Category: Lajme

Lëvizja VETËVENDOSJE!, është ankuar në Gjykatën Supreme të Republikës së Kosovës, ndaj vendimit të Panelit Zgjedhor për Ankesa dhe Parashtresa (PZAP), e cila ditë më parë ka miratuar ankesën e LDK-së kundër hapjes së qendrave alternative të votimit në diasporë.

Sipas VV-së, për të pamundësuar shkeljen flagrante të ushtrimit të së drejtës së votës, e në qëllim të kthimit të ligjshmërisë, Lëvizja Vetëvendosje! kërkon nga Gjykata Supreme e Republikës së Kosovës të Anulojë Vendimin e PZAP Nr, ZP.Anr.3/2025, të datës 1 dhjetor 2025 dhe të kthejë në fuqi Vendimin e KQZ të datës 26 nëntor 2025.

“Me datën 26 nëntor 2025, Komisioni Qendror i Zgjedhjeve (KQZ) ka marrë Vendimin mbi qendrat e votimit jashtë Kosovës, numrit të vendvotimeve dhe listën e qendrave të votimit (“Vendimi”)”, thuhet në ankesë.

Sipas VV-së, Ligji për Zgjedhjet e Përgjithshme, parasheh votimin e shtetasve të Republikës së Kosovës jashtë vendit, konkretisht parasheh disa mënyra votimi për shtetasit e Kosovës jashtë vendit, si vijon: Votimi jashtë Kosovës organizohet nga KQZ-ja dhe votuesit mund të votojnë duke u përcaktuar individualisht për mënyrën e votimit, në momentin e regjistrimit përmes platformës së KQZ-së: 3.1. fizikisht, në përfaqësi diplomatike të Republikës së Kosovës apo hapësira të tyre, të cilat shndërrohen në qendra të votimit sipas kritereve të përcaktuara nga KQZ-ja për adaptimin në qendra të votimit. Kjo mënyrë votimi nuk aplikohet në zgjedhje lokale; 3.2. duke dërguar fletëvotimet përmes kutisë postare të KQZ-së, në postën e Kosovës; 3.3. duke dërguar fletëvotimet përmes postës në një nga kutitë postare të hapura nga KQZ-ja përmes dhe me lehtësimin e përfaqësive diplomatike, jashtë Kosovës”, shkruan në ankesë.

Pra, në radhë të parë Ligji për Zgjedhjet e Përgjithshme parasheh votimin jashtë Kosovës në përfaqësi diplomatike të Republikës së Kosovës apo hapësira të tyre.

“Më tutje, Ligji për Zgjedhjet e Përgjithshme definon përfaqësi diplomatike si: ambasadë, konsullatë, mision diplomatik dhe mision konsullor, që përfaqëson Republikën e Kosovës në një diplomatike. Analogjia e qendrave të votimit brenda vendit vlen edhe për hapësirat e votimit jashtë vendit. Specifikat e qendrave të votimit duhet të vlerësohen e vendosen nga KQZ në raport me mbarëvajtjen e zgjedhjeve dhe në funksion të përmbushjes së përgjegjësisë së KQZ-së si institucion për administrimin e zgjedhjeve për të pjesëmarrje në zgjedhje të votuesve me të drejtë vote”, thuhet në ankesë.

Duke shtuar se Ligji për Zgjedhje jo që nuk e ndalon, përkundrazi krijon bazë të mjaftueshme për KQZ-në për të krijuar hapësira që garantojnë qasje për votuesit.

“Edhe standardet ndërkombëtare të etabluara në opinionet e Venecias, dhe dokumentet tjera si IDEA, e afirmojnë votimin fizikisht jashtë vendit në vendvotimet e hapura për këtë synim, sikurse edhe praktikat e vendeve të shumta me infrastrukturë ligjore të njashme konfirmojnë si legjitime e të zakonshme hapjen e vendvotimeve jashtë vendit.

