Sot mbi vendin tonë do të mbajë mot i vranët dhe me intervale kohore me diell.
Vranësirat vende -vende mund të sjellin riga të dobëta shiu.
Siç njofton Instituti Hidrometeorologjik i Kosovës, temperaturat minimale do të lëvizin ndërmjet 5 dhe 8 gradë Celsius, ndërsa maksimalet e ditës parashihen të lëvizin ndërmjet 20 dhe 24 gradë Celsius.
Do të fryjë erë nga drejtimi i juglindjes me shpejtësi 1 deri në 4 metër për sekond.
Policia e Kosovës ka njoftuar se gjatë kontrollit në shtëpinë e një personi të dyshuar kosovar në Mitrovicë të Veriut si prova materiale janë gjetur dy fara që dyshohet të jenë të bimës kanabis sativa, raporton KP.
Sipas policisë i dyshuari është intervistuar dhe me vendim të prokurorit është liruar në procedurë të rregullt.
Ish-kryetari i Gjykatës Kushtetuese, Enver Hasani, në emisionin CONTEXT në ATV, tha se është absurditet të mendohet për zgjedhje të reja pa u konstituuar më parë Kuvendi, pasi një veprim i tillë nuk ka as bazë kushtetuese dhe as kuptim juridik.
Sipas tij, zgjedhjet e parakohshme mund të ndodhin vetëm në situata të përcaktuara saktësisht nga Kushtetuta, por kurrsesi pa u konstituuar legjislatura e re.
“Nuk mund të shkohet në zgjedhje pa u konstitu Kuvendi. Pastaj është Kushtetuta, dihet saktë në cilat raste vjen deri te shpërndarja e Kuvendit. Po me shku zgjedhje kur hala s’e ke konstitu – kjo është absurd. Media është në absurd. Po budallallëk ka punë veç me mendu”, tha Hasani.
Ai shtoi se në rrafshin ndërkombëtar, një veprim i tillë nuk do të pranohej dhe do të përbënte shkelje të standardeve demokratike.
“S’të pranon kurrkush jashtë. Unë jam i bindur që edhe reagimet e jashtme do të vijnë. Ti mundesh me thanë çka të duash, po ne duhet të operojmë në një standard civilizues evropian. Nuk lëmë ty bash… Deputetët kanë mandat, por nuk mund ta ushtrojnë pa betim. Kur bëjnë betim, aktivizohet ushtrimi i mandatit”, tha Hasani.
Deklaratën e plotë të Enver Hasanit në CONTEXT, e gjeni në videon më poshtë:
Ish-kryetari i Gjykatës Kushtetuese, Enver Hasani, në emisionin CONTEXT në ATV, tha se emisari evropian Miroslav Lajçak është tallur me përfaqësuesit politikë të Kosovës gjatë procesit të dialogut dhe e ka drejtuar atë sipas vullnetit të tij.
Sipas Hasanit, Lajçaku ka ndërtuar një strukturë të tërë juridike që përmban elemente të autonomisë, ndërsa përfaqësuesit kosovarë nuk kanë pasur kontroll në këtë proces.
“Është kriju një infrastrukturë juridike, një Kushtetutë materiale… një statut, i cili është me vëllim dyfish i Kushtetutës tonë. Edhe ky ndërmjetësuesi, Lajçaku, ai është tallë me këta tonë. Edhe e ka çu ku ka dashtë zotëri Kurti, dhe ai ka dashtë me çu në autonomi. ‘Vetëmenaxhimi’ është emëruesi i përbashkët për të gjitha llojet e autonomisë – politiko-territoriale, personale dhe kulturore”, tha Hasani.
Ai tha se i vetmi sukses i mundshëm është ndërhyrja nëpërmjet procedurave juridike, për të shmangur krijimin e një entiteti që do të dëmtonte homogjenitetin politik të vendit.
“Unë mendoj që është sukses nëse mundesh me ndërru diçka që i përket rezolutës dhe arbitrazhit, sepse pastaj këto tjera mundesh me Gjykatë Kushtetuese, me institucionet qendrore, domethënë me procedura juridike me amortizu, që mos me u kriju një entitet që e prish homogjenitetin politik”, tha Hasani.
Deklaratën e plotë të Enver Hasanit në CONTEXT, e gjeni në videon më poshtë:
Ish-kryetari i Gjykatës Kushtetuese, Enver Hasani, në emisionin CONTEXT në ATV, u përgjigj ndaj kritikave të Vetëvendosjes për rastet e dorëheqjeve të kaluara, duke thënë se situatat nuk janë të njëjta dhe nuk mund të krahasohen.
