Më 16 nëntor, në ora 13:00 në Strasburg do të mbahet protesta e radhës në mbështetje të UÇK-së.
Mbështetje këtij organizimi i dha edhe ish-kryetari i PDK-së, Memli Krasniqi.
Ai përmes një postimi në Facebook, ka shkruar se të dielën të gjitha rrugët çojnë në Strasburg, duke ju bërë thirrje qytetarëve për pjesëmarrje.
Postimi i plotë:
Kryeministri në detyrë, Albin Kurti, ka njoftuar se sot janë ekzekutuar pensionet bazike dhe ato për personat me aftësi të kufizuara.
Në një postim në Facebook, Kurti ka rikujtuar se qeveria e tij mori vendim për rritjen e pensioneve rreth dy javë më parë:
“Nga ky muaj, pensioni minimal prej 120 euro bëhet 150 euro në muaj.”
Ai shtoi: “Kurse sot me rritjen e paraparë janë ekzekutuar pensionet bazike dhe pensionet për personat me aftësi të kufizuara.”
Sipas Kurtit, rritjen ekonomike dhe të buxhetit të shtetit po e rishpërndajmë me ata që kanë më së shumti nevojë.
Rusia kreu të martën një sulm masiv me 430 dronë dhe 18 raketa ndaj Kievit, duke goditur objekte të energjisë, ndërtesa banimi dhe infrastrukturë, ku u raportuan katër viktima dhe dhjetëra të plagosur, sipas zyrtarëve ukrainas.
Presidenti Volodymyr Zelensky tha se sulmi ishte ndër më të mëdhatë ndaj kryeqytetit dhe bëri thirrje për sanksione më të ashpra ndaj Rusisë. Ai shtoi se Kievi po kundërpërgjigjej me raketa me rreze të gjatë. Forca ajrore ukrainase njoftoi se shumica e dronëve dhe raketave u rrëzuan, por mbetjet që ranë shkaktuan dëme në ndërtesa shumëkatëshe, një shkollë, një objekt mjekësor dhe ndërtesa administrative në nëntë distrikte.
Anastalia, një banore 29-vjeçare, përshkroi tmerrin e momentit kur blloku i saj u godit: “Në atë moment, nuk dini se çfarë të bëni së pari: ta shpëtoni veten, fëmijën, apo të vraponi për t’i ndihmuar njerëzit, sepse shumë njerëz po bërtisnin dhe kishin nevojë për ndihmë.”
Zelensky gjithashtu tha se Ambasada e Azerbajxhanit u godit nga mbetjet e një rakete ruse të tipit “Iskander”. Kryetari i Kievit, Vitali Klitschko, raportoi 29 të lënduar në qytet, përfshirë dy fëmijë dhe një grua shtatzënë që po trajtohej në spital. Guvernatori i Rajonit të Kievit njoftoi se sulmet shkaktuan gjashtë të lënduar jashtë kryeqytetit, përfshirë një fëmijë 7-vjeçar, dhe disa zjarre.
Gjykata Themelore në Gjilan e ka dënuar me 25 vjet burgim Valmir Salihun, të akuzuarin për vrasjen e Sokol Osmanit në nëntor të vitit të kaluar.
Salihu është dënuar për shkak të veprave penale vrasje e rëndë dhe mbajtja në pronësi, kontroll ose posedim të paautorizuar të armëve.
Sipas Gjykatës, vrasja kishte ndodhur për shkak të një konflikti që viktima dhe dorasi kishin në të kaluarën.
