ATV

Author: K.B.

  • Viktimat e Epstein padisin qeverinë amerikane dhe Google: Shpërndanë publikisht të dhëna personale

    Viktimat e Epstein padisin qeverinë amerikane dhe Google: Shpërndanë publikisht të dhëna personale

    Viktimat e skandalit të Jeffrey Epstein kanë ngritur një padi kundër qeverisë së Shteteve të Bashkuara dhe kompanisë Google, pasi sipas tyre u zbuluan dhe u shpërndanë publikisht të dhënat e tyre personale përmes dokumenteve zyrtare të publikuara online.

    Padia vjen pas publikimit, në janar, të më shumë se tre milionë dokumenteve nga Departamenti i Drejtësisë i SHBA-ve, që lidhen me hetimin ndaj financierit amerikan. Në këto materiale përfshiheshin edhe emrat e rreth 100 viktimave, të cilat supozohej të mbeteshin anonime.

    Sipas padisë, e depozituar në një gjykatë në San Francisko, autoritetet amerikane “zbuluan identitetet e rreth 100 viktimave të një të dënuari për krime seksuale, duke publikuar të dhënat e tyre personale dhe duke i ekspozuar në mbarë botën”.

    Paditëset pretendojnë se, edhe pasi qeveria pranoi se publikimi i këtyre të dhënave shkelte të drejtat e viktimave dhe ndërmori hapa për t’i hequr ato, platforma online si Google vijojnë t’i ripublikojnë.

    Sipas tyre, Google vazhdon të shfaqë informacionet personale të viktimave në rezultatet e kërkimit dhe madje edhe në përmbajtje të gjeneruar nga inteligjenca artificiale, pavarësisht kërkesave të vazhdueshme për fshirje.

    Ndërkohë, gazetarët e “The New York Times” kanë identifikuar gjithashtu dhjetëra fotografi nudo në këto dokumente, ku fytyrat e personave janë të dukshme, duke shtuar shqetësimet për shkelje të privatësisë dhe dinjitetit të viktimave.

    Jeffrey Epstein u arrestua në korrik të vitit 2019 dhe u akuzua për shfrytëzim seksual të të miturve dhe trafikim. Ai u gjet i varur në qelinë e tij më 10 gusht 2019, ndërsa priste gjyqin. Autopsia përfundoi se bëhej fjalë për vetëvrasje.

    Më herët, në vitin 2008, ai ishte dënuar në Florida pasi pranoi fajësinë për akuza që lidhen me prostitucionin e të miturve, duke përfituar një dënim relativisht të lehtë prej 13 muajsh burg.

    “Viktimat po përjetojnë një traumë të re. Persona të panjohur i telefonojnë, u dërgojnë email, rrezikojnë sigurinë e tyre fizike dhe madje i akuzojnë si bashkëpunëtore të Epstein, kur në fakt ato ishin viktimat e tij”, thuhet në padi.

  • Raporti i Eurostat: Shqiptarët të tretët për marrjen e shtetësive në BE

    Raporti i Eurostat: Shqiptarët të tretët për marrjen e shtetësive në BE

    Gjatë vitit 2024, rreth 1.2 milionë persona fituan shtetësinë e një vendi të Bashkimit Evropian ku jetonin, duke shënuar një rritje prej 11.6% (+122,700 persona) krahasuar me vitin 2023.

    Sipas të dhënave të publikuara nga Eurostat, numri i shtetësive të dhëna është rritur ndjeshëm edhe në krahasim me vitin 2014, me një rritje prej 54.5%, kur në atë kohë u dhanë gjithsej 762,100 shtetësi.

    Pjesa më e madhe e këtyre shtetësive u dha nga tre vende kryesore:

    Gjermania: 288,700 shtetësi (24.5% e totalit të BE-së)

    Spanja: 252,500 (21.4%)

    Italia: 217,400 (18.5%)

    Sa i përket përkatësisë, shumica dërrmuese e përfituesve (88.0%) ishin shtetas nga vende jashtë BE-së, ndërsa 10.6% ishin qytetarë të vendeve të tjera anëtare të BE-së.

    Sirianët, marokenët dhe shqiptarët kryesojnë listën e përfituesve

    Edhe në vitin 2024, sirianët mbetën grupi më i madh i përfituesve të shtetësisë në BE, me 110,100 shtetësi të reja të dhëna.

