Author: N.T.

Tenistja Elena Rybakina ka bërë historinë në US Open, duke u kualifikuar në gjysmëfinale të turneut, ndërsa nga e hëna do të jetë zyrtarisht numri një në botë.

Rybakina, aktualisht e dyta në renditjen botërore, mposhti në çerekfinale kinezen Qinwen Zheng, në një ndeshje që nuk nisi aspak mirë për të.

Zheng fitoi setin e parë me rezultatin 6-3, por Rybakina reagoi fuqishëm në vazhdim. Ajo dominoi setin e dytë, të cilin e fitoi 6-1, ndërsa në setin vendimtar tregoi qetësi dhe përvojë, duke triumfuar 6-4.

Me këtë sukses, Rybakina siguroi jo vetëm një vend në katërshen më të mirë të turneut, por edhe kreun e renditjes botërore.

Të hënën, kur të publikohet renditja e re e tenisteve, 27-vjeçarja do të bëhet numri një në botë, duke zbritur nga froni bjellorusen Aryna Sabalenka.

Ky është një tjetër kapitull historik në karrierën e Rybakinës, e cila tashmë ka dy tituj të turneve Grand Slam, Wimbledonin në vitin 2022 dhe Australian Open në vitin 2026.

Por objektivi i saj në New York është edhe më i madh.

Për një vend në finalen e US Open, Rybakina do të përballet me amerikanen Coco Gauff.

Gauff siguroi biletën për në gjysmëfinale pasi mposhti Mirra Andreevën me rezultatin 2-6, 7-6 dhe 6-2.

Kështu, skena është gati për një përballje të madhe mes dy prej tenisteve më të forta të momentit.

Rybakina tashmë e ka siguruar majën e botës, por në New York kërkon edhe trofeun.

Faza e ligës në Ligën e Kampionëve 2026/27 hyn sonte në ditën e fundit të xhiros hapëse, me gjashtë ndeshje që premtojnë emocione dhe spektakël në arenën evropiane.

Programi i së enjtes nis në orën 18:45, me dy përballje që hapin mbrëmjen. Në Stamboll, Fenerbahce përballet me Romën, në një duel me rëndësi të veçantë për të dyja skuadrat. Klubi turk rikthehet në fazën kryesore të Ligës së Kampionëve pas një mungese të gjatë, ndërsa Roma rikthehet në kompeticionin më prestigjioz evropian për herë të parë që nga sezoni 2018/19.

Në të njëjtën kohë, PSV Eindhoven do të kërkojë një nisje pozitive në shtëpi ndaj Shakhtarit të Donetskut.

Spektakli i madh vazhdon në orën 21:00, kur në fushë zbresin disa prej emrave më të mëdhenj të futbollit evropian.

Bayern Munich do ta nisë rrugëtimin e tij në këtë edicion ndaj Bodo/Glimt, ndërsa Manchester United do të presë Sabahun e Azerbajxhanit. Për “Djajtë e Kuq”, kjo ndeshje shënon rikthimin në Ligën e Kampionëve pas paraqitjes së fundit në sezonin 2023/24.

Për më tepër, sfida ndaj Sabahut do të jetë një moment historik për klubin anglez, pasi do të zhvillojë ndeshjen e 300-të në historinë e Kupës Evropiane.

Një tjetër moment i veçantë pritet në Itali, ku Como do të bëjë debutimin e tij në garat evropiane. Skuadra e drejtuar nga Cesc Fabregas do të përballet me RB Leipzig, në një mbrëmje historike për klubin italian.

Në ndeshjen tjetër të orës 21:00, Slavia Praha do të kërkojë një start të suksesshëm ndaj Lensit.

Me këto gjashtë përballje, kompletohet xhiroja e parë e fazës së ligës në Ligën e Kampionëve. Pas dy ditësh me përballje të forta dhe shumë emra të mëdhenj në aksion, sonte mbyllet një javë e mbushur me emocionet e kompeticionit më prestigjioz për klube në Evropë.

Lionel Messi vazhdon të shkruajë histori. Pavarësisht se tashmë është 39-vjeçar, ylli argjentinas është sërish pjesë e listës së të nominuarve për “Topin e Artë” 2026.

Messi vjen nga një tjetër sezon mbresëlënës me Inter Miamin, ku në 49 paraqitje gjatë sezonit 2025/26 realizoi 45 gola dhe 30 asistime.

