Author: N.T.

Fitorja e ngushtë e Besiktasit ndaj Kayserisporit nuk ka mjaftuar për ta kënaqur ish-yllin e futbollit turk, Nihat Kahveci, i cili ka kritikuar hapur paraqitjen e skuadrës bardhezi, pavarësisht tre pikëve të marra.

Besiktasi arriti të fitojë 1:0 në ndeshjen e zhvilluar të hënën, falë golit vendimtar të shënuar nga El Bilal Touré në minutën e 95-të, por sipas Kahvecit, loja e ekipit ishte larg nivelit që pritet nga një klub me ambicie të mëdha.

Ish-sulmuesi i njohur ka theksuar se Besiktasi shfaqi probleme serioze në fazën sulmuese, duke munguar kreativiteti dhe qartësia para portës kundërshtare gjatë pjesës më të madhe të takimit.

Në analizën e tij, Kahveci nuk i ka kursyer kritikat as për Milot Rashicën. Ai vuri në dyshim ndikimin e sulmuesit kosovar në lojën e ekipit, duke e krahasuar situatën aktuale me periudhën kur Ricardo Quaresma ishte pjesë e Besiktasit.

“Kur shikon paraqitjen e Rashicës, të krijohet ideja se Quaresma ende mund të luajë. Rashica mund të ndihmojë si lojtar mbështetës në një skuadër të fortë, por kur i jepet një rol kryesor, ai nuk arrin të bëjë diferencën. Nuk e kuptoj pse trajneri e mbajti në lojë deri në minutën e 71-të, kur nuk ishte në formën e duhur”, ka deklaruar Kahveci.

Rashica, 29-vjeçar, deri tani ka shënuar dy gola dhe ka dhuruar tri asistime në të gjitha garat me fanellën e Besiktasit. Pavarësisht kritikave, ai vazhdon të jetë një nga lojtarët më të komentuar në ambientin bardhezi.

Janë zhvilluar katër ndeshje shumë interesante në mëngjesin e sotëm në kuadër të NBA, liga më e fortë e basketbollit në botë.

Detroit Pistons ka vazhduar me fitore, duke mundur Boston Celtics me vetëm një pikë diferencë, 104-103.

Më efikasë në këtë sukses ishin Tobias Harris me 25 pikë dhe Jalen Duren me 18 pikë. Nga ana tjetër, përkundër paraqitjes spektakolare të Jalen Brown, i cili shënoi 32 pikë dhe mori 11 kërcime, Celtics nuk arriti të triumfonte.

Aktualisht, Celtics renditen vetëm një pozitë më poshtë se Pistons në Konferencën e Lindjes.

Golden State Warriors kanë regjistruar fitoren e katërt radhazi, duke mundur Miami Heat me rezultat të thellë, 135-112.

Brandin Podzimeski udhëhoqi skuadrën drejt fitores me 24 pikë dhe 8 kërcime, ndërsa Stephen Curry shtoi 19 pikë dhe 11 asistime. Te skuadra humbëse, spikati Norman Powell me 21 pikë.

Warriors renditen në vendin e tetë në Konferencën e Perëndimit, ndërsa Heat ndodhen në vendin e tretë në Lindje.

Phoenix Suns ka shënuar fitoren e dytë radhazi, duke mundur Brooklyn Nets me rezultat 126-117. Dillon Brooks shkëlqeu me 27 pikë, ndërsa Devin Booker shtoi 24 pikë dhe Collin Gillespie 22 pikë për fitoren e Suns.

Te Nets, më i dalluari ishte Michael Porter Jr. me 23 pikë, por nuk mjaftuan për triumf.

Suns renditen në vendin e shtatë në Perëndim, ndërsa Nets në vendin e 13 në Lindje.

Philadelphia 76ers e mbylli me fitore këtë seri ndeshjesh, duke mundur Indiana Pacers me 113-104. Joel Embiid me 30 pikë dhe Tyrese Maxey me 29 pikë ishin protagonistët kryesorë të këtij triumfi.

