Një person ka rrahur nënën dhe vëllanë në Pejë.
Kështu njofton Policia e Kosovës përmes raportit ku thotë se i dyshuari ka qenë nën ndikim të alkoolit.
I njëjti, duke mos iu bindur urdhrave të policisë gjatë arrestimit, i ka sulmuar fizikisht edhe dy policë.
Me vendim të prokurorit i dyshuari është dërguar në mbajtje.
Policia e Kosovës ka bërë të ditur se gjatë 24 orëve të fundit janë regjistruar gjashtë raste të dhunës në familje në komuna të ndryshme të vendit.
Në Prishtina janë raportuar dy raste.
Në njërin, një grua dyshohet se është sulmuar fizikisht nga i dashuri i saj.
Në rastin tjetër, një person dyshohet se ka ushtruar dhunë psikike ndaj nënës së tij dhe ka demoluar shtëpinë.
Pas intervistimit, në të dy rastet është iniciuar procedurë e rregullt.
Në Peja, një nënë dhe djali i saj raportuan se djali, përkatësisht vëllai i tyre, ka ushtruar dhunë fizike ndaj tyre. I dyshuari, i cili sipas Policisë ishte nën ndikim të alkoolit, ka sulmuar fizikisht edhe dy zyrtarë policorë gjatë arrestimit. Me vendim të prokurorit, ai është dërguar në mbajtje.
Në Rahovec është arrestuar një grua, e cila dyshohet se ka dëbuar nga shtëpia bashkëshortin dhe e ka kanosur atë. Pas intervistimit, me vendim të prokurorit, e dyshuara është liruar në procedurë të rregullt.
Në Gjakova janë shënuar dy raste.
Në njërin, një burrë dyshohet se ka sulmuar fizikisht bashkëjetuesen e tij, duke i shkaktuar lëndime të lehta trupore. Ai është arrestuar dhe dërguar në mbajtje.
Në rastin tjetër, një çift (të dashur mes vete) janë përleshur pas një mosmarrëveshjeje. Të dy kanë refuzuar trajtimin mjekësor, ndërsa në vendin e ngjarjes është konfiskuar një thikë. Me vendim të prokurorit, i dyshuari mashkull është dërguar në mbajtje, ndërsa e dyshuara është liruar në procedurë të rregullt.
Ish-zëvendëskryeministrja e Kosovës, Edita Tahiri, ka komentuar fjalën përmbyllëse të Hashim Thaçit në Dhomat e Specializuara.
Ajo është shprehur e emocionuar me deklarimit e ish-presidentit të Kosovës.
Në profilin e saj në Facebook, Tahiri ka shkruar se fjalim i tij ishte fjalim i një lideri të UÇK-së.
“E degjova fjalimin perfundimtar te Hashim Thaçi ne Gjykate – ashtu sic ishte lider i UCK-se edhe fjalimi ishte i tille!”, ka shkruar ai.
Sot në rrugën B në Prishtinë është djegur një shtëpi, si pasojë e një zjarri që ka shpërthyer rreth orës 10:00 të paradites.
Zëdhënësi i Policisë për Rajonin e Prishtinës, Enis Pllana, ka bërë të ditur se policia ka pranuar informatën për incidentin dhe menjëherë ka dalë në vendin e ngjarjes.
“Sot rreth orës 10:00, kemi pranuar informatën për një incident zjarri në rrugën B, në Prishtinë, ku nga zjarri është përfshirë një shtëpi. Në vendngjarje kanë dalë zjarrfikësit dhe policia të cilët po merren me rastin. Nga informatat fillestare nuk është raportuar për ndonjë person të lënduar”, ka deklaruar Pllana.
Njësitë relevante po vazhdojnë hetimet për të sqaruar shkaqet e zjarrit, ndërsa rasti po trajtohet nga organet kompetente.
SHBA-të kanë vendosur të tërheqin trupat e tyre të mbetura në Siri, të cilat numërojnë rreth 1,000, pas tërheqjeve graduale gjatë muajve të fundit, thuhet në një raport.
Duke cituar zyrtarë amerikanë, The Wall Street Journal tha se tërheqja pritet të ndodhë gjatë dy muajve të ardhshëm. Raporti tha se Uashingtoni arriti në përfundimin se një prani ushtarake amerikane në Siri nuk është më e nevojshme, duke përmendur shpërbërjen pothuajse të plotë të YPG/SDF dhe integrimin e saj të mëvonshëm në strukturën shtetërore siriane, duke e bërë misionin origjinal të SHBA-së për të luftuar ISIS-in nëpërmjet partnerëve vendas praktikisht të përfunduar.
