Category: Lajme

Është ende e paqartë nëse republikanët apo demokratët do të pretendojnë kontrollin e Dhomës së Përfaqësuesve të SHBA-së pasi republikanët fituan Shtëpinë e Bardhë dhe kontrollin e Senatit.

Pjesa më e madhe e agjendës së presidentit të zgjedhur Donald Trump varet nëse partia e tij mund të kontrollojë Dhomën e Përfaqësuesve, duke i lejuar republikanët të kenë kontroll të unifikuar të legjislaturës federale dhe Shtëpisë së Bardhë. Siç qëndron, republikanët kanë fituar 206 vende nga 191 për demokratët.

Republikanët kanë nevojë për 12 vende për të përfunduar “Valën e kuqe” të tyre dhe për të fituar kontrollin e Dhomës së Përfaqësuesve pasi kanë mbajtur një shumicë historikisht të hollë në dy vjetët e fundit. Ata tashmë kanë të paktën 52 vende në Senatin prej 100 anëtarësh.

Demokratët, ndërkohë, përballen me një betejë të vështirë për të siguruar 27 vende për të arritur 218 të nevojshme për një shumicë në Dhomën e Përfaqësuesve.

Trump ka pretenduar një fitore të fuqishme ndaj kandidates demokrate Kamala Harris, duke tejkaluar 270 votat e Kolegjit zgjedhor të nevojshme për të fituar Shtëpinë e Bardhë. Ai u bë gjithashtu kandidati i parë republikan që fitoi votën popullore në dy dekada. Ai aktualisht ka 295 delegatë në krahasim me 226 të Harris pas zgjedhjeve të 5 nëntorit.

Shtetet Nevada dhe Arizona mbeten të padeklaruara, megjithëse të dyja priren në favor të Trump.

Trump do të inaugurohet për një mandat të dytë në Shtëpinë e Bardhë më 20 janar 2025. Harris, si zëvendëspresidente është planifikuar të mbikëqyrë ceremoninë e betimit në Kapitol. /AA

Zëvendësministri i Infrastrukturës, Hysen Durmishi është deklaruar pas aksidentit të ndodhur në Pestovë të Vushtrrisë, ku humbi jetën një i ri.

Sipas Durmishit, menjëherë pas rastit kanë kërkuar një raport nga punëkryesi dhe kompania mbikëqyrëse, ku sipas tij, në bazë të raportit konstatohet se në rrugë ekziston sinjalistika e nevojshme dhe aksidenti ka ndodhur në pjesën e rrugës ku ka qenë i ndaluar komunikacioni.

“Së pari ju shprehim ngushllimet tona të sinqerta familjarëve me rastin e humbjes së jetës së familjarit të tyre. Në projektin e rrugës Milloshevë – Mitrovicë përveç kontraktorit e kemi të angazhuar edhe një kompani konsulente e cila bënë mbikqyrjen e punimeve dhe kujdesen për mbarëvajtjen e punimeve dhe për sigurinë në punishte. Menjëherë pas rastit kemi kërkuar një raport nga punëkryesi dhe kompania mbikqyrëse. Në bazë të këtij raporti konstatohet se në rrugë egziston sinjalistika e nevojshme dhe aksidenti ka ndodhur në pjesë e rrugës ku ka qenë i ndaluar komunikacioni”, ka shkruar Durmishi.

“Megjithatë, me rastin po merret policia e Kosovës dhe po presim raportin zyrtar të tyre. Me këtë rast ftojmë policinë e Kosovës dhe institucioneve të drejtësisë që ta trajtojnë rastin me prioritet që sa më parë të zbardhen arsyet e aksidentit. Me këtë rast ftojmë të gjithë pjesëmarrësit në komunikacion që të lëvizin me kujdes në vendet ku zhvillohen punimet dhe të respektojnë rregullat e komunikacionit dhe sinjalistukën në vendëpunishte”, ka shkruar tutje Durmishi.

Ministrja e Jashtme finlandeze, Elina Valtonen u kërkoi sot liderëve evropianë të forcojnë sigurinë e saj pas fitores së Donald Trump në zgjedhjet presidenciale në SHBA.

