Category: Lajme

Sot diplomoi gjenerata 2026 e Forcës së Sigurisë së Kosovës, duke iu shtuar asaj 12 oficerë të rinj pas përgatitjes akademike për katër vjet.

Në këtë ceremoni mori pjesë edhe kryeministri në detyrë, Albin Kurti, i cili në fjalimin e tij dha disa zotime. Ai tha se në katër vitet e ardhshme në ushtri do t’i investojë 1 miliard euro, fabrikë të municioneve dhe 1000 gra e vajza do të shërbejnë në radhët e ushtrisë.

“Republikës dhe Forcës së Sigurisë së Kosovës iu shtuan 12 oficerë të rinj, të cilët kanë përfunduar me sukses rrugëtimin katërvjeçar të përgatitjes akademike, ushtarake dhe të lidershipit. Sot është një ditë krenarie për shtetin, sepse në kazermën që mban emrin e kryekomandantit të UÇK-së, Adem Jashari, diplomuan disa nga udhëheqësit e ardhshëm të ushtrisë sonë. Krahas investimeve mbi 460 milionë euro për blerje armatimi, kemi dyfishuar numrin e ushtarëve, kemi katërfishuar trajtimet e mbi të gjitha kemi mbështetur shkollimin dhe edukimin e tyre. Për katër vjet, do të investojmë 1 miliard euro të tjera, do t’i kemi një mijë vajza e gra në ushtrinë tonë dhe do të kemi fabrikën e municioneve “Made in Kosova””, tha Kurti.

Këshilli i Pavarur Mbikëqyrës i Shërbimit Civil të Kosovës ka refuzuar ankesën e zyrtarit të Kuvendit, Arben Loshi, i cili ka kundërshtuar vendimin për ripërtëritjen e konkursit për Sekretar të Kuvendit të Kosovës, shkruan Gazeta Express.

Ky vendim për përsëritje të konkursit ishte marrë pasi dy kandidatët e kualifikuar për votim në Kryesi të Kuvendit, vetë Arben Loshi dhe Taulant Bajrami, nuk kishin marrë asnjëri shumicën e votave të Kryesisë së Kuvendit .

Loshi në ankesën e tij kishte deklaruar se procedura e pranimit për pozitën e Sekretarit përfundon me propozimin e kandidatëve fitues tek titullari.

“Ankuesi në ankesën e parashtruar në Këshillin e Pavarur Mbikëqyrës për Shërbimin Civil të Kosovës, kundërshton Vendimin me Nr. 10-V-007, të datës 30.03.2026, të Kryesisë së Kuvendit të Republikës së Kosovës, duke pretenduar se akti i kontestuar karakterizohet me mungesë të bazës ligjore për rihapje të konkursit, sepse, procedura e pranimit përfundon me propozimin e kandidatëve fitues tek titullari/mbikëqyrësi, e që në rastin konkret procedura për pozitën e Sekretarit të Përgjithshëm të Kuvendit të Kosovës ka përfunduar pasi që e njëjta ka kaluar të gjitha fazat, kështu që, një procedurë mund të përfundoj vetëm sipas nenit 47 paragrafi 11 të LZP-së si lex specialis. Shton se rihapja e konkursit dhe mos përzgjedhja e një kandidati është në kundërshtim të plotë me LZP-në. Më tej, ankuesi pretendon se vendimi i kontestuar nuk përmban elementet e detyrueshme të aktit administrativ siç parashihet me nenin 47 të LPPA-së, pasi që akti nuk përbën arsyetim dhe as këshill juridik. Kërkon që të aprovohet ankesa, të anulohet vendimi i kontestuar dhe të obligohet Kryesia e Kuvendit të Kosovës të vazhdojë procedurën duke përzgjedhur njërin nga kandidatët e propozuar”, thuhet në dokument.

Derisa Kolegji ka argumentar se nuk është shkelur asnjë Ligj me vendimin për shpalljen e konkursit.

