Author: K.B.

Kryetari i Komunës së Mitrovicës, Faton Peci, ka bërë të ditur se gjatë këtij viti qyteti pritet të përfitojë një stadium të kategorisë së katërt dhe një palestër të re për sportin e xhudos.

Përmes një postimi në rrjetet sociale, Peci njoftoi se së bashku me ministrin e Sportit dhe Rinisë, Blerim Gashani, kanë vizituar disa nga objektet sportive në qytet për të parë nga afër zhvillimin e punimeve dhe mundësitë për investime të reja.

“Mitrovica gjatë këtij viti me stadium të kategorisë së 4-të dhe me palestër të xhudos”, ka shkruar Peci.

Sipas tij, gjatë vizitës është parë nga afër ecuria e punimeve në Stadiumi Olimpik Adem Jashari si dhe punimet për rregullimin e dojës së xhudos.

“Së bashku me ministrin e Sportit dhe Rinisë, z. Blerim Gashani, vizituam objektet sportive në Mitrovicë. Nga afër pamë zhvillimin e punimeve në Stadiumin Olimpik ‘Adem Jashari’ dhe punimet në rregullimin e dojës së xhudos”, ka deklaruar ai.

Peci ka bërë të ditur se gjatë kësaj vizite janë vlerësuar edhe mundësitë për investime në Qendra Sportive OMNI Sport dhe në Stadiumi Riza Lushta.

“Këto projekte do të ndikojnë drejtpërdrejt në zhvillimin e sportit në Mitrovicë”, ka theksuar Peci.

Shefi i njohur i kuzhinës me origjinë shqiptare René Rexhepi ka njoftuar dorëheqjen e tij nga drejtimi i restorantit të famshëm me 3 yje Michelin, Noma, pasi u akuzua për abuzim të dhunshëm me stafin për më shumë se një dekadë.

Themeluesi i restorantit danez njoftoi dorëheqjen e tij të mërkurën, pasi një artikull i New York Times zbuloi se si ai dyshohet se ka ngacmuar dhe sulmuar fizikisht të paktën 30 punonjës midis viteve 2009 dhe 2017.

“Kam punuar për të qenë një udhëheqës më i mirë dhe Noma ka ndërmarrë hapa të mëdhenj për të transformuar kulturën gjatë shumë viteve. E kuptoj që këto ndryshime nuk e riparojnë të kaluarën. Një kërkim falje nuk mjafton; unë marr përgjegjësinë për veprimet e mia. Pas më shumë se dy dekadash ndërtimi dhe drejtimi të këtij restoranti, kam vendosur të largohem dhe t’u lejoj udhëheqësve tanë të jashtëzakonshëm ta udhëheqin restorantin në kapitullin e tij të ardhshëm”, tha shefi i kuzhinës në një deklaratë, duke shtuar se ai gjithashtu ka dhënë dorëheqjen nga bordi i organizatës jofitimprurëse që themeloi në vitin 2011.

Pas akuzave për abuzim, jep dorëheqjen shefi dhe themeluesi i
Duke e bërë publik vendimin edhe përmes një videoje të postuar në rrjetet sociale, ai i kërkon falje stafit të restorantit për situatën e krijuar.

“Më vjen keq që të gjithë janë në këtë situatë, me të vërtetë më vjen keq”, u shpreh ai.

Rexhepi theksoi se polemikat e fundit nuk përfaqësojnë ekipin e restorantit dhe u shpreh krenar për atë që kanë ndërtuar së bashku. Sipas tij, vëmendja e madhe e përqendruar tek ai e bëri të mendojë se mënyra më e mirë për të mbrojtur ekipin ishte të largohej nga drejtimi.

“Për t’u siguruar që ju ndiheni 100 për qind mirë, do të largohem”, i tha ai stafit, duke shtuar se nuk po shmang asnjë përgjegjësi për mënyrën se si ka drejtuar në të kaluarën.

Pas akuzave për abuzim, jep dorëheqjen shefi dhe themeluesi i
Shefi i kuzhinës i nxiti punonjësit të vazhdojnë misionin e restorantit dhe t’i qëndrojnë pranë njëri-tjetrit si ekip. Ai i quajti ata familja e tij dhe u shpreh i bindur se do ta kalojnë këtë periudhë të vështirë.