“Evropa duhet dhe do të bëjë më shumë për sigurinë e saj. Ne jemi në rrugën e duhur, sigurisht në krahasim me mandatin e mëparshëm të Trump, “tha Valtonen në platformën X.

Ajo bëri thirrje për më shumë bashkëpunim dhe tregti përtej Atlantikut, “jo më pak”.

“Ju nuk vendosni tarifa ndaj miqve dhe aleatëve tuaj, gjë që jo vetëm i dobëson ata, por edhe veten tuaj”, tha ministrja.

Në lidhje me Ukrainën, Valtonen theksoi se nuk duhet të ketë negociata pa rënë dakord nga Kievi për ndonjë plan paqeje.

“Nuk ka negociata për Ukrainën pa Ukrainën”, theksoi ajo, duke shtuar se Finlanda është plotësisht e përkushtuar për të forcuar më tej lidhjet transatlantike dhe botën e lirë.

Me ish-presidentin Donald Trump të vendosur për të rimarrë presidencën e SHBA-së, udhëheqësit në mbarë botën, duke përfshirë aleatët evropianë të brezave të vjetër, të mërkurën e uruan atë për mandatin e tij të dytë jo të njëpasnjëshëm në Shtëpinë e Bardhë.

Gjatë fushatës së tij, Trump u zotua se do t’i jepte fund luftës në Ukrainë “brenda një dite”, duke rritur frikën midis aleatëve evropianë dhe të NATO-s se Rusia do të përfundonte me përfitime territoriale.

Ai gjithashtu deklaroi në disa raste se Evropa duhet të paguajë për sigurinë e saj në vend që të presë që Uashingtoni ta shpëtojë atë.

Të enjten, liderët e BE-së u mblodhën për një samit në Budapest, kryeqyteti i Hungarisë, ku zgjedhjet presidenciale të SHBA dominuan diskutimet. /AA

Presidenti turk Rexhep Tajip Erdogan dhe homologu qipriot Nikos Christodoulides u takuan në margjinat e një samiti në Hungari të enjten, thanë zyrtarët qipriotë.

Ky ishte një takim i rrallë dhe i pazakontë midis armiqve tradicionalë, shkruan agjencia britanike Reuters.

I pranishëm ishte edhe ministri i Jashtëm i Turqisë, Hakan Fidan, ndërsa më pas iu bashkuan Kyriakos Mitsotakis dhe Edi Rama, kryeministrat përkatësisht të Greqisë dhe Shqipërisë, tha zëvendës zëdhënësi i qeverisë qipriote, Yiannis Antoniou në një postim në X.

Takimi nuk ishte i planifikuar.

Takimet mes liderëve të Turqisë dhe Qipros ndodhin rrallë dhe janë pothuajse gjithmonë rastësisht.

Të dyja vendet nuk kanë marrëdhënie diplomatike, si pasojë e një konflikti të ashpër prej dekadash dhe ndarjes së ishullit midis grekëve dhe turqve qipriotë.

Fotot e publikuara nga takimi treguan Erdoganin dhe Christodoulides me zyrtarë të tjerë të ulur rreth një tavoline të ulët kafeje në një sallë konferencash.

Në Athinë, zyrtarët thanë se diskutimi u përqëndrua në zgjedhjet presidenciale të SHBA-ve dhe zhvillimet ndërkombëtare.

Një 37 vjeçar dyshohet se është vrarë sot. Lajmin e konfirmoi zëdhënësi i Policisë për rajonin e Gjilanit.

Pak më parë, Prokuroria atje ka lëshuar një njoftim ku thuhet se prokurori kujdestar ka dalë në vendin e ngjarjes.

“Prokuroria Themelore në Gjilan, ju njofton se gjatë ditës së sotme, më datë 7 nëntor 2024, në rrugën ‘’Mërgimtarët e Gjilanit’’, në Gjilan, rreth orës 14h, një person është gjetur pa shenja jete.”

Prokuroria thotë se viktima dyshohet se është qëlluar me armë zjarri.

