Category: Lajme

Parlamenti i Libanit e ka emëruar të enjten shefin e ushtrisë së vendit, Joseph Aoun, si president. Libani kishte dy vjet pa president për shkak të ngërçit politik.

Votimi u zhvillua disa javë pas nisjes së një armëpushimi që i dha fund luftës mbi njëvjeçare mes Izraelit dhe grupit militant libanez, Hezbollah, dhe në një kohë kur liderët e Libanit po kërkojnë ndihmë ndërkombëtare për ta rindërtuar vendin.

Aoun shihej si kandidati i parapëlqyer i Shteteve të Bashkuara dhe Arabisë Saudite, mbështetjen e të cilave do t’i nevojitet Libanit për t’u rindërtuar.

Seanca e së enjtes ishte përpjekja e 13-të për ta zgjedhur pasuesin e Michel Aoun, mandati i të cilit mbaroi në tetor 2022.

Hezbollahu e mbështeti fillimisht një kandidat tjetër, Suleiman Frangiegh, liderin e një partie të vogël të krishtere në veri të Libanit, e cila ka lidhje të ngushta me ish-presidentin e Sirisë, Bashar al-Assad. Megjithatë, të mërkurën, Frangieh njoftoi se ishte tërhequr nga gara dhe e mbështeti Aounin, duke i hapur rrugën shefit të ushtrisë të zgjidhet president.

Hezbollahu, i cili e kontrollon Libanin jugor, është shpallur organizatë terroriste nga Shtetet e Bashkuara, ndërsa Bashkimi Evropian e ka vendosur në listën e zezë krahun e tij të armatosur, por jo edhe partinë e tij politike.

Randa Slim, hulumtuese nga Instituti për Lindjen e Mesme me bazë në Uashington, tha se dobësimi i Hezbollahut politikisht dhe ushtarakisht në luftën e tij me Izraelin dhe rënie e aleatit të tij, Assad, në Siri, së bashku me trysninë ndërkombëtare për të emëruar një president, kanë hapur rrugën për rezultatin e së enjtes.

Sistemi i ndarjes së pushtetit në bazë sektare në Liban bën që të ketë shumë ngërçe për arsye politike dhe procedurale.

Roli i presidentit në Liban është i kufizuar për shkak të sistemit të ndarjes së pushtetit, sipas të cilit, presidenti është gjithmonë një i krishterë maronit, kryeministri mysliman suni dhe kryetari i Parlamentit shiit.

Megjithatë, vetëm presidenti e ka pushtetin për të emëruar ose shkarkuar kryeministrin dhe kabinetin. Qeveria kujdestare që ka udhëhequr Libanin gjatë dy vjetëve të fundit ka pasur kompetenca të kufizuara, pasi nuk ishte emëruar nga një president në detyrë. /REL/

Ministri i Financave, Hekuran Murati, ka publikuar një grafik që tregon se ka pasur një rritje të mbështetjes financiare të Qeverisë për Komunën e Prishtinës gjatë tre viteve të fundit.

Megjithatë, ai ka akuzuar kryetarin e Prishtinës, Përparim Rama, se Komuna e udhëhequr nga ai mbyll vitin me suficit (buxhet të pashpenzuar).

Ky reagim i Muratit ka ardhur pas një konferencë për media të mbajtur nga Rama të enjten, ku ai akuzoi Qeverinë se nuk po e mbështet për realizimin e projekteve madhore në kryeqytet.

“Por ç’e do këtë rritje kur Komuna e Prishtinës në vazhdimësi e mbyll vitin me suficit, sepse nuk arrin të implementojë buxhetin që vet e harton. Në vitin që sapo lamë pas, suficiti (buxheti i pashpenzuar) i Komunës së Prishtinës rezulton mbi 33 milionë euro”, ka shkruar Murati.

Në një postim në Facebook, Murati ka theksuar se Komuna e Prishtinës ka mbyllur vitin me suficit, pasi buxheti nuk është shpenzuar siç ishte planifikuar.

Ai ka shpjeguar se grafiku tregon se mbështetja buxhetore nga Qeveria është rritur ndjeshëm gjatë tre viteve të fundit.

Por, ai ka shtuar se kjo rritje është e padobishme kur Komuna e Prishtinës nuk është në gjendje ta realizojë buxhetin që vetë e harton.

