Category: Lajme

Ish-kryeministri i Shqipërisë, Pandeli Majko, ka reaguar ndaj deklaratës së Ministres serbe Snezhana Paunoviç, e cila ka thënë se po të ishte në vendin e Sllobodan Millosheviçit në vitin 1998 do ta spastronte etnikisht Kosovën.

Ai ka thënë se kjo deklaratë është një “peshë” mbi qeverinë serbe e cila kërkon integrim në BE.

Në profilin e tij në Facebook, Majko ka shkruar se kjo tregon qëllimin e Serbisë ndaj Kosovës.

“Ministrja serbe Snezhana Paunoviç, ka deklaruar se “po të ishte në vendin e Sllobodan Millosheviçit më 1998, do ta spastronte etnikisht Kosovën”. Janë kujtimet ato që na përcaktojnë! Ndaj askush nuk ka pse të ndihet shumë i “çuditur” nga deklarata e ministres serbe Snezhana Paunoviç! Kjo deklaratë publike (e një ministreje), është ndërkaq, një “peshë” mbi qeverinë serbe e cila kërkon integrimin europian! Kujtimi i një lufte të humbur e bën paqen frustruese! Ministrja serbe ka shprehur me “sinqeritet” atë vullnet kolektiv i cili, për fat të keq, ekziston ende brenda strukturave të politikës dhe shtetit serb! Sinqeriteti publik i ministres Snezhana Paunoviç nuk është vetëm “guxim”, por edhe vazhdimësi e një politike të një njeriu si Sllobodan Millosheviç, të burgosur në Hagë për krime lufte!”, ka shkruara ai, duke përmendur procesin gjyqësor ndaj ish-krerëve të UÇK-së.

Komandanti i Forcës së Sigurisë së Kosovës (FSK), gjenerallejtënant Bashkim Jashari, ka pritur në takim ambasadorin e Mbretërisë së Bashkuar në Kosovë, Jonathan Hargreaves, me të cilin ka diskutuar për zhvillimin e FSK-së dhe situatën e sigurisë në vend e rajon.

Gjatë takimit, Jashari e njoftoi ambasadorin britanik për të arriturat, aktivitetet, operacionet dhe planet e ardhshme të FSK-së, ndërsa e falënderoi Mbretërinë e Bashkuar për mbështetjen e vazhdueshme në ngritjen e kapaciteteve të forcës në të gjitha fazat e zhvillimit të saj.

Bashkëbiseduesit diskutuan edhe për situatën aktuale të sigurisë, si dhe u pajtuan për thellimin e bashkëpunimit profesional në fushën e arsimit, edukimit dhe zhvillimit të liderëve dhe njësive të FSK-së, me synim rritjen e profesionalizmit dhe kapaciteteve operacionale.

Në përfundim të takimit, ambasadori Hargreaves vlerësoi lidershipin e gjeneral Jasharit në zhvillimin e FSK-së, ndërsa të dyja palët u zotuan për forcimin e mëtejmë të bashkëpunimit në adresimin e sfidave të përbashkëta të sigurisë.

Hulumtuesi i lartë në Institutin e Kosovës për Drejtësi (IKD), Naim Jakaj, ka vlerësuar se vonesat në formimin e institucioneve të reja po prodhojnë pasoja të drejtpërdrejta në sundimin e ligjit, zhvillimin ekonomik dhe procesin integrues të Kosovës, duke rrezikuar edhe përfitimin e fondeve nga Plani i Rritjes i Bashkimit Evropian.

Në një prononcim për Ekonomia Online, Jakaj tha se Kosova nuk ndodhet në një situatë normale politike dhe institucionale, ndërsa theksoi se shtetësia ndërtohet përmes përmbushjes së objektivave strategjike dhe afrimit me standardet evropiane.

“Se a do të kemi institucione me shpejtësinë që do të duhej Kosova të vepronte, sepse ne nuk jemi në një situatë normale, jo normaliteti që Kosovën e ka përshkuar përgjatë këtyre dy viteve, ka qenë shumë i rëndë, veçanërisht për qytetarin e Republikës së Kosovës në njërën anë dhe në anën tjetër për vetë shtetësinë e Kosovës sepse, si me thënë, shteti nuk ndërtohet ose nuk shpallet sikurse që është shpallur më 17 shkurt 2008 përnjëherë dhe pastaj aty vendosen, kryhet shteti në atë kohë, por shteti ndërtohet mbi qëllimet dhe synimet të cilat i ka dhe ato qëllime dhe synime janë që Kosova të jetë sa më afër kritereve, sa më afër kushteve që i ka Bashkimi Evropian. Në mesin e këtyre kushteve është edhe plani i rritjes, që Kosova u vonua fillimisht ta miratojë, në ndërkohë edhe kur e miratoi nuk pati institucione që ta, që ta zbatojë”, tha ai.

