Category: Lajme

Presidenti i Serbisë, Aleksandar Vuçiq, deklaroi se në ditët në vijim do të qëndrojë për një vizitë zyrtare në Turqi, ku, siç tha ai, do të zhvillojë bisedime shumë të rëndësishme me presidentin turk Recep Tayyip Erdogan, duke paralajmëruar një sërë aktivitetesh intensive diplomatike në javët e ardhshme, raporton Anadolu.

Vuçiq këtë paralajmërim e bëri para gazetarëve në Mladenovac, pas hapjes së një gjimnazi të riparuar.

Vuçiq tha se pas vizitës në Ankara do të marrë pjesë në Konferencën e Sigurisë në Mynih, ku planifikon një takim bilateral me ministrin e Jashtëm të Kinës, Wang Yi.

Ai paralajmëroi gjithashtu se më 15 shkurt, në Ditën e Shtetësisë së Serbisë, pret ardhjen e presidentit të Azerbajxhanit, Ilham Aliyev, për një vizitë zyrtare në Beograd, duke theksuar se kjo vizitë ka “rëndësi të veçantë për Serbinë”, veçanërisht në fushën e energjetikës, ku dy vendet planifikojnë projekte të përbashkëta, përfshirë ndërtimin e një termocentrali me gaz.

Një ditë pas vizitës së Aliyevit, Vuçiq planifikon një udhëtim në Indi, ku do të marrë pjesë në një samit kushtuar inteligjencës artificiale dhe do të zhvillojë një takim bilateral me kryeministrin indian Narendra Modi, si dhe bisedime me liderë të tjerë botërorë.

Pas kthimit nga India, tha ai, Serbia pret ardhjen e zyrtarëve evropianë, me të cilët do të ketë një darkë më 20 ose 21 shkurt, përpara një vizite bilaterale në Kazakistan.

Akuza ndaj Kroacisë

Vuçiq deklaroi gjithashtu se, sipas tij, nuk është sekret që Kroacia, mediat e saj dhe aktorë politikë janë të përfshirë në ngjarjet në Serbi.

Ai tha se për pretendime të tilla, siç u shpreh, nuk nevojitet shërbim inteligjent, pasi ato janë “të dukshme me sy të lirë”, duke shtuar se Zagrebi shpreson për ndryshime të pushtetit në Serbi.

Duke folur për, siç tha ai, rikthimin e ideologjisë “ustashe” në hapësirën publike të Kroacisë, Vuçiq pohoi se kjo ideologji nuk është zhdukur kurrë plotësisht, por sot është e pranishme në një formë më të hapur.

Shqetësim për aleancën ushtarake në rajon

Presidenti i Serbisë deklaroi gjithashtu se është “shumë i shqetësuar” për aleancën ushtarake ndërmjet Prishtinës, Tiranës dhe Zagrebit, duke pretenduar se nuk bëhet fjalë për bashkëpunim ushtarako-teknik, por për një aleancë që mund të ketë edhe karakter ofensiv.

Sipas tij, Serbia disponon të dhëna të inteligjencës për bisedimet që, siç tha ai, po zhvillohen lidhur me drejtimet e mundshme të sulmit dhe mbrojtjes, si dhe për përpjekjet e Prishtinës për të siguruar armatim shtesë nga Shtetet e Bashkuara të Amerikës (SHBA) dhe Turqia.

Vuçiq tha se qytetarët e Serbisë nuk duhet të shqetësohen, duke theksuar se “kapacitetet e Ushtrisë së Serbisë po forcohen vazhdimisht”.

Zhvillimi teknologjik dhe robotët

Vuçiq deklaroi gjithashtu se Serbia në pesë muajt e ardhshëm mund të nisë prodhimin e robotëve humanoidë të parë, nëse sigurohen sasi të mjaftueshme të energjisë elektrike.

Ai paralajmëroi bisedime me drejtuesit e “Elektroprivredës së Serbisë” (EPS) për rritjen e kapaciteteve prodhuese, duke theksuar se shteti dëshiron të hyjë sa më shpejt në fushën e robotikës së avancuar dhe automatizimit./Anadolu/

Mbrojtësi Dani Carvajal nuk e ka të qartë se nëse do të qëndroj tek Real Madrid sezonin e ardhshëm.

