Vërshimet e ditëve të fundit në Kosovë kanë zënë vend edhe në mediat e huaja, përfshirë edhe Sky Neës Australia.
Ky televizion ka raportuar se reshjet e dendura të shiut kanë shkaktuar vërshime dhe ndërprerje të energjisë elektrike.
Po ashtu Sky Neës Australia ka përmendur edhe ndërprerjet e ujit.
Anëtarja e LDK-së, Shqipe Pantina, ka pasur kritika për organizimin e brendshëm në parti, pas rezultatit zgjedhor të 28 dhjetorit që nxori LDK-në të tretën, me rënie të konsiderueshme në vota.
Sipas saj, partia humbi orientimin duke u marrë ekskluzivisht me opozitë ndaj Kurtit dhe duke lënë anash alternativën që duhet t’u ofronte qytetarëve.
“Pse ekziston një parti politike? A ekziston veç me i bo opozitë një partie që është në pushtet apo ekziston për shkak se ti përfaqëson diçka, i përfaqëson disa vlera, i përfaqëson disa parime. Këtu ka qenë huqja edhe e LDK-së, sepse u fokusuan shumë me i bo opozitë Kurtit, duke harruar vlerat që ata i përfaqësojnë. Në rregull është, opozitën duhesh ta bësh. Për një qytetar, një votues që nuk i përket asnjë subjekti politik dhe po pajtohet që Kurti nuk po qeverisë mirë, ai do me pa se çka i ofron t’i ndryshe, cila është alternativa? Kritika që unë e kam për subjektin tim, jashtë fushatës, kur është hera e fundit që kryetari, nënkryetarët, kryesia e kanë vizitu një nëndegë?”, ka pyetur Pantina, duke goditur direkt mungesën e punës në terren.
Pantina ka thumbuar projektin e kryetarit Lumir Abdixhiku për reformimin e partisë. Ajo e quajti procesin të gabuar pasi, sipas saj, u tentua eliminimi i strukturave të vjetra për t’u dhënë pozita udhëheqëse personave pa përvojë politike.
“Reforma është lënë në gjysmë. Nuk mund të bësh reformë duke larguar strukturat e vjetra. I është dhënë hapësirë dikujt që nuk e njeh LDK-në dhe vjen nga fusha krejt tjera, duke krijuar rezistencë te anëtarësia”, u shpreh ajo në Debat Plus.
Këto deklarata nuk i kanë pëlqyer Sokol Havollit, i cili ishte po ashtu kandidat për deputet.
Ai e ka sulmuar Pantinën duke e akuzuar për goditje pas shpine ndaj partisë.
“Çka të duhen kundërshtarë politikë kur disa janë brenda? Shqipe Pantina pas çdo dështimi politik personal, sonte ia dha edhe një goditje LDK-së. A je mirë? Apo kaq të ka mjaftu? Pfff…”, ka shkruar Havolli.
Sipas rezultateve aktuale ndërsa po vazhdon numërimi edhe i një pjese të votave me postë, Lidhja Demokratike e Kosovës pritet t’i ketë 14 deputetë në Kuvend.
Një qytetar në Malin e Zi e ka marrë me sportivitet situatën e përmbytjeve dhe është ulur jashtë lokalit për të pirë një kafe me ujin që i kishte arritur deri në gjunjë.
“Populli ynë nuk dorëzohet, nuk e ndalin as përmbytjet e as moti i keq… as kur noton deri te tavolina, me ujin deri në gjunjë, por kafeja duhet patjetër të pihet. Ne jemi mësuar me gjithçka, mjafton që kafeja të jetë aty”, ka shkruar i njëjti në profilin e tij në Instagram.
SBASHK-u derisa ka përkrahur vendimin për shtyrjen e fillimit të gjysmëvjetorit të dytë deri me 12 janar, por thekson se kjo situatë me përmbytjet dëshmon se infrastruktura shkollore mbetet e pambrojtur dhe se reagimi institucional shpesh vjen vetëm pas presionit dhe shqetësimit publik.
SBASHK-u në një reagim ka bërë thirrje urgjente që të bëhen inspektime në të gjitha shkolla, vlerësim real sanim i menjëhershëm të dëmeve dhe transparencë institucionale. Po ashtu ata kanë paralajmëruar se nuk do të lejojnë kthimin në procesin mësimor pa u garantuar kushte të sigurta pune dhe mësimi.
Reagimi i plotë:
REAGIM i SBASHK-ut
Reshjet e shumta të shiut dhe përmbytjet e ditëve të fundit kanë krijuar rrezik serioz për sigurinë në shumë shkolla dhe për familjet e punëtorëve të arsimit. Kjo situatë ka dëshmuar edhe një herë se infrastruktura shkollore mbetet e pambrojtur dhe se reagimi institucional shpesh vjen vetëm pas presionit dhe shqetësimit publik.