“Me datë 07.11.2024, rreth orës 14:00 h, i akuzuari V. S. në Gjilan, në rrugën ,,Mërgimtarët e Gjilanit”, në parkingun e objektit banesor ,,Gëzimi 3”, përball lokalit berber shop ,,Donisi”, me dashje e në shenjë hakmarrje për shkak të një konflikti fizik të ndodhur para dy viteve, e ka privuar nga jeta tani të ndjerin S. O., nga fshati Vërbicë, Komuna e Gjilanit, në atë mënyrë që me të arritur me biçikleta të pandehurit V. S. dhe F. M., përballë lokalit berber shop “Donisi”, aty i pandehuri V. e vëren të ndjerin S., i cili ishte duke hyrë në veturë, me ta vërejtur përnjëherë e repetit revolen e prodhimit “Zoraki”, modeli M-917-T, e kalibrit 9×17 mm, me numër serik A3YZR16YS01-2303343, i ofrohet afër dhe me një predhë e godet të ndjerin S., në anën e pasme të shpinës (komblikut), me ç’rast i ndjeri rrëzohet në tokë, e derisa ishte i rrëzuar, ofrohet i pandehuri V., e godet dy herë me grusht dhe një herë me shqelm, e më pas të pandehurit me shpejtësi largohen në drejtim të panjohur, derisa i ndjeri S. O. ndërron jetë”, thuhet në vendimin e Themelores.
Përpos Valmir Salihut, gjykata ka shpallur fajtor dhe ka dënuar edhe Florian Mitevin.
Ai është dënuar me 8 vjet burgim për shkak se e kishte ndihmuar Salihun pasi kishte përfunduar veprën penale duke e strehuan në një shtëpi në Livoç.
“I akuzuari F. M. nga data 07.11.2024 e deri më datë 12.11.2024, në Gjilan, në vende të ndryshme me dashje ka ndihmuar të pandehurin V. S. në fshehjen – mos zbulimin e kryesit të veprës penale të vrasjes së rëndë, në atë mënyrë që edhe për kundër asaj që ishte prezentë kur i pandehuri V., shtënë një herë me revole në të ndjerin S. O., e të cilin edhe e godet me grusht dhe shqelm derisa tani i ndjeri ishte i rrëzuar në tokë, dy të pandehurit së bashku me biçikleta në shpejtësi largohen nga vendi i ngjarjes, shkojnë në shtëpinë e pa banuar i lënë biçikletat, dalin së bashku hipin në një taksi, shkojnë tek rrethi i spitalit rajonal, aty zbresin e më pas hipin prapë në një taksi tjetër dhe shkojnë në drejtim të fshatit Livoç i Ultë, me ç’rast aty rrinë të fshehur deri me datë 12.11.2024, kur dorëzohen në polici, në këtë mënyrë i pandehuri F., e ka ndihmuar të pandehurin V. në fshehjen e tij”, thuhet në vendimin e themelores.
Sokol Osmani, 37-vjeçar, ishte qëlluar për vdekje më 7 nëntorit të vitit të kaluar në Gjilan.
Komisioni i Mbikëqyrjes në Dhomën e Përfaqësuesve të SHBA publikoi të mërkurën një arkiv gjigant prej 20.000 faqesh dokumentesh, të cilat pretendohet se përmbajnë komunikime nga financuesi amerikan dhe i dënuari për krime seksuale, Jeffrey Epstein.
Sipas mediumit sllovak SME, që ka analizuar një pjesë të materialit, mes dokumenteve shfaqen edhe email-e që duken si komunikime të drejtpërdrejta midis Epstein dhe diplomatit sllovak Miroslav Lajçak, të datuara në vitin 2018.
Autenticiteti i tyre nuk është konfirmuar nga burime të pavarura dhe në asnjë prej mesazheve nuk përmenden aktivitetet kriminale të Epstein.
Bannon, një darkë e propozuar dhe përmendja e “Miro Lajçak”
Një email që qarkulloi fillimisht në rrjetet sociale tregon një komunikim mes ish-strategut të Donald Trump, Steve Bannon, dhe Epstein. Në mesazhin e 15 marsit 2018, Epstein përmend emrin “Miro Lajçak” dhe komenton se “qeveria në Sllovaki po bie”.
Data përkon me zhvillimet dramatike të asaj dite, kur presidenti Andrej Kiska pranoi dorëheqjen e qeverisë së Robert Ficos pas protestave të mëdha që pasuan vrasjen e gazetarit Ján Kuciak dhe të fejuarës së tij Martina Kušnírová.
Megjithatë, nuk ka asnjë provë që Lajçak të ketë qenë i ftuar apo të ketë marrë pjesë në ndonjë takim me Bannon ose Epstein.