Carvajal aktualisht është duke vuajtur nga lëndim që pësoi kohë më parë,dhe thotë se synimi është të rikthehet sa më shpejtë në fushat e gjelbërta.

Përndryshe në rast se një gjë të tillë nuk e arrin ta bëjë për një kohë të shkurtër,atëherë Carvajal nuk e përjashton mundësinë që të largohet nga Santiago Bernabeu dhe se karrierën mund ta vazhdojë në MLS apo në ndonjë skuadër të nivelit të ulët.

Në anën tjetër Real Madrid është duke monitoruar situatën e Carvajal,dhe se janë të bindur që spanjolli do të qëndrojë tek “Los Blancos”.

Kujtojmë që Dani Carvajal ka bërë 438 ndeshje zyrtare, 14 gola dhe 65 asistime me fanellën e Real Madridit,dhe kjo e përmbledh më së miri rëndësinë e Carvajal për klubin.

Kryeministri në detyrë i Republikës së Kosovës, Albin Kurti, së bashku me zëvendësministren në detyrë të Kulturës, Rinisë dhe Sportit, Daulina Osmani, mirëpritën pjesëtarët e Klubit Alpin “Prishtina”, të cilët po përgatiten për ngjitjen e radhës, majën e Kilimanxharos.

Gjatë takimit, kryeministri u njoftua për planet dhe përgatitjet e fundit të grupit para nisjes për në Tanzani, ku synojnë ta ngjisin majën e Kilimanxharos, në lartësi prej 5895 metrash, në ditën e përvjetorit të Pavarësisë së Republikës së Kosovës.

Organizatorët dhe përfaqësuesit e grupit të alpinistëve u shprehën se kjo ide është menduar si një formë e përfaqësimit dhe promovimit të vendit përmes sportit malor.

Duke i falënderuar për vizitën, kryeministri Kurti i përgëzoi për angazhimin në promovimin e vendit tonë dhe u uroi fat dhe suksese në këtë ngjitje të radhës, me rëndësi të veçantë.

Në seancën e së premtes në Gjykatën Themelore në Prishtinë, në fjalën përfundimtare, prokurorja Dulina Hamiti kërkoi dënimin e të akuzuarve Besnik dhe Ilaz Salihu, të cilët ngarkohen për rastin e vrasjes së S.S. Kurse, mbrojtja e tyre kërkoi që në mungesë të provave, të akuzuarit të lirohen nga akuza.

Në këtë rast, Besnik Salihu akuzohet për vrasjen e S.S., në mars të 2023-ës në Dumnicë të Podujevës dhe për armëmbajtje pa leje, ndërsa Ilaz Salihu akuzohet për ndihmë në kryerjen e vrasjes, raporton “Betimi për Drejtësi”.

Fillimisht, prokurorja Hamiti sqaroi se fjalën përfundimtare e ka përgatitur me shkrim dhe e dorëzoi në Gjykatë.

Hamiti tha se bazuar në provat e administruara gjatë shqyrtimit gjyqësor, është vërtetuar se i akuzuari Besnik ka kryer veprën penale të “Vrasjes së rëndë” dhe atë të “Armëmbajtjes pa leje. Ndërkaq, i akuzuari Ilaz atë të “Ndihmës në kryerjen e vrasjes së rëndë”.

Sipas prokurores, nga dëgjimi i dëshmitarëve në shqyrtim gjyqësor, janë vërtetuar në plotni të dhënat si në aktakuzë.

Lidhur me të akuzuarin Ilaz Salihu, kryetari i trupit gjykues, Alban Ajvazi kërkoi nga Prokuroria që të renditë provat që dëshmojnë se ai ka kryer veprën penale të “Ndihmës në vrasje të rëndë”.

Prokurorja Hamiti tha se provat janë listuar edhe në aktakuzë dhe se vetë i akuzuari Ilaz ka deklaruar mënyrën si e ka kryer veprën penale.