“Po kaq, 33 milionë euro, është buxheti i Komunës së Podujevës. Pra imagjinoni se sa punë arrin të bëjë Komuna e Podujevës me këtë buxhet, kaq pra i tepron Komunës së Prishtinës e qytetarëve të Prishtinës u mohohen ato projekte për shkak të mos-realizimit. Andaj, Kryetari i Komunës Rama, në vend se të kërkojë fajtorin gjetiu, bën mirë që të përqëndrohet në kryerjen e punëve për të cilat u ka premtuar qytetarëve”, ka shkruar tutje ai në Facebook.

Aktgjykim dënues shpalli të enjten Gjykata e Prishtinës në rastin e keqpërdorimeve me subvencione në bujqësi.

Prokuroria Speciale, në aktakuzën e parë i akuzonte 21 persona për keqpërdorim të detyrës zyrtare, mashtrim me subvencione dhe falsifikim të dokumenteve.

Sipas aktakuzës, vlera e ryshfetit që kanë përfituar personat zyrtarë është 316 mijë e 650 euro, shkruan ATV.

Dënimin më të lartë prej 8 vjetësh dhe 50 mijë euro gjobë e shqiptoi, ndaj njërit nga të akuzuarit kryesor Luan Statovci.

Atij dhe Sadat Shkodrës, i cili u dënua me gjashtë vjet burgim dhe 20 mijë euro gjobë, ua ka ndalur punën në administratë shtetërore në afat prej 10 vitesh.

Ndërsa ndaj disa të tjerëve shqiptoi dënim me burgim, por që nuk do të ekzekutohet nëse ata brenda periudhës së caktuar nga gjykata nuk do të kryejnë asnjë vepër penale

Për keqpërdorime me subvencione Prokuroria Speciale ka ngritur 6 aktakuza, pas hetimeve që ishin zhvilluar, e kishin rezultuar me arrestimin e shumë personave gjatë vitit 2021, dhe në fillim të vitit 2022.

Bashkësia Islame e Kosovës ka paralajmëruar imamët dhe punëtorët e saj lidhur me qëndrimet e tyre politike përgjatë fushatës elektorale.

Në vendimin, siç është raportuar BIK-u tërheq vërejtjen e nëpunësve administrativë dhe fetarë që të shtojnë kujdesin karshi paraqitjeve mediale, si dhe qëndrimeve në rrjete sociale.

BIK-u ndalon qëndrimin personal politik, pjesëmarrjen në fushatë zgjedhore, të qenit aktivist i ndonjë partie politike apo edhe kandidat për deputet.

“Çdo veprim i tillë nga sa u përmend më lart, konsiderohet shkelje e Kushtetutës së BIK-ut, ligjeve dhe akteve tjera normative për çfarë edhe do sanksionohen”, thuhet në vendim.

Ish-këshilltari për Siguri Kombëtare, John Bolton, që kishte punuar në Shtëpinë e Bardhë krah presidentit të atëhershëm Donald J. Trump, ka thënë e se është e vështirë të dihet nëse rajoni i Ballkanit Perëndimor do të jetë prioritet në fillimet e Administratës Trump II.

Megjithatë shton se ky rajon duhet të jetë në fokus të Shtëpisë së Bardhë për shkak se është i rëndësishëm për SHBA-në dhe për sigurinë e Evropës.

Bolton ka thënë se është shumë e rëndësishme që administrata e re të jetë vërtet serioze për të gjetur mënyra drejt arritjes së një marrëveshje të përhershme, në të kundërtën të huajt që s’kanë interes për paqe dhe stabilitet në rajon do të ndërhyjnë, dhe ajo që aktualisht është e ndërlikuar mund të bëhet edhe më keq.

“Mendoj se kjo varet pjesërisht nga kush do të marrë përgjegjësinë. Nëse është Grenell, për shkak të përfshirjes së tij të mëparshme, mendoj se ai do t’i japë prioritet. Pikëpamja ime ka qenë gjithmonë se, në fund të fundit, në mosmarrëveshjen Serbi-Kosovë, çfarëdo që të jetë vendimi përfundimtar, ai duhet të jetë i pranueshëm për të dyja palët. Nuk do të ketë një zgjidhje të imponuar nga jashtë. Dhe nëse do të kishte, rreziku do të ishte shumë i madh që ajo të mos zgjaste”.

