Author: N.T.

José Mourinho vazhdon të konfirmojë statusin e tij si një nga trajnerët më të mëdhenj në historinë e futbollit. “The Special One” ka festuar së fundmi fitoren e 750-të në karrierën e tij si trajner, një shifër mbresëlënëse që dëshmon qëndrueshmërinë, suksesin dhe mentalitetin fitues ndër vite.

Momenti historik u shënua me Benficën, ku Mourinho u pa duke festuar me skuadrën, në një atmosferë entuziazmi dhe krenarie. Kjo arritje e veçantë vjen si rezultat i një karriere të jashtëzakonshme, të ndërtuar mbi trofe, ndeshje të mëdha dhe fitore vendimtare në kampionatet më të forta të Evropës.

Nga Porto, Chelsea, Inter, Real Madrid, Manchester United, Roma e deri te aventura e tij aktuale, Mourinho ka lënë gjurmë kudo, duke ndërtuar ekipe konkurruese dhe duke fituar trofe prestigjiozë.

Me këtë sukses të radhës, José Mourinho dëshmon se mbetet ende një figurë qendrore e futbollit botëror, ndërsa fitorja e 750-të është një tjetër kapitull i artë në librin e një trajneri që me plot të drejtë mban nofkën: “The Special One”

Leo Messi do të kthehet në stadiumin Lusail në Doha, tempullin e futbollit ku përjetoi natën më të madhe të karrierës së tij dhe ku udhëhoqi Argjentinën drejt lavdisë botërore pas një finaleje të paharrueshme.

La Finalissima do të luhet më 27 mars 2026, në Katar, dhe njoftimi u bë sot, pikërisht tre vjet pas finales epike të Kupës së Botës, duke i dhënë këtij rikthimi një domethënie emocionale edhe më të thellë. Ishte po ky stadium që pa Messin të shënonte dy gola në një finale “të çmendur” dhe më pas të ngrinte trofeun që i mungonte për ta kompletuar legjendën e tij.

Rikthimi i Messit në Lusail nuk është thjesht një ndeshje. Është një kthim në vendin ku u shkrua historia, ku ëndrrat u bënë realitet dhe ku futbolli pa një kampion të përjetshëm të kurorëzohej mbret.

Doha. Lusail. Messi. Sërish aty ku gjithçka ndryshoi!

Manchester City ka nisur të mendojë seriozisht për të ardhmen e stolit teknik, në rast se Pep Guardiola vendos të largohet verën e ardhshme. Sipas raportimit të The Athletic, emri i Enzo Marescas po shqyrtohet me shumë vëmendje nga drejtuesit e klubit si një nga kandidatët kryesorë për ta zëvendësuar spanjollin.

Maresca, i cili ka një të kaluar të lidhur ngushtë me Manchester Cityn, njihet për filozofinë e tij të lojës që përputhet me atë të Guardiolës. Ai ka qenë pjesë e stafit të Cityt si asistent dhe ka fituar përvojë të çmuar si trajner kryesor, duke ndërtuar reputacion si një nga trajnerët më premtues të brezit të ri.

Burime pranë klubit bëjnë të ditur se ende nuk ka një vendim përfundimtar për të ardhmen e Guardiolës, por City po përgatitet për çdo skenar, duke analizuar me kujdes profilet që mund të garantojnë vazhdimësi dhe stabilitet në projektin sportiv.

Nëse Guardiola vendos të mbyllë kapitullin e tij të suksesshëm në “Etihad”, Enzo Maresca mund të jetë një emër kyç në planin e Manchester Cityt për të ruajtur identitetin dhe ambiciet fituese në vitet në vijim.

Mesfushori shqiptar Ardon Jashari ka rrëfyer për herë të parë me detaje periudhën e vështirë që kaloi te Milani, pas dëmtimit të pësuar menjëherë pas transferimit në San Siro. 23-vjeçari thekson se mbështetja nga klubi ishte vendimtare për rikthimin e tij.

“Pas një vere me negociata të gjata, të dëmtohesha menjëherë nuk ishte ideale. Askush nuk do të ishte i lumtur në vendin tim”, ka thënë Jashari për Gazzetta dello Sport, duke shtuar: “Të gjithë te Milani më shkruanin dhe më bënin të ndihesha i rëndësishëm – shokët e ekipit, stafi, trajneri dhe drejtuesit”.

Ai pranoi se ditët e para ishin të vështira mendërisht, por koha me familjen dhe procesi i rikuperimit e ndihmuan të qetësohej dhe të fokusohej te kthimi në fushë.

Jashari vlerësoi lart edhe trajnerin Massimiliano Allegri: “Ai është gjithmonë pranë lojtarëve. Ka përvojë dhe mund të më ndihmojë shumë në rritjen time”.

Fjalë të veçanta pati edhe për shokët e mesfushës, Luka Modriç dhe Adrien Rabiot. “Të luash me Modriçin është e jashtëzakonshme, mund të mësosh shumë prej tij. Edhe Rabiot ka pasur ndikim të madh që nga dita e parë”, u shpreh ai.