“Referuar kuadrit ligjor si më sipër, dhe në kontekst të pretendimit ankimor se organizmi i një procedure të re të rekrutimit për pozitën respektive mund të bëhet vetëm në rastet siç përcaktohet me nenin 47 paragrafi 11 të Ligjit Nr. 08/L-197 për Zyrtarët Publikë, Kolegji konstaton se një procedurë e caktuar e pranimit mund të përfundojë në çdo fazë, duke filluar në fazën e verifikimit paraprak nëse asnjë nga kandidatët aplikues s’ka përmbushur kriteret formale për pozitën e shpallur, apo nëse testin me shkrim (faza e vlerësimit) nuk e kalon asnjë kandidat, rrethana këto që Mutatis mutandis aplikohen sikurse në rastin ku asnjë kandidat nuk arrin 70 pikë, si pikë të nevojshme për t’u konsideruar kandidat i suksesshëm, rrjedhimisht në çdo rast vie në shprehje instituti i përfundimit të procedurës pa kandidat fitues dhe mbi këtë bazë urdhërohet shpallja e re e konkursit”, thuhet në vendim.

“Nisur nga kuadri ligjor si më sipër, e meqenëse se në rastin konkret nuk kemi të drejtë të fituar qoftë nga ankuesi apo kandidati tjetër, pasi që të njëjtit janë shpallur vetëm si kandidatë të suksesshëm, Kolegji arrin në përfundimin se mungesa e arsyetimit nuk e bënë aktin e kontestuar si të paligjshëm. Për më tepër, Vendimi Nr. 10-V-007, i datës 30.03.2026, i Kryesisë së Kuvendit të Republikës së Kosovës, është fakt që nuk përmban këshillë juridike, por, në mungesë të këtij elementi pala ankuese nuk humb të drejtën në mjet juridik, pasi që, një akt administrativ mund të kontestohet edhe në mungesë të këshillës juridike siç parashihet me nenin 127 paragrafin 3 të Ligjit Nr. 05/L-031 për Procedurën e Përgjithshme Administrative, 3. Nëse akti administrativ është lëshuar pa informacion, apo me informacion të pamjaftueshëm në lidhje me mjetet juridike administrative (këshillën juridike), afati i parashikuar nga paragrafi 1 i këtij neni, është tre (3) muaj. E në rastin konkret ankuesi ka shfrytëzuara të drejtën e ankimimit të Vendimit Nr. 10-V-007, të datës 30.03.2026, të Kryesisë së Kuvendit të Republikës së Kosovës.Përmbledhur si më lartë, Kolegji vlerëson se pretendimet ankimore nuk janë të bazuara, ndërsa vendimi i goditur me ankesë gjegjësisht Vendimi me Nr. 10-V-007, i datës 30.03.2026, i Kryesisë së Kuvendit të Republikës së Kosovës, nuk vërtetohet të jetë i përshirë me shkelje ligjore, andaj, bazuar në nenin 18, paragrafi 1, nën paragrafi 1.1 të Ligjit Nr. 06/L-048 për Këshillin e Pavarur Mbikëqyrës për Shërbimin Civil të Kosovës, si dhe në mbështetje të nenit 132, paragrafi 2 të Ligjit Nr. 05/L-031 për Procedurën e Përgjithshme Administrative, u vendos si në dispozitiv të këtij vendimi”, shton tutje vendimi.

Kryeministri i Shqipërisë, Edi Rama ka thënë se dorëheqja nuk është opsion të cilin e mendon.

Rama në një prononcim për Deutsche Welle tha se është zgjedhur nga 860 mijë shqiptar të cilët i dhanë mandatin për të realizuar misionin e mbylljes së negociatave me BE-në.

Ai tha se ky mision historik nuk mund të lihet në gjysmë për asnjë arsye.

“Unë kam ndarë me GP opinionet e mia dhe kam shprehur një ndjesi lidhur me faktin që unë jam zgjedhur dhe qëndroj në detyrë për të bërë gjërat jo për t’u tërhequr zvarrë dhe ndërkohë dorëheqja nuk ka qenë, nuk është dhe nuk do të jetë opsion për një arsye të thjeshtë sepse jam mandatuar bashkë me PS-në nga 860 mijë shqiptarë për të realizuar misionin e mbylljes së negociatave me BE-në. Ky mision historik s’mund të lihet në mes për asnjë arsye”, ka deklaruar Rama për DW.

Kryeministri i Moldavisë, Alexandru Munteanu, ka dhënë dorëheqje në një njoftim të papritur që shkakton edhe dorëheqjen e qeverisë.

Munteanu, i cili ka shërbyer si kryeministër që nga nëntori i vitit 2025, nuk dha asnjë shpjegim të plotë për vendimin e tij.

“Sot, mandati im si kryeministër mbaron”, tha ai.

“Në momentin që kuptova se nuk mund ta kryeja më mandatin tim në përputhje me parimet dhe bindjet e mia, zgjodha të jap dorëheqjen”, shtoi Munteanu.

