Category: Lajme

Presidentja e Komisionit Evropian, Ursula von der Leyen, theksoi se “siguria e Evropës është në një pikë kthese”.

Ajo tha se bashku me Presidentin e Këshillit Evropian, Antonio Costa, do të marrin pjesë në takimin jozyrtar të një grupi të vogël liderësh evropianë këtë të hënë pasdite në Paris.

“Sapo mbërrita në Paris për bisedime kritike. Siguria e Evropës është në një pikë kthese. Po, bëhet fjalë për Ukrainën, por edhe për ne. Ne kemi nevojë urgjente për një mënyrë të re të të menduarit. Duhet të forcojmë mbrojtjen. Dhe ne kemi nevojë për të dyja tani”, thekson Von der Leyen.

Kryeministri i Shqipërisë, Edi Rama e ka shpërndarë deklaratën e emisarit të veçantë të administratës Trump, Richard Grenell, kundër Gjykatës Speciale.

Grenell, në një urim për 17-vjetorin e Pavarësisë së Kosovës të hënën, kujtoi “padrejtësinë e rëndë” që tha se po i bëhet në Hagë “atit themelues të shtetit të Kosovës”, Hashim Thaçit.

Zyrtari i lartë amerikan tha se “kjo burgosje e padrejtë duhet të marrë fund”.

Me këtë deklaratë të Grenellit pajtohet plotësisht kryeministri i Shqipërisë, Edi Rama, i cili tha se Gjykata Speciale nuk duhet të vazhdojë.

“Absolutisht! Dhe sa më shumë të vazhdojë [Gjykata Speciale], aq më e madhe është njolla në organin ndërkombëtar të drejtësisë!”, ka thënë Rama.

Grenell: Ky përvjetor i pavarësisë i errësuar nga padrejtësia e rëndë që po i bëhet Thaçit, duhej ta festonte në Prishtinë

Kosova shënon sot 17-vjetorin e mëvetësisë së saj.

Njëra nga shtetet që e ka uruar Kosovën është edhe Kroacia.

“Sretan Dan neovisnosti Kosovo 🇽🇰! Gëzuar Dita e Pavarësisë Kosovë! Happy Independence Day!”, ka shkruar Danijela Barishiq, ambasadore e Kroacisë në Kosovë.

Policia ka arrestuar një person në Leposaviq, të dyshuar për lëndim të rëndë trupor.

21-vjeçari S.C dyshohet së bashku me tre persona të tjerë, kishte sulmuar viktimën në një lokal në Leposaviq, duke i shkaktuar lëndime të rënda trupore.

“Arrestimi i të dyshuarit është bërë pas pranimit të informatës se i njëjti ndodhej në një lokal në Leshak të Leposaviqit, ndaj të cilit gjithashtu ishte lëshuar Urdhërarresti nga Gjykata Themelore në Mitrovicë në lidhje me rastin e lartcekur”, thuhet në njoftim.

Të njëjtit gjatë kontrollit i është gjetur drogë, ndërsa me vendim të Prokurorit ai është dërguar në paraburgim për 48 orë.

“I dyshuari është dërguar në mbajtje për 48 orë, ndërsa në lidhje me substancën narkotike Drejtoria për Hetimin e Trafikut të Narkotikëve – Mitrovicë Veri ka iniciuar rastin “Blerja, posedimi, shpërndarja dhe shitja e paautorizuar e narkotikëve, substancave psikotrope dhe analoge””, ceket tutje.

Dy persona kanë humbur jetën në një aksident automobilistik në Gjirokastër, pranë kthesës së liqenit të Viroit.

Automjeti tip “Volkswagen Cady” që drejtohej nga një 58-vjeçar është përplasur me automjetin e ushtrisë, tip “Mad” që drejtohej nga një 54-vjeçar.

Përplasja ka qenë e fortë, duke i nxjerrë mjetet nga rruga dhe për pasojë , ka humbur jetën shoferi dhe pasagjeri i Volkswagenit. Ndërkohë, është dëmtuar lehtë 54-vjeçari, i cili po merr ndihmë mjekësore në Spitalin Rajonal Gjirokastër.

Aksidenti tragjik ndodhi rreth orës 14:00, në aksin rrugor “Gjirokastër-Tepelenë”, në vendin e quajtur “Kthesa e Viroit”, ndërkohë që priten hetimet për të zbuluar shkaqet e përplasjes.

Të paktën nëntë persona kanë vdekur gjatë fundjavës, pasi shirat e rrëmbyeshëm përmbytën pjesë të SHBA-së juglindore.

Guvernatori i Kentucky, Andy Beshear, tha se tetë persona kishin vdekur në shtetin e tij dhe theksoi në një konferencë shtypi të dielën se ky numër mund të rritet, shkruajnë mediat e huaja, përcjell Telegrafi.

Qindra njerëz të bllokuar në ujërat e përmbytjeve, shumë të ngecur në makinat e tyre, u shpëtuan dhe Beshear paralajmëroi banorët që “të qëndrojnë larg rrugëve tani”.

Izraeli i ka dërguar urime Kosovës për 17 vjetorin e shpalljes së pavarësisë.

Në një postim në rrjetin social “X”, Ministria e Jashtme izraelite ka publikuar një mesazh urimi në gjuhën shqipe, me një mesazh edhe në anglisht.

Kosova dhe Izraeli zyrtarizuan marrëdhëniet diplomatike në shkurt të vitit 2021 dhe në korrik të të njëjtit vit, Kosova hapi një ambasadë në Jerusalem.

Izraeli është vendi i fundit që ka njohur pavarësinë e Kosovës.

Policia e Kosovës (PK) përmes raportit 24 orësh ka njoftuar se tri vajza janë raportuar të zhdukura në Malishevë dhe Suharekë.

Në Malishevë një burrë i ka raportuar të zhdukura dy vajzat e tij.

“Më 16.02.2025 Ankuesi m/k ka njoftuar policinë se dy vajzat e tij kanë dalë nga shtëpia dhe nuk janë kthyer”, thuhet në raportin e Policisë.

Ndërkohë në Suharekë një grua e ka raportuar të zhdukur vajzën e saj.

“Më 16.02.2025 ankuesja femër kosovare ka raportuar se vajza e saj është larguar nga shtëpia dhe nuk dihet asgjë për vendndodhjen e saj”, thuhet në raportin e Policisë.

Të dy rastet thuhet se janë nën hetime.

Ambasadori i Britanisë së Madhe në Kosovë, Jonathan Hargreaves ka uruar Kosovën me rastin e Ditës së Pavarësisë.

Ai ka thënë se shteti i tij është krenar që feston arritjet e Kosovës si shtet demokratik.

“Ne mezi presim të punojmë së bashku për sigurinë tonë të përbashkët, stabilitetin e rajonit dhe për miqësinë edhe më të thellë midis vendeve tona”, ka shkruar Hargreaves.