Category: Lajme

Aleanca Kosovar e Bizneseve kanë reaguar sot pasi ka hyrë në fuqi rritja e pagës minimale në vlerë 500 euro. AKB ka thënë se rritja duhet të bazohet në ligj, analiza ekonomike dhe dialog social, dhe jo në vendim të njëanshme.

AKB ka listuar disa pyetje në drejtim të Qeverisë për atë se ku janë bazuar kur kanë vendosur për rritjen e pagës minimale.

Gjithashtu kanë rikujtuar faktin se veteranët e UÇK’së janë lënë jashtë saj, duke e cilësuar si një vendim të padrejtë.

Reagimi i plotë:

AKB: Rritja e pagës minimale duhet të bazohet në ligj, analiza ekonomike dhe dialog social – jo në vendime të njëanshme

Aleanca Kosovare e Bizneseve (AKB) e mbështet parimisht rritjen e pagave dhe përmirësimin e mirëqenies së punëtorëve, por kundërshton mënyrën se si Qeveria e Kosovës ka vendosur rritjen e pagës minimale në 500 euro.

Sipas legjislacionit në fuqi, paga minimale nuk duhet të ndryshohet me vendime të njëanshme, por mbi bazën e kritereve të përcaktuara me ligj dhe pas konsultimeve në Këshillin Ekonomik-Social (KES). Ligji parasheh që gjatë përcaktimit të pagës minimale të merren në konsideratë tregues ekonomikë dhe socialë, si: shkalla e inflacionit, kostoja e jetesës, niveli i pagave, produktiviteti i punës, zhvillimi ekonomik, niveli i punësimit dhe gjendja në tregun e punës.

AKB pyet publikisht Qeverinë e Kosovës:

– Cilat nga kriteret e përcaktuara me ligj janë analizuar dhe janë përdorur si bazë për rritjen e pagës minimale në 500 euro?

– Ku është analiza ekonomike që dëshmon se ekonomia dhe bizneset kanë kapacitet ta përballojnë këtë rritje?

– Pse është anashkaluar Këshilli Ekonomik-Social, institucioni i krijuar me ligj për të ndërtuar konsensus ndërmjet Qeverisë, punëdhënësve dhe punëmarrësve?

AKB vlerëson se vendimet që nuk mbështeten në analizë ekonomike dhe dialog social rrezikojnë të rrisin ekonominë joformale, të dëmtojnë konkurrueshmërinë e bizneseve, të rëndojnë ndërmarrjet e vogla dhe të mesme dhe të ndikojnë negativisht në punësim.

Po ashtu, AKB rikujton se ka qenë organizata e vetme ekonomike që ka kundërshtuar publikisht përjashtimin e veteranëve të UÇK-së nga përfitimi i pagës minimale. Ky përjashtim është i padrejtë dhe bie ndesh me parimin e trajtimit të barabartë. Vendimi do të ishte më i drejtë dhe më gjithëpërfshirës po të mos i linte veteranët jashtë këtij mekanizmi.

Kryetari i AKB-së, Agim Shahini, deklaroi se nuk është kundër rritjes së pagës minimale. Përkundrazi, ne mbështesim çdo rritje që bazohet në ligj, analiza ekonomike dhe dialog social. Vendimet e njëanshme krijojnë pasiguri për bizneset dhe rrezikojnë ta shtyjnë ekonominë drejt informalitetit. Qeveria duhet të sqarojë se cilat kritere ligjore ka zbatuar për këtë vendim dhe pse nuk është respektuar roli i Këshillit Ekonomik-Social.

AKB i bën thirrje Qeverisë së Kosovës që të respektojë ligjin, të rikthejë dialogun social dhe të marrë vendime ekonomike mbi baza profesionale, në interes të punëtorëve, bizneseve dhe zhvillimit të qëndrueshëm ekonomik të vendit.

Bashkësia Islame e Kosovës ka reaguar me dhimbje të thellë dhe shqetësim pas lajmit për vrasjen e imamit Gazmen ef. Tairovci në fshatin Zlipotok të komunës së Dragashit.
Në reagim thuhet se, pavarësisht motiveve apo rrethanave të rastit, askush nuk ka të drejtë të privojë tjetrin nga jeta, duke theksuar se jeta e njeriut është dhuratë e Zotit dhe cenimi i saj përbën një nga krimet më të rënda si në aspektin fetar ashtu edhe ligjor.