Njoftimi erdhi në një moment kur restoranti Noma po përgatitej të hapte një rezidencë luksoze në lagjen Silver Lake në Los Angeles, për të cilën René Rexhepi tha se do të vazhdojë sipas planit, pavarësisht protestave për hapjen e saj.

“Misioni i Noma-s për të ardhmen është të vazhdojë të eksplorojë ide, të zbulojë shije të reja dhe të imagjinojë se çfarë mund të bëhet ushqimi pas dekadash. Noma ka qenë gjithmonë më e madhe se çdo person i vetëm. Dhe ky hap tjetër e nderon këtë besim”, përfundoi ai.

‘Grushta e përplasje’ – kuzhinieri shqiptar me famë botërore reagon pas akuzave të rënda nga ish-punonjësit

Edhe këtë të enjte do të vazhdojë seanca gjyqësore ndaj ish-kryeshefit ekzekutiv të Korporatës Energjetike të Kosovës, Nagip Krasniqit.

Nga ora 09:30, Krasniqi pritet të dalë para gjyqit, përderisa ndaj tij rëndon vepra penale “Keqpërdorim i pozitës apo autoritetit zyrtar”.

Gjatë ditës së mërkurë, në Gjykatën Themelore të Prishtinës, një dëshmitar dëshmoi në seancën gjyqësore të Krasniqit.

Ndryshe, sipas aktakuzës së Prokurorisë Speciale, Krasniqi, së bashku me Ymer Dragushën dhe Isuf Zejnën, akuzohet për dëmtim të buxhetit të shtetit me rreth 37 milionë euro.

Gjykata Kushtetuese në Maqedoni të Veriut ka vendosur të refuzojë të tri iniciativat me të cilat u kontestuan dispozitat e Ligjit për kundërvajtje, gjegjësisht aplikimi i sistemit “Qyteti i Sigurt”. Dispozitat ligjore u kontestuan në disa aspekte, siç është përdorimi zyrtar i gjuhëve në procedurë kundërvajtëse, parimi i barazisë dhe zbatimi territorial. Vendimit në fjalë i parapriu një debat i gjerë me mendime të ndara, posaçërisht nga gjykatësit shqiptarë sa i përket aplikimit të gjuhës shqipe në këtë rast.

Iniciativat në Gjykatën Kushtetuese u dorëzuan nga Zijadin Sela, Ilire Dauti, Elmi Aziri, Ylli Paçuku dhe Arben Taravari. Aplikimi i sistemit të kamerave “Qyteti i Sigurt” ka filluar të aplikohet nga muaji shkurt në qytetin e Shkupit, Tetovës dhe Kumanovës.

“Me ligjin që e miraton shtëpia ligjvënëse, për çdo të drejtë që vërtetohet apo garantohet me Kushtetutë, ligjvënësi nuk mundet që atë të drejtë ta ngushtojë, ta kufizojë e aq më pak ta shfuqizojë atë. Nuk e ka një të drejtë të tillë. Në rastin konkret, çështja e përdorimit të gjuhës shqipe si gjuhë zyrtare, edhe në procedurat për këto kundërvajtje. E drejta nuk po zbatohet dhe kjo d.m.th. se gjuha shqipe nuk po përdoret”, tha gjykatësi kushtetues, Osman Kadriu.

Kryetari i Kushtetueses në Maqedoninë e Veriut, Darko Kostadinovski, tha se nuk pajtohet që “bëhet fjalë për shkurtimin e të drejtave për përdorimin e gjuhëve”.

Ai tha se SMS-at për gjoba të dërgohen në maqedonisht dhe mund të dërgohen edhe në gjuhën angleze, por jo në gjuhën shqipe.

Ndaj këtyre deklaratave pati reagime të shumta.

Bashkimi Demokratik për Integrim ka kërkuar shkarkimin e menjëhershëm të Kostadinovskit.