Kontributi i tij ishte vendimtar edhe në suksesin më të madh të klubit amerikan, pasi Messi ndihmoi Inter Miamin të fitonte për herë të parë në histori MLS Cup.

Paraqitjet individuale dhe ndikimi i tij në fushë kanë bërë që Messi të mbetet edhe një herë në mesin e kandidatëve për çmimin më prestigjioz individual në futboll.

Argjentinasi është rekordmen me tetë “Topa të Artë”, të fituar në vitet 2009, 2010, 2011, 2012, 2015, 2019, 2021 dhe 2023.

Tani, në moshën 39-vjeçare, Messi synon të bëjë të pamundurën dhe të fitojë për herë të nëntë këtë trofe, duke shtuar edhe një tjetër kapitull në karrierën e tij të jashtëzakonshme.

Nëse do ta arrinte këtë sukses, do të ishte një tjetër dëshmi e jashtëzakonshme e nivelit të argjentinasit, i cili edhe pas kaq shumë vitesh vazhdon të jetë pjesë e elitës së futbollit botëror.

Real Madridi ka bërë publike listën e futbollistëve të grumbulluar për supersfidën e sontme ndaj Interit në Ligën e Kampionëve.

“Los Blancos” do ta presin skuadrën italiane në “Santiago Bernabeu”, në ndeshjen e parë të fazës së ligës, e cila nis nga ora 21:00.

Trajneri i Real Madridit, Jose Mourinho, ka vendosur të përfshijë në skuadër edhe disa futbollistë që janë rikthyer pas lëndimeve. Thiago Pitarch, Aurelien Tchouameni dhe Endrick janë sërish në dispozicion, pasi kanë lënë pas problemet fizike që i kishin mbajtur jashtë që nga faza përgatitore.

Megjithatë, madrilenët vazhdojnë të kenë një listë të gjatë mungesash. Eder Militao, Ferland Mendy, Rodrygo Goes dhe Raul Asencio janë jashtë për shkak të lëndimeve, ndërsa Eduardo Camavinga, Bernardo Silva dhe Arda Guler nuk do të jenë të gatshëm për shkak të pezullimeve.

Për të plotësuar grupin, Mourinho ka marrë sërish lojtarë nga Castilla. Në listën e të grumbulluarve janë përfshirë edhe portierët Sergio Mestre dhe Javi Navarro, mbrojtësi Mario Rivas dhe mesfushori Cestero.

Real Madridi synon ta nisë aventurën evropiane me fitore, por përballë do të ketë një Inter që vjen në Madrid me të njëjtin objektiv: tri pikët.

Janë bërë të ditur pesë klubet që do të garojnë për çmimin prestigjioz “Klubi i Vitit për Meshkuj 2026”, një nga kategoritë e rëndësishme të ceremonisë së organizuar nga France Football.

Në listën e të nominuarve janë Arsenali, Bayern Munich, Bodo/Glimt, Flamengo dhe Paris Saint-Germain, skuadra që lanë gjurmë gjatë sezonit të kaluar, secila me paraqitje dhe rezultate të veçanta.

Arsenali riktheu titullin e Ligës Premier në vitrinën e klubit pas një pritjeje prej 22 vitesh. Skuadra londineze ishte shumë pranë edhe triumfit në Ligën e Kampionëve, por në finale u mposht nga PSG-ja pas ekzekutimit të penalltive.

Bayern Munich pati një sezon të jashtëzakonshëm në Gjermani nën drejtimin e Vincent Kompany. Bavarezët humbën vetëm një ndeshje në Bundesligë dhe dhuruan disa përballje spektakolare në Evropë, përfshirë sfidat ndaj PSG-së, Real Madridit dhe Atalantës.

Surprizën më të madhe e përfaqëson Bodo/Glimt. Klubi norvegjez befasoi Evropën duke triumfuar ndaj emrave të mëdhenj si Atletico Madrid, Manchester City dhe Inter, duke siguruar një vend në fazën e eliminimit direkt.

Në anën tjetër, Flamengo pati një sezon të suksesshëm në Amerikën e Jugut, duke fituar dy trofe të rëndësishëm nën drejtimin e Filipe Luis, përfshirë Copa Libertadores dhe kampionatin brazilian.

