Author: K.B.

Dokumentet e FBI-së në lidhje me akuzat kundër presidentit amerikan, Donald Trumpi, për abuzim seksual – të cilat mungonin nga publikimi fillestar i dosjeve Epstein – janë postuar në internet nga Departamenti i Drejtësisë i SHBA-së.

Kjo vjen pasi mediat amerikane raportuan për mungesën e tyre, shkruan skynews.

Ato përfshijnë përmbledhje dhe shënime nga tre intervista të ndara që FBI-ja zhvilloi me një grua e cila pretendoi se ishte sulmuar seksualisht nga Jeffrey Epstein dhe abuzuar seksualisht nga presidenti i tanishëm.

Trump ka mohuar vazhdimisht çdo shkelje, dhe ai dhe Shtëpia e Bardhë kanë thënë se dosjet Epstein e kanë liruar atë nga akuzat.

Në një deklaratë të mëparshme të enjten, Sekretarja e Shtypit e presidentit, Karoline Leavitt, tha se ato janë “plotësisht të pabaza” dhe “të mbështetura nga asnjë provë të besueshme”.

Edhe Departamenti i Drejtësisë ka paralajmëruar më parë se dosjet përfshijnë akuza të pabaza në lidhje me presidentin.

Cilat janë akuzat?

Gruaja, nga Karolina e Jugut, iu drejtua ligjit pasi Epstein u arrestua në vitin 2019.

Ajo pretendoi se financieri miliarder e sulmoi në ishullin Hilton Head, në shtetin e saj të lindjes, kur ishte 13 vjeç.

Incidenti i dyshuar ka ndodhur në ose rreth vitit 1984, sipas një përmbledhjeje të një interviste të FBI-së.

FBI-ja kreu intervista pasuese në katër data të ndara në vitin 2019: 24 korrik, 7 gusht, 20 gusht dhe 16 tetor.

Datat u zbuluan si pjesë e një katalogu provash kundër Ghislaine Maxwell, ish-të dashurës së Epstein dhe bashkëpunëtores së dënuar në komplot, të cilat u publikuan nga Departamenti i Drejtësisë.

Por vetëm përmbledhja e FBI-së e intervistës së 24 korrikut u përfshi fillimisht në miliona dokumente që përbëjnë dosjet Epstein. Ajo nuk përmend asnjë akuzë kundër Trumpit.

Janë memot nga tre intervistat e tjera që janë publikuar tani. Gruaja – emri i së cilës është fshirë në të gjitha intervistat – pretendon abuzim nga Epstein dhe disa bashkëpunëtorë, përfshirë, sipas saj, edhe Trumpin.

Departamenti i Drejtësisë ka përsëritur paralajmërimin e tij të mëparshëm se dosjet e Epstein përmbajnë pretendime të rreme dhe të paverifikuara.

Në kohën e publikimit të tyre, Departamenti tha: “Ky prodhim mund të përfshijë imazhe, dokumente ose video të rreme ose të paraqitura në mënyrë të rreme, pasi çdo gjë që iu dërgua FBI-së nga publiku ishte përfshirë”.

Presidentja e Kosovës, Vjosa Osmani, tha se Kuvendi i Kosovës nuk ka përmbushur obligimin e tij të paraparë me Kushtetutë për zgjedhjen e presidentit.

Ajo sqaroi edhe ndikimin e amandamenteve kushtetuese për zgjedhjen e presidentit drejtpërdrejt nga populli.

