Category: Lajme

Seancat gjyqësore në Kosovë nuk po zhvillohen për shkak të numri të pamjaftueshëm të prokurorëve. Dhe këto mungesa lidhen direkt me mungesën e buxhetit që është ndarë në Këshillin Prokurorial të Kosovës.

Këto ishin shqetësimet që u paraqiten në mbledhjen e sotme të Këshillit Prokurorial të Kosovës.

Ushtruesi i detyrës së kryeprokurorit të shtetit, Besim Kelmendi tha se në mungesë të prokurorëve seancat gjyqësore nuk po mbahen.

Ai kërkoi që KPK të insistoj tek Qeveria e Kosovës për të ndarë mjete buxhetore për plotësuar numrin e kuadrove të nevojshëm për sistemin prokurorial, raporton KosovaPress.

“Në lëndët primare që i ka prokurori i shtetit aty ku ka aktvendim për fillim të hetimeve efikasiteti është 95 % që në krahasim me vitin 2023 që ishte 89 % dhe vitin 2022 që ishte më i ulët tregon një rritje të efikasitetit edhe përkundër vështirësisë që e kanë përcjell sistemin prokurorial… Në këtë javë ne kemi pas problemet e para që i kam paralajmëruar edhe më herë gjykata edhe pse kanë gjyqtarë më shumë…Seancat gjyqësore nuk po munden me u mbajt për shkak se nuk ka numër të mjaftueshëm të prokurorëve jo më larg se këtë javë ka pas problem Gjykata Themelore e Pejës sepse nuk ka pas prokurorë që mund të shkojnë në seanca… kemi ardhur në një situatë kur buxheti i Kosovës ndahet për numër të gjyqtarëve të cilët nuk mund t’i mbajnë seancat sepse nuk ka numër të mjaftueshëm të prokurorëve”, theksoi ai.

Ushtruesi i detyrës së Kryeprokurorit të Shtetit tha se Qeveria e Kosovës nuk ka ndarë mjete buxhetore as për pozitat që janë të parapara me ligj.

Ai shtoi se në mungesë të buxhetit po paguhen shuma marramendëse për qirat e objekteve ku janë të vendosura Këshilli Prokurorial i Kosovës por edhe Prokuroria Themelore e Mitrovicës dhe Prizrenit.

“Qeveria nuk ka ndarë mjete buxhetore as për pozita të cilat me ligje janë të parashikuara. Janë me vite që neve nuk kemi referenta të ndërmjetësimit edhe pse ligji për ndërmjetësim ka paraparë këto pozita, janë me vite kur nuk janë plotësuar pozitat për bashkëpunëtor profesional edhe pse ligji i KPK parasheh që secili prokurorë me pas një bashkëpunëtor profesional. Pra, mungesa e këtyre mjeteve buxhetore e vështirëson në masë të madhe punën e gjithë sistemit, mungesa e mjeteve për ndërtimin e objekteve për blerjen e objekteve sot e keni Mitrovicën, Prizrenin që për shkaqe burokratike nuk realizohet kërkesa për tu gjetur vendi dhe për tu ndërtuar objekti. Ne paguajmë shuma marramendëse për qira edhe objekti në të cilin jemi neve këtu sot është objekt me qira dhe nuk e dimë kur a do të jemi nesër apo pasnesër në këtë zyrë dhe ku të shkojmë.. Kur neve jemi në këso situata si pritet nga ne efikasitet më i madh kur kushtet tona të punës nuk janë të tilla që na e lehtësojnë dhe mundësojnë një efikasitet të tillë”, tha ai.

Sa i takon raport vjetor të punës së KPK-së për vitin 2024, drejtori i Sekretariatit, Sami Istrefi u shpreh se meqenëse KPK nuk i është aprovuar kërkesa për buxhet shtesë kjo ka shkaktuar vështirësi në punën e prokurorit të shtetit.

Ai njoftoi se gjatë vitit 2024 KPK ka realizuar 96.17 % të buxhetit.

“Gjatë vitit 2024 bazuar në ligjin për buxhetin e Kosovës për vitin 2024 Këshillit i janë ndarë buxhet prej 17 milionë e 265 mijë e 867 euro edhe pse kërkesa jonë ka qenë 19 milionë e 760 mijë e 377 euro dhe kjo kërkesë nuk është aprovuar nga ministria e Financave dhe Transfereve për t’i mbuluar disa pozita ligjore që kemi në sistemin prokurorial të Kosovës ku ka ndikuar direkt në realizimin e aktiviteteve të sistemit prokurorial. Si kërkesë themelore ndaj qeverisë së Kosovës dhe ministrisë së Financave ka qenë edhe lejimi i mjeteve për ndërtimin e Prokurorisë Themelore të Prishtinës kur dihet se Prokuroria Themelore dhe e Apelit ballafaqohen me kushte të vështira të punës së prokurorit të shtetit ashtu edhe administratë”, theksoi Istrefi.

