Category: Lajme

Përgatiti: Driton Sadiku

Me pagën e janarit, disa policëve do t’u dalin më shumë para. Pas disa vjetësh zvarritje nëpër gjykata, 5 pjesëtarë të Policisë do ta marrin pagën e 13, për katër vjetët që iu mohua.

Sipas një aktgjykimi të shpallur rishtazi nga Gjykata Themelore në Prishtinë, Ministria e Punëve të Brendshme, detyrohet që policëve në fjalë, t’ua paguajë 14.430 euro, apo nga 2886 euro për secilin prej tyre.

Marrja e parave që u takojnë përmes procedurave gjyqësore, sipas juristëve konsiderohet shpenzim shtesë, andaj thonë se policia do të duhej t’i përfundonte këto pagesa qysh në fillim.

Për më tepër, kostoja vetëm sa rritet, pasi institucionet vazhdimisht dorëzojnë ankesa në gjykata, për lëndë që në parim dihet se janë të fituara.

Kjo më pas ndikon që lëndët të zvarriten pasi ngarkohet puna e gjyqtarëve.

Sidoqoftë, policët vazhdojnë që pagën që u takonte, ta kërkojnë duke ndjekur procedurat ligjore. Deri më tani llogaritet që rreth 6000 pjesëtar të policisë, kanë deponuar padi ndaj institucionit ku punojnë.

Përgatiti: Pranvera Krasniqi

Komunat gjithmonë janë ankuar për numër të vogël të zjarrfikësve, mirëpo pritet që sadopak numri i tyre të rritet.

Prej 97 kandidatëve që iu nënshtruan testimin me shkrim për zjarrfikës 90 prej tyre e kaluan testin mbi 50 pikë e sipër.

41 prej personave aplikuan në Prishtinë, 4 në Suharekë, 6 Gjakovë, 11 në Ferizaj, 7 në Malishevë, 9 në Vushtrri, 4 në Podujevë, 2 në Junik, 5 Lipjan, 3 ne Gjilan, 1 në Klinë dhe pesë në dragash 5 Dragash.

Edhe pse rekrutimi bëhet direkt nga Agjencia për Menaxhimin Emergjent, zjarrfikësit, pagat i marrin nga komunat.

Komuna që do të pranojë më së shumti zjarrfikës, Prishtina, thotë se është e gatshme financiarisht për pjesëtaret e rinj.

“Kryeqyteti i përmbush të gjitha kushtet që këta zjarrfikës të fillojnë punën, ne buxhetin 1 milionë e 100 mijë euro për paga dhe shërbimet e zjarrfikësve, kemi buxhet për 115 zjarrfikës ndërkaq që i kemi 82 zjarrfikës”, tha drejtori për Siguri dhe Emergjenca në Prishtinë, Lulzim Fushtica.

Pagat dhe shërbimet tjera që nevojiten për zjarrfikësit e rinj tashmë i ka siguruar edhe komuna e Podujevës.

“Si komunë planifikojmë çdoherë, nuk ka asnjë problem sa i përket buxhetit, vitin 2024 ka qenë 635 mijë euro, veç për paga 335 mijë euro kanë qenë të dedikuara”, tha drejtori për Mbrojtje dhe Shpëtim në Gjilan, Bejtullah Osmani.

Hapja e konkursit ishte kërkesë e kamotshme e komunave, më shumë se para 2 vjetëve.

“Ne i kemi 13, pritet me na u shtua dy por nuk mjaftojnë”, tha drejtori për Mbrojtje dhe Shpëtim në Podujevë, Bahri Selimi.

Aktualisht, paga mesatare e një zjarrfikësi në Kosovë është 525 euro.

Përgatiti: Sara Mulliqi

Enver Latifi, banor i fshatit Shupkovc në Mitrovicë, nuk e mban në mend kur rryma në këtë fshat ishte aq e fortë sa për ta ndezur televizorin.

“Televizori si televizor është, por pa e ndezur korrektorin nuk ndezet e as nuk punon. Nga ora 17:00 e tutje nuk ka shancë asgjë që të punojë. Nuk ka shancë pasi që është shumë rrymë e dobët”, tha Latifi.

Shkak për telashet e fshatit me rrymë është trafoja e cila nuk përmbushë kapacitetin e plotë. Si rezultat rryma në Shupkovc nuk mjafton as për nevoja elementare.

“Këtu kemi probleme me energji elektrike diku gati që katër deri pesë vite. Paisjet elektrike këtu nuk punojnë fare, sidomos në kohën e mbrëmjes. Kemi bërë kërkesë në kompaninë KEDS, para një viti por nuk është ndërmarrë asgjë, tash edhe një kërkesë tjetër e kemi dërgu para dy muajve e gjysmë, por nuk kanë kthyer përgjige për asnjërën ankesë”, tha Naser Islami, banor i fshatit Shupkovc.

Situata bëhet akoma më e rëndë gjatë dimrit kur temperaturat janë të ulëta.

“Ne si banorë po kemi telashe, pasi që po duhet si alternativë për të përdorur drunjtë për të kryer nevojat familjare si ngrohjen, përgatitjen e ushqimit e të gjitha çfarë duhen”, tha Islami.

