Category: Lajme

Kreu i PDK-së, Bedri Hamza, ka arritur në Kuvend për takimin me kryeministrin në detyrë, Albin Kurti.

Para takimit, Hamza tha se diskutimi do të përqendrohet në parime dhe se, sipas tij, nuk ka vija të kuqe.

Ai u shpreh optimist se mund të gjendet një zgjidhje që do të çojë drejt formimit të institucioneve të reja të vendit.

“Qëndrimi im është i qartë. Te unë është gjithmonë konsistenca prezent. Gjithmonë kam deklaruar që s’ka vija të kuqe me partitë politike, gjithmonë jam i gatshëm me bisedu me secilin lider politik në interes dhe në dobi të vendit dhe normalisht që deklarata ime ka qenë publike, ka qenë e qartë. Fillimisht për prioritetet, se unë kam garuar me një program, kam garuar me disa prioritete, nuk kam garuar për me i pasë 4-5 vetë ministra, 5-6 vetë, për me pasë këtë pozicion a atë pozicion, po kam garuar me pasë ambient më të mirë për biznesin, me pasë partneritet me aleatët tonë edhe me miqtë tanë, po edhe si partner me i trajtu. Me i rrit pagat, me i rrit pensionet e shumë prioritete të tjera”, tha Hamza.

Takimi po zhvillohet pas ftesës së Kurtit për një takim veçmas me liderët e tri partive politike, pas certifikimit të rezultateve të zgjedhjeve të 7 qershorit.

Kreu i LVV’së, Albin Kurti, ka arritur para pak minutash në ndërtesën e Kuvendit të Republikës së Kosovës për takimin me kreun e PDK-së, Bedri Hamza.

Kurti ka qenë i shoqëruar nga ministri në detyrë i Financave, Hekuran Murati.

“Presim që takimi të jetë konstruktiv dhe t’i konstituojmë institucionet”, ka thënë Kurti.

Pikat kufitare të Kosovës paraqiten pa fluks mëngjesin e sotëm, pa kolona të automjeteve dhe me pritje të shkurtra.

Po ashtu, Qendra për Menaxhimin Kufitar bën të ditur se në asnjërën prej pikave kufitare nuk janë regjistruar kolona të automjeteve.

Tabela e pikave kufitare:

Këtë të premte, kryetari i LVV-së Albin Kurti, do të zhvillojë takim me liderin e PDK-së Bedri Hamzën, si dhe udhëheqësin e LDK-së, Lumir Abdixhikun.

LDK e ka konfirmuar se takimi do të zhvillohet në ambientet e Kuvendit me fillim nga ora 18:00, raporton Klankosova.tv.

Po ashtu, kreu i LDK-së tha se në takim do të shkojë vetë i dyti.

Edhe kreu i PDK-së, Bedri Hamza, ka konfirmuar se të premten do të zhvillojë takim me Kurtin në orën 09:00.

Ky takim vjen pasi Kurti u dërgoi ftesa partive politike për takime pas certifikimit të rezultatit zgjedhor të 7 qershorit.

Gjykata Themelore në Pejë pritet të shpallë sot aktgjykimin në rastin e vrasjes së trefishtë në Gllogjan, një nga ngjarjet më të rënda të viteve të fundit në Kosovë.

Në bankën e të akuzuarve janë Halil Mehmetaj, Kastriot Mehmetaj dhe Kreshnik Mehmetaj, të cilët akuzohen për sulmin e armatosur ndaj një autobusi më 26 nëntor 2021, në fshatin Gllogjan të Deçanit.

Si pasojë e sulmit humbën jetën shoferi i autobusit, Gani Gjokaj, si dhe dy nxënës 17-vjeçarë, Ledion Hamzaj dhe Genta Mustafaj, ndërsa një pasagjer tjetër mbeti i plagosur.

Në seancën e fundit, Prokuroria kërkoi që tre të akuzuarit të shpallen fajtorë dhe të dënohen me burgim të përjetshëm, duke argumentuar se provat e paraqitura gjatë shqyrtimit gjyqësor dëshmojnë përfshirjen e tyre në kryerjen e veprës penale.

Të njëjtin qëndrim e mbajti edhe pala e dëmtuar, e cila kërkoi që Gjykata të shqiptojë dënimin maksimal ndaj të akuzuarve.

Shpallja e aktgjykimit është caktuar të mbahet sot, duke filluar nga ora 14:30.

Të premten parashikohet të mbajë mot me diell dhe vranësira të pjesshme. Mëngjesi do të jetë i freskët.

Era do të fryjë drejtimesh të ndryshme me shpejtësi prej 10-31 km/h.

Temperaturat minimale do të lëvizin prej 9 deri në 14°C, ndërsa ato maksimale prej 25 deri në 28°C. /MeteoKosova

Takimi mes kryetarit të LVV-së, Albin Kurti dhe atij të LDK-së, Lumir Abdixhiku, do të zhvillohet nesër në orën 18:00.