    Ata u pasuan nga shtetasit marokenë me 97,100 shtetësi, ndërsa në vendin e tretë renditen shqiptarët me 48,000 shtetësi të përfituara.

    Suedia me normën më të lartë të natyralizimit

    Norma e natyralizimit, që tregon numrin e personave që marrin shtetësi gjatë një viti në raport me totalin e banorëve jo-shtetas në fillim të vitit, rezulton më e larta në Suedi.

    Në vitin 2024:

    Suedia kryeson me 7.5 shtetësi për çdo 100 banorë jo-shtetas

    Italia renditet e dyta me 4.1

    Spanja dhe Holanda ndajnë vendin e tretë me nga 3.9 secila

    Në anën tjetër të renditjes, normat më të ulëta të natyralizimit u regjistruan në:

    Lituani: 0.1

    Bullgari dhe Estoni: nga 0.3 secila

    Këto të dhëna janë pjesë e raportit më të fundit të Eurostat mbi përfitimin e shtetësisë në vendet e Bashkimit Evropian, i cili ofron një pasqyrë më të detajuar mbi trendet e migracionit dhe integrimit në rajon. /euronews.al/

  • Kosova 90 minuta larg Botërorit – Rama dhe Lladrovci iu bëjnë thirrje kryetarëve të komunave që të vendosin ekrane gjigante në sheshe për ta shikuar ndeshjen

    Kosova 90 minuta larg Botërorit – Rama dhe Lladrovci iu bëjnë thirrje kryetarëve të komunave që të vendosin ekrane gjigante në sheshe për ta shikuar ndeshjen

    Kryetari i Prishtinës, Përparim Rama, së bashku me kryetarin e Drenasit, Ramiz Lladrovci, kanë ftuar kryetarët e komunave të vendosin ekrane të mëdha në sheshet e qyteteve për t’i mundësuar çdo qytetari të përjetojë ndeshjen vendimtare të Kosovës për kualifikimin në Kampionatin Botëror.

    “Le ta kthejmë çdo shesh në një tribunë mbështetjeje, çdo qytet në një zë të vetëm, dhe çdo qytetar në lojtarin e dymbëdhjetë të kombëtares sonë,” shkruan Rama, duke theksuar rëndësinë e solidaritetit dhe bashkëpunimit për këtë moment historik për vendin.

    Postimi i plotë:

    KRYETARËT E KOMUNAVE TË KONTRIBUOJNË PËR MREKULLINË E KUALIFIKIMIT TË KOSOVËS NË KAMPIONAT BOTËROR!

    Të martën na pret një moment historik për shtetin tonë, mundësia që Kosova të shkruajë historinë me kualifikimin në Kampionati Botëror ⚽️

    Këto ditë, krenaria dhe atdhedashuria kanë bashkuar çdo qytetar. Pas asaj që përjetuam në Bratislava, besimi është më i madh se kurrë dhe i gjithë vendi rreh si NJË zemër 💙

    Megjithatë, kapaciteti i Stadiumi “Fadil Vokrri” është tejet i vogël, për të gjithë ata që duan të jenë në këtë ndeshje vendimtare.

    Prandaj, në frymë bashkëpunimi dhe solidariteti, ftojmë kryetarët e komunave që të organizojnë vendosjen e ekraneve të mëdha,në pajtim me rrethanat e sigurisë publike, në sheshet e qyteteve të tyre, në mënyrë që të gjithë qytetarë të kenë mundësinë të përjetojnë këtë natë historike.

    Le ta kthejmë çdo shesh në një tribunë mbështetjeje, çdo qytet në një zë të vetëm, dhe çdo qytetar në lojtarin e dymbëdhjetë të kombëtares sonë për kualifikimit historik në Kampionatin botëror.

    Ky është momenti ynë. Le ta jetojmë së bashku. Le ta shkruamë historinë në çdo qytet të Kosovës

  • Vaksinimi kundër HPV-së në Prishtinë, Rama dhe UNICEF ndjekin nga afër procesin

    Vaksinimi kundër HPV-së në Prishtinë, Rama dhe UNICEF ndjekin nga afër procesin

    Në Prishtinë është zhvilluar një sesion vaksinimi kundër Human Papilloma Virusit, në kuadër të përpjekjeve për forcimin e shëndetit publik dhe rritjen e mbulueshmërisë me vaksina.

