Category: KULTURË

Artpolis, përmes Festivalit FemArt, edhe sivjet pasuron skenën kulturore të Kosovës me aktivizëm artistik të nivelit botëror, krahas prezantimit dhe mbështetjes së skenës vendore dhe rajonale.

Më 15-21 maj, 2023 në Prishtinë dhe Mitrovicë do të realizohet edicioni i 11-të i Festivalit Ndërkombëtar të Artisteve dhe Aktivisteve – FemArt, i cili vjen nën moton “Kalle Tutën”.

“Kalle Tutën” vjen si thirrje për të flakur tutje tutën, me i dhënë mundësi të resë, guximit dhe dashnisë që të lindë.

Guximi është parakusht që të mposhtim frikën. Për shumë gjatë na mësuan të heshtim, është koha të guxojmë të flasim. Do të flasim dhe do të kallim tutën guximshëm e me dashni edhe në edicionin e 11-të të Festivalit FemArt.

“Më 15-21 maj, 2023 dhe çdo ditë tjetër do të flasim edhe për gratë që nuk dëgjohen, edhe për vajzat që ëndërrojnë. Kemi kaq shumë për të thënë përmes shfaqjeve teatrore, paneleve të diskutimit, ekspozitave, konferencave, performancave, punëtorive dhe këngëve e kërcimit”, thuhet në njoftim.

“Arti dhe aktivizmi janë hapësira jonë e lirisë, e rrëfimit mbi jetën, kuriozitetit dhe magjepsjes sonë të pafund. Përmes artit tonë themi atë që mendojmë dhe besojmë, e përmes diversitetit tregojmë se kush jemi. Dallimet tona etnike, fetare, racore e gjinore përbashkohen rreth feminizmit tonë edhe në këtë edicion të FemArt. Kemi vullnet të rimarrim atë që na takon – jetën e përmbushur. Do ta bëjmë tash! Me guxim për çlirim”, thuhet tutje.

Kalle tutën nga patriarkati! Kalle tutën e paragjykimit! Kalle tutën e dështimit! Kalle tutën nga gjithçka që të ndalon të lëvizësh. Mjaft kemi qëndruar një hap prapa! Bashkë e kallim tutën! Bashkë zhvendosemi një hap para!

Prandaj, guxo të lëvizësh edhe në errësirën e natës. E nëse ke frikë të lëvizësh në errësirën e natës, së bashku e ndriçojmë qytetin! Guxo e kalle tutën për me i lënë vend dashnisë për veten dhe të tjerët!

Gratë artiste do të bëjnë hapjen e Festivalit FemArt përmes shfaqjes “Fefu dhe Shoqet e Saj”, produksion i veçantë nga Artpolis dhe premierë në edicionin e 11-të të Festivalit. I gjithë ekipi në krijimin e kësaj shfaqje përbëhet nga artiste të dëshmuara të skenës teatrore kosovare, përfshirë këtu edhe Trupën Artistike Rezidente të Artpolis me regji të Arlinda Morinës.

“Fefu dhe Shoqet e Saj” do të prezantohet më 15 maj nga ora 20:00 në Menzën Ramiz Sadiku.

Ndër të tjera publiku në Kosovë do të ketë rastin të shikojë shfaqjet e prezantuara në Festivalin prestigjioz të Avignonit; “Jogging” nga Libani, dhe “Olympe Et Moi” nga Franca, me artistët e nivelit botëror Hanane Hajj Ali, Patrick Mons dhe Veronique Ataly.

Përveç tyre, pjesë e FemArt do të jetë Trupa Artistike nga Izraeli të udhëhequr nga një prej producenteve më të njohura në botë, Yu Jingyi, dhe aktori dhe artisti multidisiplinar Yehezkel Lazarov. Përveç prezantimit të shfaqjes “The Superfluos Man – Oblomov” ata do të ndajnë përvojën dhe njohuritë e tyre përmes një punëtorie dhjetë ditore me artistë nga Kosova, duke krijuar kështu një urë lidhëse të rëndësishëm ndërmjet dy vendeve duke bashkëpunuar me artistët e Trupës së Artpolis dhe Noah Dance Company që do të rezultojë me shfaqjen e përbashkët në natën e fundit të festivalit.

