Category: Lajme

E ngarkuara me Punë e Shtetet e Bashkuara të Amerikës në Kosova, Anu Prattipati, ka zhvilluar një takim me kryeministrin e Kosovës, Albin Kurti.

Sipas njoftimit të Ambasadës amerikane, marrëdhëniet mes dy vendeve kanë potencial të madh, veçanërisht në zgjerimin e tregtisë dhe investimeve.

ShBA-ja ka theksuar se pret angazhim konstruktiv për të çuar përpara prioritetet e përbashkëta, në funksion të paqes dhe stabilitetit rajonal.

Kryeministri Kurti ka emëruar Imri Demelezin në pozitën e zëvendësministrit të parë të Bujqësisë, Pylltarisë dhe Zhvillimit Rural.

Demelezi e ka mbajtur pozitën e zëvendësministrit të këtij dikasteri edhe përgjatë mandatit të kaluar njofton ZMK.

Kryeministri Kurti e uroi Demelezi për detyrën dhe i dëshiroi suksese në përmbushjen e përgjegjësive të tij

Në seancën gjyqësore të mbajtur të enjten në rastin e sulmit në Banjskë të Zveçanit ndaj të akuzuarve Blagoje Spasojeviq, Vladimir Toliq dhe Dushan Maksimoviq, është bërë administrimi i provave në këtë rast, raporton Ekonomia Online.

Gjatë seancës janë paraqitur propozimet e prokurorisë për administrimin e provave, kundërshtimet e mbrojtjes lidhur me ligjshmërinë dhe relevancën e tyre, si dhe kërkesa shtesë nga palët për përfshirje ose përjashtim të materialeve të caktuara, ndërsa seanca është ndërprerë për të vazhduar ditën pasuese.

Prokurori i Shtetit, Naim Abazi, deklaroi se duke qenë në fazën e administrimit të provave sipas propozimit në aktakuzë, aktualisht në këtë proces janë duke u gjykuar vetëm tre të pandehur dhe për këtë arsye prokuroria ka propozuar që disa prova që lidhen me të pandehur të tjerë të mos administrohen, ndërsa disa të tjera po.

“Meqë jemi në këtë fazë të administrimit të provave ashtu siç e kemi propozuar në aktakuzë, jemi dëshmitarë që nga të gjithë këta të pandehur i kemi vetëm 3 që janë të gjykuar në këtë proces. Lidhur me këtë ne kemi propozuar që disa prova që lidhen me të pandehurit e tjerë të mos administrohen e disa prova të tjera të administrohen. Po propozoj me radhë provat që duhet të administrohen dhe ato që nuk duhet të administrohen. Gjithashtu kemi edhe dy raporte të pranuara përmes ndihmës juridike ndërkombëtare nga SHBA që do t’i propozojmë për administrim.

Ai tha se propozon gjykatës që të administrojë edhe dy raporte juridike ndërkombëtare.

Ai shtoi se këto raporte përfshijnë analiza të të dhënave elektronike të pranuara nga Meta dhe Google, që sipas tij lidhen me llogaritë elektronike të të akuzuarit Dushan Maksimoviq dhe përmbajnë të dhëna teknike, IP adresa, kontakte, materiale fotografike me armë dhe të dhëna të navigimit, duke theksuar se

“Raportin njoftues apo analizimin e të dhënave të pranuara nga META dhe Google që kanë të bëjnë me të dhënat elektronike të subjektit Dushan Maksimoviq i përpiluar nga njësia e hetimeve drejtoria kundër terrorizmit në Prishtinë. Këto dyja i janë dorëzuar autoriteteve të Kosovë, të cilat materiale në detaje janë analizuar nga hetimet përkatëse. Këto raporte përmbajnë të dhëna të natyrës teknike dhe të dokumentuara të nxjerra nga sistemet zyrtare të Google dhe Meta që lidhen me llogarinë elektronike të pandehurit Dushan Maksimoviq. Këto përmbajnë të dhëna të abonentit, IP adresa për krijimin e llogarisë së tij me origjinë nga Serbia, numri i telefonit për rikuperim me prefiks shtetëror të Serbisë, aktivizimi i shërbimeve si location history që përmban të dhëna nga Google Maps, YouTube dhe Android, lista e kontakteve të ruajtura në llogarinë e tij ku përfshihen persona të identifikuar në bazë të aktakuzës dhe të akuzuar në këtë proces gjyqësor, materiale fotografike të ruajtura nga Google Photo, ku shfaqen armë, municion dhe persona të tjerë të përfshirë në hetim. Të dhëna mbi kërkime dhe navigim në territorin e Kosovës përmes Google Maps, nga se analiza e kontakteve rezulton se ekzistenca e lidhjeve të drejtpërdrejta me të akuzuarit tregon ekzistencën e një rrjeti të komunikimit dhe ndërveprimit mes tyre. Nga analiza rezulton ora e fotografive ku shfaqen armë dhe municion si dhe fotografi ku i akuzuari paraqitet në shoqërinë e një rrjeti të komunikimit mes tyre. Këto prova janë siguruar në mënyrë të ligjshme dhe në përputhje me standardet ndërkombëtare”, tha ai.