“Bashkimi Demokratik për Integrim reagon ashpër ndaj deklaratave skandaloze dhe të papranueshme të kryetarit të Gjykata Kushtetuese e Republikës së Maqedonisë së Veriut, Darko Kostadinovski. Me qëndrimet e tij të djeshme dhe me një seri vendimesh gjatë dy viteve të fundit, ai ka dëshmuar se ky institucion është shndërruar në një mjet politik për të minuar çdo arritje që buron nga Marrëveshja e Ohrit. Deklaratat e tij për çështjen e projektit “Safe City”, sipas të cilave porositë SMS duhet të dërgohen vetëm në maqedonisht, ndërkohë që mund të dërgohen edhe në anglisht, por jo në shqip, përbëjnë një akt të hapur diskriminimi dhe një shkelje të rëndë të frymës dhe të vetë Kushtetutës së shtetit”, thuhet në reagimin e BDI-së.

Sipas BDI-së me këtë veprim, kryetari i Gjykatës Kushtetuese jo vetëm që tejkalon kompetencat e tij, por ndërhyn brutalisht në rendin juridik dhe në marrëdhëniet ndëretnike në vend.

“Edhe një herë u dëshmua se gjyqtarët shqiptarë dhe ai turk në këtë gjykatë u mbivotuan, duke rikthyer praktika që i kujtojnë opinionit publik kohët më të errëta të viteve të nëntëdhjeta. BDI kërkon dorëheqjen e menjëhershme të Darko Kostadinovskit dhe të çdo gjyqtari që ndan të njëjtat qëndrime diskriminuese për këto dy vite me majorizim. Përndryshe, prej sot e tutje ai do të mbajë përgjegjësi të plotë për çdo pasojë që mund të prodhohet në planin e marrëdhënieve ndëretnike. Ne do të veprojmë dhe do të kërkojmë përgjegjësi për këto qëndrime, të cilat nuk janë të rastësishme dhe as të sotme, por janë ndërtuar sistematikisht gjatë dy viteve të fundit”, thuhet në reagimin e BDI-së.

Ministri i Ekonomisë, Besar Durmishi ka reaguar ndaj deklaratës së Kryetarit të Gjykatës Kushtetuese Kostadinovski lidhur me përdorimin vetëm të maqedonishtes në sistemin “Safe City”. Në intervistën e lajmeve në Alsat, Durmishi tha Kryetari i Gjykatës Kushtetuese duhet ta mbrojë Kushtetutën dhe jo të merrer me politikë ditore.

“Përveç gjuhës maqedonase, sipas kushtetutës gjuhë zyrtare është edhe gjuha të cilën e flasin të paktën 20% e qytetarëve, pra gjuha shqipe. Prandaj as kryetari i gjykatës kushtetuese dhe askush tjetër nuk mund ta mohojë këtë të drejtë, as ta interpretojë kushtetutën ashtu siç dëshiron ai. Ne do të bëjmë betejën tonë brenda Qeverisë, brenda Ministrisë së Brendshme”, tha Durmishi në intervistë për Alsat.

Ekonomisti Adem Qorrolli ka komentuar zhvillimet politike në vend dhe raportet mes partive kryesore, duke u ndalur veçanërisht te roli i presidentes Vjosa Osmani.

Duke folur në Debat Plus, Qorrolli tha se Osmani, në aspektin politik, vazhdon të ketë ndikim të madh te elektorati i Lidhjes Demokratike të Kosovës.

Sipas tij, nëse presidentja do të rikthehej në këtë parti, kjo do të kishte ndikim të drejtpërdrejtë në rezultatet elektorale të Lëvizjes Vetëvendosje.

“Vjosa Osmani njëherë përnjëherë është liderë e LDK-së, po të kthehet në LDK VV-ja le ta harron tanimë edhe 40-shin se më 50 i ka të fshira”, ka thënë Osmani.

Këshilli i Sigurimit i Kombeve të Bashkuara ka miratuar një rezolutë që dënon sulmet e Iranit ndaj vendeve të Gjirit dhe Jordanisë dhe kërkon ndërprerjen e tyre të menjëhershme.

Asnjë vend nuk votoi kundër.

Pas votimit, Ambasadori i Iranit në OKB, Amir-Saeid Iravani, iu drejtua Këshillit dhe shprehu “keqardhje të thellë” për miratimin e rezolutës. “Kjo është një ditë keqardhjeje të thellë, si për Këshillin e Sigurimit ashtu edhe për bashkësinë ndërkombëtare. Miratimi i sotëm është një goditje serioze për besueshmërinë e Këshillit dhe lë një njollë të përhershme”, tha Iravani.