VV shkruan se, përderisa KQZ ka miratuar listën e vendvotimeve të propozuar nga MPJD për sa i përket përfaqësive diplomatike jashtë vendit sipas definicionit ligjor: përfaqësi diplomatike apo hapësira të tyre, “është plotësisht e palejueshme që PZAP të veprojë në kundërshtim të plotë me autorizimet ligjore dhe, përmes një keqinterpretimi ligjor, të kufizojë të drejtën elementare të votës së qytetarëve të Republikës së Kosovës me të drejtë vote”, thuhet në ankesë.

Aleanca për Ardhmërinë e Kosovës (AAK) ka bërë të ditur se në listën e saj për deputet përfshihet edhe zyrtari i Lëvizjes Vatra, Elbasan Shabani.

Ky bashkëpunim, sipas AAK-së, synon të nxjerrë në pah çështjet e shqiptarëve të Kosovës Lindore dhe të forcojë bashkëpunimin ndërkufitar dhe ndërkombëtar për të drejtat, zhvillimin ekonomik dhe integrimin e komuniteteve shqiptare në rajon.

“Shabani, banues në Gjilan, hyn në garën e 28 dhjetorit si një aktivist i njohur i kauzës së shqiptarëve të Kosovës Lindore dhe një ndër figurat më të votuara të Vatrës në dy legjislaturat e fundit. Me profesion ekonomist, ai ka punuar gjatë në ndërmarrjet publike të Gjilanit dhe aktualisht është pjesë e kabinetit të Kryetarit të Komunës. Eksperienca e tij në marketing dhe promocion e bën atë një shtesë të vlefshme për listën e AAK-së”, thuhet në njoftim.

Ministria e Punëve të Jashtme dhe Diasporës ka njoftuar se deri tani për zgjedhjet e 28 dhjetorit, kanë aplikuar rreth 42 mijë votues nga diaspora.

Afati për regjistrim përfundon pas tri ditësh.

Regjistrimi mund të bëhet online ose përmes postës, në kutinë postare të KQZ-së.

Periudha e regjistrimit ka filluar nga 26 nëntori.

Kryeministri në detyrë i Republikës së Kosovës, Albin Kurti, u ka shprehur ngushëllime familjes Bojku, pas ndarjes nga jeta të profesorit, veprimtarit dhe kryetarit të parë të Deçanit të lirë, Mehmet Bojku.

Përmes një telegram ngushëllimi, kryeministri shkroi se profesor Mehmet Bojku ishte personalitet i respektuar i arsimit, ish-i burgosur politik, udhëheqës në luftë çlirimtare dhe kryetari i parë i Komunës së Deçanit i zgjedhur në Kosovën e lirë.

“Nderi, përkushtimi dhe shërbimi i tij i sinqertë ndaj vendit kanë lënë gjurmë të pashlyeshme në historinë tonë dhe kujtesën e qytetarëve”, shkroi kryeministri Kurti.

Në emër të tij dhe të Qeverisë së Republikës së Kosovës, ai u shprehu ngushëllime familjes, miqve dhe bashkëpunëtorëve të të ndjerit, dhe të gjithë qytetarëve të Deçanit.

Telegrami i plotë i kryeministrit Kurti:

E nderuar familja Bojku,Me pikëllim të thellë morëm lajmin për ndarjen nga jeta të profesorit, veprimtarit dhe kryetarit të parë të Deçanit të lirë, Mehmet Bojku.

Profesor Mehmet Bojku ishte personalitet i respektuar i arsimit, ish-i burgosur politik, udhëheqës në luftë çlirimtare dhe kryetari i parë i Komunës së Deçanit i zgjedhur në Kosovën e lirë.

Nderi, përkushtimi dhe shërbimi i tij i sinqertë ndaj vendit kanë lënë gjurmë të pashlyeshme në historinë tonë dhe kujtesën e qytetarëve.

