Category: Lajme

Për shkak të situatës shumë të tensionuar të koronavirusit në Holandë, qeveria do të ndalojë përdorimin e fishekzjarrëve në natën e Vitit të Ri për shkak të rrezikut të plagosjeve.

Do të ndalohet gjithashtu edhe edhe shitja e fishekzjarrëve për përdorim privat.

Ideja është që të kursehen spitalet, infermierët dhe policia tashmë të mbingarkuar.

Vitin e kaluar, kur u ndaluan edhe fishekzjarrët, numri i të plagosurve nga raketat dhe fishekzjarrët që duhej të shkonin në spital ose të shkonin te mjeku ra me 70% krahasuar me vitin 2019.

Në mbledhjen e Komisionit Qendror të Zgjedhjeve e mbajtur ditën e hënë, u bë e ditur se një subjekt politik ka të drejtë të shpenzojë deri në 2,076,422 euro, pra një (1) euro për votues të regjistruar.

“Kjo llogaritje është bërë duke u mbështetur në Rregulloren Zgjedhore nr. 07/2024 për fushatën e zgjedhjeve, monitorimin dhe deklarimin financiar si dhe duke u mbështetur në të dhënat e listës preliminare të votuesve, sipas të cilës numri i votuesve në vendin tonë është 2,076,422”, thuhet në vendimin e KQZ-së.

Gjatë mbledhjes, KQZ po ashtu mori vendim për caktimin e afateve dhe miratoi planin e aktiviteteve për organizimin e zgjedhjeve të parakohshme për Kuvendin e Kosovës, të cilat do të mbahen më 28 dhjetor 2025.

Të maskuar, policia jep detaje për tentimin e dy personave të armatosur për të grabitur furgonin që transportonte para
Në fund të mbledhjes, KQZ miratoi formulën për anëtarë të Komisioneve Komunale të Zgjedhjeve për zgjedhjet e parakohshme për Kuvendin e Kosovës, të cilat do të mbahen më 28 dhjetor 2025.

Policia e Shtetit ka finalizuar në Pukë operacionin e koduar “OROSHI”, i zhvilluar nga Komisariati i Policisë Pukë, strukturat e DVP Shkodër, Drejtoria e Antiterrorit dhe me mbështetjen e forcave speciale RENEA.

Operacioni çoi në arrestimin e shtetasve Erzen Uka, 35 vjeç, dhe Julian Cumraku, 34 vjeç, të dy me precedentë penalë dhe të dyshuar për veprime të rrezikshme kundër rendit dhe sigurisë publike.

Sipas njoftimit zyrtar, rreth orës 09:00 të së hënës, patrullat e Policisë së Pukës konstatuan një person që u fut me shpejtësi në një banesë të braktisur në fshatin Orosh, Fushë-Arrëz.

Pasi policia i kërkoi të dilte, ai refuzoi dhe kërcënoi uniformat blu.

Duke pasur informacion për rrezikshmërinë e tij, zona u rrethua dhe u kërkua ndërhyrja e forcave RENEA.

Gjatë tentativës për negocim, nga brenda banesës u qëllua me armë zjarri drejt efektivëve të RENEA-s, duke rrezikuar jetën e tyre.

Rrethimi zgjati rreth 12 orë, ndërsa familjarët e të dy të dyshuarve luajtën rol në bindjen e tyre për t’u dorëzuar pa përdorimin e forcës.

Në momentin e arrestimit, Erzen Uka kishte një plagë në kofshë dhe u dërgua në Spitalin Rajonal Shkodër, jashtë rrezikut për jetën.

Kontrolli i banesës zbuloi një arsenal të plotë armësh: katër armë automatike, një pistoletë, municion luftarak, 17 granata dore difensive, kapsolla detonatore dhe fitil zjarrpërcjellës.

Po ashtu, u sekuestrua edhe një flamur i organizatës terroriste ISIS.

Të dy të arrestuarit akuzohen për “propagandë dhe thirrje për akte me qëllime terroriste”, “mbajtje dhe prodhim të armëve luftarake”, “kundërshtim të punonjësit të policisë”, si dhe shkelje të tjera penale.

Një zëdhënës i Ambasadës së Shteteve të Bashkuara në Prishtinë i ka thënë të martën Radios Evropa e Lirë se u bën thirrje të gjitha palëve në Kosovë që t’i respektojnë ligjet e vendet dhe t’i ndjekin procedurat e duhura ligjore, kur është pyetur për t’i komentuar zhvillimet e fundit në Këshillin Prokurorial të Kosovës (KPK), që kanë kulmuar me shkarkimin e ushtruesit të detyrës së Kryeprokurorit të Shtetit, Besim Kelmendit.

Më 20 nëntor, anëtarja e KPK-së, Jehohna Grantolli e ka propozuar shkarkimin e Kelmendit, pas raportimeve në një media lokale në Kosovë kinse ai kishte bashkëpunuar më 1999 me një gjyqtare serbe për rastin e Masakrës së Reçakut, të cilën gjyqtarja e konsideronte ngjarje të trilluar.

