Prokuroria Themelore e Prishtinës, bashkë edhe me Policinë e Kosovës po e zhvillojnë një aksion.
Kjo u konfirmua nga zëdhënësja Kaltrina Shala.
“Po është duke u zhvilluar ndaj katër personave, dy nga ta për keqpërdorim të pozitës zyrtare dhe dy të tjerë për marrje të ryshfetit”, tha Shala.
“Për informacione të tjera do t’ju njoftojmë me kohë”, theksoi ajo për KlanKosova.
Kandidati për deputet nga PDK, Nait Hasani, i cili pësoi ndryshim votash teksa po ndodh rinumërimi në 914 vendvotime, ka thënë se votat e tij janë rritur në mënyrë të padrejtë e duke e përdorur emrin e tij për manipulime.
Ai përmes një postimi në Facebook ka shkruar se nuk hyrë në politikë për të fituar me mashtrime por për të fituar me besim dhe se nuk ka nevojë për vota të vjedhura.
Ai bën thirrje që të hetohet çdo votë.
Postimi i tij i plotë:
Reagim politik në mbrojtje të dinjitetit tim dhe të votës së qytetarëve.T
Të nderuar qytetarë,
Në zgjedhjet parlamentare të 28 dhjetorit 2025 është cenuar rëndë vullneti i lirë i qytetarëve dhe është sulmuar drejtpërdrejt dinjiteti im politik dhe kombëtar.
Me atë që pash në rinumrim, votat e mia janë rritur në mënyrë të padrejtë, duke u përdorur emri im për manipulime të papranueshme zgjedhore.
Ky veprim përbën jo vetëm shkelje ligjore, por edhe akt të rëndë moral dhe politik.Unë refuzoj kategorikisht çdo votë që nuk buron nga vullneti i lirë i qytetarit.
Nuk kam hyrë në politikë për të fituar me mashtrime, por për të fituar me besim. Nuk kam nevojë për vota të vjedhura, sepse respektoj votën e ndershme më shumë se çdo rezultat.
Drejtësia nuk duhet të heshtë. As unë nuk do të hesht.Unë do të vazhdoj të qëndroj në anën e qytetarëve, në anën e votës së lirë dhe në anën e së vërtetës, edhe nëse kjo rrugë është më e vështirë.
Ky reagim nuk është për të mbrojtur vetëm emrin tim, por për të mbrojtur të ardhmen demokratike të Kosovës.
Qendra Emergjente në Qendrën Klinike Universitare të Kosovës gjatë dy ditëve të fundjavës është përballur me një fluks të lartë pacientësh, duke trajtuar gjithsej rreth 900 raste.
Sipas ShSKUK-së kjo është një ngarkesë të jashtëzakonshme të punës.
Nga këto raste 61 kanë qenë nga aksidentet në komunikacion.
“Në këtë periudhë janë ofruar shërbime emergjente të natyrave të ndryshme, përfshirë 194 raste reanimimi, 302 trajtime internistike, 183 raste ortopedike, 137 raste kirurgjike si dhe 33 raste që kanë kërkuar intervenime të vogla. Ndërsa 61 prej tyre kanë qenë raste të aksidentuara. Të gjitha këto shërbime janë realizuar nga ekipet e mjekëve specialistë dhe infermierëve të Qendrës Emergjente”, thuhet në njoftim.
Sipas ShSKUK-së një pjesë e konsiderueshme e pacientëve janë paraqitur drejtpërdrejt në Qendrën Emergjente, duke anashkaluar shërbimet shëndetësore parësore dhe dytësore.
“Qendra Klinike Universitare e Kosovës u bën thirrje qytetarëve që rastet jo emergjente të drejtohen fillimisht në qendrat e mjekësisë familjare apo në spitalet rajonale .Qendra Emergjente duhet të mbetet e rezervuar për rastet serioze dhe kërcënuese për jetën. Bashkëpunimi i qytetarëve është thelbësor për të mundësuar ofrimin e kujdesit shëndetësor në kohën e duhur për pacientët që janë në rrezik të drejtpërdrejtë për jetën”, thuhet në njoftim.
Presidenti kilian, Gabriel Boric ka shpallur gjendje katastrofe në dy rajone ku zjarret vdekjeprurëse kanë lënë të paktën 18 të vdekur.
Më shumë se 50,000 njerëz janë evakuuar gjithashtu në rajonet Nuble dhe Biobio, rreth 500 km në jug të kryeqytetit Santiago, raporton BBC.
Boric tha se numri i të vdekurve pritet të rritet.
Zjarri më i rrezikshëm ka përfshirë pyjet e thata që kufizohen me qytetin bregdetar të Concepcion. Rreth 250 shtëpi janë shkatërruar, thanë zyrtarët e fatkeqësive.
Komisioni Qendror i Zgjedhjeve (KQZ) do të mbajë sot (e hënë, 19 janar 2026), në ora 13:30, mbledhjen e radhës, ku në rend dite do të jetë raporti mbi procesin e deritanishëm të rinumërimit të vendvotimeve.
Kjo mbledhje vjen në kohën kur dyshimet për manipulim të votave kanë nxitur reagime të forta nga subjektet politike dhe kërkesa të shumta për rinumërim të plotë dhe hetime nga organet e drejtësisë.
Mospërputhjet më të mëdha janë evidentuar në komunën e Prizrenit, duke ngritur shqetësime serioze për keq numërim gjatë procesit fillestar.
