Author: K.B.

Në ambientet e Kuvendit të Republikës së Kosovës ka përfunduar procesi i intervistimit të 22 kandidatëve për dy pozita të gjyqtarit në Gjykatën Kushtetuese, me këtë rast u rekomanduan gjashtë kandidatë për t’u votuar në Kuvend.

Pas përfundimit të intervistimit, Komisioni me rastin e poentimit vendosi t’i rekomandojë Kuvendit për votim listën prej gjashtë kandidatëve të suksesshëm si më poshtë, raporton “Betimi për Drejtësi“.

Komisioni posaçëm me këtë përbërje: Vigan Qorrolli- kryetar i Komisionit, Arbërie Nagavci- deputete e LVV-së, Arian Tahiri- deputet i PDK-së, Armend Zemaj- deputet i LDK-së, Sllavko Simiq- deputet i LS-së, Besnik Tahiri-deputet i AAK-së, Artan Asllani- deputet i Grupit Parlamentar muiltietnik, kishte konstatuar se 25 kandidatë i plotësojnë kushtet formale për kandidim.

Po ashtu, pjesë e komisionit ishin Arjeta Sadiku- zëvendëskryesuese e Këshillit Gjyqësor të Kosovës (KGJK) dhe Safet Hoxha nga Gjykata Kushtetuese.

Avokati i Popullit Naim Qelaj edhe pse ishte anëtar Komisioni, kishte munguar në shqyrtimin e aplikacioneve por edhe atë të intervistimit të kandidatëve.

Kujtojmë se në total kishin aplikuar 25 kandidatë dhe atë: Vigan Rogova, Zahir Qerkini, Besart Belegu, Makfirete Krasniqi, Selman Ymeri, Avdylkader Muçaj, Elton Tota, Benina Kusari, Ramadan Gashi, Rafet Haxhaj, Shabi Idrizi, Shpresa Emra, Valbona Shala-Thaçi, Suzana Gashi, Ardita Haxhnikaj-Demi, Novitet Nezaj, Alban Muriqi, Emine Abdyli-Pozhari, Nazmije Krasniqi- Jusufi, Perparim Kalo, Riza Krasniqi, Flamur Mrasori, Jorida Xhafaj, Islam Sllamniku dhe Bahrie Zaçaj.

Në procesin e intervistimit që u mbajt më 7 dhe 8 prill u paraqitën 22 kandidatë, duke u tërhequr nga gara: Rafet Haxhaj, Nazmije Krasniqi-Jusufi dhe Riza Krasniqi. Në fund, për votim i rekomanduan gjashtë kandidatë.

Ministri për Punë, Familje dhe Vlerat e Luftës Çlirimtare, Andin Hoti, para Komisionit për të Drejtat e Njeriut është pyetur lidhur me ekspozitën e Shkëlzen Gashit në shesh, e cila pati pasaktësi për masakrat në Kosovë.

Në këtë temë që e ngriti deputeti i LDK-së, Armend Zemaj, Hoti tha se Ministria e tij s’e kishte në mandat heqjen e ekspozitës dhe se Gashi e ka bërë këtë ekspozitë pa lejen e askujt.

“Kam dëgjuar që të dhënat faktike të kësaj ekspozite janë marrë prej një individi që quhet Shkëlzen Gashi. Shkëlzen Gashi nuk është Albin Kurti. Shkëlzen Gashi s’është këshilltari im. Jam ndër të parët që kam reaguar kur Shkëlzen Gashi i ka cenuar vlerat e UÇK-së para pesë-gjashtë viteve”.

Deputetët opozitarë, anëtarë të Komisionit, i kërkuan përgjegjësi Hotit, duke thënë se ka mekanizma në dorë.

Në përgjigje, Hoti tha: “Unë s’mund ta rrah Shkëlzen Gashin”.

“As nuk e bëj një gjë të tillë. Çka është në fushëveprimtarinë time, unë e bëj dhe është gabim kur flasim për vlerat e luftës çlirimtare ta krijojmë situatën e tillë që të bëjmë politikë për shkak se ndoshta dikush mendon që zgjedhjet janë afër dhe na vyen politika.

Ai tha se nuk ka përgjegjësi “pse del një OJQ pa leje të kërkujt me bo një aktivitet në shesh”.

“Do të kërkoj të krijohet që të hartohet një rregullore e qartë që asnjë OJQ, kur janë në pyetje vlerat çlirimtare, të mos ketë të drejtë të ekspozojë materiale pa verifikim paraprak të institucioneve të Kosovës”.

Punëtorët e Autoritetit Rajonal të Pellgjeve Lumore (ARPL) në kuadër të Ministrisë së Mjedisit dhe Planifikimit Hapësinor nuk kanë pranuar pagën e muajit paraprak ashtu siç nuk e kanë pranuar as pagën e 13-të sikurse punëtorët e sektorit publik në vend.