Ky veprim është një sfidë për presidenten Maia Sandu dhe Partinë e saj pro-evropiane të Veprimit dhe Solidaritetit (PAS) në pushtet, e cila tani është në mandatin e saj të dytë radhazi.

Sipas procedurës parlamentare të Moldavisë, Sandu do të zhvillojë konsultime me grupet parlamentare dhe më pas do të nominojë një kandidat për kryeministër.

Munteanu, 62 vjeç, u emërua pas zgjedhjeve parlamentare në shtator 2025, në të cilat PAS mundi bindshëm një rival të anuar nga Rusia dhe fitoi një mandat të ri për të ndjekur rrugën e Moldavisë drejt Bashkimit Evropian.

Përpara kësaj, ai punoi jashtë Moldavisë për rreth 20 vjet, përfshirë edhe për Bankën Botërore.

“Do të vazhdoj t’i shërbej vendit tim nga çfarëdo pozicioni që mund të mbaj”, tha ai.

Policia pas pranimit të informatës më 25.06.2026 janë ndërmarrë veprime hetimore, ku më pas është kontrolluar një porosi e dërguar përmes një agjencioni turistik në të cilën janë gjetur dhe sekuestruar; 4 AK-47, 9 karikatorë, 262 fishekë dhe dy dritare plastike.

Sipas raportit 24 orësh të Policisë së Kosovës bëhet e ditur se të enjten pas veprimeve policore janë shoqëruar dy persona.

“ Me datën 25.06.2026 pas pranimit të informatave janë ndërmarrë veprime hetimore, ku më pas është kontrolluar një porosi e dërguar përmes një agjencioni turistik në të cilën janë gjetur dhe sekuestruar; 4 AK-47, 9 karikatorë, 262 fishekë dhe dy dritare plastike. Me datën 02.07.2026 pas veprimeve policore janë shoqëruar dy persona meshkuj kosovarë, për intervistim dhe procedura të mëtejme policore”, thuhet në raport.

Ndërkaq, lidhur me rastin me vendim të prokurorit kompetent është bastisur një shtëpi në të cilën janë gjetur dhe sekuestruar tri pjesë të AK-47 dhe kondak pushke prej druri.

Me vendim të prokurorit njëri nga personat e shoqëruar në polici, pas intervistimit me vendim të prokurorit kompetent është dërguar në mbajtje.

Dogana e Kosovës ka zbuluar një rast të mosdeklarimit të mjeteve monetare gjatë kontrollit të një automjeti në dalje të pikëkalimit kufitar Merdarë.

Dogana tha se automjeti ishte përzgjedhur për kontroll në bazë të analizës së riskut. Gjatë intervistimit fillestar, zyrtari doganor e kishte pyetur udhëtarin nëse posedonte mallra ose mjete monetare që i nënshtroheshin deklarimit. Pas përgjigjes së dhënë, automjeti u referua për kontroll të detajuar në vijën e dytë.

“Gjatë kontrollit të përbashkët nga zyrtarët doganorë dhe Policia Kufitare, u zbuluan mjete monetare të padeklaruara në dy lokacione të ndryshme të automjetit. Një shumë prej 10,000 euro u gjet në çantën personale të udhëtarit, ndërsa 13,500 euro u zbuluan të fshehura në zarfe brenda një ndarjeje të automjetit. Në total, u evidentuan 23,500 euro mjete monetare”, njoftoi Dogana.

Dogana tha se personi posedonte gjithashtu një kontratë noteriale për shitblerjen e një prone, të datës 29.06.2025, si dhe një dëshmi të tërheqjes bankare, të datës 01.07.2026, të cilat shërbenin si dokumentacion mbi prejardhjen e mjeteve monetare.

“Pas konstatimit të mosdeklarimit, rasti iu referua menjëherë oficerit kujdestar të Hetimeve Doganore për trajtim të mëtejmë. Në përputhje me legjislacionin në fuqi që rregullon deklarimin e mjeteve monetare gjatë hyrjes dhe daljes nga territori i Republikës së Kosovës, ndaj palës u aplikuan masat e parapara ligjore. Duke qenë se personi kishte dokumentuar burimin e ligjshëm të mjeteve monetare, u vendos ndalimi i 25% të shumës së padeklaruar, ndërsa pjesa tjetër iu kthye poseduesit, në pajtim me procedurat dhe dispozitat ligjore në fuqi”.

