Author: K.B.

Deputeti i LDK-së, Lutfi Haziri ka folur rreth procesit të zgjedhjes së presidentit të ri të Kosovës.

Haziri tha se Kosova tash e një kohë është në një krizë të brendshme politike.

“Jemi në krizë të brendshme, jemi mbyllur në krizën e brendshme politike. E dimë që jemi në orët e fundit të mandatit të presidentes së Republikës së Kosovës dhe fillimit të krizës së re për zgjedhjen e presidentit e cila ka me prekë edhe ekzekutivin edhe jetën e qytetarëve”, tha Haziri në Klan Kosova.

Tutje, ai tha se synimi i Lëvizjes Vetëvendosje që nga viti i kaluar ishte që në vendin e ushtruesit të detyrës së presidentit të vendit të caktohej një përfaqësues nga kjo parti.

“Prej 9 shkurtit është synuar ushtrimi i detryës me një përfaqësues të Vetëvendosjes në Presidencë, ky ka qenë synim që tash po del, po faktohet. Kriza e vitit të kaluar me zgjedhjen e kryetares e cila arriti me u zgjedh me një proces të ri zgjedhor përmes 28 dhjetorit dhe synimi ka qenë që në këtë kohë kur të vjen, kur të mungon Vjosa Osmani, Albulena Haxhiu me ushtru detyrën e presidentes dhe me menaxhu një proces të caktuar”.

Haziri tha se Lidhja Demokratike e Kosovës ishte shprehur e hapur për bashkëpunim, megjithatë sipas tij Kurti nuk kishte folur asnjëherë për emër të përveçëm për çështjen e presidentit.

“Tani ne jemi ofru me bashkëpunu si LDK në procese politike, me ne Kurti nuk ka folur asnjëherë për emra të përveçëm për president dhe nuk ka fol asnjëherë për ndarjen e ekzekutivit. Ne kemi ndërtu bashkëpunim për proces politik në rastin e zgjedhjes së presidentit në kalendarin që Kurti e ka imponu.
Në fund, Haziri konfirmoi se kryetari i LDK-së, Lumir Abdixhiku do të takohet të hënën me kryeministrin e vendit për të diskutuar rreth kësaj çështje.

“Jemi në një rrethanë kur të hënën e ardhshme Abdixhiku do të takohet paradite me Kurtin për të bisedu për procesin e ri për rifillimin e procesit për zgjedhjen e presidentit të vendit”,tha ai.

Presidenti amerikan, Donald Trump, ka shkarkuar Prokuroren e Përgjithshme të vendit, Pam Bondi.

Përmes një njoftimi të shkurtër, Trump njoftoi fundin e mandatit 14-mujor të një prej aleateve të tij më të ngushta, duke cituar nevojën për një “drejtim të ri” në Departamentin e Drejtësisë (DOJ).

Sipas një analize të detajuar nga The Economist, rënia e Bondit erdhi si pasojë e disa faktorëve kyç që “gërryen” besimin e Shtëpisë së Bardhë:

Ndonëse Bondi nisi një fushatë agresive për të hetuar rivalët politikë të Trumpit (të ashtuquajturin “Deep State”), ajo dështoi të siguronte dënime në gjykatë.

Kjo vonesë ‘irritoi’ presidentin, i cili kërkonte “fitore” të shpejta dhe goditëse.

Menaxhimi i dokumenteve sekrete të Jeffrey Epstein gjithashtu rezultoi fatal.

Gabimet teknike që nxorën zbuluar emrat e viktimave dhe akuzat për fshehje dokumentesh nxitën një revoltë të papritur edhe brenda bazës mbështetëse të Trumpit.

Gjatë vitit të kaluar, Bondi udhëhoqi spastrimet më të mëdha në historinë e DOJ, duke larguar qindra prokurorë. Ky destabilizim, në fund, e la atë pa mbrojtje dhe pa një strukturë efikase për të kryer urdhrat e Shtëpisë së Bardhë.