Mungesa e buxhetit, sulmet nga institucionet tjera karshi KPK-së, mos dekretimi i kryeprokurorit të shtetit ishin disa nga sfidat me të cilat u përballë sistemi prokurorial i Kosovës gjatë vitit 2024.

“Mos plotësimi i përbërjes së Këshillit me dy anëtarë, sulmet nga institucionet tjera me qëllim të dëmtimit të besimit të publikut në sistemin prokurorial të Kosovës, mungesa e bashkëpunimit me institucionet tjera për realizimin e takimeve nga deklarata e përbashkët e zotimeve, dorëheqja prokurorëve të komunitetit serb, dorëheqja e anëtarëve të KPK nga radhët e Odës së Avokatëve të Kosovës, buxheti i pamjaftueshëm për të mbuluara të gjitha obligimet e krijuara. Mos dekretimi i kryeprokurorit të shtetit që mbetet tash e sa kohë”, theksoi Istrefi.

Drejtori i Sekretariatit të Këshillit Prokurorial të Kosovës, Sami Istrefi u shpreh se gjatë vitit 2024 Prokurori i Shtetit ka pas në punë mbi 150 mijë kallëzime penale, prej tyre mbi 50 mijë janë pranuar në punë gjatë vitit të kaluar, ndërsa pjesa tjetër është e trashëguar ndër vite.

“Prokurori i shtetit gjatë vitit 2024 ka pas në punë gjithsej 150 mijë e 204 kallëzime penale nga regjistri PP kryes të njohur, nga regjistri PPM kryes të mitur, PPN lëndë të ndryshme, PJN ndihmë juridike ndërkombëtare BPP kryes të panjohur. Nga ky numër i lëndëve 99 mijë e 523 ose 66.26% janë të trashëguara ose si lëndë të pazgjidhura nga vitet paraprake, ku kjo përqindje 50. 681 ose 33.74% janë pranuar në punë gjatë vitit 2024. Gjatë këtij vitit nga ky numër i lëndëve 45 mijë e 481 ose 30.28% e lëndëve në punë janë zgjedhur apo proceduar në organet kompetente. 104 mijë e 173 ose 69.72% e të gjitha këtyre lëndëve janë në proces të trajtimit nga ana e prokurorit të shtetit. Në vitin 2024 janë bartur gjithsej 99 mijë e 523 lëndë, kallëzime penale”, tha ai.

Po ashtu, gjatë kësaj mbledhje të KPK u miratua edhe plani i punës i Sekretariatit të KPK për vitin 2024 teksa u theksua se me ligjin për buxhet nuk është aprovuar asnjë pozitë shtesë.

Gjatë paraqitjes së planit të punës së Këshillit Prokurorial të Kosovës u theksua rekrutimi i 24 prokurorëve, derisa u tha se për 4 vende të rezervuara për komunitetin serb nuk ka pas interesim.

Sa i takon planit Strategjik dhe Plani i Veprimit i Sistemit Prokurorial për vitet 2025-2027 i cili ishte në rend dite në mbledhjen e sotme, për shkak të disa rekomandimeve nga partnerët ndërkombëtarë konkretisht Zyra e Bashkimit Evropian ky plan është shtyrë. /KP

Pas raportimit të mediave serbe se një grup që ka marrë pjesë në organizimin e Banjskës ka mbërritur në Beograd ka reaguar eksperti i çështjeve të sigurisë Avni Islami.

Islami tha se Aleksandar Vuçiq po ndjek një manual të njohur autokratik duke krijuar krizë për të shuar revoltën, raporton KP.

“Me ardhjen e terroristëve të Banjskës në Serbi dhe shfaqjen e paramilitarëve famëkeq pranë Presidencës, ai po inskenon një klimë frike për të justifikuar masa represive ndaj protestuesve më 15 mars. Asgjë nuk është rastësi – kjo është një strategji e pastër e mbijetesës politike përmes kaosit dhe shantazhit”, ka shkruar Ismali në rrjetin social Facebook.

Serbia sipas tij nuk është duke u destabilizuar nga qytetarët e saj, por nga ai që ka kapur pushtetin dhe po përdor grupet kriminale si mburojë politike.