Në emrin tim dhe të Qeverisë së Republikës së Kosovës, u shpreh ngushëllimet më të sinqerta juve, miqve dhe bashkëpunëtorëve të të ndjerit, dhe të gjithë qytetarëve të Deçanit.

I përjetshëm qoftë kujtimi për jetën dhe veprën e Mehmet Bojkut.

U prehtë në paqe.

Sinqerisht,

Albin Kurti

Kryeministër në detyrë i Republikës së Kosovës

 

Një delegacion amerikan, i kryesuar nga i dërguari i posaçëm Steve Witkoff, u takua me presidentin rus, Vladimir Putin, dhe ndihmësit e tij për gati pesë orë në Kremlin më 2 dhjetor, për bisedime mbi një propozim për t’i dhënë fund pushtimit të plotë të Ukrainës nga Moska.

Në një ditë përpjekjesh intensive diplomatike për t’i dhënë fund konfliktit më të madh dhe më vdekjeprurës në Evropë që nga Lufta e Dytë Botërore, presidenti ukrainas, Volodymyr Zelensky, nuk ka pasur “kurrë” mundësi më të mirë se tani për ta arritur një marrëveshje.

Por, pak para bisedimeve, Putini i akuzoi qeveritë evropiane se po përpiqen ta pengojnë paqen dhe paralajmëroi se, nëse Evropa dëshiron ta nisë një luftë me Rusinë, atëherë Moska është e gatshme të luftojë.

Yury Ushakov, këshilltar i Putinit për politikën e jashtme, u tha gazetarëve pas takimit në Kremlin se “nuk jemi as më afër, por as më larg” arritjes së paqes.

“Ne nuk shtjelluam formulime të veçanta që kishin përgatitur amerikanët, por thelbin e mesazhit. Disa gjëra na përshtaten. Disa u pritën me kritika nga ne”, tha Ushakov, duke theksuar se çështjet territoriale ishin pikë veçanërisht problematike.

“Ne nuk shohim ndonjë mundësi për zgjidhjen e krizës së Ukrainës pa adresuar çështjet territoriale. Për të shënuar përparim të mirëfilltë, ka ardhur koha që si Moska ashtu edhe Uashingtoni të fillojnë të punojnë seriozisht”, shtoi ai.

Witkoff nuk komentoi duke u larguar nga takimi drejt Ambasadës së SHBA-së në Moskë.

Witkoff dhe dhëndri i presidentit amerikan Donald Trump, Jared Kushner, fluturuan për në Moskë më 2 dhjetor për t’u takuar Putinin dhe negociatorët rusë pas një propozimi fillestar 28-pikësh nga SHBA-ja.

Ai dokument – i cili kryesisht shihej si i përputhshëm me qëllimet ruse për pushtimin e plotë të Ukrainës – u “përmirësua” në 19 pika pas bisedimeve midis delegacioneve amerikane dhe ukrainase javën e kaluar.

Qeveritë evropiane gjithashtu kishin paraqitur ndryshime dhe një kundërpropozim për planin e draftit, duke synuar të hiqnin ose zbutnin dispozitat që sipas tyre cenonin sovranitetin e Ukrainës.

Por, Moska i ka hedhur poshtë këto ndryshime evropiane menjëherë dhe Ushakov tha se Putini “pa dyshim paraqiti vlerësimin e tij për rolin pengues që evropianët po e luajnë në procesin e paqes”.

Duke folur para takimit të tij me Witkoff dhe Kushner, Putin tha se Rusia është e gatshme t’i përfshijë shtetet evropiane në bisedime, në qoftë se ato e njohin atë që ai e quajti “realitetet në fushën e betejës” në Ukrainë.

Duke folur para takimit të tij me Witkoff dhe Kushner, Putin tha se Rusia është e gatshme t’i përfshijë shtetet evropiane në bisedime, në qoftë se ato e njohin atë që ai e quajti “realitetet në fushën e betejës” në Ukrainë.

“Ne nuk kemi asnjë qëllim ta luftojmë Evropën, e kam thënë këtë 100 herë”, tha Putin.

