Author: K.B.

Prokuroria Themelore në Pejë ka ngritur aktakuzë ndaj një oficeri korrektues të Qendrës Korrektuese në Dubravë, me inicialet D.Q., nën dyshimin për kryerjen e veprës penale “Marrja e ryshfetit”.

Sipas njoftimit të Prokurorisë, i pandehuri, në cilësinë e personit zyrtar, gjatë periudhës qershor-gusht 2025, në tri raste të ndara, dyshohet se ka pranuar në mënyrë të tërthortë përfitime në të holla nga një person i privuar nga liria.

“I pandehuri D.Q., në cilësinë e personit zyrtar, gjatë periudhës qershor-gusht 2025, në tri raste të ndara, dyshohet se ka pranuar në mënyrë të tërthortë përfitime në të holla nga një person i privuar nga liria, me qëllim që të vepronte në përputhje me detyrën e tij zyrtare, duke përfituar në mënyrë të kundërligjshme shuma të ndryshme parash”, thuhet në njoftimin e Prokurorisë.

Prokuroria vlerëson se me këto veprime ekziston dyshimi i bazuar mirë se oficeri korrektues ka përmbushur elementet e veprës penale të marrjes së ryshfetit.

Me rastin e ngritjes së aktakuzës, prokurori i çështjes i ka propozuar gjykatës që i pandehuri të shpallet fajtor dhe të dënohet sipas ligjit.

Po ashtu, Prokuroria ka kërkuar edhe shqiptimin e dënimit plotësues, përkatësisht ndalimin e ushtrimit të funksioneve në administratën publike ose në shërbimin publik, në përputhje me Kodin Penal të Republikës së Kosovës.

Kryetari i Aleancës, Ardian Gjini ka pritur në takim ambasadoren e Izraelit në Kosovë, Tamara Ziv.

Ai ka thënë se me të kanë biseduar për zhvillimet aktuale në vend dhe për mundësitë e intensifikimit të mëtejmë të raporteve tona bilaterale.

“Marrëdhëniet me shtetin e Izraelit janë të një rëndësie të veçantë e strategjike për ne. Falënderues për mbështetjen e vazhdueshme dhe të përkushtuar për të thelluar këtë partneritet në fusha me interes të përbashkët”, ka shkruar Gjini.

Kryetari i Komunës së Prishtinës, Përparim Rama, ka njoftuar se po vazhdojnë punimet për renovimin e Qendrës së Mjekësisë Familjare 5 në lagjen “Dardani”–”Ulpianë”, në kuadër të projektit për rritjen e efiçiencës energjetike.

Sipas Ramës, pas përfundimit të zëvendësimit të dritareve, aktualisht po realizohet izolimi i jashtëm i objektit.

“Po rinovohet Qendra e Mjekësisë Familjare 5 në “Dardani”–”Ulpianë”. Pas zëvendësimit të dritareve, po realizohet izolimi i jashtëm i objektit, në kuadër të projektit me Bashkimin Evropian dhe BERZH-in për rritjen e efiçiencës energjetike”, ka shkruar Rama.

Pritjet në pikën kufitare Batrovci, në kufirin mes Kroacisë dhe Serbisë, kanë kaluar mbi 3 orë, duke krijuar vështirësi të mëdha për mërgimtarët dhe udhëtarët që po kthehen apo po udhëtojnë drejt vendeve të Evropës Perëndimore.

Pamjet live nga vendi i ngjarjes tregojnë kolona të gjata automjetesh dhe pritje të shumta në hyrje-daljet kufitare. Fluksi i lartë i automjeteve po ua vështirëson udhëtimin mërgimtarëve, të cilët po detyrohen të presin për orë të tëra në kufi.

Ish-presidentja e Kosovës, Atifete Jahjaga, ka ndarë përvojën e saj mbi lidershipin, sfidat e udhëheqjes dhe rëndësinë e përfshirjes së grave dhe grupeve të margjinalizuara në vendimmarrje, gjatë një diskutimi të organizuar në kuadër të “Prishtina International Summer University”, raporton Ekonomia Online.

Ajo rikujtoi rrethanat në të cilat u zgjodh presidente për siç tha ajo në kulmin e një krize të thellë politike.

“Ishim ndërmjet viteve 2010 dhe 2011, nëse mund ta quaj kështu, në një krizë mjaft të thellë politike. Dhe sipas Kushtetutës së Kosovës, nëse një president nuk zgjidhet brenda raundit të tretë të votimit, vendi shkon automatikisht në zgjedhje të jashtëzakonshme. Në atë kohë, brenda një viti, Kosova ishte gati të hynte në raundin e tretë të zgjedhjeve parlamentare dhe ne po përballeshim me një nivel mjaft të polarizuar të skenës politike në Kosovë, gjë që është normale, në kllapa, për pjesën juglindore të Evropës, por momenti i Kosovës në atë kohë ishte paksa ndryshe.

