Author: N.T.

Kylian Mbappé ka rifilluar stërvitjet me ekipin dhe pritet të jetë i gatshëm për t’u paraqitur në ndeshjen e ardhshme të LaLigës ndaj Levantes.

Ylli francez ka munguar në disa ndeshje të rëndësishme të skuadrës së tij, duke mos u aktivizuar as në gjysmëfinale e as në finale të Superkupës së Spanjës. Në finale ndaj Barcelonës, skuadra e tij u mposht me rezultat 3:2, duke humbur trofeun.

Po ashtu, Mbappé nuk ishte në dispozicion as në ndeshjen e mbrëmshme të Kupës së Mbretit (Copa del Rey) ndaj Albacetes, ku ekipi i tij u eliminua pas një tjetër humbjeje, po ashtu me rezultat 3:2.

Rikthimi i Mbappés në stërvitje shihet si lajm i mirë për trajnerin dhe tifozët, të cilët shpresojnë se ai do të jetë gati për të ndihmuar ekipin në vazhdimësinë e garave në kampionat.

Janë mësuar dy finalistët e Kupës së Kombeve të Afrikës, pas ndeshjeve gjysmëfinale të zhvilluara mbrëmjen e djeshme, ku Senegali dhe Maroku siguruan biletën për aktin final të kompeticionit më prestigjioz afrikan.

Kombëtarja e Senegalit u kualifikua në finale pas fitores minimale, por tejet të vlefshme, 1:0 ndaj Egjiptit. Heroi i “Luanëve të Terangës” ishte ylli Sadio Mané, i cili në minutën e 78-të realizoi një gol të bukur nga rreth 18 metra, duke e dërguar topin në këndin e poshtëm të djathtë të portës egjiptiane.

Pavarësisht përpjekjeve të Mohamed Salah dhe bashkëlojtarëve të tij, Egjipti nuk arriti të rikthehej në lojë dhe u detyrua të largohej i zhgënjyer nga turneu, ndërsa Senegali konfirmoi formën e lartë dhe ambiciet për trofeun.

Në gjysmëfinalen tjetër, Maroku siguroi finalen pas një përballjeje dramatike ndaj Nigerisë. Koha e rregullt dhe vazhdimet përfunduan pa gola 0:0, ndërsa nga pika e bardhë marokenët u treguan më të saktë, duke triumfuar me rezultat 4:2 në serinë e penalltive.

Me këtë fitore, Maroku siguron një finale historike, duke synuar titullin e parë të Kupës së Kombeve të Afrikës pas plot 50 vitesh. Finalja do të luhet në shtëpi, përballë tifozëve vendas më daten 18 Janar në orqn 20:00, çka pritet ta kthejë ndeshjen në një spektakël të vërtetë futbolli.

Finalja ndërmjet Senegalit dhe Marokut pritet të jetë një duel i fortë mes dy prej përfaqësueseve më të kompletuara të kontinentit afrikan, ku përballen eksperienca, yje botërorë dhe ambicia për histori.

Dy persona janë arrestuar, ndërsa një tjetër është identifikuar nga Policia e Kosovës pas incidenteve serioze të ndodhura gjatë ndeshjes së Superligës së Kosovës në basketboll ndërmjet KB Vëllaznimit dhe KB Bashkimit, e zhvilluar në palestrën “Shani Nushi” në Gjakovë.

Federata e Basketbollit e Kosovës ka bërë të ditur se arrestimet janë kryer për tentim sulmi, ndërsa ndaj personit që hodhi një shishe uji në drejtim të ndihmëstrajnerit të KB Bashkimit, Bledar Gjeqaj, do të ndërmerren veprime të mëtejshme ligjore. Shishja e goditi Gjeqajn në fytyrë, duke e rrëzuar atë në parket.

Incidenti ndodhi gjatë çerekut të dytë të ndeshjes, pasi nga tribuna u dëgjuan ofendime në kor ndaj ekipit mysafir. Pavarësisht vërejtjes zyrtare drejtuar publikut, situata u përkeqësua kur një grup tifozësh të skuadrës vendase tentoi të sulmonte persona në tribunën e mysafirëve, duke rrezikuar seriozisht përshkallëzimin e dhunës.

FBK ka theksuar se vetëm falë reagimit të shpejtë të Policisë së Kosovës është parandaluar një incident edhe më i rëndë.

Në koordinim me gjyqtarët dhe organet e rendit, u mor vendimi për zbrazjen e palestrës nga publiku, me përjashtim të zonës VIP, me qëllim garantimin e sigurisë së lojtarëve, stafit dhe zyrtarëve të ndeshjes.

