Category: Lajme

Presidenti i ri i Këshillit Evropian, Antonio Costa, është deklaruar rreth zhvillimeve politike, e ndër të tjera edhe për dialogun Kosovë – Serbi dhe aplikimit për marrjen e statusit të kandidatit për Kosovën.

Kjo çështje nuk është trajtuar asnjëherë, me arsyetimin se ekzistojnë implikime politike për shkak të pesëshes mosnjohëse, por gjërat sipas tij mund të ndryshojnë sapo të ketë përparim në procesin e dialogut.

“Më e rëndësishmja është të vazhdohet me reformat në Kosovë. Të ketë zbatim të plotë të zotimeve nga ana e Kosovës, sepse e gjithë kjo ndihmon.

Ndërsa konkretizimi i detyrimeve nga dialogu mes Beogradit dhe Prishtinës është esencial për të krijuar kushte për të ecur përpara”, deklaroi Costa.

Vetëm dy ditë pas marrjes së detyrës, ai i kishte takuar liderët e Ballkanit Perëndimor.

Samiti i parë që do të kryesojë, për koincidencë, do të jetë pikërisht ai me vendet e rajonit, që do të mbahet më 18 dhjetor.

Antonio Costa premton se zgjerimin do ta ketë prioritet gjatë mandatit të tij në krye të Këshillit të BE-së.

Kosovën në këtë samit do ta përfaqësojë presidentja e vendit, Vjosa Osmani, ndërsa Serbinë Aleksandar Vuçiq.

Do të jetë ky edhe një rast ku 27 liderët e Bashkimit Evropian do të konfirmojnë përkushtimin se gjashtë vendet e rajonit do të kenë vendin e tyre në familjen evropiane.

Kryeministri Edi Rama do të kryesojë delegacionin shqiptar, në konferencën e tretë ndërqeveritare me Bashkimin Evropian, e cila pritet të mbahet sot në Bruksel.

Shqipëria do të hapë negociatat për klasterin e 6-të “Marrëdhëniet me Jashtë”, që përfshijnë politikën e jashtme, të sigurisë dhe të mbrojtjes.

Ky grup kapitull parashikohet të përmbyllet më shpejt në negociata edhe për shkak se Shqipëria ka qenë në të njëjtën linjë me politikën e jashtme të BE-së, kryesisht në vendosjen e sanksioneve ndaj Rusisë pas agresionit në Ukrainë apo edhe për çështje të tjera që lidhen me sigurinë e kontinentit evropian apo me politikën e jashtme të tij, përfshirë edhe qëndrimin për konfliktin në rripin e Gazës.

Kjo konferencë e tretë ndërqeveritare do të jetë e dyta gjatë presidencës hungareze, pas asaj të mbajtur në Luksemburg më 15 tetor, ku Shqipëria hapi pesë kapitujt e anëtarësimit ose “Themeloret” që përfshinin Gjyqësorin dhe të Drejtat Themelore, Drejtësinë, Prokurimet, Statistikat, Sigurinë dhe Kontrollin Financiar.

Kandidati i Lidhjes Demokratike të Kosovës për deputet, Izet Sadiku tha në emisionin “Compass” të ATV-së, se ndërtimi i qendrës së re spitalore, do të kushtoj 500 milionë euro.

Sadiku tha se investimet në Qendrën Klinike dhe Universitare duhet të ndalen.

“Spitali do të kushtojë 500 milionë euro…QKUK-ja, do të mbyllet pas hapjes së spitalit të ri, por investime në QKUK nuk do të ketë më. Krijimi i një qendre të re spitalore do të krijoj mundësi dhe parakushte që këto 100 milionë euro që shkojnë jashtë vendit, ne t’i ndalim në Kosovë. Nuk është rrugë e duhur të bëhen investime të përkohshme duke bërë renovime. Unë mendoj se duhet të bëhet një qendër e re dhe ne do të meremi me fillimin e ndërtimit të një qendre të re”, potencoi Sadiku në emisionin “Compass” të ATV-së.

Drejtori i shëndetësisë në Prishtinë, njëherësh kandidati për deputet i Lidhjes Demokratike të Kosovës, Izet Sadiku tha se numri i shërbimeve mjekësore është rritur ndjeshëm në komunën Prishtinës, prej se ky është në krye të drejtorisë së shëndetësisë.