Ne ishim sapo në vitin e tretë të shpalljes së pavarësisë dhe disa kriza në momente të caktuara nuk mund të përballohen shumë, ose mund të transformohen negativisht për të ardhmen e vendit. Pra, disi në atë kohë elitat politike në vend erdhën me idenë dhe propozimin për të nominuar një kandidat konsensual si kandidat të mundshëm për kreun e shtetit, sepse deri në atë kohë, asnjë nga emrat e rekomanduar ose të propozuar, pavarësisht nëse vinin nga partitë politike apo deri nga akademia, nuk po gjeneronin votat që kërkoheshin, të cilat nevojiten për zgjedhjen e Presidentit. Dhe kështu, vendi ishte disi duke degraduar më tej në një krizë shumë më të thellë”, tha ajo.

Jahjaga foli për sukseset e saj ndër vite, duke theksuar rëndësinë e të qenurit presidentja e parë femër në Kosovë.

“Ngadalë, unë u ngrita nëpër detyra dhe, në moshën 30-vjeçare, u bëra gjenerale, një gjenerale me një yll e Policisë së Kosovës, gjë që e bëri Kosovën dhe Policinë e Kosovës në atë kohë vendin e parë në botë që kishte një grua shumë të re që arrinte gradën e gjenerales, pa e ditur se në moshën 34-vjeçare, do të shkruaja një tjetër histori, duke u bërë gjenerale me pesë yje, gruaja më e re që mban atë gradë globalisht. Përsëri, pa e ditur se një vit më vonë, do të bëja një tjetër histori për gratë e Kosovës duke u bërë presidentja e parë e Republikës së Kosovës. Dhe duke iu kthyer pyetjes fillestare, pra, ishte një diskutim mjaft i vështirë; ndoshta një ditë do të mund të shkruaj disa kujtime, ku do t’i ndaj publikisht, por për momentin, për shkak të ndjeshmërisë politike, koha nuk është e duhur për të ndarë disa gjëra që nuk kanë qenë publike dhe ende nuk janë publike. Sepse, doni apo s’doni, kur jeni presidente dhe përfaqësuese e lartë institucionale, keni disa detyrime kushtetuese dhe ligjore, shumë kohë pasi t’ia dorëzoni zyrtarisht detyrën tuaj, dhe veçanërisht në rolin si presidente”, tha ajo.

Jahjaga poashtu tha se në momentin kur je në pushtet, gjithçka duhet bërë për popullin, për shtetin, e jo për vete.

“Nuk ka pasur asnjë moment të vetëm që të ketë qenë pyetje për mua, ose që unë të kem ngritur një pyetje për veten time si Atifete Jahjaga, se ku do të jem më pas. Kërkesat e mia të vazhdueshme dhe flamujt që ngrita ishin për shtetin, ishin për popullin, për proceset që kishim, sepse unë jam edukuar kështu gjatë gjithë jetës sime. Sa herë që jeni në një pozitë shumë të lartë, nuk bëhet fjalë për ju. Bëhet fjalë për shtetin, për popullin dhe institucionet të cilat ju po i udhëhiqni ose jeni gati t’i udhëhiqni. Dhe kështu, kufijtë e mospranimit të asaj oferte ishin, më mirë thënë, inekzistente, sepse vendi po shkonte gjithnjë e më thellë në krizën politike të asaj kohe. Dhe kështu, unë e pranova atë ofertë për të qenë kandidatja konsensuale”, u shpreh ajo.

Jahjaga tregoi kontributin e saj për gratë, minoritetet, e poashtu për grupet e margjinalizuara.

“Në një farë mënyre, unë e kam zgjeruar tryezën e vendimmarrjes dhe kam shtuar më shumë karrige për të gjithë ata që për shumë kohë kanë mbetur jashtë procesit të vendimmarrjes, ndonëse ata janë të ndikuar nga procesi ynë i vendimmarrjes. Kam shtuar më shumë karrige për gratë. Kam shtuar më shumë karrige për komunitetet e tjera minoritare, si dhe për komunitetet e margjinalizuara. Doja që të gjithë të ishin pjesë e procesit tim të vendimmarrjes, sepse bëhet fjalë për shtetin, bëhet fjalë për popullin, sepse ne jemi shërbëtorët e tyre dhe sa më shpejt ta kuptojmë këtë si bindje politike, qoftë në Kosovë ose kudo qoftë në botë, ne jemi shërbëtorët tuaj dhe duhet të kuptojmë se cili është shërbimi më i mirë që mund t’i ofrojmë vendit tonë dhe popullit tonë”, u shpreh ajo.

