Author: K.B.

Zyrtarë të Policisë Federale gjermane kanë arrestuar në aeroportin e Shtutgartit një shtetas të Kosovës të dënuar për vrasje.

Siç raporton Agjencia Gjermane e Lajmeve dpa, 53-vjeçari ishte dënuar në vitin 1999 nga Gjykata e Landit në Hajlbron me dymbëdhjetë vjet burgim dhe pesë vite më vonë ishte dëbuar në vendlindjen e tij, Kosovë.

“Gjatë ri-hyrjes fundjavën e kaluar, ai u arrestua dhe u dërgua në burgun e Shtutgart-Stamhajmit. Aty pritet të vuajë pjesën e mbetur të dënimit”, u tha në raportimin e dpa-së.

Sipas të dhënave, burri kishte ardhur me një fluturim nga Prishtina.

Por, gjatë një kontrolli është konstatuar se ndaj tij ekzistonte një urdhër arresti për ekzekutimin e dënimit, shpjegoi një zëdhënës i Policisë Federale.

Sipas të dhënave, 53-vjeçari duhet të vuajë edhe saktësisht 2.127 ditë burg.

Po të mos kishte hyrë sërish në Gjermani, ai do të kishte mbetur i pa shqetësuar.

Në Gjykatën Themelore në Pejë- Dega në Istog, të mërkurën është dhënë fjala përfundimtare në gjykimin për fajde ndaj katër të akuzuarve Ajet Kuqi, Xhevdet Cacaj, Idriz Gashi dhe Isuf Thaqi.

Prokurorja Sadije Muriqi, sipas procesverbalit të seancës, fjalën përfundimtare e kishte përgatitur në formë të shkruar dhe ia dorëzoi gjykatës dhe palëve. Më pas e elaboroi edhe verbalisht, raporton “Betimi për Drejtësi“.

Në procesverbal thuhet se përfaqësueja e të dëmtuarit Rifat Jasiqi, avokatja Xhevahire Klopner deklaroi se pajtohet me fjalën e prokurores. Tha se fjalën përfundimtare e ka përgatitur në formë të shkruar dhe ia dorëzoi gjykatës dhe palëve, ndërkaq e elaboroi para gjykatës.

Edhe mbrojtësi i të akuzuarit Ajet Kuqi, avokati Getuar Zekaj i caktuar sipas detyrës zyrtare, fjalën përfundimtare e dorëzoi me shkrim dhe e elaboroi më pas verbalisht. Me fjalën e mbrojtësit u pajtua edhe vetë i akuzuari Kuqi.

Gjithnjë sipas procesverbalit, mbrojtësja e të akuzuarit Xhevdet Cacaj, avokatja Venera Gashi-Selmanaj, e caktuar sipas detyrës zyrtare, njëjtë sikurse të tjerët, fjalën përfundimtare e dorëzoi me shkrim, dhe e elaboroi verbalisht.

Me fjalën e Gashi-Selmanajt u pajtua edhe Cacaj, i cili tha se nuk ka diçka tjetër për të shtuar.

Më tutje, në procesverbal thuhet se edhe mbrojtësja e të akuzuarit Idriz Gashi, avokatja Shqipdona Maraj fjalën përfundimtare ia dorëzoi gjykatës me shkrim dhe më pas e elaboroi. Me fjalën e saj u pajtua i akuzuari Gashi.

Mbrojtësja e të akuzuarit Isuf Thaqi, avokatja Majlinda Kollqaku, sipas procesverbalit, veproi ngjashëm sikur kolegët e saj, ku fjalën përfundimtare e dorëzoi me shkrim dhe e elaboroi verbalisht. Fjalën e saj e përkrahu i mbrojturi i saj, Thaqi.

Gjykatësi Petrit Nrecaj shpalljen e aktgjykimit e caktoi për një datë tjetër.

Ndryshe, edhe në këtë seancë mungoi i dëmtuari Jasiq, pasi ka njoftuar gjykatën se meqenëse nuk e ka të obliguar pjesëmarrjen, e përfaqëson mbrojtësja.

