Author: K.B.

Komuna e Vushtrrisë ka njoftuar se janë shtyrë koncertet e parapara në kuadër të manifestimit “Ditët e Diasporës 2026”, pas vdekjes tragjike të tre bashkëqytetarëve, Ejup Tërnava, Cennet Tërnava dhe Fatmire Shabani.

Përmes një njoftimi, kryetari i Komunës së Vushtrrisë, Ferit Idrizi, bëri të ditur se ky vendim është marrë në shenjë respekti dhe solidarizimi me familjet e viktimave.

“Për shkak të ndarjes tragjike nga jeta të tre bashkëqytetarëve tanë, ju njoftojmë se anulohen koncertet e parapara në kuadër të manifestimit ‘Ditët e Diasporës 2026′”, ka shkruar Idrizi.

Ai theksoi se koncertet nuk do të mbahen sipas programit të paraparë, por do të organizohen në një datë tjetër.

“Në shenjë respekti dhe solidarizimi me familjet Tërnava dhe Shabani, koncertet do të shtyhen për një datë tjetër, për të cilën do të njoftoheni me kohë përmes kanaleve zyrtare të Komunës së Vushtrrisë”, thuhet në njoftim.

Kryetari Idrizi shprehu ngushëllime për familjet e të ndjerëve, duke shtuar se Komuna bashkëndjen me dhimbjen e tyre.

“Në këto momente të rënda, u shprehim ngushëllimet tona më të thella familjeve Tërnava dhe Shabani dhe bashkëndjejmë dhimbjen për këtë humbje të rëndë. Faleminderit për mirëkuptimin tuaj”, ka deklaruar ai.

Aleanca Kosovare e Bizneseve ka reaguar në lidhje me situatën e krijuar me fermerët e Kosovës gjatë sezonit të korrje-shirjeve, ku prodhuesit vendor po përballen me mungesë tregu, mungesë të hapësirave për deponim dhe çmime jashtëzakonisht të ulëta prej vetëm 16–18 centë për kilogram.

AKB ka thënë se fermeri ka investuar, ka punuar dhe prodhuar ndërsa në fund po përballet me pasiguri se ku do ta dorëzojë prodhimin e tij. Sipas AKB-së, kjo është një goditje për bujqësinë vendore dhe për sigurinë ushqimore të Kosovës.

“AKB rikujton se çështja e blerjes së grurit për rezervat shtetërore nga importi ka qenë objekt i hetimeve nga Prokuroria Speciale e Kosovës dhe Gjykata Themelore ka konfirmuar aktakuzën ndaj ish-ministres së Industrisë, Ndërmarrësisë dhe Tregtisë, Rozeta Hajdari, dhe disa zyrtarëve të tjerë të MINT-it lidhur me rastin e rezervave shtetërore. Sipas raportimeve për aktakuzën e këtij rasti, janë ngritur dyshime lidhur me blerjen e grurit për rezervat shtetërore me çmime të larta krahasuar me tregun dhe me pasoja të pretenduara për buxhetin e shtetit. AKB thekson se sot, se nuk duhen të përsëriten praktika ku shteti mbështetet në import, duhet të krijohet një mekanizëm që rezervat shtetërore të furnizohen nga prodhuesit vendorë”, thuhet në reagim.

Ata kanë thënë nëse para 3-4 viteve, gruri për rezerva shtetërore është blerë nga Turqia për 0.47 euro për kilogram, sipas tij duhet që këtë vit shteti ta blejë grurin nga fermerët kosovarë që po e shesin me 16-18 centë për kilogram.

Sipas AKB-së, kjo do të sillte tri përfitime të mëdha ,do t’i mbështeste drejtpërdrejt fermerët vendorë, do ta forconte sigurinë ushqimore të Kosovës dhe do të kursente mjete të konsiderueshme nga buxheti i shtetit.

“Kryetari i AKB-së, Agim Shahini, deklaroi se Kosova nuk duhet të importojë atë që fermeri ynë e prodhon me mund dhe sakrificë. Rezervat shtetërore duhet të jenë mbështetje për ekonominë vendore, jo vetëm një proces blerjeje. Nëse shteti ka nevojë për grurë për rezervat strategjike, zgjidhja më e drejtë ekonomike është ta blejë atë nga fermerët tanë. Kjo është në interes të buxhetit, prodhuesve dhe qytetarëve të Kosovës. AKB kërkon nga institucionet përgjegjëse që urgjentisht të ndërmarrin masa për grumbullimin e grurit vendor, krijimin e kapaciteteve depozituese dhe garantimin e një tregu të qëndrueshëm për prodhuesit kosovarë”, thuhet ndër të tjera në reagim.

Policia Rajonale e Ferizajt i ka bërë thirrje qytetarëve që të tregojnë kujdes dhe përgjegjësi maksimale për parandalimin e zjarreve, veçanërisht gjatë ditëve me temperatura të larta dhe kushteve të favorshme për përhapjen e tyre.

