Author: K.B.

Policia e njeh dhe është në kërkim të të dyshuarit për vrasjen në Gjakovë, tha zëdhënësi i Policisë për atë rajon, Sheremet Elezaj.

Ai tha në një konferencë për media se rreth orës 05:30 pranuan një informatë se “në rrugën ‘Vëllezërit Frashëri’ në Gjakovë, dy persona meshkuj të moshës madhore janë qëlluar me armë zjarri”.

Elezaj tha se “si pasojë e plagëve të marra, njëri prej këtyre personave ka ndërruar jetë në vendin e ngjarjes dhe ekipi mjekësor ka konstatuar vdekjen e tij atje”.

Ndërsa tregoi se njësitet relevante nga Policia dhe Prokuroria po i kryejnë hetimet e para, Elezaj tha se në vendin e ngjarjes janë gjetur gëzhoja dhe një armë e ftohtë.

“Atë që mund ta ndajmë tash është se në vendin e ngjarjes janë gjetur disa gëzhoja të armës së zjarrit, po ashtu është gjetur edhe një armë e ftohtë. Kjo është e gjitha që mund të ndajme me publikun aktualisht”, tha ai.

I pyetur nëse i dyshuari është i njohur për Policinë, zëdhënësi tha: “Dorasi, për Policinë, për Drejtorinë Rajonale të Policisë në Gjakovë është i njohur. Do me thënë, ne e njohim”.

Uran Luzha, veteran i UÇK-së sonte në emisionin “Fol me Arin” ka folur në lidhje me ndaljen e pensioneve për veteranët që punojnë.

Ai është shprehur se nuk ka mbetur gjë tjetër vetëm t’i drejtohen organeve të drejtësisë, me gjë të cilën po merren.

Luzha u shpreh se bashkë me kolegët e tij, po merren me grumbullimin e dokumentacioneve.

“Neve nuk na ka mbetur tjetër vetëm t’u drejtohemi organeve të drejtësisë, që jemi duke i grumbulluar edhe me kolegët e mi. Po e grumbullojmë dokumentacionin”, tha ai.

Ushtria izraelite ka deklaruar se trupat e saj kanë filluar operacione tokësore në Libanin jugor, ndërsa luftimet kundër Hezbollahut intensifikohen rreth qytetit strategjik jugor të Khiam.

Të paktën tre sulme ajrore goditën qytetin e Khiam, raportoi të hënën Al Jazeera Arabic.

Khiam, një fortesë e Hezbollahut, ka një vendndodhje strategjike dhe shihet si një portë hyrëse për në Libanin jugor.

Lufta e fundit filloi pasi Hezbollahu qëlloi me raketa në përgjigje të vrasjes së udhëheqësit suprem të Iranit, Ajatollah Ali Khamenei.

Hezbollahu nuk e kishte sulmuar Izraelin që nga armëpushimi i vitit 2024, pavarësisht shkeljeve të përsëritura të marrëveshjes së ndërmjetësuar nga Shtetet e Bashkuara nga Izraeli.

Ndryshe, sot dy sulme ajrore izraelite shënjestruan qytetin Yater. Nuk pati raportime të menjëhershme për viktima apo dëme.

Izraeli gjithashtu nisi bastisje në Burj Qalawiya, Sultaniya dhe Chaqra. Dy bastisje u kryen gjithashtu në qytetet Qantara dhe as-Sawana.

Raportohet se më shumë se 800,000 njerëz, përfshirë gra dhe fëmijë, janë detyruar të largohen nga shtëpitë e tyre, ndërsa ushtria izraelite lëshoi urdhra evakuimi për shumë lagje në Libanin jugor, si dhe për kryeqytetin, Bejrut.

Deri në 1.60 euro për litër ka arritur çmimi i naftës në tregun me pakicë në Kosovë të hënën.

Sipas kryetarit të Shoqatës së naftëtarëve, Fadil Berjani, çmimet e naftës varësisht nga kompanitë sillen nga 1.53 deri 1.60 euro për litër, ndërsa i benzinës nga 1.34 deri 1.38 euro për litër.

Sipas tij çmimi i naftës me shumicë është 1.54 euro për litër.

Rritja po vazhdon si pasojë e përshkallëzimit të konfliktit në Lindjen e Mesme.

Më 5 mars ka hyrë në fuqi vendimi i Ministrisë së Tregtisë, Industrisë e Ndërmarrësisë (MINT) për caktimin e marzhës tregtare.

