Category: Lajme

Shërbimi Sekret thotë se mundësia që pati një person i vetëm i armatosur që të qëllojë tetë herë drejt ish-Presidentit Donald Trump gjatë një aktiviteti elektoral në Pensilvani ishte pjesërisht rezultat i dështimeve të shumta nga agjentët që u ishte ngarkuar detyra e mbrojtjes së ish-presidentit.

Raporti për hetimin e brendshëm të kësaj agjencie për atentatin ndaj ish-presidentit, tashmë edhe kandidat republikan për president, identifikoi probleme me komunikimin dhe koordinimin, përpara tubimit të 13 korrikut në qytetin Butler, si dhe mbështetjen e tepruar tek agjencitë partnere të zbatimit të ligjit në nivel shtetëror dhe lokal.

“Nuk mund të heqim dorë nga përgjegjësitë, apo t’ua kalojmë ato të tjerëve”, u tha gazetarëve të premten në Uashington drejtori në detyrë i Shërbimit Sekret, Ronald Rowe.

“Shërbimi Sekret nuk dha udhëzime të qarta apo orientime partnerëve tanë lokalë të zbatimit të ligjit”, tha ai. “Megjithëse disa anëtarë të ekipit pararojë ishin shumë të përpiktë, pati pakujdesi nga të tjerë, që solli thyerjen e protokolleve të sigurisë”.

Tentativa për vrasje tronditi pjesën më të madhe të Shteteve të Bashkuara dhe bëri që drejtorja e atëhershme e Shërbimit Sekret të jepte dorëheqjen.

Zyrtarët e zbatimit të ligjit kanë thënë se atentati u bë nga 20-vjeçari Thomas Matthew Crooks, i cili veproi i vetëm dhe që e konsideroi në mënyrë të papritur ish-presidentin si një objektiv të mundshëm.

Pavarësisht pranisë së truprojave që mbronin ish-Presidentin Trump, ekipeve pararojë të dislokuara dhe njësive lokale të zbatimit të ligjit, i dyshuari Crooks arriti të ngjitej në një ndërtesë me pamje nga tubimi dhe të pozicionohej me një pushkë të llojit AR, përpara se të zbulohej.

Të shtënat plagosën ish-Presidentin Trump dhe dy pjesëmarrës në tubim, si dhe vranë një të tretë.

Raporti i Shërbimit Sekret i publikuar të premten fokusohet në atë që agjencia e përshkruan si “mangësi komunikimi” në tubim, duke fajësuar agjentët se dështuan të merrnin masat që vendi dhe zonat përreth – përfshirë çatinë e ndërtesës në afërsi – të ishin të siguruara siç duhet.

Zoti Rowe tha se ndërkohë që pati diskutime me organet e zbatimit të ligjit në veçanti në lidhje me ndërtesën në fjalë, nuk pati biseda të mëvonshme për t’u siguruar që ekzistonte mbrojtja e duhur.

“Duhet të ishim më të drejtpërdrejtë”, tha ai. “U supozua se ishin marrë masat për atë godinë, por qartësisht nuk pati ndjekje në vazhdimësi për t’u siguruar për këtë gjë”.

Probleme të tjera përfshinin dështimin e Shërbimit Sekret për t’u siguruar që agjencitë lokale të zbatimit të ligjit të dinin se si të komunikonin me agjentët në terren. Për pasojë, truprojat e ish-Presidentit Trump nuk u informuan për kërkimet që po bëheshin për një person të dyshimtë.

Po të kishin qenë në dijeni, ata mund të kishin marrë një vendim për zhvendosjen e ish-presidentit në një vend më të sigurt.

Zoti Rowe u tha gazetarëve se personeli i Shërbimit Sekret që ka përgjegjësinë për mangësitë në fjalë, do të mbahet përgjegjës, por ai mohoi njoftimet se disave iu kërkua të jepnin dorëheqjen.

“Kjo agjenci zbaton disa nga ndëshkimet më të fuqishme, në tërësinë e qeverisë federale dhe këto dënime do të administrohen sipas procesit tonë disiplinor”, tha ai.