Një shkëmbim i çlirët për gjendjen mendore të Trump
SME raporton se ka gjetur edhe një tjetër komunikim, të datës 24 mars 2018, ku Epstein i dërgon Lajçakut një artikull të Daily Beast me titullin:
“Sa afër është Donald Trump një thyerjeje mendore?”
Përgjigjja e atribuohen Lajçakut thuhet se ishte:
“Faleminderit! Mendoj se dëgjuam mjaftueshëm prova për këtë temë sot.”
Edhe pse adresa e dërguesit është e redaktuar, nënshkrimi automatik tregon një email zyrtar të Ministrisë së Jashtme sllovake.
Toni i komunikimit duket i çlirët dhe nuk përmban asnjë element që lidhet me veprimtari të paligjshme. Deri tani, Lajçak nuk ka komentuar publikisht për këto dokumente.
Konteksti më i gjerë: trashëgimia e errët e Epstein
Jeffrey Epstein, i dënuar prej kohësh për abuzim të të miturve dhe trafikimin e tyre tek persona të pasur e të fuqishëm, u arrestua në korrik 2019 dhe vdiq në një burg të Nju Jorkut një muaj më vonë—zgjidhur zyrtarisht si vetëvrasje. Publikimet e reja kanë rigjallëruar interesin rreth rrjetit të tij të gjerë të kontakteve në SHBA dhe Europë.
Forca e Sigurisë së Kosovës, në kuadër të aktiviteteve zhvillimore të Qendrës Ndërkombëtare Trajnuese për Kërkim-Shpëtim (QNTKSH), gjatë dy javëve të kaluara ka realizuar me sukses trajnimin e avancuar në fushën e kërkim-shpëtimit malor.
Qëllimi i trajnimit ishte ngritja e kapaciteteve profesionale të pjesëmarrësve në operacionet malore të kërkim-shpëtimit, duke forcuar aftësitë teknike, koordinimin dhe reagimin efektiv në situata emergjente.
Siç thuhet në njoftimin e FSK-së, trajnimi përfshiu skenarë praktikë, përdorimin e pajisjeve të specializuara dhe procedurat standarde të operacioneve malore, duke kontribuar ndjeshëm në avancimin e njohurive dhe përgatitjes së pjesëtarëve nga FSK dhe Turqia të angazhuara në këtë trajnim.
Partia Demokratike e Kosovës i është përgjigjur deputetit të saj Enver Hoxhaj, i cili sot ka kërkuar që të shtyhet konventa për zgjedhjen e kryetarit të ri të partisë.
Sekretarja e Përgjithshme e PDK-së, Vlora Çitaku, ka bërë me dije se Konventa e Jashtëzakonshme është thirrur në bazë të nenin 35 të Statutit të Partisë.
Në një prononcim për gazetën Nacionale, ajo ka thënë se sipas statut konventa duhet të mbahet brenda pesë ditësh.
Ajo ka theksuar se PDK-ja e inkurajon garën e brendshme për kryetar.
“Në mbledhjen e fundit të Kryesisë, pas dorëheqjes së Kryetarit Memli Krasniqi, Kryesia vendosi të thërrasë Konventën e Jashtëzakonshme, e cila, bazuar në nenin 35 të Statutit të Partisë, duhet të mbahet brenda pesë ditësh. Ne e inkurajojmë dhe e mirëpresim garën e brendshme. Çdo anëtar apo anëtare që i plotëson kriteret e përcaktuara me Statut është i mirëseardhur të kandidojë. Gara do ta bënte Konventën edhe më madhështore”, ka vlerësuar Çitaku.
Ajo ka bërë me dije se më e rëndësishme se gara e brendshme partiake është fitorja e PDK-së në zgjedhjet parlamentare.
“Për secilin prej nesh, qofshim në garë ose jo, është thelbësore që në përfundim të këtij procesi të dalim të unifikuar, me vizion të qartë dhe me platformë të fortë për zgjedhjet e përgjithshme që na presin shumë shpejt. Më e rëndësishme se gara e brendshme është fitorja jonë në zgjedhjet parlamentare. Sepse beteja kryesore politike për secilin prej nesh është ajo se kush do të jetë Kryeministri i ardhshëm i Republikës së Kosovës”, është shprehur Çitaku.