Sipas Hasanit, në vitet 2017 dhe 2021 dorëheqjet janë bërë në përputhje me Kushtetutën dhe nuk janë kontestuar nga askush, prandaj nuk mund të përdoren si precedent për të justifikuar shkeljet aktuale.
“Unë mendoj që atëherë është respektu, kanë dhënë dorëheqje, në vitin 2017 dhe në vitin 2021. Me sa më kujtohet… ajo është mbyllë, se ka kontestu kurrkush. Ajo është kushtetuese dhe ligjore. U kry. Tash bëhet fjalë për një situatë tjetër”, tha Hasani.
Ai tha se nuk është e drejtë të përdoret një shkelje e mundshme nga e kaluara për të arsyetuar një tjetër, duke e krahasuar këtë qasje me arsyetimin e një vepre të paligjshme me një tjetër.
“Nuk mund të përdoret veç disa precedent që promovon zbatimin e Kushtetutës dhe të Ligjit… S’është e lume, ndonëse është me thanë ‘ai ka shkelë, edhe unë po shkel’. Është sikur me thanë hajni”, tha Hasani.
Deklaratën e plotë të Enver Hasanit në CONTEXT, e gjeni në videon më poshtë:
Ish-kryetari i Gjykatës Kushtetuese, Enver Hasani, në emisionin CONTEXT në ATV, tha se opozita ka gabuar politikisht duke mos reaguar me kohë në Komisionin Qendror të Zgjedhjeve pas zhvillimeve të fundit.
Sipas tij, në momentin që u pa se po ndodhte një proces i diskutueshëm, opozita është dashur ta ankimonte certifikimin menjëherë në KQZ.
“Politikisht është dashtë më së pari me hartue në KQZ. Është dashtë, moment që e kanë pa që po ndodh ajo që ndodhi, është dashtë me ankimu certifikimin në KQZ. S’e kanë ba. Tash me këtë, po dojnë Kushtetutën me ujë, domethënë me mos me lanë me dhanë”, tha Hasani.
Ai tha se ky veprim do të kishte shmangur arbitraritetin nga të dyja palët dhe do të lejonte që procesi të kalonte përmes Kuvendit dhe Gjykatës Kushtetuese.
“Unë mendoj që kjo është, do të thotë, prej dy palëve arbitraritet. Edhe duhet me e lanë me u bo betimin, me u konstituue Kuvendi edhe deputetët, pastaj ne jemi në Gjykatë Kushtetuese”, tha Hasani.
Deklaratën e plotë të Enver Hasanit në CONTEXT, e gjeni në videon më poshtë:
Ish-kryetari i Gjykatës Kushtetuese, Enver Hasani, në emisionin CONTEXT në ATV, tha se pas dështimit të seancës për formimin e institucioneve, presidentja nuk ka asnjë kompetencë kushtetuese për të ndërhyrë dhe se më e mira do të ishte të mos reagojë fare.
Sipas tij, në mungesë të mandatit të ri, vendi nuk mund të vazhdojë me të njëjtin kryeministër, por vetëm me ushtrues detyre nga radhët e zëvendëskryeministrave.
“Në momentin që Kushtetuta thotë mandati fillon me certifikim dhe ligji është i qartë, e ke zbatu, e ke kriju një ligj që elaboron këtë dispozitë kushtetuese… Problemi është që ti s’ke asnjë bazë kushtetuese dhe ligjore… Ai që është zëvendëskryeministër në detyrë, në atë rast do të ishte ushtrues i detyrës së kryeministrit në detyrë. S’ka, s’ka fjalë tutje”, tha Hasani.
Ai tha se presidentja nuk ka asnjë hap ligjor për të ndërmarrë dhe duhet të shmangë çdo reagim publik që do të përkeqësonte situatën.
“Sa i përket asaj pyetjes suaj… S’ka këtu presidentja kurgjo. S’ka çfarë. Çfarë pra çka ndodh? Është kot. S’di, s’e kuptoj kush i ka mësu, kush po e mëson kështu. Presidentja veç mundet të mos me u përgjigjë, që do të ishte ma e mira, do të thotë se mun përgjigjeni me tregu që s’ka more kompetenca kushtetuese para të mua”, tha Hasani.