Sipas Policisë, çdo zjarr, qoftë i shkaktuar me dashje apo nga pakujdesia, mund të rrezikojë jetën e njerëzve, të shkaktojë dëme materiale dhe të dëmtojë mjedisin.

Policia ka kërkuar që të shmanget djegia e mbeturinave, barit të thatë, sipërfaqeve bujqësore dhe pyjore, si dhe çdo veprim tjetër që mund të çojë në shkaktimin e zjarreve.

“Policia Rajonale e Ferizajt do të ndërmarrë të gjitha veprimet e nevojshme ligjore ndaj çdo personi që shkakton zjarr, me dashje ose nga neglizhenca. Ftojmë qytetarët të bashkëpunojnë me policinë dhe të raportojnë çdo rast të dyshuar të zjarrvënies apo çdo situatë që mund të paraqesë rrezik”, thuhet nga Policia.

Ministria e Industrisë, Ndërmarrësisë, Tregtisë dhe Industrisë ka publikuar çmimet e derivateve për 24 orët e ardhshme.

Sipas MINT, çmimi për një litër naftë sot është 1 euro e 64 centë, më shtrenjtë se dje, ndërsa benzina 1 euro e 46 centë.

Gasi do të shitet me çmim 0.60 euro për litër.

Një shtetas i huaj është gjetur pa shenja jete në Liqenin e Batllavës, pas një operacioni kërkim-shpëtimi të zhvilluar nga Forca e Sigurisë së Kosovës (FSK).

Sipas njoftimit të Policisë së Kosovës, rasti është raportuar më 19 korrik 2026, rreth orës 17:30, pasi Njësia e Zhytësve e FSK-së ka lokalizuar trupin e pajetë të viktimës.

Ndërkaq, FSK ka bërë të ditur se, pas marrjes së informacionit nga Qendra e Situatave e Republikës së Kosovës, ka angazhuar menjëherë Ekipin e Kërkim-Shpëtimit në operacionin e zhvilluar në Liqenin e Batllavës.

Sipas FSK-së, pas intervenimit në orët e vona, ekipi ka arritur ta gjejë trupin e pajetë të personit me inicialet A.A., shtetas i huaj, i cili më pas u është dorëzuar autoriteteve kompetente për procedurat e mëtejme.

Me vendim të prokurorit, trupi i pajetë është dërguar në Institutin e Mjekësisë Ligjore (IML) për obduksion.

Policia ka bërë të ditur se rasti është iniciuar si “Hetim mbi vdekjen”, ndërsa hetimet për zbardhjen e rrethanave të ngjarjes janë në vazhdim.

Sipas të dhënave të fundit nga Qendra Kombëtare për Menaxhim Kufitar, në shumicën e pikave kufitare në Kosovë qarkullimi po zhvillohet normalisht, me pritje prej 1 deri në 10 minutash dhe pa kolona në hyrje apo dalje

Pika kufitare Dheu i Bardhë paraqet vonesën më të madhe, ku për automjetet në dalje pritja është rreth 10 minuta, ndërsa është krijuar një kolonë prej rreth 30 metrash

Në të gjitha pikat e tjera kufitare, përfshirë Bërnjakun, Jarinjën, Hanin e Elezit, Merdarën, Qafën e Morinës dhe Vermicën, pritjet janë minimale dhe nuk raportohet për kolona.

Të dhënat janë përditësuar më 20 korrik 2026, në ora 07:54.

Në Gjykatën Themelore në Prishtinë, mbahet sot seanca e shqyrtimit fillestar në çështjen penale ndaj 21 të pandehurve, të akuzuar për krime lufte kundër popullsisë civile.

Sipas njoftimit të gjykatës në Facebook, bëhet fjalë për aktakuzën e ngritur nga Prokuroria Speciale e Republikës së Kosovës, ndaj të pandehurve të cilët akuzohen për veprën penale “Krime lufte kundër popullsisë civile”.

Me propozim të Prokurorisë Speciale, gjykimi në këtë rast pritet të zhvillohet në mungesë të të akuzuarve, pasi ata kanë qenë të paarritshëm deri në momentin e ngritjes së aktakuzës.

Gjykata u ka bërë thirrje të pandehurve që të paraqiten dhe të dorëzohen para organeve të drejtësisë në Kosovë, ndërsa personave që kanë informacione për vendndodhjen e tyre u është kërkuar që t’i raportojnë ato në Policinë e Kosovës ose te organet kompetente.

“Sipas propozimit të Prokurorisë Speciale të Republikës së Kosovës, gjykimi në këtë çështje do të.Gjithashtu, u bëhet thirrje të gjithë personave që posedojnë informacione relevante lidhur me vendndodhjen e të akuzuarve, që t’i komunikojnë këto informacione Policisë së Kosovës apo organeve tjera kompetente”, thuhet në komunikatë.