Te Pacers, më efikasi ishte Andrew Nembhard me 25 pikë.

76ers renditen në vendin e pestë në Lindje, ndërsa Pacers ndodhen në fund të tabelës.

Pas 21 sezonesh radhazi, LeBron James nuk do të jetë titullar në All Star Game 2026. Pesëshet startuese për ndeshjen e yjeve janë bërë publike, dhe mungesa e 41-vjeçarit të Los Angeles Lakers është lajmi kryesor.

LeBron po luan sezonin e tij të 23-të në NBA, dhe që nga sezoni i dytë kishte qenë gjithmonë pjesë e pesësheve të para në All Star. Ndeshja e yjeve do të zhvillohet më 15 shkurt në “Intuit Dome” në Ingleëood, shtëpi e Los Angeles Clippers.

Edhe pse nuk është titullar, James ka mundësinë të zgjidhet si rezervë, pasi trajnerët e NBA-së do të zgjedhin 14 lojtarë të tjerë, nga shtatë për secilën Conference. Lista e plotë e ekipit do të bëhet publike më 1 shkurt.

Këtë sezon, LeBron ka luajtur 24 ndeshje, mesatarisht duke shënuar 22.6 pikë, 6.9 asistime dhe 5.9 ribaunde për ndeshje. Ai ka fituar 3 herë çmimin MVP në All Star Game dhe mbetet një nga yjet më të mëdhenj të NBA-së.

Përndryshe, titullarët e All Star 2026 janë:

Nga Konferenca e Lindjes: Cade Cunningham (Detroit), Jalen Brunson (New York), Tyrese Maxey (Philadelphia), Jaylen Brown (Boston), Giannis Antetokounmpo (Milwaukee).

Derisa në Konferencën e Perëndimit: Stephen Curry (Golden State), Shai Gilgeous-Alexander (Oklahoma City), Luka Dončić (Los Angeles Lakers), Victor Wembanyama (San Antonio), Nikola Jokić (Denver).

Edhe pse nuk është titullar për herë të parë pas dy dekadash, LeBron pritet të marrë pjesë në spektaklin e All Star dhe të tregojë akoma një herë pse është një legjendë e NBA-së.

Xherdan Shaqiri është shpallur lojtari më i mirë i vitit 2025 te Baseli, duke kurorëzuar një sezon të jashtëzakonshëm me fanellën e klubit zviceran.

Sulmuesi kosovar ishte figura kyçe e Baselit gjatë vitit të kaluar, duke udhëhequr skuadrën drejt fitimit të titullit kampion dhe Kupës së Zvicrës, një sukses i dyfishtë që riktheu klubin në majat e futbollit vendor.

Me 21 gola të shënuar dhe 22 asistime, Shaqiri ishte motori kryesor i lojës së Baselit, duke dëshmuar lidership, kreativitet dhe vendosmëri në momentet vendimtare. Performancat e tij të nivelit të lartë e bënë atë zgjedhjen e padiskutueshme për çmimin individual të vitit.

Çmimi iu dorëzua kapitenit të Baselit nga presidenti i Federatës Zvicerane të Futbollit, Peter Knabel, i cili e njeh Shaqirin që nga ditët e tij të hershme në akademinë e klubit dhe vlerësoi rrugëtimin e tij të suksesshëm.

Përveç Shaqirit, edhe FC Basel u nderua me çmimin “Ekipi i Vitit 2025”, duke konfirmuar dominimin e tyre në futbollin zviceran gjatë këtij sezoni.

Ndërkohë, edhe në edicionin aktual Shaqiri po vazhdon me formë të mirë, duke regjistruar 20 paraqitje në të gjitha garat, ku ka kontribuar me gjashtë gola dhe nëntë asistime, duke mbetur një nga lojtarët më të rëndësishëm të skuadrës.