Federata e Basketbollit e Kosovës e ka cilësuar situatën si alarmante dhe ka ritheksuar politikën e saj të tolerancës zero ndaj çdo forme dhune në palestra.

Klubi nikoqir pritet të ndëshkohet për organizim të dobët të ndeshjes, ndërsa ndaj tij do të shqiptohen masa të rënda disiplinore në përputhje me rregulloret në fuqi. FBK ka paralajmëruar se dhuna fizike, tentimet për sulm, fyerjet dhe sjelljet e papranueshme nuk do të tolerohen, duke mos përjashtuar masa edhe më drastike në rast të përsëritjes së incidenteve, përfshirë zhvillimin e ndeshjeve pa publik, mbylljen e palestrave, humbjen e ndeshjeve me rezultat zyrtar dhe referimin e rasteve tek institucionet kompetente.

Muajt e fundit nuk kanë qenë të favorshëm për Julian Alvarez te Atletico Madrid. Sulmuesi argjentinas, i cili pritej të ishte një nga pikat kyçe të projektit ofensiv të klubit, po përballet me një periudhë të vështirë, ku paraqitjet e tij kanë qenë më të dobëta dhe ndikimi në lojë i reduktuar.

Në sezonin e kaluar, Alvarez shkëlqeu me 29 gola dhe 7 asistime, duke u konsoliduar si një nga sulmuesit më të rëndësishëm në Evropë. Ky sezon, megjithatë, tregon një fytyrë tjetër: ai ka shënuar 11 gola dhe ka dhënë 4 asistime, me më pak prezencë në zonat vendimtare dhe paraqitje të pasigurta gjatë ndeshjeve.

Kjo situatë ka ndikuar jo vetëm në performancën sportive, por edhe në vlerën e tij në treg. Për disa muaj, klubet evropiane ishin të gatshme të paguanin deri në 150 milionë euro për shërbimet e tij, ndërsa tani vlera ka rënë në rreth 100 milionë euro, duke detyruar Atletico të rishikojë pretencat ekonomike nëse forma e tij nuk rikthehet shpejt.

Presioni mbi Alvarez është i lartë, pasi Atletico kërkon rezultate të menjëhershme në garat kryesore. Trajneri Diego Simeone dhe stafi drejtues e shohin sulmuesin si një nga lojtarët kyç për të ardhmen e klubit, dhe çdo ndeshje pa ndikim shton shqetësimin.

Për Julian Alvarez, sfida është e dyfishtë, ai duhet të rikthehet te performanca më e mirë dhe të rikthejë besimin e skuadrës dhe tifozëve. Forma e tij ndikon jo vetëm në gola dhe asistime, por edhe në moralin e ekipit dhe aftësinë për të krijuar raste vendimtare.

Reagimi i tij në javët e ardhshme do të jetë vendimtar jo vetëm për sezonin aktual, por edhe për të ardhmen sportive dhe financiare të Atletico Madrid. Rikthimi në nivelin e tij më të lartë do të ruajë edhe statusin dhe vlerën e tij në treg.

Pas largimit të Xabi Alonsos, Alvaro Arbeloa ka marrë përsipër drejtimin e Real Madridit, por në modë të përkohshme. Sipas planit të klubit, Arbeloa do të qëndrojë në stolin e “Los Blancos” deri në verë, kur pritet të emërohet një trajner me më shumë përvojë në futbollin senior.

Një nga emrat që po qarkullojnë si kandidat surprizë është Enzo Maresca, trajner italian aktualisht i papunë. Sipas gazetës sportive Sport, Maresca ka pasur eksperiencë në Parma, Leicester City dhe Chelsea, si dhe ka punuar si ndihmës trajner te Manchester City, duke ndërtuar një profil mjaft solid në futbollin europian.

Në të njëjtën kohë, presidenti i Real Madridit, Florentino Perez, kishte shfaqur interes për të sjellë edhe Jurgen Klopp, por trajneri gjerman e refuzoi ofertën pa diskutim. “Interesi i Real Madridit? Kjo nuk ka të bëjë fare me mua dhe nuk ngjalli asnjë interes tek unë”, tha Klopp në një deklaratë për mediat gjermane, duke zhgënjyer tifozët madrilenë që ëndërronin për një emër të madh në pankinë.

Me Arbeloa që drejton përkohësisht skuadrën dhe Maresca që shihet si opsion i mundshëm, sezoni i Real Madridit vazhdon të mbetet në qendër të vëmendjes, ndërsa drejtuesit e klubit kërkojnë të gjejnë balancën ideale për të ardhmen e afërt.

