Category: Lajme

Pak orë pasi ZRRE-ja njoftoi se ka propozuar shtrenjtimin e rrymës për 15 për qind duke filluar nga muaji prill, ka nisur një fushatë kundër këtij propozimi.

“Asnjecentmeshume” është slogani i kësaj fushate që do të nisë për të kundërshtuar shtrenjtimin e rrymës.

Iniciatori i kësaj fushate është Luan Hasanaj, i cili tha se shumica e qytetarëve nuk mund të përballojnë rritjen e çmimeve.

“Miq, po e nisim një fushatë #ascnjecentmeshume për të e kundërshtuar propopzimin e ZRRE-së për shtrenjtimin e energjisë elektrike. Arsyet janë të bollshme, secili prej nesh i dinë. Shumica e qytetarëve të Kosovës nuk mund të e përballojnë rritjen e çmimeve”, ka thënë Hasanaj.

Vitin e kaluar, ZRRE-ja e uli çmimin për konsumatorët komercialë dhe industrialë për 3 për qind. Por, një vit më herët, më 2023, tarifat u rritën për 15 për qind për të gjitha kategoritë e konsumatorëve.

Aktualisht, për konsumatorët që shpenzojnë deri në 800 kilovatë në orë brenda një muaji, çmimi i rrymës gjatë ditës është 7.79 centë për kilovat, ndërsa për ata që shpenzojnë më shumë se 800 kilovatë, pjesa mbi këtë u llogaritet me çmim prej 14.45 centësh.

Nga ora 22:00 deri në 7:00 të mëngjesit, çmimi për kilovat është 3.34 centë për ata që shpenzojnë deri në 800 kilovatë dhe 6.81 centë për ata që shpenzojnë më shumë.

Komisioni Qendror i Zgjedhjeve pritet që sot t’i shpall rezultatet përfundimtare, pasi deri sot ato ishin preliminare.

Gjykata Supreme ka marrë vendimin për ankesën e fundit të parashtruar nga Partia Demokratike e Ashkalinjëve (PDAK)-LPB.

Supremja ka refuzuar ankesën e PDAK-së lidhur me manipulimet e votave me postë, duke e quajtur edhe si të “pathemeltë”.

Pas që kjo ishte ankesa e fundit në Supreme, Komisionit Qendror të Zgjedhjeve, iu hap rruga për t’i shpallur rezultatet përfundimtare të zgjedhjeve të 9 shkurtit 2025.

Në një njoftim të lëshuar nga KQZ, u bë e ditur se sot do ta bëjë shpalljen e rezultateve përfundimtare të zgjedhjeve të 9 shkurtit.

Kështu ka konfirmuar zëdhënësi i KQZ-së, Valmir Elezi.

“Mund t’iu konfirmoj se të shtunën, më 15 mars 2025, Komisioni Qendror i Zgjedhjeve do të mbajë mbledhjen e radhës dhe në rend dite është shpallja e rezultateve përfundimtare të Zgjedhjeve për Kuvendin e Republikës së Kosovës, 9 shkurt 2025” – ka thënë ai.

PËRGATITI: DRITON SADIKU

Lirinë e privuar e kërkojnë me falje.
22 të burgosur që vuajnë dënimet në burgjet e Kosovës, kanë kërkuar amnisti nga presidentja që nga janari e deri tash.

Ani pse presidentja Vjosa Osmani, e shfrytëzoi fare pak këtë të drejtë kushtetuese deri tash, nga Shërbimi Korrektuese, presin që presidenca të jetë më aktive, për shumë arsye.

“Po presim që të ketë rezultate pozitive sepse në rastet kur personat kanë sjellje pozitive, kanë marrë pjesë në programe rehabilituese, janë shfrytëzues të vikendit, janë barrë për shërbimin korrektues”, deklaroi drejtori i përgjithshëm i ShKK-së, Ismail Dibrani.

Hezitimin e presidentes për t’i falë disa të burgosur, thonë se nuk po kuptojnë, as nga Këshilli për Mbrojtjen e të Drejtave dhe Lirive të Njeriut.