“Këto amandamente nuk do të kishin asnjë efekt për zgjedhjen e presidentit që duhej të zgjidhej deri mbrëmë, pra për pasardhësin e menjëhershëm për mandatin tim. Arsyeja është shumë e thjeshtë, vetë amandamentet parashohin që procedura për zgjedhjen e presidentit drejtpërdrejt nga populli duhet të fillojë 6 muaj para përfundimit të mandatit të presidentit aktual.Kjo do të thotë se, edhe sikur këto amandamente të miratoheshin mbrëmë, ato nuk do të ndryshonin asgjë sa i përket zgjedhjes së pasardhësit tim. Pra, deri dje në mesnatë, ka qenë afati për zgjedhjen e pasardhësit tim, ai do të zgjidhej nga Kuvendi, dhe vetëm pas 5 vjetësh do të krijohej mundësia për zgjedhje të drejtpërdrejta nga populli. Kjo nuk ka të bëjë me mandatin tim aktual”, tha Osmani.

Aleanca për Ardhmërinë e Kosovës do të mbajë sot mbledhje të jashtëzakonshme të Këshillit të Përgjithshëm të partisë, bëjnë të ditur burime brenda AAK-së.

Sipas këtyre burimeve, mbledhja do të zhvillohet sot në ora 16:00 dhe vjen pas zhvillimeve të fundit politike në vend, përkatësisht pas dështimit të zgjedhjes së presidentit dhe dekretit të presidentes Vjosa Osmani për shpërndarjen e Kuvendit.

Në këtë takim pritet të diskutohen hapat e Aleancës në prag të zgjedhjeve të jashtëzakonshme parlamentare.

Për herë të parë në 36 vjet, Irani është në situatë ku duhet të zgjedhë një udhëheqës të ri suprem.

Kjo ka ndodhur vetëm një herë më parë, në vitin 1989, kur vdekja e themeluesit të Republikës Islamike, Ajatollah Ruhollah Khomeini, i ka hapur rrugë Ajatollah Ali Khameneit ta merrte drejtimin.

Khomeini vdiq nga shkaqe natyrore, ndërsa Khamenei u vra në ditën e parë të sulmeve të përbashkëta ushtarake të SHBA-së dhe Izraelit kundër Iranit, më 28 shkurt.

Tani, Asambleja e Ekspertëve e Iranit, me 88 anëtarë, duhet të mblidhet në fshehtësi për të zgjedhur pasardhësin e tij.

Alex Vatanka, drejtor i Programit për Iranin në Institutin e Lindjes së Mesme me seli në Uashington, thotë për Radion Evropa e Lirë se kushdo që do të zgjidhet, do të zgjidhet mbi një kriter të vetëm: përshtatshmëria politike.

Sipas tij, Asambleja e Ekspertëve sot është një “organ që vetëm vulos vendimet”, ndërsa procesi udhëhiqet më shumë nga rrethanat sesa nga përgatitja e mëhershme e kandidatëve.

Ndër vite janë përmendur shumë emra si pasardhës të mundshëm të Khameneit, por, aktualisht, tre kandidatë konsiderohen favoritë kryesorë.

Mojtaba Khamenei: Zgjedhja nga dinastia

Djali i dytë 56-vjeçar i udhëheqësit të ndjerë suprem përshkruhet prej kohësh si “rojtar i portës”.

Megjithëse nuk ka mbajtur kurrë një post formal qeveritar, Khamenei i ri ka kaluar dy dekada në zyrë të babait të tij, duke koordinuar mes establishmentit klerik dhe Korpusit të Gardës Revolucionare Islamike (IRGC).

Besohet se ai mbështetet nga IRGC-ja dhe se përzgjedhja e tij do të ishte vazhdimësi e politikës së të atit.

Mbështetësit, po ashtu, argumentojnë se afërsia e tij e madhe me aparatin e sigurisë, e bën atë kandidatin e vetëm të aftë për të ruajtur rendin, gjatë një konflikti aktiv.

Megjithatë, ngritja e tij në këtë post rrezikon të shkaktojë zemërim të brendshëm, sidomos mes mbështetësve kryesorë të Republikës Islamike.

Kritikët argumentojnë se lëvizja drejt “sundimit të trashëguar” bie ndesh me vetë rrënjët antimonarkiste të Revolucionit Islamik, të vitit 1979.

