Psikologu dhe profesori në Kolegjin AAB, Naim Telaku, në emisionin CONTEXT në ATV, deklaroi se gratë kanë prirje të votojnë për parti me prirje të majta, si Lëvizja Vetëvendosje.
“Zakonisht, personat e gjendjes femërore, tentojnë me votu më shumë në qendrën e majtë. Kryesisht zgjedhjet i kanë liberale, që në rastin tonë shkon me Partinë e Vetëvendosjes”, tha Telaku.
Deklaratën e plotë të Naim Telakut në CONTEXT e gjeni në videon më poshtë:
Profesori i Kolegjit AAB, Xhavit Rexhaj, në emisionin CONTEXT në ATV, tha se mungesa e angazhimit të grave nga partitë politike është një humbje e madhe për shoqërinë dhe vetë partitë.
“Mendoj se mendoj se mosangazhimi i femrave është varfërim, por edhe kjo varet edhe prej ofertës që partitë ia bëjnë grave të këtij vendi. Kandidatet zakonisht po e shkojnë dhe i motivojnë hajde prej se po na duhet se qaty i treti. Është qasje joserioze e partive ndaj femrave dhe unë mendoj se tash ua kthejnë me të njëjtën masë dhe aty humbin shumë vota”, tha Rexhaj.
Deklaratën e plotë të Xhavit Rexhajt në CONTEXT e gjeni në videon më poshtë:
Kryeministri i Shqipërisë, Edi Rama dhe presidenti i Ukrainës, Volodymir Zelensky kanë nënshkruar një marrëveshje në fushën e sigurisë. Lajmi u bë i ditur nga kryeministri Rama përmes një postimi në Facebook.
Kjo marrëveshje u nënshkrua në Davos, ku të dy liderët po marrin pjesë në punimet e Forumit Ekonomik Botëror.
“Me Presidentin e Ukrainës, Volodymir Zelensky, nënshkruam një marrëveshje të rëndësishme në fushën e sigurisë”, shkruan Rama në Facebook.
Kreu i qeverisë shqiptare zhvilloi sot (21 janar) një takim në Davos edhe me përfaqësuesen e platformës sociale TikTok, Christine Grahn, me të cilën tha se ndau shqetësimet që çuan qeverinë për vendimin për mbylljen e përkohshme të kësaj platforme në Shqipëri.
Avokati Arbër Jashari, në emisionin CONTEXT në ATV, vlerësoi kandidimin e kryetarëve të komunave nga partitë politike si një strategji të menduar mirë për të maksimizuar votat.
Sipas Jasharit, kryetarët e komunave kanë ndikim të madh në administratë, sidomos në punësim dhe tenderë lokalë.
“Kryetarët e komunave kanë një ndikim të madh në administratë, sidomos kur jemi te punësimi, veçanërisht në arsim. Ata gjithmonë kanë një rol të veçantë”, tha Jashari.
Sipas tij, kryetarët e komunave, po ashtu kanë një avantazh strategjik për shkak të informacionit të detajuar që posedojnë mbi votuesit në zonat e tyre.
“Një kryetar i komunës e din me katune, me lagje, me familje, kush është, për cilën parti voton. Duke pasur këtë informacion, mundësitë që të depërtojnë në ato familje janë shumë të mëdha,” deklaroi ai.
Deklaratën e plotë të Arbër Jasharit në CONTEXT e gjeni në videon më poshtë:
Profesori në Kolegjin AAB, Xhavit Rexhaj, në emisionin CONTEXT në ATV, vlerësoi se garat politike aktuale po zhvillohen më shumë si përballje individësh sesa ekipeve të organizuara.
Rexhaj tha se katër partitë kryesore po sillen më shumë si individë, duke mos treguar frymë ekipore.
“Kemi garë të titanëve, jo garë të ekipeve. Unë s’po e shoh që ka garë të ekipeve, po e shoh që ka garë mes katër personave”, tha Rexhaj.
Ai shtoi se fushatat në nivel qendror reflektojnë mungesën e koordinimit ekipor, sidomos në tubimet e mëdha.
“Nëse i sheh këto tubime të mëdha që po mbahen, unë nuk po e shoh një të dytë, as të tretë, asnjëra parti. PDK-ja, për shembull, do të prisja të ketë një frymë më shumë ekipore”, deklaroi ai.
Deklaratën e plotë të Xhavit Rexhajt në CONTEXT e gjeni në videon më poshtë:
Në Forumin Ekonomik Botëror në Davos, në Shtëpinë e Kosovës (House of Kosova), e filloi qëndrimin e tij në Zvicër Kryeministri i Kosovës, Albin Kurti, gjersa takoi një grup investitorësh strategjikë. Në takim kryeministri shoqërohej nga Ministrja e Ekonomisë, Artane Rizvanolli.
Sipas njoftimit, takimi ishte i fokusuar në investimet në energji e ku kryeministri theksoi se Kosova po investon në vazhdimësi, që të arrijmë sa më shumë pavarësi e siguri energjetike.