Deputeti i PDK-së, Enver Hoxhaj, sot ka kërkuar që të shtyhet konventa për zgjedhjen e kryetarit, e cila pritet të mbahen të hënën.
Ai ka bërë me dije se një parti serioze nuk mund të mbajë një konventë politike dhe përmbajtjesore në një kohë kaq të shkurtër.
Në profilin e tij në “Facebook”, Hoxhaj ka shkruar se ka kërkua nga kryesia e partisë që konventa të shtyhet të paktën për të dielën e ardhshme.
“Konventa e PDK-së për të zgjedhur kryetarin e partisë duhet të shtyhet, sepse një parti serioze nuk mund të mbajë një konventë politike dhe përmbajtësore në një kohë kaq të shkurtër. Kërkoj nga Kryesia e PDK-së shtyrjen e Konventës për të paktën deri të dielën e ardhshshme, sepse kështu do u jepej mundësia anëtarësisë dhe delegatëve të njihen me kandidaturat dhe platformat për zhvillimin e partisë dhe për çështje serioze që prekin vendin. Kjo do ta rriste cilësinë e kandidaturave dhe konkurrencën ndërmjet platformave, pasi zhvillimet e fundit kanë qenë të befasishme”, ka shkruar ai.
Ai ka bërë me dije se do të ishte mirë që në këtë garë të kishte më shumë se një kandidaturë.
Megjithatë, ai nuk ka treguar nëse do të kanditojë për kryetar të PDK-së.
“Kjo nguti nuk garanton garë cilësore, as reformimin dhe unitetin e kërkuar e të domosdoshëm për PDK-në në këtë kohë. Në partitë demokratike, më shumë se një kandidaturë është mundësi për delegatët që të zgjedhin lirisht dhe ndihmon në pasurimin e platformave individuale, duke çuar në ndërtimin e një platforme të përbashkët për PDK-në. Për një vendimmarrje kaq të rëndësishme, kërkoj që procesi zgjedhor të shtyhet, në mënyrë që gara të hapet për të gjithë dhe baza të ketë kohën e duhur për të shprehur vullnetin e saj pa presion dhe pa imponime. Dorëheqja e kryetarit, e shoqëruar me preferenca për pasuesin, krijon përshtypjen e skemave të sajuara e të paragjykuara, të cilat nuk e çojnë partinë përpara”, ka shkruar Hoxhaj, duke shtuar se gara nuk duhet të orientohet.
“Unë jam qartësisht kundër çdo imponimi, kundër çdo tentative për të orientuar garën dhe kundër çdo formule që shpërfill bazën dhe delegatët. PDK-ja ka nevojë për drejtim të ri, jo për skema të vjetra; ka nevojë për vizion të ri, jo për ndërrim rolesh. Ky është momenti për t’i hapur rrugën ndryshimit të vërtetë”, ka shkruar ai.
Ministrja në detyrë e Industrisë, Ndërmarrësisë dhe Tregtisë, Rozeta Hajdari, do të mbajë sot konferencë për media, me fillim nga ora 15:00.
Konferenca do të mbahet në orën 15:00 dhe vjen pas aktakuzës që ngriti Prokuroria Speciale kundër saj dhe tre të tjerëve lidhur me skandalin e rezervës shtetërore.
“Ministrja në detyrë e Ministrisë së Industrisë, Ndërmarrësisë dhe Tregtisë, znj.Rozeta Hajdari, sot me datën 14 nëntor në ora 15:00, do të mbajë konferencë për media”, thuhet në njoftim.
Prokuroria Speciale ka ngritur aktakuzë të hënën ndaj Ministres Rozeta Hajdari, Irfan Lipovicës, Hafiz Garës dhe Ridvan Muharremit, lidhur me skandalin e rezervës shtetërore. Tre të parët akuzohen për “Keqpërdorimi i pozitës apo autoritetit zyrtar” dhe “Zbulimi i fshehtësisë zyrtare”, ndërsa Muharremi për veprën “Ndihma në kryerjen e veprës penale të keqpërdorimit të pozitës apo autoritetit zyrtar”.
