Category: Lajme

Turisti nga Maqedonia e Veriut, Goran Tanevski, i cili ka përjetuar sulmin e 24 shtatorit 2023 në Banjskë të Zveçanit, ka përjetuar traumë të rëndë psikologjike.

Tanevski dëshmoi të mërkurën në seancën gjyqësore për rastin e sulmit në Banjskë ndaj të akuzuarve Blagoje Spasojeviq, Vladimir Toliq dhe Dushan Maksimoviq.

Prokurori special, Naim Abazi, pyeti dëshmitarin nëse kishte tejkaluar ankthin e përjetuar gjatë sulmit në Banjskë, ndërsa Tanevski tha se ende përballet me probleme psikologjike.

“ Edhe më tej kam probleme të tilla”, tha ai.

Prokurori Abazi pyeti dëshmitarin se gjatë vizitës së tij me familje në Banjskë, a ka vërejtur persona të tjerë që nuk dukeshin si turistë.

Tanevski tha se në mëngjesin e ditës së sulmit nuk kishte parë persona që dukeshin si turistë, ndërsa në momentin e sulmit dëgjoheshin të shtëna armësh dhe më pas kishte parë persona të uniformuar rreth hotelit, dy prej të cilëvë jashtë objektit dhe një brenda hotelit, të tre të armatosur.

“ Deri në ditën e ndodhjes, në atë mëngjes nuk kam parë persona që janë dukur turistë. Në ditën që ndodhi kjo dëgjoheshin gjuajtje. Ne nuk mund të shihnim asnjë, por në atë mëngjes pamë persona të uniformuar rreth hotelit dhe kishte një në hotel. Njerëzit që i pamë jashtë hotelit, pamë dy veta në uniformë, pa shenja dhe me armë ushtarake. Atij që ishte në hotel mund t’ia shihnim vetëm pushkën, kurse uniformën jo, sepse ne ishim poshtë shkallëve dhe ai po kërkonte batanije apo diçka të tillë. Nën dritaren, në të cilën ishim të vendosur ne, nga dritarja për personin që po flas, mund të kishte municion, kishte bombë”, shtoi ai.

Dëshmitari duke kujtuar ditën kritike, tha se njëri nga personat e uniformuar kishte kërkuar çarçaf dhe e shoqja i kishte dhënë batanije, ndërsa më pas mysafirëve u ishte kërkuar të qëndronin në dhoma dhe të mos dilnin jashtë hotelit.

“Na kërkoi një çarçaf. Kur ai kërkoi, unë isha në pjesën tjetër të hapësirës, ndërsa gruaja i ka dhënë një batanije. Sa i përket pyetjes së kufizimit në dhoma, nuk kishte diçka të tillë. Kishte një thirrje që të qëndronim në dhomë, sepse dikush dëshironte të dilte. Ne u nisëm për të dalë, por na u tha të ktheheshim në hotel. Dikush na tha prej katit të hotelit. Unë doja të dilja që të shoh automjetin tim, por dikush na tha që të kthehemi. Mendoj se ishte një nga personat e uniformuar, sepse ai person kishte edhe armë me vete”, tha ai.

Sipas dëshmisë së tij, ata u fshehën në bodrum disa orë për shkak të të shtënave dhe eksplodimeve jashtë hotelit. Në momentin që kishin përfunduar të shtënat, mysafirët janë kthyer në dhomë.

“Vështirësitë ishin fillimisht si rezultat i gjuajtjeve dhe eksplodimeve që ishin jashtë hotelit. Pastaj, kur zbardhi dita të nesërmen, kur i pamë këta persona të uniformuar, vendosëm që të fshiheshim në bodrum. Dhe aty qëndruam 2-3 orë, pastaj u ndalën gjuajtjet një kohë dhe u kthyem në dhomë”, tha ai.

Tanevski tha se ngjarja ka lënë pasoja të rënda psikologjike tek ai dhe familja e tij, duke theksuar se pas asaj dite kishte vendosur të mos vizitojë më Kosovën.

Ai nuk mund ta harrojë tmerrin që kishte përjetuar më 24 shtator të 2023, pasi që u ndie përgjegjës për atë që përjetoi familja e tij, duke u frikësuar se mos po i qëllon ndonjë plumb.

E frika tij më e madhe ishte fëmija i tij me autizëm.

Tanevski shtoi se familja u largua të hënën nën sigurinë e Policisë së Kosovës.