“Prokurori kujdestar nga Departamenti për Krime të Rënda dhe njësitet tjera relevante menjëherë kanë dalë në vendin e ngjarjes, ku nga hetimet e para dyshohet se viktima është qëlluar me armë zjarri dhe me urdhër të prokurorit trupi i pa jetë është dërguar për autopsi në Institutin e Mjekësisë Ligjore.”

“Prokuroria Themelore në Gjilan, në koordinim me Policinë e Kosovës – Njësinë e Hetimeve Rajonale në Gjilan, janë duke ndërmarrë të gjitha veprimet hetimore, në mënyrë që të identifikohen personat e dyshuar. Për të gjitha veprimet e tjera do të jeni të njoftuar me kohë!”

Policia e Kosovës sot në Gjilan, pas sigurimit të dëshmive dhe urdhëresës për bastisje, ka realizuar një kontroll/bastisje në shtëpinë dhe objektet përcjellëse të të dyshuarit për shitblerjen e substancave narkotike.

Gjatë bastisjes së shtëpisë dhe objekteve përcjellëse, në cilësi të provave materiale, janë gjetur dhe janë sekuestruar 632 gramë substancë marihuanë, e ndarë për shitje, si dhe një peshore për matjen e narkotikëve.

Në konsultim me prokurorin e shtetit, të dyshuarit i është caktuar masa e ndalimit policor për 48 orë, ndërsa rasti i cilësuar blerja, posedimi, shpërndarja dhe shitja e paautorizuar e narkotikëve, substancave psikotrope dhe analoge.

Prokuroria Themelore në Ferizaj njofton se ka kërkuar nga Gjykata Themelore në Ferizaj, caktimin e masës së paraburgimit në afat prej 30 ditësh ndaj të dyshuarit E.T., për shkak të dyshimit të veprës penale “Blerja, posedimi, shpërndarja dhe shitja e paautorizuar e narkotikëve, substancave psikotrope dhe analoge” sipas Kodit Penal të Republikës së Kosovës.

“Sipas Prokurorisë, ekziston dyshimi i bazuar se i pandehuri E.T., në shtëpinë e tij në fshatin Bërnicë e Poshtme, komuna Prishtinë, me qëllim të shitjes apo shpërndarjes, ka poseduar dhjetë kilogramë e tetëqindë e pesdhjetë e një gram (10.851) gram substancë narkotike e llojit marihuanë, e cila më 06 nëntor 2024, gjatë kontrollit të shtëpisë dhe objekteve përcjellëse sipas Urdhëresës së Gjykatës, të njëjtit i’u është gjetur dhe sekuestruar, me çka kreu veprën penale “Blerja, posedimi, shpërndarja dhe shitja e pa autorizuar e narkotikëve, substancave psikotrope dhe analoge” nga neni 267 paragrafi 1 të KPRK-së”, thuhet në njoftim.

I pandehuri që nga data 6 nëntor 2024, me vendim të Prokurorit të Shtetit gjendet nën masën e ndalimit 48 orësh për veprën penale të lartëcekur.

Zgjedhja e Donald Trump president për mandatin e dytë të Shteteve të Bashkuara të Amerikës (SHBA), pritet të ketë ndikime pozitive në proceset ekonomike të Kosovës. Kështu vlerësojnë njohës të ekonomisë, të cilët shprehin optimizëm se mund të riaktivizohet marrëveshja për normalizim ekonomik e cila ishte nënshkruar nga ish-kryeministri i Kosovës, Avdullah Hoti dhe presidenti i Serbisë, Aleksander Vuçiq, në prani të presidentit të SHBA-ve, Donald Trump në Shtëpinë e Bardhë.

Kryetari i Odës Ekonomike Amerikane në Kosovë, Arian Zeka thotë për KosovaPress se gjatë mandatit të parë të Trump, fokusi ka qenë tek normalizimi ekonomik mes Kosovës dhe Serbisë, pasi kjo sipas tij ndikon në tërheqjen e investimeve. Derisa Zeka beson se ky do të mbetet një prioritet edhe pas vitit 2025, pas ardhjes sërish në pushtet të këtij të Trump.