SBASHK-u përkrah vendimet e disa drejtorive komunale të Arsimit, si edhe vendimin e MASHTI-t për shtyrjen e fillimit të gjysmëvjetorit të dytë deri më 12 janar 2026, duke vlerësuar se siguria e nxënësve dhe punëtorëve të arsimit duhet të jetë mbi çdo interes tjetër.
Megjithatë, shtyrja e mësimit nuk është e mjaftueshme nëse nuk shoqërohet me veprime konkrete.
SBASHK-u KËRKON URGJENTISHT:
Inspektime të menjëhershme dhe të detajuara në të gjitha shkollat;
Vlerësim real të gjendjes së objekteve shkollore;
Sanim të menjëhershëm të dëmeve dhe eliminim të çdo rreziku për nxënësit dhe mësimdhënësit;
Transparencë dhe përgjegjësi institucionale.
Në veçanti kërkojmë inspektime urgjente në komunat më të prekura nga përmbytjet, si:
Drenasi, Malisheva, Suhareka, Fushë-Kosova, Klina, Gjakova, Dragashi dhe komunat e tjera ku janë raportuar dëme serioze.
PARALAJMËRIM SINDIKAL:
SBASHK-u nuk do të lejojë kthimin në procesin mësimor pa u garantuar kushte të sigurta pune dhe mësimi. Nëse institucionet përgjegjëse dështojnë të veprojnë me kohë dhe seriozitet, SBASHK-u do të ndërmarrë veprime sindikale, në mbrojtje të jetës, shëndetit dhe dinjitetit të anëtarësisë së saj.
Siguria nuk negociohet.
SBASHK-u, në mbrojtje të punëtorëve të arsimit.
Një person në Ferizaj nuk i është shenjës stop të dhënë nga policia, dhe i njëjti ka vazhduar lëvizjen me veturë duke shkaktuar aksident trafiku, shkruan Reporteri.net.
17-vjeçari me veturën e tipit Golf, është përplasur me një veturë tjetër, dhe pas verifikimit ka rezultuar se i njëjti nuk posedon patentë shofer dhe se veturën e kishte me afat regjistrimi të skaduar.
Ndaj tij janë shqiptuar tri gjoba, në vlerë, 150, 250 dhe 200 euro, si dhe është inicuar rast për në gjykatë.
KOMUNIKATË PËR MEDIA:
Një person nuk i ndalet patrullës së policisë dhe shkakton aksident trafiku në Ferizaj
Njësitë e Komunikacionit Rrugor në Ferizaj kanë ndërmarrë veprime ndaj një personi për disa kundërvajtje në trafik.
Më datë 05.01.2026, në rrugën “Rexhep Bislimi” në Ferizaj, personi E.A. (17 vjeç), duke lëvizur me automjetin VW Golf me targa vendore, nuk është ndalur në shenjën stop të dhënë nga policia.
Më pas, duke vazhduar lëvizjen, në rrugën magjistrale në fshatin Bibaj të Ferizajt, ka shkaktuar aksident trafiku me dëme materiale, duke u përplasur me një automjet tjetër.
Gjatë verifikimit të dokumentacionit, është konstatuar se i dyshuari nuk posedonte patentë shoferi, ndërsa automjeti që drejtonte ishte i paregjistruar, me afat regjistrimi të skaduar që nga 13.10.2024.
Për këto kundërvajtje, policia ka ndërmarrë këto masa:
-150 euro gjobë për mosndalje në shenjën “STOP” të policisë
-250 euro gjobë për shkaktim të aksidentit të trafikut
– 200 euro gjobë për drejtim të automjetit me afat të skaduar të regjistrimit
– Është inicuar rast për gjykatë për kundërvajtje për drejtim të automjetit pa patentë shoferi, si dhe automjeti është konfiskuar përkohësisht.
Policia Rajonale e Ferizajt apelon tek të gjithë qytetarët që të mos drejtojnë automjete pa patentë shoferi dhe të respektojnë rregullat e trafikut, me qëllim të rritjes së sigurisë për të gjithë pjesëmarrësit në komunikacion.
Bekim Jashari, anëtari i familjes historike nga Prekazi, ka reaguar ndaj deklaratave të analistit Nexhmedin Spahiu, i cili të martën kërkoi distancimin e familjes nga flamuri kombëtar.
Ai ka publikuar një fotografi ku shfaqet bashkë me Besarta Jasharin, të shoqëruar me një mesazh.
“Amanet na e lanë të parët, brez pas brezi e djalë pas djali. Me gjakun dhe sakrificën e tyre u rritëm ne, për të ta mbajtur lart me krenari. Valo, o flamuri më i bukur në botë,” ka shkruar Bekim Jashari.
Ky reagim vjen pas deklaratës së Spahiut, i cili tha se Murat Jashari, për t’u zgjedhur president, do të duhej të merrte “aprovim amerikan” dhe të distancohej nga simbolika e flamurit kuq e zi, duke theksuar se në varrezat e heronjve të Kosovës duhet të valojë vetëm flamuri i Kosovës.
