Category: Lajme

Presidenti i entitetit të Republikës Srpska në Bosnje dhe Hercegovinë, Milorad Dodik ka arritur të largohet nga ky shtet, pavarësisht se për të ishte lëshuar një urdhër-arrest. Ai mbrëmë nga Beogradi ka udhëtuar për në Izrael.

Pas zbarkimit në Izrael, Dodik dërgoi një mesazh në rrjetin social X dhe tha se respekton thellësisht historinë dhe vendosmërinë e Izraelit.

Avokati i Dodik thotë se vendimi nuk ka ardhur: Ai gjithashtu përmendi “një apelim të mundshëm”, raporton oslobodjenje.

“Unë kam filluar një vizitë në Izrael, një vend, forcën, historinë dhe vendosmërinë e të cilit e respektoj thellësisht. Izraeli tregon se liria dhe siguria nuk kanë çmim dhe se një popull që e di se kush është – nuk pranon të jetë as një objektiv, as një vartës, shkroi ai.

Ai shtoi gjithashtu se Republika Srpska dhe Izraeli mbrojnë njëri-tjetrin pa kërkuar falje.

“Ashtu si Izraeli mbrohet pa falje, po ashtu edhe Republika Srpska mbron të drejtën e saj për të ekzistuar, vendosur dhe ruajtur besëlidhjen e të parëve të saj. Serbët dhe hebrenjtë janë popuj që u përpoqën të zhdukeshin plotësisht – dhe ata mbijetuan. Kjo është arsyeja pse ne e kuptojmë njëri-tjetrin. Dhe kjo është arsyeja pse ne qëndrojmë së bashku”.

Meqë ra fjala, Milorad Dodik është planifikuar të marrë pjesë në Konferencën kundër Antisemitizmit në Jerusalem, Izrael, më 26 dhe 27 mars, sipas njoftimeve të mëparshme, transmeton KosovaPress.

Largimi i Dodikut shkaktoi reagim të Policisë Kufitare në Bosnjë-Hercegovinë, pasi me urdhër të drejtorit Mirko Kupresakoviq nisi një hetim mbi mënyrën se si ai e ka kaluar kufirin shtetëror.

Bashkimi Demokratik për Integrim la akuzuar institucionet e Maqedonisë së Veriut se e kanë ditur se si ka funksionuar diskoteka “Puls” në Koçan, por kanë heshtur, ndërkohë ka theksuar se institucionet nuk përballen me mënyrën se si ka funksionuar lokali, por arrestohen ish-ministrin që nuk ka pasur kompetenca prej kohësh.

Ndërsa për kryeministrin, BDI tha se për të fshehur të vërtetën, urdhëron arrestime para kamerave dhe kërcënon në mënyrë vulgare.

“Në vend që të përballet me pyetje se si objekti ka funksionuar për një vit të tërë, me licencë të falsifikuar, mbushur me të mitur, me piroteknikë dhe pa leje, pushteti arreston një ish-ministër i cili nuk ka pasur kompetenca prej kohësh, vetëm sepse nuk është i tyre. Në një shtet ku e gjithë shoqëria është në zi, kryeministri në skenë publike demonstron kërcënime vulgare, tërheqje për veshi dhe urdhëron arrestime para kamerave, jo për drejtësi por për të fshehur të vërtetën. Gjithnjë e më qarët bëhet se, institucionet kanë heshtur për një vit të tërë edhe pse e dinin se çfarë po ndodhte”, thotë BDI.

Përndryshe, si pasojë e një zjarri në diskotekën në Koçan, kanë vdekur 59 persona, shumica e viktimave ishin të rinj, me moshë nga 14 deri në 24 vjeç. Në këtë tragjedi janë lënduar mbi 150 persona.

Një protestë qytetare është paralajmëruar të mbahet të shtunën e 5 prillit në Prishtinë kundër rritjes së çmimit të rrymës.

Grupi “Asnjë cent ma shumë” ka njoftuar se kjo protestë do të nisë nga ora 15:00 në sheshin “Skënderbe” në Prishtinë.

Në njoftim thuhet se po protestohet kundër rritjes së tarifave për 15 për qind, kundër varfërisë energjetike, për zë qytetar dhe transparencë, si dhe për tarifa të drejta dhe jetë me dinjitet.

Në një zhvillim të papritur, delegacionet e Ukrainës dhe SHBA-së janë duke zhvilluar një rund të ri bisedimesh në Riad të Arabisë Saudite.

Këto bisedime nuk ishin paralajmëruar më parë.

Një anëtar i delegacionit ukrainas ka deklaruar për mediat se “Ne po vazhdojmë të punojmë me amerikanët”, duke theksuar angazhimin e vazhdueshëm për të avancuar në procesin diplomatik.

Ky takim vjen pas një periudhe tensioni, ndërsa ende pritet publikimi i një deklarate të përbashkët midis delegacionit amerikan dhe atij rus, që është parashikuar për t’u lëshuar në orën 9:00.

Takimi i fundit mes delegacionit amerikan dhe atij ukrainas, gjithashtu në Arabinë Saudite, kishte çuar në një dakordim për një armëpushim të përkohshëm 30 ditor.