Publikimi i raportit të Shërbimit Sekret vjen më pak se një javë pas asaj që zyrtarët e kanë përshkruar si një atentat të dytë të mundshëm ndaj ish-Presidentit Trump.

Oficerët e zyrës së sherifit në Florida arrestuan 58-vjeçarin Ryan Wesley Routh, duke e ndaluar atë në një autostradë kryesore të dielën, rreth një orë pasi ai u largua nga Klubi Ndërkombëtar i Golfit Trump, në West Palm Beach.

Zyrtarët thanë se të dhënat e mbledhura nga celulari i zotit Routh treguan se ai qëndroi në pritë për 12 orë, duke u fshehur në shkurret përgjatë gardhit rrethues, ndërmjet pistës numër pesë dhe shtatë të fushës së golfit, me një pushkë të llojit SKS.

Zoti Routh u largua pa arritur të qëllojë asnjëherë, pasi një anëtar i ekipit pararojë të Shërbimit Sekret, vuri re pushkën e tij që dilte nga shkurret dhe qëlloi drejt tij disa herë.

Reagimi i agjentit “është saktësisht ajo për të cilën jemi stërvitur dhe pikërisht ajo që duam të bëjë personeli ynë”, tha zoti Rowe të premten. “Ai identifikoi rrezikun, një individ me armë të gjatë, mori vendime të shpejta dhe ndërmori një veprim të shpejtë për ta shmangur rrezikun”.

Zoti Rowe tha gjithashtu se që nga atentati i 13 korrikut ndaj ish-Presidentit Trump, Shërbimi Sekret i ka siguruar atij dhe kandidates demokrate për presidente, Nënpresidentes Kamala Harris, të njëjtin nivel mbrojtjeje si Presidentit Joe Biden.

Ai tha gjithashtu se që kur ish-Presidenti Trump u largua nga detyra, ekipet e tij të sigurisë kanë qenë “më të përforcuar se për ish-presidentët e mëparshëm”.

Por ushtruesi i detyrës së drejtorit të Shërbimit Sekret tha se nivelet e rritura të sigurisë po vijnë me një kosto, duke u kërkuar ligjvënësve amerikanë më shumë fonde dhe personel.

“Kemi burime të kufizuara”, u tha zoti Rowe gazetarëve. “Harxhojmë shumë mjete dhe burime”.

“Tashmë po i përdorim këto burime në maksimum”./VOA

Një ngjarje e rëndë ka ndodhur dje gjatë mesditës në Obiliq, ku një person i moshuar derisa po qëndronte në një kafene, nuk është ndjerë mirë dhe ka pasur nevojë për ndihmë mjekësore, shkruan Gazeta Sinjali.

Mirëpo, me të arritur në vendin e ngjarjes, ekipet mjekësore kanë konstatuar se viktima është pa shenja jete.

Rasti ka ndodhur rreth orës 12:00, ku në vendin e ngjarjes përveç ekipit mjekësor nga QMF-ja në Obiliq, kanë dalë edhe njësitet policore të cilët tashmë kanë nisur hetimet lidhur me këtë ngjarje.

Derisa shkaqet e vdekjes së të moshuarit ende nuk dihen, Policia ka bërë të ditur se trupi i pa jetë i viktimës është dërguar për obduksion.

Policia e Kosovës ka bërë të ditur se gjatë 24 orëve të fundit ka shqiptuar 2 mijë e 372 tiketa trafiku.

Gjatë kësaj periudhe janë evidentuar 21 aksidente me të lënduar dhe 33 aksidente me dëme materiale.

Në të njëjtën periudhë janë arrestuar 26 persona, prej të cilëve 12 janë në mbajtje dhe 5 persona në vuajtje të dënimit.

Grupi militant libanez Hezbollah tha më 21 shtator se një komandant i dytë i lartë ishte në mesin e 15 të vrarëve nga një sulm ajror izraelit në Bejrut një ditë më parë.