Sipas Jakajt, mungesa e institucioneve funksionale po pengon disbursimin e fondeve të Planit të Rritjes dhe po ndikon negativisht në realizimin e projekteve të rëndësishme për vendin.

“Pra pasojat aktualisht janë evidente në disa fusha kyçe, veçanërisht tek sundimi i ligjit, tek mirëqeverisja dhe tek demokratizimi i vendit dhe në anën tjetër edhe tek zhvillimi ekonomik i Kosovës. Domethënë janë gati se 1/3 e buxhetit të Kosovës që do të duhej të vinin para nga plani i rritjes, në ndërkohë për shkak të mungesës së institucioneve, ato nuk mund të disbursohen për Kosovën. Nëse e vëreni, janë dhjetëra projekte të caktuara që lidhen me atë se duhet me pasë kuvend funksional, duhet me pasë qeveri legjitime dhe legale në mënyrë që ajo t’i kryejë proceset përpara”, tha ai.

Ai theksoi se bllokada institucionale po ndikon edhe në procesin e reformave në drejtësi, duke përmendur gjashtë projektligje që presin miratim nga institucionet e reja.

“Reforma në drejtësi, janë gati se gjashtë projektligje që lidhen, që vijnë nga deklarata e zotimeve që do të duhej qeveria t’i miratonte sa më shpejt një qeveri e ardhshme, dhe Kuvendi t’i miratonte po ashtu në lexim të parë dhe në lexim të dytë normalisht me vërejtjet e shoqërisë civile, veçanërisht të Institutit të Kosovës për Drejtësi”, tha ai.

Jakaj tha se mungesa e institucioneve po pengon edhe procesin e integrimit evropian të Kosovës, pas aplikimit për statusin e vendit kandidat në Bashkimin Evropian.

“Tjetër, integrimi. Ne kemi aplikuar në Bashkimin Evropian për statusin kandidat, në ndërkohë nuk ka asnjë zhvillim deri më tani në raport edhe nga Bashkimi Evropian por edhe nga Kosova. Por, Bashkimi Evropian nuk mund të jetë si me thënë iniciator ose proaktiv kur vetë Kosova nuk ka institucione legjitime dhe legale të cilat do të duhej me i çu përpara këto çështje që të dërgojnë deri tek marrja e statusit kandidat të BE-së”, tha ai.

Sipas tij, edhe fenomeni i migrimit lidhet ngushtë me mungesën e institucioneve funksionale dhe me dështimin për të adresuar problemet në sektorë kyç.

“Ndalimi i migrimit, domethënë është edhe përmes planit të rritjes, edhe përmes pasjes së një qeverie legjitime dhe legale, e cila i kryen detyrat e veta të përditshme, bën që qytetarët të mos migrojnë. Ne kemi qenë dëshmitarë të problemeve të ndryshme, veçanërisht kohëve të fundit në sistemin shëndetësor dhe ato janë krejt pasojë e mospasjes së vëmendjes së qeverisë dhe të Kuvendit të Kosovës si organ që mbikëqyr qeverinë, që ato çështje të mos jenë si me thënë të dukshme dhe evidente në sistemin shëndetësor”, tha ai.

Jakaj përmendi edhe vonesat në miratimin e Strategjisë Kundër Korrupsionit dhe zbatimin e Strategjisë për Sundimin e Ligjit.

“Kosova deri më 31 dhjetor 2024 ka pasur si kriter edhe ligjor ta miratojë strategjinë për kundërkorrupsion. Nuk e ka të miratuar. Qeveria e Kosovës ka miratuar strategjinë për sundimin e ligjit 2021-2026. Deri më tani kjo strategji nuk ka mbërritur as 60 përqindëshin të të zbatimit të kësaj strategjie. Pikërisht ne e kemi pasur një raport ku tregohet vetëm për vitin 2023 që nuk ka kaluar as 50 përqindëshin e zbatimit të saj”, tha ai.