BIK e ka dënuar ashpër këtë akt, duke kërkuar nga organet e rendit që të ndërmarrin të gjitha veprimet e nevojshme ligjore

Pavarësisht motiveve apo rrethanave të këtij rasti tragjik, askush nuk ka të drejtë ta privojë tjetrin nga jeta. Jeta e njeriut është dhuratë e Zotit të Madhëruar dhe cenimi i saj përbën një nga krimet më të rënda, të dënuara si nga feja, ashtu edhe nga ligji. Dënojmë me ashpërsinë më të madhe këtë akt të rëndë kriminal të kryer ndaj imamit Gazmend ef. Tahirhovci dhe kërkojmë nga organet kompetente që të ndërmarrin të gjitha veprimet e nevojshme ligjore, në mënyrë që autori i këtij krimi të marrë dënimin e merituar në përputhje me ligjin dhe drejtësia të vihet në vend.

Policia e Kosovës, ka njoftuar për një person të arrestuar, i cili ishte në kërkim si i dënuar me një vit burg për vjedhje të rëndë.

I arrestuari është B.Q 25 vjeçar, është dërguar në burg për vuajtjen e dënimit.

Postimi:

Në Prizren arrestohet një i kërkuar dhe i dënuar me 1 (një ) vit burg për veprën “Vjedhje e rëndë”

Prizren, 01 korrik 2026

Më datë 30 qershor 2026, policët e njësitit për realizimin e urdhëresave të Stacionit Policor Prizren, pas veprimeve operative–hetimore kanë arritur të lokalizojnë dhe të arrestojnë të kërkuarin B.Q. mashkull rreth 25 vjeçar nga Prizreni. I njëjti ka qenë në kërkim pasi ishte dënuar 1 (një) vit burg efektiv me vendim të plotfuqishëm të Gjykatës Themelore të Prizrenit.

I arrestuari është dënuar për veprën penale “ Vjedhje e rëndë” nga neni 327, i KPRK-së.

I arrestuari B.Q. fillimisht është sjellë në Stacionin Policor Prizren dhe më pas është dërguar në burg për vuajtjen e dënimit.

Policia mbetet e përkushtuar në zbatimin e ligjit dhe garantimin e sigurisë publike, duke ndërmarrë veprime të vazhdueshme për identifikimin dhe arrestimin e personave të kërkuar, si dhe për parandalimin e veprave penale që cenojnë shëndetin dhe mirëqenien e qytetarëve.

Kyçja në centralin e Vlorës, vazhdon të jetë qëndrimi i Qeverisë së Kosovës sa i përket thirrjes së SHBA-së për t’iu bashkuar projektit strategjik të LNG-së. Këtë qëndrim e ka ripërsëritur të martën në një intervistë në ATV, ministrja e Ekonomisë, Artane Rizvanolli.

Sipas Rizvanollit, kur diskutohet për këtë temë, s’mund të flitet njëjtë sikur për Serbinë e Bosnje Hercegovinën, sikurse për Kosovën, meqë Kosova s’ka importuar kurrë gaz rus.

“SHBA ka synim heqjen e gazit rus nga ky rajon, mirëpo s’mund të flasim për Kosovën njëjtë sikur të flasim për Serbinë e Bosnje e Hercegovinën, sepse Kosova s’ka importuar kurrë gaz rus. Prej cilit gaz do të pavarësohemi ne”, ka thënë Rizvanolli.

Ndonëse Kosova nuk importon gaz rus, importon energji elektrike nga shtete të cilat janë të varura nga gazi rus. E pyetur lidhur me milionat që importohen, Rizvanolli është arsyetuar se të dhënat e Doganës së Republikës së Kosovës s’janë të sakta, meqë sipas saj, aty përfshihet edhe rryma që kalon tranzit nëpër Kosovë.

