Category: Lajme

Kryetari i Prishtinës, Përparim Rama, ka reaguar lidhur me zhvillimet në raportet ndërmjet Shteteve të Bashkuara të Amerikës me Kosovën dhe Serbinë, duke ngritur shqetësime për, siç e ka cilësuar ai, “izolimin strategjik” të Kosovës.

Në një postim në Facebook, Rama ka krahasuar nisjen e Dialogut Strategjik ndërmjet SHBA-së dhe Serbisë me pezullimin e Dialogut Strategjik ndërmjet SHBA-së dhe Kosovës.

“Brenda pak ditësh, Shtetet e Bashkuara artikuluan qartë prioritetet e tyre në raport me Serbinë dhe Kosovën. Me Serbinë nisi Dialogu Strategjik, niveli më i lartë i bashkëpunimit dypalësh”, ka shkruar Rama.

Sipas tij, në kuadër të këtij dialogu janë përfshirë fusha si energjia, siguria energjetike, investimet në infrastrukturë, rrjeti 5G, mbrojtja, arsimi, shkenca dhe teknologjia.

“Ndërkohë, mesazhi për Kosovën ishte krejt i kundërt! Departamenti Amerikan i Shtetit deklaroi se Dialogu Strategjik me Kosovën mbetet i pezulluar”, ka deklaruar Rama.

Kryetari i Prishtinës ka përmendur edhe deklaratat e ish-ambasadorit amerikan në Kosovë, Jeffrey Hovenier, i cili sipas tij ka paralajmëruar për dëmtimin e reputacionit të Kosovës në Uashington.

“Këto janë qëndrime zyrtare të aleatit më të rëndësishëm të Republikës së Kosovës dhe, si të tilla, janë shumë shqetësuese për të ardhmen e shtetit të Kosovës dhe të qytetarëve të saj”, ka shkruar Rama.

Ai ka kërkuar nga kryeministri i Kosovës që të japë sqarime për situatën aktuale në marrëdhëniet me SHBA-në.

“Prandaj, Kryeministri i Kosovës ka detyrim t’u japë qytetarëve një përgjigje të qartë”, ka thënë Rama.

Ai ka ngritur pyetje për arsyet që kanë çuar, sipas tij, në përkeqësimin e raporteve me aleatin kryesor të Kosovës.

“Si ka mundësi që marrëdhëniet me Shtetet e Bashkuara kanë arritur në pikën ku partneriteti strategjik është i pezulluar, besimi është vënë në pikëpyetje dhe Uashingtoni flet publikisht për kushtet që Kosova duhet t’i përmbushë?”, ka deklaruar Rama.

Në fund, ai ka theksuar se marrëdhënia ndërmjet Kosovës dhe SHBA-së është në një pikë kritike.

“Si ka mundësi që marrëdhënia me Shtetet e Bashkuara, aleatin tonë më të madh strategjik, ka arritur në pikën më të ulët që kanë njohur ndonjëherë raportet ndërmjet Kosovës dhe SHBA-së?”, ka shkruar Rama.

Ushtruesja e detyrës së presidentes së vendit, Albulena Haxhiu, ka shprehur ngushëllime për humbjen tragjike të jetës së tre qytetarëve nga Vushtrria, të cilët vdiqën në aksidentin pranë Bllacës.

Përmes një postimi në Facebook, Haxhiu tha se e ka pikëlluar thellë lajmi për vdekjen e Ejup Tërnavës, Cennet Tërnavës dhe Fatmire Shabanit.

Ajo u shpreh ngushëllime familjeve Tërnava dhe Shabani, të afërmve dhe miqve të viktimave, duke thënë se ndan dhimbjen me ta në këto momente të rënda.

“Udhëtimi i tyre drejt shtëpisë u ndërpre vetëm pak kilometra larg Kosovës, duke lënë pas dhimbje të madhe për familjet dhe të gjithë ata që i njohën. Në këto çaste të rënda, u shpreh ngushëllimet më të sinqerta familjeve Tërnava dhe Shabani, të afërmve dhe miqve të tyre. Jemi pranë jush dhe ndajmë dhimbjen tuaj. U prehshin në paqe”, tha mes tjerash Haxhiu në Facebook.

Andy Burnham do të marrë zyrtarisht detyrën e kryeministrit të Mbretërisë së Bashkuar këtë të hënën, pasi u zgjodh lider i Partisë Laburiste pas dorëheqjes së Keir Starmer.

Burnham, 56 vjeç, ish-kryetar i Bashkisë së Greater Manchester, do të emërohet nga Mbreti Charles III për formimin e qeverisë dhe më pas do të mbajë fjalimin e tij të parë para rezidencës në Downing Street 10.

