Author: K.B.

Kryetari i Rahovecit, Smajl Latifi, ka përkujtuar 27-vjetorin e Masakrës së Pastaselit, duke e cilësuar atë si një nga krimet më të rënda të kryera gjatë luftës në Kosovë.

Në një postim në Facebook, Latifi rikujtoi se më 31 mars 1999, në fshatin Pastasel u vranë 106 civilë të paarmatosur, përfshirë fëmijë, gra dhe të moshuar.

“Në ditën e fundit të marsit të përgjakur të vitit 1999, ndodhi një prej krimeve më mizore nga kriminelët serbë në fshatin Pastasel të Rahovecit, ku u vranë 106 fëmijë, gra, pleq e burra të paarmatosur”, ka shkruar Latifi.

Ai theksoi se në këtë fshat kishin gjetur strehim edhe banorë nga zona të tjera përreth, të cilët po përpiqeshin t’i shpëtonin dhunës së luftës.

“Banorë të Pastaselit, por edhe të fshatrave përreth, kishin gjetur vendstrehim në fshat për të shpëtuar veten dhe familjet e tyre nga krimet gjenocidiale serbe”, ka deklaruar ai.

Kryetari i Rahovecit nënvizoi se kjo ngjarje mbetet e paharrueshme dhe se kërkimi i drejtësisë për viktimat është obligim i vazhdueshëm institucional dhe shoqëror.

“Ajo ditë e përgjakshme do të mbetet e pashlyer në kujtesën tonë. Drejtësia dhe dënimi i krimeve të 31 marsit 1999 do të jetë qëllimi ynë kryesor deri në realizim”, ka shtuar Latifi.

Ai e ka përmbyllur mesazhin me nderime për të gjithë të rënët gjatë luftës në Kosovë.

“Lavdi e përjetshme të gjithë të rënëve të luftës”, ka përfunduar Latifi.

Ditë më parë u raportua për tensione ndërmjet kryeministrit Edi Rama dhe deputetes së Partisë Socialiste, Elisa Spiropali e cila javë më parë u lirua nga detyra e ministres së Punëve të Jashtme.

Mediat në Shqipëri patën raportuar se ka pasur një moment, ku Rama i është drejtuar Spiropalit me fjalinë “Mos më provoko se do të nxjerr jashtë”.

“Mos më provoko se do të nxjerr jashtë”, tensione mes Ramës e Spiropalit në mbledhjen me dyer të mbyllura

E në tërë këtë proces, sot ka reaguar ish ministrja Spiropali, e cila ka thënë se heshtja e saj nuk është mungesë përgjigjeje.

Sipas saj, ajo që po ndodh nuk është thjesht një çështje personale, por një shfaqje e një modeli që po zgjerohet me një normalitet të heshtur, ku arroganca dhe abuzimi nuk paraqiten më si devijime, por si forma të pranueshme shoqërore.

Lexoni të plotë postimin e Spiropalit:

Ka ditë që në emisione dhe forume flasin për mua, me një siguri që shpesh nuk vjen nga njohja, por nga nevoja për ta mbushur boshllëkun me versione. Zërat shtohen, interpretimet shumëfishohen, ndërsa ajo që mungon është qetësia për të kuptuar se jo çdo gjë që ndodh kërkon një rrëfim të menjëhershëm publik.

Heshtja ime nuk është mungesë përgjigjeje, është një kufi i vendosur mes asaj që duhet thënë dhe asaj që duhet kuptuar, sepse në një kohë kur gjithçka kërkon të shpjegohet, rrezikojmë të humbasim kuptimin e vetë përgjegjësisë.

Ajo që po ndodh nuk është thjesht një çështje personale, por një shfaqje e një modeli që po zgjerohet me një normalitet të heshtur, ku arroganca dhe abuzimi nuk paraqiten më si devijime, por si forma të pranueshme shoqërore.

