Category: Lajme

Janë publikuar të dhënat rreth kurorëzimeve dhe shkurorëzimeve përgjatë muajit maj në Kosovë.

Sipas të dhënave të Agjencisë të Statistikave të Kosovës, gjatë muajit maj janë regjistruar gjithsej 1.037 kurorëzime (brenda dhe jashtë Kosovës).

Krahasuar me muajin prill 2026, në muajin maj ka rënie të numrit të kurorëzimeve rreth 7,9%.

Kurse, në këtë periudhë janë regjistruar 117 raste të shkurorëzimeve në Kosovë.

Krahasuar me muajin prill ka rritje të numrit të shkurorëzimeve për 5,4%.

Kosova ende nuk e ka dorëzuar në Komisionin Evropian raportin mbi zbatimin e hapave reformues në kuadër të Planit të Rritjes.

Afati përfundimtar është 15 korriku, që praktikisht nënkupton se Kosova ka kohë deri në mesnatë për ta dorëzuar raportin në Bruksel.

Raporti është i domosdoshëm, sepse mbi bazën e tij Komisioni Evropian vlerëson shkallën e zbatimit të reformave, nga të cilat varen edhe pagesat e radhës nga Plani i Rritjes.

Për ndarjen e të hollave kërkohet vlerësim pozitiv i Komisionit Evropian.

Qeveria e Kosovës nuk i është përgjigjur pyetjes së REL-it nëse do t’ia dalë ta dorëzojë raportin në kohë.

Deri më tani, Kosova ka marrë vetëm parafinancimin prej mbi 61 milionë eurosh, që përfaqëson shtatë për qind të shumës së përgjithshme prej 882 milionë eurosh të ndara për vendin.

Kosova nuk ka marrë ende asnjë këst të rregullt nga Plani i Rritjes, pasi vlerësohet se nuk e ka përmbushur asnjë hap reformues. Arsyeja kryesore ishte kriza institucionale që shënoi tërë vitin e kaluar dhe pamundësia për të vazhduar me zbatimin e reformave.

Zëdhënësi i Komisionit Evropian, Guillaume Mercier, konfirmoi se deri më tani katër shtete të rajonit kanë dorëzuar raportet e tyre mbi zbatimin e reformave.

“Komisioni Evropian është i gatshëm t’i ndihmojë partnerët nga Ballkani Perëndimor që të përshpejtojnë zbatimin e reformave të papërfunduara, në mënyrë që ato të realizohen brenda afatit të zgjatur”, konfirmoi për REL Mercier.

Përveç Kosovës, raportin ende nuk e ka dorëzuar as Bosnje e Hercegovina. Në Bruksel nuk presin që të marrin dokument nga Bosnja, pasi ky shtet ende nuk e ka miratuar Agjendën e Reformave.

Më 30 qershor përfundoi afati për periudhën e katërt raportuese.

“Pas pranimit të raporteve, Komisioni do të vlerësojë zbatimin e hapave përkatës të reformës dhe do të marrë vendim për ndarjen e fondeve përkatëse”, tha Mercier.

Përparim i pabarabartë në rajon

Sipas të dhënave zyrtare të Komisionit Evropian, vendet e Ballkanit Perëndimor kanë nisur pothuajse të gjitha reformat e planifikuara, por vetëm 57 për qind e hapave janë përmbushur plotësisht.

Komisioni Evropian thekson se dallimet ndërmjet vendeve janë të mëdha.

Mali i Zi dhe Shqipëria udhëheqin me rreth 80 për qind të hapave të përmbushur. Pas tyre renditet Maqedonia e Veriut, e cila gjatë muajve të fundit ka përshpejtuar ndjeshëm ritmin e reformave dhe pritet ta tejkalojë shkallën prej 50 për qind.

Serbia vlerësohet se ka realizuar rreth 35 për qind të reformave, megjithëse puna është duke u zhvilluar në rreth 85 për qind të hapave të planifikuar.

Kosova dhe Bosnja ngelin mbrapa

Kosova dhe Bosnja janë dy vendet që kanë mbetur dukshëm mbrapa, për shkak të rrethanave të ndryshme politike.