“The Superfluos Man – Oblomov”, e prezantuar në “Isra-Drama: Ekspozimin Ndërkombëtar të Teatrit Izraelit”, është një përshtatje e klasikut rus Oblomov që ngre pyetjen: A ka të drejtë njeriu të jetojë jetën e tij pa lënë gjurmë?

Në këtë edicion sjellim tingujt latin përmes koncertit të La Chica-s, e cila sjell temperamentin dhe entuziazmin shpirtëror venezuelas, të përzier me ndikimin multikulturor, urban dhe modern parisien. Në muzikën e saj ndërthuren zhanret e ndryshme si pop, hip-hop, ritëm dhe bluz, muzikë latine, muzikë afro-karaibe dhe ndikimi i muzikës klasike të Debussy-t që vjen në tri gjuhë; spanjisht, frëngjisht dhe anglisht.

Këtyre iu bashkohen edhe artiste/ë dhe aktiviste/ë nga Sllovenia përmes shfaqjes “Pesë Llojet e Heshtjes”, me regji nga Maša Pelko, Polonia “Gruaja dhe Jeta” me regji të Piotr Łukaszczyk, Serbia “Vajzat” me regji të Milena Bogavac, si dhe DJ nga Bosnja dhe Herzegovina Marina Mimoza.

E rol të rëndësishëm luan sivjet edhe skena artistike vendore, fuqizimi i së cilës është një nga synimet kryesore të Festivalit FemArt, që nga themelimi. FemArt, e krijuar nga gratë për gratë, hapësirë të veçantë iu jep edhe sivjet artisteve dhe aktivisteve vendore, prezantimit dhe promovimit të punëve të tyre.

Pjesë e Festivalit është edhe filmi “Vera Andrron Detin” nga Kaltrina Krasniqi, që ka rrëmbyer dhjetëra çmime të rëndësishme vendore dhe ndërkombëtare, i cili shoqërohet me një panel diskutimi në mes artisteve që e krijuan filmin dhe publikut në Kino Armata.

Në bashkëpunim me Teatrin Kombëtar do të prezantohen shfaqjet “Gratë” me regji të Nastazja Domaradzka, si dhe “Molly” me regji të Sibel Abdiu. Kurse në bashkëpunim me Teatrin e Qytetit të Prizrenit “Bekim Fehmiu” do të prezantohet shfaqja “Deni dhe Deti i Thellë i Kaltër” me regji të Ana Bateva. E sivjet bashkëpunimi vazhdon me Teatrin Oda, Teatrin Dodona, Teatrin e Qytetit të Mitrovicës, dhe Pallatin e Rinisë. Kurse tek Klubi i Boksit sjellim ekspozitën “Status” nga Mimozë Sahiti, me kurator Albert Heta.

Ndërsa tek Dispanzeri afër QKMF-së në Prishtinë do të prezantohet shfaqja “Sober” me regji nga Butrint Pasha, në të cilën luajnë aktorët e Trupës Artistike Rezidente të Artpolis.

FemArt sjell në Bibliotekën Kombëtare konferencën “Kalle Tutën: Një Konferencë për Jetesë të Guximshme”, që bën bashkë artiste/ë, aktiviste/ë dhe personalitete të shquara në këto panele diskutimi: “Përtej paragjykimeve: Fuqizimi i grave për të tejkaluar stereotipet në vendimmarrje në art dhe në kulturë”, “Paqja dhe siguria: Kapërcimi i frikës dhe ndërtimi i komuniteteve të qëndrueshme”, “Thyerja e stigmës: Shëndeti mendor dhe mirëqenia në kohë sfiduese”.