Pas 26 vitesh karrierë në institucionet e sigurisë dhe drejtësisë, Kryeprokurori i Prishtinës, Zejnullah Gashi, ka arritur në majat e sistemit prokurorial.

Të hënën, prokurori me origjinë nga Prizreni u nominua nga Këshilli Prokurorial i Kosovës për pozitën e Kryeprokurorit të Shtetit.

Në votimin e fshehtë të zhvilluar nga Këshilli Prokurorial i Kosovës, ai siguroi pesë vota të anëtarëve, duke u propozuar për këtë post.

Gashi ka një karrierë të gjatë në institucione. Ai është pjesë e strukturave shtetërore të sigurisë dhe drejtësisë që nga viti 2000.

Deri në vitin 2010, Zejnullah Gashi punoi në Policinë e Kosovës në Stacionin Policor në Prizren. Aty u gradua deri në pozitën shef i Krimeve Ekonomike dhe Korrupsionit.

Në vitin 2010, Gashi, jurist me profesion, u dekretua si gjyqtar në sistemin gjyqësor. Shërbeu për pesë vjet si gjyqtar në Gjykatën Themelore në Prizren.

Më 2015, u dekretua si prokuror në Prokurorinë Themelore në Prizren. Ushtroi edhe funksionin e zëvendëskryeprokurorit të kësaj Prokurorie. Në të njëjtën kohë, Gashi përfaqësoi Prokurorinë Themelore në Prizren si anëtar në Këshillin Prokurorial të Kosovës.

Nga viti 2023 deri sot, Gashi vazhdon të ushtrojë pozitën e Kryeprokurorit të Prokurorisë Themelore në Prishtinë.

Disa muaj më parë, më 26 mars të këtij viti, Gashi u shfaqur në shoqërinë e disa funksionarëve të lartë shtetërorë në Bratisllavë të Sllovakisë. Udhëtoi atje për ndeshjen futbollistike mes Sllovakisë dhe Kosovës.

Një fotografi e realizuar në stadiumin e Bratisllavës, e shfaqte Gashin në shoqërinë e tre kryetarëve të komunave, përfshirë Përparim Ramën e Prishtinës, nënkryetarit të Vetëvendosjes, Glauk Konjufca dhe ministrit Blerim Gashani.

Në fotografi shihet edhe Trim Ademi, djali i kryetarit të Federatës së Futbollit të Kosovës, Agim Ademi. I pari i federatës ishte hetuar disa herë penalisht nga Prokuroria Themelore në Prishtinë, të cilën e udhëheq Gashi.

Në maj të këtij viti, portali Kallxo.com publikoi një hulumtim për një takim të Zejnullah Gashit me ish-ministren e Drejtësisë, tashmë u.d. presidenten, Albulena Haxhiu. Takimi ishte zhvilluar më 2024.

Hulumtimi mbështetet në një kallëzim penal të deponuar në Prokurorinë Speciale nga Policia e Kosovës.

Sipas këtij kallëzimi, Kryeprokurori Gashi i kishte shkuar Haxhiut pa paralajmërim në zyrë në Ministrinë e Drejtësisë. Sipas një deklarate të Haxhiut dhënë hetuesve policorë, Gashi i ishte sqaruar ministres për një rast që po e hetonte Prokuroria Themelore në Prishinë.

I ndjekur penalisht në këtë rast ishte Lavdim Krasniqi, një kushëri i Alban Krasniqit, bashkëshortit të ish-ministres së Drejtësisë.

Sipas Haxhiut, Gashi i ishte sqaruar asaj se nuk ishte duke e hetuar Lavdim Krasniqin për hakmarrje politike. /Paparaci.com

Policia Rajonale e Ferizajt ka ndërmarrë një sërë masash operative për parandalimin dhe trajtimin e incidenteve, ndërsa ka publikuar të dhënat për periudhën 06–12 korrik.

Sipas Policisë, gjatë kësaj periudhe janë regjistruar gjithsej 15 raste të vjedhjeve, të kategorizuara si vepra penale kundër pasurisë. Prej tyre, 12 raste kanë ndodhur në territorin e Ferizajt, ndërsa 3 raste janë raportuar në komunën e Kaçanikut.

Po ashtu, në rajonin e Ferizajt është raportuar edhe një rast i dhunës në familje, i cili ka ndodhur në komunën e Kaçanikut.

Në kuadër të zbatimit të urdhëresave të gjykatave kompetente, Policia ka arrestuar 26 persona të kërkuar për vepra të ndryshme penale dhe kundërvajtëse.

Policia Rajonale e Ferizajt ka bërë të ditur se do të vazhdojë angazhimin e saj në parandalimin e veprave penale, rritjen e sigurisë publike dhe zbatimin e urdhëresave të institucioneve të drejtësisë.