“Pamja që krijohet kur një djalë pason babanë e tij, ngjan disi me pamjen e një monarkie”, i tha Radios Evropa e Lirë në vitin 2024 Farzan Sabet, bashkëpunëtor i lartë në Shkollën e të Diplomuarve në Gjenevë.

Një anëtar i Asamblesë së Ekspertëve tha në vitin 2024 se Khamenei i vjetër e ka kundërshtuar idenë që djali i tij ta pasonte.

Për më tepër, edhe grada relativisht e ulët klerikale e Khameneit të ri, Hojatoleslam, është çështje debati.

Hetimet e fundit, përfshirë një raport të agjencisë Bloomberg, të publikuar në fund të janarit, nxorën në pah një sërë pasurish të paluajtshme të lidhura me Khamenein e ri, i cili që nga viti 2019 është nën sanksione të SHBA-së.

Raportet sugjerojnë se ai ka arritur të ruajë dhe të zgjerojë një rrjet global asetesh luksoze, përmes ndërmjetësve dhe kompanive fiktive.

Alireza Arafi: Zgjedhja e sigurt

Ajatollah Alireza Arafi, 67 vjeç, konsiderohet si “njeriu tipik i sistemit”.

Aktualisht, shërben në Këshillin e Përkohshëm të Udhëheqjes, me tre anëtarë.

Arafi ka ngjitur çdo shkallë institucionale – nga drejtimi i universitetit global Al-Mustafa deri tek udhëheqja e të gjithë sistemit të seminareve fetare në Iran.

Ai ka hyrë në arenën politike në vitin 2019, kur është emëruar nga Khamenei në pozitën e njërit nga gjashtë klerikët në Këshillin e Fuqishëm të Gardianëve.

Arafi konsiderohet si zgjedhje e sigurt institucionale. Ai i plotëson kredencialet e nevojshme klerikale dhe ka shërbyer si administrator besnik – pa u lidhur publikisht me dhunën ndaj protestave brenda vendit.

Sipas Vatankës, ngritja e Arafit nuk ka qenë rastësi. Ai thotë se gatishmëria e Khameneit për ta emëruar në role të rëndësishme, “tregon se ai ka pasur shumë besim në aftësitë e tij burokratike”.

Ai e përshkruan Arafin si një “ushtar të aftë të sistemit”, i cili ka shumë gjasa ta vendosë mbijetesën e Republikës Islamike përpara karizmës personale.

Krahasuar me figura si kreu i gjyqësorit, Gholam-Hossein Mohseni-Ejei, për të cilin Vatanka thotë se ka “shumë gjak në duar”, Arafi paraqitet si një administrator me reputacion më të pastër, që mund ta ketë mbështetjen e IRGC-së “për hir të vazhdimësisë”.

Megjithëse është i njohur në qarqet fetare, ai është larg të qenët një emër i njohur për shumicën e iranianëve.

Atij i mungon një bazë personale pushteti dhe mund ta ketë të vështirë të sigurojë besnikërinë absolute të Gardës Revolucionare Islamike.

Hassan Khomeini: Karta e fundit

Hassan Khomeini, 53 vjeç, është nipi i themeluesit të Republikës Islamike të Iranit, Ruhollah Khomeini.

Një klerik më i moderuar, me lidhje të afërta me kampin reformist, ai është lënë prej kohësh në hije nga linja e ashpër.

Por, emri i tij është përmendur si kandidat i mundshëm, veçanërisht pasi presidenti amerikan, Donald Trump, ka thënë se do të preferonte një lider “më të moderuar” në Teheran.

Për një sistem klerikal, legjitimiteti i të cilit është duke u dobësuar dhe që po përballet me izolim ndërkombëtar, Hassan Khomeini mund të jetë një kthesë.

Ai lidhet me qarqet reformiste dhe ka mbështetur më shumë liri sociale dhe uljen e tensioneve diplomatike.