Avokati i palës së dëmtuar Naim Rudari tha se mbështet propozimin e prokurorisë, por që pati edhe disa propozime që të administrohen edhe disa prova të tjera.

Avokati i të akuzuarit Blagoje Spasojeviq, Ljubomir Pantovic, tha se në mënyrë të përgjithshme i kundërshton provat materiale të propozuara për administrim, duke shtuar se nga aktakuza nuk mund të vërtetohet lidhja e të mbrojturit të tij me provat, përveç një rasti që lidhet me gjurmët e barutit në rrobat e tij, ndërsa sipas tij provat e tjera lidhen kryesisht me mënyrën e arrestimit dhe nuk kanë rëndësi juridike.

Ai po ashtu ka propozuar edhe disa prova që duhet të administrohen, duke përfshirë edhe një foto.

“Sa i përket kundërshtimit, unë në fillim do të them se në mënyrë të përgjithshme e kundërshtoj provat materiale të cilat janë të propozuara që të administrohen në këtë shqyrtim. Këtë e bëj për shkak se nga kjo aktakuzë nuk është e mundur duke shikuar në mënyrë objektive që të vërtetohet se në çfarë lidhje është i mbrojturi im me këto prova. Përveç se në një rast ku flitet për gjurmët e barutit në rrobat e tij. Të gjitha të tjerat në shqyrtim të provave që janë të cekura në aktakuzë kanë të bëjnë vetëm me përshkrimin e mënyrës në të cilën është arrestuar Blagoje Spasojeviq që nuk është e rëndësisë juridike.

Avokati i të akuzuarit Vladimir Toliq, Millosh Deleviq, deklaroi se në mënyrë gjenerale i kundërshton të gjitha provat materiale të prokurorisë, pasi sipas tij ato janë siguruar në kundërshtim me ligjin dhe rregullat e procedurës penale në Kosovë dhe si të tilla nuk mund të shërbejnë si bazë për vërtetimin e fajësisë.

“E kundërshtoj në mënyrë gjenerale të gjitha provat materiale të prokurorisë sepse janë të siguruara në kundërshtim me ligjin dhe rregullat e Kosovës për procedurën penale. Si të tilla nuk mund të jenë bazë për vërtetimin e fajësisë”, tha ai.

I akuzuari Vladimir Toliq deklaroi se fotografia e paraqitur në aktakuzë është realizuar në momentin kur ai është gjetur në vendin e ngjarjes dhe se që nga momenti i afrimit të zyrtarëve policorë është bërë incizim dhe fotografim i vazhdueshëm nga një zyrtar policor, duke shtuar se pret që këto incizime dhe fotografi të jenë në posedim të policisë dhe të dëshmojnë se ai nuk ka poseduar armën e quajtur minahedhës, nuk ka pasur kontakt me të dhe nuk e ka parë asnjëherë, duke deklaruar se nuk ka pasur asnjë lidhje me atë armë.

“Sa i përket fotografisë e cila është treguar në aktakuzë, ajo është fotografi e cila është bërë me vetë daljen në vendin e ngjarjes ku unë jam gjetur. Nga ai moment kur më janë afruar zyrtarët policorë, ka qenë incizim dhe fotografim konstant nga një zyrtar policor, ashtu që shpresoj që këto incizime dhe fotografi kanë mbetur tek ata dhe ata mund ta provojnë se unë nuk kam poseduar armën, të ashtuquajturën minahedhës. Se nuk kam pasur kurrfarë kontakti me të, nuk e kam parë. Dhe krejt këtë gjë e hedh dhe deklaroj se nuk kam pasur kurrfarë lidhje dhe kontakt me atë armë”, tha ai.