Grupi i mbështetur nga Irani tha se Ahmed Mahmud Wahbi udhëhoqi operacionet ushtarake të Forcës Radwan të Hezbollahut në mbështetje të Hamasit, të shpallur organizatë terroriste nga SHBA-ja dhe BE-ja që nga data 7 tetor e vitit të kaluar.

Në atë datë, grupi palestinez sulmoi Izraelin, duke nxitur luftën në Gaza.

Ushtria izraelite tha se sulmi ajror i saj në periferinë jugore të Bejrutit të premten eliminoi shefin e Forcës Radwan, Ibrahim Aqil, dhe disa komandantë të tjerë.

Zëdhënësi i ushtrisë izraelite, admirali Daniel Hagari, tha se sulmi në rrethinën Dahia në jug të Bejrutit e kishte në shënjestër dhe e vrau Ibrahim Akilin, komandantin e Forcës elitare Radëan të Hezbollahut, si dhe 10 operativë të tjerë të këtij grupi të shpallur organizatë terroriste ngas Shtetet e Bashkuara të Amerikës.

Akili shërbente si shef i organit më të lartë ushtarak të Hezbollahut, Këshilli i Xhihadit, dhe ka qenë i sanksionuar nga Shtetet e Bashkuara për shkak të përfshirjes në dy sulme terroriste më 1983, si pasojë e të cilave ishin vrarë mbi 300 njerëz në Ambasadën amerikane në Bejrut dhe në barakat e Marinës amerikane.

Sulmi i së premtes në Bejrut u krye gjatë orës së pikut kur njerëzit po ktheheshin nëpër shtëpi nga puna dhe fëmijët e kishin kryer mësimin. Ky ishte sulmi më vdekjeprurës në kryeqytetin e Libanit në vitet e fundit.

Më herët të premten, Hezbollah e goditi veriun e Izraelit me 140 raketa, një ditë pasi lideri i Hezbollahut, Hassan Nasrallah, u zotua për hakmarrje ndaj Izraelit për shpërthimet vdekjeprurëse të pajisjeve të telekomunikimit në Liban këtë javë.

Hezbollahu edhe Izraeli kanë këmbyer zjarr pothuajse çdo ditë prej 8 tetorit, një ditë pasi nisi lufta mes Izraelit dhe Hamasit – grupit palestinez të shpallur organizatë terroriste nga Shtetet e Bashkuara dhe Bashkimi Evropian.

Megjithatë, sulmi raketor i së premtes ishte më i madh se zakonisht.

Nasrallah u zotua të enjten për vazhdimin e sulmeve të përditshme ndaj Izraelit, pavarësisht sulmit vdekjeprurës të kësaj jave në pajisjet e komunikimit të anëtarëve të saj, raporton REL.

Rreth 30,000 njerëz në dy qytete në Japoninë qendrore janë urdhëruar të evakuohen pasi sinoptikanët paralajmëruan për përmbytje të mëdha të shkaktuara nga shirat e dendur.

Rreth 18,000 njerëz në qytetin e Wajima dhe 12,000 të tjerë në Suzu u është thënë të kërkojnë strehim në prefekturën Ishikawa, ishull Honshu.

Faqja e internetit Kyodo News ka publikuar një foto ku shihet një rrugë e tërë e përmbytur në Wajima.

Agjencia Meteorologjike e Japonisë (Jma) ka lëshuar një emergjencë me shi të dendur, niveli më i lartë i alarmit,  për disa pjesë të prefekturës.

Transmetuesi publik japonez NHK citoi zyrtarë qeveritarë të thoshin se 12 lumenj në prefekturë kishin dalë nga shtrati

Rajoni është ende duke u rikuperuar pas një tërmeti vdekjeprurës me magnitudë 7.5 në ditën e Vitit të Ri.

Kryeministri i Kosovës, Albin Kurti, e ka akuzuar Perëndimin të enjten se po e “përkëdhel” Serbinë për shkak të frikës dhe shqetësimeve për destabilizim, duke shtuar se ajo nuk po “shpaguhet” dhe se Kosova po “paguan” për këtë.