“Por, nëse Evropa dëshiron të luftojë përsëri dhe e fillon luftën, atëherë ne jemi të gatshëm për atë menjëherë”.

Bashkimi Evropian ka thënë disa herë se nuk do ta pranojë një rishikim të dhunshëm të kufijve të Evropës dhe se vetëm Ukraina mund të vendosë për të ardhmen e territorit të saj.

Putin vazhdon të ngulë këmbë se Ukraina duhet t’ia dorëzojë Rusisë rajonin lindor të Donbasit për të siguruar paqen, duke përfshirë zonat që ushtria ruse nuk ka arritur t’i pushtojë në më shumë se tri vjet e gjysmë lufte.

Kievi nuk i pranon këto kushte dhe i ka kundërshtuar përpjekjet e Moskës për t’i kufizuar shpresat e Ukrainës drejt anëtarësimit në NATO, për të vendosur kufij për madhësinë e forcave të saj të armatosura.

“Tani, më shumë se kurrë, ka mundësi për ta ndalur këtë luftë”, tha Zelensky në një konferencë për shtyp në Dublin, pas takimit me kryeministrin irlandez, Micheal Martin, më 2 dhjetor.

“Detyra jonë e përbashkët është të ndalim luftën, jo vetëm të arrijmë ndërprerjen e armiqësive. Kërkohet paqe e dinjitetshme. Për ta arritur këtë vërtet, të gjithë duhet të jenë në anën e paqes”, shtoi ai.

Sekretari amerikan i Shtetit, Marco Rubio, duke komentuar bisedimet me Rusinë për t’i dhënë fund luftës së saj në Ukrainë, tha: “Kemi bërë përparime, por ende nuk kemi arritur aty ku duhet”.

“Dhe, ajo që jemi përpjekur ta bëjmë – dhe mendoj se kemi bërë ca përparim – është të kuptojmë se me çfarë mund të jetonin ukrainasit, që t’u jepet atyre garanci sigurie për të ardhmen”, tha Rubio për Fox News në një intervistë të transmetuar më 2 dhjetor.

“Në fund të fundit, vendimet duhet të merren, në rastin e Rusisë, vetëm nga Putini, jo këshilltarët e tij. Vetëm Putini mund ta përfundojë këtë luftë nga ana ruse”, shtoi ai.

Ukraina ka shprehur hapur shqetësimin se Uashingtoni dhe Moska mund të pajtohen për një plan për të ndalur konfliktin më të madh dhe më vdekjeprurës në Evropë që nga Lufta e Dytë Botërore.

Trump bëri fushatë në vitin 2024 duke pretenduar se mund ta ndalë luftën brenda 24 orësh, por arritja e një marrëveshjeje për të ndaluar pushtimin e plotë të Ukrainës – që Moska e nisi në shkurt 2022 – del të jetë shumë e vështirë.

Trump ka shprehur pakënaqësi me të dyja palët, pasi bisedimet kanë ngecur për muaj, para se të rigjallëroheshin përsëri në javët e fundit.

Moskë ka thënë vazhdimisht se duhet patjetër ta kontrollojë të gjithë Donjeckun, një nga pesë rajonet ukrainase që Putin pretendon pa bazë se janë ruse. Dorëzimi i tokës që forcat ukrainase e kanë mbajtur larg Rusisë me kosto të madhe do të ishte një lëshim i madh nga Kievi dhe mund të ketë pasoja politike për Zelenskyn.

Ukraina frikësohet se disa nga kushtet e propozimit do ta lënë atë të ndjeshme ndaj pushtimit eventual nga Rusia, edhe pse Shtetet e Bashkuara kanë propozuar gjithashtu një garanci sigurie 10-vjeçare për Kievin.

Putin ka thënë se është i gatshëm për bisedime për paqe, por nëse Ukraina refuzon marrëveshjen, atëherë forcat ruse do të çajnë përpara dhe do të marrin më shumë toka ukrainase.