“Shifrat e importit s’janë të sakta. Shifrat e Doganës që iu referohen të gjithë janë shifra që përfshijnë energjinë që kalon tranzit nëpër Kosovë. Shifra reale është 30-40 % më e ultë, varësisht se në cilin vit e shikon”, ka thënë Rizvanolli.

Tutje në këtë intervistë, ministrja e Qeverisë Kurti ka thënë se sa i përket projektit të gazit, aktualisht s’ka një koncept specifik dhe sipas saj, vendimi për këtë çështje s’mund të merret as bazuar në euforinë e debateve televizive e as në diskutimet parazgjedhore.

“Duhet të kemi një gjë të qartë, s’ka një projekt në tavolinë, për të cilin jemi duke folur. Do të doja që të gjithë ata që flasin për gazin, të fillojnë me atë e të shpjegojnë se çfarë po mendojnë për gazin”, ka thënë Rizvanolli në ATV.

E pyetur nëse ky qëndrim i Qeverisë Kurti nënkupton që Kosova s’do të shtrojë rrjet të gazit brenda vendit, Rizvanolli ka thënë se ky “s’është qëndrimi” dhe se do të merret një vendim që do të jetë transparent.

“Do të bëhet duke i marrë parasysh konsideratat politike dhe konsideratat ekonomike”, ka shtuar ajo.

Sipas Rizvanollit, sa i përket kësaj teme, nuk shtrohet diskutimi nëse Kosova është me Amerikën apo me Rusinë.

Ministrja ka thënë që për projektin në fjalë sigurisht që do të shikohen gjërat me llupë sa i përket asaj se a i konvenon Kosovë, por gjithashtu edhe duke marrë parasysh aspektin strategjik.

“Sigurisht që shihet si vendim strategjik, por edhe pse është vendim strategjik nuk do të thotë të mos matet me gram. Edhe vendimet strategjike duhet të merren në mënyrë të tillë, që të dinë qytetarët se sa do të na kushtojë neve si qytetarë. Unë s’mund të them një qëndrim për sot, duke qenë se s’kemi një koncept për projektin”, ka thënë Rizvanolli.

Presidenti i Shteteve të Bashkuara, Donald Trump, fitoi më shumë se 1 miliard dollarë vitin e kaluar nga aktivitetet e tij të biznesit në fushën e kriptovalutave, sipas raportit të detyrueshëm financiar për vitin 2025, shkruan BBC.

Në një deklarim financiar prej 927 faqesh, ai raportoi 635 milionë dollarë të ardhura nga honoraret e monedhës meme të Trumpit, vlera e së cilës ka rënë ndjeshëm nga lançimi i saj, vetëm pak ditë para se ta merrte detyrën.

Ai raportoi gjithashtu mbi 500 milionë dollarë të ardhura nga World Liberty Financial, një kompani e kriptovalutave e themeluar nga djemtë e tij dhe fëmijët e të dërguarit të tij të posaçëm, Steve Witkoff.

Trump fitoi edhe miliona të tjerë nga pasuritë e paluajtshme dhe produktet me markën Trump. Megjithatë, Shtëpia e Bardhë mohoi se ai po përfitonte nga posti i presidentit.

Të ardhurat e raportuara në deklarimin më të fundit financiar tejkalojnë ndjeshëm ato të raportit të vitit 2024, kur Trump kishte deklaruar mbi 600 milionë dollarë të ardhura.

Por Shtëpia e Bardhë, e cila ka theksuar vazhdimisht se Trump i ka vendosur bizneset e tij në një fond të administruar nga djemtë e tij, mohoi sërish se ekziston ndonjë konflikt interesi.

Zëvendëssekretarja për shtyp e Shtëpisë së Bardhë, Anna Kelly, tha se presidenti e ka bërë me krenari SHBA-në “kryeqytetin botëror të kriptovalutave”.

“As presidenti dhe as familja e tij nuk janë përfshirë ndonjëherë – dhe nuk do të përfshihen kurrë – në konflikte interesi”, tha ajo në një deklaratë.