Të akuzuarit Arbër Gashi, Ajet Kuqi, Xhevdet Cacaj, Idriz Gashi, Shërbim Berisha, Blerim Thaqi dhe Isuf Thaqi, ngarkohen për veprën penale të fajdesë, në dëm të dëmtuarit Rifat Jasiq. Për të akuzuarin Blerim Thaqi ishte veçuar procedura penale dhe i njëjti është dënuar me 2 vjet burgim dhe 2 mijë euro gjobë për “Fajde”. Ai po ashtu obligohet që pas plotfuqishmërisë së aktgjykimit në afat prej 30 ditësh t’ia kompensojë të dëmtuarit Jasiq 16 mijë e 650 euro.

Kurse, për të akuzuarin Shërbim Berisha pocedura është veçuar më 28 tetor 2025. Ndërkaq, për të akuzuarin Arbër Gashi, proceduar u veçua në seancën e 27 janarit 2026.

Sipas aktakuzës të ngritur nga Prokuroria Themelore në Pejë, më 13 korrik 2018, të akuzuarit ngarkohen për veprën penale të fajdesë, në dëm të dëmtuarit Rifat Jasiq.

Sipas aktakuzës, G.D., akuzohej se në vitin 2015 kishte shfrytëzuar gjendjen ekonomike të dëmtuarit Rifat Jasiq, duke kontraktuar kamatë jopropercionale në këmbim të hollave. Sipas akuzës, i pandehuri i kishte dhënë të dëmtuarit shumën prej 90 mijë euro me kamatë prej 5% në muaj.

Ndërsa sipas dispozitivit të dytë, D., akuzohej se i kishte dhënë shumën prej 23 mijë euro me kamatë prej 10% në muaj dhe pasi i dëmtuari nuk e paguan në tërësi kamatën, i pandehuri ia shton borxhin bazë në shumë prej 27 mijë euro dhe kamatën prej 7 mijë euro.

I pandehuri Arbër Gashi akuzohet se në Deçan, në vitin 2014 dhe vitin 2015, i kishte dhënë të dëmtuarit shumën prej 4 mijë euro me kamatë 10% në muaj dhe shumën prej 17 mijë euro në këmbim të kamatës prej 10% në muaj.

I pandehuri Ajet Kuqi akuzohet se në vitin 2016, të dëmtuarit i kishte dhënë shumën prej 10 mijë euro me kamatë mujore prej 8% në muaj.

I pandehuri Xhevdet Cacaj akuzohet se në vitin 2015, të dëmtuarit ia kishte dhënë me fajde shumën prej 5 mijë euro me kamatë prej 7% në muaj, ndërsa në vitin 2016 akuzohet se i kishte dhënë përsëri të dëmtuarit shumën prej 2 mijë euro me kamatë mujore prej 10% . Ndërsa sipas dispozitivit të tretë, i njëjti akuzohet se e kishte ngarkuar të dëmtuarin me 15% kamatë mujore, për të hollat e dhëna në shumë prej 6 mijë euro në muaj.

I pandehuri Idriz Gashi akuzohet se më 2016, të dëmtuarit i kishte dhënë hua me fajde në shumë prej 6 mijë euro, me kamatë prej 15% në muaj.

I pandehuri Përparim Rexhepi akuzohet se i dha të dëmtuarit shumën prej 15 mijë euro, me kamatë mujore prej 6%.

I pandehuri Shërbim Berisha akuzohet se i kishte dhënë të dëmtuarit shumën prej 15 mijë euro, me kamatë mujore prej 5% në muaj apo 750 euro në muaj. Tutje, i pandehuri Blerim Thaqi akuzohet se i kishte dhënë të dëmtuarit shumën prej 15 mijë euro, me kamatë mujore prej 3 % në muaj.

I pandehuri Isuf Thaqi akuzohet se i kishte dhënë të dëmtuarit në periudha të ndryshme kohore shumën prej 20 mijë euro, me kamatë prej 5% në muaj. Kurse, i akuzuari Qamil Pajaziti akuzohet se i kishte dhënë të dëmtuarit shumën prej 4 mijë euro, me kamatë mujore prej 7.5%, përkatësisht nga 300 euro në muaj.

Me këto veprime, ata akuzohen se në vazhdimësi kanë kryer veprën penale “Fajdeja”, nga neni 343, paragrafi 1 dhe lidhur me nenin 81 të KPRK-së.

