Category: Lajme

Besimtarët e krishterë në të gjithë vendin, kremtojnë sot Pashkën. Kremtimi i Pashkëve është momenti më i madh në kalendarin liturgjik të Kishës Katolike dhe kishave të tjera të krishtera.

Në këtë ditë, Pashkët shënojnë ringjalljen e Jezu Krishtit pas kryqëzimit, ringjallje që simbolizon besimin te Zoti dhe shpresën për të gjithë besimtarët.

Sivjet Pashkët festohen në të njëjtën ditë si në kalendarin Gregorian ashtu edhe në atë Julian.

Mbrëmë në Katedralen “Shënë Nënë Tereza” në Prishtinë, nën drejtimin e Ipeshkvit të Ipeshkvisë së Kosovës, Imzot Dodë Gjergji, është mbajtur ceremonia e Meshës Solemne të Pashkëve.

Duke ftuar besimtarët katolikë që këtë festë të madhe ta kremtojnë me lutje për paqe dhe zemrat e mbushura me shpresë dhe gëzim, ipeshkvi Dodë Gjergji bëri thirrje për paqe e pajtim në mbarë botën si një qëllim i përbashkët për të mirën e njerëzimit.

Ai tha se edhe pse kjo Pashkë na gjen në një botë të përgjakur, në një Europë të përçarë dhe në një Kosovë që rënkon nën barrën e papërgjegjësisë politike, pasigurisë për të ardhmen dhe ndarjeve të panevojshme, janë të ftuar të ruajmë qetësinë e shpirtit, shkëlqimin e shpresës dhe ngushëllimin e fesë.https://zeri.info/inarticle.html

Ndryshe sot në ditën e Pashkës, në orën 11:00 mbahet meshë në Katedralen ‘Shën Nënë Tereza’.

Ndërsa në orën 19:00 organizohet pritja solemne e Pashkës, e cila do të mbahet në Qendrën “BogdaniPolis” që gjendet nën Katedralen ‘Shën Nënë Tereza’. /rtk

Në Kosovë, pacientët përballen me një sërë sfidash në sistemin shëndetësor, nga mungesa e barnave e deri te trajtimi joetik nga stafi mjekësor, por mungesa e mekanizmave funksionalë për adresimin e ankesave po bën që shumë prej tyre të heqin dorë nga kërkimi i së drejtës.

Kështu thotë në intervistë për Ekonomia Online, Besim Kodra, drejtor i programeve në Shoqatën për të Drejtat e Pacientëve në Kosovë (PRAK). Ai ngrit shqetësimin se kjo situatë po krijon një kulturë të heshtjes në mesin e pacientëve.

Ai shtoi se shpeshherë pacientët detyrohen të përballen vetë me situatën, pa pasur një adresë të sigurt për t’i kanalizuar shqetësimet e tyre.

“Ankesat janë të natyrave të ndryshme: për mungesë të barnave, për trajtim joetik e johuman. Ka ankesa për listat e pritjes, për komunikime mes stafit shëndetësor dhe pacientëve, për kushtet hotelierike, higjienike e të tjera. Problematike për ne mbetet fakti që institucionet nuk kanë mekanizma të qartë të trajtimit të ankesave dhe kjo i demotivon njerëzit për t’u ankuar edhe shpesh herë ata i shtrëngojnë vetë duart dhe konfrontohen vetë me stafin shëndetësor, që është diçka që nuk duhet të ndodhë. Mendoj që Ministria e Shëndetësisë është dashur të krijojë një procedurë standarde të menaxhimit të ankesave dhe çdo ankesë të marrë një trajtim ose një epilog të drejtë”, tha ai.

Kodra vlerëson se gjendja aktuale nuk është pasojë e mungesës së problemeve, por e mungesës së informimit dhe e besimit të qytetarëve në sistemin që supozohet se duhet t’i mbrojë.

“Realisht, mendoj se nuk ka ankesa aq sa ka shkelje, për shkak se edhe njerëzit nuk i njohin mirë të drejtat e tyre dhe nuk e dinë se kur duhet të parashtrojnë ankesa ose kur e drejta e tyre është shkelur. Në parim, mendoj se gjendja në sistem nuk është e mirë. Këtë nuk mund ta shoh vetëm dikush që nuk do ta shohë. Gjërat duhet ndryshuar në masë të madhe për t’i dhënë rëndësi secilës nevojë të qytetarit dhe trajtimit të secilës ankesë, ku ai nuk ka marrë shërbimin shëndetësor që iu ka nevojitur”, tha ai.

