Author: K.B.

Kryeministri i vendit, Albin Kurti, është deklaruar për takimin që ka zhvilluar me presidentin e Francës, Emmanuel Macron, në Paris.

Kurti, ka bërë të ditur se gjatë takimit ai i ka kërkuar presidentit francez mbështetjen e Francës në rrugën e vendit drejt integrimit në Bashkimin Evropian e organizata ndërkombëtare dhe thellimin e bashkëpunimit ekonomik përmes organizimit të forumeve të reja të bizneseve Kosovë–Francë.

‘’ Gjithashtu, në takim ngrita çështjet e sigurisë, forcimit të kapaciteteve tona mbrojtëse, dialogut me Serbinë dhe zbatimin e marrëveshjes për normalizim të plotë’’, ka shkruar Kurti mes tjerash.

Postimi:

Pata kënaqësinë sot të zhvilloj vizitë dhe të kem drekë pune në Pallatin Elize në Paris me Presidentin e Republikës së Francës, Emmanuel Macron.

Për rreth dy orë diskutuam për rolin e rëndësishëm dhe të vazhdueshëm të NATO-s në Kosovë, për angazhimin e misioneve të Bashkimit Evropian, si dhe për përkushtimin e Republikës së Kosovës për harmonizim të plotë me politikën e jashtme dhe të sigurisë së BE-së.

Nga Presidenti Macron kërkova mbështetjen e Francës në rrugën tonë drejt integrimit në BE e organizata ndërkombëtare dhe thellimin e bashkëpunimit ekonomik përmes organizimit të forumeve të reja të bizneseve Kosovë–Francë. Gjithashtu, në takim ngrita çështjet e sigurisë, forcimit të kapaciteteve tona mbrojtëse, dialogut me Serbinë dhe zbatimin e marrëveshjes për normalizim të plotë.

Falenderoj Presidentin Macron për pritjen e përzemërt dhe mbështetjen e Republikës së Francës në ecjen e Republikës sonë përpara.

Presidentja e Kosovës, Vjosa Osmani, ka përkujtuar historinë e dhimbshme të Nënës Ferdonije, 27 vjet pas humbjes së familjarëve të saj gjatë luftës në Kosovë.

Osmani ka rikujtuar se katër djemtë dhe bashkëshorti i saj u rrëmbyen dhunshëm nga forcat e regjimit gjenocidal të Serbisë, ndërsa deri më sot vetëm eshtrat e dy prej djemve janë gjetur.

“Për dy djemtë e tjerë dhe bashkëshortin, pritja vazhdon. Një pritje që nuk është vetëm e saj, por e gjithë shoqërisë sonë. Një plagë që ende nuk është mbyllur”, ka theksuar presidentja.

Ajo e cilësoi historinë e Nënës Ferdonije si dëshmi të dhimbjes së madhe, por edhe të forcës së jashtëzakonshme të një nëne që nuk ndalet së kërkuari drejtësi.

“Është dëshmi se dashuria e një nëne nuk dorëzohet kurrë, se kujtesa nuk zbehet dhe se kërkimi për drejtësi nuk ndalet”, u shpreh Osmani.

Në fund, presidentja ka theksuar se institucionet e Kosovës mbeten të përkushtuara për të vënë drejtësinë në vend, duke u përkulur me respekt para qëndresës së Nënës Ferdonije.

Kryesia e Kuvendit do të mblidhet të hënën të hënën më 30 mars nga ora 11:00.

Në rend të ditës, mes tjerash, është edhe propozimi i rendit të ditës për seancën e radhës plenare, e cila parasheh shqyrtimin e disa projektligjeve që kanë të bëjnë kryesisht me marrëveshje ndërkombëtare.

Ky është njoftimi i Kuvendit:

Rendi i ditës

Miratimi i procesverbali të mbledhjes së mëparshme të Kryesisë së Kuvendit,Propozimi i rendit të ditës për Seancën plenare të radhës:Miratimi i procesverbaleve nga seancat e mëparshme,Deklarimet jashtë rendit të ditës,Pyetjet parlamentare,Shqyrtimi i Projektligjit nr.10/L-008 për Ratifikimin e Marrëveshjes për qasje në Arsimin e Lartë dhe pranim për studime në Ballkanin Perëndimor,Shqyrtimi i Projektligjit nr.10/L-009 për Ratifikimin e Amendamentit “nr.3 të Marrëveshjes Financiare ndërmjet Republikës së Kosovës dhe Bashkimit Evropian, për Programin IPA 2018“,Shqyrtimi i Projektligjit nr.10/L-010 për Ratifikimin e “Amendamentit nr. 2 të Marrëveshjes Financiare ndërmjet Republikës së Kosovës dhe Bashkimit Evropian, për Programin IPA 2017“,Shqyrtimi i Projektligjit nr.10/L-011 për ratifikimin e Marrëveshjes së Kredisë mes Republikës së Kosovës dhe Bankës Evropiane për Investime për Projektin Energjia Diellore Fotovoltaike në KEK – Porta Globale,Shqyrtimi i Projektligjit nr.10/L-012 për ratifikimin e Marrëveshjes së Kredisë ndërmjet Republikës së Kosovës, e Përfaqësuar nga Ministria e Financave, Punës dhe Transfereve dhe Bankës Evropiane për Rindërtim dhe Zhvillim (BERZh) për Projektin e efiçencës së energjisë në ndërtesa publike,Shqyrtimi i Projektligjit nr.10/L-013 për ratifikimin e Marrëveshjes së Kredisë “ Projekti i Rrugës me Shpejtësi të Lartë Prishtinë – Mitrovicë” (Kredi shtesë) ndërmjet Fondit Saudit për Zhvillim dhe Republikës së Kosovës,Shqyrtimi i Projektligjit nr.10/L-014 për ratifikimin e Marrëveshjes së Kredisë ndërmjet Republikës së Kosovës dhe Bankës Evropiane për Rindërtim dhe Zhvillim për Projektin “Impianti për Trajtimin e Ujërave të Zeza në Podujevë”,Formimi i Komisionit Ad-Hoc për përzgjedhjen e kandidatëve për një (1) anëtar të Komisionit të Pavarura të Mediave,Formimi i Komisionit Ad-Hoc për përzgjedhjen e kandidatëve për tre (3) anëtarë nga radhët e komunitetit shqiptar dhe për dy (2) anëtarë jo shumicë në Komisionin e Pavarura të Mediave,Formimi i Komisionit Ad-Hoc për përzgjedhjen e kandidatëve për gjashtë (6) anëtarë nga komuniteti shqiptar, një (1) anëtar nga komuniteti serb dhe një (1) antar nga komunitetet jo shumicë në Bordin e Radiotelevizionit të Kosovës,Propozimi i GP të Listës Serbe për emërimin e deputetit Branislav Nikoliq në komisione parlamentare.

Në mbledhjen e sotme të Komisionit për Buxhet janë miratuar të gjitha pikat e rendit të ditës, përfshirë edhe shyqrtimin e projektligjit nr.10/L-013 për ratifikimin e marrëveshjes së kredisë “projekti i rrugës me shpejtësi të lartë Prishtinë-Mitrovicë” (kredi shtesë) ndërmjet Fondit Saudit për Zhvillim dhe Republikës së Kosovës.

Ministri i Financave, Hekuran Murati prezantoi projektin, duke thënë se qëllimi i këtij projekti është që të lidhë kryeqytetin me qytetin e Vushtrrisë dhe Mitrovicës.

“Qëllimi i këtij projekti është të lidhë, pra, kryeqytetin me qytetin e Vushtrrisë dhe Mitrovicës deri në Smrekonicë, pjesa e segmentit është përfunduar. Ndërkaq, pjesa e mbetur parashihet që të përfundohet apo të përshpejtohet përmes këtij financimi. Punët që do të financohen janë sipas seksionit Smrekonicë-Mitrovicë, që ka një gjatësi prej 5 kilometrash, ku ndërtimi i dy korsive shtesë, dy korsive të emergjencës, si dhe ndërtimi i katër urave janë të paraparë për t’u ndërtuar përgjatë këtij segmenti. Vlera totale e financimit është në shifrën prej 53 milionë rialë sauditë, apo e konvertuar rreth 13 milionë euro. Ndërkaq, pjesa tjetër prej 3.7 milionë euro parashihet të jetë si bashkëfinancim nga Qeveria e Republikës së Kosovës“, tha ai.

Ndërsa është miratuar edhe pika për marrëveshjen e kredisë mes Kosovës dhe Bankës Evropiane për Investime për projektin Energjia Diellore Fotovoltaike në KEK-Porta Globale.

Edhe për këtë pikë foli ministri Murati.