Në garë është edhe Paris Saint-Germain. Kampionët francezë dominuan në Ligue 1 dhe arritën suksesin më të madh në Evropë, duke fituar Ligën e Kampionëve pas fitores ndaj Arsenalit në finale.

Fituesi i çmimit do të mësohet më 26 tetor 2026, gjatë ceremonisë së “Ballon d’Or”, e cila do të mbahet në Londër të Anglisë.

Java e pestë e Albi Mall Superligës së Kosovës sjell sot, të martën, dy përballje që pritet të prodhojnë emocione dhe pikë të rëndësishme për skuadrat. Të dy takimet janë në program nga ora 16:00.

Në Skenderaj, në stadiumin “Bajram Aliu”, Drenica do të përballet me Prishtinën në një duel ku vendasit kërkojnë fitoren e parë të sezonit, ndërsa mysafirët synojnë të vazhdojnë serinë pozitive.

Prishtina e ka nisur kampionatin në mënyrën më të mirë të mundshme, duke regjistruar tri fitore në tri ndeshjet e para. Skuadra kryeqytetase do të kërkojë të ruajë ritmin edhe në Skenderaj, por përballë do të ketë një Drenicë që llogarit fuqishëm në mbështetjen e tifozëve dhe faktorin e fushës.

Në të njëjtën kohë, në stadiumin “Liman Gegaj” në Malishevë, Vushtrria do të përballet me Llapin.

Kjo sfidë është veçanërisht e rëndësishme për të dyja skuadrat, pasi fillimi i sezonit ka qenë shumë i vështirë. Si Vushtrria, ashtu edhe Llapi kanë pësuar nga katër humbje në katër ndeshjet e para, ndaj përballja e sotme është një mundësi për të ndryshuar situatën dhe për të regjistruar pikët e para.

Dy ndeshje, katër skuadra dhe një objektiv i përbashkët: të dalin nga fusha me pikë dhe të kthejnë sezonin në rrugën e duhur.

Janë bërë të ditur pesë klubet që do të garojnë për çmimin prestigjioz “Klubi i Vitit për Meshkuj 2026”, një nga kategoritë e rëndësishme të ceremonisë së organizuar nga France Football.

Në listën e të nominuarve janë Arsenali, Bayern Munich, Bodo/Glimt, Flamengo dhe Paris Saint-Germain, skuadra që lanë gjurmë gjatë sezonit të kaluar, secila me paraqitje dhe rezultate të veçanta.

Arsenali riktheu titullin e Ligës Premier në vitrinën e klubit pas një pritjeje prej 22 vitesh. Skuadra londineze ishte shumë pranë edhe triumfit në Ligën e Kampionëve, por në finale u mposht nga PSG-ja pas ekzekutimit të penalltive.

Bayern Munich pati një sezon të jashtëzakonshëm në Gjermani nën drejtimin e Vincent Kompany. Bavarezët humbën vetëm një ndeshje në Bundesligë dhe dhuruan disa përballje spektakolare në Evropë, përfshirë sfidat ndaj PSG-së, Real Madridit dhe Atalantës.

Surprizën më të madhe e përfaqëson Bodo/Glimt. Klubi norvegjez befasoi Evropën duke triumfuar ndaj emrave të mëdhenj si Atletico Madrid, Manchester City dhe Inter, duke siguruar një vend në fazën e eliminimit direkt.

Në anën tjetër, Flamengo pati një sezon të suksesshëm në Amerikën e Jugut, duke fituar dy trofe të rëndësishëm nën drejtimin e Filipe Luis, përfshirë Copa Libertadores dhe kampionatin brazilian.

Në garë është edhe Paris Saint-Germain. Kampionët francezë dominuan në Ligue 1 dhe arritën suksesin më të madh në Evropë, duke fituar Ligën e Kampionëve pas fitores ndaj Arsenalit në finale.

Fituesi i çmimit do të mësohet më 26 tetor 2026, gjatë ceremonisë së “Ballon d’Or”, e cila do të mbahet në Londër të Anglisë.

Liga e Kampionëve rikthehet me ndryshime të rëndësishme në gjykimin e ndeshjeve dhe përdorimin e VAR-it.

UEFA ka prezantuar direktiva të reja, duke rikthyer gjyqtarin kryesor në qendër të vendimmarrjes. Sipas shefit të gjyqtarëve të UEFA-s, Roberto Rosetti, vendimet duhet të merren fillimisht në fushë, ndërsa VAR-i duhet të ndërhyjë vetëm kur ka një gabim të qartë dhe të rëndësishëm.