Ushtria amerikane tashmë ka finalizuar tërheqjen e saj nga garnizoni Al-Tanf, një postë kyçe pranë kufijve të Sirisë, Jordanisë dhe Irakut, si dhe nga baza Al-Shaddadi në Sirinë verilindore në fillim të këtij muaji, vuri në dukje deklarata
Raporti tha më tej se tërheqja nuk ishte e lidhur me vendosjet aktuale detare dhe ajrore të SHBA-së në Lindjen e Mesme, të cilat synojnë sulme të mundshme ndaj Iranit nëse bisedimet bërthamore dështojnë. Ai tha se Irani kishte paralajmëruar gjithashtu se do të synonte forcat amerikane në rajon në përgjigje të çdo sulmi ajror të SHBA-së.
Duke cituar një zyrtar të lartë amerikan, tha se tërheqja ishte duke u zhvilluar ndërsa qeveria siriane merr përsipër përpjekjet kundër terrorizmit, duke shtuar se forcat amerikane ende mund t’i përgjigjen çdo kërcënimi të ISIS-it.
Sipas The Wall Street Journal, disa zyrtarë amerikanë dhe të huaj paralajmëruan se një prani e reduktuar amerikane mund të rrezikonte një prishje të armëpushimit dhe t’i lejonte ISIS-it të riorganizohej, ndërsa të tjerë thanë se trupat e mbetura shërbyen kryesisht si një sinjal politik dhe jo si një forcë e konsiderueshme kundër terrorizmit.
Prishtina do të mirëpresë sërish një nga ngjarjet më të mëdha muzikore të verës, pasi Sunny Hill Festival ka konfirmuar zyrtarisht datat e edicionit të ardhshëm.
Përmes një postimi në rrjetet sociale, organizatorët bënë të ditur:
“IT’S OFFICIAL. Sunny Hill Festival. 31 July • 1 August • 2 August”.
Kështu, festivali do të mbahet më 31 korrik, 1 dhe 2 gusht në Prishtinë, duke rikthyer atmosferën elektrizuese që çdo vit mbledh mijëra adhurues të muzikës.
I konsideruar si një nga festivalet më të mëdha në rajon, Sunny Hill sjell në skenë artistë me famë ndërkombëtare dhe tërheq vizitorë nga vende të ndryshme të botës. Emrat e performuesve për këtë edicion pritet të publikohen në ditët në vijim.
Një gjykatë në Korenë e Jugut e ka dënuar ish-presidentin, Yoon Suk Yeol, me burgim të përjetshëm, pasi e gjeti fajtor për udhëheqjen e një kryengritjeje pasi ai shpalli gjendje lufte më 2024.
Yoon papritur shpalli gjendje lufte gjatë një adresimi televiziv dhjetorin e vitit 2024, duke thënë se masat drastike ishin të nevojshme për të çrrënjosur “forcat antishtetërore” në Asamblenë Kombëtare të Koresë së Jugut.
Konservatori i linjës së ashpër, Yoon, 65 vjeç, më vonë u ndoq penalisht, u arrestua dhe u akuzua për krime të ndryshme, përfshirë për kryengritje dhe pengim të drejtësisë.
Gjykatësi kryesor, Ji Gwi-yeon, tha se Yoon dërgoi trupa në ndërtesën e Asamblesë në përpjekje për të heshtur kundërshtarët politikë të cilët kishin penguar përpjekjet e tij për të qeverisur.
“Gjykata gjen se qëllimi ishte që të paralizohej Asambleja për një periudhë të konsiderueshme”, tha Ji në Gjykatën e Qarkut Qendror të Seulit.
“Shpallja e gjendjes së luftës rezultoi me pasoja të mëdha sociale, dhe është e vështirë që të gjendet ndonjë tregues se i pandehuri ka shprehur keqardhje për këtë gjë”, tha gjykatësi.
“Ne e dënojmë Yoonin me burgim të përjetshëm”.
Ish-ministri i Mbrojtjes, Kim Yong-hyun, u dënua me 30 vjet burgim për rolin e tij në këtë krizë.
Prokurorët kërkuan dënimin më të ashpër për akuzën për kryengritje ndaj Yoonit dhe në seancat dëgjimore në janar kërkuan që ai të dënohej me vdekje.
Koreja e Jugut ka një moratorium jozyrtar për dënimin kapital – të burgosurit e fundit ishin ekzekutuar më 1997 – prandaj një dënim me vdekje, efektivisht e lë Yoonin përjetë prapa grilave.
Mijëra mbështetës u mblodhën jashtë ndërtesës së gjykatës para vendimit, duke mbajtur slogane të tilla si “Yoon Madhështor Sërish” ose “Hidhni poshtë akuzat kundër presidentit Yoon”.
Turmat brohoritën kur vetura e burgut e transportoi ish-presidentin për në gjykatë.
Pranë gjykatës u dislokuan forca të sigurisë për të shtypur çdo trazirë.
Përveç këtij dënimi, Yoon veçse ishte dënuar me pesë vjet burgim për akuza të tjera, ndërkaq zyrtarë të tjerë të lartë u dënuan po ashtu me dënime të ashpra me burg./REL
Agjencia për Ushqim dhe Veterinari (AUV) u bënë thirrje pronarëve të kafshëve shtëpiake (qenve), që të përmbushin detyrimin ligjor për identifikimin e kafshëve të tyre me mikroçip dhe regjistrimin e tyre në modulin për kafshët shtëpiake në Sistemin Informativ të Agjencisë. Pas regjistrimit kryhet edhe lëshimi i pasaportës për kafshën shtëpiake.