Shtoi se Strategjia e Energjisë e Republikës së Kosovës 2022-2031, është thelbësore dhe qëndron si pikë kyçe e avancimit energjetik të vendit dhe tranzicionit të drejtë, drejt energjisë së ripërtëritshme.
“Kryeministri Kurti i ftoi grupin e investitorëve që të investojnë në Kosovë e të shfrytëzojnë kushtet e favorshme për investim e veçanërisht në sektorin e energjisë, që mbetet sektor kyç për zhvillimin e vendit”, citohet Kurti në komunikatë.
Përgatiti: Fatlum Jashari
Në 19-vjetorin e vdekjes, Kosova përkujtoi presidentin historik Ibrahim Rugova.
Mëngjesin e së 21 Janarit, presidentja Vjosa Osmani dhe kori diplomatik ndërkombëtar në Kosovë bën homazhe tek varri i Rugovës.
Ajo theksoi kontributin e jashtëzakonshëm të presidentit Rugova në vënien e themeleve të shtetit të Kosovës nga koha e okupimit dhe në liri, pas luftës.
“Në atë kohë presidenti Rugova jo vetëm qe bëri bashkë të gjithë qytetarët rreth kauzës për liri, demokraci, pavarësi, por njëkohësisht u bë zëri i Kosovës në botë duke ndërtuar aleanca të fuqishme të cilat na u dishtën më së shumti në ato kohë të vështira”, tha Osmani.
Në ceremoninë zyrtare përkujtimore – që përfshiu ekspozitën “Një jetë për dritë” të fotografit Hazir Reka – presidentja Osmani e cilësoi Rugovën filozof e vizionar, si dhe arkitekt të pavarësisë.
“Ishte ai që e vendosi Kosovën në tryezën e diplomacisë ndërkombëtare, që krijoi miqësi me Shtetet e Bashkuara të Amerikës”, tha Osmani.
Ish-presidenti, Fatmir Sedjiu tha se Rugova ishte simbol të unitetit, pajtimit dhe lider që arriti të jetësojë ëndrrën për liri e pavarësi.
“Në takimet e shpeshta që kam pasur dhe që kam edhe tani, me zyrtarë ndërkombëtarë – që nga ambasadorë e deri te intelektualë, diplomatë, politikanë – vështirë të përfundojë biseda pa folur me respekt për veprën e presidentit Rugova, për të vlerësuar rolin dhe kontributin thelbësor të arkitektit dhe ndërtuesit të shtetit të pavarur dhe sovran të Kosovës”, tha Sedjiu.
Nëpërmjet një postimi në Facebook, kryeministri Albin Kurti, kujtoi Rugovën si një njeri që “la pas infrastrukturën e një tradite të madhe politike”.
“Në historinë moderne të Kosovës, një dekadë e gjysmë (1989-2006) e saj është e lidhur ngushtë me emrin e Presidentit Rugova, periudhë kjo që fillon me rezistencën paqësore të viteve ’90 dhe përfundon me periudhën e ndërtimit të institucioneve të Kosovës që kulmoi me shpalljen e pavarësisë së saj më 2008”, ka shkruar Kurti.
Me homazhe te varri, presidentin Ibrahim Rugova e përkujtoi edhe partia të cilën e udhëhoqi gjatë gjithë karrierës politike – Lidhja Demokratike.
“Ibrahim Rugova është shqiptari më i madh i të gjitha kohërave, ai priu me dinjiteti, arriti të krijoj shtetin e Kosovës, arriti të krijoj një ëndërr pas të cilës rreshtohemi të gjithë pa asnjë dallim”, tha kryetari i LDK-së, Lumir Abdixhiku.
Në kuadër të aktiviteteve për përvjetorin e 19-të vdekjes së Ibrahim Rugovës, po ashtu, u përurua libri “Rugova, prijësi intelektual” i autorit Ndue Ukaj.
Ndërsa te shtatorja, në sheshin para presidencës, u ekspozua e vetura e restauruar presidenciale.
Përgatiti: Arian Hajdaraj
Në prill të vitit 1999, Valbona Kelmendit, forcat serbe ia vranë babanë, dy vëllezërit dhe kunatën shtatzënë.
“Më 12 prill 1999, unë me vëllan e madh jena largu nga shtëpia me tractor. Baba dhe vëllau I dytë kanë mbet në shtëpi. Mas do kilometrave e kanë vra vllaun e madh edhe kunatën që ka qenë shtatzënë. Na tjert jena largu. Rrugës m kanë plagos edhe mu”, ka deklaruar ajo.
Kelmendi këtë dëshmi e dha në gjykimin ndaj Millorad Gjokovicit, I cili akuzohet për krime lufte pikërisht në rajonin e Pejës. Megjithëse, të akuzuarin nuk e mban në mend gjatë luftës, për të kishte dëgjuar shumë.
