Category: Lajme

Presidentja Vjosa Osmani me rastin e dhënies së dekoratës “Urdhri Hero dhe Heroina e Kosovës”, për Fehmi dhe Xhevë Lladrovcit, Ramiz Lladrovci, e ka falënderuar duke theksuar se “vlerësimi për heronjtë, dëshmorët dhe martirët e lirisë, është rruga për të tashmen dhe të ardhmen e ndritur”.

“Fehmiu dhe Xheva, jetuan dhe u sakrifikuan bashkë për lirinë e Kosovës, andaj, ata i takojnë Kosovës dhe kombit, të cilët me shembullin e tyre na dëshmuan vlerën e lirisë me përkushtimin e pashoq, duke mbetur trashëgimi për gjenerata”, ka shkruar ai.

Postimi i plotë i Lladrovcit në rrjetin social:

Me rastin e 17 vjetorit të Pavarësisë së Kosovës, Presidentja Vjosa Osmani, nderoi veprën dhe sakrificën e heroit dhe heroinës, Fehmi dhe Xhevë Lladrovci.

Në emër të Familjes Lladrovci, dekoratën e pranoi Kosovarja, me këtë rast, në motivacionin e Presidentes Osmani thuhet:

Fehmi Lladrovci, i rënë në krye të betejës, kundër forcave serbe, mbetet një nga figurat heroike të luftës çlirimtare të Kosovës, bazuar në vendimin paraprak, i dorëzohet sot dekorata “Urdhri Hero i Kosovës”, post mortem, Fehmi Lladrovcit për trimëri dhe sakrificë për lirinë e Kosovës.

Xhevë Lladrovci, e rënë përkrah burrit të saj Fehmi Lladrovci mbetet ndër gardianet e përjetshme të lirisë së Republikës së Kosovës, bazuar mbi vendimin paraprak, i dorëzohet sot dekorata “Urdhri Heroinë e Kosovës”, post mortem Xhevë Lladrovci, për trimëri dhe sakrificë për lirinë e Kosovës.

Familja Lladrovci dhe Krasniqi, me rastin e 17 vjetorit të Pavarësisë së Kosovës, ndjehen të nderuara, nga Presidentja Osmani, me rastin e akordimit të urdhrit “Hero dhe Heroina e Kosovës” për Fehmi dhe Xhevë Lladrovcin.

Fehmiu dhe Xheva, jetuan dhe u sakrifikuan bashkë për lirinë e Kosovës, andaj, ata i takojnë Kosovës dhe kombit, të cilët me shembullin e tyre na dëshmuan vlerën e lirisë me përkushtimin e pashoq, duke mbetur trashëgimi për gjenerata.

Faleminderit Presidente Osmani!

Vlerësimi për heronjtë, dëshmorët dhe martirët e lirisë, është rruga për të tashmen dhe të ardhmen e ndritur!

Kryetari i Partisë Demokratike, Sali Berisha, në një konferencë për shtyp të mbajtur këtë të mërkurë, ka kërkuar nga FBI që të hetojë mënyrën se si janë shpenzuar fondet amerikane në Shqipëri.

“Në hierarkinë e shpërdorimit të fondeve të taksapaguesve amerikanë dhe pasurimit të elitave të ekstremit të majtë në vende të ndryshme të botës, Shqipëria është një rast flagrant. Delina Fico, bashkëjetuesja aktuale e ministrit Blendi Çuçi dhe ish-bashkëjetuesja e kryeministrit Edi Rama, ka përfituar shuma të konsiderueshme përmes projekteve të USAID-it” deklaroi Berisha.

Sipas tij, këto fonde janë përdorur për të ndikuar në kapjen e sistemit të drejtësisë nga qeveria.

“Delina Fico dhe këshilltarët e saj ligjorë, përmes kompanisë së saj, kanë afruar shërbime për Gjykatën e Lartë dhe sistemin e drejtësisë, duke përfituar në mënyrë të paligjshme rreth dhjetë milionë euro nga fondet e USAID-it. Madje, paga e saj është dy herë më e lartë se ajo e ambasadorit të SHBA në Shqipëri,” shtoi Berisha, raporton euronews.al

Ai i bëri thirrje FBI-së që të kryejë një hetim të thelluar për të zbardhur sipas tij shpërdorimet e fondeve në nivelet më të larta qeveritare.