Kundërshtime ndaj këtyre provave pati edhe avokatja e të akuzuarit Dushan Maksimoviqit, Jovana Fillipoviq.

I akuzuari Dushan Maksimoviq deklaroi se rreth një vit më parë kishte bërë kërkesë nga paraburgimi për t’i parë video-incizimet që janë pjesë e aktakuzës, por ishte njoftuar se nevojitet aprovimi i gjykatës, duke kërkuar që t’i mundësohet shikimi i kësaj prove në prani të avokates në mënyrë që të mund të dëshmojë më lehtë para gjykatës pafajësinë e tij.

“Unë diku para një viti kam bërë një kërkesë në paraburgim që të më miratohet që të shikoj video incizimet që janë në aktakuzë. Nga paraburgimi më kanë njoftuar se duhet aprovimi nga gjykata. Andaj do të kërkoja nëse është e mundur që të më miratohet që atë provë ta shikoj në prani të avokatës në qendrën e paraburgimit, ashtu që të mundem më lehtë para kësaj gjykate ta vërtetoj pafajësinë time që nuk kam lidhje me ngjarjet e 24 shtatorit”, tha ai.

Pala mbrojtëse gjithashtu u ankua se prokuroria nuk i ka pajisur me të gjitha shkresat e lëndës dhe provat e tjera, ndërsa avokati Millosh Deleviq kërkoi ndërprerjen e shqyrtimit gjyqësor deri në pajisjen e plotë me materialet e rastit.

Avokati i të akuzuarit Vladimir Toliq, Millosh Deleviq, tha se kërkon që të ndërpritet shqyrtimi gjyqësorë deri sa të pajisemi në total me shkresta e lëndës dhe me provat e tjera.

Kryetari i trupit gjykues, Ngadhnjim Arrni, tha se për shkak të përfundimit të orarit të punës trupi gjykues ka marrë aktvendim për ndërprerjen e seancës dhe vazhdimin e saj ditën e nesërme.

Sipas Prokuroria Speciale e Republikës së Kosovës, 45 persona, përfshirë edhe tre të akuzuarit që ndodhen në paraburgim, akuzohen se më 24 shtator 2023 kanë kryer sulm terrorist në Banjskë të Zveçanit, ku mbeti i vrarë zyrtari policor Afrim Bunjaku.

Presidenti i ShBA-ve, Donald Trump e ka falënderuar presidenten e Kosovës, Vjosa Osmanin për pjesëmarrjen e saj në Bordin e Paqes, mbledhja e të cilit po zhvillohet aktualisht në Uashington.

Tre persona, njëri prej tyre i mitur, janë arrestuar në Mitrovica pas raportimit të dy rasteve të thyerjeve të lokaleve në zona të ndryshme të qytetit.

Sipas njoftimit zyrtar, njësitë policore pas veprimeve intensive operative dhe hetimore kanë arritur të identifikojnë dhe arrestojnë të dyshuarit.

Gjatë kontrollit, tek ta janë gjetur gjësendet e vjedhura nga lokalet e thyera.

Të dyshuarit janë shoqëruar në stacion policor dhe ndaj tyre është iniciuar rasti penal “Vjedhje e rëndë”. Me vendim të prokurorit, atyre u është caktuar masa e ndalimit prej 48 orësh.

Presidentja e Kosovës ka qëndruar në Washington për takimin inaugurues të Bordit të Paqes. Ajo ka shpërnda pamje para takimit.

“Në Washington DC, para takimit inaugurues të Bordit të Paqes me Presidentin Trump dhe liderë të tjerë botërorë, për t’i avancuar përpjekjet e përbashkëta për paqe dhe siguri globale”, ka shkruar Osmani.

Irani dhe Rusia kanë nisur stërvitje të përbashkëta detare në ujërat jugore të Iranit më 19 shkurt, derisa Shtetet e Bashkuara po vazhdojnë ta zgjerojnë praninë e tyre ushtarake në Detin Arabik.

Stërvitjet po zhvillohen kryesisht në Ngushticën e Hormuzit, në Gjirin e Omanit dhe në pjesën veriore të Oqeanit Indian, transmeton Radio Evropa e Lirë.

Të njohura si “Brezi i Sigurisë Detare”, këto ushtrime vjetore mbahen që nga viti 2019 dhe zakonisht kanë përfshirë edhe Kinën, megjithëse Pekini nuk duket të jetë i përfshirë në stërvitjet e tanishme.

