Author: K.B.

Kryetari i Rahovecit, Smajl Latifi, ka shprehur ngushëllime familjes Kastrati për vdekjen e familjarit të tyre Alushit, i cili u gjet sot pa shenja jete nga ekipet e kërkim-shpëtimit në malet e Zatriqit.

Kreu i kësaj komune u shpreh se Alush Kastrati, ishte babai i dëshmorit Mazllum Kastrati, një prind që i dha atdheut më të shtrenjtën e tij dhe që jetoi me krenari dhe sakrificë për lirinë e Kosovës.

“Shpreh mirënjohjen time të thellë për të gjitha ekipet që u angazhuan pa ndërprerë në kërkim: Policinë e Kosovës, ekipet profesionale të Forcës së Sigurisë së Kosovës, bashkëpunëtorët, së bashku me drejtorinë për Mbrojtje dhe Shpëtim dhe me ekipet komunale për emergjenca të shëndetësisë dhe të zjarrfikësve. Po ashtu, falënderojmë organet e tjera kompetente profesionale, ekipet vullnetare të kërkim-shpëtimit (shoqata e Kosovës për kërkim-shpëtim) dhe të gjithë qytetarët që ndihmuan dhe u angazhuan gjatë këtyre ditëve të vështira të operacionit të udhëhequr nga nënkolonel Arsim Berisha”, ka shkruar Latifi në Facebook.

“Familjes Kastrati i shpreh ngushëllimet më të sinqerta! U prehsh në qetësi, baca Alush!”, u shpreh numri një i Rahovecit.

80 vjeçari Alush Kastrati, ishte shpallur i zhdukur më 7 mars, teksa sot u gjet i vdekur pas disa ditë kërkimesh të pandërprera.

Kryeministri i Kosovës Albin Kurti, i ka kujtuar demonstratat e studentëve të Universitetit të Prishtinës, të cilët 45 vjet më parë hapën periudhë të re për shqiptarët nën Jugosllavi.

“Ajo erdhi si një organizim i gjerë i nisur nga studentët, që një javë më parë, më 4 mars, kishin kundërshtuar kushtet e këqija në mensën e universitetit, por që protesta e tyre ishte ngritur në nivel artikulimesh politike”, shkroi Kurti në profilin e tij në Facebook.

Kurti deklaroi se mijëra njerëz nga tërë Kosova u përgjigjen në thirrjen studentëve të Universitetit të Prishtinës për të protestuar.

“Kërkesat e tyre përmbledheshin pas parullës ‘Kosova Republikë’, e shkruar shkurtimisht edhe si “KR”, që ishte kërkesa e shqiptarëve brenda Jugosllavisë për Kosovën si republika e shtatë në kuadër të Federatës. Demostrata e 11 marsit, u pasua nga demostrata gjithëpopullore më 26 mars, si dhe me 1 dhe 2 prill 1981, që asaj stine ia dhanë epitetin e Pranverës ‘81, si stinë e kryengritjes politike dhe rizgjimit kombëtar të shqiptarëve nën Jugosllavi”.

I pari i ekzekutivit, theksoi se demostratat e shqiptarëve në vitin 1981, janë ndër ngjarjet kyçe në historinë politike të Kosovës.

“Ato ishin organizim i indinjatës qytetare dhe i revoltës së shqiptarëve si një populli që nën Jugosllavi ishte i shtypur dhe i nënpërfaqësuar politikisht, i diskriminuar etnikisht dhe i shfrytëzuar ekonomikisht”, shkroi tutje ai.

Duke kujtuar atë ditë, Albin Kurti thotë se demonstratat e vitit 1981 u shtypën dhunshëm nga policia jugosllave, pasuar nga mijëra arrestime, ndalime arbitrare, gjyqe politike dhe verdikte që rezultuan me mijëra të burgosur e vite të shumta dënimesh me burg.

