Category: Lajme

Lidhja Demokratike e Kosovës e ka prezantuar aderimin e radhës, Gjeneral Major Gëzim Hazrollin.

Ish komandanti Brigadës 123 të UÇK-së ishte një nga të parët që udhëhoqi transformimin e TMK-së në FSK.

“Sot, Lidhja Demokratike e Kosovës mirëpret një nga figurat më të shquara të mbrojtjes sonë kombëtare: Gjeneral Major Gëzim Hazrollin – ushtarakun që në luftë udhëhoqi me guxim, në paqe shërbeu me përkushtim, dhe në shtet ndërtoi me urtësi.
Me mbi tre dekada uniformë, Hazrolli i bashkohet LDK-së jo vetëm si profesionist i rrallë, por si simbol i disiplinës, integritetit dhe karakterit që vendi ynë sot ka nevojë t’i rikthejë në qendër të jetës publike.
Në vitet vendimtare të çlirimit, si Komandant i Brigadës 123, të UÇK-së, ai ishte ndër njerëzit që mbajtën vijën e frontit – me përgjegjësi dhe me sakrificë. I qetë në vendimmarrje, i saktë në udhëheqje, i palëkundur në detyrë. Prej atyre burrave që i kanë dhënë peshë fjalës komandant.
Pas luftës, kur vendi kishte nevojë për themele të reja, Hazrolli ishte ndër të parët që vuri gurët e parë në ngritjen e Trupave të Mbrojtjes së Kosovës; dhe ndër të parët që udhëhoqi transformimin e tyre në Forcë të Sigurisë së Kosovës, për t’i dhënë Republikës një ushtri moderne, profesionale, të besueshme për aleatët tanë.
Nga viti 2009 deri në maj 2025, në pozitat më të larta drejtuese të FSK-së dhe Ministrisë së Mbrojtjes, ai ishte pjesë e çdo procesi kyç të modernizimit: ngritja e kapaciteteve luftarake, profesionalizimi i trupës, ndërtimi i standardeve që sot e lidhin ushtrinë tonë me partnerët euroatlantikë.
I formuar në institucionet strategjike më prestigjioze; Royal College of Defence Studies në Londër, Marshall Center në Garmisch, programet ekzekutive në Monterey, California; Gjenerali Hazrolli është ndër ekspertët më të plotë që ka prodhuar sistemi ynë i sigurisë.
Për shërbimin e tij, Republika e ka nderuar me Medaljen Presidenciale Ushtarake, Medaljen për Shërbime të Shquara, Medaljen e Karrierës – dekorata që mbahen pak, meritohen shumë dhe trashëgohen me krenari.
Sot, ardhja e tij në Lidhjen Demokratike të Kosovës përçon një mesazh të qartë:
njerëzit e shtetit po kthehen në politikë; njerëzit e përgjegjësisë po bashkohen në një projekt që synon rend, stabilitet dhe orientim të palëkundur euroatlantik.
Gjeneral Hazrolli i bashkohet LDK-së për një arsye të thjeshtë dhe të madhe: sepse Kosova ka nevojë për shtet, jo spektakël; për institucione të përgatitura, jo improvizim; për drejtim të qetë, të matur dhe të sigurt – jo aventurë politike.
Mirë se vjen, Gjeneral Gëzim Hazrolli.
Në këtë shtëpi politike, do të gjesh vlerat që i mbron prej tri dekadash: nderin, disiplinën, besën dhe përkushtimin ndaj Republikës.
Udhëtimi ynë për një Kosovë më të sigurt, më të fortë dhe më evropiane sot bëhet më i fuqishëm” shkruan Abdixhiku në njoftim.

Dhomat e Specializuara të Kosovës (DhSK) në Hagë kanë marrë vendim që dëshmitarin Bislim Zyrapi të mos lejohet që mbrojtja e Hashim Thaçit ta shtojë në listën e dëshmitarëve të saj, por u lejua pranimi i pesë deklaratave të tij të mëhershme me qëllim të krahasimit të dëshmive për shkaqe të qëndrueshmërisë dhe besueshmërisë së dëshmisë së tij.