“Nuk e shoh të logjikshme që e themelon vetë komisionin, komisioni ia dërgon propozimet, ndërkaq nuk i beson vlerësimit të komisionit. Në anën tjetër është e drejtë e të burgosurve që të presin mëshirë nga shteti”, tha Behxhet Shala nga KMDLNj.

Aktualisht në të gjitha burgjet apo qendrat korrektuese dënimin e vuajnë 1720 persona por nga KMDLNj-ja thonë se shumica prej tyre meritojnë lirimin.

Sidoqoftë për një të burgosur shteti paguan mbi 800 euro në baza mujore, teksa për një vit, të burgosurit shtetit i kushtojnë afër 1.4 milion euro.

PËRGATITI: ARIAN HAJDARAJ

Që nga ri-funksionalizimi në platformën e-prokurimi dominojnë procedurat e nisura nga komunat.

Të mërkurën e 14 marsit, komuna e Podujevës, publikoi njoftimin për kontratë, për ndërtimin e pishinës gjysmë-olimpike në Podujevë, me vlerë prej 4 milionë euro.

Një ditë më herët, komuna e Ferizajt po ashtu njoftoi se ka nisur procedurat e prokurimit, për ndërtimin e qendrës multifunksionale, me vlerë prej 3.3 milionë euro.

Ndërsa, Gjakova nisi procedurën për rikonstruktimin e një rruge, në vlerë prej 640 mijë euro. Këto në fakt ishin vetëm disa nga projektet me vlerë më të madhe, derisa janë dhjetëra të tjera me shuma më të vogla.

Fillimi I procedurave për projektet që konsiderohen me rëndësi, sipas njohësve të punës së nivelit lokal, tregojnë joseriozitet në raport me besimin e qytetarëve.

“Është vërejtur se autoritete kontraktuese/komunat kanë rritur numrin e procedurave të prokurimit. Kjo është shqetësuese për shoqërinë civile, sepse ata kur zhvillojnë projekte të rëndësishme në fund të mandatit, tregon qasjen e tyre, rreth përgatitjen e tyre për të zhvilluar një fushatë në vititn e fundit të mandatit”, tha Kenan Gashi nga AVONET.

Po ashtu fillimi i projekteve vetëm disa muaj para përfundimit të mandatit, vlerësohet se krijon pasiguri nëse do të përfundohen.

“Kto praktika janë potencial edhe për një proces të padrejtë, që rrezikon cilësinë e projekteve. Këto planifikime shpeshherë nuk përkojnë me kërkesat e qytetarëve”, deklaroi tutje Gashi.

Zgjedhjet komunale do të zhvillohen në nëntor të këtij viti.

PËRGATITI: BENITA ZENELI

Në fillim për disa muaj qe pilot-projekt vetëm në katër komuna. Më pas projekti për Përzgjedhjen e mjekut familjar u zgjerua në tërë vendin dhe synohej të zgjaste 100 ditë.

Megjithatë qytetarët në shumë komuna ende po përballen me probleme sa i përket aplikimit në E-Kosova. Nga komuna e Drenasit madje kërkuan hapjen e një zyre mbështetëse për qytetarët.

“Ajo zyre me kon mbështetëse i qytetarëve që me u regjistrua nëse nuk munden me u regjistrua online, se shumë prej tyre ndoshta nuk din me u regjistruar në E-Kosova, dikush s’ka telefon hiç…”, u pergjigj Ismet Bogiqi, drejtor i QKMF-së në Drenas.

Por nga Ministria e Shëndetësisë iu është thënë se po punohet në këtë drejtim.
Nga dikasteri përmes një përgjigje për ATV thanë se procesi është planifikuar të përfundojë deri në fundvit.

“Procesi i përzgjedhjes së mjekut familjar ende nuk është përmbyllur. Sipas Planit të Veprimit, ky proces do të vazhdojë deri në fund të vitit 2025″, deklaruan nga MSh-ja.