Ai përmendi edhe ngecjen e procesit të vetingut për shkak të mosmiratimit të amendamenteve kushtetuese.

“Vetingu. Ja paramendoni situatën kur ka amendamente kushtetuese të konfirmuara nga ana e Gjykatës Kushtetuese dhe ato nuk janë votuar, si pasojë ka mbetur vetingu në sistemin e drejtësisë, ai vetingu i pjesshëm, që nuk zbatohet për arsye që kuvendi, veçanërisht shumica parlamentare, partia e parë që në këtë rast është Lëvizja Vetëvendosje, nuk ka gjetur mundësinë që t’i gjejë edhe katër deputetë nga komunitetet joshumicë serb, që këto amendamente t’i votojë në ndonjërën prej seancave në dy legjislaturat e kaluara”, tha ai.

Sipas Jakajt, humbja e mundshme e fondeve të Planit të Rritjes do të ishte në dëm të drejtpërdrejtë të qytetarëve të Kosovës.

“Krejt këto çfarë i përmenda janë dhe lidhen me planin e rritjes, që Kosova në rastin kur vonohet me formim të institucioneve, nuk do të mund t’i marrë këto mjete. Dhe fatkeqësisht ndoshta, përveç ndoshta në ndonjë marrëveshje politike, por, sipas asaj që shihet edhe në planin e rritjes edhe me Bashkimin Evropian, disa fonde ndoshta nuk do të mund të rikthehen në rast se nuk i zbatojmë ato kritere, ato kushte të cilat janë veçanërisht mirë për ne dhe jo për si me thënë në fund të mbrëmjes për Bashkimin Evropian. Ato janë kryesisht, veçanërisht të mirë për Republikën e Kosovës dhe për qytetarin në përgjithësi”, tha ai.

Jakaj kritikoi edhe mungesën e takimeve ndërmjet partive politike pas certifikimit të rezultateve zgjedhore, duke vlerësuar se kryetari i Lëvizjes Vetëvendosje, Albin Kurti, duhet t’i intensifikojë përpjekjet për arritjen e një marrëveshjeje politike.

“Sikurse herët e kaluara, edhe në këtë rast, ne kemi pritur që do të ketë diskutime edhe pasi që rezultatet preliminare u publikuan, diskutime të iniciuara fillimisht nga kryetari i Lëvizjes Vetëvendosje zoti Kurti, që ato bisedime të nisin sa më parë. U prit që të certifikohen, në rregull, por aktualisht nuk ka takime. Tregoni se a ka sot ndonjë takim me PDK-në, LDK-në dhe AAK-në? A ka ndonjë kërkesë të re për t’u takuar? Nuk do të duhej të pritej, si me thënë, të kalohej java dhe të mos kishte një takim në mes të këtyre partive politike. O të diskutohet për program, o të diskutohet për çështjen e presidentit. Këto të dyja do të duhej që të ishin çështje që partitë politike, veçanërisht Lëvizja Vetëvendosje si parti e parë, do të duhej ta kishte prioritet që në kohën kur çohet në mëngjes zoti Kurti prej gjumit. Domethënë, ai do të duhej ta kishte prioritet t’i thërriste partitë politike në mënyrë që të gjente konsensus”, tha Jakaj për Ekonomia Online.

Avdullah Hoti nga Lidhja Demokratike e Kosovës, ka reaguar lidhur me çështjen e dialogut strategjik të cilin, Shtetet e Bashkuara të Amerikës e kanë pezulluar në raport me Kosovën.

Hoti, ka shkruar se në anën tjetër, SHBA, të premten raundin e parë të dialogut strategjik me Serbinë.

‘’Po ashtu, Kosova, ka refuzuar të përfshihet në rrjetin rajonal të gazit, përmes të cilit synohet të shpërndahet gazi amerikan, i cili ka për qëllim uljen e varësisë nga gazi rus të vendeve të rajonin dhe më gjerë. Në të njëjtën kohë, fqinji verior i Kosovës tashmë ka hyrë në marrëveshje të mëdha kontraktuale energjetike, përfshirë edhe importin e gazit amerikan’’, ka shkruar Hoti.