“Më saktësisht, është shtimi i kapaciteteve të reja gjeneruese të ripërtërishme, pra të energjisë së ripërtërishme, konkretisht 100 megavat kapacitet shtesë fotovoltaik apo energji solare që po ndërtohet për energji elektrike, e cila pra parashihet që të gjenerojë rreth 152 gigavat-orë kapacitet prodhues në vit. Si dhe pra në investim parashihet edhe infrastruktura përkatëse duke përfshirë rrugët hyrëse, kabllot në terren, transformator, pra për linjën, si dhe linjë kabllore nëntokësore në nënstacionin ekzistues në termocentralin Kosova A. Kjo kredi nga Banka Evropiane për Investime ka vlerën prej 33 milionë eurosh dhe bëhet pra në kuadër… është njëra nga komponentët e financimit në kuadër të projektit i cili në tërësi parashihet të ketë vlerën prej 104 milionë eurove. Për këtë projekt, pra është edhe një marrëveshje tjetër e financimit me KfË-në, me vlerë prej 29 milionë euro, si dhe Korniza e Investimeve për Ballkanin Perëndimor, grantin në vlerë prej 32 milionë eurove. Pra, meqenëse jemi nën presionin kohor edhe për vazhdimin e projektit dhe është tejet e nevojshme, e konsideroj që është pra… nëse e shihni të arsyeshme të miratohet kjo marrëveshje, sepse edhe kushtet financiare pra janë kushte koncesionare, të ngjashme sikurse që i kemi me marrëveshje tjera për financimin e këtyre projekteve“, tha Murati.

E, ai që kishte kritika për Qeverinë ishte deputeti i PDK-së, Mërgim Lushtaku.

Lushtaku pyeti Muratin edhe për kredinë me BERZH-in.

“Dhe realisht këto vite sa jeni në qeveri, fatkeqësisht… kemi pasur një projekt që kish me ndihmuardhe kish me… liruar energjinë për qytetarët tonë. Po flas për një projekt të madh siç është edhe projekti i çështjes së termocentralit që fatkeqësisht, siç e dini më herët, është penguar ky projekt. Por gjithsesi nuk duam të kthehemi te ajo pjesë, sepse tash më e rëndësishme janë investimet për projektet. Përgjegjësia i takon atyre që e kanë penguar në atë kohë dhe tash po i shohim pasojat me rritje të energjisë. Sigurisht, më kujtohet ka qenë një buxhet planifikimi i tërësishëm. Pse e keni ndryshuar? Ndoshta këtu nuk po më kujtohet konkretisht, por e di që keni planifikuar në buxhet në tërësi për të mbuluar të gjitha shpenzimet e këtij projekti me u realizuar në tërësi. Por ju keni vendosur që të keni edhe një marrëveshje ndërkombëtare me BERZH-in. Pse keni vendosur kështu? Pasi nëse ka pasur buxhet të mjaftueshëm, pse patjetër me shku edhe në kredi te BERZH-i? Sigurisht është ajo ideja juaj, po unë besoj që kish me qenë më mirë me buxhetin tonë, meqë ka pasur hapësirë“, tha Lushtaku.

Ministri Murati, duke iu përgjigjur pyetjes së deputeti Lushtaku, tha se mbi 30% e projektit realisht janë grant, të cilat s’ka nevojë të kthehen, gjë që e bën të favorshme ekonomikisht.

“Nuk ka qenë e paraparë me buxhet masi nuk ka hyrje buxhetore meqenëse projekti që nga fillimi ka qenë i paraparë të zbatohet nga KRU-ja (Kompania Rajonale e Ujësjellësit). Pra, meqenëse është ndërmarrje publike jashtë-buxhetore. Por gjithsesi arsyeja pse ka qenë e favorshme të shkohet në këtë rrugë është edhe pjesa e grantit që po e marrim. Pra diku 22 milionë euro janë grant. Meqenëse shkojmë me financim përmes Bankës Zhvillimore Gjermane (KfË) dhe me financim nga Banka Evropiane për Investim (BEI), është kualifikuar projekti edhe për përfitimin e grantit me vlerë prej 22 milionë euro. Pra, mbi 30% e projektit realisht janë grant, të cilat s’ka nevojë të kthehen, e gjë që e bën të favorshme ekonomikisht. Pra ka qenë kjo mënyrë e përzgjedhjes“, sqaroi Murati.