Deputeti i zgjedhur i LDK-së, Avdullah Hoti, ka thënë se vitit 2026 ka nisur me tarifa të rritura të ujit dhe kanalizimeve.
Ai ka theksuar se në regjionin e Prishtinës rritja është 43.85% për amvisëri dhe 40.01% për biznese.
“Viti 2026 nis me tarifa të rritura të ujit dhe kanalizimeve. Në regjionin e Prishtinës, rritja është 43.85% për amvisëri dhe 40.01% për biznese. Në anën tjetër, furnizimi me ujë nuk është përmirësuar mjaftueshëm, humbjet e ujit në rrjet mbesin të larta, kompanitë e ujësjellësit vazhojnë të kenë raporte të auditimit me plot vërejtje substanciale. Brenda këtyre tarifave të rritura paguhet edhe për derdhjen e ujërave të zeza, por ato ujëra të zeza nuk trajtohen. Ato derdhen në lumenj”, ka shkruar Hoti, duke paralajmëruar edhe shtrenjtim tjetër të energjisë elektrike.
“Në prill pritet të shqyrtohet rritja e sërishme e energjisë elektrike. Tatimi në pronë për biznese sivjet nis me rritje substanicale gjithashtu”, ka shkruar ai.
Reshjet intensive të orëve të fundit kanë shkaktuar rritje të ndjeshme të nivelit të ujit në lumin Starovë dhe lumin Vërdovë, ku ekziston mundësia që të dalin nga shtratit.
Në terren janë vendosur forca të shtuara punonjësish, ndërsa situata po monitorohet nga strukturat përkatëse, të cilat janë në gatishmëri për të ndërhyrë në rast se niveli i ujërave vazhdon të rritet.
Edhe lumi i fshatit Rrëmenj ka dalë nga shtrati, duke shkaktuar një situatë serioze dhe shqetësuese për banorët e zonës.
Autoritetet u bëjnë thirrje banorëve të zonave përreth lumenjve të tregojnë kujdes të shtuar dhe të ndjekin me vëmendje udhëzimet e institucioneve.
Deri në këto momente, Pogradeci mbetet bashkia më problematike sa i përket situatës së motit dhe përmbytjeve.
Presidentja e Republikës së Kosovës, Vjosa Osmani, ka uruar besimtarët ortodoksë për Krishtlindjen.
Nëpërmjet një postimi, Osmani ka uruar paqe, shëndet dhe harmoni në familjet e të gjithë qytetarëve.
“Duke u uruar qytetarëve tanë të krishterë ortodoksë në Kosovë dhe besimtarëve ortodoksë në mbarë botën, një Krishtlindje të bekuar dhe paqësore.
Sjelltë kjo ditë e shenjtë paqe, shëndet të mirë dhe harmoni në familjet tuaja. Krishtlindjet na kujtojnë vlerat e qëndrueshme të dashurisë, solidaritetit dhe respektit për njëri-tjetrin. Këto vlera fitojnë kuptim kur reflektohen në veprimet tona të përditshme. Gëzuar Krishtlindjet Ortodokse!” shkroi Osmani.
Kompania Rajonale Ujësjellësi “Mitrovica” ka njoftuar se vazhdon të jetë ketë ndërprerje të ujit për shkak të nivelit të turbullshmërisë në kanalin Ibër–Lepenc.
Në njoftim bëhet thirrje që mos të përdoret për pije uji që eventualisht mund të arrijë në rrjet.
“Ju njoftojmë se niveli i turbullshmërisë në kanalin Ibër–Lepenc vazhdon të jetë mbi kufijtë e lejuar për trajtim të sigurt të ujit, për çka Impiantet për Trajtimin e Ujit të Pijes nuk mund të operojnë. Edhe pse gjatë orëve të mbrëmjes është vërejtur një rënie e përkohshme e turbullshmërisë dhe janë bërë përpjekje për rifillimin e trajtimit të ujit, situata ka ndryshuar sërish dhe niveli i turbullshmërisë ka shënuar rritje, duke e bërë të pamundur vazhdimin e procesit të trajtimit dhe shpërndarjes së ujit për konsum. Si pasojë, furnizimi me ujë të pijes mbetet i ndërprerë, ndërsa uji që eventualisht mund të arrijë në rrjet NUK duhet të përdoret për pije, por vetëm për qëllime higjienike dhe teknike, deri në një njoftim të radhës”, njofton Kompania Rajonale Ujësjellësi “Mitrovica”.
Më tej kanë njoftuar se “Ekipet tona janë në monitorim të vazhdueshëm të gjendjes dhe parametrave të ujit, dhe rifillimi i trajtimit do të bëhet menjëherë sapo kushtet teknike ta lejojnë këtë. Për çdo risi, ndryshim apo zhvillim të mëtejmë të situatës, konsumatorët do të informohen në kohë reale, përmes kanaleve tona zyrtare të komunikimit”.