Disa nga veprimet e mëparshme të Witkoffit kanë ngritur alarme tek vëzhguesit e jashtëm, të cilët frikësohen se ai po manipulohet ose se nuk kupton thellësisht kontekstin e ndërlikuar historik të luftës.

Witkoff ka përdorur përkthyes të siguruar nga Kremlini për bisedimet e tij me Putin dhe zyrtarë të tjerë, në vend që të përdorte përkthyes të autorizuar nga Ambasada e SHBA-së.

Pas takimit të fundit të Witkoffit me Putin në gusht, zyrtarët amerikanë dhe evropianë thanë se ai nuk kishte kuptuar mirë gjeografinë e territorit ukrainas që Putin po pretendonte.

Disa media cituan burime që thanë se Witkoff dhe Kushner mund të takojnë Zelenskyn pas bisedimeve në Kremlin.

Zelensky tha se pret të marrë lajme nga ekipi amerikan menjëherë pas bisedimeve në Moskë dhe se mbetet i gatshëm të takojë Trumpin, në varësi të rezultateve të diskutimeve të 2 dhjetorit./REL

Moderatorja e njohur sportive, Laura Woods, përjetoi një moment shqetësues gjatë transmetimit live të ndeshjes miqësore të Anglisë kundër Ganës, të martën, më 2 dhjetor.

Ndërsa po prezantonte ndeshjen në panelin e ITV së bashku me Ian Wright dhe Anita Asante, 38-vjeçarja humbi ekuilibrin dhe u rrëzua papritur.

Pamjet treguan se ajo u përkul përpara, duke u mbështetur te kolegët që reaguan menjëherë për të mos e lënë të binte, por Woods ra në tokë para se kamera të ndërpritej.

Transmetimi u ndërpre menjëherë dhe u kalua në pamje të gjerë të stadiumit, e më pas në një bllok reklamash.

Shikuesit, të habitur dhe të shqetësuar, mbushën rrjetet sociale me mesazhe mbështetjeje. Komentet varionin nga lutjet për gjendjen e saj deri te falënderimet për reagimin e shpejtë të Ian Wright dhe Anita Asante që e ndihmuan në moment.

Pas rikthimit nga reklamat, rolin e saj e mori Katie Shanahan, e cila po raportonte nga terreni.

Ajo informoi publikun se Woods ishte ndjerë keq papritur, por tashmë ishte nën kujdesin e stafit mjekësor.

Komisioni Qendror i Zgjedhjeve në mbledhjen e mbajtur të mërkurën ka marr vendim për certifikimin e Nismës Socialdemokrate.

Besnik Buzhala, Drejtori i Zyrës për Regjistrim, Certifikim dhe Kontrollin Financiar të Subjekteve Politike, tha se NISMA SOCIALDEMOKRATE – NISMA, brenda afatit ka dorëzuar listën e përmirësuar me nënshkrimet e mbështetësve.

“Periudha e certifikimeve politike ka përfunduar me 30 nëntor. Subjekti politik Nisma ka përmbushur kriteret për certifikim duke dorëzuar listën e nënshkrimeve dhe mbështetësve dhe ja paguar taksën për certifikim. Lidhur me këtë zyra rekomandon që të certifikoj nismën socialdemokrate”, tha ai.

Sërish, gjyqtarët e Dhomave të Specializuara në Hagë që pritet ta marrin vendimin në rastin e krerëve të UÇK-së, kanë refuzuar të gjitha provat që dëshmojnë për krimet serbe të kryera në Kosovë.

Kjo është bërë e ditur me dy vendime të ndara për provat e mbrojtjes së Hashim Thaçit dhe Jakup Krasniqit, vendime të cilat i ka parë gazeta Nacionale.

Madje, në vendimin për provat e paraqitura nga Krasniqi, gjyqtarët duken të ‘nervozuar’ pse shumica e dëshmive të mbrojtjes, janë prova të krimeve serbe të kryera në Kosovë.