Për rastin të informuar janë edhe në KEDS. Megjithatë zëdhënësi, Lulzim Krasniqi ka thënë se konsumatorët në Shupkovc kanë furnizim të qëndrueshëm me rrymë.

Përgatiti: Benita Zeneli

Lajmin se që nga tetori 2024 paga minimale do jetë 350 euro e mirëpriti, por Hafiz Sylejmani i cili punon si sigurim fizik në QKUK, pagën me rritje nuk e gëzoi asnjëherë.

Sylejmani që mban edhe 5 anëtarë të tjerë të familjes, thotë se paga që e merr është e pamjaftueshme për të.

I zgjedhur edhe si përfaqësues i punëtorëve të tjerë Sylejmani thotë se të dëshpëruar me këtë janë edhe kolegët e tij e që në të ardhëm paralajmërojnë edhe veprime sindikale.

Si Sylejmani janë edhe qindra punëtorë të tjerë. E për këtë Sindikata e pavarur e Punëtorëve të Sektorit Privati fajëson institucionet publike të cilat i kanë kontraktuar kompanitë që paguajnë punëtorët.

Kryesuesi i Sindikatës të punëtorëve të sektorit privat, beson se Qeveria duhet t’i subvencionojë kompanitë e kontraktuara, në mënyrë që ato të kenë mundësi financiare t’i paguajnë punëtorët.

Por edhe vetë vendimi i Qeverisë së Kosovës për rritjen e pagës minimale po vlerësohet i paligjshëm. Derisa edhe nga IKD thonë se duhet të bëhet rritja e vlerës së kontratave.

Ndërkohë Kosova ende vazhdon të jetë një ndër vendet me pagën më të ulët në Evropë dhe rajon.

Ministri i Brendshëm turk, Ali Yerlikaya, njoftoi se është rritur në 66 numri i viktimave nga zjarri që shpërtheu në një hotel në lokacionin turistik dimëror Kartalkaya, ndërsa 51 të tjerë kanë mebtur të plagosur, raporton Anadolu.

Nga 51 personat e plagosur, njëri është në gjendje kritike dhe aktualisht po trajtohet në repartin e kujdesit intensiv, konfirmoi ministri i Shëndetësisë, Kemal Memişoğlu, duke deklaruar se 17 persona janë liruar nga spitali pasi kanë marrë ndihmën mjekësore.

Një zjarr shpërtheu herët këtë mëngjes në një hotel në lokacionin turistik dimëror Kartalkaya në qytetin turk Bolu, duke bërë që ekipe të shumta emergjente nga qytetet fqinje, duke përfshirë zjarrfikësit, njësitë e reagimit ndaj fatkeqësive dhe ekipet mjekësore të mbështetura nga helikopterët, të dërgohen në vendngjarje.

Autoritetet evakuuan rreth 230 të ftuar nga hoteli ndërsa përpjekjet për shuarjen e zjarrit vazhduan.

Një hetim ka nisur për shkakun e zjarrit.

Kartalkaya në provincën Bolu është një nga destinacionet më të rëndësishme turistike dimërore në Türkiye dhe tërheq mijëra vizitorë gjatë sezonit të skijimit.

Resorti ndodhet rreth 295 kilometra në lindje të Istanbulit.

Paneli Zgjedhor për Ankesa dhe Parashtresa (PZAP) ka gjobitur sërish subjetin politik Lëvizjen Vetëvendosje me 3 mijë e 500 euro, për shkak të gjuhës së përdorur nga kryeministri Albin Kurti, në një tubim elektoral në Podujevë.

Vendimi vjen pas ankesës së Lidhjes Demokratike të Kosovës. Ndërsa në vendimin e PZAP thuhet: “Më tutje parashtruesi i ankesës thekson se për ilustrim se çka ka thënë kryeministri Kurti në fjalimin e tij në Podujevë, të transkriptuar edhe në tekst e gieni si në vijim: “Te dashur qytetarë të Llapit, LYDYKYII – Lidhja Demokratike e Kosovës nuk është Lidhje, por është lodhje, dhe nuk është demokratike, por është dokrarike, e ne përgjithësi mender methane opozita po i japin zor mule anej mule knej për vend të dytë, poget e kanë pa edhe ata vet që s’ka ymyt, se qashtu qysh Shpejtimi i ka myt, Vetëvendosja po i myt cep më cep në Republikën e Kosovës”, thuhet në vendimin e PZAP-së, raporton KosovaPress.

Sipas PZAP-së, thuhet se “Me datë 17.01.2025 PZAP ka pranuar një ankesë nga subjekti politik Lidhja Demokratike e Kosovës, me të cilën pretendon se në qytetin e Podujevës me datë 15.01.2025 në ora 18:00 në tubimin politik të subjektit Lëvizja Vetëvendosje kryetari i kësaj partie dhe kryeministri aktual gjatë fjalimit të tij ka bërë shkelje të rëndë të Ligjit Nr.08/L-228 për Zgjedhjet e Përgjithshme në Republikën e Kosovës, respektivisht nenit 34, paragrafi 1, nën paragrafi 1.11 i cili shprehimisht thotë “përdorimi i gjuhës në formën e shkruar ose gojore, që nxit ose provokon ose që mund të nxisë ose provokojë, një person tjetër për të kryer një akt të dhunës kundër personave të tjerë ose pasurisë, ose e cila nxit apo mund të nxisë urrejtje kundrejt të tjerëve”, thuhet më tej në vendim.