Në Mitrovicë programi i FemArt realizohet në bashkëpunim me 7 Arte, si dhe Muzeun e Mitrovicës. Aty do të prezantohen dokumentari dhe paneli i diskutimit Biba May “Jo Më” produksion nga Artpolis, shfaqja “Gratë”, si dhe performanca “Olympe et Moi”.

Edicioni i 11-të do të përmbyllet me koncertin e tre emrave të njohur në skenën e muzikës vjeneze Rina Kaçinari Trio, në përbërje të Rina Kaçinarit, Carles Muñoz Camarero dhe Jörg Mikula, me mysafir special Kori i Grave “Okarina”. Kjo treshe do të prezantojë në FemArt kompozime origjinale që përshkruajnë momentet e ndryshme të jetës trishtimin, dashurinë dhe lumturinë.

Ditët në vazhdim FemArt do të ndajë me ju detajet e programit, përfshirë edhe konceptet e aktiviteteve, për të cilat mund të informoheni në rrjetet sociale dhe webfaqen e Festivalit.

Sopranoja shqiptare me famë botërore Ermonela Jaho është nderuar nga juria ndërkombëtare të ICMA ( International Classical Music Awards) me çmimin “Artisti i Vitit 2023”, gjatë një koncerti gala në Wrocław të Polonisë.

Lajmi është bërë i ditur nga vetë sopranoja në rrjetet sociale. Mes falenderimeve të shumta sopranoja shkruan se “Le të punojmë të gjithë së bashku për ta lënë këtë botë një vend më të mirë sesa e gjetëm përmes artit”.

Mes atyre që e kanë uruar sopranon Jaho ka qenë dhe presidenti i Shqipërisë Bajram Begaj. “Ju jeni një Ambasadore e shkëlqyer e Shqipërisë në botë, ndaj arritjet tuaja artistike kanë duartrokitjet dhe mirënjohjen e të gjithë shqiptarëve!” shkruan zoti Begaj në Facebook.

“Ne të gjithë jemi ambasadorë të Shqipërisë në çdo moment që jetojmë, si brenda Shqipërisë ashtu edhe në çdo kontakt me botën. Mirënjohjen dhe duartrokitjet e shqipëtarëve i mbaj gjithmonë në zemër” është përgjigjur sopranoja shqiptare me famë botërore Ermonela Jaho.

“Se çfarë instrumenti i rëndësishëm dhe i gjithanshëm është zëri i njeriut, tregoi Artistja e Vitit, Ermonela Jaho. Kjo soprano shqiptare i la të shkëlqejë të gjitha aftësitë e saj në arien e interpretuar plot lëvizje “Io son l’umile ancella” nga Adriana Lecouvreur nga Francesco Cilea nën shoqërimin e të orkestrës” shkruhet në faqen e ICMA në internet për prezantimin e Jahos në koncertin gala në Wrocław të Polonisë./RTSh

Librat për shkencën i bënë bashkë akademikët nga Kosova e Shqipëria.

Ata shpalosën krijimtarinë e tyre në edicionin e dytë të panairit mbarëkombëtar të Librit Akademik dhe Shkencor.

“Librat shkencorë janë më të paktë në numër krahasuar me librat letrarë dhe publicistikë. Nuk shtypen me letër luksoze dhe të lënë përshtypjen e indiferencës. Por, magjia e tyre qëndron sa në ide të reja, sa në dije të gjithanshme dhe dije të thella”, tha kryetari i ASHAK-së, Mehmet Kraja.

Të kënaqur me panairin që synohet të bëhet traditë, u ndanë edhe akademikët bashkorganizatorë të panairit.

Me këtë rast, edhe puna e akademikut Sabri Hamiti u shpërblye me çmimin “Jakov Xoxa”.

“Falënderimet e mia do të ishin mbase shumë, po janë për të gjitha institucionet që e mundësuan këtë”, tha Hamiti.