Ajo shtoi: “Të gjitha veprimet e Presidentit Trump dhe administratës së tij ndërmerren në interesin më të mirë të popullit amerikan – dhe çdo i ashtuquajtur ‘gazetar’ që pretendon të kundërtën, thjesht po riciklon të njëjtin narrativ të lodhur dhe të rremë që demokratët dhe mediat tradicionale kanë përhapur prej një dekade”.

Vetë presidenti ka theksuar gjithashtu se ai nuk i nënshtrohet ligjeve federale për konfliktin e interesit.

Trump dikur ishte kritik ndaj kriptovalutave, duke e quajtur famshëm Bitcoinin një “mashtrim” dhe “një katastrofë që pret të ndodhë”.

Por deklarimi i së martës tregon se të ardhurat e tij nga kriptovalutat i tejkalojnë ndjeshëm ato nga biznesi i pasurive të paluajtshme, i cili fillimisht e bëri të famshëm.

Ai fitoi rreth 77 milionë dollarë nga klubi i tij Mar-a-Lago dhe 122 milionë dollarë nga klubi i golfit në Doral të Floridës.

Ai gjithashtu fitoi më shumë se 30 milionë dollarë nga secili prej klubeve të golfit në Bedminster të New Jersey-t, Jupiter të Floridës dhe Turnberry të Skocisë.

Sipas deklarimit financiar, Trump fitoi miliona të tjerë edhe nga sipërmarrje të tjera biznesi.

Këto përfshinin 4.7 milionë dollarë honorare nga orët me markën Trump, si dhe nga Biblat, atletet, parfumet dhe kitarat me markën Trump.

Teksa udhëheqësit e NATO-s po përgatiten për samitin në Turqi, që mbahet javën e ardhshme, planet e aleancës për samitin në Shqipëri vitin e ardhshëm janë vënë në pikëpyetje.

Radio Evropa e Lirë ka konfirmuar nga burimet se Tirana nuk përmendet në draft-deklaratën për samitin e NATO-s – që mbahet në Ankara javën e ardhshme – si vend ku do të mbahet samiti i radhës.

Ndërkaq, agjencia Reuters, duke u thirrur në burime, tha se mbajtja e samitit në Tiranë është vënë në pikëpyetje për shkak të rezistencës nga administrata amerikane dhe pakënaqësia në mesin e shteteve aleate me shpenzimet e ulëta për mbrojtje nga Shqipëria.

Mospërmendja e Shqipërisë në draft-deklaratën vjen teksa anëtarët evropianë të NATO-s synojnë t’i dëshmojnë presidentit amerikan, Donald Trump, në Ankara se kanë bërë përparim sa i përket zotimeve për shpenzimet për mbrojtjen dhe synojnë të shmangin një përplasje të drejtpërdrejtë me udhëheqësin amerikan.

Një nga burimet e Retuersit tha se shpenzimet për mbrojtje të Shqipëri janë të tilla sa po të mbahej samiti i NATO-s në këtë shtet më 2027, Trump mund të zemërohet.

Një diplomat evropian tha se versioni i fundit i tekstit të deklaratës thekson se udhëheqësit mezi presin takimin e tyre të radhës, pa specifikuar kohën dhe vendin ku do të mbahet ky takim.

“Draftet janë drafte, jo vendime”, tha një zëdhënës i Qeverisë shqiptare për Reuters kur u pyet për draft-deklaratën, për të cilën ende po negociohet dhe mund të pësojë ndryshime.

Shtëpia e Bardhë nuk deshi të komentonte, ndërkaq një zyrtar i NATO-s tha se nuk do të komentojnë për këtë çështje tani.

Në vitet e fundit, deklaratat zyrtare të samiteve të NATO-s kanë pasur referencë të qartë për vendin e samitit pasues. Në samitin në Hagë të mbajtur vitin e kaluar, udhëheqësit thanë në deklaratën e tyre se “mezi presim të takohemi në Turqi më 2026 dhe më pas në Shqipëri”.

Në të njëjtin samit, udhëheqësit e NATO-s iu përgjigjën kërkesës së Trumpit që të zotohen për 5 për qind të Bruto Prodhimit të Brendshëm në shpenzime të mbrojtjes brenda një dekade.