Megjithatë, nuk pëlqehet nga linja e ashpër e regjimit.

Në një fjalim në vitin 2022, fishkëllimat dhe ndërhyrjet nga publiku kundër tij u bënë aq të forta, saqë Ali Khamenei i qortoi ata që po e pengonin, kur doli në skenë pas tij.

Fakti që në vitin 2016, Këshilli i Gardianëve e skualifikoi nga kandidimi për zgjedhjet në Asamblenë e Ekspertëve, tregon se IRGC-ja do ta pranonte atë vetëm nëse Republika Islamike do të ishte para kolapsit të plotë.

“Ruani çfarë ka mbetur”

Vatanka thotë se kushdo që do ta marrë pushtetin në këto rrethana, nuk do të ketë shumë mundësi për të zbatuar ndonjë mision madhor.

Marrja e kontrollit të një vendi nën sulm ushtarak, me një popullsi të lodhur dhe me një ekonomi të dobësuar, do ta detyronte edhe një ideolog të përkushtuar që të vepronte me pragmatizëm, sipas tij.

“Tani nuk është koha për t’u thelluar më shumë. Tani është koha për ta përfunduar këtë luftë, për t’u riorganizuar dhe për të ruajtur atë që ka mbetur nga vendi”, përfundon Vatanka./REL

Presidentja e Kosovës, Vjosa Osmani, në një konferencë për media mëngjesin e së premtes foli edhe për afatin kushtetues që lidhet me zgjedhjen e presidentit të ri.

Sipas saj, bëhet fjalë për një çështje të qartë kushtetuese dhe jo për debat politik, pasi afati i paraparë me Kushtetutë për zgjedhjen e presidentit ka skaduar.

“Neni 86 i Kushtetutës përcakton se presidenti i ri duhet të zgjidhet jo më vonë se 30 ditë para përfundimit të afatit të presidentit aktual. Mandati im përfundon më 4 prill 2026. Kjo do të thotë se 5 marsi ishte afati i fundit kushtetues që Kuvendi të zgjedhë presidentin e ri dhe ky afat ka përfunduar mbrëmë në mesnatë. Nuk kemi pra të bëjmë me një debat politik, por me një fakt të qartë kushtetues. Kuvendi i Republikës së Kosovës ka dështuar të përmbushë një nga obligimet themelore kushtetuese”, tha Osmani.

Presidentja Vjosa Osmani, tha se u detyrua të shpërndajë Kuvendin dhe të shpallë zgjedhje të reja, si pasojë e dështimit të Kuvendit për ta kryer detyrën e vet.

E para e shtetit madje tha se “këtu e sollën vendin njerëz të papërgjegjshëm e me qëllime të rrezikshme”.

“Zvarritjet do të krijonin situata më të rrezikshme”, u shpreh Osmani mes tjerash.

Sulmi amerikano-izraelit në Iran ka hyrë në ditën e pestë dhe shumica e botës pyet sa do të zgjasë.

Informacionet që ka siguruar Politico tregojnë se Komanda Qendrore (CENTCOM) planifikon që lufta të zgjasë edhe mbi 100 ditë, madje deri në muajin shtator.

“Komanda Qendrore e Shteteve të Bashkuara të Amerikës (CENTCOM) po kërkon nga Pentagoni që të dërgojë oficerë shtesë të inteligjencës ushtarake në selinë e saj në Tampa, Florida, për të mbështetur operacionet kundër Iranit për të paktën 100 ditë, por me shumë gjasa deri në shtator”, sipas njoftimit që ka siguruar gazeta.

Kjo është kërkesa e parë e njohur e administratës për staf shtesë të inteligjencës për luftën kundër Iranit, një shenjë se Pentagoni po cakton tashmë burime për operacione që mund të zgjasin ndjeshëm më shumë se afati fillestar katër-javor që për këtë konflikt kishte vendosur presidenti amerikan, Donald Trump.