Nënkryetarja e Akademisë së Shkencave dhe Arteve të Kosovës, Justina Shiroka Pula, tregon se në këtë edicion do të promovohen 37 libra nga fusha të ndryshme.

“Nëse nuk gjejnë direkt ndonjë shkencë mund të gjejnë botime, të cilat japin informacion dhe konkluzione të autorëve të ndryshëm të institucioneve të ndryshëm”, tha nënkryetarja e ASHAK-së, Justina Shiroka-Pula.

Sipas saj, sfida më e madhe për institucionet shkencore është financimi.

Panairi i Librit Akademik dhe Shkencor filloi sot e do të zgjasë deri më 26 prill. Ndërkaq, për herë të parë u mbajt vitin e kaluar në Tiranë. /atvlive.tv

Mic Sokoli lindi në vitin 1839 në Fang të Bujanit, Tropojë dhe ra në vitin 1881. Ishte luftëtar i shquar i Lidhjes Shqiptare të Prizrenit, Hero i Popullit.

Mic Sokoli rrjedh nga një familje patriotësh. Udhëhoqi njësi të mëdha luftarake të Lidhjes në shumë beteja. u shqua për strategji, gatishmëri dhe trimëri. Mori pjesë aktive në luftimet e Shkupit, Prizrenit, Ferizajit, Gjilan, në Gjakovë kundër Mehmet Ali Pashës, u dallua në betejën e Nokshiqit kundër agresorëve malazezë, luftoi në Plavë e Gucia, në Hot, Grudë, Tuz. Pastaj në rrafshin e Kosovës në betejën e madhe të Shtimes, të Carralevës dhe së fundmi në atë të Slivoves nga ku dhe ra heroikisht.

Në betejën e Slivovës në afërsi të Shtimes, në (prill 1881) kundër forcave osmane të Dervish Pashës kreu një akt trimërie të rrallë, duke i vënë gjoksin topit të armikut dhe ra heroikisht në fushën e betejës duke frymëzuar të gjithë luftëtarët e tjerë të vazhdojnë luftën me trimëri e krenari.

Mici ra heroikisht në moshën 42 vjeçare, duke lënë pas gruan dhe 2 fëmijë, një djalë dhe një vajzë. Më shumë se një shekull më pas, po një nip i tij e vazhdoi aty ku e la Mici, aty ku e ndërpreu Lidhja Shqiptare. Ai kishte trashëguar nga gjenet e Micit trimërinë dhe shkathtësinë ushtarake. Nipi i Mic Sokolit, ra dëshmorë duke luftuar për bashkim kombëtar dhe quhet Tahir Sinani.

Shumë ngjarje dhe luftëtarë të Epokës së Lidhjes Shqiptare të Prizrenit u përjetësuan përmes epikës historike, mirëpo vendin e parë e zë Mic Sokoli, prijësi i Krasniqes, biri i Sokol Ramës nga Malësia e Madhe. Heroizmi i pashoq i Micit u kthye në legjendë, dhe këngët për të jehuan nëpër vite duke mbërritur deri tek ne.

Bernë, 20 prill -Jemi dëshmitarë se diaspora e sotme shqiptare, kryesisht nga Kosova që jetojnë  dhe veprojnë në territorin helvetik, janë viktime e politikave diskriminuese të regjimit jugosllav dhe Serbisë së diktatorit serb Millosheviq, ku ky i fundit, shqiptarëve iu kishte shkatërruar gjithçka para viteve 1999, përfshirë këtu shkolla e xhamia.

Por sot këta ish-emigrantë e sot qytetarë të Zvicrës  janë shembull integrimi në territorin helvetik, të cilët janë bërë të njohur dhe të suksesshëm jo vetëm në futboll, por edhe në arsim, të cilët sot në Zvicër kanë 100 shkolla dhe 100 xhami, në të cilat po ruhet dhe kultivohet kultura dhe gjuha shqipe, ku në xhamia, ligjëratat dhe lutjet bëhen edhe në gjuhen shqipe, shkruan gazeta zvicerane në shqip Le Canton27.ch.