“ Akti i sotëm përfaqëson një abuzim të hapur të mandatit të Këshillit të Sigurimit”, tha ai, duke kritikuar ashpër Shtetet e Bashkuara për zhvillimin e një “lufte barbare kundër popullit iranian” dhe nxitjen e konfliktit, përfshirë vrasjen e udhëheqësit suprem të Iranit, Ali Khamenei.

“Kjo rezolutë është një padrejtësi e hapur ndaj vendit tim, i cili është viktima kryesore e një akti të qartë agresioni. Ajo shtrembëron realitetin në terren dhe injoron qëllimisht shkaqet rrënjësore të krizës aktuale”, tha Iravani, duke akuzuar SHBA-në dhe Izraelin se qëndrojnë pas rezolutës.

Qëndrimet e Rusisë dhe Kinës

Duke iu drejtuar Këshillit, ambasadori rus në OKB, Vassily Nebenzia, tha se vendi i tij abstenoi nga votimi për projektrezolutën “sepse ishte jashtëzakonisht e pabalancuar” dhe nuk do t’i shërbente qëllimit të “arritjes së paqes dhe sigurisë ndërkombëtare”.

“Na vjen keq për situatën në të cilën janë gjendur vendet e Lindjes së Mesme. Për më tepër, i konsiderojmë sulmet ndaj infrastrukturës civile të shteteve arabe në Gjirin Persik të papranueshme”, tha Nebenzia.

Ambasadori i Kinës në OKB, Zhang Jun, i tha Këshillit se konflikti “nuk ka as legjitimitet dhe as bazë ligjore” dhe se SHBA-të dhe Izraeli duhet të ndalojnë sulmet e tyre për të parandaluar përkeqësimin e mëtejshëm të situatës në rajon.

Këshilli i Sigurimit i OKB-së votoi gjithashtu për një projektrezolutë të propozuar nga Moska të mërkurën, duke u bërë thirrje të gjitha palëve të ndërpresin veprimet ushtarake në Lindjen e Mesme, por propozimi nuk u miratua.

Çmimet e naftës janë rritur sërish të enjten, pavarësisht se vendet kryesore ranë dakord të lirojnë një sasi rekord nafte nga rezervat e tyre të emergjencës, ndërsa përpiqen të frenojnë ndikimin e luftës së Iranit.

Nafta bruto Brent u rrit me pothuajse 9% duke arritur në 100 dollarë (74.79 dollarë) për fuçi në tregtimin e Azisë, edhe pasi të 32 anëtarët e Agjencisë Ndërkombëtare të Energjisë (IEA) thanë se do të lirojnë 400 milionë fuçi në përgjigje të shqetësimeve për furnizimin, raporton BBC.

Të mërkurën, Irani paralajmëroi se nafta mund të arrijë në 200 dollarë për fuçi, ndërsa sulmet e tij ndaj anijeve intensifikohen në Ngushticën e Hormuzit, një rrugë ujore kyçe për dërgesat e energjisë.

Një zëdhënës i Korpusit të Gardës Revolucionare Islamike (IRGC) tha se çdo anije e lidhur me ShBA-në, Izraelin ose aleatët e tyre do të jetë në shënjestër.

Deputeti i AAK-së, Besnik Tahiri, në ”Click” të RTV21 ka deklaruar se kryeministri Albin Kurti po shmang zgjedhjet për shkak të situatës aktuale politike në Kosovë.

“Kurti po i frkësohet zgjedhjeve për shkak se po e sheh që fuqia e presidentes Vjosa Osmani ka qenë bukur e madhe, po e sheh se opozita nuk është dorëzuar, po sheh se opozita mundet me u ribashku dhe e din që përgjegjësia kryesore për bllokadë është e tij,” tha Tahiri.

Ai shtoi se kjo situatë tregon tensionin në mes të ekzekutivit dhe institucioneve të tjera, si dhe nevojën për dialog dhe bashkëpunim për të shmangur krizën politike dhe për të siguruar funksionim normal të shtetit.