Deklaratën e plotë të Enver Hasanit në CONTEXT, e gjeni në videon më poshtë:
Ish-kryetari i Gjykatës Kushtetuese, Enver Hasani, në emisionin CONTEXT në ATV, tha se qasja aktuale ndaj ligjit dhe Kushtetutës nga ana e pushtetit rrezikon të çojë vendin drejt anarkisë, ndërsa opozita nuk duhet të lejojë diçka të tillë.
Sipas tij, veprime të tilla mund të duken të padëmshme në pamje të parë, por krijojnë pasoja serioze dhe rrezikojnë funksionimin kushtetues të shtetit.
“Këtu e kam vërejtë… a e di çka thonë? ‘S’është kurrgjë’ për shumë çka që ndodh këtu. Kolegë, po fatkeq, se edhe komandir të juridikut këtu nuk bëhet kurrgjë, edhe me e marrë Kushtetutën me qky edhe me nënshkru kapitullimin e Kosovës, me nënshkru me ispatë… a e kuq o? Por do pasoja krijohen masandej”, tha Hasani.
Ai shtoi se opozita duhet ta mbrojë Kushtetutën dhe t’i lejojë procedurat e kontrollit kushtetues të vazhdojnë normalisht.
“Pasoja është sepse kjo logjikë çon në anarki, domethënë me qenë në anarki dhe në kaos. Unë mendoj që opozita, së paku, sepse opozita nuk është identifiku as me anarki, as me kaos deri sot. Përkundrazi, është identifiku me një respekt më të madh ndaj Kushtetutës, ligjit dhe sistemit të drejtësisë, dhe është dashtë me leju dhe me vazhdu procedurat e kontrollit të Kushtetutës në vot”, tha Hasani.
Deklaratën e plotë të Enver Hasanit në CONTEXT, e gjeni në videon më poshtë:
Ish-kryetari i Gjykatës Kushtetuese, Enver Hasani, në emisionin CONTEXT në ATV, tha se në rastin e certifikimit të kandidatëve nga ekzekutivi nuk ka pasur dorëheqje të vërtetë dhe se Glauk Konjufca nuk ka qenë autoritet kompetent për ta pranuar atë.
Sipas tij, nëse do të respektohej ligji, Komisioni Qendror i Zgjedhjeve nuk do të duhej të vazhdonte pa dorëheqje të dorëzuar në mënyrë formale.
“Nuk është dorëheqje. Absolut, do të thotë ajo, ajo është – këta anglisht thonë mockery – është abuzim, hajgare, tallje me institucionet, po, sepse ai u drejtohet personit të jokompetent. Glauku asnjë funksion s’ka në Kosovë, ai nuk është kryetar, vendi nuk ka as ushtrues detyre”, tha Enver Hasani.
Hasani tha se KQZ-ja duhej të kërkonte dorëheqjen që në fillim, pasi ligji e kërkon atë në momentin e certifikimit.
“KQZ-ja, kryetari i KQZ-së është jurist i mirë, nuk e kuptoj pse që në fillim nuk ka lyp me i dorëzu dorëheqjes, siç e kërkon ligji. Ai ligj ka kërku dhe kërkon dorëheqjen në momentin e certifikimit… në fakt, ashtu është edhe po të shikohet fillimi i mandatit me Kushtetutën e Republikës së Kosovës, kur e cakton papajtueshmërinë e funksionit ekzekutiv me atë të deputetit”, tha Hasani.
Deklaratën e plotë të Enver Hasanit në CONTEXT, e gjeni në videon më poshtë:
Pasi Gjykata e Apelit në Speciale ka aprovuar pjesërisht ankesën e Prokurorisë ndaj vendimit për konfirmimin e aktakuzës në rastin ndaj Hashim Thaçit, Bashkim Smakajt, Isni Kilat, Fadil Fazliut dhe Hajredin Kuçit, është shtuar një formë e përgjegjësisë penale ndaj Thaçit në rastin kundër administrimit të drejtësisë.
Më 14 prill 2025, gjyqtarja e procedurës paraprake, Marjorie Masselot, ka ndryshuar vendimin e saj të mëparshëm për konformimin e aktakuzës, kështu duke konfirmuar formën e përgjegjësisë penale për Thaçin që bie në bazë të nenit 32 (3) të KPRK-së që ka të bëjë për shtytje në kryerjen e veprës penale të “Pengimit të personave zyrtarë në kryerjen e detyrave zyrtare”, në bazë të nenit 401 (3) dhe (5) të KPK-së.
Në vendim, Masselot ka urdhëruar që Prokuroria të dorëzojë versionin e ri të aktakuzës deri më 16 prill 2025 dhe pastaj administratorja ta dorëzojë tek Thaçi dhe të tjerët në gjuhën shqipe, si dhe versionin e redaktuar ta dorëzojnë për publikun, raporton “Betimi për Drejtësi“.