Ndërkaq, është mirtuar edhe shqyrtimi i Projektligjit nr.10/L-011 për ratifikimin e marrëveshjes së kredisë mes Republikës së Kosovës dhe Bankës Evropiane për Investime për projektin Energjia Diellore Fotovoltaike në KEK – Porta Globale, shqyrtimi i Projektligjit nr.10/L-014 për ratifikimin e marrëveshjes së kredisë në mes të Republikës së Kosovës dhe Bankës Evropiane për Rindërtim dhe Zhvillim për projektin “Impianti për Trajtimin e Ujërave të Zeza në Podujeve” dhe shqyrtimi i Projektligjit nr.10/L-012 për ratifikimin e marrëveshjes së kredisë ndërmjet Republikës së Kosovës, e përfaqësuar nga Ministria e Financave, Punës dhe Transfereve dhe Bankës Evropiane për Rindërtim dhe Zhvillim (BERZH) për projektin e Efiçencës së Energjisë në ndërtesa publike./EO/

Ministria e Mbrojtjes ka njoftuar se sot është dita e fundit e konkursit për rekrutimin e ushtarëve të rinj në Forcën e Sigurisë së Kosovës, shkruan Reporteri.net.

Në total do të rekrutohen 320 ushtarë. Ministria ka ftuar qytetarët të aplikojnë.

“Sot është dita e fundit e konkursit për rekrutimin e ushtarëve të rinj në Forcën e Sigurisë së Kosovës. Apliko dhe bëhu ushtar i Kosovës! 🇽🇰”, thuhet në njoftimin e Ministrisë.

Të drejtë aplikimi kanë shtetasit e Kosovës nga mosha 18 deri në 25 vjeç, të cilët kanë përfunduar shkollimin e mesëm.

Kandidatët duhet të plotësojnë edhe këto kritere shtesë: Gjendje të mirë fizike dhe shëndetësore, figurë të pastër morale dhe ligjore si dhe përkushtim për të shërbyer me dinjitet dhe profesionalizëm.

KEDS ka paralajmëruar se do të mbajë një konferencë për media lidhur me çështjen e fundit të ngritur në opinion publik, duke iu referuar çështjes që ngriti Lidhja Demokratike e Kosovës për njehsorët elektrikë.

Konferenca do të mbahet të martën, me datë 1 Prill, në ambientet e zyrave kryesore të KEDS-it, duke filluar nga ora 15:00, thuhet në këtë njoftim.

“Ftoheni të merrni pjesë për të përcjellë nga afër qëndrimet dhe sqarimet zyrtare lidhur me këtë çështje. KEDS mbetet e përkushtuar ndaj transparencës, korrektësisë dhe informimit të drejtë ndaj qytetarëve të Kosovës”.

Visar Azemi nga Lidhja Demokratike e Kosovës në disa konferenca për shtyp ka thënë se qytetarët po manipulohen me keqllogaritje të rrymës së shpenzuar në njehsorët elektrikë.

Kryetari i LDK-së, Lumir Abdixhiku, tha se partia e tij kërkon “hetim të menjëhershëm, përgjegjësi institucionale, kompensim për qytetarët dhe ndaljen e çdo rritjeje të tarifave deri në zbardhjen e plotë të gjendjes reale”.

Ministrja e Mjedisit dhe Planifikimit Hapësinor, Fitore Pacolli, ka reaguar ndaj shqetësimeve të banorëve të Rugovës lidhur me vendimin për ndalimin e transportit të materialeve ndërtimore në zonën e Bjeshkët e Nemuna.

Në një përgjigje zyrtare, ministrja theksoi se vendimi nuk është i drejtuar kundër banorëve apo zhvillimit të zonës, por synon të parandalojë degradimin e mëtejmë të mjedisit në parqet kombëtare, përfshirë edhe Parku Kombëtar Bjeshkët e Nemuna dhe zonën e Rugova.

Sipas saj, masa është ndërmarrë për të rregulluar transportin e materialeve ndërtimore dhe për të siguruar që çdo ndërhyrje të jetë në përputhje me ligjin dhe standardet mjedisore. Ajo nënvizoi se ndërtimet pa leje, përfshirë hotele dhe vila, kanë kontribuar në dëmtimin e ekosistemit të zonës.

Vendimi nuk ka për qëllim të kufizojë lirinë e lëvizjes së qytetarëve, por të garantojë që ndërhyrjet në këto zona të jenë të kontrolluara dhe ligjore”, thuhet në reagim.

Pacolli pranoi se banorët janë përballur me vështirësi ndër vite për pajisje me leje ndërtimore, duke ia atribuar këtë vonesave institucionale dhe mungesës së planeve rregulluese në nivel lokal, veçanërisht në Komunën e Pejës. Ajo bëri të ditur se institucionet janë duke punuar për të përshpejtuar procedurat dhe për të mundësuar zhvillim të qëndrueshëm.