Admirali i marinës iraniane, Hassan Maqsudlu, u tha gazetarëve se një nga qëllimet e stërvitjeve është “parandalimi i çdo veprimi të njëanshëm në rajon”, me gjasë duket duke iu referuar rritjes së pranisë ushtarake amerikane.

Stërvitjet e përbashkëta Iran-Rusi
Sipas mediave iraniane, marinat e Iranit dhe Rusisë zhvilluan ushtrime të vëzhgimit ajror dhe praktikuan formacione taktike si dhe manovrime në kuadër të stërvitjes.

Ushtrimet përfshinë gjithashtu skenarë të formacioneve ofensive, me qëllim përmirësimin e koordinimit taktik, forcimin e komandës dhe kontrollit të përbashkët, si dhe simulimin e reagimit të shpejtë në kushte operacionale, ku njësitë praktikuan teknika të kombinuara dislokimi dhe manovrimi.

Forcat pjesëmarrëse përfshinin njësi nga marina iraniane dhe marina e Korpusit të Gardës Revolucionare Islamike (IRGC) – si anije luftarake, anije me raketa, helikopterë, ekipe të operacioneve speciale dhe mjete të shpejta sulmuese – së bashku me korvetën ruse Stoikiy dhe avionë luftarakë të Forcave Ajrore Iraniane.

IRGC-ja, e cila i zhvilloi stërvitjet e veta detare në Ngushticën e Hormuzit më 16–17 shkurt, pritet të shpallet zyrtarisht organizatë terroriste nga Bashkimi Evropian këtë javë.

Vendimi për ta futur IRGC-në në listën e zezë u mor muajin e kaluar.

Nga pala ruse, duket se vetëm një anije luftarake mori pjesë në stërvitje.

“Të vogla dhe simbolike”
Duke e theksuar praninë e kufizuar të Rusisë, ish-oficeri i marinës iraniane, Mohammad Parsi, i përshkroi stërvitjet si “të vogla dhe simbolike”.

“Nuk mund ta paramendoj Rusinë duke ofruar mbështetje reale në një përballje të drejtpërdrejtë mes Iranit dhe Shteteve të Bashkuara”, i tha ai Radios Farda, duke shtuar se Moska ka gjasa ta përdorë Teheranin si “mjet presioni” në përballjen e saj më të gjerë me Perëndimin, në vend që të angazhohet për mbrojtje të ndërsjellë.

Stërvitjet po zhvillohen ndërsa Shtetet e Bashkuara dhe Irani po i vazhdojnë bisedimet për një marrëveshje të mundshme që do të kufizonte programin bërthamor të Iranit dhe do të shmangte luftën.

“Irani do tregonte mençuri duke arritur marrëveshje”, tha zëdhënësja e Shtëpisë së Bardhë, Karoline Leavitt, më 18 shkurt, pasi rundi i dytë i bisedimeve SHBA–Iran në Gjenevë përfundoi pa ndonjë përparim.

Uashingtoni ka rritur praninë e tij ushtarake në Lindjen e Mesme javët e fundit dhe së fundmi ka dërguar aeroplanmbajtësen e dytë në Detin Arabik.

Sipas disa raportimeve, fuqia ajrore amerikane në rajon ka arritur tani nivelin më të lartë që nga pushtimi i Irakut në vitin 2003./REL

Kryetari i Grupit Parlamentar të Partisë Socialiste, Taulant Balla, deklaroi në Kuvendin e Shqipërisë se vendi duhet të mbrojë luftën e pastër të Ushtrisë Çlirimtare të Kosovës.

Ai e quajti të papranueshme përpjekjen e prokurorëve të Gjykatës Speciale në Hagë për të cilësuar Ushtrinë Çlirimtare të Kosovës si një ndërmarrje kriminale.