E me ritmin që është duke shkuar ky proces, njohësit janë skeptik që mund të ketë sukses deri në afatin e paraparë.

“S’mundet me përfundu deri atëherë me të gjitha problemet që po paraqiten. Kemi edhe probleme të shumta teknike. Mbi të gjitha MSH-ja duhet të bëjë edhe fushata vetdijesuese dhe të i njoftoj më shumë qytetarët për rëndësinë që e ka përzgjedhja e mjekut familjar.”, tha njohësi i shëndetësisë, Bujar Vitia.

Deri më tani as numri i qytetarëve që bënë përzgjedhjen nuk është aq i lartë.

Përmes platformës E-Kosova, sipas Ministrisë së Shëndetësisë kanë aplikuar vetëm 14 mijë qytetarë.

PËRGATITI: NORA LUTA

Jovica Rakiq, që ishte pjesë e ekipit mjekësor në autoambulancën, që u pa kur u sulmua zyra e Komisionit Komunal Zgjedhor në Mitrovicë të Veriut, ka pranuar se atë ditë kishin pranuar thirrje fiktive, pasi nuk kishte pasur të lënduar.

Duke iu përgjigjur pyetjeve të gjykatës, dëshmitari tha se Qendra e Mjekësisë Familjare udhëhiqet nga strukturat paralele.

Rakiq, ndër të tjera deklaroi se nga vendi i ngjarjes ishin larguar për dhjetë sekonda

Sipas aktakuzës gjatë sulmit, u përdor një autoambulancë për bartje të granatave të dorës, të cilat i mori Milun Millenkoviq. E Rakic, kur u pyet nga mbrojtja e Lunes, mohoi të ketë pasur çanta ndonjë gjë tjetër pos pajisjeve mjekësore.

Ndërkohë, gjatë kësaj seance me pyetjet e mbrojtjes u ballafaqua pjesëtari i PK-së, Idriz Idrizi, që ishte në detyrë më 6 dhjetor të 2022-s.

Idrizi, kishte thënë se sulmi u udhëhoq nga Millun Millenkoviq, i njohur me nofkën Llune, e situata monitorohej nga Aleksandër Vlajic, i cili nga PSRK-ja është duke u hetuar edhe për spiunazh.

Gjykimi në këtë rast do të vazhdoj gjatë majit.

PËRGATITI: BESMIRE KLUNA

Për rreth një orë, Muhamet Demiri priti në stacion të Xhamia e Llapit për të shkuar në Podujevë.

Ai e kritikon vendimin e marrë nga Komuna e Prishtinës që autobusët e linjës Podujeve-Prishtinë të mos hynë në kryeqytet.

‘’Është një prej gjërave me të këqija që mund të ju ndodh qytetarëve me I la në breznicë e me ardh kah, nuk edi as vet nuk edi, past diçka privat, po me duhet me shku në Gjykatë, po është shpenzim’’, tha Demiri.

Udhëtarët në këtë relacion ankohen se po dëmtohen edhe financiarisht meqë taksitë, për më tepër ilegalë, kushtojnë dyfish më shumë.

‘’Po I shoh taksistat me ata furgonat po vin po I marrin njerëzit me ka 2 euro po I marrin për një udhëtim që është dyfyshi. Jam duke shkuar në një promovim të një libri mund të shkoj ose të mos shkoj por njerëzit që kanë punë çdo ditë ju bjen që gati krejt paga të ju shkoj në udhëtim’’, u përgjigj Shaban Pllana, qytetar.

Në anën tjetër pronarët e autobusëve të kësaj linje protestën para komunës e vazhduan edhe këtë të premte.

‘’Në rast se do me thanë kryhet puna në këtë drejtim edhe anulojnë vendimin na menjëherë I largojmë autobusat dhe përfundon greva, përndryshe nuk përfundon’’, tha Sadat Kurtolli, shofer i autobusit në linjën Podujeve – Prishtinë.

Sipas Komunës se Prishtinës, vendimi për ndalimin e hyrjes të autobusëve në qendër është marrë për ta liruar trafikun e ngarkuar.