Vendimi përcakton marzhë të fitimit prej 2 cent për shitjet me shumicë dhe 12 centë për shitjet me pakicë. Çmimet globale të naftës janë rritur ndjeshëm pas sulmeve të Iranit ndaj vendeve tjera në

Lindjen e Mesme, si përgjigje ndaj sulmeve nga SHBA-ja dhe Izraeli.

Çmimi i naftës në botë është rritur në nivelin më të lartë që nga korriku i vitit 2022 të dielën në mbrëmje, pasi administrata e presidentit amerikan Donald Trump sugjeroi se lufta me Iranin mund të zgjasë edhe disa javë, ndërkaq vetë presidenti i ka bërë thirrje komunitetit ndërkombëtar për ndihmë në rihapjen e Ngushticës së Hormuzit për cisternat e naftës.

Nafta brent u shtrenjtua për 2.9% dhe arriti në rreth 106.12 dollarë për fuçi.

Lufta në Lindjen e Mesme po pengon transportin e barnave jetike drejt vendeve të Gjirit, duke rrezikuar furnizimin me ilaçe për trajtimin e kancerit dhe terapi të tjera që kërkojnë ruajtje në temperatura të kontrolluara.

Sipas Reuters, kompanitë farmaceutike po detyrohen të ndryshojnë rrugët e transportit dhe të gjejnë alternativa për dërgimin e barnave në rajon. Konflikti, i nisur pas sulmeve të Shteteve të Bashkuara të Amerikës dhe Izraelit ndaj Iranit ka mbyllur disa aeroporte të rëndësishme dhe ka penguar qarkullimin e mallrave.

Aeroporte kryesore si Dubai, Abu Dhabi dhe Doha janë mbyllur pas sulmeve iraniane, duke detyruar kompanitë të përdorin rrugë alternative për transportin e ilaçeve.

Ekspertët paralajmërojnë se nëse konflikti vazhdon, mund të shfaqen vështirësi më të mëdha në furnizimin me barna, pasi shumë prej tyre kanë afat të shkurtër përdorimi dhe kërkojnë transport të shpejtë në kushte të veçanta.

Dy ditë më parë, një foshnje dymuajshe ka vdekur në Tiranë.

Nëna e foshnjës, Vjollca Shkëmbi ka folur për A2Cnn, ku mes lotësh ka treguar se fëmijën e ka sjellë në jetë si lindje e parakohshme.

Sipas saj, mjekët e Tiranës duhet ta mbanin nën kujdesin e tyre për një kohë më të gjatë, gjë të cilën sipas saj nuk e kanë bërë.

Në të njëjtën linjë është edhe bashkëshorti i saj, Arben Vesholliu i cili thotë se fëmija merrte kujdes të veçantë nga prindërit por kjo nuk mjaftonte për shkak të lindjes së parakohshme dhe kujdesit të munguar mjekësor.

Ai ka një kërkesë, të sjellin foshnjën në banesë që mund t’i japë lamtumirën e fundit.

Gjyshja nga nëna tregon me detaje për problemet që fëmija kishte, duke shtuar se fëmija po rritej me vështirësi.

“Pas gjendjes së rënduar shëndetësore, mjekët e Korçës vendosën ta rikthejnë foshnjën për mjekim më të specializuar në pediatrinë e Tiranës ku dhe ka ndërruar jetë”, tha ajo.

Korpusi i Gardës Revolucionare Islamike (IRGC) tha se do të shtojë përpjekjet për të gjurmuar dhe ndoshta eliminuar kryeministrin izraelit Benjamin Netanyahu.

Në një deklaratë të lëshuar të dielën, të transmetuar nga agjencia e lajmeve Tasnim e Iranit, IRGC tha se fati i pasigurt i kryeministrit “sionist kriminal” dhe mundësia e vdekjes së tij ose arratisjes së familjes së tij nga territoret e pushtuara e thekson më tej krizën aktuale dhe paqëndrueshmërinë midis sionistëve.

Deklarata shtoi se, në hakmarrje për gjakun e punëtorëve iranianë që u vranë në komplekset industriale në të gjithë vendin gjatë sulmeve SHBA-Izrael, IRGC kreu operacione të kombinuara kundër “objektivave SHBA-sioniste në pozicione në territoret e pushtuara dhe në tre baza amerikane në rajon gjatë valës së 52-të të Operacionit “Premtimi i Vërtetë 4″, duke shkatërruar objektivat me saktësi dhe forcë të madhe”.

Sipas IRGC, “tingulli i vazhdueshëm i sirenave të ambulancës dhe pranimi nga institucionet sioniste i numrit në rritje të vdekjeve dhe lëndimeve pas sulmeve efektive iraniane demonstrojnë thellësinë e dëmit të shkaktuar në sektorët industrialë në Tel Aviv”.