Ky model nuk imponon vetëm vendime, por ndërton një kulturë ku bindja konsiderohet virtyt dhe përshtatja shpërblehet më shumë se merita, duke e zhvendosur gradualisht politikën nga një hapësirë e konkurrencës së ideve në një strukturë të mbyllur ku rëndësi ka sa përshtatesh, jo sa vlen.

Në këtë rrjedhë, fitorja fillon të humbasë përmbajtjen e saj morale dhe reduktohet në rezultat, ndërsa besimi që e legjitimon atë dobësohet në mënyrë të padukshme. Dhe kur iluzioni zëvendëson reflektimin, atëherë edhe dinjiteti fillon të trajtohet si një element i negociueshëm, i varur nga momenti dhe nga pozicioni, jo si një vlerë që qëndron përtej pushtetit.

Këtu fillon edhe heshtja e debatit, jo si mungesë mendimesh, por si mungesë hapësire për t’i vënë në jetë. Sepse debati nuk zhduket, ai shtypet, dhe kur shtypet, nuk krijon qetësi, por grumbullim të padukshëm tensioni. Dhe pikërisht aty ku debati zëvendësohet nga dakordësia e heshtur, meritokracia fillon të përmendet si parim, por nuk funksionon më si praktikë, sepse ajo kërkon një drejtësi që nuk pranon kompromise me rehatinë e pushtetit.

Në këtë klimë, frika nuk ka nevojë të shpallet për të ekzistuar, ajo ndihet, shpërndahet në mënyrë të heshtur dhe bëhet pjesë e një rendi të ri ku njerëzit mësohen të masin fjalët, jo për nga vërtetësia, por për nga pasojat. Dhe kur kjo ndodh, liria humbet karakterin e saj si ushtrim i përditshëm dhe reduktohet në një dëshirë që përmendet më shumë sesa praktikohet. Kjo është ndoshta forma më e rafinuar e kufizimit, kur liria nuk ndalohet, por zbehet.

Ndërkohë, Evropa mbetet referencë e përhershme në diskurs, një fjalë që përdoret për të legjitimuar çdo drejtim.

Evropa nuk është një narrativë për t’u cituar, por një rend vlerash që kërkon përputhje, dhe çdo distancë mes fjalës dhe praktikës e bën këtë referencë të zbrazët. Në këtë pikë, politika përballet me një pyetje që nuk mund ta shmangë: a jemi duke ndërtuar një sistem që prodhon përgjegjësi apo një sistem që e justifikon dhe riprodhon veten?

Fitorja nuk merret, ajo provohet.

Meritohet kur njerëzit nuk të ndjekin nga frika, por të besojnë nga bindja, dhe kur largohesh, mbetet respekti, jo vetëm rezultati.

Prandaj, nuk kam folur për veten, sepse kjo nuk është një histori që fillon dhe mbaron me një individ. Është një pasqyrë e një kohe që kërkon më shumë reflektim se reagim. Dhe ndoshta, në një moment kur gjithçka kërkon zë, heshtja bëhet forma më e fortë e fjalës, sepse ajo nuk i nënshtrohet menjëhershmërisë, por i jep kohë të vërtetës të marrë formë.

Partia Demokratike e Kosovës i ka bërë thirrje presidentes, Vjosa Osmani, që pa humbur kohë ta emërojë anëtarin e dytë të PDK-së në KQZ, Rashit Qalaj. Kërkesa e PDK-së vjen pas vendimit te Gjykates Kushtetuese e cila shpalli të papranueshme kërkesën e presidentes Osmani për sqarimin lidhur me çështjen e emërimit të anëtarëve të KQZ-së.

Sekretari për Anëtarësi dhe Financa në PDK, Betim Gjoshi, tha për RTV21 se kërkesa e Osmanit në Kushtetuese ka qenë e panevojshme meqë ndarja e mandateve në KQZ është më se e qartë.