Ndryshe, në këtë rast akuzohej edhe L.K., mirëpo për të njëjtin kishte pushuar procedura penale për shkak se ka ndërruar jetë. Sipas aktit akuzues, ai akuzohej se i kishte dhënë të dëmtuarit shumën prej 10 mijë euro me kamatë mujore prej 4% në muaj, kurse pas pagesës nga i dëmtuari të kamatës në shumë prej 1 mijë e 200 euro, ai ia kishte rritur përqindjen në 5% në muaj, ku i njëjti për periudhën prej 12 muaj paguan 500 euro në muaj në emër të kamatës. /BetimipërDrejtësi/

Kryeministri në detyrë, Albin Kurti, s’ka pranuar t’u përgjigjet gazetarëve kur është pyetur nëse do të ketë ndonjë koalicion qeverisës.

Gjithashtu, Kurti u pyet edhe për aktgjykimin e Kushtetuteses për votimin e nënkryetarit nga radhëte e komunitetit serb, Nenaq Rashiq, por Kryeministri në detyrë ishte “shumë vonë”.

Kurti po merr pjesë në “Dita e Biznesit Francez në Kosovë”, në një forum për fuqizimin e bashkëpunimit ekonomik dhe promovimit të mundësive të investimit midis Kosovës dhe Francës.

Të mërkurën, ai deklaroi se do të ketë ndryshime nga kabineti që e prezantoi në vjeshtë, por theksoi se prioritet mbetet konstituimi i Kuvendit dhe formimi sa më i shpejtë i qeverisë.

“Do të ketë shumë prej emrave të cilët tashmë i kam prezantuar, edhe unë edhe Glauk Konjufca në vjeshtën e vitit të kaluar. Mirëpo nuk do të jenë identik, do të ketë edhe emra të tjerë. Ne po përgatitemi që si parti ta konstituojmë Kuvendin, dhe sa më shpejt ta formojmë qeverinë. I kemi tri marrëveshje ndërkombëtare me Bankën Botërore dhe njëkohësisht e kemi Planin e Rritjes me BE-në në vlerë prej 882.6 milionë euro, e që duhet sa më parë ta miratojmë në Kuvend, pa harruar atë që e kemi përgjegjësi më shumë, obligim, e ky është buxheti për vitin 2026″, tha Kurti.

Shikuesit vunë re një detaj në serialin e animuar “The Simpsons” – ekzistencën e një ishulli në pronësi të pedofilit të dënuar Jeffrey Epstein.

Në episodin e sezonit të 12-të “The Computer Wore Menace Shoes”, i cili u transmetua në vitin 2000, Homer krijon një faqe interneti për të përhapur thashetheme dhe lajme të rreme nën pseudonimin Z. X.

Midis teorive konspirative të Homerit është një referencë për “të çmendurit në një ishull”, të cilën shikuesit e interpretuan si një ishull privat në Ishujt Virgjër të ShBA-së që ishte në pronësi të Jeffrey Epstein.

Një skenë nga episodi, e shkruar nga John Swartzwelder dhe me regji nga Mark Kirkland, përmbante një njoftim në Z. X ku shkruhej: “Vëmendje: Disa të çmendur në ndonjë ishull sundojnë fshehurazi botën”.

Reagimet e shumta nga shikuesit në rrjetet sociale ishin të shumta.

“Mbeta pa fjalë pas këtij episodi”, “Ky nuk është një serial, por një përshkrim i jetës sonë nga jeta reale”, “Ata dinin gjithçka”, janë disa nga komentet për këtë serial.

Disa përdorues të mediave sociale kanë pohuar se krijuesi i “Simpsons”, Matt Groening, dyshohet se ka udhëtuar me një nga avionët privatë të Epstein.

Kreu i qeverisë shqiptare, Edi Rama ka publikuar disa foto nga vizita e tij në Vatikan.

Ai do takohet me me Atin e Shenjtë, e cila nisi sot nga Genazzano, në bazilikën e famshme, ku gjendet shembëlltyra e Zojës së Këshillit të Mirë, mbi një copë të shkëputur nga muri i Kishës së Shkodrës në vitin e largët 1467.