Postimi:

Kosova, si vendi më proamerikan në rajon dhe më gjerë, e ka të pezulluar dialogun strategjik me SHBA-në. Ndërsa, fqinji verior i Kosovës e nis këtë të premte raundin e parë të këtij dialogu me SHBA-në.

Po ashtu, Kosova, ka refuzuar të përfshihet në rrjetin rajonal të gazit, përmes të cilit synohet të shpërndahet gazi amerikan, i cili ka për qëllim uljen e varësisë nga gazi rus të vendeve të rajonin dhe më gjerë. Në të njëjtën kohë, fqinji verior i Kosovës tashmë ka hyrë në marrëveshje të mëdha kontraktuale energjetike, përfshirë edhe importin e gazit amerikan.

Nëse vazhdon kjo qasje, Kosova mbetet e izoluar ekonomikisht dhe politikisht, duke humbur mundësinë për forcimin e partneritetit strategjik dhe të sigurisë energjetike.

Gjykata e Prishtinës i ka vazhduar masën e paraburgimit edhe për dy muaj të dyshuarit për spiunazh, Fatmir Shehollit.

Vazhdimin e masës së paraburgimit ndaj tij, e ka konfirmuar për KALLXO, zëdhënësja e Gjykatës së Prishtinës, Mirlinda Gashi.

“Referuar kërkesës tuaj për informata, ju njoftojmë se pas kërkesës së Prokurorisë Speciale të Republikës së Kosovës për vazhdimin e masës së paraburgimit në çështjen penale ndaj të pandehurit F.SH., për shkak të dyshimit të bazuar se ka kryer veprën penale të Spiunazhit në vazhdimësi, gjyqtarja e procedurës paraprake pas shqyrtimit të kërkesës, përmes Aktvendimit ka aprovuar kërkesën e PSRK-së, ashtu që të njëjtit i është vazhduar masa e paraburgimit në kohëzgjatje prej 2 (dy) muaj.”- thuhet në përgjigjjen e Gashit.

Sot Franca feston Ditën e saj Kombëtare, e njohur ndryshe si Dita e Bastijës, një datë që shënon fillimin e Revolucionit Francez dhe triumfin e vlerave të lirisë, barazisë dhe vëllazërisë.

Ambasadori i Francës në Kosovë, Olivier Guerot, shpjegoi rëndësinë e kësaj feste dhe lidhjen e fortë që populli francez ka me idenë e Republikës dhe demokracisë, shkruan RTK.

Ambasadori foli edhe për mënyrën se si shënohet kjo ditë në Francë, duke përmendur tri aktivitetet kryesore.

“Në Francë i kemi tre momente kryesore. Më 13 korrik është tradita e ballos së zjarrfikësve. Më 14 korrik mbahet parada ushtarake, ndërsa në mbrëmje organizohen fishekzjarre në të gjithë Francën”, tha Guerot.
Duke folur për marrëdhëniet me Kosovën, ambasadori theksoi se Franca ka qenë mbështetëse e saj që nga fillimi.

“Franca është përkrah Kosovës prej fillimit. Franca është një aleat, një mik i besueshëm, solidar në qëndrueshmëri, në vazhdimësi. E kemi mbështetur pavarësinë e Kosovës, krijimin e shtetit të Kosovës”, deklaroi ai.

Sipas Guerot, fokusi aktual i bashkëpunimit është mbështetja për zhvillimin ekonomik të Kosovës, duke veçuar organizimin e Lojërave Mesdhetare 2030 në Prishtinë.

Ai shtoi se Franca synon ta intensifikojë bashkëpunimin me Kosovën në fusha të ndryshme, veçanërisht në kulturë dhe ekonomi.

Prokurorët e SPAK kanë vendosur, pas 500 ditësh, të lejojnë avokatët ndërkombëtarë të Erion Veliajt të takojnë kryebashkiakun e Tiranës.

Mësohet se vendimi është marrë para disa ditësh, pavarësisht faktit se nuk ka ndryshuar asnjë shkak nga arsyet për të cilat vetë prokurorët e SPAK-ut i kishin refuzuar disa herë kërkesat për takim të mbrojtjes ndërkombëtare me Veliajn.