Qeveria e Kurtit është kritikuar nga disa vende të Perëndimit dhe BE-ja për një sërë vendimesh në veriun e vendit të banuar me shumicë serbe gjatë këtij viti, ku ai ka thënë se dëshiron të vendosë rend dhe ligj.

Ai tha se Perëndimi, duke qenë “shumë i kujdesshëm” me Serbinë, po bën që edhe Kosova “të paguajë për këtë dhe kjo nuk është e drejtë”.

Duke folur në një intervistë për agjencinë e lajmeve Reuters të premten, Kurti tha: “Mendoj se përkdhelja e Serbisë [nga Perëndimi] gjatë dy vjetëve e gjysmë prej se ka nisur agresioni rus në Ukrainë nuk po shpaguhet, prandaj dikush duhet të thotë mjaft”.

“Lidhjet e fuqishme të Serbisë me Federatën Ruse dhe lidhjet e thella historike, ekonomike dhe kulturore mes tyre, po e bëjnë Perëndimit të jetë shumë i kujdesshëm me Serbinë”, tha Kurti.

Serbia, për dallim nga vendet e BE-se dhe vendet e tjera të Perëndimit, nuk pranon të vendosë sanksione ndaj Rusisë për pushtimin e Ukrainës nga Moska.

Ajo vazhdon të mbajë lidhje të ngrohta me Rusinë, edhe pse ka thënë se e mbështet integritetin territorial të Ukrainës.

Ndërkohë, muajt e fundit Serbia ka nënshkruar një marrëveshje me Francën për blerjen e avionëve luftarakë në vlerë rreth 2.7 miliardë euro, si një memorandum mirëkuptimi për litium me BE-në.

“Ajo [Serbia] ka gjetur partnerë edhe në Perëndim për shkak të frikës dhe shqetësimeve që disa diplomatë i kanë se mund të ndodhë destabilizimi përsëri. Para luftës në Ukrainës kam parë disa diplomatë perëndimorë shumë të relaksuar, tani të njëjtit janë shumë të frikësuar. Mendoj se ata e kanë pasur gabim atëherë dhe e kanë gabim tani”, shtoi ai.

“Brukseli t’i bëjë trysni Serbisë”

Kurti e kritikoi Bashkimin Evropian, të cilit të dyja vendet fqinje synojnë t’i bashkohen dikur, se nuk ka reaguar ndaj “shkelje” që ka bërë Serbia.

“Brukseli duhet ta luajë rolin e gjyqtarit që i bie pipit kurdo herë që ka shkelje të Marrëveshjes”, tha Kurti, duke iu referuar Marrëveshjes Bazë që Kosova dhe Serbia e arritën nën ndërmjetësimin e BE-së në fillim të vitit 2023 për normalizimin e marrëdhënieve.

Bashkimi Evropian vazhdimisht ka kritikuar palët për moszbatimin e kësaj marrëveshjeje.

Kurti ka ngulur këmbë që marrëveshja të nënshkruhet dhe që Serbia ta tërheqë një letër që kryeministrja e atëhershme, Ana Bërnabiq, i dërgoi BE-së vitin e kaluar, ku shprehu rezerva për marrëveshjen, si dhe t’ia dorëzojë Kosovës Millan Radoiçiqin dhe grupin e tij, të dyshuar për sulmin e armatosur në Banjskë.

“Çfarë kemi parë këto dy vjet është se Brukseli nuk ka reaguar kur Beogradi e ka shkelur marrëveshjen. Ne duam që Brukseli t’i bëjë trysni Serbinë ta respektojë marrëveshjen dhe të angazhohet me vullnet të mirë dhe në mënyrë konstruktive në zbatimin e plotë të saj”, tha Kurti.

Qeveria e Kurtit e ndaloi dinarin serb, mbylli disa degë të postës serbe, si institucione paralele serbe në një sërë vendimesh gjatë këtij viti, ndërsa synon ta hapë edhe urën mbi lumin Ibër, për cfarë është kritikuar se rrezikon trazira dhe destabilitet.