Lidhur me këtë çështje Ministria e Mjedisit dhe Planifikimit Hapësinor në përgjigjjen zyrtare për KlanKosova.tv tha se kjo ka ndodhur për shkak të një gabimi teknik nga Ministria e Financave gjegjësisht Divizioni i pagave.

MMPH ka kërkuar mirëkuptimin e zyrtarëve të ARPL-së, duke shtuar se kjo çështje do të rregullohet në muajin pasues pasi përgatitja e pagave për muajin mars 2026 tashmë ka përfunduar.

“Mosrealizimi i pagës së rregullt dhe pagës së 13-të për zyrtarët e ARPL-së ka ndodhur për shkak të një gabimi teknik nga Ministria e Financave gjegjësisht Divizioni i pagave këtë muaj është përballur me shumë procese shtesë (paga e 13-të, kompensime retroaktive për përvojë pune, krijimi i ministrive të reja, bartje dhe sistemim i nëpunësve), gjë që ka krijuar ngarkesë të madhe në kohë të shkurtër. Për këtë arsye, kenë ndodhur lëshime teknike dhe kërkojmë mirëkuptimin e zyrtareve të ARPL-së. Kjo do të rregullohet në muajin vijues, pasi përgatitja e pagave për muajin mars 2026 tashmë ka përfunduar”, thuhet në përgjigjjen e MMPH.

Shefja e deputetëve të LDK-së, Jehona Lushaku Sadriu ia ka bartur përgjegjësinë Lëvizjes Vetëvendosje për gjetjen e zgjidhjes së çështjes së presidentit të vendit.

Pas mbledhjes së kryesisë, ajo ka thënë se i takon partisë me numrin më të madh të votive që të ofrojë zgjidhje për këtë proces.

Sipas saj, afatet kushtetuese janë të qarta dhe duhen veprime intensive për t’i shmangur zgjedhjet e reja.

“Është tepër e rëndësishme që të gjithë ta kuptojmë që Gjykata Kushtetuese ka dhënë afate të qarta dhe për t’i menjanuar zgjedhjet duhet një zgjidhje për t’i dhënë vendit president. Bisedimet duhet të intesifikohen për të gjetur zgjidhje. Barra është e atyre që kanë numrin më të madh të votove. Rreziku është që të shkojmë në zgjedhje, por pa vullnetin e partisë së parë nuk mund t’I jepet zgjidhje kësaj çështjeje”, ka deklaruar ajo.

Shërbimi Spitalor Klinik dhe Universitar i Kosovës njofton për funksionalizimin dhe suksesin e sallës kirurgjikale në Ambulancën Specialistike në Shërbimi Spitalor Klinik dhe Universitar i Kosovës, ku realizohen intervenime kirurgjikale të vogla dhe të mesme në kushte ambulantore, pa pasur nevojë për hospitalizim të pacientëve.

Kjo sallë po mundëson trajtim të shpejtë dhe efikas për pacientët, duke reduktuar ndjeshëm kohën e pritjes dhe duke ofruar kujdes kirurgjikal cilësor. Në këtë njësi kryhen kryesisht ndërhyrje të Klinikës së Kirurgjisë Plastike dhe Rekonstruktive, përfshirë heqjen e lezioneve të lëkurës si nevuset, lipomat dhe kistet, trajtimin e plagëve dhe cikatriceve, si dhe korrigjime të ndryshme rekonstruktive. Të gjitha këto procedura realizohen me anestezion lokal.

Përveç kësaj, salla shërben edhe për klinika të tjera, si Neurokirurgjia, Kirurgjia Torakale, Abdominale dhe Vaskulare, ku kryhen intervenime të vogla si heqja e formacioneve të indeve të buta, trajtimi i plagëve sipërfaqësore dhe procedura diagnostike e terapeutike, përfshirë biopsitë.

E pajisur me teknologji moderne dhe në përputhje me standardet bashkëkohore mjekësore, kjo sallë garanton siguri dhe cilësi të lartë në ofrimin e shërbimeve shëndetësore.

Që nga funksionalizimi i saj, janë realizuar mijëra intervenime kirurgjikale, duke ndihmuar një numër të madh pacientësh. Vetëm gjatë vitit 2025 janë kryer gjithsej 1,548 intervenime, çka dëshmon për rëndësinë dhe efikasitetin e këtij shërbimi në sistemin shëndetësor të vendit.

Kryetarja e Kuvendit, Albulena Haxhiu ka kërkuar nga partitë politike që ta gjejnë një zgjidhje për çështjen e presidentit dhe që vendi të shmangë zgjedhjet e reja.

Pas mbledhjes së kryesisë së Kuvendit, ajo ka thënë se është e gatshme të ndihmojë në këtë proces.

Ajo u ka bërë thirrje subjekteve politike që t’i lënë anash dallimet.

“Si kryetare e kuvendit unë jam e hapur që nëse grupet parlamentare shohin se unë mund të ndihmoj. Unë mirëpres vazhdimin e takimeve që kanë ndodhur së fundmi. Ti lëmë anash të gjitha dallimet dhe ta gjejmë një zgjidhje për president dhe uroj që të mos ndodh që unë si ushtruese e detyrës së presidentes ta caktoj datën e zgjedhjeve. Prandaj, partitë të dëshmojnë vullnet për ta gjetur një zgjidhje për çështjen e presidentit”, ka thënë ajo.