“Kërkesa e presidentes Osmani ka qenë e panevojshme, në vitin 2021 për njëjtën çështje i është drejtuar gjykatës dhe ka pasur pegjigje si dhe ka qenë e panevojshme edhe për shkak të konfigurimit të kuvendit i cili përafërisht ngjashëm si 2021 VV kishte 58 sot 57 PDK kishte 19 sot ka 22 edhe Osmani në atë kohë na kishte dhënë dy mandate neve dy VV-së ashtu siç e thotë edhe kushtetuta. Ne presim qe ajo sa më shpejtë ta emëroj anëtarin PDK z. Qalaj i cili i plotëson të gjitha kriteret…Nëse shikojmë praktikën deri më tani dhe lexojmë kushetutën drejt, mandati i takon PDK-së. Nuk ndahen mandatet në baza të asaj se sa mandate ke në Kuvend por ndahen duke marrë përbazë nenin 139 kushteutës dhe Ligjin për zgjedhjet dhe presim që znj Osmani, i bëjmë thirrje që sot pa humbur kohë ta emëroj anëtarin e PDK-së”, tha Gjoshi për RTV21.

Afati për deklarimin e pasurisë nga zyrtarët publik po i afrohet fundit, ndërsa drejtori i Agjencisë për Parandalimin e Korrupsionit, Yll Buleshkaj, bën të ditur se mbi 90% e zyrtarëve tashmë e kanë përmbushur këtë obligim, por paralajmëron gjoba për ata që nuk e respektojnë afatin.

Në një intervistë Buleshkaj theksoi se afati i fundit për deklarimin e pasurisë përfundon sot në orën 23:59.

“Shumica dërrmuese e zyrtarëve, mbi 9 mijë, kanë deklaruar pasurinë tashmë. Janë mbi 90% e zyrtarëve që e kanë përfunduar këtë proces. I kemi mbi 400 të cilët ende nuk kanë filluar deklarimin e pasurisë dhe i kemi 530 të cilët janë në përfundim të deklarimit të pasurisë. Do të thotë jemi në 900-shin e fundit të deklarimit të pasurisë.

Po ashtu edhe afati i deklarimit të pasurisë është në fund. Kanë mbetur tashmë vetëm edhe 12-13 orë për ta deklaruar pasurinë sepse mbyllet si afat në mesnatë, do të thotë në orën 23:59:59 sekonda mbyllet sistemi. Dhe si i tillë, secili që vonohet edhe një minutë pas mesnate, kualifikohet për të pranuar një gjobë e cila është 30% e pagës mujore të atij zyrtari”, tha ai.

Buleshkaj, kritikoi praktikën e lënies së deklarimit për momentet e fundit nga një pjesë e zyrtarëve.

“Edhe kësaj radhe, ngjashëm me radhët e kaluara, kemi numër goxha të madh të zyrtarëve që e kanë lënë deklarimin e pasurisë për momentet e fundit, e që nuk është një praktikë shumë e mirë. Sidomos për ata që mund të kenë diçka të paqartë në proces dhe kanë nevojë të konsultohen me Agjencinë. Ne kemi numër të vogël të zyrtarëve që janë të ngarkuar me punët e deklarimit të pasurisë dhe ata nuk do të kenë mundësi që të pranojnë 1000 telefonata potenciale përnjëherësh.

Që nga fillimi kemi bërë thirrje që secilin zyrtar ta fillojë më herët deklarimin e pasurisë dhe ta përfundojë shumë më herët. Për më tepër, sot kemi një arsye shtesë ta kryejmë më herët sepse është një lojë futbollistike shumë e rëndësishme ku shumica e qytetarëve të Kosovës janë të interesuar ta përcjellin. Ajo zgjat afërsisht deri në fund të afatit dhe ka shumë mundësi që t’ju kalojë afati zyrtarëve të caktuar dhe të kualifikohen, siç e përmenda më herët, për gjobë”, u shpreh ai.

Ai u bëri thirrje zyrtarëve që ta përfundojnë sa më shpejt këtë obligim dhe të kërkojnë ndihmë në rast nevoje.