“Por demostratat e pranverës së vitit 1981, e futën organizimin politik të shqiptarëve në Jugosllavi në një kahje të re, që kulmoi me rezistencën e armatosur të Ushtrisë Çlirimtare të Kosovës, ku u bashkëorganizuan shumë nga ata që kishin qenë të organizuar edhe më 1981. Sot në 45 vjetorin e demostratave të vitit 1981, duke i kujtuar ato ngjarje dhe zhvillime historike, i kujtojmë me mirënjohje të gjithë individët dhe grupet që i dhanë jetë atij zhvillimi politik me ngjarje historike dhe të gjithë brezat që u përbashkuan te demostratat e vitit 1981”.

Gjykata Speciale ka publikuar në njoftim në faqen zyrtare të saj në “X” duke shkruar se gjyqtarët e Hagës sigurojnë se të drejtat e të akuzuarve respektohen në përputhje me Kushtetutën e Republikës së Kosovës dhe Konventën Evropiane për të Drejtat e Njeriut.

Specialja shkruan se nëse një i akuzuar s’është i kënaqur me ndonjë vendim, ai mund t’i drejtohet Gjykatës Kushtetuese të Dhomave të Specializuara.

“Nëse një i akuzuar beson se një vendim nuk është në përputhje me ligjin ose shkel të drejtat e tij, ai mund ta apelojë vendimin te një panel i veçantë gjyqtarësh dhe, si mjet i fundit, te Dhoma e Specializuar e Gjykatës Kushtetuese”, thuhet në njoftim.

“Në vendimmarrjen e tyre, gjyqtarët ndjekin Konventën Evropiane për të Drejtat e Njeriut dhe vendimet e marra më parë nga Gjykata Evropiane për të Drejtat e Njeriut.Vetëm Dhoma e Specializuar e Gjykatës Kushtetuese ka zbatuar të paktën 160 raste të vendosura më parë nga Gjykata Evropiane për të Drejtat e Njeriut për të siguruar që vendimet e saj të jenë në përputhje me standardet ndërkombëtare të të drejtave të njeriut”, thekson Specialja.

The Judges of the Specialist Chambers ensure that the rights of the accused are upheld in line with the Kosovo Constitution and the European Convention on Human Rights. pic.twitter.com/P550qGsUW5

— Kosovo Specialist Chambers (@SpecialChambers) March 11, 2026

Asociacioni i Gazetarëve të Kosovës ka mirëpritur vendimin e marrë këtë të mërkurë për dënimin me një vjet burgim të A.I pas kërcënimit ndaj ekipeve të gazetarëve e monitoruesve të Betimi për Drejtësi dhe Nacionale.

Sipas një njoftimi të Gjykatës Themelore të Gjilanit, A.I “i është shqiptuar dënim me një (1) vit burgim, i cili dënim nuk do të ekzekutohet nëse i pandehuri brenda 2 (dy) viteve nuk kryen vepër tjetër penale.”

“A.I me një gjest si “ekzekutim” iu ishte drejtuar në një seancë pronash në Viti gazetares së Nacionales, Eriola Cacaj, kameramanit Drilon Namani si dhe monitoruesit të Betimi për Drejtësi, Flamur Kabashi. Rasti kishte ndodhur më 30 janar”, njofton AGK.

AGK-ja ka përshëndetur “efikasitetin me të cilin gjykata e ka trajtuar këtë rast dhe prioritetin që i është dhënë, me besimin se kjo praktikë do të vazhdojë edhe në të ardhmen”.

“AGK-ja ka mirëpritur Strategjinë e KGJK-së të miratuar në janar të këtij viti, e që prioritizon rastet gjyqësore që ndërlidhen me shpifjen dhe sigurinë e gazetarëve dhe të anëtarëve të shoqërisë civile”.

Policia e Kosovës, ka njoftuar se i zhdukuri nga Rahoveci është gjetur i vdekur.

Në njoftimin e PK’së, bëhet e ditur se trupi i Alush Kastratit u gjet në një zonë malore, disa kilometra larg fshatit Zatriq.