Ndryshe, mbrojtja e Thaçit kishte kërkuar autorizim për ta shtuar Zyrapin në listën e saj të dëshmitarëve dhe të pranojë pesë deklarata të tij të mëhershme sipas Rregullës 153, raporton “Betimi për Drejtësi“.

Mbrojtja kishte argumentuar se ekziston arsye e rëndësishme për aprovimin e kërkesës së tyre, me arsyetimin se Zyrapi është një dëshmitar shumë i rëndësishëm për të gjitha palët në këtë çështje.

Përveç kësaj, mbrojtja kishte thënë se me aprovimin e kërkesës së tyre, nuk shkaktohet asnjë paragjykimi për palët- pasi dëshmitari dhe dëshmitë e tij janë të njohura mirë për palët dhe pjesëmarrësit, përveç kësaj, deklaratat e tilla i janë paraqitur dëshmitarit gjatë dëshmisë së tij në korrik 2024 dhe nuk do të shkaktonte asnjë vonesë në procedurë.

Mbrojtja ka thënë se këto deklarata duhet të pranohen pasi ato përmbajnë prova lehtësuese të cilat nuk mund të injorohen.

Veç kësaj, mbrojtja ka thënë se Zyrapi është i disponueshëm edhe për marrje në pyetje, gjë që përmbush një prej kërkesave kyçe sipas Rregullës 153.

Prokuroria kishte thënë se deklaratat nuk janë të besueshme në vetvete dhe nuk plotësojnë kriteret e domosdoshme sipas Rregullës 153, si dhe kjo rregull nuk mund të përdoret për të anashkaluar Rregullën 155.

Veç kësaj, Prokuroria pretendon se mbrojtja e kishte mundësinë që ta merrte në pyetje dëshmitarin në lidhje me çështjet përkatëse gjatë kohës kur ai dëshmoi në sallën e gjyqit në vitin 2024.

Në replikën e saj, mbrojta ka thënë se ZPS-ja po kërkon që të imponojë një lexim tepër formal të rregullave, duke shtuar se vetë praktika e deritanishme e DhSK-së tregon se Rregulla 153 është aplikuar në raste kur materiali nuk kualifikohet si deklaratë në kuptimin teknik të Rregullës 155.

“Sipas mbrojtjes: (i) Pesë Deklaratat nuk bien nën Rregullën 155 sepse nuk janë deklarata të marra nga ZPS, por materiale dokumentare të krijuara në rrethana të tjera; (ii) prandaj, Rregulla 153 është rruga e duhur; dhe (iii) ZPS nuk i ka sfiduar dot elementet kyçe të pranueshmërisë. Mbrojtja shton se ZPS është vetë autor i një pjese të koklavitjes procedurale që e ka sjellë këtë çështje deri në këtë pikë”, thotë mbrojtja sipas vendimit.

Megjithatë, Prokuroria s’e ka kundërshtuar pranimin e pesë deklaratave sipas Rregullës 138, por vetëm për qëllime të krahasimit dhe jo për të vërtetuar të vërtetën e përmbajtjes së tyre.

Mbrojtja ka theksuar se ndryshe nga ajo se çfarë sugjeron Prokuroria, çdo paraqitje sipas Rregullës 153 kërkon që dëshmitari të jetë në listën e dëshmitarëve të palës që e paraqet.

Kurse, trupi gjykues ka thënë se mbrojtja nuk ka shpjeguar se pse ka pritur deri në fund të paraqitjes së saj të provave për të kërkuar pranimin e këtij materiali me ndryshimet përkatëse në listën e dëshmitarëve të saj.

Trupi gjykues tutje ka thënë se pranimi i këtyre deklaratave i nënshtrohet kritereve specifike të parashikuara me Rregullat 153 dhe 155.

