Category: Lajme

Deputetja e PDK-së, Blerta Deliu-Kodra, ka reaguar lidhur me vdekjen tragjike të një 27-vjeçari në Lipjan, duke kërkuar nga prokuroria dhe institucionet përgjegjëse që të zbardhin urgjentisht rastin.

Ajo e cilësoi ngjarjen si shqetësuese dhe theksoi se siguria në vend duhet të trajtohet me seriozitet të plotë.

“Presim nga prokuroria dhe institucionet përgjegjëse të zbardhin detajet e këtij rasti tragjik. Situata e sigurisë në Kosovë duhet të trajtohet me seriozitet të plotë. Është akt shumë i rëndë dhe institucionet përgjegjëse të cilat kanë mbetur në heshtje, duhet të marrin masa dhe përgjegjësit duhet të ofrojnë përgjegjësi. Sa i përket seancës, deputetja tha se nuk pret reflektim as sot, pasi sipas saj, qasja e VV-së është e njëjtë.
“PDK-ja do ta respektoj aktgjykimin e Gjykatës Kushtetuese. Tashmë kemi deponuar në Gjykatën Kushtetuese edhe disa vërejtje të tjera për shkak të mosrespektimit të këtij aktgjykimi, po presim përgjigje. Nuk pres që sot të ketë reflektim, është po e njëjta qasje e marrjes peng të kuvendit”, tha ajo.

Këngëtarja me famë botërore, Rita Ora, do të jetë e ftuar speciale dhe performuese kryesore në darkën gala që FIFA do të organizojë të enjten në New York, në kuadër të Botërorit të Klubeve.

Ngjarja do të mbahet në ambientet luksoze të Cipriani Wall Street, në bashkëpunim me platformën “Big Art Festival”, dhe pritet të mbledhë emra të njohur nga bota e futbollit, drejtues të lartë të FIFA-s, si dhe figura nga moda, biznesi dhe arti.

Përveç se e ftuar nderi, Rita Ora do ta mbyllë mbrëmjen me një performancë muzikore, duke theksuar ndërthurjen e sportit me kulturën në skenën ndërkombëtare.

Ndryshimet klimatike pothuajse trefishuan numrin e vdekjeve të lidhura me të nxehtin në qytetet e mëdha evropiane, gjatë valës së të nxehtit ekstrem, nga fundi i qershorit deri në fillimin e korrikut, sipas një studimi të ri.

Hulumtues nga Mbretëria e Bashkuar, Danimarka, Holanda dhe Zvicra analizuan kushtet në 12 qytete të mëdha evropiane ndërmjet 23 qershorit dhe 2 korrikut, raporton DPA.

Ata erdhën në përfundim se rreth 2.300 njerëz kanë vdekur nga shkaktarët e lidhur me të nxehtin gjatë periudhës 10-ditore, ndërsa për dy të tretat e vdekjeve – rreth 1.500 – u fajësuan ndryshimet klimatike.

Temperaturat në shumë qytete arritën nivele ekstreme gjatë asaj periudhe, shpesh duke kaluar 40 gradë celsius.

Pa ngrohjen globale, që studimi thotë se ka ngritur temperaturat e ditës në qytete për 1 deri në 4 gradë celsius, rreth 800 njerëz do të kishin vdekur nga i nxehti, sipas llogaritjeve të grupit, raporton REL.

Për analizën, ekipi ka krahasuar temperaturat aktuale të regjistruara në qytete gjatë periudhës, me vlera të modeluara që do të mund të ishin regjistruar pa ndryshimet klimatike.

Më pas, është llogaritur numri i pritur i vdekjeve të lidhura me të nxehtin në të dy skenarët.

Vala e vonë e të nxehtit ka prekur veçanërisht grupet e prekshme, si njerëzit me probleme ekzistuese dhe të moshuarit.

Sipas ekipit, 88 për qind e vdekjeve të llogaritura kanë ndodhur në mesin e personave të moshës 65 vjeç dhe më të vjetër.

Gjykata Themelore në Prishtinë, dega në Lipjan ka pranuar kërkesë për caktim të masës së paraburgimit për policët e dyshuar në rastin e vdekjes së 27-vjeçarit në Lipjan.

Këtë e ka konfirmuar zëdhënësja e Gjykatës Themelore në Prishtinë, Mirlinda Gashi e cila njoftoi se sot do të mbahet seanca dëgjimore për pesë policët.

“Lidhur me kërkesën tuaj për informata, ju njoftojmë se Gjykata Themelore në Prishtinë – Dega në Lipjan sot ka pranuar kërkesën për caktim të masës së paraburgimit në çështjen penale ndaj pesë të pandehurve. Seanca dëgjimore është caktuar të mbahet nesër me datë 09.07.2025 në ora 10:30”, thuhet tutje në konfirmim.

Të paktën 161 persona janë ende të zhdukur në Kerr County, Teksas, pas përmbytjeve të fuqishme që lanë pas vetes mbi 100 të vdekur, 94 prej tyre vetëm në zonën e Kerrville.

Ndër të zhdukurit janë edhe 5 vajza dhe një kujdestar nga një kamp veror, shkruan BBC.

Guvernatori Greg Abbott tha se përpjekjet e shpëtimit vazhdojnë me helikopterë, dronë dhe mbi 250 reagues në terren. Presidenti i aeroportit lokal e përshkroi situatën si “një makth”, ndërsa vullnetarët e shpëtimit raportojnë shkatërrim masiv dhe vështirësi ekstreme në kërkime.

Autoritetet pranojnë se ishin paralajmëruar për stuhi, por askush nuk e priste një “mur uji 30 metra të lartë”. Kritikat janë ngritur për mungesë paralajmërimesh dhe evakuimesh në kohë.

Kryeministri izraelit, Benjamin Netanyahu, ka bërë të ditur se takimi i tij të martën vonë me presidentin amerikan, Donald Trump, është përqendruar kryesisht në çështjen e lirimit të pengjeve që po mbahen në Rripin e Gazës nga Hamasi.

Përmes një postimi në platformën X (ish-Twitter), Netanyahu theksoi gjithashtu vendosmërinë e tij për të “eliminuar” aftësitë ushtarake dhe qeveritare të Hamasit, duke lënë të kuptohet se operacionet ushtarake në enklavën palestineze nuk janë drejt përfundimit.

Sipas tij, gjatë takimit është diskutuar edhe për ndikimin dhe mundësitë që ka krijuar ajo që e cilësoi si një “fitore e madhe e arritur ndaj Iranit”, pas një fushate ajrore muajin e kaluar, në të cilën Shtetet e Bashkuara iu bashkuan sulmeve izraelite ndaj vendndodhjeve të dyshuara bërthamore të Republikës Islamike.

Ky është takimi i tretë i Netanyahut në SHBA që nga marrja e detyrës nga presidenti Trump më 20 janar. Kryeministri izraelit u shpreh më herët për gazetarët se, edhe pse fushata ushtarake në Gaza nuk ka përfunduar ende, “negociatorët sigurisht po punojnë” për një marrëveshje armëpushimi.

Trumpi e ka pritur Netanyahun për herë të dytë brenda dy ditësh në Shtëpinë e Bardhë, ndërsa i dërguari i tij për Lindjen e Mesme, Steve Witkoff, ka deklaruar se Izraeli dhe Hamasi po i afroheshin një marrëveshjeje armëpushimi pas gati dy vitesh lufte intensive.