Një tjetër objektiv është që kontrollet e VAR-it të jenë më të shpejta dhe të mos shkaktojnë vonesa të panevojshme. Teknologjia mund të përdoret edhe për korrigjimin e identitetit të lojtarit të ndëshkuar gabimisht, ndërsa në raste të caktuara mund të rishikohet edhe një karton i dytë i verdhë i dhënë gabimisht.

VAR-i mund të ndërhyjë gjithashtu për faulle pa top, nëse ato ndikojnë drejtpërdrejt në një gol, penallti apo vendim tjetër të rëndësishëm.

UEFA kërkon më shumë uniformitet edhe në rastet e prekjeve me dorë në zonë, për të shmangur interpretime të ndryshme.

Ndryshime ka edhe në ritmin e lojës. Lojtarët që zëvendësohen duhet të largohen nga fusha brenda 10 sekondash, ndërsa vonesat në rivëniet nga porta apo goditjet e këndit mund të sjellin ndëshkime dhe ndryshim të zotërimit.

Ndërkohë, UEFA nuk do të aplikojë automatikisht “ligjin Prestianni” për mbulimin e gojës gjatë komunikimit. Por sjellja antisportive mund të ndëshkohet.

Në fund, vetëm kapiteni pritet të komunikojë me gjyqtarin për vendimet, ndërsa protestat e lojtarëve të tjerë mund të ndëshkohen me karton të verdhë.

Mesazhi i UEFA-s për sezonin e ri është i qartë: më shumë autoritet për gjyqtarin në fushë dhe një VAR që korrigjon gabimet, por nuk merr kontrollin e ndeshjes.

Lojërat Mesdhetare “Prishtina 2030” tashmë kanë edhe simbolin e tyre zyrtar. Logoja, e krijuar nga dizajneri Dardan Luta, do të jetë një prej elementeve kryesore të identitetit të Kosovës gjatë organizimit të kësaj ngjarjeje të madhe sportive.

Logoja u prezantua në Taranto, gjatë ceremonisë përmbyllëse të Lojërave Mesdhetare 2026, në një moment simbolik kur Kosova mori zyrtarisht stafetën për organizimin e edicionit të vitit 2030.

Në pamje të parë, dizajni duket minimalist dhe i thjeshtë, por pas formave të tij fshihen disa referenca të lidhura ngushtë me Prishtinën, kulturën dhe historinë e Kosovës.

Elementi qendror është vetë numri “2030”. Forma e tij e përmbysur është konceptuar si një referencë ndaj Hyjneshës në Fron, një prej simboleve më të njohura të kryeqytetit.

Edhe numrat 2 dhe 3 kanë një funksion të dyfishtë. Përmes mënyrës se si janë vendosur, ato krijojnë forma që të kujtojnë shkronjat “P” dhe “R”, duke iu referuar drejtpërdrejt emrit të Prishtinës.

Në dy zerot e logos është integruar një tjetër element i trashëgimisë shqiptare. Format e tyre janë frymëzuar nga motivet tradicionale të qilimave shqiptarë, duke i dhënë dizajnit një karakter të veçantë kulturor.

Jo më pak domethënëse është edhe tipografia. Ajo është bazuar në anatominë e alfabetit latin-romak të zbuluar në Ulpianë, duke krijuar një lidhje mes identitetit modern të Lojërave dhe historisë së lashtë të Kosovës e Dardanisë.

Kështu, një simbol në dukje minimalist është ndërtuar mbi disa shtresa kuptimore: Prishtina, trashëgimia kulturore, historia dhe sporti janë ndërthurur në një identitet të vetëm vizual.

Kjo ishte edhe një prej kërkesave kryesore të konkursit për krijimin e logos, e cila duhej të ishte origjinale, e qartë, e dallueshme, lehtësisht e mbajtshme në mend dhe funksionale në madhësi e formate të ndryshme.

Logoja është konceptuar për t’u përdorur shumë përtej materialeve promocionale. Ajo do të shfaqet në fanella, stadiume, dokumente zyrtare, materiale reklamuese, transport dhe hapësira publike, si dhe në qytetet ku do të zhvillohen garat e Lojërave Mesdhetare “Prishtina 2030”.

