Category: Lajme

Kryetari i Prishtinës, Përparim Rama, ka njoftuar se më 2 korrik kryeqyteti do të jetë nikoqir i ngjarjes qendrore “America and Kosovo: A Freedom Story for the Next 250 Years”, e organizuar në kuadër të programit për shënimin e 250-vjetorit të Shteteve të Bashkuara të Amerikës.

Sipas Ramës, aktiviteti do të përcjellë mesazhin se partneriteti ndërmjet Kosovës dhe Shteteve të Bashkuara nuk është vetëm një histori suksesi, por edhe një vizion i përbashkët për të ardhmen.

Rama në një postim në Facebook bëri të ditur se në Kryeqytet ka pritur një delegacion nga Washington D.C., të udhëhequr nga Dr. Faton Bislimi, në kuadër të projektit “America Inspires Freedom – The Kosovo Story”, pjesë e programit zyrtar të kremtimit të 250-vjetorit të SHBA-së.

Rama tha se në takim morën pjesë profesori Daniel Serwer, profesori Edward P. Joseph, Besa Pinchotti, majori Mario Marquez, filantropi Ramiz Tafilaj dhe personalitete të tjera që, sipas tij, kanë dhënë kontribut të çmuar në forcimin e marrëdhënieve ndërmjet Kosovës dhe Shteteve të Bashkuara.

Sipas kryetarit të Prishtinës, gjatë takimit u diskutua për 250-vjetorin e demokracisë amerikane, rrugëtimin e Kosovës si shtet i lirë e demokratik, si dhe mundësitë për partneritete të reja që do të thellojnë bashkëpunimin ndërmjet dy vendeve në të ardhmen.

Instituti Kombëtar i Shëndetësisë Publike të Kosovës (IKSHPK) u bën thirrje qytetarëve të tregojnë kujdes të shtuar gjatë ditëve me temperatura të larta, pasi ekspozimi i zgjatur në vapë mund të ndikojë negativisht në shëndet, veçanërisht te fëmijët, të moshuarit dhe personat me sëmundje kronike.

Sipas një postimi në rrjetin social në Facebook të IKSHPK-së thuhet se për të reduktuar rrezikun nga temperaturat e ngritura gjatë qëndrimit në ambientet e hapura, IKSHPK rekomandon:

Të evitoni qëndrimin dhe aktivitetet fizike në ambiente të hapura gjatë orëve më të nxehta të ditës.

Të qëndroni sa më shumë në vende me hije ose në ambiente të freskëta.

Të mbroni kokën dhe fytyrën duke mbajtur kapelë.

Gjatë ekspozimit në diell, të përdorni syze dielli për mbrojtjen e syve.

Të mbroni lëkurën duke përdorur krem mbrojtës ndaj rrezeve të diellit.

Të pini ujë rregullisht gjatë gjithë ditës për të shmangur dehidratimin.

IKSHPK thekson se respektimi i këtyre rekomandimeve ndihmon në parandalimin e goditjes nga të nxehtit, dehidratimit dhe problemeve të tjera shëndetësore që mund të shkaktohen nga temperaturat e larta.

Kryeministri letonez Andris Kulbergs deklaroi se Letonia dhe Ukraina planifikojnë të ndërtojnë së bashku një fabrikë për prodhimin e dronëve në kufirin me Rusinë dhe Bjellorusinë.

Siç raportohet nga mediat e huaja, gjatë një vizite në bazën ushtarake në rajonin Latgale, Kulbergs tha se bashkëpunimi midis dy vendeve do të përfshijë zhvillimin e industrisë ushtarake, përfshirë prodhimin e dronëve në zonën kufitare.

Sipas fjalëve të tij, është planifikuar gjithashtu të futet një sistem për kapjen e dronëve në kufi, me qëllim që të zvogëlohet nevoja për të angazhuar avionë luftarakë në çdo incident.

Pak ditë pas helmimit të 64 studentëve të Akademisë së Sigurisë në Shqipëri, burime për ABC News thanë se kanë dalë rezultatet e analizave nga laboratori ISUV që tregojnë se mostrat e ushqimeve dhe kampionet ambientale kanë dalë të pastra nga ngarkesa bakteriale që analizuan nga Instituti i Referencës për S.coli, Salmonelë dhe Listeria.

Burime pranë grupit të hetimit thonë se pritet tashmë edhe rezultati nga dokumentat e marra nga krimi ekonomik pranë AKU-së në lidhje me kontrollet që janë kryer kompanisë së ushqimit nëse ka pasur ose jo parregullsi.

60 kursantë të Akademisë së Policisë në Tiranë dyshohet e u helmuan sërish ditën e 25 qershorit.

Ata shfaqën shenja si të vjella, diarre dhe temperaturë, dhe u dërguan menjëherë në shërbimin infektiv në Qendrën Spitalore Universitare “Nënë Tereza” për ndihmë mjekësore./abcnews.al

Rrufeja ka goditur Kullën Eiffel ndërsa një stuhi e fuqishme përfshiu Parisin të shtunën në mbrëmje, duke i bërë vizitorët të kërkonin strehim.

Moti dramatik pasoi ditë të tëra me vapë rekord në Francë, ku autoritetet thonë se temperaturat ekstreme kontribuan në një rritje të ndjeshme të vdekjeve.

Raportohet se Franca ka regjistruar mbi 1,000 vdekje nga nxehtësia, ndërsa temperaturat përvëluese kanë përfshirë vendin.

Disa pjesë të vendit kanë kaluar 40°C këtë javë, duke shtuar presion mbi spitalet dhe ndihmësit e parë mes një rritjeje të thirrjeve emergjente.