Sipas Zyrës Federale për Statistika (OFS) në Zvicër, aktualisht jetojnë dhe veprojnë 389.444 myslimanë apo 8% sipas regjistrimit të vitit 2021 nga popullsia rezidente e përhershme e moshës mbi 15 vjeç.

Sipas shifrave të fundit nga Zyra Federale e Statistikave (FSO) që datojnë nga viti 2019, 5.5% e banorëve të moshës 15 vjeç e lartë deklarojnë se janë myslimanë në Zvicër, pra rreth 390,000 njerëz. Por numri i tyre këto katër vitet e fundit është rritur në afro 400 mije.

Imami i Gjenevës Rijad Aliu uron festen e Bajramit komunitetit shqiptare dhe të huaj në gjuhen shqipe dhe tri gjuhë të tjera të Zvicrës

Imami i Gjenevës prof. Rijad Aliu, mbrëmë para qindra besimtarëve në Xhaminë e Gjenevës “Dituria” ka uruar Fitër Bajramin komunitetit shqiptarë dhe jo shqiptarë në gjuhën shqipe dhe në tri gjuhë tjera në Zvicër.

“Vëllezër dhe motra të nderuara, në emri tim personal dhe të Xhamisë sonë ‘Dituria’ në Gjenevë, të gjithë besimtarëve anë e mbanë botës islame ua uroj këtë festë të Bajramit, duke e lutur të Madhin Allah që harmonia, dashuria, solidariteti dhe toleranca të mbretëroje në mesin tonë këtu në Zvicër dhe paqja në botë”, është shprehur imami Aliu.

Njëkohësisht, me një mesazh drejtuar komuniteti shqiptarë në Zvicër iu është drejtuar me urime edhe imami i njohur Mehas Alija, kryetar i Unionit të Bashkësive Islame Shqiptare në Zvicër, duke kërkuar që në mesin tonë të kenë paqe dhe tolerancë pavarësisht nga religjioni, gjuha, raca apo origjina.

Shumica e myslimanëve në Zvicër vijnë nga vendet e ish-Jugosllavisë (42%) kryesisht shqiptarë nga Kosova, Maqedonia Veriore dhe Lugina e Preshevës, kurse nga Turqia (14%). Një e teta kanë kombësi zvicerane (mbi 30%, krahasuar me 12% në vitin 2000).

Një mbështetje e fuqishme nga Kuvajti, Katari dhe Turqia. Xhamitë shqiptare financohen nga vet organizimi, në baza vullnetare

Një nga bashkëbiseduesit tanë ka deklaruar se “gjithçka çfarë na ka shkatërruar Miloshiviqi me tanke në vendlindje, po përpiqemi t’i kemi sot këtu pran nesh në Zvicër..”. Sipas tij, sot në Zvicër, shqiptarët kanë mbi 200 qendra shkollore, mësim në gjuhen shqipe, po ashtu edhe mbi 100 xhami, qendra këto për falje, shkruan gazeta zvicerane Le Canton27.ch

Më 1 qershor 1978, mbreti Khaled erdhi nga Arabia Saudite për të inauguruar xhaminë e Gjenevës, më e madhja në vend. Mbretëria financoi ndërtimin e ndërtesës prestigjioze.

Ceremonia ishte zhvilluar në prani të Këshilltarit Federal Pierre Aubert, Kryetarit të Bashkisë së Gjenevës Pierre Raisin si dhe përfaqësuesve të kishave.

E vendosur në Petit-Saconnex, Xhamia e Madhe e Gjenevës përbëhet nga katër ndërtesa: Xhamia, një shkollë për mësimin e Kuranit, një bibliotekë dhe një laborator gjuhësor.