“Kështu që edhe njëherë u bëjmë thirrje që të gjithë ta kryejnë obligimin sa më herët që është e mundur gjatë ditës. Në qoftë se kanë pyetje për Agjencinë, t’i adresohen përmes numrave të cilët tashmë ata i kanë dhe i dinë. Për më tepër ka edhe email, përmes të cilit do të tentojmë t’ju kthejmë përgjigje të gjithë atyre që kanë ndonjë pyetje. Sistemi është funksional, duhet ta theksoj, është goxha intuitiv, është i sigurt dhe të gjithë ata mund ta kryejnë obligimin në kohë. Kushdo që ka harruar fjalëkalimin mund ta resetojë fjalëkalimin e tyre, është një procedurë mjaft e thjeshtë duke i vendosur kredencialet që janë numri personal dhe emaili kontaktues i cili është përdorur për deklarimin e pasurisë. Si të tillë, janë hapa tepër të lehtë”, thotë ai.

Buleshkaj nënvizoi se procesi i deklarimit është i thjeshtë dhe kërkon pak kohë për shumicën e zyrtarëve.

“Deklarimi i pasurisë, për kushdo që s’ka pasur dallim të madh në këto vitet e fundit apo nga viti i kaluar deri në këtë vit, është çështje minutash për ta kryer obligimin sepse të gjitha të dhënat e herës së kaluar tashmë janë në sistem, vetëm kanë nevojë t’i përditësojnë ato. Për shembull, në qoftë se dikush nuk ka pasuri të paluajtshme shtesë (apartamente, tokë, etj.), nuk ka nevojë t’i prekë fare, thjesht i kalon si hapa. Në qoftë se ka vetëm dallim në të hyra, i ndryshon vetëm të hyrat dhe mund ta dërgojë të gjithë regjistrin për një kohë shumë të shkurtër, çështje minutash. Këtu po flas nga përvoja ime sepse edhe të gjithë zyrtarët e Agjencisë janë subjekte deklaruese dhe ne të gjithë e kemi kryer deklarimin e pasurisë. Për mua, për shembull, ka marrë disa minuta si proces dhe ka qenë shumë lehtë për t’u përfunduar”, thekson Buleshkaj.

Ai shpjegoi se gjobat për mosdeklarim janë të shkallëzuara në bazë të pagës së zyrtarëve.

“Ligji e ka paraparë që gjoba, e cila shqiptohet në mënyrë mandatore nga Agjencia, të jetë e shkallëzuar varësisht nga paga që pranon zyrtari. Në qoftë se një zyrtar e ka një pagë më të lartë, për shembull 1500 euro, gjoba për të është rreth 500 euro. Për dikë tjetër që e ka më të vogël, në qoftë se është po thojmë 1000 euro, gjoba do të jetë 300 euro. Do të thotë është e shkallëzuar varësisht, është në bazë të pagës, jo pagës mesatare, por pagës reale që zyrtari pranon në bazë mujore. Ata që kanë paga më të vogla, normal që kanë edhe gjobë më të vogël. Por, sidoqoftë, çfarëdo gjobë që pranohet, duke pasur parasysh që edhe në sektorin publik nuk ka pagë më të vogël se po besoj rreth 500 euro, gjoba minimale do të jetë mbi 150 euro, që është shumë goxha e madhe dhe substanciale për secilin qytetar të Kosovës, për më tepër në kohën kur edhe çmimet nuk janë duke u zbritur por janë duke u ngritur në mënyrë të vazhdueshme”, thotë drejtori.

Buleshkaj paralajmëroi edhe pasoja më të rënda në rast të mosrespektimit të afateve edhe pas gjobës fillestare.

“Po flasim tashmë për afatin e parë, do të thotë për të gjithë ata që deklarimin e bëjnë pas 1 prillit. Secili zyrtar publik i cili është i obliguar ta kryejë këtë deklarim dhe nuk e kryen, për 15-ditëshin e parë pason gjoba (30% e pagës). Në qoftë se vonohet më shumë se 15 ditë pas afatit, atëherë përveç gjobës bëhet edhe subjekt i hetimit penal. Të gjitha këto raste Agjencia i përcjell në prokurori, pastaj prokuroria mund të ngritë aktakuzë për mosdeklarim të pasurisë në kohë, e cila sipas ligjit tonë po ashtu edhe Kodit Penal, dënohet edhe me gjobë edhe me burg deri në (në qoftë se nuk gaboj) deri në 5 vite për mosdeklarim të pasurisë. Po ashtu edhe gjobat mund të jenë jo tashmë vetëm 30% e pagës, por janë edhe më të mëdha”, shtoi Bukeshkaj.