    Kryetari i kryeqytetit, Përparim Rama, së bashku me shefen e zyrës së UNICEF në Kosovë, Veronika Vashchenko, si dhe drejtorin e Shëndetësisë, Izet Sadiku, kanë vizituar nga afër procesin e vaksinimit në shkollën Shkolla Ismail Qemali.

    Sipas njoftimit, Kosova po konsiderohet një histori suksesi në rajon, pasi që nga viti 2024 ka përfshirë vaksinën kundër HPV-së në kalendarin e rregullt të vaksinimit, duke arritur shkallë të lartë të përfshirjes së fëmijëve.

    “Ky është një hap i rëndësishëm në mbrojtjen e shëndetit të fëmijëve tanë dhe në ndërtimin e një shoqërie më të shëndetshme për të ardhmen”, thuhet në njoftim.

    Autoritetet lokale dhe partnerët ndërkombëtarë theksojnë rëndësinë e vazhdimit të programeve të vaksinimit, si një ndër mekanizmat kryesorë për parandalimin e sëmundjeve dhe mbrojtjen e shëndetit publik.

  • Missit i bien dhëmbët live, pamjet thyejnë rrjetin

    Missit i bien dhëmbët live, pamjet thyejnë rrjetin

    Një incident i papritur ka tërhequr vëmendjen gjatë konkursit të bukurisë “Miss Grand Tajlandë”, ku konkurrentja Kamolwan Chanago humbi dhëmbët gjatë fjalës së saj hapëse. Pamjet tregojnë Chanagonin duke ia kthyer shpinën publikut për t’i vendosur përsëri dhëmbët, pa u larguar nga skena, ndërsa publiku shpërtheu në brohoritje për trimërinë e saj.

    E nxitur nga duartrokitjet, ajo vazhdoi me besim pjesën tjetër të shfaqjes, duke pozur me buzëqeshje në fustanin e saj të shndritshëm të mbrëmjes.

    Videoja e incidentit u bë virale në mediat sociale, me përdorues që lavdëruan profesionalizmin dhe qetësinë e Chanagos përballë një situate të papritur.

    Ky aksident ndodhi gjatë raundit paraprak të gjykimit, ndërsa fituesja do të shpallet të shtunën dhe do të përfaqësojë Tajlandën në “Miss Grand International 2026”, në Indi.

    Incidenti vjen në një kohë kur konkursi ka qenë gjithashtu nën vëzhgimin e polemikave të tjera. Gjatë një episodi të mëparshëm, zëvendëspresidenti për Azinë dhe Oqeaninë në Miss Universe Organization, Nawat Itsaragrisil, kritikoi publikisht konkurrenten Melissa Flores Bosch për mungesën në një xhirim të sponsorit.

    Boschi kundërshtoi duke u përballur me komentet, duke deklaruar: “Unë kam zë” dhe duke akuzuar zyrtarin për mungesë respekti ndaj grave.

    Situata përfundoi me largimin e saj dhe të disa konkurrenteve të tjera, ndërsa debati nxiti diskutime për të drejtat dhe respektin e grave në konkurset e bukurisë.

  • Rama paralajmëron renovimin e shkollës “Ismail Qemali” pas përfundimit të shkollave të reja

    Rama paralajmëron renovimin e shkollës “Ismail Qemali” pas përfundimit të shkollave të reja

    Kryetari i Prishtinës, Perparim Rama, ka bërë të ditur se renovimi i shkollës “Ismail Qemali” pritet të realizohet pas përfundimit të disa projekteve të reja shkollore në kryeqytet.

    “Ne jemi duke i ndërtuar tashmë 10 shkolla në pjesë të ndryshme të kryeqytetit. Tri faktikisht vetëm se kanë përfunduar, presim që edhe tri të tjera të përfundojnë edhe këto kanë me na dhënë mundësinë pastaj që të ndërhyjmë edhe në këto shkolla ekzistuese sepse e dini që janë të mbingarkuara si rezultat që nuk kemi pasë ndërtesa fizike për me i përmbush nevojat nëpër lagje të tjera, e një numër i madh i nxënësve këtu vijnë edhe prej lagjeve të tjera pikërisht për shkak të kësaj çështjeje. Mirëpo tashti jemi shumë afër të përfundimit të shkollave të reja dhe në momentin kur këto përfundojnë kemi mundësi pastaj që të fillojmë edhe ndërhyrjet edhe në shkollën sikur ‘Ismail Qemali’”, u shpreh Rama.