Xhamia e Madhe e Gjenevës është ndërtuar në vitin 1978 në rrethin e institucioneve ndërkombëtare në Grand-Saconnex. Është xhamia më e madhe në Zvicrën frankofone dhe e vetmja që ka një minare. Është gjithashtu e vetmja që njihet nga jashtë, xhamitë e tjera në Zvicrën frëngjisht folëse janë në ndërtesa civile.

Për 300 mijë shqiptarë në Zvicër 100 xhami janë pakë a shumë?.. Pas Xhamisë së Bernit, Gjenevës, Will-it, Spreitenbach dhe Reinach, shqiptarët e Zvicrës së shpejti edhe me një xhami në Friburg.

Me rritjen e numrit të shqiptarëve në Zvicër rreth (300 mijë) po rriten edhe shkollat dhe xhamitë në këtë vend. Themi kështu sepse para 4 vitesh, në prag të Ramazanit në Zvicër u hapën dy objekte fetare, u bë inaugurimi i dy xhamive të mëdha (Will dhe Gjenevë) për komunitetin shqiptar në këtë vend demokratik dhe tolerant. Dy imamët e këtyre xhamive kane falënderuar autoritetet zvicerane për këtë mundësi.

Ne Qershorin e vitit 2017, shqiptarët në Zvicër kishin ndërtuar dy xhami me një shumë prej 8 milionë CHF. Për katër vite, katër xhami në Zvicër, që kjo i bie se shqiptaret në Zvicër sikur ndërtojnë thuajse për çdo dy vite nga një xhami. Sipas imamëve dhe organizatoreve, në mesin e qindra kontribuuesve, sponsorëve shqiptarë e myslimanë, kishte edhe donatorë katolikë dhe zviceranë.

Shqiptarët në Zvicër bëhen me 100 shkolla dhe 100 xhami. Së shpejti shqiptarët e Friburgut më xhami të re “Assotiation Culturell Islamic Albanaise”

Sipas gazetës zvicerane në shqip Le Canton27.ch, në Zvicër janë mbi 100 xhami të shqiptareve. Shumica e xhamive shqiptare në Zvicër janë me imamë të rregullt, të punësuar. Numri më i madh i besimtarëve është prezent ditëve të premte, por edhe ditëve të pushimeve sidomos gjatë  muajit të Ramazanit dhe ditëve të festave të  Bajramit të Vogël dhe të Madhit, kurse ditëve tjera, xhamitë më pak frekuentohen për shkak të angazhimeve të besimtarëve me punë të përditshme dhe obligime familjare.

Është e vështirë të numërohet numri i objekteve të adhurimit mysliman në Zvicër. Vlerësimet variojnë nga rreth 300 xhami. Në Zvicër, vetëm katër kanë minare (Gjenevë, Cyrih, Winterthur dhe Wangen bei Olten). Pa muezin, janë rreth 200 imamë që predikojnë në Zvicër, prej të cilëve mbi 100 janë me angazhim të plotë.

Pjesa dërmuese e xhamive në Zvcër mbështeten nga Kuvajti, Katari dhe Turqia. Kurse, xhamitë shqiptare financohen nga vet organizimi spontan i shqiptareve, në baza vullnetare.

“Të dashur vëllezër dhe motra, me datë 17.04.2023 ditë e hënë (nata e Kadrit në muajin Ramazan), u bë aksion për grumbullimin e mjeteve për ndërtimin e Xhamisë së re në Fribourg. Shuma e tubuar 1 814 400 CHF, masha’Allah. Allahu i shpërbleftë të gjithë kontribuuesit. Vetëm besimi në Allahun arrin të bën çudira”, thuhet ne web faqen e xhamisë së shqiptarëve në Friburg, transmeton gazeta zvicerane Le Canotn27.ch, ku në vazhdim prezantohet edhe në video ku shihet maketi i xhamisë se re në Friburg, të cilin kanton jetojnë mbi 20 mijë shqiptarë, kryesisht nga Kosova, Maqedonia Veriore dhe nga Lugina e Preshevës.