“Është e papranueshme se si mund t’i vishet një lufte çlirimtare kjo akuzë, e cila as nuk bazohet në prova. Më e rëndë se kaq është fakti se si mund të arrihet në përfundimin që viktima të jetë më fajtore se vrasësi dhe përdhunuesi; dhe si ai që sot mban përgjegjësi për 1,600 trupa, motra e vëllezër shqiptarë të Kosovës, të cilët në gjuhën poshtër burokratike quhen të zhdukur, të vdekur, por të pakallur. Në këtë këndvështrim, mendoj që sa herë na jepet mundësia të flasim me të huaj dhe partnerë ndërkombëtarë, na takon si përgjegjësi morale, politike dhe kombëtare të ngremë çështjen e pafajësisë së katër udhëheqësve të UÇK-së: presidentit Thaçi, kryetarëve të Kuvendit Kadri Veseli dhe Jakup Krasniqi, dhe ministrit të Brendshëm Rexhep Selimi. Ata jo vetëm që luftuan për lirinë dhe çlirimin e Kosovës, por kontribuan në krijimin e shtetit të Kosovës. Në momentin historik të shpalljes së pavarësisë, më 17 shkurt, jemi mbledhur këtu në sallë për ta ndjekur këtë moment historik nga Parlamenti i Shqipërisë, ku presidenti Thaçi mbante fjalën e shpalljes së pavarësisë”, tha Balla.

Deputeti shtoi se turpi i takon prokurorëve, të cilët sipas tij, sot konsiderojnë themeluesit e shtetit të Kosovës si anëtarë të një ndërmarrjeje kriminale.

“Sot ngrihet një akuzë kundrejt udhëheqësve dhe turpi i takon prokurorëve, të cilët sot konsiderojnë themeluesit e shtetit të Kosovës anëtarë të një ndërmarrjeje kriminale. Kjo është një përgjegjësi që na takon të gjithëve. Nëse nuk bëjmë gjithçka që duhet për ta ndaluar këtë paturpësi, historia do të na bëjë edhe ne fajtorë, sepse nuk arritëm të mbrojmë historinë e ndritur të Ushtrisë Çlirimtare të Kosovës, në momentin kur shqiptarët na kishin zgjedhur përfaqësues të tyre. Faleminderit”, përfundoi ai.

Hungaria po konsideron ndërprerjen e eksporteve të energjisë elektrike dhe gazit drejt Ukrainës në rast se Kievi nuk rikthen furnizimin me naftë ruse përmes tubacionit Druzhba.

Kjo u bë e ditur nga zyra e kryeministrit hungarez, Viktor Orban, ndërsa Hungaria dhe Sllovakia përballen me sfidën e sigurimit të furnizimeve pas ndërprerjes së rrjedhave më 27 janar, pas një sulmi me dron rus që, sipas Ukrainës, dëmtoi infrastrukturën e tubacioneve.

Rafineritë hungareze planifikojnë të përdorin rezervat shtetërore të naftës, ndërsa qeveria sllovake miratoi të mërkurën një kredi prej 250,000 tonësh. Zyra e Orbanit njoftoi gjithashtu publikimin e rezervave strategjike të naftës, me kërkesë të kompanisë së rafinimit MOL.

Hungaria dhe Sllovakia akuzojnë Ukrainën për vonesë në rifillimin e rrjedhave të naftës për arsye politike dhe kanë njoftuar ndalimin e eksporteve të naftës drejt Ukrainës.

Kryeministri Viktor Orban ka shprehur hapur qëndrimin kundër anëtarësimit të Ukrainës në Bashkimin Evropian. Të dy vendet kanë ruajtur marrëdhënie të qëndrueshme me Vladimir Putin gjatë luftës gati katërvjeçare në Ukrainë.

Qeveria hungareze beson se Ukraina mund të përpiqet të ndikojë në zgjedhjet që do të mbahen më 12 prill, një pretendim që Kievi e ka mohuar. Orban është në pushtet për 16 vjet, por sondazhet e fundit tregojnë një humbje të epërsisë përpara zgjedhjeve.

Shtetet e Bashkuara, nën udhëheqjen e presidentit Donald Trump, po i bëjnë presion NATO-s që të reduktojë ndjeshëm aktivitetet jashtë territorit tradicional, përfshirë përfundimin e një misioni kyç të aleancës në Irak, kanë thënë katër diplomatë të NATO-s për “POLITICO”.

Sipas tyre, SHBA-ja ka lobuar muajt e fundit edhe për zvogëlimin e misionit paqeruajtës të NATO-s në Kosovë (KFOR), si dhe që Ukraina dhe partnerët e Indo-Paqësorit të mos marrin pjesë zyrtarisht në samitin vjetor të aleancës që do të mbahet në korrik në Ankara.

Kjo nismë pasqyron përpjekjen e Shtëpisë së Bardhë për ta trajtuar NATO-n si një pakt strikt euroatlantik të mbrojtjes dhe për të zhbërë dekada zgjerimi drejt menaxhimit të krizave, partneriteteve globale dhe iniciativave të bazuara në vlera – fusha që prej kohësh kanë irrituar presidentin amerikan dhe bazën e tij politike MAGA (Bëjeni Amerikën përsëri të madhe).