Dogana e Kosovës rikujtoi se çdo person fizik që hyn ose del nga territori i Republikës së Kosovës me mjete monetare në vlerë prej 10,000 euro ose më shumë (ose kundërvlerën e tyre në valuta të tjera apo instrumente të negociueshme) ka detyrim ligjor t’i deklarojë ato pranë autoriteteve doganore.

Mosdeklarimi ose deklarimi i pasaktë përbën kundërvajtje dhe sjell pasoja ligjore, përfshirë ndalimin e përkohshëm ose konfiskimin e një pjese të mjeteve monetare, sipas legjislacionit në fuqi.

“Dogana e Kosovës mbetet e përkushtuar në zbatimin e ligjit dhe forcimin e kontrolleve në të gjitha pikat e kalimit kufitar, me qëllim parandalimin e veprimtarive të paligjshme, mbrojtjen e integritetit të sistemit financiar dhe luftimin e pastrimit të parave, financimit të terrorizmit dhe formave të tjera të kriminalitetit financiar”.

Një indonezian 22 vjeç dhe një grua tre vjet më e vjetër se ai, ia panë sherrin një akti të puthjes që bënë mes vete, më 27 shkurt.

Ani se një gjë të tillë e bënë brenda një veture në Banda Aceh, veprimi i tyre u bë viral, pasi u transmetua live në Tik Tok.

Por, në vendin ku ata u puthën, diçka e tillë nuk lejohet.

Provinca Aceh e Indonezisë zbaton sheriatin dhe sipas rregullave të ligjit islamik, diçka e tillë është e ndaluar në publik.

Për pasojë, çifti u paraburgos dhe u mbajt prapa grilave më shumë se dy muaj.

Pas kaq kohe, autoritetet konservatore këtu ua bënë atyre gjyqin dhe i shpalli fajtorë për shkelje të ligjit islam.

Njëri dhe tjetri u dënuan me nga 21 goditje me kamxhik, secili. Në fakt, gjykata kishte shqiptuar nga 25 goditje për ta, por dënimi u ul në 21, pasi çifti kishte kaluar disa muaj në paraburgim.

Ndëshkimi ndaj tyre u zbatuar të enjten, në një skenë në parkun Bustan-ussalatin në Banda Aceh, në prani të qindra qytetarëve.

Aceh është provinca e vetme në Indonezi që zbaton Sheriatin, një e drejtë që iu dha në vitin 2006 në kuadër të marrëveshjes së paqes për t’i dhënë fund konfliktit separatist. Që nga viti 2015, disa dispozita të këtij ligji zbatohen edhe ndaj jomyslimanëve që janë vetëm 1 për qind e banorëve këtu.

Ligji parashikon deri në 100 goditje me kamxhik për vepra që konsiderohen shkelje të moralit, përfshirë tradhtinë bashkëshortore, marrëdhëniet homoseksuale, lojërat e fatit dhe konsumimin e alkoolit.
Po të enjten, katër persona të tjerë u ndëshkuan publikisht në Aceh për lojëra të fatit online dhe tradhti bashkëshortore.

Organizata Amnesty International Indonesia e dënoi praktikën e ndëshkimit publik me kamxhik, duke e cilësuar atë si shkelje të të drejtave të njeriut dhe trajtim mizor e poshtërues, pavarësisht se Indonezia ka ratifikuar konventa ndërkombëtare kundër dënimeve çnjerëzore.

Dëshmitarët e masakrës së Saradanit nga komuna e Istogut janë shprehur të pakënaqur lidhur me vendimin e Gjykatës Themelore të Prishtinës e cila edhe në rigjykim e ka dënuar me 12 vite burgim Ekrem Bajroviqin, i akuzuar për krime lufte gjatë viteve 1998-1999.

Naim Elshani, dëshmitar tha se ky vendim është qesharak, duke treguar se ende i bart në trup plagët nga tortura që i është bërë, raporton Ekonomia Online.

