Category: Lajme

Kryeministri në detyrë, Albin Kurti, ka reaguar pas hyrjes në fuqi të pagës minimale prej 500 eurosh, duke e cilësuar këtë si një sukses të qeverisë së tij.

Ai theksoi se paga minimale kishte mbetur e pandryshuar për më shumë se një dekadë, ndërsa gjatë mandatit të qeverisë së tij, sipas tij, ajo është rritur katër herë, nga 130/170 euro në 250 euro, më pas në 350, 425 dhe tashmë në 500 euro.

Kurti u shpreh se nga kjo rritje do të përfitojnë rreth 150 mijë punëtorë të sektorit privat, duke shtuar se me qeverisjen e tij është arritur trefishimi i pagës minimale.

“Pra, për më shumë se një dekadë para qeverisjes tonë paga minimale ishte e ultë dhe e pandryshueshme. Ndërkaq për më pak se gjysmë dekade me ne, kemi trefishim të pagës minimale. Rritjen dhe zhvillimin ekonomik të Republikës sonë do ta përcjellim gjithnjë me shtim të mirëqenies për të gjithë”, ka shkruar Kurti në Facebook.

Altin Krasniqi, djali i ish-kryeparlamentarit Jakup Krasniqi ka reaguar përmes Facebook rreth mbajtjes në Hagë të ish-ushtarëve të UÇK-së.

Përmes një postimi në Facebook, deputeti i PDK-së tha se nga 4 nëntori i vitit 2020 kanë kaluar 2049 ditë.

Ai i cilësoi këto ditë si ‘të vjedhura’, teksa shtoi se pritjes po i vie fundi.

“Vertet na jane vjedhur 2049 dite, por nuk do të mund të na e vjedhin kurrë të vërtetën. E ndersa pritjes po i vie fundi, kam vetem nje gje per te thene: Çlirimtarët kanë qenë, janë dhe do të mbeten heronj”, ka shkruar ai.

Policia e Kosovës, ka njoftuar se ka arrestuar një person në Klinë, pasi që i njëjti ka ushtruar dhunë psikike dhe fizike ndaj gruas së tij.

Në raport shtohet edhe se, viktima ka pranuar tretman mjekësor dhe se, pas intervistimit ajo është dërguar te familja e saj.

‘’DHUNË NË FAMILJE

Klinë 30.06.2026 – 21:00. Është arrestuar i dyshuari mashkull kosovar, për shkak se kishte ushtruar dhunë psikike dhe fizike ndaj bashkëshortes së tij. Si pasojë e dhunës, viktima ka pranuar tretman mjekësor dhe pas intervistimit është dërguar te familja e saj, kurse i dyshuari pas intervistimit me urdhër të prokurorit është liruar në procedurë të rregullt’’, thuhet në raport.

Një tërmet me magnitudë 3.8 ka lëkundur Kosovën pak minuta më parë.

Sipas të dhënave të EMSC-së, tërmeti ishte me magnitudë 3.8 dhe u regjistrua në orën 09:46.

Epiqendra ishte në rajonin kufitar mes Kosovës, Serbisë dhe Maqedonisë së Veriut, rreth 9 kilometra në jug të Leskovacit, në jug të Serbisë, ndërsa thellësia e tij ishte 5 kilometra.

Lëkundjet janë ndier edhe në disa pjesë të Kosovës. Deri më tani nuk ka raportime për dëme materiale apo persona të lënduar.

Në rrugën “Ymer Aliu” në Prishtinë, të martën rreth orës 22:20, janë arrestuar dy të dyshuar meshkuj kosovarë nën dyshimin për grabitje.

Sipas policisë, të dyshuarit, nën kërcënimin e thikës, u kishin marrë tre viktimave, dy femrave braziliane dhe një mashkulli rumun dy telefona celularë, 1500 euro dhe disa bizhuteri, para se të largoheshin në drejtim të panjohur.

Gjatë kontrollit, njësitë policore kanë gjetur dhe konfiskuar dy telefonat e grabitur, një pjesë të parave, bizhuteritë si dhe dy thika që dyshohet se janë përdorur në rast.

Me vendim të prokurorit, të dyshuarit janë dërguar në mbajtje për 48 orë.

Kryeministri në detyrë i Kosovës, Albin Kurti, ka theksuar rëndësinë e marrëdhënieve mes Kosovës dhe Shteteve të Bashkuara të Amerikës, duke vlerësuar kontributin amerikan në lirinë dhe shtetndërtimin e vendit.

Në një postim pas pjesëmarrjes në shënimin e Ditës së Pavarësisë së SHBA-së në Ambasadën Amerikane në Prishtinë, Kurti ka përkujtuar vlerat themelore të Deklaratës së Pavarësisë së SHBA-së.

“Jeta, Liria dhe Kërkimi i Lumturisë, janë të veçuara në preambulën e Deklaratës së Pavarësisë së Shteteve të Bashkuara të Amerikës, në mesin e të drejtave të patjetërsueshme, si themel i qeverisjes që krijohet me miratimin e popullit,” ka shkruar Kurti.

Ai theksoi se populli i Kosovës për një kohë të gjatë ka qenë i privuar nga këto të drejta, ndërsa ka shtuar se përvoja e Kosovës është e lidhur ngushtë me mbështetjen amerikane.

“Prandaj, këmbënguljes dhe sakrificës së popullit tonë për liri e pavarësi, natyrshëm i erdhi ndihma amerikane,” ka deklaruar ai.

Kurti gjithashtu u shpreh mirënjohës për SHBA-në, duke theksuar se Kosova mbetet falënderuese për “ndihmën, partneritetin dhe aleancën e pazëvendësueshme” me Shtetet e Bashkuara.

Sot rreth orës 06:00 është raportuar për një zjarr në rrugën “Sylejman Vokshi” në Prishtinë.

Lajmin e ka bërë të ditur zëdhënësi i Policisë së Kosovës për Prishtinën, Enis Pllana.

Sipas tij, policia menjëherë pas pranimit të informatës ka dalë në vendin e ngjarjës, si dhe ekipet e zjarrfikësve të cilat kanë arritur ta lokalizojnë zjarrin.

“Rreth orës 06:00, është raportuar për një zjarr në rrugën ‘Sylejman Vokshi’ në Prishtinë. Menjëherë pas pranimit të informatës, njësitë policore kanë dalë në vendin e ngjarjes, si dhe ekipet e zjarrfikësve, të cilat kanë arritur ta lokalizojnë zjarrin. Sipas informacioneve fillestare, nuk raportohet për persona të lënduar, ndërsa si pasojë e zjarrit janë dëmtuar dy vetura”, tha Pllana.

Aktualisht, hetuesit policorë janë duke ndërmarrë veprimet e nevojshme për të sqaruar plotësisht rrethanat e ngjarjes.