Sonte, Milani i Jasharit përballet me Napolin në gjysmëfinalen e Superkupës së Italisë, një tjetër mundësi për mesfushorin shqiptar që të dëshmojë vlerat e tij me fanellën kuqezi.

Manchester City ka zyrtarizuar kualifikimin në gjysmëfinale të Carabao Cup, duke vazhduar rrugëtimin e suksesshëm në këtë kompeticion dhe duke u rreshtuar sërish mes favoritëve për fitimin e trofeut.

“Qytetarët” arritën në fazën gjysmëfinale pas një paraqitjeje bindëse në çerekfinale, ku triumfuan me rezultat 2–0 ndaj Brentford, duke treguar qetësi, kontroll loje dhe efikasitet në momentet vendimtare të ndeshjes. Kjo fitore i siguroi skuadrës së Pep Guardiolës një vend mes katër më të mirave të turneut.

Në gjysmëfinale, Manchester City do të përballet me Newcastle United, në një duel që pritet të jetë tejet i fortë dhe emocionues. Përballja do të zhvillohet në formatin me dy ndeshje, vajtje-ardhje, ku të dyja skuadrat synojnë finalen dhe trofeun e Carabao Cup.

Rruga e Cityt drejt gjysmëfinales ka qenë e qëndrueshme, me paraqitje solide dhe rotacion të mençur të skuadrës, duke dëshmuar thellësinë dhe cilësinë që ka ekipi edhe në kompeticionet kupë.

Tashmë, me gjysmëfinalen të siguruar, Manchester City e ka të qartë objektivin: të hedhë hapin e radhës drejt finales dhe të luftojë për një tjetër trofe në epokën e Guardiolës. Pyetja që mbetet është nëse “Qytetarët” do të arrijnë ta kurorëzojnë këtë rrugëtim me triumf në fund.

Mëngjesin e sotem janë zhvilluar 2 ndeshje ne kuader të Ligës më të fortë të basketbollit në botë, NBA.

Skuadra e Cleveland Cavaliers ka pësuar humbjen e dytë radhazi, pasi kësaj radhe u mund nga Chicago Bulls me rezultat 127-111.

Coby White udhëheqi skuadren e tijë drejt fitores me 25 pikë, derisa kontribut dhanë edhe Josh Giddey me triple-double prej 23 pikëve, 11 kërcimeve dhe po aq asistime dhe Nikola Vucevic me 20 sosh.

Nga ana tjetër Donovan Mitchell shkëlqeu me 32 pikë por që nuk mjaftuan për fitore.

Bulls renditen në vendin e 10 në Lindje derisa Cavaliers një pozitë më lartë.

Mmephis Grizzlies ka realizuar fitoren e dytë rresht pasi mundi Minessota Timberëolves me shifrat 116-110.

Më efikaset në fitoren e Grizzlies ishin Jaren Jackson Jr. me 28 pikë e 12 kercime dhe Jock Landale me 20 pikë dhe 10 kërcime.

Te skuadra humbëse Julius Randel u dallua me 21 pikë.

Grizzlies renditen në vendin e nëntë në perëndim derisa Timberëolves në poziten e gjashtë.

Mungesa e Raphinhës në formacionin më të mirë të vitit të përzgjedhur nga FIFA ka ngjallur reagime të shumta në opinionin sportiv, duke shkaktuar debat mes tifozëve, analistëve dhe mediave ndërkombëtare. Polemikave iu shtua edhe një reagim publik nga bashkëshortja e futbollistit, Natalia Rodrigues.

Ajo shprehu hapur habinë e saj përmes rrjeteve sociale, duke vënë në pikëpyetje përjashtimin e anësorit të Barcelonës nga Best XI. Sipas medias portugeze A Bola, Rodrigues kishte shkruar në një “story” në Instagram, tashmë të fshirë: “A është Raphinha basketbollist?”, një ironi që u interpretua si kritikë e drejtpërdrejtë ndaj vendimit të FIFA-s.

Formacioni më i mirë i vitit u shpall në ceremoninë e organizuar në Doha, ku u përfshinë emra të njohur të futbollit botëror si Gianluigi Donnarumma, Virgil van Dijk, Jude Bellingham, Pedri, Lamine Yamal dhe Ousmane Dembélé.

Për shumë tifozë dhe analistë, përjashtimi i Raphinhës konsiderohet i pakuptimtë, sidomos pas sezonit spektakolar 2024/25. Sulmuesi brazilian regjistroi 34 gola dhe 26 asistime, duke qenë një nga figurat kryesore në sukseset e Barcelonës, që fitoi La Ligën dhe arriti deri në gjysmëfinale të Ligës së Kampionëve.

Megjithatë, sipas burimeve pranë FIFA-s, dëmtimet e shpeshta dhe fakti që Raphinha ka zhvilluar vetëm 10 paraqitje në sezonin aktual duket se kanë ndikuar në vendimin përfundimtar.

Pavarësisht përjashtimit nga Best XI, Raphinha vazhdon të mbetet një nga lojtarët më vendimtarë të Barcelonës, ndërsa debati mbi kriteret dhe zgjedhjet e FIFA-s pritet të vazhdojë edhe në ditët në vijim.