“E di që shumë njerëz në rajon nuk e pëlqejnë fare idenë e shkëmbimit të territoreve. Ata thonë se, sapo të fillosh ta bësh këtë, s’do të kishte fund. Kjo do të sillte paqëndrueshmëri. Pikëpamja ime ka qenë se nuk po flasim për ndryshime kufijsh askund, përveçse kur palët që ndajnë kufirin bien dakord. Ideja që duhet të ketë një shkëmbim territoresh anon në favor të njërës palë, ideja që kurrë nuk mund të ketë një shkëmbim territoresh anon në favor të palës tjetër. Mendoj se ky është lloji i negociatave që një i huaj mund të ndihmojë për ta lehtësuar, mund të bëjë propozime kompromisi, por në të vërtetë është diçka që kërkon nivelet më të larta të Kosovës dhe Serbisë në një dhomë private për të parë nëse liderët mund ta zgjidhin. Dhe pastaj ata mund ta kalojnë përmes proceseve të tyre kushtetuese, në mënyrë që, nëse Parlamenti duhet ta miratojë, të ketë një shumicë për të”, tha Bolton për Express.

“Nga përfshirja ime e kufizuar, liderët mund të kenë qenë afër një marrëveshjeje, por parlamentet e tyre, të paktën në rastin e Kosovës, nuk ishin gati të shkonin përpara. Kjo nuk është një zgjidhje e qëndrueshme, dhe megjithëse është zhgënjyese, mendoj se ia vlen përpjekja për të parë nëse ka një mënyrë për të gjetur një zgjidhje të qëndrueshme. Sepse të pranosh një zgjidhje tjetër të përkohshme thjesht hap mundësinë për më shumë konflikt”.

“Dhe, në masën që ka pasiguri politike në Ballkanin Perëndimor, kjo pengon investimet ekonomike të huaja. E bën më të vështirë hyrjen në BE dhe NATO. Askush nuk e nënvlerëson vështirësinë e kësaj, por mendoj se përfitimi për të gjithë – Serbinë, Kosovën dhe rajonin në tërësi – tregon se ia vlen përpjekja, sado e vështirë të jetë”, tha Bolton.

Komandanti i misionit të KFOR-it, Enrico Barduani, është takuar me ambasadoren e Mbretërisë së Holandës, Karin Boven, me të cilën ka diskutuar për situatën e stabilitetit rajonal.

KFOR-i përmes një komunikate për media ka thënë se Barduani ka shprehur mirënjohje ndaj Bovenit për kontributet afatgjate të Holandës në sigurinë e rajonit.

“Ata diskutuan mbi pikëpamjet lidhur me tema të ndryshme, duke përfshirë sigurinë e qëndrueshme në të gjithë Kosovën, situatën e stabilitetit rajonal dhe përpjekjet e KFOR-it në mbështetje të dialogut të lehtësuar nga BE ndërmjet Prishtinës dhe Beogradit”.“Gjeneral Major Barduani gjithashtu i shprehu ambasadores Boven urimet për kontributet afatgjata të Holandës ndaj KFOR-it dhe stabilitetit rajonal”, thuhet në komunikatë për media.

Ndërsa është thënë se ky takim është pjesë e ndërveprimeve të rregullta të Gjeneral Major Bardunit me homologët e tij përkatës në Kosovë dhe në rajon.

KFOR-i vazhdon të zbatojë mandatin e tij – të bazuar në Rezolutën 1244 të Këshillit të Sigurimit të Kombeve të Bashkuara të vitit 1999 – për të kontribuar në një mjedis të sigurt dhe të qetë për të gjithë njerëzit dhe komunitetet që jetojnë në Kosovë dhe për lirinë e lëvizjes, në çdo kohë dhe në mënyrë të paanshme.

KFOR-i punon në bashkëpunim me Policinë e Kosovës dhe Misionin e Bashkimit Evropian për Sundimin e Ligjit në Kosovë (EULEX).

Kryeministrja italiane Giorgia Meloni tha të enjten se ajo kurrë nuk kishte diskutuar me Elon Musk një marrëveshje të mundshme për të përdorur Starlink-in e tij për të ofruar komunikime të sigurta për ushtrinë.

Meloni, e cila ka një marrëdhënie të mirë me Musk, tha se interesi kombëtar ishte ‘thjerrëza e vetme’ përmes së cilës ajo gjykonte kontratat me kompani të tilla si SpaceX, pronarin e Starlink, dhe se ajo nuk ndikohej nga miqësitë apo pikëpamjet politike.