Më herët, avokatët ndërkombëtarë të Veliajt kishin kërkuar disa herë takim me të, për të dokumentuar çdo shkelje të bërë ndaj kryebashkiakut të Tiranës në çështjen e tij hetimore dhe për ta çuar atë në Gjykatën Ndërkombëtare të të Drejtave të Njeriut në Strasburg.

Nuk dihet pse pas 500 ditësh SPAK ka ndryshuar mendje dhe ka vendosur të lejojë takimin mes avokatëve dhe Veliajt.

Komunat e Kosovës pritet të dëmtohen financiarisht me mbi 150 milionë euro gjatë vitit 2026, si pasojë e vendimeve gjyqësore, moszbatimit të aktgjykimeve të Gjykatës Kushtetuese, reduktimit të grantit të arsimit dhe përgjysmimit të grantit të performancës, ka thënë drejtori ekzekutiv i Asociacionit të Komunave të Kosovës (AKK), Sazan Ibrahimi.

Ibrahimi në një intervistë për Ekonomia Online, ka thënë se vetëm gjatë gjashtëmujorit të parë të këtij viti, komunave u janë marrë mbi 60 milionë euro nga vendimet gjyqësore, shumica prej të cilave lidhen me kontratat kolektive.

“Këtë vit, viti 2026, është viti më i rëndë financiar për komunat e Republikës së Kosovës. Janë duke u marrë mjete financiare padrejtësisht të gjitha komunave të Republikës së Kosovës, pa dallim partiak. Vetëm në gjashtëmujorin e parë të këtij viti, komunave nga vendimet gjyqësore, ku shumica e tyre kanë të bëjnë me kontratat kolektive, ju kanë marrë mbi 60 milionë euro”, tha ai.

Ibrahimi tha se një barrë tjetër financiare për komunat do të jetë edhe moszbatimi nga Ministria e Financave i aktgjykimit të Gjykatës Kushtetuese lidhur me përvojën e punës së shërbyesve publikë.

“Tani, pjesa tjetër është ku ministri Hekuran Murati nuk e ka zbatuar një aktgjykim të Gjykatës Kushtetuese sa i përket normës së përvojës së punës, ku Gjykata Kushtetuese ka thënë që norma e përvojës së punës duhet paguhet 0.5% për vit. Kurse ministri Murati e ka zbatuar normën prej 0.25% të përvojës së punës që nga fillimi i vitit 2023, vitin 2024, vitin 2025, për shërbyes publik. Dhe tani, në bazë të informatave që i kemi nga niveli lokal, numrin e shërbyesve publikë në nivel lokal, dëmi i cili do t’i shkaktohet komunave apo buxheteve komunale, për shkak që ministri Murati nuk e ka zbatuar atë gjykimin e Gjykatës Kushtetuese, do të jetë përafërsisht 60 milionë euro”, tha ai, për Ekonomia Online.

Sipas tij, komunat do të përballen edhe me një reduktim të grantit specifik për arsim.

“Shtoj kësaj edhe vendimin e fundit të Qeverisë së Republikës së Kosovës ku granti specifik për arsim ka me qenë i reduktuar për komuna rreth 24 milionë euro, ku mbi 3,000 mësimdhënës në nivel lokal do të paguhen nga buxhetet e komunave të Republikës së Kosovës dhe vlera do të jetë rreth 24 milionë euro”, tha ai.

Ibrahimi kritikoi edhe vendimin për përgjysmimin e grantit të performancës për komunat përfituese.

“Ministri i Pushtetit Lokal mori vendim apo Qeveria e Republikës së Kosovës mori vendim që grantin për performancë, shumën e cila ka qenë e dedikuar në Ligjin për Ndarjet Buxhetore të vitit 2026 ka qenë 4 milionë euro. Mirëpo në mënyrë të jashtëligjshme ata i përgjysmuan këtë grant dhe vendosën që në vend të 4 milionë euro të jetë 2 milionë euro. Domethënë dëmi ndaj pesë komunave përfituese është rreth 2 milionë euro. Në total këtë vit, domethënë bazuar në llogaritë tona, i del që komunat do të dëmtohen nga aspekti financiar mbi 86 milionë euro. I përmblodha nga të gjitha katër dëmet pothuajse kryesore të cilat niveli qendror ia ka shkaktuar nivelit lokal nga aspekti financiar”, tha ai.

Ai paralajmëroi se shumica e këtyre mjeteve do të merren nga investimet kapitale, subvencionet dhe mallrat e shërbimet.