“Duke pasur parasysh që gjatë administratës së parë të tij një rendësi e madhe i është dhënë aspektit të normalizimit ekonomik ndërmjet Kosovës dhe Serbisë gjithmonë me synimin që të zgjidhet kjo çështje e cila në një mënyrë ose tjetër pengon edhe tërheqjen e investimeve amerikane dhe investimeve tjera të huaja, atëherë pashmangshëm që pres që ky do të jetë edhe fokusi pas janarit të vitit 2025. Pra, pas ardhjes sërish në pushtet ose marrjes së mandatit të ri nga ana e presidentit Trump”, thotë Zeka.

Ndërsa, ai thekson se vazhdojnë të mirëpresin marrëveshjen e vitit 2020, i cili thotë se ka dispozita të mira të cilat qojnë në një zgjidhje gjithëpërfshirëse e cila do të përfundonte me njohjen e Kosovës nga ana e Serbisë.

“Oda Ekonomike Amerikane në mënyrë të vazhdueshme përgjatë këtyre katër viteve të fundit i ka bërë thirrje Qeverisë së Republikës së Kosovës që të fokusohet në zbatimin e marrëveshjes për normalizim ekonomik ndërmjet Kosovës dhe Serbisë të 4 shtatorit të vitit 2020, fatkeqësisht as interesi i Qeverisë së Kosovës, rrjedhimisht pastaj as i akterve tjerë nuk ka qenë në zbatimin e dispozitave të kësaj marrëveshje. Por, ne e patëm mirëpritur marrëveshjen në vitin 2020, dhe akoma besojmë që marrëveshja ka dispozita të mira të cilat do të ndihmonin që përmes normalizimit ekonomik të dyja shtetet dhe Kosova dhe Serbia të arrinin të zgjidhnin edhe problemet tjera të cilat i kanë, të cilat mundësojnë ose qojnë në një zgjidhje gjithëpërfshirëse e cila do të përfundonte me njohjen e Kosovës nga ana e Serbisë”, nënvizon Zeka.

Edhe njohësi i çështjeve juridike, Florin Lata thotë se ka mundësi që marrëveshja e 2020 të riaktivizohet, nëse ka vullnet nga SHBA-të, presidenti Trump.

“Është e mundshme që të riaktivizohet, sepse, nuk ka pas ndonjë zhvillim të madh i cili mund të ketë ndikim, që ajo marrëveshje të konsiderohet e pavlefshme. Pra, nëse do të ekzistojë një vullnet nga SHBA-të, presidenti Trump, besoj se do të ulën sërish në tavolinë. Përfshirja e SHBA-ve në mënyrë direkte do të ketë efekt më pozitiv dhe përshpejtues për gjetjen e një zgjedhje të përhershme me Serbinë”, shprehet Lata.

Ndërsa, thotë se zgjedhja e Donald Trump si president i SHBA-ve pritet të ndikojë në ekonominë e vendit.

“Sigurisht se një pjesë e madhe e investimeve të cilat vinë në Kosovë janë edhe nga ShBA-të dhe ndihma të cilën japin përmes programeve ka një ndikim pozitiv. Pra, vet Gjykata Komerciale është themeluar mbi bazën e një ndihme të madhe të programeve të USAID-it. Prandaj sigurisht që mund të ketë ndikim. Shpresojmë që ndihma amerikane nuk do të ndalet”, thotë Lata.

Në anën tjetër, njohësi i ekonomisë, Mustafë Kadrijaj po ashtu thotë se me presidentin Trump pritet të ketë ndikim edhe në ekonominë e vendit.

“Shenjat e para ekonomike më të marrë lajmin për fitoren e Trump ishin në nivel botëror si tek ulja e çmimeve të derivateve, tek fuqizimi i dollarit e po ashtu edhe tek tregjet financiare. Kjo është në nivel global, dhe padyshim se e ka impaktin edhe në nivel rajonal, dhe në Kosovë. Ndërsa, në nivel të Kosovës, kur flasim për impakt ekonomik, ka mundësi të ndikojë në temat e lartëpërmendura…Ndërsa, kur flasim për marrëveshjet e 2020, vlerësoj se ato të cilat kanë interes ekonomik, vlerësoj se janë të mirëseardhura për shtetin e Kosovës, dhe asgjë nuk do të ishte dëm të jetesoheshishin”, thotë Kadrijaj.