Në debatin e zhvilluar më 14 korrik në Komitetin për Punë të Jashtme të Parlamentit Evropian, drejtori i Drejtorisë së Përgjithshme për Zgjerim, Jan Geert Koopman, konfirmoi se Kosova ka ngecur për shkak të krizës politike në vend.

“Kosova është shumë prapa. Kjo është pasojë e bllokadave të brendshme politike gjatë periudhës së kaluar, të cilat thjesht kanë penguar miratimin e legjislacionit të rëndësishëm. Megjithatë, pas zgjedhjeve të mbajtura në qershor të këtij viti, muajin e kaluar, tani po shohim se Kosova ka filluar të ndërtojë stabilitetin e nevojshëm institucional dhe, për këtë arsye, presim edhe një ritëm më të lartë të zbatimit të reformave”, deklaroi Koopman.

Bosnja, nga ana tjetër, jo vetëm që nuk ka marrë asnjë cent nga Plani i Rritjes, por për shkak të mosmiratimit të Agjendës së Reformave ka humbur edhe mbi 100 milionë euro.

Pagesat varen nga rezultatet

Edhe ritmi i pagesave ndryshon ndjeshëm ndërmjet vendeve.

Shqipëria, Maqedonia e Veriut dhe Mali i Zi kanë marrë tashmë tri këste të rregullta.

Serbia ka marrë vetëm një pagesë, ndërsa fondet e tjera mbeten pezull për shkak të ligjeve të diskutueshme në fushën e drejtësisë. Komisioni Evropian po vlerëson nëse kushtet për pagesa të reja janë përmbushur.

“Fakti që deri më tani nuk është bërë asnjë pagesë tjetër tregon se nuk kemi qenë plotësisht të bindur se këto kushte janë përmbushur”, tha Koopman.

Kosova dhe Bosnja nuk kanë marrë asnjë pagesë të rregullt.

Mekanizmi është i thjeshtë: shtetet raportojnë për çdo hap reformues, secili hap ka një vlerë financiare, ndërsa Komisioni Evropian përcakton shumën që do të ndahet në bazë të rezultateve të arritura.

“Mendoj se është shumë e rëndësishme të kuptohet se kushtëzimi i rreptë përbën një nxitje të fuqishme për zbatimin e reformave. Dinamika e reformave që po shohim në rajon është e konsiderueshme. Prandaj, fakti që jo të gjitha fondet janë përdorur menjëherë nuk duhet të shihet si diçka negative. Përkundrazi, kjo është pjesë përbërëse e mënyrës se si është konceptuar ky instrument”, tha Koopman.

Fondet mund të humben përgjithmonë teksa afatet po skadojnë

Më herët gjatë këtij viti, komisionarja evropiane për Zgjerim, Marta Kos, paralajmëroi se rajoni rrezikonte të humbiste rreth 700 milionë euro për shkak të vonesave në reforma.

Sipas zyrtarëve evropianë, ky paralajmërim ndikoi që vendet të përshpejtonin procesin. Megjithatë, edhe vendet më të avancuara mund të humbasin një pjesë të fondeve, pasi afatet po afrohen.

Dita e fundit e qershorit dhe ajo e dhjetorit përbëjnë dy afatet kyç. Hapat reformues që nuk realizohen brenda këtyre afateve humbasin financimin.

“Për rikujtim, afati për zbatimin e hapave të reformës në kuadër të periudhës së katërt të raportimit të Instrumentit për Reforma dhe Rritje ishte 30 qershori 2026. E njëjta datë shënoi edhe përfundimin e periudhës së tolerancës për hapat e reformës që duhej të ishin përmbushur në mesin e vitit 2025. Siç u përmend, Komisioni Evropian tani do t’i vlerësojë raportet dhe do të përcaktojë ndarjet përkatëse”, konfirmoi Guillaume Mercier.

Çfarë ndodh me fondet e humbura?

Fondet që humben nuk kthehen në buxhetin e Bashkimit Evropian.

Komisioni Evropian mund të rillogarisë ndarjen e mjeteve në nivel rajonal dhe t’ua ridrejtojë ato vendeve që kanë zbatuar me sukses reformat para afatit.