“Dhe paramendoni tash, shumica absolute e këtyre mjeteve do të mirren nga investimet kapitale, nga subvencionet, nga mallrat dhe shërbimet, dhe çfarë do të munden kryetarët e komunave të investojnë në komunat e tyre përkatëse. Domethënë nëse vazhdon një trend i tillë dhe nëse vazhdon një papërgjegjësi totale e nivelit qendror kundra komunave, shumë shpejt komunat mund të shndërrohen në njësi administrative të cilat nuk do të kenë mjete financiare për investime kapitale, për mallra, shërbime dhe subvencione, dhe do të jenë përgjegjës vetëm për shpërndarjen e certifikatave të lindjes dhe certifikatave të tjera. Pra ky është një dëm kolosal i cili është duke iu shkaktuar komunave me qëllim dhe me vetëdije”, tha ai.

Ibrahimi tha se niveli qendror po bart te komunat përgjegjësi financiare që nuk burojnë nga vendimet e tyre.

“Dhe duke marrë parasysh që kontratat kolektive nuk janë nënshkruar nga komunat, po nga niveli qendror, atëherë kjo është edhe përgjegjësi institucionale e nivelit qendror. 24 milionë euro, të cilat komunat do të jenë të obliguara t’i ndajnë për mësimdhënësit, është dashur që të bëhet një strategji që shkallë-shkallë të eliminohet ky problem apo të minimizohet ky problem. Mirëpo niveli qendror në mënyrë arbitrare ka marrë vendim që këto 24 milionë euro komunat duhet t’i ndajnë për t’i mbuluar koston e mësimdhënësve të cilët janë me kontrata”, tha ai.

Ai shtoi se pasojat financiare do të rëndohen edhe nga kostot shtesë të procedurave gjyqësore dhe përmbarimore.

“Nuk mundesh ta shkëputësh kontratën e njëanshme dhe në mënyrë arbitrare me një mësimdhënës sepse ai mësimdhënës do t’i shfrytëzojë procedurat ligjore dhe do t’i përfitojë ato mjete financiare. Po përveç atyre që do t’i përfitojë, avokatët dhe përmbaruesit do të fitojnë një përqindje deri në 30%. Gjithashtu kjo përqindje e avokatëve, procedurave gjyqësore dhe përmbaruesve është e njëjtë edhe për moszbatimin e vendimit të Gjykatës Kushtetuese për normën e përvojës së punës nga 0.25 në 0.5%. Domethënë përveç që po dëmtohet buxheti komunal, po dëmtohet edhe buxheti i shtetit sepse reagimi, përgjegjësia institucionale është duke munguar dhe në përgjithësi kryetarët e komunave janë duke u ankuar që nuk do të kenë mjete financiare për zbatimin e projekteve të cilat i kanë paraparë me buxhetet komunale të cilat janë aprovuar në shtator të vitit të kaluar për këtë vit”, tha ai.

Në Qendrën Klinike Universitare të Kosovës (QKUK) ka nisur largimi i shtretërve të dëmtuar nga Klinika e Pediatrisë, me qëllim përmirësimin e kushteve për pacientët dhe stafin shëndetësor.

Ky veprim vjen pas raportimit publik të një nëne, e cila kishte ndarë përvojën e saj gjatë qëndrimit me fëmijën në objektin e vjetër të Pediatrisë, duke ngritur shqetësime për kushtet në klinikë.

Një ditë më parë, Shërbimi Spitalor Klinik dhe Universitar i Kosovës (ShSKUK) kishte njoftuar për formimin e një komisioni ad-hoc, i cili do të shqyrtojë masat administrative ndaj punonjësve shëndetësorë lidhur me rastin.

Largimi i shtretërve të dëmtuar është pjesë e veprimeve të ndërmarra pas reagimeve publike për gjendjen infrastrukturore dhe kushtet e qëndrimit në Klinikën e Pediatrisë./RTVD/

Lëvizja e Qytetarëve të Lirë (PSG), parti kjo opozitare në Serbi, kërkoi sot shkarkimin e menjëhershëm të Ministres së Administratës Shtetërore dhe Vetëqeverisjes Lokale, Snezhana Paunoviq, për shkak të gjuhës së urrejtjes të shprehur në “deklaratën shoviniste” se ajo do ta spastronte etnikisht Kosovën nga shqiptarët në vitin 1998″.