LDK ka konfirmuar se takimi do të zhvillohet në ambientet e Kuvendit, raporton Klankosova.tv.

Kreu i LDK-së, pas mbledhjes së sotme të Kryesisë së partisë, tha se në takim do të shkojë vetë i dyti.

Edhe kreu i PDK-së, Bedri Hamza, ka konfirmuar se të premten do të zhvillojë takim me Kurtin në orën 09:00.

Ky takim vjen pasi Kurti u dërgoi ftesa partive politike për takime pas certifikimit të rezultatit zgjedhor të 7 qershorit.

Deputetja e AAK-së, Time Kadriaj, ka deklaruar se Aleanca për Ardhmërinë e Kosovës ka qenë subjekti më transparent gjatë procesit politik.

Ajo tha se kryetari Ardian Gjini e ka pranuar ftesën për takim, por sipas saj, pjesëmarrja e AAK-së është refuzuar.

“Ne kërkojmë kushte që janë në të mirën e Kosovës. AAK ka qenë partia më transparente në këtë proces”, u shpreh Kadriaj në Kanal10.

Duke folur për zhvillimet politike, ajo vlerësoi se zgjidhja më e mirë për situatën aktuale do të ishte që Ramush Haradinaj të zgjidhej president i vendit.

“Për ne, zgjidhja më e duhur për situatën aktuale është që Ramush Haradinaj të jetë president. Megjithatë, ne nuk i kemi numrat për këtë dhe gjithçka varet nga Lëvizja Vetëvendosje”, deklaroi Kadriaj.

Deputetja e Lidhjes Demokratike të Kosovës (LDK), Janina Ymeri, folur për qëndrimin e saj të mundshëm, në rast të një marrëveshjeje mes LDK-së dhe Lëvizjes Vetëvendosje (LVV) për formimin e institucioneve të reja.

E pyetur nëse do të qëndronte në sallë dhe do ta mbështeste një marrëveshje të tillë, përfshirë edhe çështjen e zgjedhjes së presidentit, Ymeri tha se ende nuk mund të japë një përgjigje përfundimtare.

“Nuk mund të them asgjë tash. Varet nga rrjedhja e ngjarjeve më vonë. Për shembull, kush është presidenti që po propozohet e kështu më radhë”, ka deklaruar Ymeri në Debat Plus.

Deputetja më vonë e ka sqaruar deklaratën edhe në Facebook:

“Siç mund ta keni dëgjuar nga Debat Plus, sonte jam kontaktuar se a do të qëndroj në sallë për President/e:

1. Varet se kush do të bëhet President/e edhe cila do jetë rrjedha e ngjarjeve, pra do e shqyrtoj si çdo vendim tjetër në Kuvend.

Për rrjedhën e ngjarjeve e kam pas fjalën për momentet si kriza, protesta dhe trazira rreth këtij vendimi nëse nuk arrihet pajtim sepse në këto raste ndryshojnë prioritetet.

2. Marrëveshja politike nuk do të thotë që mbivendoset ose më bën të nënvlerësoj votën e 27,480 votuesve për Janina Ymeri”, ka sqaruar ajo.

Drejtori i Përgjithshëm i Policisë së Shtetit, Skënder Hita, ka dhënë detaje mbi rastin e dhunimit të një të miture nga disa bashkëmoshatare në Fier, pamje të cilat u bënë publike përmes një videoje që shkaktoi reagime të shumta.

Në një deklaratë për mediat, Hita tha se pas publikimit të videos janë kryer të gjitha veprimet procedurale dhe hetimore në bashkëpunim me Prokurorinë. Sipas tij, njëra prej vajzave të përfshira kishte precedent të mëparshëm dhe është arrestuar.

“Është një video e rëndë ku shihen disa të mitura duke kryer veprime të dhunshme. Janë kryer veprimet procedurale dhe, në vijim të hetimeve të zhvilluara në bashkëpunim me Prokurorinë, janë ndërmarrë ndjekjet penale. Një prej vajzave ka pasur rast të përsëritur dhe është arrestuar”, deklaroi Hita.

Kreu i Policisë foli edhe për pezullimin e efektivit të përfshirë në këtë rast, duke sqaruar se ndaj tij është marrë masa për shkelje të standardeve profesionale dhe cenim të figurës së Policisë së Shtetit.

Sipas Hitës, efektivi nuk dyshohet se ka publikuar videon, por ka krijuar një marrëdhënie të papërshtatshme me të miturat e përfshira në ngjarje.

“Oficeri i Policisë i përfshirë në rastin e Fierit nuk është evidentuar se ka nxjerrë videon. Pezullimi i tij është urdhëruar për shkelje të standardeve dhe cenim të rëndë të figurës së Policisë, pasi ka hyrë në një marrëdhënie të panevojshme me vajzat që kanë kryer veprime të kundërligjshme ndaj një të miture tjetër”, u shpreh Hita.