Me fjalë të tjera, sistemi transferon fondet nga vendet që nuk arrijnë rezultatet e kërkuara te ato që zbatojnë më shpejt reformat.

Megjithatë, duke qenë se tashmë është e qartë se jo të gjitha vendet do të përdorin fondet e tyre, Komisioni Evropian ende nuk ka vendosur se çfarë do të bëjë me pjesën e mbetur të mjeteve.

Aktualisht po shqyrtohen opsionet që ato të orientohen drejt investimeve të tjera në rajon, por vendimi përfundimtar ende nuk është marrë.

Një shofer në Leposaviq është ndëshkuar me 300 euro, tri pikë negative dhe ndalim i drejtimit të mjetit për tre muaj.

Sipas policisë, shoferi 27-vjeçar, dyshohet se me veturën Audi Q5 me targa të huaja, voziti me shpejtësi prej 117 km/h, në një zonë ku kufizimi i lejuar është 60 km/h.

“Rreth orës 09:05, njësia rajonale e trafikut rrugor Mitrovicë Veri, në rrugën magjistrale Leposaviq–Mitrovicë, përkatësisht në fshatin Serbovc, ka ndaluar një automjet të tipit Audi Q5 me targa të huaja. Gjatë kontrollit, është konstatuar se shoferi M.H. (1999) po drejtonte automjetin me shpejtësi prej 117 km/h, në një zonë ku kufizimi i lejuar është 60 km/h. Shpejtësia është matur me radar mobil”, thuhet në njoftim.

Zyrtarët policorë të Drejtorisë Rajonale të Policisë Mitrovicë Veri, gjatë periudhës janar–qershor 2026, kanë shqiptuar gjithsej 8,718 tiketa trafiku.

Një rast i rëndë ka ndodhur në Han të Elezit, ku dhjetëra persona dyshohet se janë helmuar nga konsumimi i ushqimit fast-food.

Siç ka bërë të ditur për T7, Bashkim Hazizi nga QKMF atje, vetëm nga ora 12, deri tani, janë paraqitur 9 raste të reja.

‘‘Nga ora 12:00 deri më tani kanë ardhur edhe 9 raste të reja, me simptoma si të vjella, barkqitje etj. Megjithatë, gjendja e tyre është stabile. Disa po marrin terapi ambulatore, ndërsa disa të tjerë janë liruar për në shtëpi me terapi përcjellëse. Për momentin, trajtimi është ofruar me kohë dhe menaxhimi i rasteve po shkon mirë. Besoj se nuk do të ketë raste të reja. Zakonisht, gjatë stinës së verës pritet të ketë fluks pacientësh me simptoma të ngjashme dhe ne, si staf, gjithmonë përgatitemi për raste të tilla’’, ka thënë ai.

Një rast i vjedhjes me dëm të konsiderueshëm është duke u hetuar nga Policia dhe Prokuroria në Pejë, pasi një 27-vjeçare ka raportuar se i janë vjedhur 94 mijë franga zvicerane nga valixhja e saj.

Zëdhënësi i Prokurorisë Themelore në Pejë, Shkodran Nikçi në një prononcim për Telegrafin ka thënë se institucionet janë duke punuar intensivisht për të ndriçuar të gjitha rrethanat e ngjarjes.

“Në lidhje me rastin në fjalë, me t’u raportuar rasti janë ndërmarrë disa veprime në koordinim të plotë mes prokurorëve të shtetit dhe hetimeve rajonale të Policisë së Kosovës në Pejë. Aktualisht jemi duke punuar intensivisht në mënyrë që të zbardhen të gjitha rrethanat e rastit”, ka deklaruar Nikçi.

Drejtoresha e Bujqësisë dhe Zhvillimit Rural në Kryeqytet, Jeta Rafuna, ka bërë të ditur se ka marrë pjesë në nisjen e Tregut Mobil, një iniciativë që synon të afrojë prodhimet vendore me qytetarët dhe të krijojë mundësi më të mira për promovimin dhe shitjen e produkteve të fermerëve.

Përmes një postimi në Facebook, Rafuna njoftoi se aktivitetin e ka vizituar së bashku me nënkryetarin e Kryeqytetit, Florian Dushi.