“Në Pallatin Apostolik të Vatikanit – Pritja nga Prefekti i Shtëpisë Papnore dhe Zotërinj të Shenjtërisë së Tij”, shkroi kryeministri shqiptar.

Përfaqësuesit e platformës “Liria ka Emër”, Eliza Hoxha dhe Ismail Tasholli e kanë vizituar sot Komunën e Klinës, ku janë pritur në NJË takim nga kryetari i kësaj komune, Zenun Elezaj.

Hoxha dhe Tasholli e kanë njoftuar kryetarin Elezaj me misionin e platformës “Liria ka Emër” dhe me aktivitetet në kuadër të fushatës së mobilizimit qytetar për Marshin “Drejtësi, jo politikë”, i cili do të mbahet më 17 shkurt në Prishtinë, në mbrojtje të drejtësisë së paanshme dhe të vlerave të luftës çlirimtare.

Ata shprehën mirënjohje për mbështetjen e dhënë nga Kryetari i Klinës.

“Kur mbështetja për drejtësi vjen nga secila komunë, kjo kauzë merr edhe më shumë peshë. Më 17 shkurt, marshojmë bashkë për drejtësi të vërtetë, jo të politizuar”, tha Hoxha.

“E falënderojmë kryetarin për pritjen që na e bëri dhe gatishmërinë e tij për ta mbështetur pa rezervë Marshin”, tha Tasholli.

Kryetari i Klinës, Zenun Elezaj duke theksuar se drejtësia duhet të jetë e paanshme dhe larg çdo ndikimi politik, u zotua për mobilizim gjithëkomunal për këtë Marsh.

“Marshi “Drejtësi, jo politikë” është një thirrje e drejtë qytetare dhe i ftoj qytetarët e Klinës, por edhe të gjithë Kosovën, që më 17 shkurt të jenë pjesë e këtij marshimi paqësor për drejtësi të vërtetë”, ka theksuar ai.

Platforma “Liria ka Emër” do të vazhdojë takimet dhe aktivitetet në tërë komunat e Kosovës dhe me të gjithë akterët e rëndësishëm të shoqërisë për mobilizim sa më të gjerë qytetar për Marshin e 17 shkurtit, nën moton “Drejtësi, jo politikë”.

Kandidati për deputet nga radhët e Partisë Demokratike të Kosovës, Bekim Haxhiu, do të deponojë sot në Gjykatë Supreme dy ankesa, lidhur me procesin zgjedhor të 28 dhjetorit.

Në një deklarim për IndeksOnline, Haxhiu ka konfirmuar se ankesat po i bën konform afatit të caktuar ligjor, teksa ankesat kanë të bëjnë me dy çështje të rëndësishme që përkojnë me rezultatin përfundimtar dhe ndarjen e mandateve.

“KQZ-ja ka futur në rezultatin zgjedhor 23 mijë e 232 pako me fletëvotime të cilat janë administruar jashtë afatit ligjor, me një vendim që KQZ-ja ka nxjerrë kundërligjshëm dhe në kundërshtim me ligjin për zgjedhjet neni 96, pika 2. Si të tilla, nuk mund të baraz-vlerësohen edhe votat e vlefshme, edhe votat e pavlefshme, të ardhura pas afatit ligjor. Procesi zgjedhor duhet të jetë i drejtë, i matshëm në kohë, dhe jo kështu i cenueshëm, ku votat që kanë mbërritur pas afatit ligjor prej 7 deri në 1 ditë, të procedohen dhe futën në rezultatin zgjedhor. Kjo ka cenuar edhe barazinë e votuesve, edhe barazinë e votave të vlefshme” deklaroi Haxhiu.

Arsyeja e dytë e ankesës është gabimi në përllogaritjen e mandateve të deputetëve.

“Sipas votave të fituara, unë jam i renditur në numrin 20 me votat e fituara, në një subjekt që ka fituar 22 mandate. Përllogaritja e kuotës gjinorë është duke u bërë gabim nga KQZ-ja, sepse nuk ka pasur në konsideratë as ligjvënësi, as KQZ-ja, që prej miratimit të ligjit të ri për zgjedhje duhet të balancohet me ligjin për barazi gjinore, që është ligj special që garanton përfaqësimin 50:50. Kjo do të duhej të praktikohej qysh në fazën e kandidimit, që të jetë e barabartë” shtoi Haxhiu.