Federata Mbretërore e Futbollit e Marokut ka reaguar zyrtarisht pas finales së Kupës së Kombeve të Afrikës ndaj Senegalit, duke bërë të ditur se ka nisur procedura ligjore për shkak të ngjarjeve që shënuan përfundimin e ndeshjes.

Përmes një komunikate për media, federata marokene ka theksuar se synon të kërkojë “drejtësi” për atë që e cilëson si cenim të rrjedhës normale të finales, pavarësisht se gjatë ndeshjes kishte vlerësime të ndryshme lidhur me vendimet e gjyqtarit.

Kontesti lidhet me një moment kyç të takimit, kur gjyqtari akordoi një penallti për Marokun, vendim pas të cilit Kombëtarja e Senegalit reagoi duke u larguar përkohësisht nga fusha në shenjë proteste. Megjithatë, jo të gjithë lojtarët senegalezë e braktisën fushën dhe pas rreth dhjetë minutash ndërprerjeje, ndeshja u rifillua.

Në fund, Senegali arriti të triumfonte dhe të fitonte titullin e kampionit të Afrikës, por ngjarjet e fundit të finales vazhdojnë të shkaktojnë debate të forta në opinionin sportiv.

Federata Marokene ka njoftuar se do të ndjekë rrugë ligjore ndaj Konfederatës Afrikane të Futbollit (CAF) dhe FIFA-s, duke kërkuar shqyrtimin e situatës dhe mundësinë e anulimit të rezultatit ose riluajtjes së finales.

“Kjo situatë ndikoi drejtpërdrejt në zhvillimin normal të ndeshjes dhe në performancën e lojtarëve tanë. Vendimi i gjyqtarit për penalltinë ishte i drejtë, por reagimi që pasoi ndryshoi rrjedhën e finales”, thuhet në deklaratën e federatës marokene.

Në të njëjtën kohë, federata ka falënderuar tifozët për mbështetjen e vazhdueshme gjatë turneut dhe për atmosferën e krijuar gjatë organizimit të kampionatit.

Megjithatë, bazuar në praktikat e mëparshme të Kupës së Kombeve të Afrikës, një anulim i finales apo heqje e titullit konsiderohet shumë pak e mundshme. Në rast të ndonjë vendimi disiplinor, pritet që ai të jetë i natyrës financiare dhe jo sportive.

Sonte rikthehet spektakli më i madh i futbollit evropian, Liga e Kampionëve, me një mbrëmje të mbushur plot emocione dhe përballje vendimtare. Nëntë ndeshje janë në program për t’u zhvilluar në kuadër të xhiros së shtatë të fazës së ligës, një fazë ku çdo pikë mund të bëjë diferencën mes kualifikimit, “play-off”-it apo eliminimit të hershëm.

Pas një pauze mbi njëmujore, rikthimi i Champions League pritet me interes të madh, pasi shumë skuadra janë në garë të drejtpërdrejtë për një vend në tetëshen e parë, e cila siguron kualifikim direkt në fazën tjetër.

Vëmendja kryesore e mbrëmjes është e përqendruar te përballja mes Interit dhe Arsenalit, që do të luhet në stadiumin legjendar “Giuseppe Meazza” nga ora 21:00. Kampionët e Italisë kërkojnë patjetër fitore për të mbetur në zonën elitare, ndërsa londinezët vijnë me moral të lartë dhe mund të sigurojnë kualifikimin edhe me një barazim, pas një serie perfekte prej gjashtë fitoresh në gjashtë ndeshje.

Në ndeshjet e tjera, Real Madridi synon të vazhdojë rrugëtimin e tij drejt tetëshes duke kërkuar tre pikë të plota ndaj Monacos, ndërsa Manchester City përballet me një udhëtim të vështirë në Norvegji kundër Bodo/Glimt. Një tjetër sfidë e fortë e pret edhe Paris Saint-Germainin, që luan në transfertë ndaj Sporting Lisbonës.