Hajdari, Lipovica dhe Gara akuzohen se gjatë muajve shkurt – mars të vitit 2022, në bashkëkryerje kanë keqpërdorur detyrat zyrtare me qëllim përfitimi pasuror për persona të tjerë dhe shkaktimi të dëmit ndaj buxhetit të Republikës së Kosovës. “Si rezultat i veprimeve të të pandehurëve, i është shkaktuar buxhetit të shtetit dëm prej 2,912,134.78 euro”, thuhet në njoftimin e Prokurorisë.
Ata akuzohen gjithashtu se, pa autorizim, kanë zbuluar fshehtësinë zyrtare. Hajdari bashkë me dy zyrtarët akuzohet se ka zbuluar sekrete shtetërore tek biznesmeni Muharremi, ashtu që i kanë treguar vendndodhjen e rezervës.
“Edhe pse kanë qenë në dijeni se vendndodhja e rezervave shtetërore përbën sekret shtetëror, sipas Ligjit për Rezervat Shtetërore të Mallrave, ata me dashje ia kanë vënë në dispozicion këtë informacion të pandehurit R.M. Ndërkaq, i pandehuri R.M. akuzohet se u ka krijuar kushte të tjerëve për kryerjen e veprës penale, duke ndërmjetësuar dhe negociuar drejtpërdrejt, si dhe duke propozuar e rekomanduar përzgjedhjen e operatorëve ekonomikë në emër të rezervave shtetërore”, thuhet në njoftim.
Lajmin për ngritjen e aktakuzës e dha vetë Hajdari.
“Sapo u njoftova nga avokati im, për dorëzimin e aktakuzës nga Prokuroria Speciale në Gjykatën Themelore në Prishtinë, lidhur me çështjen e kontraktimit të rezervave shtetërore, proces ky tepër i rëndësishëm për të gjithë ne. Sapo ta kem pranuar të plotë dokumentin e aktakuzës do të deklarohem më gjerësisht për media”, ka shkruar Hajdari.
Ajo ka thënë se ndihet krenare për punën në ministri.
“Unë ndihem krenare për punën që kam bërë si ministre e Industrisë, Ndërmarrësisë dhe Tregtisë, në kohën më të vështirë – sigurimin e rezervës shtetërore të mallrave, me produktet esenciale për jetesë, në kohën kur ishim të pambrojtur, gjatë muajve shkurt dhe mars 2022.”
Në gusht të vitit 2023, ish-zëvendëssekretari i MINT, Irfan Lipovica, si dhe drejtori i Departamentit të Rezervave Shtetërore në MINT, Hafiz Gara, u arrestuan për këtë rast. Policia arrestoi edhe afaristin Ridvan Muharremin.
Bastisjet dhe arrestimet u bënë pas publikimit të disa audio-incizimeve, në të cilat pretendohej se vaji i kontraktuar dhe i paguar në Poloni për rezervat shtetërore të Kosovës, nuk kishte arritur kurrë. Ngjashëm, as rezervat e grurit.
Hajdari tha në atë kohë se blerjet për rezerva shtetërore janë bërë në përputhje me ligjin, por nuk dha më shumë detaje, meqë informacionet për to janë sekrete shtetërore.
Ajo kishte akuzuar policinë se gjatë bastisjeve, ka marrë në cilësinë e provave dokumente të klasifikuara si sekrete shtetërore.
Kryeministri Albin Kurti i doli në mbrojtje Hajdarit atë kohë, duke thënë se “nuk ka kurrfarë korrupsioni e keqpërdorimi”.
“Unë kam besim të plotë në ministren Rozeta Hajdari dhe në punën e saj”, kishte deklaruar Kurti.
Lidhur me këtë rast është ftuar për intervistim edhe vetë Kurti, mirëpo ai ka refuzuar të shkojë në Prokurori, duke kërkuar që të intervistohet në Kryeministri.
Qeveria e Kosovës pranoi ftesën e parë të Prokurorisë Speciale për intervistim të Kurtit më 12 dhjetor të vitit të kaluar. Zëdhënësi i Qeverisë, Përparim Kryeziu e kishte cilësuar këtë si tentim ndikimi në rezultatin e zgjedhjeve nacionale 2025, të cilat u mbajtën më 9 shkurt.