Prishtina është bërë me shoqatë të vullnetarëve për zjarrfikje dhe shpëtim e cila do të ndihmojë në përballje me fatkeqësitë natyrore.

Kryetari i Prishtinës, Përparim Rama tha se po vendosen “themelet e një force të re për mbrojtjen e jetëve dhe pasurive të qytetarëve”.

Kjo shoqatë, është e para e këtij lloji në Kosovë.

“Me themelimin e shoqatës së vullnetarëve për zjarrfikje dhe shpëtim të kryeqytetit po vendosim themelet e një force të re për mbrojtjen e jetëve, mbrojtjen e pasurive të qytetarëve tanë, Prishtina është në rritje të vazhdueshme, e krahas me rritje vinë edhe sfida të reja, prej rritjes së popullsisë e deri te zgjerimi i infrastrukturës, kërkohet që të jemi në gatishmëri të përhershme edhe për situata emergjente. Andaj këtë shoqatë e shoh si tejet të rëndësishme e mbështetëse për Prishtinën tonë që do të ndihmojë të përballemi me lloje të ndryshme të fatkeqësive qofshin ato natyrore a po të shkarkuara nga njeriu”, potencoi Rama.

Ndërsa drejtori për siguri dhe emergjenca Lulzim Fushtica tha se ky është një hap i rëndësishëm në forcimin e sigurisë publike.

Ai theksoi rëndësinë e përfshirjes më të gjerë dhe bashkëpunimit ndërmjet institucioneve dhe qytetarëve.

“[Themelimi i shoqatës]Shënon një hap të madh përpara në forcimin e sigurisë publike dhe përmasimin e reagimeve ndaj emergjencave, siç e dimë siguria dhe menaxhimi i emergjencave nuk janë vetëm përgjegjësi e institucioneve shtetërore, ato kërkojnë një përfshirje të gjerë dhe një bashkëpunim të ngushtë mes institucioneve dhe qytetarëve”, tha ai.

Mal Gashi nga zjarrfikësit, tha se kjo nuk është vetëm një detyrë por “është një mision ku duhet të tregojmë gatishmëri”.

Tutje ai theksoi se kjo do t’i ndihmojë jo vetëm në fikje të zjarreve por edhe ballafaqim me fatkeqësitë e tjera natyrore.

“Shoqata e vullnetarëve dhe zjarrfikësve do të jenë vullnetarë, nuk është vetëm një detyrë, por është një mision i gjerë, të cilët duhet të tregojnë gatishmëri, guxim për t’i realizuar të gjitha detyrat që i kanë para vetes. Dhe kjo do të jetë një komponent e brigadës profesionale për zjarrfikje dhe shpëtim që do të na ofrojë mundësi jo vetëm në fikje të zjarreve po për tu ballafaquar me fatkeqësitë natyrore dhe fatkeqësitë tjera”, tha ai

Presidenti i Turqisë, Recep Tayyip Erdogan, ka fajësuar partitë opozitare për provokimin e një “lëvizje dhune” ndërsa protestat në vend vazhduan për natën e gjashtë, raporton BBC.

Protestat nisën kur Kryetari i Stambollit, Ekrem Imamoglu – rivali politik kryesor i Erdoganit – u ndalua për akuza korrupsioni. Erdogan e ka mohuar se akuzat ndaj Imamoglu janë të motivuara politikisht. Partia kryesore e opozitës, CHP, ka thënë se protestat do të përfundojnë të martën, por pa specifikuar hapat e mëtejshëm. Erdogan i ka quajtur demonstratat “të liga” dhe ka akuzuar opozitën për “provokime” që dëmtojnë paqen e qytetarëve, përcjell KosovaPress.

Protestuesit, shumica prej të cilëve të rinj, janë mbledhur kundër qeverisë, por gjithashtu kritikojnë opozitën. Deri tani, 1,133 persona janë arrestuar që nga nisja e protestave. Imamoglu është ende kandidati i CHP për zgjedhjet presidenciale të 2028-s, edhe pse është në burg. Arrestimi i tij ka ngritur zemërimin e protestuesve, që kërkojnë demokraci dhe kthimin e tij në post. Protestat janë më të mëdha që nga ato në Gezi në 2013.

Presidentja e Kosovës, Vjosa Osmani, ka kujtuar masakrat e Celinës, Fortesës dhe Brestocit.

Osmani ka thënë se më 25 mars 1999, forcat e regjimit gjenocidal të Serbisë, kryen masakra të përgjakshme në fshatrat e Rahovecit, në të cilat vranë 75 civilë në Celinë, 69 në Fortesë, 49 në Brestoc.

“Në mbrojtje të popullsisë, ranë heroikisht edhe pesë luftëtarë të UÇK-së. Ata u vranë vetëm sepse ishin shqiptarë, vetëm sepse donin liri”, ka deklaruar Osmani.

Presidentja ka shtuar tutje se “Dhimbja mbetet, drejtësia mungon, por e vërteta nuk zhbëhet”.

“Kujtojmë martirët, nderojmë heronjtë e UÇK-së dhe nuk do të ndalemi asnjëherë në kërkim të drejtësisë”.