Vesna Malishiq, kryeredaktore e Radarit në Serbi tha se gazetarët e së përjavshmes kishin marrë informacione se një grup që ka marrë pjesë në organizimin e Banjskës ka mbërritur në Beograd.

Komisioni Qendror i Zgjedhjeve (KQZ) para shpalljes së rezultateve të zgjedhjeve parlamentare të 9 shkurtit do të marrë konfirmimet nga Paneli Zgjedhor për Ankesa dhe Parashtresa dhe Gjykata Supreme, nëse në këto institucione ka ndonjë ankesë që kërkon vendimmarrjen e tyre.

Zëdhënësi i KQZ-së, Valmir Elezi tha se aktualisht KQZ-ja është duke pritur vendimmarrjen nga Gjykata Supreme, lidhur me ankesën e paraqitur në këtë institucion nga një subjekt politik i certifikuar.

Pas ndjekjes së këtyre hapave ligjor, ai tha se KQZ-ja mund t’i shpall rezultatet përfundimtare të zgjedhjeve të 9 shkurtit.

“Për të ardhur deri te shpallja e rezultatit përfundimtar te subjekteve politike dhe kandidatëve për deputetë, Komisioni Qendror i Zgjedhjeve është duke ndjekur hapat e paraparë me Ligjin e ri për Zgjedhjet e Përgjithshme dhe aktet nënligjore. Aktualisht, KQZ është duke pritur vendimmarrjen nga Gjykata Supreme lidhur me ankesën e paraqitur në këtë institucion nga një subjekt politik i certifikuar. Para thirrjes së mbledhjes për shpalljen e rezultateve, KQZ do të marrë konfirmimet nga PZAP dhe Gjykata Supreme nëse në këto institucione ka ndonjë ankesën që kërkon vendimmarrjen e tyre dhe nëse KQZ mund të procedoje me shpalljen e rezultateve përfundimtare”, tha ai.

Në zgjedhjet parlamentare të 9 shkurtit, në bazë të rezultateve preliminare të KQZ-së, Vetëvendosje ka dalë e para, e dyta PDK, LDK e treta dhe AAK-Nimsa e katërta.

Pas më shumë se tre orësh qëndrim, ish-presidenti Hashim Thaçi ka dalë nga Qendra Klinike Universitare e Kosovës, ku ishte për vizitë te babai i tij.

Ai u prit me thirrjet “UÇK-UÇK” e “Hashim Thaçi”, ndërsa përshëndeti me dorë qytetarët që ishin mbledhur për të. Krahas qytetarëve, aty është parë edhe vëllai i tij, Gani Thaçi.

Thaçit deri më tani i ishin refuzuar disa kërkesa për ta vizituar babanë e sëmurë.

Vizita e tij u zhvillua në masa të rrepta sigurie, jo vetëm jashtë qendrës së QKUK-së por edhe brenda saj.

I rrethuar nga forcat e shumta policore dhe ato të EULEX-it, Thaçi kishte mbërritur në QKUK rreth orës 11:00.

Pas tri kërkesave të refuzuara, Gjykata Speciale ia ka aprovuar Thaçit kërkesën për të ardhur në Kosovë për të vizituar babanë e sëmurë.

Gjatë ditës së sotme, territori i Kosovës u kaplua nga erëra të forta, e që priten të vazhdojnë edhe për disa orë.

Lidhur me këtë fenomen, ka reaguar Kompania për Distribuimin e Energjisë Elektrike në Kosovë (KEDS), e cila thotë se disa rajone kanë mbetur pa energji elektrike.

Në disa lokacione, sipas KEDS-it, po ashtu janë shkaktuar edhe dëme në rrjetin elektrik shpërndarës.

“Ekipet e KEDS-it kanë dalë në terren menjëherë dhe po punojnë në mënyrë intensive për të rikthyer në normalitet furnizimin me energji elektrike për konsumatorët e afektuar, për çka kërkojmë mirëkuptimin e tyre”, thuhet tutje në njoftimin e kompanisë.

Prokuroria Themelore në Prishtinë ka bërë me dije se në kuadër të hetimeve ndaj të pandehurit G.G. për veprën penale të mashtrimit, të mërkurën ka realizuar dy kontrolle në Gjakovë, në bashkëpunim me Policinë e Kosovës.

Gjatë aksionit, bëhet me dije se autoritetet kanë sekuestruar 55 mijë euro para të gatshme dhe kanë iniciuar një rast të ri për veprën penale të “Shpëlarjes së parave”, raporton KosovaPress.