Kodra tha se nga vlerësimi i bërë nga PRAK gjatë vitit të kaluar del se vetëm 46 për qind e qytetarëve në Kosovë e dinë se kush i mbron të drejtat e tyre si pacientë. Sipas tij, në mungesë të një databaze shtetërore për ankesat, nuk dihet as sasia reale e tyre e as natyra specifike.

“Në vlerësimin që e kemi bërë vitin e kaluar del se diku rreth 46 për qind e njerëzve e dinë në Kosovë se kush i mbron të drejtat e tyre. Kjo tregon për masën e madhe që duhet të informohet, sepse pa njohuritë rreth të drejtave që i kanë, nuk mund edhe t’i kërkojnë ato dhe nuk parashtrojnë ankesa. Vitin e kaluar kemi pranuar 300 ankesa. Problem është se në Kosovë nuk ka një mekanizëm të qartë të trajtimit të ankesave dhe nuk kemi një databazë të përgjithshme shtetërore se sa është numri i ankesave. Për shembull: disa shkojnë në ministri, disa vijnë te ne, disa shkojnë në pesë Oda të profesionistëve shëndetësorë, disa në inspektorat, disa shkojnë nëpër qendra të mjekësisë familjare. Nuk ka një databazë shtetërore se sa është numri i ankesave dhe cili është lloji i tyre”, tha ai.

Kodra tha se më të prekur nga këto probleme janë grupet sociale të margjinalizuara, si pensionistët.

“Në bazë të numrave dhe statistikave që i kemi, janë rastet sociale, pensionistët të cilët më shumë atakohen nga sistemi shëndetësor, për shkak të paaftësisë ose pamundësisë për të marrë shërbimin shëndetësor që e kanë. Çuditërisht, këto grupe më pak parashtrojnë ankesa, sepse edhe mundësinë që ata të informohen rreth të drejtave e kanë më të kufizuar. Për këtë arsye, mendoj se shtetet krijohen në këtë formë që t’ju ndihmojnë njerëzve ose t’i privilegjojnë ata, që nuk mund të marrin shërbimin shëndetësor”, tha ai.

Ndërsa Prokuroria Speciale në Hagë tashmë ka përmbyllur paraqitjen e dëshmitarëve ndaj Hashim Thaçit dhe të bashkakuzuarve të tij, pyetja që shtrohet është nëse kushtet janë pjekur për të zbutur masën e sigurisë, përkatësisht lirimin nga paraburgimi.

Vendimi, sipas përfaqësuesve të Gjykatës dhe të shoqërisë civile, është ende i hapur, por rreziqet e theksuara nga prokuroria mund të përdoren si arsye për të vazhduar ndalimin.

Gjykata Speciale në Hagë në përgjigje për Ekonomia Online, bëri të ditur se kjo çështje mbetet në dorë të trupit gjykues dhe varet nga vlerësimi i rrezikut.

Angela Griep, shefe e Njësisë për Informim Publik dhe Komunikim në Dhomat e Specializuara thekson se çdo dy muaj rishqyrtohet nevoja për paraburgim, por asnjë garanci nuk jepet për ndonjë ndryshim të afërt.

“Gjykatësve u kërkohet me ligj që të shqyrtojnë çdo dy muaj nëse ekzistojnë ende arsyet për të mbajtur dikë në paraburgim. Përpara se gjyqtarët të vendosin, të dyja palët, mbrojtja dhe prokuroria, kanë mundësinë të japin mendimet e tyre. Gjyqtarët më pas përcaktojnë nëse ekziston rreziku që një i paraburgosur të ikë, të pengojë ecurinë e procedimeve dhe/ose të kryejë krime të mëtejshme. Ata gjithashtu përcaktojnë nëse këto rreziqe, nëse ka, mund të zbuten përmes masave të tjera përveç ndalimit të vazhdueshëm të një të akuzuari”, tha Griep.

Ajo sqaron se gjyqtarët vlerësojnë nëse ekziston rreziku që i paraburgosuri të ikë, të pengojë procedurat apo të kryejë vepra të tjera, si dhe nëse këto rreziqe mund të zbuten me masa më të lehta.