Thuhet se me vlerë 1.5 miliardë euro dhe i shtrirë në pesë vjet, projekti është kritikuar ashpër nga partitë opozitare duke vënë në dyshim nëse trajtimi i komunikimeve të tilla duhet t’i besohet një kompanie Musk.

“Ne jemi thjesht në fazën hetimore, prandaj nuk i kuptoj të gjitha akuzat që janë bërë. Po ju them më shumë: as personalisht nuk kam ide të qarta për këtë çështje”, tha Meloni në një konferencë për shtyp.

“A është problemi me SpaceX, fakti që është një kompani private apo idetë politike të Elon Musk?”, shtoi ajo.

Italia po vlerëson përdorimin e sistemit të telekomunikacionit të bazuar në hapësirë ​​të Musk për të siguruar komunikime të sigurta midis qeverisë, diplomatëve italianë dhe zyrtarëve të mbrojtjes që veprojnë në zona të ndjeshme në të gjithë Mesdheun.

Këto shërbime të sigurta të ofruara nga Musk do të ishin një zgjidhje më e menjëhershme në krahasim me konstelacionin satelitor IRIS2 (Iris në katror) të BE-së, shkruan Reuters.

Agjencia e Infrastrukturës Rrugore (RIA) mban fajin e pjesshëm për aksidentin vdekjeprurës të një autobusi me destinacion Shkup afër Sofjes në autostradën Struma, i cili vrau 45 dhe plagosi shtatë të tjerë më 23 nëntor 2021, thuhet në një vendim të Gjykatës së Qarkut të Pernikut, i publikuar më faqen e internetit të institucionit të mërkurën.

Autobusi fatkeq ishte në pronësi të kompanisë Besa Trans, e regjistruar në Republikën e Maqedonisë së Veriut dhe ishte i katërti dhe i fundit nga grupi i autobusëve që shkuan në udhëtim. Hetimi i aksidentit iu ngarkua Shërbimit Hetimor Kombëtar. Përfundimet fillestare i atribuan aksidentit gabim njerëzor, pasi drejtuesi i mjetit po drejtonte me shpejtësi të madhe.

Sipas gjykatës, RIA është përgjegjëse për 10% të dëmeve të pësuar dhe duhet të urdhërohet t’i paguajë secilit prej paditësve 20,000 BGN si dëmshpërblim jopasuror. Në dokumente thuhet se seksioni në fjalë nuk është nxjerrë Aktin 16 për autostradë dhe për rrjedhojë ka statusin e një autostrade, pasi seksioni është hapur për qarkullim në vitin 2007 në fazën e Aktit 15.

Në vendimin e gjykatës thuhet gjithashtu se shoferi po e ngiste autobusin me shpejtësi 106 kilometra në orë, kur shpejtësia maksimale në këtë zonë ishte 120 kilometra. Dizajni i rrugës së shpejtë nuk përputhej me karakteristikat gjeometrike të terrenit.

“Pjerrësia e projektuar e tërthortë e kthesës korrespondon me një shpejtësi prej 90 kilometrash në orë, por nuk ka asnjë shenjë rrugore B26/90 kilometra të vendosur në vendet e nevojshme për të kufizuar shpejtësinë”, shtoi gjykata.

Përplasja ndodhi pak pas orës 2:00 të mëngjesit të datës 23 nëntor 2021 në 31 km të autostradës Struma, afër fshatit Bosnek (Bullgaria Perëndimore). Autobusi, me 52 turistë që ktheheshin në Shkup nga një udhëtim në Stamboll, u përplas në shinat e rojes dhe mori flakë, duke u djegur plotësisht. Një ditë më pas u shpall ditë zie kombëtare në Bullgari në kujtim të viktimave në aksidentin vdekjeprurës të autobusit dhe nëntë viktimave të zjarrit në një shtëpi pleqsh në Bullgarinë verilindore. Flamujt kombëtarë të të gjitha institucioneve shtetërore u valëvitën në gjysmështizë.

Një padi civile u ngrit në Gjykatën e Rrethit të Pernikut në janar 2022, duke rezultuar në deklarata të ekspertëve për gjendjen e seksionit rrugor, duke përfshirë shenjat rrugore, shinat mbrojtëse dhe shenjat rrugore. Shenjat shtesë rrugore përgjatë pjesës ku ka ndodhur aksidenti janë vendosur nga Agjencia e Infrastrukturës Rrugore (ARN) në fillim të këtij viti.