Aktakuza e rikonfirmuar, sipas gjyqtares, duhet t’i dorëzohet në Kosovë edhe Hajredin Kuçit.
Veç kësaj, në vendim thuhet se Thaçi është i informuar për të gjitha akuzat dhe tashmë është deklaruar lidhur me ato, ndërsa zhvillimi i fundit me vendimin aktual nuk shton ndonjë pikë të re të aktakuzës, por vetëm një formë të re të përgjegjësisë për nxitje në lidhje me veprat për të cilat ai është i akuzuar në pikën 1, 2 dhe 3 të aktakuzës.
Si rrjedhojë, gjyqtarja ka konstatuar se nuk është e nevojshme ndonjë paraqitje fillestare në seancë siç ndodhë nëse shtohet ndonjë akuzë e re. Por, qëndrimi i Thaçit lidhur me ketë formë të re të përgjegjësisë duhet të evidentohet dhe se këtë Thaçi duhet të bëjë me shkrim deri më 24 prill 2025.
“z. Thaçi ftohet që, nëse dëshiron, të deklarojë fajësi ose pafajësi me shkrim, deri të enjten, më 24 prill 2025, ora 16:00. Nëse nuk e shfrytëzon këtë të drejtë, Gjykatësi do të regjistrojë një deklaratë të pafajësisë në emër të tij, sipas rregullës 92 (2) (f)”, thuhet në vendim.
Megjithatë, Thaçit i ofrohet e drejta që në rast që dëshiron të njoftohet publikisht në seancë lidhur me këtë formë të përgjegjësisë, mund ta bëjë kërkesën deri në po të njëjtën ditë. Ndërsa, si afat për dorëzimin e mocioneve nga ana e palëve është caktuar 8 maji.
Ndryshe, Gjykata e Apelit e Dhomave të Specializuara të Kosovës (DhSK) në Hagë ka aprovuar pjesërisht ankesën e Prokurorisë ndaj vendimit për konfirmimin e aktakuzës në rastin ndaj Hashim Thaçit, Bashkim Smakajt, Isni Kilat, Fadil Fazliut dhe Hajredin Kuçit.
Nga katër pika të ankesës së ZPS-së, u pranua vetëm ajo që kishte të bënte me përgjegjësinë e Thaçit për nxitjen e Kilajt, Smakajt dhe Fazliut për të kryer veprën penale të pengimit të personave zyrtarë në kryerjen e detyrave zyrtare.
Paneli i Apelit ka marrë vendim që një nga katër pikat që kishte ngritur ZPS-ja kundër vendimit për konfirmimin e aktakuzës ndaj Hashim Thaçit, Bashkim Smakajt, Fadil Fazliut dhe Hajredin Kuçit, ta pranojë lidhur me përgjegjësinë penale të Thaçit për ‘nxitje’ në kryerjen e veprës penale “Pengim i personave zyrtarë në kryerjen e detyrave zyrtare”.
Pika e katërt e ankesës së ZPS-së, kishte të bënte me kundërshtimin e konstatimit të gjyqtares që neni 32 (3) i KPRK-së nuk zbatohet për veprën e “Pengim i personave zyrtarë” sipas nenit 401 (3) dhe (5) të KPRK-së.
Sipas ZPS-së, gjyqtarja ka gabuar kur ka konstatuar se për shkak se neni 401 (3) dhe (5) të KPRK-së nuk parashikon dënim deri në pesë vjet burgim, për rrjedhojë neni 32 (1) nuk është i zbatueshëm pasi sipas saj kjo dispozitë zbatohet vetëm për vepra që janë të dënueshme më pak se pesë vjet.
Sipas ZPS-së, gjykatësi i procedurës paraprake ka gabuar duke konstatuar se, për shkak se neni 401 (3) dhe (5) i KPK-së parashikon dënim nga një deri në pesë vjet burgim, neni 32 (3) nuk ishte i zbatueshëm, pasi kjo dispozitë zbatohet vetëm për vepra të dënueshme me të paktën pesë vjet burgim. Mbrojtja e Thaçit kishte thënë se gjyqtarja e ka interpretuar saktë këtë nen.
Neni 32 (3 ) i KPRK-së për “Shtytje” thotë se “Kushdo që me dashje shtytë personin tjetër të kryejë vepër penale të dënueshme me së paku pesë (5) vjet burgim dhe vepra penale as që është tentuar, shtytësi dënohet për tentativë”.