Më pas, fjalën përfundimtare e paraqiti përfaqësuesi i palës së dëmtuar, avokati Skender Musa, duke deklaruar se vrasja është bërë për shkak të motivit hakmarrës që nga viti 2012.

Musa tha se të akuzuarit kanë kryer veprën penale në mënyrë profesionale dhe kanë ndërmarrë veprime duke zhdukur provat në vendin e ngjarjes.

Gjithashtu, avokati Musa shtoi se të akuzuarit së bashku edhe me vëllezërit tjerë kanë zhvilluar komunikime mes vete duke ardhur deri te kryerja e veprës penale.

Në fund, ai tha se të akuzuarit duhet të shpallen fajtorë dhe të dënohen sipas ligjit. Tha se për kërkesën pasurore-juridike do të procedojnë në kontest të rregullt juridiko-civil.

Mbrojtësi i të akuzuarit Besnik Salihu, avokati Arlind Fetahu tha se së fundi është anagzhuar si mbrojtës. Ai u shpreh se deklarimet e dhëna nga Prokuroria dhe pala e dëmtuar nuk përputhen mes vete.

Fetahu tha se aktakuza mbështetet vetëm në të thënat e të akuzuarit Ilaz në Polici. Kërkoi që i mbrojturi i tij të lirohet nga akuza në mungesë të provave.

Vetë i akuzuari Besnik tha se familja e tij është viktimë e familjes së të ndjerit.

Në anën tjetër, mbrojtësi i të akuzuarit Ilaz Salihu, avokati Qazim Qerimi gjithashtu e dorëzoi me shkrim fjalën përfundimtare, duke mbetur në tërësi pranë saj.

Në fund, gjykatësi i rastit Alban Ajvazi e shpalli të përfunduar gjykimin, duke caktuar datën e shpalljes së aktgjykimit për një ditë tjetër.

Sipas aktakuzës, më 26 mars 2023, rreth orës 18:08 minuta, në fshatin Dumincë e Epërme, Komuna e Podujevës, pas një mosmarrëveshjeje mes të akuzuarit Besnik Salihu dhe tani të ndjerit S.S., i akuzuari në mënyrë dinake dhe papritur iu afrua të ndjerit S.S. me qëllim që t’i merrte jetën.

Në aktakuzë thuhet se i akuzuari kishte shtënë me armë zjarri, duke qëlluar dy herë në kokë tani të ndjerin S.S- një herë me pistoletë në anën e majtë të kokës dhe një herë me armë të gjatë nën mjekër, duke i shkaktuar gjakderdhje masive të jashtme trunore, dhe për shkak të plagëve të marra nga predhat e shkrepura në kokë, tani i ndjeri S.S. ndërroi jetë në vendin e ngjarjes, ku më pas i akuzuari Besnik largohet nga vendi i ngjarjes.

Me këto veprime, i pandehuri Besnik Salihu ka kryer veprën penale të “Vrasjes e rëndë”, sipas nenit 173, paragrafi 1, pika 14 e KPRK-së.

Tutje, në aktakuzë thotë se i pandehuri Besnik, në datën, kohën dhe vendin e përshkruar si në dispozitivin e parë të kësaj akuze, pa autorizim dhe në kundërshtim me ligjin për armët, ka poseduar një revole dhe një armë të gjatë, me të cilën ka kryer veprën penale të përmendur si më lart.

I njëjti ngarkohet edhe për kryerjen veprën penale “Mbajtjes në pronësi, kontroll ose posedim të paautorizuar të armëve”, sipas nenit 366, paragrafi 1 të KPRK-së.

Gjithashtu, në aktakuzës thuhet se i pandehuri Ilaz Salihu, në vendin, kohën dhe mënyrën e përshkruar në dispozitivin e parë të kësaj aktakuze, me dashje ndihmoi vëllain e tij, të akuzuarin Besnik, duke i premtuar se do të fshehë provat e kryerjes së veprës penale.