Shtetet kanë premtuar se do të shpenzojnë 3.5 për qind të Bruto Prodhimit të Brendshëm për çështjet bazë të mbrojtjes – si trupat dhe armët – ndërkaq 1.5 për qind në masa të tjera të lidhura me mbrojtjen, sikurse siguria kibernetike.

Derisa shumë shtete të NATO-s kanë rritur buxhetet e tyre për mbrojtjen në muajt e fundit, disa shtete ende nuk e kanë përmbushur qëllimin paraprak të shpenzimeve për këtë fushë deri në 2 për qind.

Shefi i NATO-s, Mark Rutte, tha më herët gjatë këtij muaji se pothuajse të gjitha shtetet e aleancës e kanë arritur synimin prej 2 për qind.

“Vitin e kaluar, Shqipëria, Çekia, Sllovenia nuk e arritën këtë, por janë të përkushtuara që shpenzimet t’i rrisin mbi 2 për qind këtë vit”, tha ai.

Qeveria e Shqipërisë tha në një deklaratë për Reutersin se po “finalizojmë masat e nevojshme fiskale për të harmonizuar shpenzimet e Shqipërisë për mbrojtjen dhe ato të lidhura me mbrojtjen për vitin 2026 në bazë të trajektores së dakorduar me aleatët e NATO-s në samitin e Hagës”.

“Sapo këto masa të miratohen në ditët në vijim, shpenzimet e Shqipërisë për mbrojtjen dhe ato të lidhura me mbrojtjen për vitin 2026 do të arrijnë në 2.6 për qind të Bruto Prodhimit të Brendshëm në përputhje me Metodologjinë e NATO-s për Shpenzimet e Mbrojtjes. Prej tyre, 2.2 për qind e BPB-së përfaqëson shpenzimet bazë për mbrojtjen, ndërsa 0.4 për qind përfaqëson shpenzime të tjera që lidhen me mbrojtjen dhe sigurinë”, u tha në deklaratë.

Një diplomat evropian tha se Shqipëria ende mund të jetë mikpritëse e samitit.

“Ata po i rrisin shpenzimet, të shohim se çfarë do të prodhojë kjo”, tha diplomati, duke shtuar se “unë ende besoj se samiti i radhës do të jetë në Shqipëri”./REL

Këshilli Prokurorial i Kosovës ka nisur procesin e intervistimit të kandidatëve për pozitën e Kryeprokurorit të Shtetit.

KPK tha se po shënojnë “një etapë të rëndësishme të procedurës kushtetuese dhe ligjore për përzgjedhjen e autoritetit më të lartë të sistemit prokurorial në Republikën e Kosovës”.

“Siç ju kemi informuar më herët, në funksion të garantimit të një procesi transparent, të verifikueshëm dhe të barabartë për secilin kandidat, Paneli Vlerësues, tre orë para fillimit të intervistave, ka hartuar pyetjet standarde të intervistimit në prani të monitoruesve nga radhët e partnerëve ndërkombëtarë dhe organizatat e shoqërisë civile. Paneli Vlerësues do të intervistojë gjatë ditës së sotme z. Atdhe Dema, prokuror në Departamentin për Hetimin e Terrorizmit në Prokurorinë Speciale të Republikës së Kosovës, z. Naim Abazi, prokuror në Departamentin për Hetimin e Korrupsionit dhe Krimit Financiar në Prokurorinë Speciale të Republikës së Kosovës, z. Rafet Halimi, prokuror në Departamentin për Hetimin e Korrupsionit dhe Krimit Financiar në Prokurorinë Speciale të Republikës së Kosovës, z. Shqipdon Fazliu, prokuror në Zyrën e Kryeprokurorit të Shtetit dhe z. Zejnullah Gashi, Kryeprokuror i Prokurorisë Themelore në Prishtinë”, thuhet në njoftim.

Gjatë intervistimit, KPK thotë se “secili kandidat do t’i nënshtrohet të njëjtave standarde të vlerësimit profesional, bazuar në kriteret e përcaktuara me legjislacionin në fuqi dhe aktet nënligjore përkatëse”.