Më shumë se 30 zona ishin nën alarm të kuq për nxehtësi për pjesën më të madhe të javës, dhe vendi regjistroi ditën e tij më të nxehtë të mërkurën, me temperaturën mesatare 24-orëshe që arriti në 30°C.

Ndryshe, temperaturat janë rritur ndjeshëm në të gjithë Evropën ditët e fundit.

Deklaratat e presidentit të Serbisë Aleksandër Vuçiq se do të japë dorëheqje, janë pjesë e një strategjie për ruajtjen e kontrollit politik, në një moment të rritjes së presionit publik dhe protestave të vazhdueshme.

Kështu vlerëson eurodeputeti holandez Thijs Reuten, teksa komenton zhvillimet e fundit politike në Serbi.

“Njoftimi për të hequr dorë nga posti i Presidentit është një manovër për të hartuar një strategji që të mbetet në pushtet për sa më gjatë të jetë e mundur, në një mënyrë apo tjetër. Kjo është ajo që ka të bëjë kjo lëvizje klasike e manualit të autokratëve. Le të mos e humbasim fokusin”, thotë ai përmes një reagimi në X.

Reuten shton se mbeten në anën e popullit serb.

“Ne mbetemi në anën e popullit serb, i cili vazhdon të ketë kërkesa shumë të thjeshta: zgjedhje të drejta, jo vetëm diskutim për sundimin e ligjit, por zbatim të tij, si dhe transparencë”, përfundon ai. /Kp/

Announcing to give up the position of President, to plot a strategy to remain in power as long as possible. One way or the other. That is what this classic autocrats playbook move is about.

Let’s keep our eyes on the ball.
1/2 https://t.co/HBoPsA7OIz

— Thijs Reuten 🇪🇺🌹 (@thijsreuten) June 28, 2026

Kreu i Organizatës Botërore të Shëndetësisë (OBSH), Tedros Adhanom Ghebreyesus, paralajmëroi se temperaturat ekstreme mund të jenë përgjegjëse për qindra vdekje shtesë në Evropë.

“Mbi 1.300 vdekje shtesë janë regjistruar që nga 21 qershori dhe lidhen me temperaturat e larta në Evropë”, shkroi Tedros në rrjetin X.

“Evropa është kontinenti që po ngrohet më shpejt në botë, me ritëm dy herë më të lartë se mesatarja globale. Aktualisht, 150 milionë njerëz jetojnë nën ndikimin e vapës ekstreme – qindra kanë humbur jetën, shkollat janë mbyllur dhe rrjetet energjetike po mbingarkohen”, shtoi ai.

Gjatë fundjavës së shkuar, në disa vende evropiane, përfshirë Gjermaninë, Poloninë dhe Çekinë, janë thyer rekordet e temperaturave, duke arritur ose tejkaluar 40 gradë Celsius.

Autoritetet çeke u bënë thirrje qytetarëve të shmangin aktivitetin fizik dhe lëshuan paralajmërime për smog në pjesën qendrore dhe veriore të vendit, për shkak të niveleve të larta të ozonit pranë sipërfaqes së tokës, të shkaktuara nga vapa.

Në Gjermani u reduktuan udhëtimet me tren në një linjë kryesore në landin perëndimor, Nordrhajn-Vestfalenit, ndërsa në qytetin lindor të Lajpcigut u pezullua qarkullimi i tramvajeve.

Policia e Berlinit përdori topa uji për t’i ndihmuar banorët e kryeqytetit të freskoheshin.

Sipas mediave lokale, shumë njerëz qëndruan brenda në shtëpi dhe shmangën daljet jashtë deri pas perëndimit të diellit.

Kompania franceze e shpërndarjes së energjisë, Enedis, njoftoi të dielën pasdite se rreth 36.000 familje në veri dhe në qendër të Francës kanë mbetur pa energji elektrike.

Qeveria e Hungarisë tha se centrali bërthamor Paks në këtë vend, ka ulur prodhimin të dielën, për shkak të temperaturës së lartë të lumit Danub – uji i të cilit përdoret për ftohje.

Valë e të nxehtit ekstrem mbërthen qytetet e Evropës

Tedros tha se stresi nga nxehtësia, shpesh quhet “vrasës i heshtur”, duke shtuar se shtëpitë, vendet e punës dhe shkollat në Evropë nuk janë ndërtuar për të përballuar temperatura të tilla.

“I nxitur nga ndryshimet klimatike dhe ngrohja globale, fenomeni i valëve të të nxehtit që dikur ndodhte një herë në një brez, tani po përsëritet pothuajse çdo vit”, tha ai.

Agjencia e lajmeve, Reuters, citoi disa shkencëtarë të kenë thënë se vala e të nxehtit, e cila nisi më 20 qershor, ka qenë më e rënda e regjistruar ndonjëherë në Evropë. /REL

Kandidatët për deputetë nga radhët e PDK-së, Bekim Haxhiu dhe Qëndrim Kryeziu, kanë dorëzuar sot ankesë në PZAP për rezultatin përfundimtar të zgjedhjeve të 7 qershorit.

Ankesa e tyre do ta shtyjë procesin e certifikimit të zgjedhjeve. Afati i fundit për ankesa në PZAP përfundon në orën 12:00, më 29.06.2026.

“Unë dhe kandidati Qëndrim Kryeziu kemi dorëzuar ankesë në PZAP për rezultatet përfundimtare të publikuara nga KQZ-ja, për shkak se rezultati i përfundimtar i publikuar është i pasaktë, i paverifikuar. Ankesa është e bazuar dhe rezultati nuk mund të certifikohet”, tha Bekim Haxhiu para mediave.