Ajaxi ka zyrtarizuar afrimin e Maximilian Ibrahimovic, djalit të legjendës së futbollit Zlatan Ibrahimovic. Sulmuesi 19-vjeçar i është bashkuar gjigantit holandez në formë huazimi nga AC Milan deri në fund të sezonit, me opsion blerjeje.

Klubi nga Amsterdami synon të rikrijojë një histori të veçantë pas më shumë se dy dekadash, duke sjellë sërish mbiemrin Ibrahimovic në “Johan Cruyff Arena”. Marrëveshja është konfirmuar fillimisht nga Milani, i cili përmes një deklarate zyrtare bëri të ditur huazimin e lojtarit të ri suedez.

“AC Milan konfirmon se Maximilian Zlatan Seger Ibrahimovic i është bashkuar AFC Ajax në formë huazimi, me opsion për transferim të përhershëm. Klubi i uron atij shumë suksese për pjesën e mbetur të sezonit”, thuhet në njoftimin e klubit italian.

Edhe Ajaxi e ka bërë publike marrëveshjen, duke theksuar se huazimi është i vlefshëm për gjashtë muaj dhe se ekziston mundësia që lojtari të blihet në fund të sezonit. Sulmuesi anësor pritet të jetë fillimisht pjesë e projektit zhvillimor të klubit, por me mundësi aktivizimi edhe në ekipin e parë.

Maximilian Ibrahimovic ka treguar formë të mirë këtë sezon me Milan Futuro, ekipin rezervë të kuqezinjve, ku ka realizuar pesë gola dhe ka dhënë katër asistime, duke tërhequr vëmendjen e disa klubeve evropiane.

Mbetet për t’u parë nëse koha e tij do të ndahet mes ekipit të parë të Ajaxit dhe Jong Ajax, por afrimi i tij shihet si një investim premtues për të ardhmen e klubit holandez.

Real Madridi ka konfirmuar zyrtarisht se Kylian Mbappé nuk do të jetë pjesë e skuadrës për ndeshjen e Kupës së Mbretit ndaj Albacetes. Ylli francez nuk është përfshirë në listën e të grumbulluarve, duke vazhduar mungesat e tij në kompeticionet vendore.

Kjo mungesë vjen pas një periudhe ku Mbappé nuk u aktivizua as në gjysmëfinale dhe as në finale të Superkupës së Spanjës, çka ka ngritur pikëpyetje mes tifozëve dhe mediave spanjolle. Sipas informacioneve nga burime pranë klubit, arsyeja kryesore lidhet me një problem fizik në gju, për të cilin stafi mjekësor ka rekomanduar kujdes maksimal.

Trajneri dhe drejtuesit e Real Madridit kanë vendosur të mos rrezikojnë gjendjen e Mbappés, duke zgjedhur menaxhimin e minutave dhe rikuperimin e plotë të lojtarit, sidomos në një fazë të ngjeshur të sezonit. Qëllimi i klubit është që sulmuesi francez të rikthehet në formë optimale për ndeshjet vendimtare në La Liga dhe garat evropiane.

Edhe pse mungesa e tij është një goditje për repartin ofensiv, te Real Madridi mbizotëron qetësia dhe besimi se Mbappé do të rikthehet shumë shpejt në fushë. Ndërkohë, “Los Blancos” synojnë të kalojnë raundin e radhës në Kupën e Mbretit edhe pa njërin nga emrat më të mëdhenj të skuadrës.

Kupa e Kombeve të Afrikës po hyn në fazën vendimtare dhe sot futbolli afrikan pritet të ofrojë emocione të mëdha, me zhvillimin e dy ndeshjeve gjysmëfinale që premtojnë spektakël dhe rivalitet të fortë.

Programi hapet me përballjen mes Senegalit dhe Egjiptit, e cila do të zhvillohet në Stade Ibn Batouta në Tanxher, me fillim nga ora 18:00. Senegali siguroi biletën për në gjysmëfinale pas fitores minimale 1-0 ndaj Malit, duke konfirmuar stabilitetin në mbrojtje.

Në anën tjetër, Egjipti eliminoi Bregun e Fildishtë me rezultatin 3-2 në një duel dramatik, ku Mohamed Salah ishte protagonisti absolut dhe lideri i “Faraonëve”.

Gjysmëfinalja e dytë do të luhet në mbrëmje, nga ora 21:00, në Stade Prince Moulay Abdallah në Rabat, ku përballë do të jenë Nigeria dhe Maroku.