“Unë nuk pajtohem me këtë vendim. Ky vendim është qesharak. 12 vite burgim t’i merr një kriminel ku me sytë e mi e pashë në krim, tortura, i përjetova, ku ende sot plagët më kullojnë gjak. Domethënë, është tmerr. Unë nuk pajtohem me këtë vendim. Po, besoni që mua këtë më kanë pushkatuar serbët dy herë. Sot jam duke u pushkatuar edhe nga, ndoshta edhe nga shqiptarët, nga gjykatat. Domethënë unë nuk kam sigurim, nuk kam mbrojtje, çdo ditë kërcënohem nga njerëzit që nuk ia duan të mirën Kosovës. Unë jeta ime ka qenë në rrezik disa herë. Kam kërkuar mbrojtje nga prokurori, domethënë nuk më ka afruar mbrojtje. Unë edhe me shpenzimet e mia, me qindra herë kam ardhur që pesë vite. Kam kërkuar për transport për dëshmitarë. Nuk vijnë dëshmitarët që janë maltretuar gjatë viteve ’90 deri në vitin 1999. Unë domethënë këtu nuk pajtohem unë me këtë vendim. 12 vite burgim është shumë pak. 12 vite burgim një kriminel lufte me i marrë, kjo është çmenduri. Nuk, nuk ka drejtësi, unë nuk shoh drejtësi. Nuk e di ku është drejtësia. Unë sa di, vuaj pasojat. Unë nuk e di që 27 vite që mundem me i bë 5 minuta gjumë për shkak të dhimbjeve që i kam. Nuk kam çfarë me shtuar unë. Unë ju përshëndes juve mediave, i përshëndes shqiptarët. Nuk kam çfarë me shtuar më shumë”, tha Elshani.

I pakënaqur është shprehur edhe dëshmitari tjetër Ylber Lipa.

“Pavarësisht zgjatjes, tejzgjatjes së procesit, së paku ne katër si dëshmitarë prej 32-ve që jemi sot, jemi të pakënaqur me vendimin, edhe pse e kemi parasysh se ligjet e asaj kohe me të cilat është dënuar, dënimi maksimal është 15 vite. Kjo tregon se është vërtetuar dënimi prej 12 viteve që është bërë në shkallën e dytë pas ankesës së avokatit të kriminelit Bajroviq. Megjithatë, ne duhet të pajtohemi dhe duhet ta krijojmë besimin në gjykatat tona. Aq sa ka paraparë ligji, aq sa ka paraparë gjykata, dhe nuk kemi çfarë të bëjmë.E keqja e gjithë kësaj është mospërkrahja e dëshmitarëve nga shteti. Mosinteresimi i dëshmitarëve që të vijnë, pa marrë parasysh rrethanat me të cilat ne jemi përballur, jo vetëm me shpenzime, por me të gjitha pasojat. Në rastin konkret të Naimit si dëshmitar kryesor, ai përballet me probleme shëndetësore, me pasoja dhe trauma psikologjike, si dhe me të gjitha të tjerat. Shpresojmë që drejtësia, sado me vonesë, do të bjerë në vend. Shpresojmë që shteti ynë sa më shpejt të organizohet, të fuqizohet dhe të mos ndalet në hetimin dhe zbulimin e kriminelëve. Kaq”, tha ai./EO/

Disa vjet më parë, kryeministri Rama hyri në garë me rajonin, teksa premtoi që shumë shpejt, paga mesatare në vend do të arrinte vendet e Ballkanit Perëndimor, si Serbia, Maqedonia e Veriut, Mali i Zi dhe Bosnja, që e kishin në atë kohë rrogat 30-50% më të lartë sesa ne.

Paga mesatare mujore në vend vërtet është rritur, duke arritur në 860 euro bruto për vitin 2025, por edhe të tjerët nuk kanë mbetur në vend.

Në Serbi, paga mesatare mujore bruto ka arritur në 1290 euro, në Bosnjë Hercegovinë 1245, në Mal të Zi 1203 euro, në Maqedoninë e Veriut, 1100 euro, sipas një publikimi të mëparshëm të Monitor bazuar mbi të dhënat zyrtare nga agjencitë statistikore të vendeve përkatëse.

Deri tani gara për të punësuarit ka qenë e humbur, teksa pagat në vendet e rajonit vijojnë të mbeten 30-50% më të larta sesa në Shqipëri.

Në fakt, kryeministri e ka mbajtur premtimin, por vetëm për veten dhe presidentin e vendit.

“Monitor” në bashkëpunim me korrespondentët e saj në vendet e Ballkanit Perëndimor raporton pagat e niveleve të larta të qeverisjes, si presidenti, kryeministri në të 6 vendet e Ballkanit Perëndimor.

Bosnjë-Hercegovina dhe Shqipëria kryesojnë listën, për pagat, ndërsa Shqipëria është absolutisht e para për pagën e drejtuesve në raport me pagën mesatare në vend.

Në Shqipëri, Presidenti ka një pagë mujore bruto prej 425 mijë lekë, ose 4,470 euro me kursin aktual. Paga e tij është 5.2 herë më e lartë sesa rroga mesatare në vend.