“E kuptoj se censura ndaj këtyre abuzimeve është e fortë, por unë nuk po merrem me asgjë tjetër veçse me fondet e taksapaguesve amerikanë, të cilat janë keqpërdorur në mënyrë të tmerrshme. Përgjegjës për këtë janë Edi Rama dhe Blendi Çuçi,” tha ai.

Duke kritikuar atë që e quajti kontroll politik mbi drejtësinë, Berisha u shpreh se “një prokurori e pavarur do të kishte nisur hetimet menjëherë mbi këto raste”.

Ai premtoi gjithashtu një auditim të plotë të fondeve me ndihmën e ekspertëve shqiptarë dhe amerikanë, duke garantuar se do të kërkohet mbajtja e përgjegjësisë ligjore.

Kryeministri i Republikës së Kosovës, Albin Kurti ka pranuar letër urimi nga Kryeministri i Maqedonisë së Veriut, Hristijan Mickoski me rastin e 17-vjetorit të shpalljes së Pavarësisë së Kosovës, raporton EO.

“Ky rast më mundëson të ritheksoj angazhimin tim të sinqertë për thellimin e mëtejshëm të marrëdhënieve miqësore dhe bashkëpunimit ndërmjet vendeve tona”, thuhet në urimin e kryeministrit Mickoski.

Duke i dëshiruar Republikës së Kosovës dhe qytetarëve të saj progres, mirëqenie dhe prosperitet, kryeministri Mickoski është shprehur i bindur se me përpjekje të përbashkëta do të vazhdojmë të forcojmë lidhjet në të gjitha fushat me interes të përbashkët dhe do të përmirësojmë bashkëpunimin tonë në kuadër të nismave rajonale dhe shumëpalëshe.

Pavarësisht përhapjes së virozave dhe rastit të meningitit akut, që ka rritur ndjeshëm pasigurinë e prindërve për shëndetin e fëmijëve, shkollat në Durrës nuk janë dezinfektuar, ndryshe nga kopshtet dhe çerdhet.

Mungesat në institucionet arsimore parauniversitare janë rritur ndjeshëm, veçanërisht në shkollat “Kushtrimi i Lirisë’ “Eftali Koçi”, që e bëjnë mësimin në të njëjtën godinë, ku mungesat ditët e fundit arrijnë deri në 80% në klasa, pas konfirmimit të rastit me meningit akut.

Megjithatë, mësimi vijon edhe në klasa me vetëm një nxënës, vendim që ka shkaktuar reagime nga prindërit dhe mësuesit.

Drejtoresha e Qendrës Ekonomike të Arsimit në Durrës, Lindita Muhedini, sqaron se dezinfektimi është kryer vetëm në çerdhet dhe kopshtet me fjetje, për shkak të mungesave të shumta, ndërsa për shkollat nuk ka pasur një kërkesë zyrtare nga autoritetet arsimore.

Mungesa e një koordinimi mes institucioneve arsimore dhe autoriteteve shëndetësore mbetet shqetësim për prindërit, që kërkojnë masa për të mbrojtur shëndetin e fëmijëve në moshën shkollore. /TCH

Nga rezultatet preliminare të publikuara në Komisionin Qendror të Zgjedhjeve(KQZ), Partia Demokratike e Kosovës (PDK) ka marrë 184 mijë e 499 vota ose 22.05 për qind të votave nga zgjedhjet parlamentare të mbajtuara më 9 shkurt.

Ndërsa, kandidati për kryeministër nga Partia Demokratike e Kosovës (PDK), Bedri Hamza ka marrë brenda listës në partinë e tij 122 mijë e 326 vota nga ato që janë numëruar deri më tani sipas raportimeve në media.

Krahas këtyre votave të numëruara deri tani që ka marrë PDK më 9 shkurt, del se 66 për qind të tyre i ka fituar Hamza nga votat e përgjithshme në PDK, raporton KosovaPress.

Në zgjedhjet 2021, PDK ka pasur 148 mijë e 285 vota, apo 17.09 për qind.

Deri më tani nuk janë numëruar votat e diasporës, votat me kusht dhe votat e personave me aftësi të kufizuara.

Në përgjithësi, numri i shtetasve të Kosovës të regjistruar për të votuar jashtë Kosovës ishte 104 mijë e 924, prej të cilëve 20 mijë e 324 ishin regjistruar për votim në përfaqësi diplomatike dhe votuan 15 mijë 352, ndërkaq për votimin përmes postës ishin regjistruar 84,600 shtetas.