“Shkurtimisht, do t’i takon Trupit Gjykues të përcaktojë nëse të gjitha ose disa nga këto rreziqe vazhdojnë të ekzistojnë pasi Prokuroria të ketë përfunduar paraqitjen e provave të tyre dhe, nëse po, nëse rreziqet mund të zbuten përmes masave të tjera përveç vazhdimit të paraburgimit të të akuzuarit”, tha ajo.

Bekim Blakaj nga Fondi për të Drejtën Humanitare vlerëson se zbutja e masës së sigurisë është diskutuar gjatë, por gjithmonë është refuzuar për shkak të një arsyeje të vetme: ndikimit ndaj dëshmitarëve.

Ai kujton se tashmë ekziston edhe një aktakuzë e veçantë për pengim të drejtësisë ndaj Hashim Thaçit, e cila, sipas tij, do të përdoret si mjet për të justifikuar mbajtjen në paraburgim.

Ai thotë se kushtet për zbutje janë pjekur, qoftë për paraburgim shtëpiak apo masa të tjera, meqë procesi ka zgjatur tej mase dhe të akuzuarit janë mbajtur për një kohë të gjatë pa lëvizje në këtë aspekt.

“Provat e prokurorisë tashmë janë administruar, pra nuk ka dëshmitarë të rinj të propozuar nga prokuroria. Çështja e zbutjes së masës së sigurisë është një çështje e cila është diskutuar shumë në të kaluarën edhe Prokuroria gjithmonë ka gjetur arsyetime të ndryshme. Mirëpo, arsyetimi kryesor i tyre ka qenë ndikimi te dëshmitarët, për çka edhe realisht ka një aktakuzë të re për dëmtim të administrimit të drejtësisë, apo pengim të administrimit të drejtësisë ndaj ish-presidentin Thaçi dhe kam frikë që kjo tash do të përdoret si një argument shtesë për prokurorinë edhe për Gjykatën në fakt që për të mos ja ndërpre paraburgimin. Realisht unë mendoj që kushtet janë pjekur që të zbutet masa me paraburgim shtëpiak apo me ndonjë masë tjetër, sepse edhe ashtu procesi ka zgjatur tepër shumë edhe për një kohë të gjatë janë të akuzuarit në paraburgim. E kam një bindje që nuk do të ndodh shpejt që të zbutet masa e sigurisë”, tha ai.

Blakaj komenton edhe fazën e mbrojtjes, duke parashikuar një kohëzgjatje më të shkurtër të administrimit të provave sesa ajo e Prokurorisë.

“Mendoj që edhe pse realisht mbrojtja ish dashtë që të ketë kohën e njëjtë sikur Prokuroria, mendoj që kjo administrimi i provave të propozuara nga mbrojtja edhe dëshmitarëve të mbrojtjes do të jetë më e shkurtër se sa ajo e Prokurorisë, pa marrë parasysh që janë katër ekipe mbrojtëse dhe secili ekip ka të drejtë që t’i propozojë dëshmitarët e vet. Në këtë rast për aq sa kemi parë, ne mendoj që do të bashkëpunojnë ekipet mbrojtëse dhe do t’i sjellin dëshmitarët e njëjtë të cilët ju hynë në punë të katër palëve”, tha ai.

Lidhur me kohën e përfundimit të procesit, Blakaj shton se pritjet janë që një aktgjykim i shkallës së parë mund të vijë gjatë vitit të ardhshëm.

“Këtë moment askush nuk mundet me ditë bile ndoshta as vetë paneli gjyqësor, sepse mund të zgjatet numri i ditëve të cilat kanë me u dëgjuar disa dëshmitarë. Po besoj që ndoshta viti i ardhshëm do të jetë – diku gjatë vitit të ardhshëm mund të presim një aktgjykim të shkallës së parë, pastaj normal ekzistojnë edhe shkalla e apelit e kështu me radhë”, tha ai për EO.

E diela në Kosovë pritet të karakterizohet me atmosferë plotësisht stabile, temperatura pranverore dhe rreze të shumta diellore. Pasdite lokalisht do të ketë shtim të vranësirave, por pa ndonjë reshje atmosferike. Temperaturat pritet të lëvizin nga 6 minimalja deri në 23 apo 24 gradë Celsius maksimalja.

Në Shqipëri, Maqedoninë Veriore, Luginë të Preshevës dhe Mal të Zi sot pritet të mbajë mot me diell dhe vranësira lokale të cilat pritet të zhvillohen pasdite sidomos në disa zona kodrionore-malore, por kryesisht nuk do të ketë reshje atmosferike.

