Category: Lajme

Vetëm dy ditë pas raportimit të ATV-së për asfaltin 3.5 centimetra në magjistralen Gjilan-Ferizaj, i cili kishte filluar të dëmtohej seriozisht fare pak muaj pasi u shtrua, autoritete përkatëse kanë ndërmarr veprime për të rikthyer infrastrukturën në gjendje të mirë.

Banorët e fshatit Livoq, në një prononcim për ATV-në, kishin paralajmëruar masa, me bllokim rruge, nëse nuk do të ndërhyhej.

Veç kësaj, zëvendësministri i Infrastrukturës, deklaroi se ndaj kompanisë përgjegjëse nuk do të kryhen pagesat, derisa të vërtetohet cilësia e punimeve.

Në një takim të zhvilluar në Tiranë, Presidenti i Shqipërisë, Bajram Begaj, e ka pritur homologun e tij nga Sllovakia, Peter Pellegrini, ku gjatë një konference për media, ai ka theksuar se një nga temat kryesore të bisedës ka qenë edhe Kosova, duke shprehur shpresën se Sllovakia do të mbështesë përpjekjet e Kosovës për anëtarësimin në organizatat ndërkombëtare, raporton Gazeta Sinjali.

Sllovakia vazhdon të jetë një nga pesë shtetet e Bashkimit Evropian që ende nuk e ka njohur pavarësinë e Kosovës.

“Një nga temat që diskutuam ishte Kosova. Shqipëria ka luajtur gjithmonë një rol kyç në promovimin e stabilitetit rajonal dhe e mbështet pa rezerva rrugën e Kosovës drejt integrimit ndërkombëtar. Për ne, Kosova është një demokraci e qëndrueshme dhe një faktor i rëndësishëm stabiliteti për rajonin”, tha Begaj.

Ai gjithashtu e falënderoi Presidentin Pellegrini për njohjen e pasaportës së Kosovës nga Sllovakia, një hap që ka ndodhur që nga viti 2012.

“Shqipëria shpreson se Sllovakia do të mbështesë Kosovës në rrugën e saj drejt anëtarësimit në organizatat ndërkombëtare dhe do të rishikojë qëndrimin e saj ndaj Republikës së Kosovës”, përfundoi Begaj.

Qendra e Lëvizjes Vetëvendosje në Prishtinë ka njoftuar zyrtarisht se asamblistët Berat Lahu dhe Edmond Azemi nuk janë më pjesë e kësaj partie.

Në njoftim është bërë me dije set Lahu dhe Azemi janë përjashtuar nga VV-ja me vendim të komisionit disiplinor, i cili është marrë më 10 mars.

“Dy anëtarë të grupit parlamentar të Kuvendit Komunal në Prishtinë janë përjashtuar nga Lëvizja VETËVENDOSJE! Berat Lahu dhe Edmond Azemi nuk janë më pjesë e Lëvizjes VETEVENDOSJE!, me vendim të komisionit disiplinor të Lëvizjes. Vendimi i parë është marrë me datën 10.03.2025. Votimi dhe prezenca në seanca në të cilat dëmtohet interesi publik dhe tjetërsimi i vullnetit të qytetarëve për interesa të ngushta, janë arsyet e këtij përjashtimi. Rruga jonë është gjatë dhe vështirë, ata që për interese personale tjetërsojnë këtë rrugëtim nuk kanë vend në Lëvizje!”, është thënë në njoftimin e VV-së.

Reagimi vjen pasi dy asamblistët në Kuvendin komunal të Prishtinës, Berat Lahu dhe Edmond Azemi janë tërhequr nga grupi i asamblistëve të VV-së.

Para seancës së sotme të Kuvendit Komunal, Lahu dhe Azemi janë pozicionuar si të pavarur.

Të dy asamblistët të cilët fituan ulëse në Asamblenë Komunale duke garuar me Lëvizjen Vetëvendosje, ishin përballur me presion direkt nga Gëzim Sveçla, shefi i asamblistëve të LVV-së, në fund të vitit të kaluar kur vendosën të votojnë buxhetin për vitin 2025.