Kandidati i republikanëve në zgjedhjet presidenciale Donald Trump, është shpallur presidenti i 47-të i Shteteve të Bashkuara duke siguruar rreth 276 vota të Kolegjit Elektoral.

Në garën e 5 nëntorit ishin demokratja Kamala Harris, aktualisht zëvendëspresidente e Amerikës dhe republikani Donald Trump, i cili ishte president nga viti 2017 deri më 2021.

Ndërkaq, fitoren e Trumpit e kanë përshëndetur lider botërorë. Edhe në Kosovë Trumpi u urua nga liderë institucional e partiak.

Kosova ka gëzuar përkrahjen e SHBA-së, ndër vite, pavarësisht kush ka qenë në krye të saj.

Marrëveshja e 4 shtatorit të vitit 2020:

Ish-kryeministri i Kosovës, Avdullah Hoti dhe presidenti i Serbisë, Aleksandar Vuçiq, kanë nënshkruar në më 4 shtator të vitit 2020 marrëveshje për normalizim ekonomik në Shtëpinë e Bardhë, në prani të presidentit të Shteteve të Bashkuara, Donald Trump.

Pikat e përmbajtjes së marrëveshjes së nënshkruar nga pala kosovare:

Të dyja palët do të zbatojnë marrëveshjen për autostradën Beograd-Prishtinë, të nënshkruar më 14 shkurt, 2020.

Të dyja palët do të zbatojnë marrëveshjen e hekurudhave Beograd-Prishtinë të nënshkruar më 14 shkurt, 2020. Për më tepër, të dyja palët do t’i përkushtohen një studimi të fizibilitetit për mundësitë e lidhjes së infrastrukturës hekurudhore Beograd-Prishtinë me një port në det të thellë në Adriatik.

Kosova (Prishtina) dhe Serbia (Beogradi) do të punojnë me Korporatën Ndërkombëtare të SHBA-së për Zhvillim Financiar dhe EXIM, në memorandumet e mirëkuptimit, për të operacionalizuar këto:

-Autostradën e paqes

-Lidhjen hekurudhore Prishtinë-Merdare

-Lidhjen hekurdhore Nish-Prishtinë

-Sigurimin e financave për mbështetjen e kredive që kërkohen për ndërmarrjet e vogla dhe të mesme

-Projekte shtesë dypalëshe

-Prani e plotë ndërkombëtare në Beograd, Serbi, e Korporatës Ndërkombëtare të SHBA-së për Zhvillim Financiar.

Të dyja palët do të hapin dhe operacionalizojnë objektin në pikëkalimin e përbashkët kufitar Merdare.

Të dyja palët do t’i bashkohen “zonës së mini-Schengenit”, të shpallur nga Serbia, Shqipëria dhe Maqedonia e Veriut në tetor të vtit 2019 dhe do t’i shfrytëzojnë plotësisht përfitimet nga ajo.

Të dyja palët do t’i njohin diplomat dhe certifikatat profesionale të njëra-tjetrës.

Të dyja palët do të pajtohen të punojnë me Departamentin amerikan të Energjisë dhe subjektet e tjera të Qeverisë amerikane në një studim fizibiliteti, me qëllim të pëërdorimit të përbashkët të Liqenit të Ujmanit, si furnizues i sigurt i ujit dhe energjisë.

Të dyja palët do të shumëfishojnë burimet e tyre të energjisë.

Të dyja palët do të ndalojnë përdorimin e pajisjeve 5G, të siguruara nga shitës të pabesueshëm, në rrjetet e tyre të komunikimit. Aty ku tashmë ka pajisje të tilla, të dyja palët angazhohen për heqjen e tyre dhe përpjekje tjera të ndërmjetësimit në kohën e duhur.

Të dyja palët do të rrisin kontrollin e pasagjerëve ajrorë, ndarjen e informacioneve midis njëra-tjetrës dhe brenda kornizës së përgjithshme të bashkëpunimit me SHBA-në në Ballkan, dhe do të angazhohen për përditësime teknologjike, për të luftuar aktivitetet keqdashëse, duke zbatuar dhe operacionalizuar sistemet e siguruara nga SHBA-ja, për kontroll dhe informacion, përfshirë: PISCES, APIS, ATS-G dhe SRTP.