Kelmendi e ka mohuar bashkëpunimin në atë rast, ndërsa vendimin për shkarkimin e tij e ka konsideruar të paligjshëm, duke thënë se është marrë në mungesë kuorumi, prandaj do ta vazhdojë punën në këtë institucion.

Në linjë me qëndrimin e tij kanë qenë edhe disa anëtarë të KPK-së, në mesin e tyre Visar Krasniqi, sipas të cilit çdo vendim i marrë në mungesë kuorumi “është inekzistent” dhe që propozimi për shkarkimin e Kelmendit bazohet “në një energji të qartë të një puçi institucional”.

KPK-ja i ka 13 anëtarë, ndërsa për shkarkimin e Kelmendit kanë votuar pesë prej tyre. Sipas rregulloreve, kuorumi sigurohet me gjashtë anëtarë.

Të njëjtën ditë, në vendin e Kelmendit është emëruar Agron Qalaj.

Presidentja e Kosovës, Vjosa Osmani ka thënë një ditë më parë se është duke e analizuar procesin nga aspekti ligjor dhe se është në bashkëpunim me shtetet e QUINT-it (Shtetet e Bashkuara, Britaninë e Madhe, Gjermaninë, Francën dhe Italinë) lidhur me zhvillimet në KPK, të cilat i ka quajtur “jashtëzakonisht serioze”.

“Sistemi i drejtësisë në vend është përballur për një kohë të gjatë me sfida sa i përket profesionalizmit, integritetit, pavarësisë dhe paanshmërisë. Është shumë me rëndësi që në mënyrë që deklaratat e mia të mos shihen si ndonjë ndërhyrje, sepse jam person politik që kurrë në karrierën time nuk kam ndërhyrë në sistemin e drejtësisë, që t’i lëmë vend edhe analizës së përbashkët që e kemi me partnerët tanë lidhur me procesin që ka ngjarë sa i përket shkarkimit apo tentim-shkarkimit”, ka thënë Osmani për gazetarë.

Në ditën e shkarkimit, një anëtar i KPK-së e ka akuzuar Kryeprokrurorin e Prokurorisë Speciale, Blerim Isufaj, se qëndron mbrapa tentimeve për ta shkarkuar Kelmendin.

Mirëpo, Prokuroria Speciale e ka mohuar ndërhyrjen e Isufajt në vendimet e KPK-së.

Presidentja Osmani kishte refuzuar ta dekretonte Isufajn për Kryeprokuror të Shtetit në tetorin e 2023-tës, me arsyetimin se kishte pasur shkelje në procesin e përzgjedhjes së tij nga KPK-ja.

Një muaj më pas, KPK-ja e dërgoi përsëri emrin e Isufajt për dekretim, por që atëherë presidentja nuk mori më asnjë vendim.

Pozitën e Kryeprokurorit të Shtetit vazhdoi ta ushtronte Kelmendi, prej kur Aleksandër Lumezit i përfundoi mandati më 2022.

Çfarë u raportua për Kelmendin?

Më 19 nëntor, Besim Kelmendi ka dalë në një konferencë të jashtëzakonshme për media, duke i mohuar raportimet se ka bashkëpunuar me gjyqtaren serbe, Danica Marinkoviq, më 1999, e cila e kishte përsipër rastin e masakrës së Reçakut.

Atëbotë, Marinkoviq punonte si gjyqtare në Gjykatën e Qarkut në Prishtinë, dhe e kishte cilësuar masakrën si “ngjarje të trilluar”.

Në atë masakër u vranë 45 civilë shqiptarë.

Kelmendi e ka konfirmuar se është paraqitur si dëshmitar në Prokurorinë Speciale të Kosovës lidhur me punën e tij në gjykatë në kohën kur ka ndodhur masakra.

Sipas tij, në atë periudhë ishte i punësuar në Gjykatën e Qarkut në Prishtinë si bashkëpunëtor profesional, duke theksuar se kryente punën e procesmbajtësit, andaj i mohoi akuzat se ishte asistent i Marinkoviqit.

Sipas tij, Marinkoviq ishte gjyqtarja që “zhduku provat për masakrën e Reçakut”.

Ai i ka bërë këto deklarata pas pretendimeve të medias lokale në Kosovë, Paparaci, se Kelmendi kishte qenë i përfshirë në trajtimin e rastit të Reçakut më 1999.

Radio Evropa e Lirë nuk ka mundur t’i verifikojë pretendimet e këtij mediumi.

Përgjatë konferencës së 19 nëntorit, Kelmendi është pyetur pse është ftuar si dëshmitar në Prokurorinë Speciale lidhur me këtë rast.