Pas marrjes së detyrës, ai pritet të emërojë menjëherë kabinetin e ri qeveritar dhe të prezantojë prioritetet e ekzekutivit, me fokus në uljen e kostos së jetesës dhe zvogëlimin e pabarazive rajonale.

Ndryshimi i kryeministrit nuk shoqërohet me zgjedhje të përgjithshme, pasi sistemi parlamentar britanik lejon që partia në pushtet të zgjedhë një lider të ri, i cili bëhet automatikisht kryeministër nëse gëzon shumicën në Dhomën e Komunëve. Zgjedhjet e ardhshme parlamentare në Britani pritet të mbahen në vitin 2029.

Kirurgu torakal në Qendrën Klinike Universitare të Kosovës (QKUK), Shqiptar Demaçi, ka ngritur alarmin për shtimin e rasteve të plagosjeve me armë të ftohta te të rinjtë gjatë sezonit veror.

Sipas tij, vetëm gjatë 24 orëve të fundit, në Qendrën Emergjente, Reanimacion dhe Klinikën e Kirurgjisë Torakale janë trajtuar tre persona të plagosur me thika dhe brisqe.

Demaçi ka bërë të ditur se një 18-vjeçar është pranuar në gjendje të rëndë, me shok hemorragjik, pasi kishte humbur rreth 2.5 litra gjak nga plagët në kraharor. Ai është operuar me urgjencë dhe, falë ndërhyrjes së shpejtë të ekipeve mjekësore dhe transportit në kohë me autoambulancë, gjendja e tij është menaxhuar me sukses.

Kirurgu u ka bërë thirrje të rinjve që të shmangin përdorimin e armëve të ftohta dhe sjelljet agresive, duke paralajmëruar se incidente të tilla mund të përfundojnë me pasoja fatale.

“Si fenomen, loja e përdorimi nga pasja e armëve të ftohta, në moshën adoleshentëve e rinore ka qenë prezente, por jorrallë bëhet agresive! Në vend të alarmit, e them, vetëm për 24 orë u trajtuan tre të plagosur me brisq e thika në QKUK, Qendrën Emergjente, Reanimacion dhe Kirurgjia torakale ! Një i ri (18 vjeç) në gjendje të shokut të rëndë gjakderdhës u operua në mënyrë shumë urgjente( humbte 2,5 litra gjak nga plagët në krahëror), por u soll me kohë nga mjekët e paramedikët me autoambulancë të regjionit dhe u menaxhua me sukses nga ekipi kujdestar në QKUK (Q.Emergjente/Reanimacion/Kirurgji Torakale/ MIQ)! Mos ta teprojmë me lojëra e sjellje agresive se mund të ketë fatalitete!”, shkruan ai në Facebook.

Ministria e Punëve të Jashtme dhe Diasporës ka njoftuar se situata në pikën kufitare Bajakovo, në kufirin ndërmjet Kroacisë dhe Serbisë, është stabilizuar dhe qarkullimi tashmë po zhvillohet pa vonesa të gjata.

Sipas MPJD-së, pritjet dhe kolonat e krijuara gjatë ditës ishin pasojë e zbatimit të Sistemit EES (Entry/Exit System), i cili ka sjellë procedura shtesë të kontrollit kufitar.

Gjatë ditës, Ambasada e Kosovës në Kroaci ka qenë në komunikim të vazhdueshëm me autoritetet kufitare, ndërsa ambasadori Martin Berishaj, së bashku me stafin e Ambasadës, vizitoi pikën kufitare Bajakovo për t’u takuar me bashkatdhetarët që ishin në pritje.

MPJD bëri të ditur se do të vazhdojë të ofrojë mbështetje dhe informata për qytetarët e Kosovës, veçanërisht gjatë sezonit veror.

Prokuroria Themelore në Mitrovicë – Departamenti për Krime të Rënda ka paraqitur pranë Gjykatës Themelore në Mitrovicë kërkesë për caktimin e paraburgimit për të dyshuarin me iniciale B.R., nën dyshimin se ka kryer vepraa penale “Vrasja në tentativë” dhe “Mbajtja në pronësi, kontroll ose posedim të paautorizuar të armëve”.

Sipas Prokurorisë, i pandehuri dyshohet se tentoi ta privonte nga jeta B.M., duke e goditur me thikë në kokë, në pjesën e brinjëve dhe prapa kraharorit.

“I dyshuari me datë 18 korrik me qëllim ka dashur ta privojë nga jeta të dëmtuarin B.M., duke e goditur me thikë në kokë, në pjesën e majtë të brirëve dhe prapa kraharorit. Nga këto veprime i dëmtuari pëson lëndime të rënda trupore dhe gjendet i shtrirë në Kirurgjinë Torakale në QKUK”, njofton Prokuroria.