Drejtuesi i Xhamisë në ndërtim Bedrudin Sadullahu, duke falënderuar besimtarët për këtë solidaritet dhe kontribut, ka thëne për gazetën zvicerane në shqip Le Canton27.ch se “pjesa e dërmuse e mjeteve janë tubuar për xhaminë e re në Friburg,  falë gatishmërisë dhe bujarisë së komunitetit tonë në kantonin tonë dhe në Zvicër”.

“Xhamia e jonë në Friburg për të qenë në funksion, nevojiten 2 500 500 CHF. Deri më tani janë grumbulluar 1 830 000 CHF. Objekti do të ketë bibliotekën, salla leximi, restorant të madh prej 350 m2 si dhe lokale për aktivitete të tjera kulturore e sportive, por edhe këndin për lojë për fëmijë”, ka thënë Sadulli.

“Së pari falënderoj autoritetet zvicerane që na kanë mundësuar lokacionin. Çështjen administrative e kemi kryer, po ashtu projektin e kemi të gatshëm dhe mjetet gati-gati po bëhen. Çka inshalla xhamia jonë në Friburg do jetë e gatshme për Ramazanin e vitit të ardhshëm, ku do të kemi dy festa, Bajrmin dhe xhaminë re”, ka treguar Sadullahu duke uruar festen e Bajramit komunitetit myslimanë në Friburg dhe Zvicër.

Më shumë se 350 shoqata myslimane dhe objekte kulti, të rrymave të ndryshme, janë të përhapura në të gjithë Zvicrën. Asnjë xhami nuk pretendon hapur se ka një tendencë xhihadiste. Në Zvicër, shumica e myslimanëve vijnë nga Ballkani. Vendet ku ata luten janë gjithashtu vende takimi ku transmetohen traditat e vendeve të tyre të origjinës.

“Myslimanët shqiptarë kanë përvojë të bashkëjetesës ndërfetare”, tha Arlinda Amiti, koordinatore e programit të doktoratës “Islami dhe Shoqëria: Studime Islame-teologjike” në Qendrën Zvicerane për Islamin dhe Shoqërinë (CSIS).

Se sa janë të integruar shqiptarët, në këtë rast femrat shqiptare, dëshmon edhe një fakt se zonja prof.dr.Arlinda Amiti (me shami) është shqiptarja e parë doktore e shkencave në Zvicër, e cila pos shqipes, zotëron edhe 7 gjuhë të huaja.

Zvicra sot ka rreth 400,000 myslimanë të cilët në vitin 1970 ishin vetëm 16,000. Sipas gazetës zvicerane në shqip Le Canton27.ch, ky numër i madh i myslimanëve në Zvicër të cilët janë kryesisht nga Ballkani,  janë edhe për shkak të politikave diskriminuese të regjimit të Millosheviqit, i cili kishte dëbuar më dhunë qindra mijëra shqiptarë dhe boshnjakë nga viset e tyre si nga Kosova po ashtu edhe nga Bosnja.

Posta e Kosovës të enjten lëshoi në qarkullim postar emisionin e pullave postare të titulluar “Hidroelektrana e Prizrenit”.

Në njoftim thuhet se historia e elektrifikimit në Kosovë ndërlidhet me Hidroelektranën e parë në vend, të ndërtuar në vitin 1929 në Prizren.

“Ky elektrifikim, krijoi mundësitë të reja zhvillimore në Kosovë në lëmin ekonomike dhe kulturore. Hidroelektrana e Prizrenit për dyzet e katër vjet furnizoi qytetarët me energji elektrike. Në vitin 1975 objekti është shndërruar në muze dhe bënë pjesë si aset i trashëgimisë sonë kulturore, me status të monumentit me mbrojtje të përhershme”, thuhet në njoftimin e Postës.

Ky emision i pullave postare përbëhet nga një pullë postare dhe Zarfi i Ditës së Parë, ndërsa në qarkullim postar do të jetë deri në konsum të plotë.