Të hënën edhe më ngrohtë dhe paradite me diell, ndërsa pasdite destabilizim i atmosferës. Pasdite priten zhvillime lokale të vranësirave konvektive që do të kushtëzojnë rrebeshe të izoluara shiu me vetëtima dhe bubullimë, më të shprehura në viset kodrinore-malore. Rrebeshe lokale me vetëtima dhe bubullimë priten në pjesë të Kosovës, zonat kontinentale të Shqipërisë, pjesë qendrore, lindore, juglindore e veriore, pastaj në perëndim të Maqedonisë së Veriut. Në këto zona rrebeshet do të jenë më të shprehura edhe pse do të jenë të karakterit lokal.

Nga e marta pritet të kemi mot mjaft jo-stabil, rrebeshet e shiut do të jenë më të shpeshta dhe më të përhapura sidomos orëve të pasdites dhe mbrëmjes./MeteoBallkan

Familjarët e viktimave të tragjedisë së 16 marsit në diskotekën “Pulse”, sot do të zhvillojnë marshimin e tretë protestues në Koçan, raporton Gazeta Sinjali.

Ky marshim, i cili vjen pas protestës të fundit të mbajtur më 12 prill, ka për qëllim kërkesat për drejtësi dhe hetime të plotë për tragjedinë që mori 62 jetë dhe la mbi 190 të plagosur.

Marshi do të nisë nga parku i qytetit në Koçan dhe do të kalojë përmes Komunës deri në Ministrinë e Brendshme. Familjarët e viktimave kërkojnë përgjegjësi për ngjarjen dhe dëshirojnë që hetimi të përfshijë të gjithë ata që kanë pasur përgjegjësi në ngjarjen tragjike.

Zjarri që shpërtheu në diskotekën “Pulse” në 16 mars, i cili shkaktoi humbjen e jetës së 62 personave, përfshirë tre që ishin duke u mjekuar jashtë shtetit, është një nga ngjarjet më tragjike të vitit. Hetimi për këtë incident ka përfshirë mbi 60 individë dhe tre persona juridikë, të cilët po hetohen për përfshirje në incidentin e tmerrshëm.

Prokuroria e Posaçme e Shqipërisë ka lëshuar urdhër arreste për disa zyrtarë të Policisë së Tiranës, të cilët dyshohet se janë të përfshirë në një skemë korrupsioni, raporton Gazeta Sinjali.

Shefi i qarkullimir rrugor në Tiranë, Roven Zeka, shefi i sektorit të aksidenteve, Sokol Novaku dhe oficeri i Policisë Gjyqësore, Edison Tabaku janë personat që dyshohen për përfshirje në këtë çështje, ka transmetuar Top Channel.

Ndërkohë, pritet njoftim zyrtar nga SPAK për rastin korruptiv që çon në pranga tre zyrtar policie.

Kuvendi i Kosovës as sot nuk ka arritur të zgjedhë kryetarin e ri. Edhe pas dy përpjekjeve, kandidatura e propozuar nga Lëvizja Vetëvendosje, Albulena Haxhiu, nuk ka arritur të sigurojë numrin e nevojshëm të votave për t’u zgjedhur kryeparlamentare.

Në të dy raundet e votimit, Haxhiu mori nga 57 vota, duke dështuar të arrijë kuotën prej 61 votash që kërkohet për të marrë këtë post. Dështimi për të siguruar shumicën ka bërë që procesi të ndërpritet sërish.

Pas votimit të dytë, kryesuesi i seancës konstituive, Avni Dehari, vendosi ta ndërpresë seancën për 48 orë. Ai njoftoi se seanca do të vazhdojë të hënën, në ora 15:00.

Grupi parlamentar i Lëvizjes Vetëvendosje, ka propozuar deputeten Albulena haxhiu si kandidate për kryetare të Kuvendit të Kosovës.

Albulena Haxhiu (e lindur më 11 maj 1987) është politikane shqiptare, e cila ishte deputete e Vetëvendosjes prej legjislaturës së katërt të Kuvendit të Kosovës. Prej 3 shkurtit 2020, Haxhiu shërben si Ministre e Drejtësisë në Kosovë.

Haxhiu ka përfunduar studimet Bachelor dhe Master në Fakultetin Juridik të Universitetit të Prishtinës. Ajo është e martuar dhe ka një fëmijë. Haxhiu është mbesa e Ahmet Haxhiut.