Një tjetër veçori e këtij identiteti është pritja e parë publike. Krahasuar me disa projekte të mëparshme të identitetit vizual në Kosovë, të cilat kanë shkaktuar debate të shumta, logoja e “Prishtina 2030” është pritur dukshëm më pozitivisht.

Ndoshta pikërisht sepse arrin të bëjë një kompromis mes modernes dhe tradicionales: vizualisht është e pastër dhe bashkëkohore, ndërsa në përmbajtje bart simbole që lidhen me Prishtinën, kulturën shqiptare dhe historinë e Kosovës.

Në fund, logoja e Dardan Lutës nuk është thjesht një kombinim numrash për të shënuar vitin 2030. Ajo është konceptuar si një rrëfim vizual për qytetin dhe vendin që do të presë Lojërat Mesdhetare – një identitet që synon ta përfaqësojë Kosovën para mijëra sportistëve dhe miliona shikuesve nga rajoni e më gjerë.

Prishtina 2030 kështu nuk ka marrë vetëm një logo, por një simbol që synon ta tregojë historinë e saj në një gjuhë moderne.

Tyson Fury ka hedhur benzinë mbi një prej dueleve më të shumëpritura të boksit, duke pretenduar se Anthony Joshua po tërhiqet nga përballja e planifikuar mes dy yjeve britanikë.

“Gypsy King” nuk u ndal me kaq. Nëse dueli me Joshuan nuk realizohet, Fury ka bërë të qartë se synimi i tij i radhës është Oleksandr Usyk, të cilin e ka sfiduar publikisht për një përballje të tretë.

Fury dhe Joshua kanë qenë prej kohësh në bisedime për një duel mes dy ish-kampionëve të botës në peshat e rënda. Përballja është përfolur për muajin nëntor, por ende nuk ka një konfirmim zyrtar për vendin ku do të zhvillohet.

Fury, i cili nuk e ka fshehur zhgënjimin për vonesat në finalizimin e marrëveshjes, kishte sulmuar Joshuan edhe javën e kaluar, duke e cilësuar atë si “frikacak”.

Në një video të publikuar në Instagram, 38-vjeçari pretendoi se Joshua po i shmanget përballjes dhe menjëherë e ktheu vëmendjen te rivali i tij ukrainas.

“E gjithë kjo vetëm do të më çojë drejt një përballjeje me Oleksandr Usykun. Oleksandr, ti je trajneri dhe mentori i tij. E di se ai ka mentalitet të dobët dhe nuk do të përballej kurrë me ‘Gypsy King’, ndërsa ti ke pasur guximin të luftosh me mua dy herë”, deklaroi Fury.

Britaniku më pas iu referua dy humbjeve të tij ndaj Usykut dhe i bëri ukrainasit një ftesë të drejtpërdrejtë për një trilogji.

“Herën e fundit vendimet ishin në favorin tënd. Të lumtë. Të uroj fat dhe le ta bëjmë përsëri. Le ta përsërisim në nëntor”.

“Topi është në fushën tënde. A dëshiron të luftosh me mua këtë vit, në 2026, apo po e lë fare? Më njofto, sepse tani jam duke kërkuar një kundërshtar të ri”, shtoi ai.

Fury është mposhtur dy herë nga Usyk, i cili gjatë karrierës së tij ka arritur të shpallet dy herë kampion i padiskutueshëm i botës në kategorinë e peshave të rënda.

Në anën tjetër, Joshua së fundmi ka punuar me ekipin ukrainas të stërvitjes që ka bashkëpunuar edhe me Usykun, një detaj që e bën edhe më pikante deklaratën e Furyt.

Sa i përket duelit Fury–Joshua, Madison Square Garden në New York është përmendur si një prej opsioneve kryesore për organizimin e tij. Megjithatë, kampi i Joshuas preferon që përballja të zhvillohet në Wembley Stadium.

Kompania saudite Sela, e cila raportohet se po financon eventin, së bashku me transmetuesin Netflix, thuhet se favorizojnë zhvillimin e duelit në Shtetet e Bashkuara.

Tani vëmendja është kthyer te negociatat. Nëse Fury–Joshua merr dritën jeshile për nëntor, fansat do të shohin më në fund një duel që është kërkuar prej vitesh. Në të kundërt, “Gypsy King” tashmë e ka bërë të qartë alternativën e tij: një kapitull të tretë me Usykun.