    Ai theksoi se komuna ka si synim që gjatë viteve të ardhshme të kalojë gradualisht në sistemin e mësimit tërëditor, duke përmirësuar kushtet për nxënësit dhe mësimdhënësit. Sipas tij, investimet në arsim janë duke vazhduar, përfshirë edhe digjitalizimin e shkollave dhe pajisjen me mjete bashkëkohore.

    Rama shtoi se gjatë këtij viti nuk pritet nisja e projektit të madh për renovimin e plotë të shkollës “Ismail Qemaili” por do të vazhdojnë ndërhyrjet dhe restaurimet e pjesshme. Ai theksoi se plani është që renovimi të zhvillohet me faza, pa pasur nevojë për zhvendosjen e nxënësve, duke shfrytzuar edhe kapacitetet e shkollave të reja që janë në përfundim e sipër.

    Sipas tij, me përfundimin e objekteve të reja arsimore, do të lehtësohet mbingarkesa në shkollat ekzistuese dhe do të krijohen kushte për renovime të plota, përfshirë edhe shkollën “Ismail Qemali”.

  • Demhasaj: 30 ditët për zgjedhjen e presidentit do të shfrytëzohen për lojë politike

    Demhasaj: 30 ditët për zgjedhjen e presidentit do të shfrytëzohen për lojë politike

    Gjykata Kushtetuese ka dalë të mërkurën me vendim në lidhje me kërkesën e Lëvizjes Vetëvendosje ndaj dekretit të presidentes Vjosa Osmani për shpërndarjen e Kuvendit.

    Në aktgjykim është thënë se Kuvendit i jepen edhe 34 ditë afat shtesë për zgjedhjen e Presidentit.

    Pas vendimit të Gjykatës Kushtetuese, anëtari i AAK-së, Arton Demhasaj, ka kritikuar veprimet e partive politike dhe ka theksuar mungesën e besimit në procesin aktual.

    Demhasaj ka thënë se përçarja mes partive mund të ndikojë në procesin politik dhe në stabilitetin institucional.

    “Është krijuar një hendek i madh mes partive politike dhe LVV njëherë pretendoi ta nxjerrë një figurë konsesuale dhe pastaj shkojë me dy kandidat partiak dhe nuk besoj që opozita nuk ka dozë besimi”, tha Demhasaj.

    Ai thotë se vendi do të shkojë prap në zgjedhje e 30 ditëshi do të shfrytëzohet për lojëra politike.

    “Krejt këto 30 ditë kanë me shkuar duke luajtur lojë politike që nuk fund kur të shkon vendi në zgjedhje me u mundu me fajësuar njëra tjetrën për shkuarjen në zgjedhjet e jashtëzakonshme”, ka thënë Demhasaj për “Front Online”.

  • Komentatori kosovar bëhet viral në mediat botërore pas festës së çmendur pas golave të ‘Dardanëve’

    Komentatori kosovar bëhet viral në mediat botërore pas festës së çmendur pas golave të ‘Dardanëve’

    Komentatori Engjëll Bërbatovci është bërë viral në thuajse të gjitha mediat botërore pas reagimeve të tij të ‘çmendura’ pas golave në ndeshjen e kombëtares së Kosovës ndaj Sllovakisë.

    Kombëtarja e Kosovës mposhti Sllovakinë në udhëtim me rezultat 4-3 duke siguruar finalen e madhe për kualifikim në Kupën e Botës 2026.

    Në këtë finale të ‘play-off’-it, “Dardanët” do të luajnë ndaj Turqisë në stadiumin Fadil Vokrri, të martën, më 31 mars, nga ora 20:45.

    Megjithatë, fitorja e Kosovës ishte për infarkt pasi gjatë pjesës së parë dy herë ishin në disavanazh dhe 45 minutat e parë u mbyllen me rezultat 2-1 në favor të vendasve.