“Paraprakisht, Paneli vëren se një numër i konsiderueshëm i Provave të Propozuara shkojnë për të vërtetuar kryerjen e krimeve nga forcat serbe. Paneli deklaroi në mënyrë të përsëritur se krime të tilla nuk janë në diskutim dhe gjithashtu nuk janë në vetvete relevante për procedurat aktuale, përveç nëse mund të tregohet se ato lidhen me një fakt ose rrethanë materiale për këtë çështje. Pavarësisht këtyre indikacioneve të përsëritura, Mbrojtja ka vazhduar të kërkojë të ofrojë, ose të nxjerrë, prova të fakteve të tilla. Paneli kujton se barra e vërtetimit të rëndësisë, si me kushtet e tjera për pranim, i takon palës ofertuese. Prandaj është thelbësore që Palët dhe pjesëmarrësit të identifikojnë qartë në parashtrimet e tyre përfundimtare se në çfarë materiali mbështeten në lidhje me çështjen e tyre dhe çfarë vlere provuese dhe rëndësie i japin secilit artikull të tillë”, thuhet në këtë vendim të gjyqtarëve të Speciales, të cilët shprehen të pakënaqur pse avokatët e Krasniqit kanë prezantuar prova të krimeve serbe në Kosovë.

Si rezultat, të gjitha provat të cilat dëshmojë krimet e Ushtrisë e formacioneve tjera serbe në Kosovë, janë rrëzuar, pra nuk janë pranuar në proces.

“Duke iu kthyer Provave të Propozuara 2, 4, 6, 8, 9, 12, 13, 26, 31 dhe 34, Trupi Gjykues vëren pohimin e Mbrojtjes se ato pretendojnë të jenë provuese të krimeve të kryera nga shteti serb dhe formacionet paraushtarake, si dhe ilustrojnë tensionet ndërpersonale midis civilëve, shënjestrimin e shqiptarëve nga serbët dhe armatosjen e popullsisë civile nga shteti serb. Pasi i shqyrtoi këto pika, Trupi Gjykues vëren se ato pretendojnë të jenë relevante për të treguar krimet serbe dhe se Serbia po fabrikonte prova ose po manipulonte hetimet. Megjithatë, Trupi Gjykues kujton se provat e krimeve të dyshuara të kryera nga forcat serbe në përgjithësi janë të parëndësishme për akuzat kundër të Akuzuarit. Mbrojtja nuk ka arritur të vërtetojë se incidentet e përshkruara në këto pika janë të lidhura në ndonjë mënyrë tjetër me ndonjë nga akuzat në Aktakuzë. Në mënyrë të ngjashme, Prova e Propozuar 16, e cila ofron një analizë krahasuese të kapaciteteve ushtarake të forcave serbe dhe të UÇK-së, nuk ka lidhje të dukshme me çështjen”, thuhet në këtë vendim.

Ngjashëm, me të njëjtën arsye, janë refuzuar edhe një pjesë e provave të paraqitura nga mbrojtja e Hashim Thaçit. Me të njëjtin arsyetim. Për gjyqtarët, provat e krimeve serbe, janë të parëndësishme.

“ZPS-ja kundërshton Provat e Propozuara 9-15, 18, 20, 22-24, 26, 34, 35, 37 dhe 39-42 të Shtojcës. Në veçanti, ZPS-ja pohon se Provat e Propozuara 9 dhe 37 të Shtojcës 1 janë tepër të gjata dhe nuk jepet asnjë shpjegim që do të justifikonte pranimin e të gjitha faqeve.44 Lidhur me Provat e Propozuara 12, 13 dhe 17 të Shtojcës 1, ZPS-ja pohon se ato janë paraqitur pa faqe kopertine dhe janë dhënë informacione të paplota burimore. Pasi i shqyrtoi këto pika, Paneli vëren se të gjitha ato lidhen me krime të supozuara të kryera nga forcat serbe kundër shqiptarëve etnikë ose listojnë viktima të krimeve të supozuara të kryera nga forcat serbe. Ndërsa këto pika kanë të bëjnë me vendet e listuara në aktakuzë (“Aktakuzë”), krimet ose faktet e përshkruara në të nuk janë ndryshe relevante për krimet e akuzuara në rastin aktual. Mbrojtja nuk ka arritur të shpjegojë rëndësinë e tyre për ndonjë fakt ose rrethanë të rëndësishme për këtë çështje. Prandaj, Paneli konstaton se Mbrojtja nuk ka arritur të vërtetojë rëndësinë e këtyre Provave të Propozuara.”, thuhet në vendim.