I dyshuari është arrestuar më 18 korrik, dhe me vendim të prokurorit gjendet në mbajtje.

Komuna e Vushtrrisë ka njoftuar se janë shtyrë koncertet e parapara në kuadër të manifestimit “Ditët e Diasporës 2026”, pas vdekjes tragjike të tre bashkëqytetarëve, Ejup Tërnava, Cennet Tërnava dhe Fatmire Shabani.

Përmes një njoftimi, kryetari i Komunës së Vushtrrisë, Ferit Idrizi, bëri të ditur se ky vendim është marrë në shenjë respekti dhe solidarizimi me familjet e viktimave.

“Për shkak të ndarjes tragjike nga jeta të tre bashkëqytetarëve tanë, ju njoftojmë se anulohen koncertet e parapara në kuadër të manifestimit ‘Ditët e Diasporës 2026′”, ka shkruar Idrizi.

Ai theksoi se koncertet nuk do të mbahen sipas programit të paraparë, por do të organizohen në një datë tjetër.

“Në shenjë respekti dhe solidarizimi me familjet Tërnava dhe Shabani, koncertet do të shtyhen për një datë tjetër, për të cilën do të njoftoheni me kohë përmes kanaleve zyrtare të Komunës së Vushtrrisë”, thuhet në njoftim.

Kryetari Idrizi shprehu ngushëllime për familjet e të ndjerëve, duke shtuar se Komuna bashkëndjen me dhimbjen e tyre.

“Në këto momente të rënda, u shprehim ngushëllimet tona më të thella familjeve Tërnava dhe Shabani dhe bashkëndjejmë dhimbjen për këtë humbje të rëndë. Faleminderit për mirëkuptimin tuaj”, ka deklaruar ai.

Aleanca Kosovare e Bizneseve ka reaguar në lidhje me situatën e krijuar me fermerët e Kosovës gjatë sezonit të korrje-shirjeve, ku prodhuesit vendor po përballen me mungesë tregu, mungesë të hapësirave për deponim dhe çmime jashtëzakonisht të ulëta prej vetëm 16–18 centë për kilogram.

AKB ka thënë se fermeri ka investuar, ka punuar dhe prodhuar ndërsa në fund po përballet me pasiguri se ku do ta dorëzojë prodhimin e tij. Sipas AKB-së, kjo është një goditje për bujqësinë vendore dhe për sigurinë ushqimore të Kosovës.

“AKB rikujton se çështja e blerjes së grurit për rezervat shtetërore nga importi ka qenë objekt i hetimeve nga Prokuroria Speciale e Kosovës dhe Gjykata Themelore ka konfirmuar aktakuzën ndaj ish-ministres së Industrisë, Ndërmarrësisë dhe Tregtisë, Rozeta Hajdari, dhe disa zyrtarëve të tjerë të MINT-it lidhur me rastin e rezervave shtetërore. Sipas raportimeve për aktakuzën e këtij rasti, janë ngritur dyshime lidhur me blerjen e grurit për rezervat shtetërore me çmime të larta krahasuar me tregun dhe me pasoja të pretenduara për buxhetin e shtetit. AKB thekson se sot, se nuk duhen të përsëriten praktika ku shteti mbështetet në import, duhet të krijohet një mekanizëm që rezervat shtetërore të furnizohen nga prodhuesit vendorë”, thuhet në reagim.

Ata kanë thënë nëse para 3-4 viteve, gruri për rezerva shtetërore është blerë nga Turqia për 0.47 euro për kilogram, sipas tij duhet që këtë vit shteti ta blejë grurin nga fermerët kosovarë që po e shesin me 16-18 centë për kilogram.

Sipas AKB-së, kjo do të sillte tri përfitime të mëdha ,do t’i mbështeste drejtpërdrejt fermerët vendorë, do ta forconte sigurinë ushqimore të Kosovës dhe do të kursente mjete të konsiderueshme nga buxheti i shtetit.

“Kryetari i AKB-së, Agim Shahini, deklaroi se Kosova nuk duhet të importojë atë që fermeri ynë e prodhon me mund dhe sakrificë. Rezervat shtetërore duhet të jenë mbështetje për ekonominë vendore, jo vetëm një proces blerjeje. Nëse shteti ka nevojë për grurë për rezervat strategjike, zgjidhja më e drejtë ekonomike është ta blejë atë nga fermerët tanë. Kjo është në interes të buxhetit, prodhuesve dhe qytetarëve të Kosovës. AKB kërkon nga institucionet përgjegjëse që urgjentisht të ndërmarrin masa për grumbullimin e grurit vendor, krijimin e kapaciteteve depozituese dhe garantimin e një tregu të qëndrueshëm për prodhuesit kosovarë”, thuhet ndër të tjera në reagim.