Shtimi i shpejtë i personelit dhe burimeve për të mbështetur aktivitete që zakonisht planifikohen shumë më parë se një veprim ushtarak amerikan tregon se sa pak ishte parashikuar nga ekipi i Trumpit pasojat e gjera të luftës që u nis së bashku me Izraelin të shtunën.

“Ne pamë një operacion krejt ad hoc ku dukej se askush nuk e kuptonte vërtet ose nuk besonte se veprimi ushtarak ishte i pashmangshëm. Duket sikur u zgjuan të shtunën në mëngjes dhe vendosën të nisin luftën”, tha Gerald Feierstein, ish-diplomat i lartë amerikan që ka punuar në Lindjen e Mesme.

Presidenti amerikan, Donald Trump që nga fillimi i agresionit ka ndryshuar disa herë informacionet që ka dhënë, por ka nënkuptuar se lufta mund të zgjasë të paktën katër javë.

Ministri amerikan i Luftës, Pete Hegseth, ka sugjeruar se lufta mund të zgjasë edhe më shumë se katër javë, duke përmendur edhe gjashtë javë.

Forca e Sigurisë së Kosovës pritet të zbarkojë në Gazë brenda pak muajve, si pjesë e forcës stabilizuese që do të vendoset atje. Ky është misioni i parë i saj jashtë vendit në kuadër të një operacioni të autorizuar nga OKB-ja, në bashkëpunim me Shtetet e Bashkuara të Amerikës.

Ministri i Mbrojtjes, Ejup Maqedonci, në një intervistë me gazetarin Blerim Haxhiaj, ka dhënë më shumë hollësi rreth angazhimit të Kosovës në kuadër të Bordit të Paqes të themeluar nga presidenti amerikan Donald Trump.

“Kjo forcë stabilizuese për Gaza po ndërtohet dhe zhvillohet duke iu referuar një rezolute të OKB-së. Pra kjo rezolutë e ka mandatar SHBA-në që të krijojë një forcë stabilizuese dhe ne jemi ndër vendet themeluese të kësaj force, e cila tashmë është duke marrë formë”, ka thënë Maqedonci në RTK.

Ai ka bërë të ditur se në fillim të kësaj jave e ka dërguar në qeverinë e Kosovës edhe rekomandimin që të bëhet vendimi politik për zbarkimin e FSK-së.

“Vendimi politik pastaj duhet të kalojë në fazat e tjera të autorizimit të FSK-së nga Kuvendi i Kosovës, për t’u aprovuar përfundimisht nga presidenti apo presidentja e Kosovës autorizimi për zbarkim të FSK-së jashtë vendit. Ne jemi tashmë në fazën përfundimtare të koordinimeve, të identifikimit të kapaciteteve me të cilat do të marrim pjesë në Gaza”, ka shtuar ministri.

Ai ka thënë se kjo është një arritje e madhe për Kosovën, pasi për herë të parë vendi ynë po merr pjesë në një mision që është autorizuar nga OKB, edhe pse nuk është vend anëtar i saj.

“Mendoj se kjo është arritja kryesore strategjike për vendin tonë në aspektin e pjesëmarrjes në këtë forcë, për të cilën nuk është folur shumë fatkeqësisht. Përveç kësaj normalisht kontributi për paqen, sigurinë, aspekti humanitar, është gjithmonë element për të cilin ne jemi të fokusuar dhe për të cilin po angazhohemi”, ka nënvizuar Maqedonci.

Pas zhvillimeve me çështjen e presidentit, ambasadorët e QUNIT-it kanë shkuar në Qeveri, raporton Ekonomia Online.

Aty janë parë veturat, ndërkohë që nuk ka një njoftim.

E në zyrë të presidencës, pas pak pritet që në konferencë për media të dalë Presidentja Vjosa Osmani.