Familjarët e atyre që humbën jetën në aksident ngritën padi këtë gusht, duke kërkuar dëmshpërblim prej 750 mijë eurosh nga RIA dhe shoqata bullgare e siguruesve të automjeteve. Avokati pretendon se në rrugë ka pasur një sërë parregullsish, si ngatërrimi i sinjalistikës dhe shenjave rrugore, shinat mbrojtëse dhe asfalti jo cilësor, të cilat kanë ndikuar në aksident./BTA/

Deputeti i Lidhjes Demokratike të Kosovës, Avdullah Hoti, ka thënë se ikja e partisë në pushtet nga debatet televizive e dalja në takime partiake nëpër komuna është përpjekje e dëshpëruar për të kamufluar dështimet në qeverisje në katër vite mandat, raporton Ekonomia Online.

Sipas tij ndryshe ky bojkot nuk ka si të kuptohet.

“Po të kishte rezultate, do t’i mbushnin studiot televizive e do të përballeshin me opozitën në çdo studio televizive, tryezë e forum. Është lehtë t’u flasësh militantëve partiakë që të duartrokasin, por përballja me kundërshtarët politik duhet bazuar në fakte”, ka shkruar Hoti. Hoti potencon se për katër vite mandat, kjo qeveri ka pasur 12 miliardë euro buxhet e asnjë projekt i realizuar.

“Katër vite mandat: 12 miliardë euro buxhet e asnjë projekt i realizuar, asnjë investim madhor vendor apo i huaj, probleme me energji elektrike, asnjë njohje për shtetin e Kosovës, sanksione nga BE-ja, marrëdhënie të cenuara me aleatët kryesorë të Kosovës, afera në rezerva shtetërore, në energjetikë e në sektorë të tjerë”, thekson Hoti.

Papa Françesku intensifikoi kritikat e tij ndaj fushatës ushtarake të Izraelit në Gazë, duke e quajtur situatën humanitare në enklavën palestineze si “shumë serioze dhe të turpshme”.

Në adresimin vjetor para diplomatëve, që në emër të Papës e mbajti një nga këshilltarët, Françesku duket se iu referohej vdekjeve të shkaktuara nga i ftohti në Gazë, territor ku pothuajse nuk ka fare energji elektrike.

“Ne nuk mund të pranojmë në asnjë mënyrë bombardimin e civilëve”, u tha në fjalimin e Papës, që u lexua nga këshilltari i tij.

“Ne nuk mund të pranojmë që fëmijët të ngrijnë për vdekje sepse spitalet janë shkatërruar apo se është sulmuar rrjeti energjetik i vendit”, raporton Radio Evropa e Lirë.

Papa pritej që personalisht të mbante fjalimin, por i kërkoi një këshilltari të tij që ta bënte në emër të tij, pasi Ati i Shenjtë është duke u rikuperuar nga një ftohje.

Fjalimi ishte pjesë e adresimit para emisarëve të akredituar në Vatikan nga afër 184 shtete. Ambasadori izraelit në Selinë e Shenjtë ishte i pranishëm në këtë ngjarje.

Françesku zakonisht është i kujdesshëm që të mos mbajë anë në konflikte. Por, së fundi ai ka qenë më i zëshëm për fushatën ushtarake të Izraelit në Gazë dhe ka sugjeruar që komuniteti global duhet të hetojë nëse ofensiva përbën gjenocid ndaj popullit palestinez.

Në dhjetor, një ministër izraelit publikisht e kishte kundërshtuar këtë sugjerim të Atit të Shenjtë.

Lufta në Gazë nisi më 7 tetor 2023, pasi Hamasi – grupi palestinez i shpallur organizatë terroriste nga Shtetet e Bashkuara dhe Bashkimi Evropian – sulmoi jugun e Izraelit duke vrarë afër 1.200 persona dhe duke rrëmbyer afër 250 të tjerë.

Fushata hakmarrëse ushtarake e Izraelit në Gazë ka lënë të vrarë më shumë se 46.000 palestinezë, sipas Ministrisë së Shëndetësisë në këtë territor. Kjo ministri ka thënë se mbi gjysma e viktimave ishin gra dhe fëmijë. Izraeli pretendon se ka vrarë më shumë se 17.000 militantë, por nuk ka dhënë prova për këtë pretendim.

Izraeli ka shkatërruar pjesë të mëdha të territorit dhe lufta ka detyruar afër 90 për qind të popullsisë, prej 2.3 milionë banorësh, që të zhvendosen, shpesh disa herë./REL