Reagimi thotë se deklarata është një avokim i vetëdijshëm i persekutimit etnik.

PSG thekson se një person që justifikon dëbimin e njerëzve vetëm për shkak të kombësisë së tyre nuk mund të jetë anëtar i Qeverisë së Serbisë dhe se është veçanërisht e rrezikshme që mesazhe të tilla vijnë nga Ministri i Administratës Shtetërore dhe Vetëqeverisjes Lokale, që do të duhej të garantonte barazinë e të gjithë qytetarëve para institucioneve shtetërore dhe respektimin e Kushtetutës dhe ligjit.

“Deklarata e ministres hap gjithashtu një çështje serioze të përgjegjësisë së mundshme penale në përputhje me nenin 317 të Kodit Penal, i cili ndalon nxitjen e urrejtjes dhe intolerancës kombëtare, racore dhe fetare”, vlerëson PSG, e cila pret që prokuroria publike kompetente të hetojë nëse ka elementë të asaj vepre penale në pikëpamjet e saj të shprehura publikisht.

Snezhana Paunoviq ka qenë anëtare e Partisë Socialiste të Serbisë që nga viti 1992 dhe nënkryetare që nga viti 2024, sipas biografisë së saj zyrtare. Ajo u zgjodh në pozicionin e deputetes për herë të parë në vitin 2013 dhe në dy mandate mbajti pozicionin e Zëvendëskryetares së Kuvendit.

Deklarata ka nxitur reagime edhe në Kosovës.

Ministri për Familjen dhe Vlerat e Luftës, Andin Hoti, ka thënë se kjo deklaratë tregon që Serbia nuk është çliruar nga ideologjia gjenocidale.

“Babai yt ideologjik, Millosheviqi, provoi të njëjtën gjë në Kosovë. Përfundoi para drejtësisë ndërkombëtare, ndërsa Serbia u largua nga Kosova me bisht ndër shalë. Përgjigjja e popullit të Kosovës, e Ushtrisë Çlirimtare të Kosovës dhe e botës demokratike dihet. Kosova mbeti e lirë. Millosheviqi përfundoi si kriminel lufte dhe sot han dhe. Të njëjtin fat do ta kishe edhe ti, dhe do ta kesh sa herë që tenton. Kushdo që sot bën thirrje për spastrim etnik nuk është vetëm kërcënim për Kosovën. Ai është dëshmi se Serbia ende nuk është çliruar nga ideologjia gjenocidale e Millosheviqit dhe nga politika kriminale që solli luftëra, masakra dhe turp historik”, ka shkruar ai në Facebook.

E në Institutin e Krimeve të Kryera Gjatë Luftës, në një reagim në Facebook, kanë thënë se “përballja me të kaluarën mbetet parakusht për ndërtimin e besimit dhe paqes së qëndrueshme në rajon”.“Deklarata e Snežana Paunović, ministre në Qeverinë e Serbisë, e cila u shpreh se, po të ishte në vend të Slobodan Millosheviqit, do ta kishte “spastruar etnikisht Kosovën”, rikthen në vëmendje vazhdimësinë e një diskursi që lidhet me politikat përgjegjëse për luftën, spastrimin etnik dhe krimet kundër njerëzimit të kryera në Kosovë. Krimet e kryera gjatë viteve 1998–1999 kanë qenë objekt i proceseve gjyqësore ndërkombëtare, ku udhëheqës të nivelit më të lartë politik, ushtarak dhe policor të regjimit të Millosheviqit u shpallën fajtorë për krime në Kosovë. Megjithatë, edhe sot, zyrtarë të lartë të shtetit serb vazhdojnë të përdorin retorikë që relativizon ose normalizon politika që prodhuan mijëra viktima, dëbime masive, dhunë seksuale dhe zhdukje me dhunë. Ndërkohë, në Kosovë vazhdon puna për dokumentimin e krimeve të kryera gjatë luftës. Në IKKL dokumentojmë faktet dhe dëshmitë me bindjen se ato janë themel për drejtësi, pranim të krimeve dhe kërkimfalje institucionale. Sepse përballja me të kaluarën mbetet parakusht për ndërtimin e besimit dhe paqes së qëndrueshme në rajon”, shkruhet në reagimin e Institutit në Facebook.