Të dyja palët zotohen se do të mbrojnë dhe promovojnë liritë fetare, duke përfshirë edhe rifillimin e komunikimit ndërfetar, mbrojtjen e vendeve fetare dhe zbatimin e vendimeve gjyqësore, që janë të lidhura me Kishën Ortodokse Serbe, si dhe vazhdimin e kthimit të pronave pa trashëgimi nga periudha e Holokaustit, si dhe të pronave hebreje që nuk i ka kërkuar askush.

Të dyja palët zotohen të përshpejtojnë përpjekjet që të lokalizojnë dhe identifikojnë mbetjet e personave të humbur. Të dyja palët angazhohen që të identifikojnë dhe implementojnë zgjidhje të gjata dhe të qëndrueshme për refugjatët dhe personat e zhvendosur brenda vendit. Të dyja palët angazhohen që të përcaktojnë një pikë kontakti, që do t’i udhëheqë këto përpjekje brenda ministrive të tyre respektive dhe do t’i koordinojë këto përpjekje mes Beogradit dhe Prishtinës, si dhe do t’i përditësojë të dhënat për numrin e rasteve të zgjidhura dhe ato që janë në proces, çdo vit./

Sekretarja e Përgjithshme e Partisë Demokratike të Kosovës (PDK), Vlora Çitaku, në një intervistë për Ekonomia Online ka thënë se marrëdhëniet mes Kosovës dhe Shteteve të Bashkuara të Amerikës (SHBA) nuk varen vetëm nga kush është në Shtëpinë e Bardhë, por edhe kush i udhëheq institucionet e Kosovës.

Për këtë, ajo ka bërë thirrje që bartësit e institucioneve të Kosovës dhe eksponentët e lartë politik të kenë gjuhën shumë më të kalibruar, pas zgjedhjeve të fundit në ShBA ku Donald Trump u zgjodh presidenti i 47-të i Amerikës.

Çitaku ka theksuar se institucionet e Kosovës duhet që të angazhohen fuqimisht në përforcimin e misionit diplomatik në Washington, i cili sipas saj është lënë me dy-tre diplomat.

Ajo ka shtuar se Kosova nuk duhet të lihet në harresë nga administrata Trump, por një gjë të tillë e quan të mundur “vetëm nëse Kosova është pro aktive dhe në Washington imponohet si zgjidhje, jo si problem”.

“Zgjedhjet në SHBA përcillen me shumë kuriozitet në mbarë globin, kjo për shkak të relevancës politike ushtarake, ekonomike të SHBA-së dhe është e natyrshme që njerëzit të kenë preferenca për kandidatët në garë. Megjithatë, bartësit e institucioneve të Kosovës, eksponentë e lartë politik duhet ta kenë gjuhën shumë më të kalibruar. Ne duhet që të jemi shumë më të kujdesshëm, një administratë e re e presidentit Trump, sigurisht që do të rishikoj listën e prioriteteve. Është e rëndësishme që Kosova, institucionet e Kosovës, të angazhohen fuqimisht në përforcimin e misionit tonë diplomatik në Washington, i cili është lënë me dy tre diplomat. Duhet të trokasim në çdo derë, duhet të fuqizojmë raportet dhe të krijojmë miqësi të reja. Kosova nuk duhet të lihet në harresë nga administrata Trump dhe një gjë e tillë është e mundur vetëm nëse ne jemi pro aktiv dhe në Ëashington imponohemi si zgjidhje, jo si problem. Unë nuk i frikësohem asnjëherë Shtëpisë së Bardhë, nga Shtëpia e Bardhë, Kosovës gjithmonë i kanë ardhur vetëm lajme të mira”, ka thënë ajo.