Sipas Panelit, gjyqtarja kishte konstatuar se vepra që bie në nenin 401 (3) të KPRK-së është e dënueshme nga 1 deri në 5 vjet burgim, prandaj e përjashtoi përgjegjësinë e Thaçit sipas nenit 32 (3) të KPRK-së për pikën 1, 4 dhe 4 të aktakuzës.
Veç kësaj, paneli kishte thënë se ka mospajtime për interpretimin e këtij neni pasi sipas tyre, panele më të ulëta kanë interpretuar që ky nen është i zbatueshëm për veprat penale të dënueshme mbi pesë vjet dhe disa për ato të dënueshme nën 5 vjet.
Në vendim thuhet se me shumicë votash, Paneli ka rënë dakord me ZPS-në, duke thënë se neni 32 (3) duhet të zbatohet për vepra që përfshijnë ose edhe i tejkalojnë pesë vite burgim.
“Si rezultat, Paneli konstaton, me shumicë votash, se duke qenë se vepra e pengimit të personave zyrtarë është e dënueshme në format e saj të rënduara me burgim nga një (1) deri në pesë (5) vjet, forma e tretë e nxitjes sipas nenit 32(3) të KPK-së është e zbatueshme në këtë rast”, thuhet në vendim.
Si rrjedhojë, ata e konsideruan gabim konstatimin e gjyqtares së ky nen nuk ishte i zbatueshëm për veprën “Pengim i personave zyrtarë në kryerjen e detyrave zyrtare”. Kështu që paneli, pranoi pikën katër të ankesës së ZPS-së.
“Duke qenë se konstatimi për ekzistencën e një dyshimi të bazuar mirë se Thaçi i ka nxitur Fazliun, Smakajn dhe Kilajn për të kryer veprën penale të pengimit të personave zyrtarë përfshin një vlerësim faktik të provave, çështja i kthehet Gjykatësit të Procedurës Paraprake për shqyrtim të mëtejshëm”, thuhet tutje në vendim.
Ndryshe, në këtë rast Bashkim Smakaj, Fadil Fazliu dhe Isni Kilaj u arrestuan më 5 dhjetor 2024 në Kosovë dhe u transferuan në objektin e paraburgimit në DhSK, më 6 dhjetor 2024 në bazë të aktakuzës së konfirmuar dhe fletarrestimeve të lëshuara nga Haga.
Ndërsa, Thaçit i është dorëzuar fletarrestimi në objektin e paraburgimit në Hagë më 5 dhjetor 2024, gjithnjë sipas njoftimit të DhSK-së.
Kurse, Hajredin Kuçit i është dorëzuar aktakuza e konfirmuar dhe fletëthirrja për t’u paraqitur para gjykatëses së procedurës paraprake për paraqitjen e parë, e cila u mbajt me 9 dhjetor.
Sipas aktakuzës, Thaçi individualisht dhe përmes veprimeve të përbashkëta me grupet; Grupi Fazliu (Fadil Fazliu dhe Fahri Fazliu), Grupin Smakaj (Bashkim Smakaj, Blerim Shala dhe Artan Behrami) si dhe Grupin Kilaj (Isni Kilaj dhe VllaznimKryeziu), kanë ndjekur një model të sjelljes për të penguar personat zyrtarë në kryerjen e detyrave zyrtare.
Në aktakuzë thuhet se Thaçi ka udhëhequr dhe marrë pjesë në këto përpjekje përmes vizitave të tij në objektet e paraburgimit gjatë kohës sa ishte i paraburgosur në kuadër të gjykimit të tij për krime lufte dhe krime kundër njerëzimit.
Aty thuhet se anëtarët e Grupit Fazliu, Grupit Smakaj dhe Grupit Kilaj u koordinuan për të ndikuar në dëshmitarët e ZPS-së gjatë vizitave jo të privilegjuara të datave 2 korrik, 9 shtator dhe 6 tetor 2023.
Si rrjedhojë, ndaj Thaçit rëndojnë tri akuza për pengim të personit zyrtar në kryerjen e detyrave zyrtare, tri për shkelje të fshehtësisë së procedurës dhe katër akuza për mosbindje ndaj gjykatës.
Ndërsa, Kilaj, Smakaj dhe Fazliu akuzohen për tentativë të pengimit të personave zyrtarë në kryerjen e detyrave zyrtare dhe mosbindje ndaj gjykatës. Kurse, Kuçi i ka dy akuza për mosbindje ndaj gjykatës.