Njoftimi:

Gjendet një trup i pajetë në një zonë malore, dyshohet se është personi i zhdukur në Rahovec

Rahovec, 11 mars 2026

Policia e Kosovës, përkatësisht Drejtoria Rajonale e Policisë në Gjakovë, njofton opinionin publik se në kuadër të operacionit të kërkimit lidhur me zhdukjen e personit Alush Kastrati, sot ekipet e angazhuara në terren kanë hasur në një trup të pajetë në një zonë malore, disa kilometra larg fshatit Zatriq.

Trupi i gjetur, bazuar në përshkrimet dhe të dhënat e njohura, dyshohet të jetë i personit të raportuar si i zhdukur në këtë rast. Në vendin e ngjarjes kanë dalë njësitet përkatëse policore dhe në koordinim me prokurorin e shtetit janë duke ndërmarrë veprimet e nevojshme hetimore dhe procedurale.

Deputetja e LDK-së, Hykmete Bajrami, ka uruar Forumin Rinor të LDK-së në 36 vjetorin e themelimit.

Bajrami ka pasur një thirrje për të rinjtë që s’janë të kënaqur me situatën aktuale politike që t’i bashkohen LDK-së meqë aty janë dyert e hapura për ta.

“Urimet më të sinqerta me rastin e 36-vjetorit të gjithë themeluesve dhe atyre që sot janë pjesë e Forumit Rinor të Lidhjes Demokratike të Kosovës, ndërsa të rinjve që ende s’janë pjesë e kësaj organizate u them se nëse s’jeni të kënaqur me situatën politike aktuale dhe dëshironi të kontribuoni që ajo të ndryshojë, shtëpia e demokracisë i ka dyert e hapura për ju!”, ka shkruar Bajrami.

Rreth 3,000 anije në muaj kalojnë normalisht nëpër Ngushticën e Hormuzit në Lindjen e Mesme, duke e bërë atë një nga rrugët më të rëndësishme detare në botë për tregtinë e energjisë.

Kjo ngushticë është kanali më i ngarkuar i transportit të naftës në botë, pasi rreth 20% e naftës globale kalon përmes saj çdo ditë. Ajo është gjithashtu mjaftueshëm e thellë për të lejuar kalimin e tankerëve më të mëdhenj të naftës bruto.

Rruga detare përdoret nga disa prej prodhuesve më të mëdhenj të energjisë në rajon, përfshirë Irani, Iraku, Kuvajti, Katari, Arabia Saudite dhe Emiratet e Bashkuara Arabe.

Megjithatë, lufta në rajon ka ulur ndjeshëm trafikun detar në këtë zonë. Sipas United Kingdom Maritime Trade Operations, janë raportuar 13 anije të sulmuara që nga fillimi i konfliktit.

Situata ka ndikuar edhe në tregjet globale të energjisë. Çmimi i naftës u rrit mbi 100 dollarë për fuçi, përpara se deklaratat e Donald Trump se lufta ishte “pothuajse e përfunduar” të çonin në një rënie të çmimit në rreth 90 dollarë për fuçi, megjithëse kjo mbetet ende mbi nivelet para luftës.

Ngadalësimi i trafikut përmes Ngushtica e Hormuzit ka ngritur shqetësime globale, pasi çdo ndërprerje në këtë rrugë strategjike mund të rrisë çmimet e energjisë, transportit dhe prodhimit në mbarë botën.

Ambasadorët e Bashkimit Evropian kanë miratuar sanksione të reja kundër 19 zyrtarëve dhe subjekteve iranianë përgjegjës për shkelje të rënda të të drejtave të njeriut, tha sot shefja e politikës së jashtme të BE-së, Kaia Kalas.

Sanksionet, të cilat kishin filluar të përgatiteshin para fillimit të luftës, do të kenë nevojë për miratimin përfundimtar nga Këshilli i BE-së.

Ndërkohë iranianët në Teheran morën pjesë në funeralet e zyrtarëve ushtarakë iranianë të vrarë në sulme, mes konfliktit SHBA-Izrael me Iranin.

Një haker i huaj tre vite më parë hyri në sistemin e FBI-së dhe pati qasje në dokumente të besueshme lidhur me hetimin ndaj pedofilit amerikan, Jeffrey Epstein. Hyrja ndodhi në zyrën e FBI-së në New York, sipas dokumenteve të sapobotuara të Departamentit të Drejtësisë dhe një burimi të njohur me rastin, shkruan Reuters.