Një duel me shumë peshë është edhe ai mes Tottenhamit dhe Borussia Dortmundit, ku të dyja skuadrat janë të detyruara të fitojnë për të mbajtur gjallë shpresat për kualifikim direkt. Ndërkohë, Napoli ndodhet nën presion maksimal në udhëtimin ndaj Copenhagen, pasi çdo hap fals mund ta lërë jashtë fazës së “play-off”-it.

Programi i mbrëmjes plotësohet me tri përballje të tjera interesante: Bayer Leverkusen udhëton drejt Greqisë për t’u përballur me Olympiacosin, Kairat Almaty pret në shtëpi Club Brugge, ndërsa Villarreal përballet me Ajaxin në një duel klasik evropian.

Një mbrëmje që premton futboll të nivelit të lartë, emocione të forta dhe rezultate që mund të përcaktojnë fatin e shumë skuadrave në Ligën e Kampionëve.

Java e 20-të e kampionatit spanjoll, La Liga, ka nxjerrë në pah disa nga performancat më të spikatura të javës, të përmbledhura në formacionin zyrtar të Sofascore. Mes emrave më të dalluar qëndron Vedat Muriqi, i cili ka rrëmbyer vëmendjen kryesore me paraqitjen e tij brilante.

Sulmuesi i Mallorcës dhe Kombëtares së Kosovës u vlerësua me notën 8.8, duke u renditur ndër më të mirët e javës. Muriqi dëshmoi edhe një herë rëndësinë që ka për skuadrën e tij, duke qenë dominues në zonën kundërshtare, i fortë në duele dhe vendimtar në fazën sulmuese.

Pas het-trikut spektakolar ndaj Athletic Bilbaos, vendi i tij në formacionin e javës ishte më se i merituar. Në vijën e sulmit, ai shoqërohet nga Ante Budimir, i cili mori notën 9.0, ndërsa pak më prapa tyre shkëlqeu talenti i Barcelonës, Lamine Yamal, lojtari më i vlerësuar i javës me notën 9.2.

Mesfusha përbëhet nga Bryan Zaragoza, Pablo Fornals dhe Aleix Febas, të cilët ofruan kreativitet, stabilitet dhe intensitet gjatë ndeshjeve të tyre.

Në repartin defensiv, u dalluan Jose Gayà, Daley Blind, Raul Asencio dhe Aitor Ruibal, që garantuan siguri dhe organizim, ndërsa në portë performancë të jashtëzakonshme pati Leo Roman. Portieri i Mallorcës u vlerësua me notën maksimale 10, pas një paraqitjeje perfekte ndaj Bilbaos, duke kompletuar një javë fantastike për skuadrën.

Fillimi i aventurës së Endrick te Real Madridi nuk ka qenë aspak i lehtë. Sulmuesi brazilian ka pranuar se periudha e tij e parë në klubin madrilen u shoqërua me zhgënjim dhe pasiguri, sidomos pas një lëndimi serioz që e la jashtë një prej turneve më të rëndësishme të sezonit.

Endrick pësoi dëmtim tek muskujt në fund të sezonit të kaluar, një problem që u përkeqësua gjatë fazës përgatitore para Kupës së Botës për Klube të FIFA-s, e zhvilluar në Shtetet e Bashkuara të Amerikës. Pas ekzaminimeve mjekësore, u konfirmua se ai nuk do të ishte në gjendje të luante për disa muaj, duke humbur kështu turneun në tërësi.

Në një intervistë të fundit, talenti brazilian e përshkroi këtë moment si më të vështirin në karrierën e tij deri tani, duke theksuar se dhimbja më e madhe nuk ishte humbja e ndeshjeve, por pamundësia për të konkurruar.

Sipas tij, humbjet janë pjesë normale e futbollit, por lëndimet janë diçka krejt tjetër, pasi ato mund të të shkëpusin plotësisht nga loja dhe të të vendosin përballë pasigurisë për të ardhmen.

Aktualisht, Endrick është i përqendruar në rikthimin e formës më të mirë gjatë huazimit të tij te Lyoni, me synimin që të bindë Carlo Ancelottin dhe të sigurojë një ftesë për Kupën e Botës 2026.