“Kur kemi filluar ne i kemi rreth 3 milionë shërbime i kemi për tri vjet më shumë, që i bie shumë më shumë kemi rritje të shërbimeve se sa vizita mjekësore. Nuk kemi qytetar më të sëmuar, por kemi shërbime shumë më shumë”, tha Sadiku në emisionin “Compass” të ATV-së.

Listës esenciale të produkteve mjekësore i janë shtuar edhe shtatë produkte të reja për trajtimin e kancerit të gjirit dhe melanomës, kancerit agresiv të lëkurës.

Këtë e ka bërë të ditur ministri i Shëndetësisë, Arben Vitia.

“Kam nënshkruar përditësimin e fundit të listës esenciale të produkteve mjekësore dhe materialit shpenzues. U shtuan: 7 produkte të reja bashkëkohore për trajtimin e kancerit të gjirit dhe melanomës, kancerit agresiv të lëkurës. U shtua – Materiali shpenzues për shërbimin e ri të STROKE, i cili shpëton jetën e pacientëve me sulm në tru dhe dëmtime të enëve të gjakut në tru”, ka shkruar Vitia në Facebook.

Vitia shprehet se kjo u arrit falë buxhetit prej 70 milionë euro për barnat esenciale.

“Buxheti më i madh ndonjëherë”, është shprehur Vitia tutje.

“Ky është përditësimi i nëntë brenda 19 muajve. Në vitin 2025, do të vazhdojmë ta përditësojmë më tej listën me produkte të reja për qytetarët tanë. Së shpejti punë e veprime edhe për parandalimin e sëmundjeve”.

Rruga magjistrale Prishtinë – Pejë, në segmentin Kijevë – Dollc, do të bllokohet përkohësisht ditën e mërkurë, për shkak të punimeve që përfshijnë minimimin e pestë të masave shkëmbore në këtë zonë.

Sipas njoftimit, qarkullimi i trafikut do të ndërpritet plotësisht në segmentin nga udhëkryqi i Gjakovës në Klinë deri tek udhëkryqi i rrugës për Gjurgjevik.

Ndërprerja do të zgjasë nga ora 15:00 deri në pastrimin dhe hapjen e rrugës.

Autoritetet përgjegjëse kërkojnë mirëkuptimin e qytetarëve gjatë kësaj periudhe dhe falënderojnë për bashkëpunimin.

Inspektorët e Inspektoratit Qendror të Mbikëqyrjes së Tregut kanë mbyll përkohësisht 34 qendra masazhi dhe lokale me muzikë nate në tërë territorin e Kosovës, për shkak të mos regjistrimit të bizneseve, si dhe mungesës së pëlqimit/aktvendimit për plotësimin e kushteve minimale teknike.

Akioni i përbashkët i Inspektoratit të Tregut në kuadër të Ministrisë së Industrisë, Ndërmarrësisë dhe Tregtisë, në bashkëpunim më Policinë e Kosovës, përkatësisht Drejtorinë e Hetimit të Trafikimit me Njerëz, dhe me inspektorët nga ATK, kanë realizuar një aksion të gjerë inspektimi tek operatorët ekonomikë, që ushtrojnë veprimtari tregtare – aktivitete të mirëmbajtjes trupore qendra masazhi dhe aktivitete tjera të argëtimit dhe rekreacionit (muzikë nate).

“Aksioni i përbashkët ka rezultuar me inspektimin e 126 subjekteve ekonomike, përkatësisht 69 operatorë ekonomikë, të cilët ushtrojnë veprimtari tregtare – aktivitete të mirëmbajtjes trupore (qendra masazhi) dhe 57 operatorë ekonomikë, që ushtrojnë veprimtari tregtare, aktivitete tjera të argëtimit dhe rekreacionit (muzikë nate). Inspektorët e Inspektoratit Qendror të Mbikëqyrjes së Tregut konform kompetencave ligjore kanë bërë mbyllje të përkohshme të 34 operatorëve ekonomikë në tërë territorin e Republikës së Kosovës, për shkak të mos regjistrimit të bizneseve, si dhe mungesës së pëlqimit/aktvendimit për plotësimin e kushteve minimale teknike”, thuhet në njoftimin e Ministrisë së Industrisë, Ndërmarrësisë dhe Tregtisë.