Kelmendi dhe nëna e saj, tashmë në moshë të shtyrë, besojnë se i akuzuari mund të ketë informacione të rëndësishme.
“Nana e ka përmend shumë. Ka thanë që veç ai (Gjokovic) munet me ditë kush mi ka vra familjarët”, tha KELMENDI.
Dyshimet për këtë, iu shtuan edhe më, kur Gjokovic, i vizitoi në shtëpi, shumë vite pas luftës.
“A ka ardhur Gjokovici në shtëpinë tuaj pas luftës me këtë veturë?”, tha Halit Gashi, i dëmtuar.
“Po. Ka ardh me dajën tim. Kur e kam marr vesh që është serb, I kam thënë dajës mos ma sill në shtëpi edhe njëherë”, tha Valbona Kelmendi, dëshmitare.
Millorad Gjokovic, i cili akuzohet për krime lufte në rajonin e Pejës, posaçërisht për vrasjen e Esat Shalës, u arrestua në vitin 2022.
Përgatiti: Driton Sadiku
Një muaj pas inaugurimit të pjesshëm të rrugës magjistrale Prishtinë – Mitrovicë, punët për pjesën e mbetur kanë stagnuar.
Megjithatë kontrata e nënshkruar me 8 shkurt të vitit të kaluar, parashihte qe brenda periudhës një vjeçare, të përfundonte e tërë rruga me gjatësi 9.78 kilometra.
Madje atë kohë zv/ministri i infrastrukturës Hysen Durmishi, thoshte se e kanë kushtëzuar kompaninë që mos të ketë vonesa si në të kaluarën.
Kur kanë mbetur vetëm 18 ditë para një vjetorit të nënshkrimit të kontratës, përfundimi i tërësishëm i rrugës duket ende larg.
Fajin për këtë megjithatë Durmishi ia lë motit të ligë, teksa pa treguar detaje, thotë se kompania do të penalizohet për mospërmbushje të kontratës.
“Për shkak edhe të kohës, tash koha e dimrit. Ne e kemi një kontratë me ta, ata e kanë për obligim me i respketu kushtet e kontratës. Aty është një kompani ndërkombëtare mbikëqyrëse që i kontrollon punimet dhe nëse kontraktori nuk e respekton kontratën do të ketë penalizime”, ka thënë Durmishi.
Kësisoj, pavarësisht lëshimit të segmentit të parë, kolonat në hyrje të Vushtrrisë vazhdojnë të jenë të gjata.
Madje tek kyçja në rrugën që të dërgon brenda në qytet, shoferët presin deri në gjysmë ore.
Sidoqoftë me kolona të tilla qytetarët do të përballen dhe për një kohë, pasi nga Ministria nuk dhanë afate se kur mund të përfundohet e gjitha.
Punët për zgjerimin dhe ndërtimin e rrugës nacionale N2 Prishtinë-Mitrovicë, në një gjatësi rreth 35 kilometra, kanë nisur para 15 vjetësh.
Përgatiti: Nora Luta
Në rigjykim, Gjykata e Mitrovicës dha një tjetër verdikt për Leotrim Shalën, i akuzuar për shtytje në vetëvrasje të të fejuarës së tij, Betina Ymeri.
Ndryshe nga vendimi në tetor të vitit të kaluar, kur ishte liruar nga akuza, këtë të martë Shala u shpall fajtor, duke u dënuar me katër vjet burgim.
Pasi tha se u morën parasysh vërejtjet e shkallës së dytë drejt vlerësimit të deklaratave të dëshmitarëve, dhe të të akuzuarit të dhëna në Polici, gjykata theksoi se deri tek vendimi, erdhi edhe bazuar në provat e reja.
Sipas aktgjykimit, maltretimet që Shala po ia bënte viktimës, u vërtetuan edhe përmes komunikimit të palëve në rrjetin social Instagram.
Vendimin e Gjykatës e kanë konsideruar meritor familjarët e Ymerit, dhe aktivistë të shoqërisë civile.
Sipas aktakuzës së Prokurorisë së Mitrovicës, Leotrim Shala nga dhjetori i 2021-ës deri në shtator të 2022-ës, duke e rrahur, kanosur dhe duke ia ndaluar të punoj, e duke i shkaktuar presion të lartë psikik, e kishte nxitur Betina Ymerin të vetëvritet.
Sipas dosjes Ymeri, e kishte kontaktuar Shalën përmes video-lidhjes, e më pas e kishte kryer vetëvrasjen.
Gjykata e Apelit e ktheu rastin në rivendosje, pasi kishte vlerësuar se shkalla e parë nuk kishte arritur në mënyrë të hollësishme të bëjë vlerësimin e provave një nga një, dhe ndërlidhjen e tyre.
Sipas Apelit, është dashur të shqyrtohet në veçanti deklarata e nënës së viktimës Fatime Ymerit, e cila gjatë gjykimit kishte thënë se vajza ka pasur në krahun e majtë, dy vija në formë të prerjes nga i akuzuari.