“Jam thirrur si dëshmitar sepse një person, që ka qenë prokuror në atë kohë, me emrin Ismet Shufta, kur e kanë pyetur se kush ka punuar në Gjykatë, ai ka përmendur emrat e njerëzve që i kanë rënë ndërmend. I kishte rënë në mend edhe emri im sepse sot jam U.D. i Kryeprokurorit. Nuk e di pse, sepse s’kam marrë asnjë arsyetim”, tha Kelmendi.

Punëtorët e Radiotelevizionit të Kosovës vazhdojnë grevën e përgjithshme për shkak të mosmarrjes së pagave. Punëtorët e RTK-së në grevë, nuk do të ketë edicionet e lajmeve në orën 11 dhe 13.

Sindikata e Punëtorëve të RTK-së ka bërë të ditur se greva do të zhvillohet çdo ditë nga ora 11:00 deri në 13:00, me pezullimin e të gjitha punëve në çdo sektor.

Për shkak të grevës së përgjithshme, nuk do të ketë lajme në orën 11 dhe 13.

Sindikata u kërkon falje qytetarëve, por sqaron se greva vjen si pasojë e mos-ekzekutimit të pagave për pothuajse dy muaj.

Edhe Shoqata Sindikale e Radio Kosovës ka njoftuar punëtorët se, duke filluar nga sot, do të organizohet grevë dyorëshe para ndërtesës së Radio Kosovës.

Shoqata ka kërkuar sërish nga organet përgjegjëse që të marrin masa urgjente për zgjidhjen e kësaj çështjeje, në mënyrë që punëtorëve t’u garantohen të drejtat e tyre ligjore dhe institucioni të vazhdojë punën pa pengesa.

Sindikatat paralajmërojnë se greva do të vazhdojë deri në alokimin e buxhetit për RTK-në dhe, përveç grevës, do të organizojnë edhe protestë para Qeverisë dhe Kuvendit ditët në vijim.

Në mungesë të pagave dhe zgjidhjes institucionale, rrezikohet funksionimi i programeve dhe misioni publik i transmetuesit të vetëm në vend.

Sot (e martë) është e planifikuar seanca në rastin ku Prokuroria Speciale e akuzon ish-kryeshefin e Koorporatës Energjetike të Kosovës, Nagip Krasniqin, për keqpërdorim të detyrës zyrtare në favor të kompanisë sllovene “HSE”.

Në aktakuzën e ngritur në gusht të 2024-ës, Prokuroria Speciale pretendon se Krasniqi ia mundësoi kompanisë sllovene “Holding Slovenske Elektrane” (HSE) që të tregtojë energji pa pasur licencë në Kosovë, duke i shkaktuar dëm shtetit prej rreth 3.2 milionë eurosh.

Aktakuza e ngarkon Krasniqin se pak ditë pasi që e ka marrë detyrën e kryeshefit të KEK-ut, ia ka mundësuar kompanisë “Holding Slovenske Elektrane” tregtimin e rrymës në Kosovë, në kundërshtim me Ligjin për Energjinë Elektrike dhe atë për Zyrën e Rregullatorit.

Sipas aktakuzës, Krasniqi me dashje e ka aprovuar blerjen dhe ka nënshkruar kontrata me kompaninë sllovene, ndonëse ka qenë në dijeni se tregtimi i energjisë nuk mund të bëhej me kompani të palicencuara nga Zyra e Rregullatorit për Energji (ZRRE).

Më 3 korrik 2025, para Gjykatës Themelore në Prishtinë, Krasniqi është deklaruar i pafajshëm lidhur me akuzat për keqpërdorim të detyrës zyrtare, në nisje të gjykimit për aktakuzën e parë ndaj tij.

Ndaj Nagip Krasniqit ka edhe një aktakuzë tjetër për keqpërdorim të detyrës zyrtare. Në aktakuzën e re, përveç ish-kryeshefit të KEK-ut, janë të përfshirë edhe ish-shefi i prokurimit në këtë korporatë, Ymer Dragusha, dhe avokati, Isuf Zejna. /Koha

Një rasti i dhunës në familje ka ndodhur mbrëmjen e 23 nëntorit në Leposaviq, ku një mashkull kosovar është arrestuar nga Policia e Kosovës pasi dyshohet se ka sulmuar fizikisht babanë e tij.

Sipas njoftimit zyrtar, sulmi ka ndodhur rreth orës 23:00, në momentin kur i dyshuari ishte nën ndikim të alkoolit. Pavarësisht incidentit, viktima – babai i tij – ka refuzuar që të marrë trajtim mjekësor.

Me vendim të prokurorit, i dyshuari është dërguar në mbajtje në stacionin policor deri në këndellje.

“Leposaviq 23.11.2025-23:00. Është arrestuar i dyshuari mashkull kosovar, pasi që nën ndikim të alkoolit kishte sulmuar fizikisht babanë e tij viktimën. Viktima ka refuzuar tretmanin mjekësor. Me vendim të prokurorit, i dyshuari do të ndalet në stacionin policor deri në këndellje dhe pastaj të intervistohet”, thuhet në raportin e Policisë së Kosovës.