Duke u mbështetur në të dhënat e KQZ-së, numri i zarfeve me fletëvotimeve nga vendvotimet me kusht është 12 mijë e 801, të cilat gjithashtu do t’i nënshtrohen verifikimit, i cili përfshin krahasimin me listën e votuesve të nënshkruar në vendvotime të rregullta. Ndërkaq, numri i votave të personave me nevoja të veçanta është 2 mijë e 597 vota.

Grafika:

Qeveria franceze njohu zyrtarisht sot rolin e imamit si profesion, duke e shtuar atë në listën e profesioneve nga Agjencia Franceze e Punësimit, raporton Anadolu.

Ministri i Brendshëm Bruno Retailleau e bëri njoftimin gjatë seancës përmbyllëse të takimit të dytë të Forumit Francez të Islamit (FORIF), duke theksuar rëndësinë e njohjes.

Retailleau tha se dialogu midis shtetit dhe përfaqësuesve fetarë myslimanë duhet të bazohet në besim dhe përgjegjësi.

Ai theksoi se muslimanët refuzojnë shtrembërimin e besimit të tyre nga ideologjitë ekstremiste.

Ndërsa pohoi se shteti nuk duhet të ndërhyjë në institucionet fetare, Retailleau vuri në dukje se mund të ofrojë mbështetje.

Në kuadër të nismës, roli i imamit është përfshirë zyrtarisht në listën zyrtare të profesioneve të njohura në Francë.

Ai e përshkroi masën si një hap historik, duke shënuar njohjen e parë të tillë në vend.

Gjithashtu, ai njoftoi krijimin e një përshkrimi zyrtar të punës dhe kontratave të punës për imamët, duke ofruar një kuadër të strukturuar për punën e tyre.

Retailleau trajtoi gjithashtu shqetësimet për islamofobinë në Francë, duke zbuluar se vitin e kaluar u regjistruan 173 sulme antimuslimane.

Ai pranoi, megjithatë, se numri aktual ka të ngjarë të jetë më i lartë për shkak të mosraportimit nga viktimat.

Për të luftuar krimet, qeveria do të prezantojë një platformë të re ankesash kushtuar raportimit të incidenteve islamofobike.

Klerikët muslimanë që punojnë në spitale dhe ushtri do të njihen tashmë zyrtarisht si pjesë e shërbimit publik, duke siguruar që rolet e tyre të njihen zyrtarisht brenda institucioneve shtetërore.

Kryeministri i Republikës së Kosovës, Albin Kurti ka pranuar letë urimi nga kryeministri i Malit të Zi, Milojko Spajić me rastin e 17-vjetorit të shpalljes së Pavarësisë së Kosovës.

“Më vjen mirë që mund të them se marrëdhëniet dypalëshe ndërmjet Malit të Zi dhe Republikës së Kosovës vazhdojnë të zhvillohen në frymën e fqinjësisë së mirë dhe respektit të ndërsjellë. Besoj se në periudhën në vijim duhet të merren parasysh modalitetet për rritjen e mëtejshme të bashkëpunimit, veçanërisht kur bëhet fjalë për lidhjen infrastrukturore dhe forcimin e aktivitetit ekonomik”, thuhet në urimin e kryeministrit Spajić.

Ai gjithashtu është shprehur i bindur në përmbushjen e pritjeve të partnerëve evropianë, për të arritur qëllimin tonë strategjik – anëtarësimin e plotë në Bashkimin Evropian, i cili ndër të tjera, do të krijojë perspektivë për prosperitet ekonomik.

Organizata e Veteranëve të Luftës të Ushtrisë Çlirimtare të Kosovës ka shprehur shqetësimin për gjendjen shëndetësore të ish-presidentit Hashim Thaçi.

Në reagim thuhet se janë të indinjuar me heshtjen e institucioneve të Kosovës, të cilët sipas tyre nuk po reagojnë ndaj padrejtësive të Gjykatës Speciale dhe po ashtu që nuk po e mbajnë opinionin publik të infomurar për gjendjen shëndetësore të tyre.

“Kërkojmë nga Gjykata Speciale që të japë një raport të qartë dhe zyrtar mbi gjendjen shëndetësore të ish-presidentit Thaçi dhe bashkëluftëtarëve tanë që po mbahen padrejtësisht në paraburgim që mbi katër vite”, thuhet në reagimin e kësaj organizate.