Veç kësaj, u tha se pesë deklaratat përmbajnë informacion që shkojnë drejtpërdrejt në provimin e akteve dhe sjelljen e të akuzuarve siç përshkruhet në aktakuzë, por pranimi i saj sipas Rregullës 153 do të anashkalonte skemën procedurale dhe do t’iu mohonte palëve të tjera mundësinë për të pyetur dëshmitarin për këto çështje.

Trupi gjykues ka vlerësuar se nuk është e nevojshme që të shtohet Zyrapi në listën e dëshmitarëve të mbrojtjes, por kjo e fundit së bashku me Prokurorinë ka thënë që pesë deklaratat mund të pranohen sipas Rregullës 138, me qëllim të kufizuar për vlerësimin e qëndrueshmërisë dhe besueshmërisë së dëshmisë së Zyrapit.

Policia e ka arrestuar një person për veprën penale “Vjedhje” në qytetin e Vushtrrisë, të hënën.

Në njoftimin e lëshuar për media thuhet se nga provat dhe informacionet e siguruara gjatë hetimit, dyshohet se i dyshuari gjatë muajit nëntor, në intervale të ndryshme kohore, “në dy raste ka kryer vjedhje të sasisë së naftës, ku i dyshuari kishte vjedhur naftë nga gjeneratori i ankuesit”.

I dyshuari është shoqëruar në stacion policor dhe pas intervistimit, me aktvendim të prokurorit kompetent, ndaj tij është caktuar masa e ndalimit policor për 48 orë.

Ka vazhduar edhe sot protesta e punëtorëve të “Trafikut Urban” si dhe operatorëve privatë në kryeqytet.

Kryetari i Sindikatës së “Trafikut Urban”, Ilmi Gashi ka thënë se s’ka qarkullim të autobusëve në Prishtinë pa u alokuar paratë.

Sipas tij, Komuna i detyrohet “Trafikut Urban” 2.4 milionë euro. Ai gjithashtu i kërkoi falje qytetarëve për situatën e krijuar, por që siç tha kjo zgjedhje u është imponuar.

“Protesta vazhdon dhe sot edhe tutje deri në alokimin e mjeteve borxh që detyrohet Komuna të lshyjë borxhet ndaj ‘Trafikut urban’ dhe operatorëve privatë. Deri në këto momente, vendimi që është marrë ditën e enjte për bartjen e të hyrave vetjake për vitin 2024 në vitin 2025 që arrin vlera e asaj shume 28 milionë është dërguar nga Komuna te Ministria e Financave. Po presim nga Ministria e Financave për të kthyer këtë vendim me pozitivitet për ne gjë që i alokon ato mjete që është ai vendim. Komuna i detyrohet Trafikut Urban 2.4 milionë borxh. Shpresojmë që sot ose nesër mos po reflektojnë. Në momentin që alokohen paratë ne dalim në punë, gjysmë ore na duhet kohë për tu kthyer në normalitet. Sa të realizohet bartja ne fillojmë punën. Qytetarëve u kërkojmë falje. S’është bërë kjo me dashjen tonë, na është imponuar”, tha ai.

Në mbledhjen e Këshillit Prokurorial të Kosovës (KPK), anëtari Visar Krasniqi ka propozuar të shkarkohet nga pozita kryesuesi Ardian Hajdaraj dhe më pas kanë lëshuar sallën bashkë me Veton Shabanin.

Siç raporton Betimi për Drejtësi, Krasniqi ka kërkuar edhe nga Agron Qalaj, i caktuar tash U.D. i kryeprokurorit të Shtetit, që ta lirojë takimin e Këshillit, me arsyetimin se është person i paautorizuar të qëndrojë në këtë takim.

“Propozimi im është shkarkimi yt nga pozita e anëtarit të Këshillit dhe automatikisht bie edhe prej kryesuesit. Meqenëse jemi bë hajgarexhi në takime të Këshillit, po bëjmë propozime qysh na teket, qysh na vijnë ndër mend”, tha Krasniqi.