Vendasit kanë pasur një rrugëtim pothuajse perfekt deri tani, me katër fitore dhe një barazim, duke u udhëhequr nga Brahim Diaz, i cili ka realizuar pesë gola në turne, ndërsa mbrojtja e Marokut ka pësuar vetëm një gol. Nigeria, nga ana tjetër, ka treguar forcë dhe efikasitet në fazën ofensive, duke shënuar plot 14 gola dhe pa njohur humbje në asnjë ndeshje.

Finalja e Kupës së Kombeve të Afrikës është planifikuar për më 18 janar, dhe të katër kombëtaret gjysmëfinaliste ëndërrojnë të sigurojnë një vend në ndeshjen për titullin e kampionit të kontinentit.

U zhvilluan disa përballje interesante në NBA, ku vëmendja kryesore shkoi te dueli mes Oklahoma City Thunder dhe San Antonio Spurs.

Thunder realiazoi fitoren e katërt radhazi, pasi triumfoi bindshëm me rezultatin 119-98, duke konfirmuar formën e lartë ndaj një rivali direkt në Konferencën e Perëndimit.

Kampionët kontrolluan ndeshjen nga fillimi në fund, ndërsa lider absolut ishte Shai Gilgeous-Alexander, i cili realizoi 34 pikë, derisa Jalen Ëilliams shtojë 20 sosh.

Te skuadra humbëse, u dallua Stephon Castle me 20 pikë, tetë asistime dhe shtatë kërcime.

Kujtojm që për Spurs kjo ishte humbja e dytë rresht.

Pas tri humbjesh radhazi, rikthim te fitorja shënuan Los Angeles Lakers, që mposhtën Atlanta Hawks me shifrat 141-116.

LeBron James zhvilloi një tjetër paraqitje të shkëlqyer me 31 pikë dhe 10 asistime, ndërsa Luka Doncic kontribuoi me 27 pikë, duke udhëhequr kalifornianët drejt një fitoreje të merituar.

Nga ana tjetër, paraqitje të mirë kishte Nickeil Alexander-Walker me 26 pikë, por të pamjaftueshme për ta evidentuar humbjen.

Lakers renditen në poziten e pestë në Konferencën e Perëndimit derisa Hawks në vendin e nëntë në Lindje.

Vijon kriza te Milwaukee Bucks, që pësuan një tjetër humbje të thellë, kësaj here 139-106 nga Minnesota Timberwolves, me këtë të fundit që realizuan fitoren e dytë radhazi.

Më efikaset në këtë fitore ishin, Julius Randel me 29 pikë, tetë kërcime e gjashtë asistime dhe Bones Hyland me 23 sosh.

Ndërkaq ylli i skudrës së Bucks, Giannis Antetokounmpo arriti të shënoj 25 pikë, tetë kërcime e pesë asistime por nuk mundi ta shpëtoj skuadrën e tijë nga humbja.

Timberwolves renditen në vendin e katërt në Konferencën e Perëndimit, derisa Bucks në poziten e 11 në Lindje.

Basketbollisti amerikan Kevin Durant vazhdon të shkruajë historinë e NBA-së edhe në moshën 37-vjeçare, duke arritur një tjetër rekord personal. Me një trepikësh të realizuar ndaj Portland Trail Blazers, Durant kaloi legjendarin Wilt Chamberlain dhe ngjitet në vendin e shtatë të realizuesve më të mirë të të gjitha kohërave në ligë.

Durant, i njohur për aftësinë e tij për të shënuar nga çdo pozicion dhe për elegancën në lëvizje, vazhdon të tregojë nivel elit edhe në këtë fazë të karrierës. Gjuajtja e tij nga pika e lartë e bën pothuajse të pamundur mbrojtjen kundër tij.

Ky sezon po e gjen “KD” në formë të jashtëzakonshme, me mesatare 26.1 pikë, 5.1 kërcime dhe 4.4 asistime për ndeshje, duke u renditur si një nga lojtarët më produktivë të ligës mbi 37 vjeç, vetëm pas Stephen Curry.

Edhe pse shpesh krahasohet me LeBron James dhe quhet “anti-LeBron” për rrugëtimin e tij të veçantë, Durant ka treguar vazhdimisht se është një nga shënuesit më të rrezikshëm në historinë e NBA-së. Ai ka lënë gjurmë të pashlyeshme, duke u përfshirë edhe në listën e 75 lojtarëve më të mirë të historisë së ligës në 75-vjetorin e NBA-së.