“ Unë prej asaj dite vendosa që të mos vij asnjëherë në Kosovë. Ajo që ndodhi atë ditë asnjëherë nuk mund ta harroj. Unë i dërgova ata atje që të pushonim, unë u ndieva përgjegjës për atë që ata përjetuan. Edhe sot e kësaj dite, kur më kujtohet për atë që ndodhi, ndiej stres, pasiguri dhe frikë. Në orën 15:00 dëgjuam gjuajtje dhe eksplodime. Kjo ndodhi derisa nuk zgjati dita. Kishim frikë se mos na qëllonte ndonjë plumb. Pastaj, kur zbardhi dita, pamë ushtarë jashtë me armë, kishte edhe më tej gjuajtje. Kur u ndalën gjuajtjet, unë komunikova me Ministrinë e Jashtme dhe m’u tha se nuk mund të shkoja se nuk është e sigurt. Gjithë ditën ishte dilema se a të shkonim a jo. Ne shkuam të hënën, do të thotë paradite dhe shkuam duke na siguruar Policia e Kosovës. Gjithë ajo kohë paraqet stres dhe frikë. Unë kam një fëmijë me autizëm që ka qenë aty, nuk e di a e dini çfarë do të thotë kjo”, tha ai.

Deri tani, të arrestuar dhe nën masën e paraburgimit për këtë rast janë Blagoje Spasojeviq, Vladimir Toliq dhe Dushan Maksimoviq, për të cilët është veçuar procedura penale.

Prokuroria Speciale e Republikës së Kosovës më 11 shtator 2024 ka ngritur aktakuzë kundër Milan Radoiçiqit dhe 44 të tjerëve për sulmin terrorist të 24 shtatorit 2023 në Banjskë të Zveçanit.

Të akuzuarit ngarkohen se përmes përdorimit të dhunës me armatim të rëndë, tentuan ta shkëpusin pjesën veriore të territorit të Republikës së Kosovës e t’ia bashkojnë Republikës së Serbisë, me ç‘rast ka mbetur i vrarë rreshterii Policisë së Kosovës, Afrim Bunjaku. /KP/

Kryetarja e Kuvendit, Albulena Haxhiu, sot do të pres në takim kryetarët e komisioneve parlamentare.

Kështu është bërë e ditur përmes një komunikate për media, ku është shtuar se takimi do të nis nga ora 14:00.

Po ashtu, bëhet e ditur edhe se, vendi është Salla C 301.

Ish raportuesja për Kosovën në Parlamentin Evropian, Viola Von Cramon, përmes një postimi në rrjetin social ‘’X’’, ka vlerësuar se Serbia është ‘’shumë larg’’ anëtarësimit në Bashkimin Evropian.

Von Cramon, ka shtuar edhe se, me përjashtim të Bjellorusisë e Azerbajxhanit, asnjë vend tjetër vend tjetër s’është më larg anëtarësimit në BE se sa Serbia, përcjell Express.

‘’ Para se të flasim aktualisht, në rastin e Serbisë, për anëtarësim apo për opsion vetoje, duhet të ndodhin ende shumë, shumë gjëra. Vendi aktualisht është po aq larg nga një anëtarësim real sa pothuajse asnjë tjetër (me përjashtim të Bjellorusisë dhe Azerbajxhanit). Nuk kam shkruar se ata janë “kandidatë”. Thjesht kam vënë në dukje se nuk mund të jesh shumë më larg anëtarësimit në BE sesa Serbia. (Nëse i lëmë mënjanë shtetet e përmendura.)’’, ka shkruar ajo.

Këto komente, von Cramon i ka bërë në një replikë që ajo i ka bërë gazetarit të gazetës gjermane “FAZ” Michael Martens, i cili ka thënë se presidenti serb, Aleksandar Vuçiq, ka dhënë ‘’mesazh’’ se Serbia do të ishte e gatshme që të anëtarësohet në Bashkimin Evropian edhe pa të drejtën e vetos.

Avokati i ish-kryetarit të Parlamentit të Kosovës Kadri Veseli, Rodney Dixon po i thotë fjalët përfundimtare në gjyqin e madh ndaj Thaçit dhe të tjerëve.

Ai tha se Kadri Veseli nuk mund të shpallet fajtor në bazë të provave që nuk janë testuar dhe thashethemeve, transmeton Klankosova.tv.

“ZPS-ja kur foli të hënën foli shumë pak për zotëri Veselin, deri në momentin kur nga fundi, zotëri Howling iu rikthye trillimit të ZPS-së, të ligjeve dhe fakteve për një përpjekje të fundit për të përfshirë zotëri Veselin. Sipas nesh, deri në këto momente nuk u tha asgjë,madje edhe kur thanë, thanë fjalë boshe. Asgjë deri në fund të fjalës së ZPS-së, sepse nuk kanë asnjë përgjigje për akuzat që ngritëm ne sa i takon argumenteve të tyre ndaj zotëri Veselit. Por sidoqoftë, ata pretendojnë se ne nuk kemi trajtuar themelësinë e akuzave të ZPS-së. Është akuzë e rëndë kjo. Sepse ajo që bëmë ne javën e kaluar, ishte trajtimi i të gjitha akuzave, një nga një, të paraqitura nga ZPS”, u shpreh Dixon.