Paneli Zgjedhor për Ankesa dhe Parashtresa, para disa ditësh po ashtu e kishte gjobitur VV-në me 3 mijë euro, për shkak të gjuhës së përdorur nga Kurti në tubimin zgjedhor të mbajtur në Pejë.

Ditë më parë Paneli Zgjedhor për Ankesa dhe Parashtresa (PZAP) e ka dënuar me 20.000 euro Lidhjen Demokratike të Kosovës për shkelje të “Kodit të Mirësjelljes” gjatë fushatës për zgjedhjet e 9 shkurtit.

Ushtruesi i detyrës së Kryeprokurorit të Shtetit, Besim Kelmendi, ka mbajtur kolegjiumin e rregullt me të gjithë kryeprokurorët e prokurorive të vendit dhe prokurorët e Zyrës së Kryeprokurorit të Shtetit, ku kanë marrë pjesë edhe prokurori për çështje kibernetike në Departamentin e Drejtësisë së SHBA-së, Nathan Brooks, si dhe përfaqësuesit e Ambasadës së SHBA-së në Kosovë.

Sipas njofitmit, gjatë këtij takimi, kryeprokurorët dhe prokurorët e ZKPSH-së patën një diskutim të hapur dhe përmbajtjesor me Brooks, për tema që ndërlidhen me krimet kibernetike, me ç’rast u shkëmbyen përvojat profesionale nga kjo fushë.

“Çështje tjetër me rëndësi që u diskutua në këtë takim ishte edhe numri i rasteve me kryerës të panjohur të veprave penale. Lidhur me këtë pati diskutime për gjetjen e një zgjidhje që do të ndikonte në zvogëlimin e numrit të këtyre rasteve, duke përfshirë edhe shtimin e kërkesave për Policinë e Kosovës që të angazhohet më shumë për zbulimin dhe identifikimin e këtyre kryerësve të veprave penale. Po ashtu, në këtë takim u diskutua edhe për Planin e Punës së Prokurorit të Shtetit për vitin 2025, i cili plan do të jetë në harmoni me strategjinë e sistemit prokurorial”, thuhet në njoftim.

Kamera ilegale e vendosur në një shtyllë elektrike në komunën e Leposaviqit, e cila është monitoruar nga BIA serbe, sipas hulumtuesve të Institutit për Studime të Luftës Hibride “Octopus”, ka pasur për qëllim monitorimin dhe gjetjen e pozicioneve të përshtatshme, që të mund të hidhen në veprim dhe të kontrollojnë lëvizjet e organeve të Kosovës, në mënyrë që të gjejë momente të caktuara që të sulmojnë, si në rastin e Banjskës.

Hulumtuesi i lartë në Institutin për Studime të Luftës Hibride “Octapos”, Gurakuç Kuçi, në një intervistë për KosovaPress, ka thënë se institucionet e Serbisë, fatmirësisht për Kosovën kanë ra në një pozitë jashtëzakonisht të dobët të kontrollit të Kosovës.

“Institucionet e Serbisë, fatmirësisht për ne dhe fatkeqësisht për ata, kanë ra në një pozitë jashtëzakonisht të dobët të kontrollit të Kosovës të tyre, saqë më efektiviteti të kontrollit të Kosovës, përveç që nuk është siç ka qenë, ata duhet që në orët e energjisë elektrike, të fshehin kamerat e tyre që të mund të kontrollojnë diçka.. Ka qenë e vendosur jo rastësisht, por strategjikisht që të kontrolloj të gjitha rrugët, i ka bartur informacionet te Shërbimet e Inteligjencës së Serbisë. Kanë pasur për qëllim monitorimin dhe gjetjen e pozicioneve të përshtatshme, ku ata mund të hidhen në veprim për çështje të caktuara, po ashtu të kontrollojnë lëvizjet e organeve të Kosovës, në mënyrë që të gjejë momente të caktuara që të sulmojnë si në rastin e Banjskës”, ka thënë Kuçi.

Një kamerë ilegale është kapur në veri të vendit, konkretisht në Komunën e Leposaviqit. Sipas burimeve të KosovaPress, e njëjta është vendosur nga strukturat paralele. /kp

Marco Rubio, është sekretari i ri i Shtetit amerikan.

Rubio u betua sot pas konfirmimit në senatin e Shteteve të Bashkuara të Amerikës.

Ai e lexoi betimin përpara zëvëndëspresidentit, James David Vance.

Marco Rubio, në këtë pozitë e pason Antony Blinken, i cili shërbeu gjatë administratës Biden.

Të hënën në Washington është mbajtur ceremonia zyrtar e transferimit të pushtetit nga presidenti Joe Biden tek presidenti i ri Donald Trump.

Dje, Trump u inaugurua si presidenti i 47-të i ShBA-së.