    Se barazimi i rezultatit në të dy rastet dhe dy golat tjerë të epërsisë ishin plot emocion këtë e tregon edhe reagimi i komentarit kosovar të Art Sport, Engjëll Bërbatovci.

    Edhe pse në komentim ishte në ndeshjen mes Danimarkës dhe Maqedonisë së Veriut, Bërbatovci kishte lënë një ekran ku shikonte edhe rezultatin apo ndeshjen e Kosovës, duke bërë që reagimet e tij të ishin thjeshtë të çmendura.

    “Zemra gati më doli nga vendi gjatë komentimit të ndeshjes Danimarka – Maqedonia e Veriut… duke e përcjellë Kosovën. Me falet nëse është dëgjuar adrenalina në mikrofon”, ka shkruar Bërbatovci në postimin përkrah videos.

    Video e postuar nga Bërbatovci është bërë shpejt virale në mediat botërore, duke u postuar në masë të madhe dhe duke u komentuar për reagimet e tij.

  • A do ta ndryshojë Erdogan agjendën për ta ndjekur ndeshjen Kosovë – Turqi në Prishtinë?

    A do ta ndryshojë Erdogan agjendën për ta ndjekur ndeshjen Kosovë – Turqi në Prishtinë?

    Presidenti I Turqisë, Recep Tayip Erdogan i ka uruar futbollistët e kombëtares së vendit të tij për kualifikim në finalen e play-offit të eliminatoreve evropiane për Kupën e Botës FIFA 2026.

    Në një bisedë telefonike me Ministrin e sportit, Osman Aşkın Bak, Presidentin e Federatës Turke të Futbollit, İbrahim Ethem Hacıosmanoğlu, trajnerin e Kombëtares A, Vincenzo Montella, si dhe me futbollistët e ekipit kombëtar, ai u uroi atyre sukses në përballjen me Kosovën, që do të zhvillohet më 31 mars në Prishtinë.

    Meqenëse edhe Turqia edhe Kosova i kaluan sfidat tek të enjten mbrëma, ende nuk ka një vendim final nëse Erdogan edhe personalisht do të jetë i pranishëm në këtë përballje me vendin mik e vlla siç e kishte quajtur Kosovën në disa raste.

    Burime të KosovaPress brenda kabinetit të presidentit turk, bën me dije se pikërisht për ditën e martë ai ka agjendë të paracaktuar, dhe se një vendim eventual për ndryshimin e saj nuk ka mundësi të merret para të dielës.

    Erdogan e kishte vizituar Kosovën në dy raste – më 2010 dhe 2013. Herën e parë, i shoqëruar nga atëbotë kryeministri Hashim Thaçi i kishte vizituar edhe disa xhami, derisa në të dytën, poashtu me Thaçin si nikoqir, mori pjesë në inaugururimin e zgjerimit të Aeroportit Ndërkombëtar “Adem Jashari”. Gjatë kësaj vizite edhe e pati dhënë deklaratën: “Kosova është Turqi, Turqia është Kosovë”, si shprehje e miqësisë mes dy shteteve dhe popujve.

  • “Kryeministër qiti paret”, Peci: Ngacmimi i Përparim Ramës ishte në frymën e festës

    “Kryeministër qiti paret”, Peci: Ngacmimi i Përparim Ramës ishte në frymën e festës

    Kryetari i Komunës së Mitrovicës së Jugut, Faton Peci ishte në lidhje direkte sot në emisionin Kosova Live në T7.

    Peci ishte i pranishëm në stadium për ndeshjen Sllovaki – Kosovë dhe ndau momente nga festa e madhe dhe emocionet që përjetuan ata nga afër.

    E një postim i kryetarit të Prishtinës, Përparim Rama në rrjete sociale pati reagime të shumta.

    Ai publikoi foto me zyrtarët shtetërorë duke shkruar: Qiti paret kryeministër, teksa iu referua premisë prej 500 mijë eurosh që Qeveria e Kosovës kishte premtuar për “Dardanët” në rast se e kalojnë Sllovakinë.

    Lidhur me këtë çështje, i pari i Mitrovicës së Jugut tha se ngacmimi i Ramës ishte në frymën e festës.