“Mbrojtja mbështetet në të drejtat më themelore që duhen të jenë në çdo gjykim penal, pra e thënë shkurt, të testohen provat ndaj të akuzuarve. ZPS-ja po përpiqet të shfrytëzojë pikërisht fillin e artë të të drejtës penale për të lidhur klientin tim. Ky parim ligjor është i padiskutueshëm, gjykata nuk mund të shpall fajësinë për një person, nëse kjo shpallje fajësie do të mbështetet vetëm mbi prova të patestuara dhe thashetheme”, u shpreh ai.

Avokati i Hashim Thaçit, Luka Mishetiq ka përfunduar deklaratën përmbyllëse.

Në seancën e sotme, të fundit të deklaratave përmbyllëse në rastin kundër ish-presidentit të Kosovës, Hashim Thaçi, ish-kryeparlamentarëve, Kadri Veseli dhe Jakup Krasniqi, dhe ish-deputetit, Rexhep Selimi në Gjykatën Speciale në Hagë, Mishetiq tha se të akuzuarit duhet të shpallen të pafajshëm për të gjitha akuzat.

“Ju lutem shpallni pafajësinë për të gjitha akuzat”, tha Mishetiq në fjalën e tij përmbyllës.

Paraprakisht në fjalën e tij, Mishetiq ka thënë se ZPS-ja nuk ka arritur të ofrojë prova për akuzat me të cilat ngarkohet Thaçit. Ai u shpreh se ZPS-ja ka premtuar “spektakël”, por nuk nuk kanë arritur të paraqesin asgjë në mbështetje të pretendimeve të tyre.

Me këtë, Mishetiq tha se ZPS-ja në këtë gjykim ka bërë “një mëkat të madh dhe të pafalshëm”.

“Ata kanë premtuar fishekzjarre, spektakël, por nuk kanë paraqitur asgjë. Dhe kjo ka ndodhur të hënën. Ju e dëgjuat refrenin e tyre, ata thanë se do ta bënin këtë gjë, por nuk e bënë.

Duket se ZPS-ja në fund do të jepte një shpjegim të asaj që Thaçi ka thënë po ka bërë, por a ju dhanë ata këtë argument. Nuk kishin përgjigje, vetëm premtime boshe të tepërta që nuk do të ndiqeshin me fakte”, tha Mishetiq në fjalën e tij.

Arabia Saudite ka njoftuar se muaji i shenjtë i Ramazanit do të fillojë të mërkurën.

Oborri mbretëror saudit tha se hëna e re e muajit të shenjtë u pa të martën në mbrëmje dhe se agjërimi do të fillojë të mërkurën, më 18 shkurt, shkruajnë mediat e huaja.

Pavarësisht kësaj, nga Bashkësia Islame e Kosovës kanë thënë për Telegrafin, se në Kosovë, muaji i Ramazanit fillon të enjten, më 19 shkurt.

Kujtojmë se rreth 2 miliardë myslimanë në mbarë botën pritet të fillojnë agjërimin çdo ditë nga lindja e diellit deri në perëndim të diellit.

Ramazani bie në muajin e nëntë të kalendarit hënor islamik, i cili përbëhet nga 12 muaj në një vit që zgjasin 354 ose 355 ditë.

Agjërimi gjatë Ramazanit është një nga pesë shtyllat e Islamit dhe konsiderohet i detyrueshëm për myslimanët e shëndetshëm të rritur.

Përjashtimet zakonisht vlejnë për fëmijët e vegjël, të sëmurët, udhëtarët dhe gratë që janë shtatzëna, ushqejnë me gji ose gjatë ciklit menstrual.

Tradita e shikimit të hënës është përdorur prej kohësh për të përcaktuar fillimin e Ramazanit, si dhe festat kryesore islame të Fitër Bajramit dhe Kurban Bajramit.

Presidentja e Kosovës, Vjosa Osmani ka marrë urimin për Ditën e Pavarësisë nga presidenti i Finlandës, Alexander Stubb.

Homolugu i saj francez ka shprehur vlerësimin për vizitën e Osmanit në Helsinki gjatë vitit të kaluar, si dhe ka rikonfirmuar përkushtimin për forcimin e mëtejshëm të marrëdhënieve dy paleshe ndërmjet Finlandës dhe Kosovës.

“Presidenti i Republikës së Finlandës, Alexander Stubb, i ka përcjellë urime Presidentes së Republikës së Kosovës, Vjosa Osmani, dhe qytetarëve të saj me rastin e Ditës së Pavarësisë, duke shprehur urimet për prosperitet dhe mirëqenie të vazhdueshme për Republikën e Kosovës.Në mesazhin e tij, Presidenti Stubb ka shprehur vlerësimin për vizitën e Presidentes Osmani në Helsinki gjatë vitit të kaluar, si dhe ka rikonfirmuar përkushtimin për forcimin e mëtejshëm të marrëdhënieve dypalëshe ndërmjet Finlandës dhe Kosovës”, thuhet në njoftimin e Presidencës.