Në një video që u publikua nga debati mes tyre, përmendej emri i Albin Kurtit, hajnia, pronat në Badovc e deri te akuzat e ndryshme.

Dy persona janë zhdukur në qytetin e Tuzllës në Bosnje e Hercegovinë si pasojë e reshjeve të mëdha që kanë shkaktuar rritjen e nivelit të ujit në lumenjtë e këtij vendi.

Bëhet fjalë për një polic dhe një person që në orët e paradites së 27 marsit ka ikur nga policia dhe është futur në shtratin e lumit Jala.

Për shkak të reshjeve që po vazhdojnë për ditën e të tretë me radhë, në pjesën më të madhe të Bosnje e Hercegovinës lumenjtë kanë dalë nga shtrati.

Gjendje më e rënduar raportohet në pjesën veriore dhe veriperëndimore të vendit, ku janë mbyllur disa rrugë kryesore.

Në Laktash, afër Banjallukës, janë përmbytur rreth 100 shtëpi. Lumi Bukovica ka çarë kanalin rreth orës katër të mëngjesit dhe ka përmbytur një lagje të tërë.

Sipas Institutit Federal Hidrometeorologjik, reshje intensive priten deri më 29 mars, ndërsa më pas parashikohet stabilizim gradual i motit dhe ndërprerje e reshjeve deri më 3 prill.

Në fund të vitit të kaluar, Bosnja u përballë më vërshime vdekjeprurëse, kur 27 njerëz humbën jetën nga përmbytjet dhe rreshqitjet e dheut më 4 tetor.

Shirat e rrëmbyeshëm dhe erërat e fuqishme goditën pjesë të Bosnjës jugore dhe qendrore më 4 tetor, duke shkatërruar shtëpi, rrugë dhe duke ndërprerë rrymën dhe bllokuar qasjen në disa fshatra./REL

Ish-nënkryetari i Prishtinës, Alban Zogaj ka dorëzuar në Gjykatën Themelore të Prishtinës padi për shpifje ndaj Dejona Mihalit.

Në një postim n Facebook, Zogaj thotë se ky veprim erdhi pas akuzave të rënda dhe të pabaza që Mihalit ka bërë kundër tij, në lidhje me manipulim të votave të diasporës.

“Sot kam dorëzuar në Gjykatën Themelore të Prishtinës padinë për shpifje ndaj Dejona Mihalit, aktiviste e VV, pas akuzave të rënda dhe të pabaza që ajo ka bërë kundër meje, ndër tjera. Ajo më ka akuzuar padrejtësisht për manipulim të votave të diasporës, një shpifje e pastër që synon të dëmtojë integritetin tim dhe besimin e qytetarëve në procesin zgjedhor”, ka shkruar Zogaj.

“Unë besoj në ndershmërinë e procesit demokratik dhe nuk do të lejoj që askush të përhapë shpifje për qëllime politike. Prandaj, përmes kësaj padie, po mbroj jo vetëm dinjitetin tim, por edhe parimin se zgjedhjet duhet të jenë të pastra dhe të drejta, të mbrojtura nga çdo tentativë për manipulim apo diskreditim përmes shpifjeve. Drejtësia duhet të thotë fjalën e saj dhe e vërteta duhet të mbizotërojë mbi shpifjet!”, ka shkruar Zogaj.

Një tërmet i fuqishëm ka goditur Azinë Juglindore, duke shembur ndërtesa të larta që ishin duke u ndërtuar në Bangkok, dhe duke rrëzuar objekte në Mianmar.

Të paktën një person është mbytur dhe dhjetëra punëtorë janë nxjerrë nga rrënojat e një rrokaqielli, tha Instituti Kombëtar për Emergjenca Mjekësore në Tajlandë.

Dëshmitarët në Bangkok thanë se njerëzit dolën në rrugë në panik pas dridhjeve të fuqishme të tokës.