Deklarata deklaroi gjithashtu se sektorët industrialë dhe qendrat ku mblidhen forcat amerikane në bazën ajrore al-Harir, si dhe bazat Ali Al Salem dhe Camp Arifjan, u shkatërruan gjithashtu nga raketa dhe dronë të fuqishëm iranianë.

Si përkujtesë, SHBA-të dhe Izraeli nisën një fushatë gjithëpërfshirëse ushtarake kundër Iranit pas vrasjes së Udhëheqësit të Revolucionit Islamik, Ajatollah Seyed Ali Khamenei, dhe disa komandantëve të lartë ushtarakë dhe civilëve më 28 shkurt.

Sulmet përfshinin sulme ajrore të gjera mbi objektiva ushtarake dhe civile në të gjithë Iranin, me humbje të konsiderueshme njerëzore dhe dëme të përhapura në infrastrukturë.

Në përgjigje, forcat e armatosura iraniane kryen operacione hakmarrëse, duke synuar pozicionet amerikane dhe izraelite në territoret e pushtuara dhe bazat rajonale duke përdorur valë raketash dhe dronësh.

Partia Demokratike ka njoftuar protestë kombëtare në datën 22 mars. Por kjo datë përkon me një ditë pushimi zyrtar në Shqipëri, pasi shënohet Sulltan Nevruzi, një festë që për shumë qytetarë ka edhe dimension shpirtëror dhe familjar, përcjell Gazeta Express.

Pikërisht kjo përputhje ka nxitur debat brenda radhëve të opozitës. Sipas burimeve, në Partinë Demokratike janë zhvilluar diskutime, madje edhe me tone të larta, për mundësinë e shtyrjes së protestës në një datë tjetër.

Një burim i tha Shqip.com se një pjesë e strukturave të PD i kanë kërkuar kryetarit, Sali Berisha që protesta e 22 marsit të anulohet dhe të caktohet një datë tjetër, pikërisht për shkak se përkon me festën e Sulltan Nevruzit. Megjithatë, sipas të njëjtit burim, Berisha nuk e ka pranuar këtë propozim dhe ka qenë i vendosur që protesta të mbahet në datën e paralajmëruar si formë reagimi nga ana e qytetarëve, pasi mazhoranca refuzoi t’i heqë imunitetin Belinda Ballukut.

Edhe publikisht, Berisha është shprehur se shqiptarët presin vazhdimin e revoltës dhe se, sipas tij, nuk është koha për festë.

Por pikërisht këtu lind edhe dilema politike. Se si e mat tempin e revoltës së shqiptarëve Sali Berisha dhe qasjen e tyre festive apo jo, kjo mbetet për t’u parë e kuptuar në vijim. Në një klimë ku pjesëmarrja qytetare shpesh varet nga shumë faktorë socialë dhe ekonomikë, vendosja e një proteste në një ditë feste mbetet një zgjedhje që mund të interpretohet në mënyra të ndryshme.

Në fakt, qëndrime të kësaj natyre, ashtu si edhe retorika e përdorur më herët për “kilometrin e fundit”, duket se i drejtohen kryesisht një segmenti të caktuar të elektoratit opozitar. Ato synojnë të mbajnë të mobilizuar një bazë militante që vazhdon të besojë tek lidershipi aktual i PD.

Protesta e fundit, ajo e 12 marsit, ishte larg të qenit në kufijtë e revoltës. Për të mos thënë se i ngjante më shumë protestave modeste të Lapajt dhe Qorit sesa një “shpërthimi i madh” opozitar që premtohet prej kohësh.

Në këtë kuptim, protesta e 22 marsit duket të jetë më shumë një test për opozitën Berishiste, mobilizimin e bazës së tij më besnike, në një kohë kur zgjerimi i mbështetjes përtej këtij rrethi mbetet sfida kryesore politike e cila siç edhe po duket nuk ka gjasa të jetësohet.

Në prill, PD pritet të zhvillojë zgjedhjet për kryetarin e saj dhe Sali Berisha është kandidat, ndoshta edhe i vetmi në garë. Në këtë kuadër, protesta e 22 marsit mund të lexohet edhe si një mesazh politik brenda radhëve të selisë blu, një demonstrim force për të treguar se Berisha jo vetëm pritet të rifitojë sërish drejtimin e partisë, por ta bëjë këtë pa rivalë realë përballë. Puna ka nisur për të gjetur 1 apo 2 “kukulla” vërdallë nëpër korridoret e PD.