Disa prej provave të cilat gjqytarët i kanë pranuar, ndërlidhen me kontekstin historik në Kosovë, fakt të cilin gjyqtarët e kanë vlerësuar si të rëndësishëm.

“Për më tepër, në lidhje me Shtojcën 1 Provat e Propozuara 1, 3, 19, 21, 23, 24, 26 dhe 29, Paneli konsideron se Mbrojtja e Thaçit nuk e ka artikuluar qartë rëndësinë e këtyre pikave, përveçse ka deklaruar se ato janë relevante për kontekstin historik të konfliktit të armatosur, ekzistencën e një konflikti të armatosur, ose lëvizjen e refugjatëve nga Shqipëria në Kosovë. Megjithatë, Paneli, duke ushtruar diskrecionin e tij, konsideron se sfondi historik mund të jetë paksa i rëndësishëm për çështjen, pasi ofron informacione mbi, ndër të tjera, bashkëveprimin midis figurave të ndryshme politike, përpjekjen e shqiptarëve të Kosovës për pavarësi, luftimet midis UÇK-së dhe forcave serbe në Drenicë në vitin 1998. Është pritje e Panelit që Mbrojtja e Thaçit do të shpjegojë në detaje më të mëdha rëndësinë e këtyre pikave për çështjen e saj në dosjen e saj përfundimtare të gjyqit, ose në parashtrimet përfundimtare. Paneli është i kënaqur, me paralajmërimin e përmendur më sipër, se Shtojca Provat e Propozuara 1, 3, 17, 19, 21, 24 dhe 29 janë relevante për aspekte të caktuara të akuzave, si dhe për faktet dhe rrethanat materiale për çështjen”, thuhet në vendim.

Gjykimi në rastin e krerëve të UÇK-së, tashmë janë në fazën e fundit.

Edhe zyrtarisht, mbrojtjet e Hashim Thaçit dhe Jakup Krasniqit e kanë njoftuar trupin gjykues në Speciale, se po i mbyllin çështjet e tyre. Pra, nuk ka më dëshmitarë e as prova.

Në parashtresat e publikuara të cilat i ka parë Nacionale specifikohet se më nuk ka asnjë dokument që do të paraqitet.

“Në përputhje me Urdhrin e Trupit Gjykues, Mbrojtja e Z. Hashim Thaçi konfirmon me anë të kësaj se, në këtë fazë, nuk ka më dëshmitarë për t’u thirrur dhe asnjë material tjetër provues për t’u paraqitur si pjesë e çështjes së Mbrojtjes. Rrjedhimisht, në përputhje me Rregullin 131 të Rregullores, Mbrojtja e mbyll çështjen e saj. Megjithatë, ky njoftim nuk cenon asnjë ndihmë të përshtatshme që Mbrojtja mund të kërkojë në lidhje me çështjet e provave që mbeten pezull para Trupit Gjykues”, thuhet në parashtresë.

Ngjashëm, thuhet edhe në parashtresën e mbrojtjes së Jakup Krasniqit.