Para se Formula 1 të hynte në epokën e kufizimeve strikte financiare dhe teknike, vitet ’90 përfaqësonin kulmin e lirisë inxhinierike. Skuderitë funksiononin si laboratorë të pavarur zhvillimi, me zgjidhje teknike unike dhe identitet të dallueshëm për çdo ekip. Ishte një periudhë ku kreativiteti shpesh bënte diferencën në pistë.

Një nga makinat simbol të asaj kohe tani po shkruan një kapitull të ri të historisë së saj. Ferrari F310, e përdorur nga Michael Schumacher në Botërorin e Formula 1 të vitit 1997, do të dalë në ankand nga shtëpia prestigjioze RM Sotheby’s.

E pajisur me një motor 3.0 litra V10 që prodhonte rreth 730 kuaj fuqi, Ferrari F310 debutoi në Çmimin e Madh të Belgjikës. Schumacher e përdori makinën gjatë sesioneve kualifikuese, por për shkak të reshjeve të dendura gjatë garës, u detyrua të rikthehej te shasia e mëparshme. Në garën pasuese në Itali, makina iu besua Eddie Irvine, i cili e mbylli garën në vendin e tetë.

Paraqitja e fundit e këtij modeli erdhi në Çmimin e Madh të Austrisë, ku gara përfundoi pas një përplasjeje me Jean Alesi. Pas tërheqjes nga garat, Ferrari F310 u shit nga fabrika në vitin 1999, duke kaluar fillimisht në Gjermani e më pas në Shtetet e Bashkuara të Amerikës.

Makina ka qenë pjesë e disa ekspozitave prestigjioze, përfshirë Audrain Auto Museum në Rhode Island në vitin 2014 dhe Goodwood Festival of Speed në vitin 2019. Ajo është certifikuar zyrtarisht nga Ferrari Classiche në janar të vitit 2007 dhe shoqërohet me dokumentacionin origjinal të njohur si “Red Book”.

Vlera e parashikuar në ankand për këtë pjesë të rrallë të historisë së Formula 1 varion nga 5.5 deri në 7.5 milionë euro, duke e bërë atë një nga objektet më të çmuara të motorsportit që del në shitje këtë vit.

Real Madrid po përjeton një periudhë të vështirë dhe pa precedent në sezonin aktual, me rezultate zhgënjyese dhe paqartësi të brendshme që po rrisin shqetësimet e tifozëve dhe ekspertëve.

Klubi madrilen u eliminua nga Copa del Rey, duke humbur 3-2 ndaj Albacete, një ekip i Divizionit të Dytë, në ndeshjen debutuese të trajnerit të ri Álvaro Arbeloa. Pak ditë më vonë, “Los Blancos” humbën edhe Superkupën e Spanjës, duke u mposhtur 3-2 nga rivali tradicional, FC Barcelona, në finalen e zhvilluar në Arabinë Saudite.

Shtysa e krizës për disa ekspert thuhet se është edhe shkëputja e kontratës së Xabi Alonso, i cili qëndroi në stol vetëm 233 ditë, një nga periudhat më të shkurtra për trajnerë në historinë e klubit. Largimi i tij nxori në pah tensionet në menaxhimin e skuadrës dhe mungesën e autoritetit brenda grupit të lojtarëve.

Në LaLiga, Real Madrid renditet aktualisht në vendin e dytë, katër pikë prapa Barcelonës. Në Champions League, skuadra ndodhet në vendin e 7-të në tabelë, larg pritshmërive të klubit për të qenë një prej favoritëve për trofe.

Analistët dhe mediat sportive e përshkruajnë situatën në klub si tension të lartë dhe paqartësi taktike, ndërsa presioni mbi drejtuesit dhe trajnerin e ri është në rritje. Shumë pyetje mbeten pa përgjigje rreth drejtimit të skuadrës dhe mënyrës se si Real Madrid do të reagojë ndaj këtij sezoni problematik.