Shërbimi Gjeologjik i Shteteve të Bashkuara tha se tërmeti ishte 7.7 ballë i Rihterit, me një thellësi prej 10 kilometrash. Po ashtu u regjistruan pasgoditje të fuqishme.

Epiqendra e tërmetit ishte 17.2 kilometra nga qyteti Mandalaj në Mianmar, qytet që ka një popullsi prej 1.5 milion banorësh, shkruan Radio Evropa e lirë.

Autoritetet në Mianmar ende nuk kanë njoftuar për dëme apo viktima.

“Kemi nisur kërkimet përreth Jangonit, për të shikuar nëse ka viktima dhe dëme. Deri më tani nuk kemi informacione”, tha për Reuters një zyrtar nga Departamenti i Zjarrfikësve në Mianmar.

Në mediat sociale janë publikuar pamje nga Mandalaja, duke shfaqur shembje të ndërtesave. Këto imazhe nuk ka qenë e mundur që menjëherë të verifikohen në mënyrë të pavarur.

Agjencia Xinhua e Kinës raportoi se dridhje të fuqishme të tokës janë ndier në provincën Junan, në jugperëndim të Kinës, që gjendet në kufi me Mianmarin. Por, autoritetet kineze nuk kanë raportuar për viktima./REL

Presidentja e Kosovës, Vjosa Osmani, ka deklaruar sot se ka pranuar shkresën zyrtare nga Komisioni Qendror i Zgjedhjeve (KQZ), e cila përmban rezultatet përfundimtare të zgjedhjeve dhe mënyrën se si ndahen ulëset në Kuvendin e Republikës së Kosovës.

Në një deklaratë për mediat, Osmani tha se tashmë ka një afat ligjor prej 30 ditësh për thirrjen e seancës konstituive, duke shtuar se ky afat është parashikuar nga Kushtetuta e Kosovës.

“Për momentin ekipi ime ligjor është duke analizuar se sa mund të ketë nevojë për përgatitje të kësaj seance në mënyrë që kur të thirret mos të jetë i suksesshëm konstituimi i Kuvendit të Kosovës”, tha Osmani.

Sipas saj, gjithçka do të bëhet brenda afatit kohor kushtetues.

“Për momentin nuk mund të japë një datë sepse dua të jem e saktë, mirëpo shumë shpejt do ta kemi edhe datën”, tha ajo.

Sot është mbajtur ceremonia e certifikimit të gjeneratës së parë të rekrutëve të Forcës së Sigurisë së Kosovës për vitin 2025, raporton Gazeta Sinjali.

Gjatë kësaj ceremonie, presidentja e vendit, Vjosa Osmani, tha se FSK është dëshmi e sakrificës dhe se Ushtria e Kosovës nuk është thjesht një forcë e armatosur, por një angazhim i përjetshëm ndaj atdheut.

“Sot është një ditë e veçantë për ju dhe për Kosovën, ku 344 djem dhe vajza i bashkohen FSK-së. Të dashur ushtarë, ju keni kaluar shumë sfida me përkushtim. FSK është më shumë se një forcë, është simbol i përkushtimit dhe sakrificës, dhe dëshmi e forcës së shtetit tonë,” tha Osmani.

Osmani theksoi se Kosova është e lirë falë sakrificës së dëshmorëve dhe martirëve.

“Ushtria nuk është thjesht një forcë e armatosur; ushtria jonë është një betim i përhershëm për atdheun tonë, është një përkushtim ndaj sigurisë dhe një garanci për paqen,” shtoi Osmani.

“Me punën dhe përkushtimin tuaj, do të vazhdoni ta mbani shtetin tonë. FSK po marshon fuqishëm përpara, e mirëpajisur. Ju jeni pasardhës të drejtë të UÇK-së, të cilët sakrifikuan gjithçka për atdheun në momentet historike të vendit tonë. Të kujtojmë dëshmorët, heronjtë dhe martirët. Edhe sot, shprehim falënderimin për aleatët tanë, përfshirë SHBA-të,” tha Osmani.