Kryeministri shqiptar ka një pagë mesatare mujore bruto prej 393 mijë lekësh, ose 4130 euro. Paga e tij është 4.8 herë më e lartë se ajo mesatare në vend dhe më e larta nga të githë kryeministrat e Ballkanit.

Në Bosnjë-Hercegovinë, struktura administrative është e komplikuar. Bosnjë dhe Hercegovina nuk ka një President të vetëm të shtetit. Në vend të kësaj, ajo drejtohet nga një Presidencë treanëtarëshe, e cila përfaqëson tre komunitetet kryesore etnike të vendit. Vendi ka dy kryeministra, nga një për secilin prej dy entiteteve të saj: Federatën e Bosnjë dhe Hercegovinës dhe Republikën Srpska. Për kryeministrat, paga mesatare bruto (e llogaritur si mesatare e dy pagave) është rreth 4 mijë euro dhe për presidentët, mesatarja është rreth 4600 euro, më e larta në Ballkan. Megjithatë, në raport me pagën mesatare në vend, difernca është më e ulët se me Shqipërisë (përkatësisht 3.7 herë për presidentin dhe 3.2 herë për kryeministrin) për shkak të rrogës më të lartë në Bosnjë Hercegovinë.

Për pagat neto, presidenti dhe kryeministri shqiptar kryesojnë Ballkanin, pasi Bosnjë Hercegovina ka një ngarkesë më të lartë fiskale. Paga neto e presidentit shqiptar është rreth 320 mijë lekë, ose gati 3400 euro, përkundrejt 3 mijë euro mesatarja presidenciale në Bosnjë.

Kryeministri shqiptar është absolutisht më i paguari, pasi merr neto 302 mijë lekë, ose gati 3200 euro, përkundrejt 2600-2700 euro të kryeministrave të Bosnjës. Madje kryeministri shqiptare ka një pagë neto më të lartë se pagat bruto të shumicës së homologëve në Ballkan.

Vendet e tjera të Ballkanit, ndonëse kanë paga mesatare më të larta janë më modestë në shpërblimet e drejtuesve të lartë, që udhëheqin politikat e vendit.

Në Mal të Zi, presidenti ka një pagë bruto prej 2700 eurosh, ose 2.2 herë mbi pagën mesatare të Malit të Zi. Në nivele të ngjashme e ka pagën dhe kryeministri i vendit.

Serbia është shteti që ka arritur të ketë pagën mesatare më të lartë bruto në rajon, por që në kontrast i paguan më pak drejtuesit e vendit. Presidenti ka një pagë bruto prej 338 mijë dinarë, ose 2,740 euro, vetëm 2.1 herë më shumë se paga mesatare në vend. Kryeministri ka një pagë bruto prej 282 mijë denarësh, ose rreth 2300 eurosh, 1.8 herë mbi pagën mesatare në vend.

Në Maqedoninë e Veriut nuk janë të deklaruara pagat, por mediat kanë raportuar se presidenti dhe kryeministri marrin secili nga rreth 140 mijë denarë maqedonas neto, që i korrespondon një page bruto prej 206 mijë denarë, ose rreth 3300 euro, ose tre herë mbi pagën mesatare në vend.

Në Kosovë, paga bazë mujore bruto e presidentit është 1980 euro, ose 1.64 herë mbi pagën mesatare në vend. Kryeministri ka një pagë bazë po bruto prej 1870 euro (1.55 herë mbi pagën mesatare).

Pagat e drejtuesve në raport me mesataren

Shqipëria është vendi ky presidenti dhe kryeministri kanë diferencën më të lartë me pagën mesatare në vend, me rreth 5 herë më shumë. Diferenca e dytë më e lartë është në Bosnjë Hercegovinë, me 3.2-3.7 herë. Më pas renditet Maqedonia e Veriut, me rreth 3 herë, e ndjekur nga Kosova me 2.6-2.8 herë. Në Mal të Zi pagat e drejtuesve të lartë janë 2.2 herë mbi atë mesatare dhe në fund renditet Serbia, ku drejtuesit marrin më pak se dyfishi i mesatares.

Ndërsa Serbia ka pagën mesatare mujore më të lartën në Ballkan dhe 50% më shumë se në Shqipëri, presidenti dhe kryeministri shqiptar kanë paga përkatësisht 63% dhe 80% më të larta sesa homologët serb. /Monitor.al/