Irina Çishiq, e lindur më 8 tetor të vitit 1993, u qëllua nga një plumb snajperi në kryeqytetin e Bosnjës në Sarajevë, katër ditë pasi mbushi 1 vjeç.
Prindërit e saj, tani kërkojë të dinë nëse ‘vajza e tyre u vra’ në ‘gjuetinë e snajperëve’ – një nga temat më të raportuara orët e fundit në mediat botërore, për atë se gjatë luftës në Bosnjë, ‘njerëzit e pasur kishin paguar për të qëlluar mbi njerëz veç për qejf’.
“Meqë Irina sapo kishte mësuar të ecte, gruaja ime Stana e mbante për dore. Kurrë nuk e kuptuam pse dikush do të qëllonte drejt një shënjestre 50–60 centimetra të gjatë sa një vajzë njëvjeçare – në vend të një shënjestre shumë më të madhe, siç është gruaja ime, që do të ishte më e lehtë për t’u goditur”, tha për Shërbimin e Ballkanit të Radios Evropa e Lirë (REL) babai i Irinës, Samir Çishiq.
Për tri dekada, prindërit e vajzës së vrarë kërkojnë një përgjigje: a u vra vajza e tyre vetëm për të shkaktuar më shumë dhimbje dhe vuajtje?
Sipas gazetave Il Giorno, La Repubblica dhe agjencisë ANSA, prokurorët po hetojnë pretendimet se gjatë luftës në Bosnje e Hercegovinë (1992–1995), pasanikë të huaj kanë paguar “shuma të mëdha parash” për të qëlluar me armë “për pikën e qejfit” civilë në Sarajevën e rrethuar.
Sarajeva u rrethua nga Ushtria e Republikës Sërpska nga viti 1992 deri në vitin 1995. Rrethimi që zgjati 1.425 ditë, ishte një nga më të gjatët në historinë moderne evropiane.
Më shumë se 1.600 fëmijë u vranë dhe 14.000 u plagosën.
Presidentja e Kosovës, Vjosa Osmani ka kritikuar Bashkimin Evropian duke thënë se ‘Brukseli zyrtar duket se nuk sheh progresin që ka bërë Kosova’.
Osmani ka thënë se Kosova nuk bën flirt me vende të tjera e fuqi keqdashëse si Rusia, Kina e Irani, të cilat i quan edhe si “trekëndëshi i së keqes”, por në të njëjtën kohë ndjen se puna s’po i vlerësohet.
“Por në të njëjtën kohë, nuk e ndiejmë që ky qasje pro-evropiane dhe fakti që ne jemi 100% të përafruar me politikën e përbashkët të jashtme dhe të sigurisë së BE-së është parë ose vlerësuar. Përkundrazi, duket sikur merret si e mirëqenë. 97% e njerëzve, sigurisht, janë pro-evropianë. Reformat tona në ekonomi, në sundim të ligjit, sidomos në luftën kundër krimit dhe korrupsionit, kanë qenë thelbësore. Megjithatë, në rrugën tonë të integrimit evropian, jemi të bllokuar. Dhe duket sikur procesi i bazuar në meritë, për të cilin BE-ja flet aq shumë, mbetet diçka që duhet të vijë. Unë ende nuk e shoh të ndodhë”, ka thënë Osmani në “Politico”.
“Por shpresoj, ashtu siç thatë ju, që Gjermania do të luajë atë rol udhëheqës në shtyrjen e një procesi të bazuar në meritë, sepse ne nuk po kërkojmë bamirësi. Nuk po kërkojmë rrugë të shkurtër. Po kërkojmë, pikërisht, respekt për punën që bëjmë dhe pranimin e reformave që ne ndërmarrim. Dhe nëse kjo do të merret parasysh, Kosova do të bëhej vendi udhëheqës. Por realiteti është se tani për tani, aplikimi ynë as nuk është shqyrtuar. Ne aplikuan në dhjetor 2022, dhe tani jemi pothuajse në dhjetor 2025. Ai ndodhet diku në sirtarët e Bashkimit Evropian, por nuk po ecën përpara”, ka thënë Osmani.