Analistët e shohin largimin e saj si një mesazh të qartë: në administratën aktuale, besnikëria absolute është vetëm pika e nisjes.

Pa rezultate politike të prekshme dhe pa aftësinë për të menaxhuar krizat, asnjë bashkëpunëtor nuk konsiderohet i paprekshëm.

Nëpërmjet një letre publike, historianë dhe albanologë ndërkombëtarë i kanë bërë apel Prokurorisë Speciale të Kosovës që të ndalë hetimet për Shkëlzen Gashin, autorin e ekspozitës që shpërfaqi të dhëna të pasakta për masakrat në Kosovë javën e shkuar.

Florian Bieber, Konrad Clewing, Krisztián Csaplár-Degovics, Sir Noel Malcolm, Robert Pichler, Albert Ramaj e Oliver Jens Schmitt, kanë thënë se nuk është normale që cilësia e një pune shkencore, bashkë me dobësitë e mundshme apo reale, të bëhet shkak për ndjekje penale nga shteti dhe se procese të tilla ndodhin zakonisht në shtete autoritare ose në demokraci të dobëta dhe të rrezikuara.

Ata i kanë bërë thirrje edhe opinionit publik që debatet historike të zhvillohen me më shumë maturi dhe qetësi.

Letra e plotë:

Apel drejtuar Prokurorisë Speciale të Republikës së Kosovës dhe opinionit publik në Kosovë

Si studiues që veprojmë jashtë vendit, ne, nënshkruesit, qëmoti merremi me tema historike që lidhen me Kosovën. Ndihemi gjithashtu ngushtë të lidhur me vendin e sotëm. Me kënaqësi kemi mundur të vëzhgojmë se si, paralelisht me lirinë e fituar në vitin 1999, edhe demokracia në Kosovë është konsoliduar gjithnjë e më shumë. Deri më sot, kultura e saj demokratike dallohet në mënyrë pozitive nga situata në shtetet fqinje, ku polarizimi politik përshkon të gjitha temat.

Megjithatë, zhvillimet aktuale të drejtësisë në lidhje me një debat që në thelb duhet të zhvillohet në mënyrë shkencore, na japin arsye për shqetësim të madh. Siç dihet, më 30 mars 2026, Prokuroria Speciale e Republikës së Kosovës ka nisur hetime penale kundër përgjegjësit të një ekspozite, në qendër të së cilës qëndrojnë krimet e rënda të luftës të kryera nga forcat serbe në Kosovë në vitet 1998 dhe 1999. I dyshuari, pas një kontrolli në shtëpi, është marrë në pyetje për orë të tëra, ndërsa telefoni dhe kompjuteri i tij janë konfiskuar. Dyshimi fillestar i Prokurorisë Speciale lidhet me veprën penale “Nxitja e përçarjes dhe mosdurimit”.

Shqetësimi ynë nuk është i kufizuar vetëm te pasojat për autorin Shkëlzen Gashi. Shqetësimi ynë themelor ka të bëjë me dëmin që mund t’u shkaktohet kushteve strukturore hulumtuese për studiuesit, shtetit ligjor dhe kulturës së debatit demokratik në Kosovë.

Ky apel nuk synon të bëjë një analizë të detajuar të përparësive apo dobësive shkencore të librit të Shkëlzen Gashit apo me cilësinë e teksteve të ekspozitës (të cilat, siç ndodh me shumicën e lexuesve, i njohim vetëm në fragmente përmes raportimeve mediatike). Megjithatë, në punën shkencore është krejtësisht normale që, së pari, terminologjia edhe e pjesëve të veçanta të një teksti të jenë të kritikueshme dhe, së dyti, që autori – në rastin ideal – të reflektojë mbi semantikën e vet si pasojë e kësaj kritike. Pikërisht siç duket se po ndodh në rastin konkret.