“Mbrojtja e Jakup Krasniqit nuk ka ndërmend të thërrasë më shumë dëshmitarë ose të paraqesë ndonjë material tjetër provues si pjesë të çështjes së saj. Rrjedhimisht, në përputhje me Rregullin 131 të Rregullores, dhe Urdhrin e Trupit Gjykues, Mbrojtja e Krasniqit me anë të kësaj mbyll çështjen e saj. Ky Njoftim nuk cenon asnjë ndihmë të përshtatshme që Mbrojtja e Krasniqit mund të kërkojë në lidhje me çështjet e provave që mbeten pezull para Trupit Gjykues”, thuhet në parashtresë.

Anëtari i Lëvizjes Vetëvendosje, Armend Muja, është deklaruar rreth pretendimeve që më 28 nëntor, Kosova importoi energji elektrike nga Serbia.

Në një konferencë për media, Muja ka shpalosur të dhënat përmes të cilave thotë se ardhja e NOA-s në tregun energjetik në Kosovë daton që nga viti 2017.

Pikë e parë është akuza se me 28 nëntor Kosova po importon energji elektrike nga Serbia. Qytetarë të nderuar, kjo është e pavërtetë. Në fakt, që nga koha kur kemi ardhë ne, nga 2008 deri diku kur ne kemi ardhë në pushtet është importi i energjisë elektrike nga Serbia.

Po, Kosova ka dominuar, importi i energjisë elektrike ka qenë privalent dhe furnitorët nga Serbia kanë qenë dominues deri në kohën kur ne kemi ardhë në pushtet, qoftë përmes kontratave të drejtpërdrejta që i kanë nënshkruar akterët e KEK-ut, akterë që sot dalin në intervista dhe akuzojnë për energji… dhe pastaj nga 2020 e këndej. Sllovenia, dhe në 3-4 vitet e fundit Shqipëria dhe Maqedonia e Veriut dhe Danimarka, përbëjnë 94-95 për qind të gjithë importit të energjisë elektrike.

Pra vendi kah po buron energjia elektrike është Shqipëria, Maqedonia e Veriut dhe Danimarka. Pjesëmarrja e Serbisë në tregun gjatë importit të energjisë elektrike më 2025 është më pak se 1 për qind. Këto janë të dhëna që i kemi marrë deri dje. Për ju që dëshironi ta verifikoni…ajo çka ju siguroj është se importi nga Serbia është më pak se 1 për qind”, tha Muja.

Ai tha se gjatë kohës së hulumtimit të kontratave u interesuan të dijnë se kush i nënshkroi ato.

“Ne na interesoi se kush nënshkroi kontratë me NOA-n. Kontrata u nënshkrua më 2019, nga KEK-u dhe NOA, teksa e dyta më 2021, nga kryeshefi ekzekutiv i KEK-ut, Përparim Kabashi, katër ditë para se të merrte këtë detyrë Nagip Krasniqi”, u shpreh Muja.

Ai thotë se Kabashi ka qenë i deleguar nga LDK-ja, si në bord të ZRRE-së, ashtu edhe në KEK.

“Në bazë të vështrimit tonë, faturë për faturë, kontratat e para me Vukhamoviç, me lejoni të pyes kolegen e LDK-së, për kontratat e nënshkruara gjatë shpalljes së pavarësisë së Kosovës”.

Muja thotë se nga viti 2008 e deri më 2013, është nënshkruar kontrata në vlerë prej 141 milionë eurosh, me kompaninë e Vuk Hamoviqit.

“Subjekti që nënshkroi kontratë në vitin 2019 me Vuk Hamoviqin vazhdon të jetë i njëjtë”, shtoi Muja.

Ai thotë se dëmi që i është shkaktuar Kosovës nga këto kontrata kap vlerën e afro 400 milionë eurove.

Të gjitha dokumentet që posedojnë për vendimet mbi blerje të energjisë, Muja thotë se LVV-ja do t’i publikojë menjëherë, duke lutur Prokurinë e Shtetit që t’i marrë në pyetje ish-përgjegjësit e KEK-ut, në kohën e pazareve me Vuk Hamoviqin.