Brenda NATO-s, kjo qasje është quajtur “kthim në misionin themelor”, duke nënkuptuar kufizimin e aktiviteteve “jashtë zone” që tejkalojnë detyrat thelbësore të mbrojtjes dhe parandalimit.

Presion për t’u tërhequr nga Iraku

NATO-ja aktualisht mban mision këshillimor në Irak, që synon forcimin e institucioneve të sigurisë dhe parandalimin e rikthimit të Shtetit Islamik. Ky mision u krijua gjatë mandatit të parë të Trumpit në vitin 2018 dhe është zgjeruar disa herë që nga viti 2021, me kërkesë të Bagdadit.

Sipas diplomatëve, Washingtoni ka kërkuar që misioni të përfundojë që në shtator. Paralelisht, SHBA-ja pritet të tërheqë rreth 2,500 ushtarë nga Iraku në kuadër të një marrëveshjeje të vitit 2024 me qeverinë irakiane, si pjesë e angazhimit të Trumpit për t’i dhënë fund “luftërave të pafundme”.

Ekspertë të sigurisë paralajmërojnë se tërheqja e NATO-s dhe SHBA-së mund të fuqizojë grupet e milicive dhe të destabilizojë rajonin, përfshirë Kurdistanin verior.

Megjithatë, brenda aleancës ka kundërshtime. Sipas diplomatëve, shumica e vendeve anëtare janë të hapura për zvogëlim gradual të misionit, por jo për përfundim të shpejtë.

Diskutime të hershme për zvogëlimin e KFOR-it në Kosovë

Më shqetësuese për aleatët evropianë është sinjalizimi i SHBA-së për të reduktuar praninë e NATO-s në Kosovë. Misioni paqeruajtës KFOR, i autorizuar nga OKB-ja dhe i vendosur në vitin 1999 pas luftërave në ish-Jugosllavi, aktualisht numëron rreth 4,500 trupa.

Engjëllushe Morina, bashkëpunëtore e lartë e politikave në Këshillin Evropian për Marrëdhëniet me Jashtë, ka thënë se misioni mbetet “i domosdoshëm” për sigurinë rajonale.

“Nëse NATO-ja tërhiqet, kjo mund t’i inkurajojë separatistët serbë në veri të Kosovës dhe të ketë efekt zinxhir në rajon, përfshirë Republikën Sërpska në Bosnje e Hercegovinë”, ka thënë ajo.

Një diplomat i lartë i NATO-s ka thënë se ekziston shqetësim serioz, pasi “gjërat në Ballkanin Perëndimor mund të përshkallëzohen shpejt”.

Megjithatë, zyrtarë të NATO-s theksojnë se nuk ka asnjë afat kohor për përfundimin e misionit në Irak apo për KFOR-in dhe se çdo vendim kërkon miratimin e të 32 vendeve anëtare.

Presion për përjashtimin e Ukrainës dhe partnerëve të Indo-Paqësorit

SHBA-ja po ushtron gjithashtu presion që Ukraina dhe katër partnerët zyrtarë të NATO-s në Indo-Paqësor – Australia, Zelanda e Re, Japonia dhe Koreja e Jugut – të mos ftohen në takimet formale të samitit të korrikut në Ankara. Sipas diplomatëve, kjo argumentohet si përpjekje për të reduktuar numrin e takimeve dhe për ta fokusuar samitin në çështjet “thelbësore” të NATO-s.

Një vendim i tillë do të sinjalizonte një përqendrim më të madh në çështjet bazë të aleancës, duke lënë në plan të dytë partneritetet globale.

Po ashtu, NATO-ja ka vendosur të mos organizojë Forumin Publik këtë vit – një aktivitet paralel që zakonisht rrit dukshmërinë e samitit dhe përfshin liderë, ekspertë të mbrojtjes dhe zyrtarë qeveritarë. Zyrtarisht, kjo lidhet me kursime buxhetore, por disa diplomatë besojnë se pas vendimit qëndron indirekt presioni amerikan për të reduktuar financimin e organizatave ndërkombëtare.

Sipas kritikëve, në një kohë kur NATO-ja përpiqet të bindë opinionin publik për rëndësinë e aktiviteteve të saj dhe rritjes së shpenzimeve të mbrojtjes, kufizimi i komunikimit publik mund të jetë i dëmshëm.