Çitaku ka thënë se si administrata Republikane edhe ato Demokrate në SHBA, historikisht kanë qenë në mbështetje të fuqizimit të subjektivitetit ndërkombëtar të Kosovës, sipas saj, njohja e fundit ndaj Kosovës si dhe vendimi për ndryshimin e mandatit të FSK-së në ushtri, ka ardhur pikërisht në kohën e administratës së Presidentit Trump.

“Tradicionalisht në tri dekadat e fundit politka e jashtme amerikane në raport me Ballkanin perëndimor dhe me Kosovën në veçanti është karakterizuar nga konsistenca. Edhe administrata Republikane edhe ato  Demokrate kanë qenë në mbështetje të fuqizimit të subjektivitetit ndërkombëtar të Kosovës dhe orientimi i tyre strategjikë ka qenë identik, integrimi i kësaj pjese të Evropës në familjen euro-atlantike. Ajo çfarë ka dalluar ndonjëherë është nuanca, gjuha, tempoja dhe shpejtësia e implementimit të planeve apo projekteve. Në dekadën e fundit në fakt administrata kur është udhëhequr nga presidentet demokrat, po ashtu është karakterizuar me një koordinim më të ngushtë me partneret evropian. Tani kemi një presidencë të dytë të Trump. Ne duhet të kujtojmë që njohja e fundit Kosovës i ka ardhur pikërisht në kohën e administratës së Presidentit Trump, nga Izraeli. Si dhe vendimi për ndryshimin e mandatit të FSK-së në ushtri është bërë gjatë asaj periudhe. Raportet mes Kosovës dhe ShBA-së nuk diktohen vetëm nga kush është në Shtëpi të Bardhë, por edhe kush i udhëheq institucionet e Kosovës”, ka thënë ajo.

Çitaku është shprehur se raportet ndërmjet Kosovës dhe SHBA-ve patën arritur një nivel që nuk është parë më herët, sipas saj si shkak i “sjellëve të papërgjegjshme të kryeministrit Kurti”.

Ajo ka shtuar se në Kosovë duhet të përqendrohemi në zgjedhjet e 9 shkurtit, kjo si shprehet Çitaku “natyra e raporteve të Kosovës me SHBA-të e BE-në varet në masë të madhe edhe nga udhëheqësit e institucioneve të Kosovës”.

“Në katër vitet e fundit në ShBA ka qenë Joe Biden, i cili deri në detaje është i familjarizuar me çështjen e Kosovës. Përkundër kësaj për shkak të sjelljes së papërgjegjshme të kryeministrit Kurti, të institucioneve të Kosovës, raportet mese Kosovës dhe SHBA-ve patën mbërri një nivel të cilin nuk e kemi parë më herët. Pra, ne në Kosovë duhet të përqendrohemi në zgjedhjet tona që i kemi me 9 shkurt sepse natyra e raporteve të Kosovës jo vetëm me SHBA-të, por edhe me BE-në varet në masë të madhe edhe nga udhëheqësit e institucioneve të Kosovës”, ka thënë ajo.

“Raportin mesë Kosovës dhe SHBA-së nuk duhet që të reduktohet vetëm në çështjen e dialogut mesë Kosovës dhe Serbisë. Kosova duhet që të jetë shumë me aktive, shumë me insistuese që të sjell investitor amerikanë. Ju kujtoj që kjo qeveri, patë hequr dorë nga një projekt shumë i rëndësishëm ai i Gaz përçuesit i cili do të ndikonte besoj unë pozitivisht edhe në fuqizimin e raporteve mesë Kosovës dhe SHBA-ve”, ka thënë ajo.

Donald Trump është zgjedhur presidenti i 47-të i Shteteve të Bashkuara të Amerikës.

Trump do të rikthehet në Shtëpinë e Bardhë, pas fitores ndaj demokrates, Kamala Harris, e cila nuk ia doli të bëhej presidentja e parë grua në Amerikë. Republikani Trump 78-vjeçar, ka siguruar votat e 270 anëtarëve të Kolegjit Elektoral, aq sa ishin të nevojshme për t’u bërë president.

Trumpi e ka shpallur fitoren dhe ka paralajmëruar lidership të fuqishëm të Shteteve të Bashkuara të Amerikës. Donald Trump ka qenë president i SHBA-së nga viti 2017 deri më 2021.