Në të kundërtën, në demokracitë evropiane nuk është aspak normale që cilësia e një pune shkencore, bashkë me dobësitë e saj të mundshme apo reale, të bëhet shkak për ndjekje penale nga shteti. Duhet të na shqetësojë të gjithëve fakti që procese të tilla ndodhin zakonisht në shtete autoritare ose në demokraci të dobëta dhe të rrezikuara. Edhe një rast i vetëm mund të krijojë një precedent shkatërrues për marrëdhënien ndërmjet shkencës dhe shoqërisë. Dhe më keq akoma: mund të dobësojë në mënyrë thelbësore rendin demokratik të një vendi.

Prandaj, ne i bëjmë thirrje opinionit publik në Kosovë që debatet historike shkencore, edhe kur bëhet fjalë për tema të ndjeshme, të zhvillohen sa më me maturi dhe qetësi. Polarizimi partiak, siç ekziston tashmë në vendet fqinje, paraqet rrezik për demokracinë e Kosovës edhe në këtë nivel. Gjithashtu, u bëjmë thirrje institucioneve të drejtësisë dhe në veçanti Prokurorisë Speciale që vlerësimin e karakterit shkencor të një vepre t’ia lërë sërish komunitetit shkencor dhe një debati të lirë. Liria e shkencës dhe liria e shprehjes janë parime themelore të domosdoshme të shtetit ligjor dhe të demokracisë. Në këtë kuptim, i bëjmë thirrje konkrete Prokurorisë Speciale të Republikës së Kosovës që të ndërpresë hetimet në lidhje me ekspozitën e ndërprerë para kohe në Prishtinë dhe autorin e saj.

3 prill 2026

Florian Bieber, Graz

Konrad Clewing, Regensburg

Krisztián Csaplár-Degovics, Budapest

Sir Noel Malcolm, Oxford

Robert Pichler, Vjenë

Albert Ramaj, St. Gallen

Oliver Jens Schmitt, Vjenë

Ushtarakët e FSK-së, gjatë stërvitjeve të rregullta zbritën nga zona malore për nderime tek dëshmorët në Kompleksin Memorial të Vrellës në Istog.

Të njëjtit, bënë homazhe dhe përkujtuan sakrificën e të rënëve për lirinë e vendit.

Ata u pritën nga kryetari i OVL UÇK – Istog, Muhamet Demaj, së bashku me bashkëluftëtarë.

Po ashtu, ata vizituan edhe nxënësit, ku zhvilluan aktivitete të përbashkëta dhe brohoritën për UÇK-në.

Në kuadër të mirëmbajtjes së kapaciteteve operacionale, kompanitë e Regjimentit të tretë të Forcave Tokësore të Forcës së Sigurisë kanë realizuar me sukses ushtrimet fushore në nivel skuadre dhe togu.

FSK njofton se stërvitjet u kryen me qëllim ngritjen e gatishmërisë operacionale dhe përgatitjes profesionale të personelit.

“Ushtrimet fushore “Kilo Mike”, “Stuhia e Marsit 2026” dhe “Sierra 26” kishin për qëllim ngritjen dhe mirëmbajtjen e kapaciteteve në Operacione të Mbështetjes Logjistike, zhvillimin e shkathtësive taktike individuale në përmbushjen e misionit, testimi i gatishmërisë fizike të personelit, përmirësimi i koordinimit ndër-njerëzor, operimi në kushte të vështira dhe reagimi ndaj kërcënimeve në terren kodrinoro-malor”.

“Këto ushtrime dëshmojnë përkushtimin e ushtarakëve në arritjen e standardeve të larta profesionale dhe operacionale, duke kontribuar drejtpërdrejt në rritjen e kapaciteteve të përgjithshme të njësive në përmbushjen e misionit”, thuhet në njoftimin e kësaj force.

Të premten një shtetas i Serbisë është shoqëruar në polici në pikën kufitare në Bërnjak.