Më tej bëhet e ditur se ndaj operatorëve ekonomikë, që ushtronin veprimtarinë e tyre në kundërshtim me ligjin, janë shqiptuar 45 masa ndëshkuese sipas legjislacionit në fuqi.

Për më tepër thuhet se Inspektorati Qendror i Mbikëqyrjes së Tregut, konform kompetencave ligjore që ka, do t’i vazhdojë inspektimet edhe ditëve në vijim dhe nëse konstatohen shkelje do të ndërmerren masa për ndalim të ushtrimit të veprimtarisë si dhe masa të tjera ndëshkuese sipas legjislacionit aktual në fuqi.

Policia e Kosovës ka arrestuar 21 persona si të dyshuar për “marrje me prostitucion” ose siç njihen ndryshe “Eskorta”.

Po ashtu në aksionin e gjerë te policisë, janë arrestuar edhe 7 femra për veprën penale “‘keqtrajtim apo braktisje e fëmijës’.

“Inicimi i 7 rasteve për veprat penale ‘keqtrajtim apo braktisje e fëmijës’, ku janë arrestuar 7 femra të dyshuara si dhe janë identifikuar 7 fëmijë lëmoshë kërkues”, thuhet në njoftimin e policisë.

Njoftimi i plotë:

Policia e Kosovës, në vazhdën e angazhimeve të saj sipas autorizimeve ligjore, me synim arritjen e rezultateve sa më profesionale në identifikimin dhe trajtimin e veprave penale dhe dukurive të tjera negative, ka zhvilluar planin operativ “Ditët e veprimit të përbashkët “JAD SEE 2024 ”, i cili ka rrjedhur si planifikim dhe aktivitet i EMPACT-it, në të cilin përveç Kosovës, kanë marrë pjesë edhe shumë shtete tjera si: Shqipëria, Mali i zi, Maqedonia e Veriut, Kroacia, Bosnjë e Hercegovina, Serbia, Moldavia, Ukraina, Rumania, Bullgaria, Spanja, Franca, si dhe përfaqësues nga EUROPOL-i, FRONTEX-i si dhe INTERPOL-i.

Bazuar në planin e përgatitur, Policia e Kosovës, përkatësisht Drejtoria për Hetimin e Trafikimit me Njerëz, DHTNJ, ka ndërmarrë veprimet siç janë:

operacione në rrugë, sheshe dhe qendra tregtare për identifikim të fëmijëve në situatë rruge si viktima të mundshme të trafikimit, operacione të përbashkëta me inspektorë të MINT-it, ATK-së dhe inspektorë të punës në inspektimin/kontrollimin e lokaleve, plani taktik lidhur me eskorta.

Gjatë planit operativ kanë qenë të angazhuar edhe njësi tjera mbështetëse të Policisë së Kosovës si dhe i tërë plani është realizuar në bashkëpunim me inspektorë nga MINT-i, inspektorë të ATK-së, inspektorë nga Inspektorati Qendror i Punës dhe inspektorë komunalë dhe ky bashkëpunim ka rezultuar me aktivitetet si në vijim:

Inspektimi/kontrollimi i 125 lokaleve të llojeve të ndryshme në tërë territorin e Republikës së Kosovës.

Inicimi i 7 rasteve për veprat penale ‘keqtrajtim apo braktisje e fëmijës’, ku janë arrestuar 7 femra të dyshuara si dhe janë identifikuar 7 fëmijë lëmoshë kërkues.

Gjithashtu janë iniciuar edhe 10 raste ‘marrje me prostitucion’ të identifikuara si ESKORTA, ku janë arrestuar 21 të dyshuar.

Gjatë këtij plani janë sekuestruar gjithsej 73 dokumente nga personat e huaj, të cilët janë referuar në DMH për verifikim dhe trajtim sipas ligjit për të huaj, ku 1 person gjatë verifikimit ka rezultuar me urdhër arrest aktiv dhe i është dorëzuar stacionit përkatës për procedura të mëtutjeshme.