Sipas zëdhënësit të KQZ-së, Valmir Elezi, KQZ mund të marrë një vendim të ri për të zgjeruar rinumërimin në komunat e tjera, në varësi të gjetjeve që dalin gjatë procesit aktual të rinumërimit.
Deri më tani, procesi i rinumërimit është duke u zhvilluar në Qendrën e Numërimit dhe Rezultateve (QNR).
Sipas të dhënave zyrtare, deri në orën 07:15, janë rinumëruar 556 vendvotime nga gjithsej 914, ndërsa pritet që KQZ të prezantojë detaje shtesë lidhur me gjetjet dhe hapat e mëtejmë gjatë mbledhjes së sotme.
Procesi gjyqësor në rastin e ish-krerëve të UÇK-së po shkon drejt fundit.
Sot, në Hagë do të dorëzohen dosjet përfundimtare.
Prokuroria, avokati i viktimave dhe ekipet mbrojtëse të Hashim Thaçit, Kadri Veselit, Rexhep Selimit dhe Jakup Krasniqit do t’i dorëzojnë dosjet përkatëse trupit gjykues.
Pas dorëzimit të dosjeve, pason fjala përfundimtare, e cila pritet të mbahet nga 9 deri më 18 shkurt, me ç’rast më pas procesi gjyqësor ndaj Thaçit, Veselit, Selimit e Krasniqit, konsiderohet edhe zyrtarisht i mbyllur.
Katërshja e Ushtrisë Çlirimtare të Kosovës ndodhen në Hagë nga nëntori i 2020-tës, duke mos iu ofruar asnjë mundësi lirimi nga paraburgimi deri në këtë fazë të procedurës.
Pas përfundimit të fjalëve përfundimtare, gjykatësit do të kenë një afat prej tre muajsh për të shpallur vendimin e shkallës së parë, me mundësi shtyrjeje edhe për dy muaj të tjerë.
Policia e Shtetit shqiptar njoftoi se ka arrestuar dy persona, banues në Tiranë, pasi ishin shpallur në kërkim nga Misioni i OKB-së në Kosovë, UNMIK, të akuzuar për trafikim të qenieve njerëzore.
Arrestimi i tyre është bërë në Tiranë, dhe ata pritet të esktradohen në Kosovë.
“Në qytetin e Tiranës, u bë kapja dhe ndalimi i shtetasve R. B. dhe G. H., banues në Tiranë. Këta dy shtetas ishin të shpallur në kërkim ndërkombëtar, pasi Përfaqësuesi Special i Sekretarit të Përgjithshëm të UNMIK/Kosovë, më datë 13.01.2026, ka lëshuar urdhër arresti ndërkombëtar për këta dy shtetas, si të dyshuar për kryerjen e veprave penale “Pjesëmarrje ose organizim i grupit të strukturuar kriminal”, në fushën e trafikimit të qenieve njerëzore, parashikuar nga Kodi Penal i Kosovës”, tha policia.
Procesi i rinumërimit të votave ka bërë që shumë prej kandidatëve për deputetë të humbasin numër të konsiderueshëm të votave nga rezultatet e para.
Nga LVV deri më tani, Arbër Rexhaj ka – 628 vota, Rea Krasniqi -545 vota, Dafina Alishani -465 vota, Valon Ramadani -432 vota, Mytaher Haskuka -280 vota.
Kurse nga Partia Demokratike më së shumti që ka humbur vota është, Fetah Paçarizi -6,010 vota dhe nga gjithë kandidatët për deputetë. Pas tij janë Nait Hasani -3,409 vota, Kujtim Gashi -2,360 vota, Luljeta Veselaj – Gutaj -2,102 vota, Xhemshit Krasniqi -413 vota.
Kurse nga LDK në pesëshen që kanë humbur më së shumti vota nga rinumërimi janë: Xhavit Uka -1,597 vota, Driton Selmanaj -1,047 vota, Anton Quni -535 vota, Visar Azemi -415 vota, Ardian Shala -155 vota.
Kurse nga AAK më së shumti vota ka humbur, Besnik Krasniqi -316 vota, Tringa Morina -163 vota, Burim Ramadani -153 vota, Edmond Hoxha -137 vota dhe Diellza Fetoshi -103 vota.
Instituti Hidrometeorologjik i Kosovës njofton se të hënën moti do të jetë i vranët dhe me intervale me diell.
Temperaturat minimale do të jenë -9 deri -7°C, ato maksimale -1 deri 3°C.
Në disa vende mund të ketë ngrica dhe mjegull, andaj IHMK ka bërë thirrje për kujdes në trafik.
Një grua është gjetur pa shenja jete në Fushë Kosovë.
Sipas raportit zyrtar të Policisë së Kosovës, rasti është evidentuar më 18.01.2026 rreth orës 11:00, kur është raportuar se një viktimë femër kosovare është gjetur pa shenja jete. Menjëherë në vendin e ngjarjes kanë dalë njësitë relevante policore, ndërsa ekipi mjekësor ka konstatuar vdekjen e viktimës.
Me vendim të prokurorit të shtetit, trupi i pajetë është dërguar në Institutin e Mjekësisë Ligjore (IML) për t’iu nënshtruar obduksionit, me qëllim të sqarimit të rrethanave të vdekjes. Hetimet lidhur me rastin janë duke vazhduar.