Luis Suárez do të vazhdojë aventurën e tij me Inter Miamin. Sulmuesi uruguaian ka rinovuar kontratën me klubin amerikan dhe do të mbetet pjesë e kampionit të MLS-së së paku edhe për një vit tjetër, deri në vitin 2026.

Suárez iu bashkua Inter Miamit në vitin 2023 dhe që nga ardhja e tij është shndërruar në një nga figurat kyçe të skuadrës, falë përvojës, golave dhe asistimeve vendimtare. Kontributi i tij ka qenë thelbësor në ngritjen e klubit në majat e futbollit amerikan.

Në sezonin e fundit, 38-vjeçari regjistroi shifra mbresëlënëse, me 17 gola dhe 17 asistime në të gjitha garat. Në total, Suárez ka realizuar 42 gola dhe 30 asistime në 87 paraqitje, duke u renditur si golashënuesi i dytë më i mirë në historinë e Inter Miamit.

Uruguaiani ishte gjithashtu pjesë kyçe e skuadrës që arriti suksese historike, duke fituar Supporters’ Shield në vitin 2024 dhe MLS Cup në vitin 2025, trofe që vulosën statusin e Inter Miamit si një prej ekipeve më të forta në kampionat.

Me rinovimin e Suárezit, Inter Miami synon të ruajë boshtin kryesor të ekipit dhe të vazhdojë garën për trofe edhe në sezonet e ardhshme, ndërsa përvoja dhe instinkti i golit të sulmuesit uruguaian mbeten një armë e rëndësishme për klubin.

Federata e Volejbollit e Kosovës ka shënuar një hap të madh përpara në modernizimin e garave vendore, duke u pajisur zyrtarisht me sistemin bashkëkohor Video Challenge. Ky zhvillim përbën një moment historik për sportin e volejbollit në Kosovë dhe një risi të rëndësishme në rajon.

Me këtë investim, FVK bëhet federata e parë në rajon që implementon teknologjinë Video Challenge në garat elite, duke vendosur standarde të reja në organizimin dhe drejtimin e ndeshjeve. Ky sistem u mundëson ekipeve dhe gjyqtarëve rishikimin e aksioneve vendimtare, çka ndikon drejtpërdrejt në rritjen e saktësisë së vendimeve, transparencës dhe drejtësisë sportive.

Përdorimi i Video Challenge pritet të ketë ndikim të menjëhershëm në cilësinë e ndeshjeve, duke ulur gabimet njerëzore dhe duke rritur besueshmërinë e garave në nivelin më të lartë.

Ky projekt është realizuar falë mbështetjes financiare të Ministrisë së Kulturës, Rinisë dhe SportiT, e cila ka kontribuar në avancimin e infrastrukturës teknologjike të sportit kosovar.

Sipas njoftimit të FVK-së, sistemi Video Challenge do të përdoret në ndeshjet më të rëndësishme dhe të nivelit të lartë që zhvillohen në Kosovë, duke e afruar volejbollin vendor me standardet ndërkombëtare.

Me këtë hap strategjik, Federata e Volejbollit e Kosovës konfirmon përkushtimin e saj ndaj inovacionit, zhvillimit dhe rritjes së vazhdueshme të cilësisë së volejbollit kosovar, duke hapur një kapitull të ri për këtë sport në vend.

Federata e Futbollit të Kosovës ka bërë të ditur zyrtarisht datën dhe vendin e zhvillimit të Superkupës së Kosovës, ku do të përballen dy prej skuadrave më të trofeshme të futbollit kosovar, FC Drita dhe FC Prishtina.

Sipas njoftimit të FFK-së, finalja e Superkupës do të zhvillohet të dielën, më 25 janar 2026, me fillim nga ora 14:30 sipas kohës lokale të Turqisë, përkatësisht në ora 12:30 sipas kohës në Kosovë. Takimi do të luhet në stadiumin modern “Mardan Palace” në Antalia.

Në këtë përballje prestigjioze do të ballafaqohen FC Drita, kampione në fuqi e Kosovës, dhe FC Prishtina, fituese e Kupës së Kosovës për edicionin 2024/25, në një duel që pritet të zgjojë interes të madh te tifozët.

Vendimi për zhvillimin e Superkupës në Antalia është marrë nga Komiteti Ekzekutiv i FFK-së, duke marrë parasysh faktin se të dyja ekipet do të jenë të angazhuara në fazën përgatitore dimërore në Turqi, nga 15 deri më 30 janar 2026. Kjo zgjedhje është bërë në përputhje me agjendën e klubeve, me qëllim lehtësimin e përgatitjeve dhe organizimit të ndeshjes.

Kjo do të jetë hera e katërt që finalja e Superkupës së Kosovës zhvillohet në Antalia, pasi më herët kjo arenë ka pritur përballjet Drita–Prishtina, Llapi–Ballkani dhe Prishtina–Ballkani, duke u shndërruar tashmë në një destinacion tradicional për këtë kompeticion.