“Në cilësinë e monitoruesve, procesin e intervistimit po e ndjekin përfaqësues të Zyrës së Bashkimit Evropian dhe misionit të OSBE-së në Kosovë, EULEX-it, EU4FAST-WB-së, Institutit të Kosovës për Drejtësi dhe Betimi për Drejtësi, Rrjetit Ballkanik për Gazetari Hulumtuese (BIRN), Grupit për Studime Juridike dhe Politike (GLPS), Rrjetit të Organizatave Joqeveritare AVONET, KDI-së dhe Lëvizjes FOL”, thuhet në njoftim.

KPK thotë se me përfundimin e fazës së intervistimit, Paneli Vlerësues do të vazhdojë “procedurat e mëtejshme të vlerësimit në pajtim me dispozitat ligjore dhe aktet nënligjore në fuqi, deri në përmbylljen e procesit të përzgjedhjes dhe paraqitjen e propozimit për emërimin e Kryeprokurorit të Shtetit, në përputhje me kompetencat e përcaktuara me ligj”.

“Këshilli Prokurorial i Kosovës do të vazhdojë të informojë opinionin publik dhe mediat për ecurinë e këtij procesi deri në përmbylljen e tij, në frymën e përgjegjësisë institucionale dhe respektimit të parimeve të shtetit të së drejtës”, thuhet në fund të njoftimit.

Kryeministri në detyrë, Albin Kurti, ka përsëritur se është në pritje të certifikimit të rezultateve të zgjedhjeve të 7 qershorit nga KQZ që më pas të nisë “pa humbur kohë” diskutimet me partitë tjera për formimin e institucioneve të reja.

“Së pari duhet ta presim certifikimin e rezultateve. Certifikimi i rezultateve duhet të presë për certifikimin e ankesave dhe më pastaj, pa humbur kohë, do të kemi komunikimet dhe diskutimet e nevojshme”.

Kurti nuk iu përgjigj gazetarëve që e pyetën se kë e preferon për koalicion. Ai u arsyetua se është duke u nxituar.

Kosova mbajti zgjedhje të jashtëzakonshme më 7 qershor pasi legjislatura e kaluar dështoi të zgjidhte Presidentin e ri. Me po këtë sfidë do të përballet edhe legjislatura e re me t’u formuar. Sidoqoftë, nga partia e Kurtit, e cila doli e para në zgjedhje, është paralajmëruar se fillimisht do të hidhet në votim Qeveria e më pas Presidenti.

Kryeqyteti turk, Ankaraja, po përgatitet për samitin e NATO-s më 7 dhe 8 korrik. Në kohë luftërash globale dhe tensionesh gjeopolitike, dhe në sfondin e kërcënimeve nga Presidenti i SHBA-së Donald Trump, samiti konsiderohet veçanërisht i rëndësishëm. Turqia i siguron NATO-s ushtrinë e dytë më të madhe dhe siguron krahun juglindor të Aleancës. Prandaj, roli i Ankarasëmbart një peshë të konsiderueshme politike. Për më tepër, një president i SHBA-së pritet në Turqi për herë të parë në 17 vjet. Barack Obama e vizitoi vendin për herë të fundit në vitin 2009.

Megjithatë, përgatitjet kanë rënë në hije nga zhvillimet politike të brendshme. Sipas autoriteteve dhe raporteve, janë arrestuar gjithsej 225 persona, 178 prej të cilëve aktualisht janë në paraburgim. Midis të ndaluarve janë aktivistë të të drejtave të njeriut, përfaqësues të shoqërisë civile, akademikë, aktivistë mjedisorë, gazetarë dhe studentë. Një ndalim dyjavor për tubimet publike është gjithashtu në fuqi në Ankara.

Akuza për terrorizëm

Zyra e prokurorit publik deklaroi se hetimet synojnë “zbulimin e aktiviteteve të organizatave terroriste në të gjithë vendin”. Midis të arrestuarve janë Nevzat Özer, përfaqësuesi i organizatës mjedisore TEMA në Ankara; Dr. Emel Memiş Parmaksız, lektore e ekonomisë në Universitetin e Ankarasë; Yıldız Tar, kryeredaktore e portalit të lajmeve LGBT Kaos GL dhe gazetare si dhe avokatët Semra Demir dhe Kürsat Bafra. Sipas informacioneve aktuale, ata akuzohen për “anëtarësim në një organizatë të armatosur terroriste” dhe janë lënë në paraburgim.