AUV sqaron se aplikimi i mikroçipit është procedurë që bëhet një herë, dhe kafsha e mban çipin deri në fund të jetës.
“Mikroçipimi është baza për përcaktimin e pronësisë së kafshës shtëpiake, për sigurimin e kujdesit të shëndetit të kafshëve në kohë dhe me cilësi, si dhe për një siguri më të madhe për pronarët, nga aspekti i transmetimit të sëmundjeve ngjitëse nga kafshët tek njerëzit. Pronarët që tashmë kanë mikroçipuar kafshët e tyre shtëpiake, kujtohen se kanë detyrimin ligjor të njoftojnë çdo ndryshim të të dhënave për kafshën ose për pronarin tek shoqata veterinare kompetente, e cila duhet të përditësojë bazën elektronike të të dhënave”, thonë nga AUV.
Agjencia për Ushqim dhe Veterinari thekson se në bazën e të dhënave duhet të regjistrohen edhe vdekja, humbja ose shitja e kafshëve.
“Mikroçipimi i kafshëve shtëpiake ka për qëllim identifikimin e përhershëm të kafshëve, parandalimin e braktisjes së tyre dhe kontrollin e shumimit të tyre, si dhe lehtësimin e gjetjes së tyre në rast të humbjes ose vjedhjes”, thonë nga AUV.
Valdrin Dervishaj, ish-këshilltari i ish-ministres së Arsimit, Arbërie Nagavcit, e ka paralajmëruar ministrin e ri të këtij dikasteri, Hajrulla Çeku, për numrin e madh të aktakuzave në këtë ministri.
Dervishaj me anë të një shkrimi në ‘Facebook’, ka thënë se Çekun në zyre do ta pres një sekretare me aktakuzë për korrupsion prej katër milionë eurosh.
“Pastaj të pret prokurim me aktakuzë për korrupsion. Të pret udheheqës i finanvave me aktakuzë për korrupsion Të pret ekzekutim me aktakuzë. Pra, veç në recepcion s’ka aktakuzë, literalisht“, vijon ish-këshilltari i Nagavcit.
“Mbarësi s’ka me njerëz me aktakuzë për korrupsion që ia kanë transferu biznesit 400,000€ në llogari për qef dhe kanë ble shportë rreth 200€ (lexo shportë, jo kontejner)“, vijon më tej ai.
Kësisoj, Dervishaj duke e cilësuar si “ministër parimor” Çekun, i bëri thirrje ndër të tjera që të zgjidh një sekretar me integritet, të bëhet një auditim rrënjësor, heqjen e maturës dhe testit të arritshmërisë.
“Këto do të nxjerrin një nga ministrat më të suksesshëm. A e dini pse? Sepse këto asnjë nga ministrat nuk pati guxim ta bëjë”, përmbyllet shkrimi i tij.
Endrit Nika është dënuar sot me 18 vjet burgim nga Gjykata Themelore në Prishtinë për vrasjen e të dashurës së tij, shtetases argjentinase Maria Clara Urdangaray.
Pas shpalljes së aktgjykimit, familjarët e së ndjerës e mirëpritën vendimin, por shprehën pakënaqësi për lartësinë e dënimit, duke paralajmëruar mundësinë e ankesës.
Menjëherë pas përfundimit të seancës, për media foli nëna e viktimës, e cila tha se procesi ka qenë i rëndë për familjen.
“Ka qenë e vështirë që nga fillimi për ta përballuar, por kemi besuar gjithmonë në drejtësinë e Kosovës. E vlerësojmë punën e prokurorit Armend Hamiti, i cili sot e dëshmoi angazhimin e tij me të gjitha provat që ka paraqitur. Clara e ka marrë drejtësinë dhe falënderojmë të gjithë për këtë,” u shpreh ajo.
Megjithatë, ajo theksoi se asnjë vendim nuk mund ta lehtësojë dhimbjen e familjes.
“Vajza jonë vazhdon të jetë e vdekur. Asgjë nuk mund të na ngushëllojë. Ai vazhdon të jetojë, ndërsa vajza jonë ka vdekur në formën më brutale,” deklaroi nëna e Maria Clara Urdangaray.
E pyetur nëse do ta apelojnë vendimin, ajo tha se kjo çështje do të diskutohet me avokatin e familjes.
“Kjo është diçka që duhet ta konsultojmë me avokatin tonë, por me shumë gjasë do ta apelojmë këtë vendim. Në sistemin tonë në Argjentinë, një vrasës i një gruaje dënohet me burgim të përjetshëm. Natyrisht, po e kërkojmë edhe ne këtë,” shtoi ajo.
18 vite burgim për Endrit Nikën, të akuzuarin për vrasjen e të dashurës argjentinase në Fushë Kosovë