“Sot, së bashku me nënkryetarin e Kryeqytetit Florian Dushi, vizituam nisjen e Tregut Mobil, një iniciativë që e afron prodhimin vendor me qytetarët dhe u krijon bujqve tanë mundësi më të mira për promovimin dhe shitjen e produkteve të tyre”, ka shkruar ajo.

Rafuna theksoi se Drejtoria e Bujqësisë dhe Zhvillimit Rural do të vazhdojë mbështetjen për fermerët dhe prodhuesit vendorë.

“Si Drejtori e Bujqësisë, do të vazhdojmë të punojmë për krijimin e kushteve sa më të mira për fermerët dhe prodhuesit vendorë, sepse besojmë se një bujqësi e fortë është themel i një Kryeqyteti të zhvilluar”, është shprehur ajo.

Drejtoresha u bëri thirrje qytetarëve që ta vizitojnë Tregun Mobil dhe të mbështesin prodhuesit vendorë përmes blerjes së produkteve të tyre.

“Ftoj të gjithë qytetarët ta vizitojnë Tregun Mobil, të zgjedhin produkte të freskëta vendore dhe përmes çdo blerjeje, të mbështesin punën e palodhshme të bujqve tanë. Së bashku, forcojmë bujqësinë vendore dhe zhvillimin e qëndrueshëm të Kryeqytetit”, ka përfunduar Rafuna.

Deputetja britanike, Alicia Kearns i ka quajtur të turpshme deklaratat e ministres serbe, Snezhana Paunoviq për spastrim etnik në Kosovë.

Ajo ka thënë se njerëzit që sot janë në të tridhjetat i kujtojnë mizoritë që forcat e Millosheviqit i kryen ndaj tyre dhe familjeve të tyre.

“Asnjë përpjekje për t’i arsyetuar, apo edhe më keq, për t’i lavdëruar këto krime nuk mund ta bëjë botën të harrojë atë që ndodhi në Kosovë. Mos harroni kurrë”, ka shkruar Kearns në X.

Këto komente ajo i ka bërë duke shpërdarë lajmin se Bashkimi Europian e ka dënuar deklaratën e ministres serbe, e cila tha se “po të ishte në vend të i Sllobodan Millosheviqit, në vitin 1998, do ta kishte spastruar etnikisht Kosovën”.

Kjo deklaratë e Paunoviq ka nxitur reagime të shumta edhe në Kosovë dhe në shumë kryeqendra tjera evropiane.

Serbian Minister Snezana Paunovic’s disgraceful support for ethnic cleansing in Kosovo is a stain on Serbia’s Government.

People in their thirties today remember the atrocities committed on them and their families by Milosevic’s forces.

No attempt to justify – or worse –…

— Alicia Kearns MP (@aliciakearns) July 15, 2026

Kryetari i Aleancës, Ardian Gjini, ka pritur në zyrat e partisë drejtoreshën e Institutit Kombëtar Demokratik (NDI) në Kosovë, ambasadoren Nancy Soderberg, me të cilën ka diskutuar për bashkëpunimin ndërmjet Aleancës dhe NDI-së, si dhe për zhvillimet aktuale politike në vend.

Gjini bëri të ditur se gjatë takimit u riafirmua gatishmëria e Aleancës për të kontribuar në formimin sa më të shpejtë të institucioneve qendrore, përmes ofertës gjashtëpikëshe të partisë.

“Shprehëm gatishmërinë e Aleancës për të kontribuar në formimin sa më të shpejtë të institucioneve qendrore përmes ofertës sonë gjashtëpikëshe, e cila i garanton Kosovës zhvillim, stabilitet dhe siguri kombëtare”, ka theksuar Gjini.

Ai po ashtu vlerësoi bashkëpunimin e kahershëm me NDI-në, duke nënvizuar se kjo organizatë ka qenë një partnere e rëndësishme në programet për fuqizimin e grave dhe të rinjve në politikë.

Në fund të takimit, Gjini e falënderoi ambasadoren Soderberg për mbështetjen e vazhdueshme të NDI-së ndaj proceseve demokratike në Kosovë, duke shprehur besimin se bashkëpunimi ndërmjet Aleancës dhe NDI-së do të vazhdojë të forcohet edhe në të ardhmen.