Disa nga të akuzuarit u morën në pyetje për lidhjet e mundshme me organizatën e ndaluar komuniste TKP/ML.

Kjo përfshinte pyetje në lidhje me emrat e koduar të mundshëm, trajnimin ushtarak dhe strukturat organizative. Sipas raportimeve, disa nga të akuzuarit deklaruan në gjykatë se nuk kishin dëgjuar kurrë më parë për organizatën. Akuzat mohohen nga të përfshirët.

Shkencëtarja politike Parmaksız u mor në pyetje gjithashtu në lidhje me këto çështje. Ajo thuhet se u mor në pyetje, ndër të tjera, në lidhje me emrat e koduar, trajnimin e mundshëm në emër të një organizate, pjesëmarrjen në veprime dhe strukturat e komunikimit dhe financiare.

Ajo i mohoi me forcë akuzat: “Nuk kam absolutisht asnjë lidhje ose përkatësi me këtë organizatë terroriste. Unë jam një studiuese. Këto janë akuza shumë serioze. Unë punoj për shtetin tim dhe popullin tim.”

“Qeveria ka nevojë për mbulim pozitiv nga shtypi”

Pse qeveria po ndërmerr këtë veprim pak para samitit të NATO-s, edhe pse në fakt po tërheq vëmendje ndërkombëtare?

Shkencëtari politik Berk Esen, duke folur për DW, e përshkroi situatën si “të vështirë për t’u shpjeguar” dhe “jologjike”: “E kam të vështirë të shpjegoj një zhvillim që unë vetë nuk e kuptoj. Për një qeveri që kërkon mbulim pozitiv nga shtypi para samitit, ky nuk është një zhvillim i favorshëm.”

Në të njëjtën kohë, ai tregon modele të përsëritura: “Në të kaluarën, ka pasur arrestime të përsëritura nga spektri i krahut të majtë para samiteve të NATO-s. Kjo shpesh interpretohej edhe si një sinjal për SHBA-në.” Megjithatë, në këtë rast, arrestimet përfshijnë edhe individë që, nga perspektiva e autoriteteve, mund të marrin pjesë potencialisht në protesta.

Esen thekson gjithashtu: “Shumë prej të arrestuarve nuk kanë përkatësi politike apo lidhje me skenën e krahut të majtë. Kjo mund të shpjegohet edhe me dobësitë në sistemin e drejtësisë.”

“Abuzim me ligjet”

Human Rights Watch gjithashtu shpreh kritika të forta. Benjamin Ward i organizatës foli për një “abuzim të ligjeve antiterrorizëm për të kryer arrestime masive dhe për të heshtur njerëzit pak para një samiti të NATO-s”. Kjo bie ndesh me vlerat themelore të aleancës.

Ward kërkoi lirimin e menjëhershëm të të ndaluarve. Ai deklaroi gjithashtu se “pastrimi i rrugëve të Ankarasë nga demonstruesit e mundshëm” vetëm sa e bën më të dukshëm represionin në rritje të qeverisë. Aleatët e Turqisë në NATO duhet të përdorin ndikimin e tyre për të sjellë një ndryshim kursi.

Berberët në Gjilan, duke filluar nga sot, më 1 korrik, kanë vendosur të ndryshojnë çmimet e shërbimeve të prerjes së flokëve, shkruan mediumi lokal, Radio Star.

Sipas informatave të fundit, një pjesë e madhe e berberëve kanë rritur çmimin e prerjes së flokëve nga 5 euro në 7 euro.

Në të kaluarën, çmimet e prerjeve varionin nga 3 euro, ndërsa me kalimin e viteve dhe rritjen e kostove të jetesës, pagave dhe shpenzimeve të bizneseve, tarifat janë rritur gradualisht.

Radio Star shkruan se nga sektori kanë bërë të ditur se në disa sallone të qytetit, çmimi i prerjes së flokëve arrin deri në 10 euro, varësisht nga lokacioni dhe lloji i shërbimit që ofrohet.