Në Pastasellë të Rahovecit, kryetari i AAK-së, Ramush Haradinaj së bashku me Smajl Latifin, familjarë dhe bashkëpunëtorë nderuan kujtimin e 106 martirëve të ekzekutuar nga ky fshat dhe nga fshatrat përreth, të strehuar aty për t’i shpëtuar barbarisë së armikut.

Të njëjtin fat e patën edhe 42 shqiptarë të pafajshëm nga fshati Burim i Malishevës.

Përmes një postimi në Facebook, Haradinaj thotë se plumbat e armikut nuk kursyen të moshuarit, as gratë e fëmijët, duke lënë plagë të thella për familjet e tyre.

“Jetojmë çdo ditë me lavdinë e të rënëve dhe me sakrificën që forcoi rrugën tonë drejt lirisë. Kujtimi për ta mbetet i përhershëm, ndërsa detyrimi ynë është ta mbrojmë dhe ta forcojmë Kosovën, për të cilën ata dhanë jetën”, ka shkruar Haradinaj.

Ministri për Evropën dhe Punët e Jashtme i Shqipërisë, Ferit Hoxha, zhvilloi një bashkëbisedim me studentë të Akademisë Diplomatike të Vjenës, në ambientet e Ministrisë për Evropën dhe Punët e Jashtme.

Takimi u karakterizua nga një shkëmbim i hapur dhe i frytshëm mbi sfidat dhe transformimet që po përjeton diplomacia në një kontekst të ri gjeopolitik, gjithnjë e më kompleks dhe dinamik, shkruan Tvklan.al.

Në qendër të diskutimeve ishte rrugëtimi evropian i Shqipërisë, përfshirë progresin e arritur në reformat kyçe, ecurinë e procesit të negociatave për anëtarësim dhe angazhimin e vazhdueshëm për të prodhuar rezultate konkrete në funksion të integrimit në Bashkimin Evropian.

Hoxha theksoi se orientimi evropian i Shqipërisë ka qenë i qartë dhe i pandryshueshëm që prej fillimit të këtij procesi: “një rilidhje e plotë dhe pa kushte me hapësirën natyrore të përkatësisë sonë – Evropën”.

“Për ne nuk ka asgjë më gjithëpërfshirëse dhe më jetike sesa procesi i anëtarësimit në Bashkimin Evropian. Në Evropë ka ndodhur një ndryshim i rëndësishëm: zgjerimi është rikthyer në qendër të vëmendjes. Sot, kushdo që flet për zgjerimin e konsideron atë një investim strategjik për të ardhmen e Evropës. Evropa është një histori zgjerimi, një histori rritjeje. Dhe nëse shpesh thuhet se Evropa do të zgjerohet kur të vijë koha e duhur, për ne kjo kohë është tani. Nuk ka arsye për vonesa”, u shpreh Hoxha.

Ai nënvizoi gjithashtu rëndësinë e bashkëpunimit dhe të përgjegjësisë së përbashkët për të çuar përpara perspektivën evropiane të vendit, duke vlerësuar njëkohësisht rolin e brezit të ri të diplomatëve në formësimin e së ardhmes së Evropës dhe të rajonit.

Ministri vlerësoi gjithashtu kontributin ndër vite të Akademisë Diplomatike të Vjenës në përgatitjen e brezave të diplomatëve, duke theksuar lidhjen e qëndrueshme të këtij institucioni me Shërbimin e Jashtëm të Shqipërisë, përmes formimit të disa prej përfaqësuesve të tij.