Ministrja rikujtoi se janë miratuar dokumente strategjike, përfshirë Planin Hapësinor për Parkun Kombëtar “Bjeshkët e Nemuna” (2022) dhe Planin e Menaxhimit (2024), të cilat synojnë balancimin ndërmjet ruajtjes së natyrës dhe zhvillimit ekonomik.

Ajo siguroi banorët se mirëmbajtja e objekteve ekzistuese, si ndërrimi i dritareve apo dyerve, nuk do të pengohet dhe se kërkesat për transport të materialeve për qëllime të tilla do të trajtohen me prioritet.

Në fund, Pacolli bëri thirrje për bashkëpunim me institucionet, duke theksuar se synimi është kalimi nga ndërtimet pa leje drejt një zhvillimi të rregullt dhe të qëndrueshëm, ku respektohen njëkohësisht e drejta e pronës private dhe mbrojtja e mjedisit.

Me shtatë vota për, zero kundër dhe asnjë abstenim, u miratua buxheti i komunës së Zubin Potokut për vitin 2026 nga Komisioni për Buxhet, raporton Ekonomia Online.

Ministri i Financave, Hekuran Murati, derisa prezantoi buxhetin për këtë komunë, theksoi se buxheti për këtë vit do jetë rreth 3.6 milionë euro.

“Kemi përpara nesh buxhetin e komunës së Zubin Potokut, i cili, për fat të keq, nuk ka arritur të miratohet në kohë dhe sipas procedurës, si në rastet e tjera, para se buxheti, pra ligji për ndarje buxhetore, të miratohet në lexim të dytë dhe të hyjë në fuqi. Megjithatë, Ligji për Menaxhimin e Financave Publike e ka paraparë këtë skenar. Pra, nëse buxheti i një komune nuk arrin të miratohet me kohë dhe të përfshihet në ligjin për ndarje buxhetore, atëherë, në momentin e parë që miratohet, dorëzohet në Ministrinë e Financave. Ministria e Financave e përcjell më tutje përmes mbledhjes së Qeverisë, përmes vendimit të Qeverisë, për miratim në Kuvend, ku pastaj Kuvendi ka të drejtën ta miratojë apo jo.

Meqenëse kemi të bëjmë me buxhetin e një komune e cila, megjithatë, e ka miratuar buxhetin brenda kufijve që janë përcaktuar dhe ka respektuar dispozitat e tjera të Ligjit për Buxhet, përveç shkeljes së afatit që ka ndodhur në këtë rast, atëherë edhe rekomandimi i Ministrisë së Financave është që të miratohet nga Kuvendi buxheti i komunës së Zubin Potokut. Kjo bëhet në mënyrë që të mos paraqiten probleme gjatë këtij viti sa i përket planifikimit dhe mirëmenaxhimit të buxhetit.

Në tërësi, buxheti është diku rreth 3.6 milionë euro. Sa i përket përmbajtjes, Ministria e Financave nuk ka të drejtë të ndryshojë diçka, madje as komisioni këtu; thjesht, çdo gjë që është brenda kufijve procedohet për miratim ose jo nga Kuvendi. Marrë parasysh këtë, ju ftoj për miratim nga komisioni dhe pastaj edhe në seancë”, tha Murati.

Gjatë periudhës 23–27 mars 2026, Zyra për Mbrojtje dhe Ndihmë të Viktimave ka trajtuar 66 raste të reja në të gjithë Kosovën.

Nga këto, 60 raste kanë qenë për dhunë në familje, ndërsa janë regjistruar edhe raste për dhunim, grabitje, vrasje në tentativë, bashkëjetesë nën moshën 16-vjeçare dhe shkelje të UM-së.

Në këtë periudhë, zyra ka përgatitur 6 kërkesa për urdhërmbrojtjeje në gjykatë dhe 19 kërkesa për urdhërmbrojtje emergjente, si dhe 3 kërkesa për ndërprerje të UM-së. Janë dhënë gjithsej 18 aktvendime të aprovuara, 2 refuzuara dhe 1 i tërhequr, ndërsa janë kryer 96 seanca gjyqësore dhe 19 seanca në prokurori.

Po ashtu, janë ofruar 57 këshilla juridike, janë dhënë 14 aktgjykime dënuese, 1 lirues dhe 4 refuzuese. Përfaqësimi i rasteve ka përfshirë 1 rast në polici dhe 3 raste në strehimore, ndërsa 7 raste janë referuar te Qendra për Punë Sociale dhe 1 rast te Agjencia për Ndihmë Juridike Falas.