Ai thotë se është cenim i barazisë së votës kur dikush me më shumë se 21 mijë vota nuk mund të bëhet deputet, e dikush me 9 mijë vota mund të bëhet deputete.

“Unë besoj që Gjykata Supreme do të merret me ritëm të çështjes, pasi PZAP-ja është marrë me ankesa vetëm në mënyrë formale, nën arsyetimet e KQZ-së në aspektin administrativ. Është e vërtetë që, në dy ankesat të cilat i kam parashtruar, ankesa e cila ka qenë për përllogaritjet e gabuara, vet PZAP-ja deklaroi që KQZ-ja nuk ka mandat për të ndryshuar normat ligjore. Ndërsa, ankesën e parë e arsyeton me ndryshimin e normave ligjore nga KQZ-ja. Duhet kuptuar që KQZ-ja është organ administrativ ligj zbatues dhe jo ligjvënës. KQZ-ja nuk ka të drejtë të ndryshojë ligjin” përfundoi Haxhiu.

Komisioni Qendror i Zgjedhjeve nuk ka dhënë një datë të saktë se kur ky institucion do të thërrasë mbledhjen e radhës për certifikimin e rezultateve të zgjedhjeve të parakohshme për Kuvendin e Kosovës, të cilat janë mbajtur, më 28 dhjetor 2025.

Zëdhënësi i KQZ-së, Valmir Elezi, ka thënë për Indeksonlinen se procesi zgjedhore ndodhet në fazën e ankesave dhe se ky institucion duhet të presë përfundimin e tyre.

“Aktualisht, procesi zgjedhor ndodhet në fazën e ankesave ndaj rezultateve përfundimtare të shpallura nga KQZ-ja, më 31 janar 2026. Sipas Ligjit për zgjedhjet e përgjithshme, palët kanë të drejtë të ankimojnë vendimet e PZAP-it në Gjykatën Supreme, ndërsa afati për paraqitjen e ankesave përfundon sot. Komisioni Qendror i Zgjedhjeve do të presë derisa vendimet të bëhen të plotfuqishme dhe më pas do të procedojë me certifikimin e rezultateve përfundimtare të zgjedhjeve të parakohshme për Kuvendin e Kosovës, të mbajtura, më 28 dhjetor 2025”, tha Elezi.

Zgjedhjet e parakohshme për Kuvendin e Kosovës të 28 dhjetorit, janë mbajtur para 40 ditësh.

Prej 26 ditësh po kërkohet për gjetjen e trupit të 30 vjeçarit Jurgen Karaj nga fshati Fullqet i Klosit i cili dyshohet të jetë rrëmbyer nga rrjedha e ujit të zallit të Darsit në datën 10 Janar.

Që prej asaj dite kërkimet në rrjedhën e lumit Mat janë bërë pa ndërprerje ku çdo ditë në terren kanë qenë dhjetëra forca të Batalionit të Tretë të Repartit të Këmbësorisë Burrel, familjarë të Jurgenit e struktura të tjera.

Ndërkohë, që prej datës 29 Janar, kërkimeve ju është bashkuar edhe një grup i specializuar nga Forcat e Sigurisë së Kosovës. Mbi 11 persona janë çdo ditë në kërkime krah forcave tona të armatosura.

E gjithë vija lumore e lumit të Matit është kontrolluar disa herë, por pa mundur të gjejnë trupin e 30 vjeçarit apo ndonjë shenjë të tij. Sakaq, kërkime po bëhen edhe në basenin ujor të liqenit të Ulzës.

Forcat e Sigurisë së Kosovës kanë lëshuar dronin nënujor në hyrje të liqenit duke bërë të mundur kontrollin edhe në thellësi të tij. Deri në datën 3 Shkurt, nuk është gjetur asnjë shenjë e 30 vjeçarit Jurgen Karaj.

Kërkimet do të vijojnë ndërsa prurjet e lumit Mat kanë rënë ndjeshëm ditët e fundit, duke krijuar më shumë mundësi kontrolli nga grupet e angazhuara në terren.