Me këtë, i pandehuri Ilaz Salihu ka kryer veprën penale të “Ndihmës në vrasjen e rëndë”, sipas nenit 173, paragrafi 1, pika 14, lidhur me nenin 3 të KPRK-së.

Qeveria e Shqipërisë ka miratuar sot Amnistinë Penale pas mbledhjes së Këshillit të Ministrave, duke e depozituar projektligjin në Kuvend për shqyrtim.

Ministri i Drejtësisë, Besfort Lamallari, ka njoftuar se nga kjo nismë përfitojnë drejtpërdrejt qindra të dënuar, ku 447 persona do të lirohen menjëherë nga burgu, ndërsa 853 të tjerë do të përfitojnë ulje dënimi.

Mes përfituesve, siç raportojnë mediat shqiptare, ka gra, të mitur dhe shtetas të huaj.

Po ashtu, është bërë e ditur se do të amnistohen edhe 5077 të dënuar me masa alternative, ndërsa pushohet ndjekja penale për rreth 14 mijë procedime për vepra të lehta.

Lamallari në deklarimin e tij tha se amnistia është një akt human dhe një mundësi e dytë për rehabilitim dhe ri integrim, si dhe një hap konkret për uljen e mbipopullimit në burgje dhe fokusimin e drejtësisë aty ku rreziku shoqëror është real.

Kryetari i Prishtinës, Përparim Rama, ka komentuar miratimin e buxhetit të Kryeqytetit për vitin 2026, duke e cilësuar këtë si një dëshmi të lidershipit politik dhe të funksionimit të demokracisë lokale.

Rama ka falënderuar asamblistët e Kryeqytetit për përgjegjësinë dhe pjekurinë e tyre politike, duke theksuar se qytetarët e Kryeqytetit meritojnë përfaqësues që veprojnë me përgjegjësi publike. Ai gjithashtu ka shprehur mirënjohje për qytetarët e Prishtinës, duke theksuar se vota e tyre ka sjellë një asamble që e kupton mandatin si detyrim për shërbim publik, vendimmarrje të përgjegjshme dhe ndërtimin e së ardhmes së qytetit.

Sipas Ramës, miratimi i buxhetit tregon qartë funksionimin e demokracisë. “Kur asambleistët janë aty për të ndërtuar e jo për të bllokuar, për të marrë përgjegjësi e jo për të sabotuar, kjo reflekton demokracinë në veprim”, ka deklaruar ai.

Kryetari i Prishtinës ka nënvizuar gjithashtu se vendimi përfaqëson ndryshimin midis politikës së së kaluarës dhe qeverisjes aktuale. Ai ka theksuar se largimi nga kultura e bllokadës është i domosdoshëm për zhvillimin e qytetit dhe për realizimin e planifikimeve serioze, investimeve strategjike dhe projekteve që ndikojnë drejtpërdrejt në jetën e qytetarëve.

Rama ka përfunduar duke theksuar se buxheti i miratuar nuk është vetëm një dokument financiar, por një deklaratë politike dhe një mesazh se Prishtina ka zgjedhur qeverisjen demokratike, përgjegjësinë dhe të ardhmen e qytetit.

Instituti Hidrometeorologjik i Kosovës (IHMK) njofton se gjatë kësaj fundjave moti në Prishtinë do të jetë kryesisht i vranët, me intervale dielli dhe reshje shiu të përkohshme.

Të shtunën pritet mot kryesisht i vranët, por me periudha të shkurtra dielli. Vranësirat vende-vende mund të sjellin reshje të dobëta shiu. Temperaturat minimale do të luhaten nga 2 deri në 5 gradë Celsius, ndërsa maksimalet nga 8 deri në 12 gradë. Era do të fryjë nga veriperëndimi me shpejtësi 1–5 m/s.

Të dielën, moti do të jetë i ngjashëm – i vranët, me intervale dielli dhe mundësi për reshje shiu në disa zona. Temperaturat minimale do të jenë 1 deri 4 gradë Celsius, ndërsa maksimalet 7 deri 11 gradë. Era do të fryjë nga verilindja me shpejtësi 1–7 m/s.