“Prokuroria Themelore në Prishtinë njofton opinionin publik dhe të dëmtuarit në çështjen penale kundër të pandehurit G.G për veprën penale ‘Mashtrimi’ nga neni 323 pargrafi 4 se në vazhdën e hetimeve ndaj të pandehurit G.G., me datë 12.03.2025 në bashkëpunim me Policinë e Kosovës ka realizuar dy (2) kontrolle në Komunën e Gjakovës, me ç’rast ka sekuestruar edhe pesëdhjetë e pesë (55) mijë euro para të gatshme dhe njëkohësisht ka iniciuar rast në lidhje me veprën penale ‘Shpërlarja e parave’ nga neni 56 i ligjit për parandalimin e pastrimit të parave dhe luftimin e financimit të terrorizimit”, thuhet në njoftim.

Prokuroria njofton se rasti vazhdon të mbetet nën hetime dhe ndodhet në fazën finale.

Ndryshe, ditë më parë prokuroria kishte bërë të ditur se ka sekuestruar 166 parcela të cilat gjenden në komunën e Novobërdës dhe Graçanicës, si dhe dy banesa në Prishtinë në vlerë mbi 1 milionë euro për të cilat ekziston dyshimi i bazuar se janë përfituar me vepër penale.

Rasti sipas njoftimit kishte të bënte ndaj të dyshuarit G.G.

Hashim Thaçi ende po qëndron për vizite te babai i tij i sëmurë në QKUK, raporton EO.

Nuk dihet sa do të zgjasë kjo vizitë, por në oborrin e QKUK-së ka orë që janë mbledhur qytetarë të shumtë për ta përshendetur Hashim Thaçin në të dalë nga kjo vizitë.

Thaçi ka arritur paraditen e sotme në Kosovë me leje të përkohshme nga Gjykata Speciale në Hagë.

Pas tri kërkesave të refuzuara, Gjykata Speciale ia ka aprovuar Thaçit kërkesën për të ardhur në Kosovë për të vizituar babanë e sëmurë.

Një aksident i rëndë ka ndodhur sot në fshatin Duboc të Vushtrrisë.

Aty është aksidentuar autobusi i cili po i transportonte nxënësit.

Si pasojë ka humbur jetën shoferi i autobusit ndërsa disa nxënës kanë pësuar lëndime dhe po trajtohen në Emergjencën e Spitalit “Sheikh Zayed” në Vushtrri.

Lajmin për këtë e ka dhënë kryetari i Komunës së Vushtrrisë, Ferit Idrizi përmes një telegrami ngushëllimi.

“Në një aksident që ka ndodhur gjatë transportit të nxënësve nga fshati Duboc, komuna jonë ka humbur një burrë të ndershëm e një qytetar të përgjegjshëm, shoferin e kësaj linje, Hajzer Sadiku, ndërsa janë lënduar edhe disa nxënës, të cilët tashmë janë duke marrë trajtim në Emergjencën e Spitalit “Sheikh Zayed” në Vushtrri”, ka shkruar Idrizi.

Një shtetas shqiptar i dyshuar për kultivim të drogës është ekstraduar nga Shqipëria në Kosovë dhe është dërguar në mbajtje me vendim të prokurorit.

Ai ishte arrestuar nga autoritetet shqiptare dhe tashmë është dorëzuar te autoritetet kosovare për t’u përballur me drejtësinë.

I dyshuari ishte arrestuar fillimisht më 27 shtator 2024 në Pejë, pasi u kap duke kultivuar 2850 bimë të llojit kanabis-sativa.

Gjatë operacionit policor, u sekuestruan 133.95 kg marihuanë, mbi një ton drogë e përpunuar dhe e papërpunuar, 2530 euro para të gatshme, gjashtë telefona mobil dhe sasi të tjera të konsiderueshme të substancave narkotike, me një vlerë totale prej rreth pesë milionë euro.

Pas arrestimit në Shqipëri, ai u ekstradua në Kosovë, ku tashmë do të përballet me akuzat për kultivim dhe trafikim të narkotikëve.

Aivo Orav, ambasadori i Bashkimit Evropian, mori pjesë në takimin e përbashkët me Këshillin e Bashkëpunimit Rajonal (RCC), ku u theksua rëndësia e bashkëpunimit rajonal.

Përmes profilit të tij në rrjetin social “X” (ish-Twitter), theksoi se në këtë takim u diskutua edhe rreth planit të rritjes, që RCC-ja ofron për partnerët e Ballkanit Perëndimor, përfshirë dhe Kosovën.