Kjo është hera e parë që publikohen detaje për atë që ka pasur qasje në server, duke përfshirë pretendimet se bëhet fjalë për një haker të huaj. FBI e përshkroi incidentin në një deklaratë si “i izoluar”. “FBI ka kufizuar qasjen për aktorin keqdashës dhe ka riparuar rrjetin. Hetimi vazhdon, kështu që në këtë moment nuk kemi komente të mëtejshme”, thuhet në deklaratë.

Edhe pse burimi thotë se sulmi ishte veprim i një krimineli kibernetik dhe jo i një qeverie të huaj, incidenti nxjerr në pah vlerën potenciale të dosjeve të Epstein për inteligjencën. Publikimi i dokumenteve të Departamentit amerikan të Drejtësisë zbuloi lidhjet e të ndjerit financues me individë të shquar nga politika, financat, shkenca dhe biznesi, gjë që ka nxitur hetime në shumë vende.

“Kush nuk do të përpiqej të merrte dosjet e Epsteinit nëse do të ishte në vend të një rusi ose ndonjë tjetri që kërkon materiale komprometuese?”, tha Jon Lindsay, që studion rolin e teknologjive të reja në sigurinë globale në Institutin Teknologjik të Georgias. “Do të isha i habitur nëse agjencitë e huaja të inteligjencës nuk i konsideronin seriozisht dosjet e Epsteinit si objektiv”, shtoi ai.

Sulmi ndodhi pasi serveri në Laboratorin Forenzik për shfrytëzimin e fëmijëve në zyrën e FBI-së në New York mbeti i pambrojtur. Sipas burimeve dhe dokumenteve, serveri mbeti i ekspozuar pa qëllim nga agjenti special Aaron Spivack ndërsa përpiqej të kuptonte procedurat komplekse të agjencisë për menaxhimin e provave digjitale.

Kalendari i përgatitur nga Spivack, pjesë e dokumenteve të Epsteinit që u publikuan, tregon se sulmi ndodhi më 12 shkurt 2023. Hyrja u zbulua një ditë më vonë, kur Spivack gjeti në kompjuterin e tij një skedar tekst që e paralajmëronte se rrjeti i tij ishte komprometuar.

Hetimet e mëtejshme zbuluan gjurmë të aktiviteteve të pazakonta në server, që përfshinin “kërkimin e disa skedarëve të lidhur me hetimin mbi Epsteinin”. Dokumentet nuk tregojnë saktësisht cilët skedarë u përdorën, nëse u morën të dhëna, apo kush ishte hakeri.

Burimi që njeh rastin thotë se sulmin e kreu një haker i huaj që fillimisht nuk kuptoi se ishte futur në serverin e një agjencie policore. Hakeri, sipas burimit, shprehu neveri për praninë e imazheve të abuzimit të fëmijëve dhe la një mesazh duke kërcënuar se do t’i raportonte pronarin e serverit në FBI.

Zyrtarët e FBI-së qetësuan situatën duke bindur hakerin se ata ishin vetë FBI. Kjo përfshinte, ndër të tjera, një video-thirrje gjatë së cilës i treguan hakerit shenjat e tyre zyrtare përpara kamerës. Reuters nuk ka mundur të identifikojë hakerin, vendin nga i cili veproi, çfarë bëri me të dhënat e aksesuar, apo nëse ka nisur ndonjë procedurë për identifikimin dhe ndëshkimin e tij.

Spivack tha për hetuesit se ndihej si “kri i shfajësuar” dhe fajin për gabimin e atribuoi politikave të kundërta të brendshme të FBI-së dhe udhëzimeve të gabuara për teknologjinë e informacionit. Shumë dokumente të Departamentit të Drejtësisë mbi rastin Epstein mbeten ende të redaktuara ose plotësisht sekrete. Administrata e Trumpit thotë se kjo bëhet për të mbrojtur identitetet e viktimave dhe hetimet që vazhdojnë.