Kujtojmë se Qalaj u caktua në këtë pozitë, pas shkarkimit të Besim Kelmendit, vendim ky që u quajt i paligjshëm dhe ndaj tij pati reagim nga ambasada amerikane.

Ushtria amerikane njoftoi të dielën, 30 nëntor, se së fundmi ka shkatërruar 15 vende ku ndodheshin depot me armë të ISIS‑it në jug të Sirisë.

Komanda Qendrore Amerikane (CENTOM) njoftoi se, në bashkëpunim me forcat siriane, identifikuan dhe asgjësuan këto depo përgjatë provincës Rif Dimashq gjatë disa sulmeve ajrore e shpërthimeve në tokë që u zhvilluan mes datave 24 dhe 27 nëntor.

Sipas deklaratës zyrtare, operacioni çoi në shkatërrimin e më shumë se 130 mortajave (armë që lëshojnë predha) dhe raketave, si dhe armë zjarri automatike, mitralozë, mina kundërtank dhe materiale për ndërtimin e bombave. Gjithashtu, janë gjetur dhe shkatërruar sasi të lëndëve narkotike.

Komandanti i CENTCOM‑it, admirali Brad Cooper, tha se ky “operacion i suksesshëm siguron që lufta kundër ISIS‑it të jetë e qëndrueshme”, duke mos i lejuar grupit asnjë hapësirë për të “rilindur”, me sulme terroriste qoftë në Shtetet e Bashkuara apo vende të tjera.

Sipas raportimeve, ndërsa ISIS në të kaluarën kontrollonte territore të mëdha në Siri dhe Irak, pas humbjeve të mëdha ushtarake të koalicionit të udhëhequr nga SHBA‑të, tani grupi është shpërndarë në celula të vogla.

Megjithatë, mbetet rreziku i ripërtëritjes së aktiviteteve të tij dhe ky sulm i përbashkët synon ta pengojë këtë.

Policia e Kosovës ka shpallur sot konkursin e ri të punësimit për disa pozita me karakter financiar dhe administrativ, duke ofruar gjithsej shtatë vende të lira pune. Konkursi është publikuar më 1 dhjetor 2025, me referencë zyrtare 10/1-01/SRS/0779/2025.

Pozitat e hapura janë:

Zyrtar i Lartë i Aseteve – 1 vend
Zyrtar i Lartë i Financave – 2 vende
Zyrtar i Lartë i Kontabilitetit – 1 vend
Zyrtar i Lartë Shpenzues në Drejtorinë e Buxhetit dhe Financave – 1 vend
Zyrtar i Lartë i të Hyrave – 2 vende

Policia e Kosovës fton të gjithë kandidatët e interesuar të aplikojnë sipas kritereve dhe udhëzimeve të specifikuara në njoftimin zyrtar të publikuar në faqen e institucionit:
www.kosovopolice.com/shpallje/mundesi-punesimi

Konkursi mbetet i hapur në përputhje me afatet ligjore për aplikim.

Deputeti i LDK-së, Avdullah Hoti, ka kritikuar ashpër qeverisjen katërvjeçare të VV-së, duke thënë se LDK-ja është detyruar të fokusohet në parandalimin e dëmeve në ekonomi, shoqëri dhe integritetin shtetëror, të shkaktuara nga vendime arbitrare dhe ligje jokushtetuese.

Ai theksoi se shumë ligje janë rrëzuar nga Gjykata Kushtetuese dhe se ankesa e LDK-së në PZAP për votimin e diasporës jashtë përfaqësive diplomatike, synon mbrojtjen e integritetit të procesit zgjedhor.

Hoti kritikoi reagimin e qeverisë ndaj vendimit të PZAP-së dhe tha se ata “nuk kuptojnë esencën e integritetit shtetëror”, duke bërë thirrje që qeveria aktuale të largohet me votë.