Ai dyshohet t’i kishte ofruar ryshfet një polici në mënyrë që ta linte pasagjerin të futej me dokument me afat të skaduar.

“Me datën 03.04.2026, rreth orës 11:00, gjatë kontrollit kufitar në hyrje të Pikë Kalimit Kufitar Bërnjak, i dyshuari shtetas i Serbisë i cili po drejtonte automjetin me targa të Serbisë, i ka ofruar zyrtarit policor para, me qëllim që i njëjti të lejonte hyrjen e pasagjerit me dokument identifikues me afat të skaduar në territorin e Republikës së Kosovës, veprim ky në kundërshtim me ligjin”, thuhet në raportin e Policisë së Kosovës.

“Me veprimet e kryera personi i dyshuar ka konsumuar veprën penale ‘Dhënie e ryshfetit’, ku lidhur me rastin, personi i dyshuar është shoqëruar për intervistim pranë Drejtorisë së Krimeve Ekonomike, ndërsa me vendim të prokurorit kujdestar, kartëmonedha është konfiskuar, përderisa personi i dyshuar dërgohet në mbajtje”.

Shtëpia e Bardhë ka kërkuar 152 milionë dollarë për të rikthyer ish-ishullin e burgut të Alcatrazit në detyrë aktive, duke ndjekur thirrjen e presidentit Donald Trump vitin e kaluar për të transformuar destinacionin e njohur turistik të Gjirit të San Franciskos.

Kërkesa u përfshi në një buxhet të propozuar që Shtëpia e Bardhë publikoi për të financuar qeverinë për vitin fiskal 2027.

Kërkesa të tilla për shpenzime zakonisht trajtohen nga ligjvënësit në Kongres si sugjerime.

Bëhet e ditur se buxheti kërkon fonde për Byronë Federale të Burgjeve për të mbuluar kostot e vitit të parë të rindërtimit të Alcatrazit në “një burg të sigurt të teknologjisë së fundit”.

Ai u mbyll në vitin 1969 dhe ka qenë nën kujdesin e Shërbimit të Parqeve Kombëtare.

Në maj, Trump njoftoi se po i jepte udhëzime Byrosë së Burgjeve, Departamentit të Drejtësisë të SHBA-së dhe agjencive të tjera që të “rihapnin një Alcatraz të zgjeruar dhe të rindërtuar ndjeshëm, për të strehuar shkelësit më të pamëshirshëm dhe të dhunshëm të Amerikës”.

Alcatraz, i cili u hap në vitin 1934, ishte cilësuar si burgu më i sigurt i Amerikës, duke pasur parasysh vendndodhjen e ishullit, ujërat e ftohta dhe rrymat e forta.

Asnjë arratisje e suksesshme nuk është regjistruar zyrtarisht, megjithëse pesë të burgosur janë të listuar si “të zhdukur dhe të supozuar të mbytur”.

Një nga dy pilotët amerikanë të aeroplanit luftarak F-15 që u rrëzua në Iran është shpëtuar nga forcat amerikane, raporton NBC News.

Aeroplani u rrëzua mbi Iran më herët sot, raportuan më parë Reuters, CNN dhe media të tjera.

Një zyrtar amerikan tha se një nga pilotët e aeroplanit është shpëtuar gjallë.

Zyrtarët nuk kanë komentuar deri më tani se si u rrëzua aeroplani dhe ende ushtria amerikane nuk ka dhënë ndonjë koment.

Më parë, agjencia e lajmeve Reuters raportoi se një zyrtar amerikan tha se aeroplani ishte rrëzuar.

Incidenti shënon herën e parë që një aeroplan amerikan është rrëzuar mbi Iranin gjatë konfliktit.

Afër fillimit të luftës, tre aeroplanë F-15 u rrëzuan gabimisht në një incident zjarri miqësor nga mbrojtja ajrore e Kuvajtit.