Haxhiu ka folur edhe për ndryshimin e profilit të Zyrës së Presidencës së Kosovës, pasi që ajo ka marrë pozitën e ushtruesës së detyrës.

Ka thënë se qëllimi ka qenë informimi i qytetarëve për aktivitetet dhe se sipas saj, rrjetet sociale duhet të jenë trashëgimi institucionale, e jo të konsiderohen si individuale.

“Më vjen shumë keq për debatet që janë zhvilluar në këtë drejtim, por ju them me përgjegjësi të plotë, por ne nuk kemi kontribuar që debate të shkojë në këtë mënyrë. Me qëllim që ne ti njoftojmë qytetarët jemi detyruar që të hapim faqe të tjera…E di që dikujt ju ka dukur si çështje teknike…Rrjetet sociale nuk janë individuale dhe ato duhet të mesin trashëgimi e institucioneve”, ka thënë tutje ajo.

Shefja e grupit parlamentar e Lëvizjes Vetëvendosje, Arbërie Nagavci është deklaruar rreth çështjes së presidentit pas përfundimit të mbledhjes së Kryesisë së Kuvendit.

Para mediave, ajo tha se kryeministri Albin Kurti po bën gjithçka që është në kompetencë të tij për t’i shmangur zgjedhjet.

“Kryeministri Kurti ka pasur takim me kryetarin e LDK-së, besoj që ai është duke vazhduar angazhimin maksimal të tij si kryetar i VV-së. Besoj që gjatë gjithë këtyre ditëve do të intensifikojë përpjekjet për të gjetur një zgjedhje, dhe presidenti të votohet brenda afatit që ka caktuar Kushtetuesja, jemi të bindur që vendit i duhet një president i zgjedhur në kuvend, zgjedhjet e reja nuk do të sjellin asnjë rezultat tjetër, janë të panevojshme”, deklaroi Nagavci.

“Kryeministri Kurti është duke bërë gjithçka është në mandatin e tij dhe jam e bindur që të do të trajtojë në mënyrën më të përgjegjshme të mundshme, shmangien e zgjedhjeve të reja”.

Sekretarja e Përgjithshme e PDK-së, Vlora Çitaku, ka deklaruar se në mbledhjen e fundit të Kryesisë së Kuvendit ka ndodhur një situatë e paprecedentë, pasi siç tha ajo, nuk është arritur dakordim për rendin e ditës.

Sipas saj, PDK ka proceduar dhe protokolluar një kërkesë për miratimin e një rezolute të veçantë, e cila synon trajtimin e së kaluarës historike dhe të viktimave të luftës së fundit në Kosovë.

“Për ne asnjëherë kjo çështje nuk ka qenë politike. Kujtesa nuk është veç e kaluara, por identiteti. Kujtesa është themeli mbi të cilin ndërtohemi ne si shoqëri e si shtet.

Çitaku tha se partia ka synuar që kjo rezolutë të vijë si tekst i dakorduar mes grupeve parlamentare dhe të votohet në mënyrë unanime.

“E kaluara, kujtesa, lufta e dhimbjet që kemi përjetuar si komb nuk guxojnë të na ndajnë. Këto janë tema rreth secilave ne si shoqëri duhet të kemi konsensus”.

Megjithatë, Çitaku kritikoi përfaqësuesit e VV-së, duke thënë se ka pasur rezistencë të pajustifikueshme që kjo çështje të trajtohet si pikë e parë e rendit të ditës.

Ajo shtoi se, pavarësisht dështimit për miratimin e rendit të ditës në këtë seancë, PDK nuk do të tërhiqet dhe do të kërkojë që rezoluta të trajtohet si prioritet në seancat e ardhshme të Kuvendit

“Kërkesa jonë ishte që kjo çështje të trajtohet si pikë e parë e rendit të ditës, jo si fushëbetejë, do të duhej të trajtohej si pikë e parë. Pati rezistencë të paarsyeshme dhe të pashpjegueshme nga ana e përfaqësuesve të VV-së që kjo pikë të trajtohet si pikë e parë e rendit të ditës. Miratimi i rendit të ditës i mbeti seancës. Ne nuk heqim dorë dhe do të kërkojmë nga seanca që ta trajtojë si pikë të parë të rendit të ditës”, theksoi deputetja e PDK-së.

Instituti Demokratik i Kosovës, ka thënë se projektligji për Byronë kërkon trajtim të kujdesshëm dhe adresim të çështjeve kyçe të ngritura nga Kushtetuesja dhe Komisioni i Venecias.

KDI ka vlerësuar se një reformë e tillë duhet të ndërtohet mbi parime të qarta kushtetuese, siguri juridike dhe respektim të të drejtave themelore.

‘’ KDI ngriti shqetësime për dy çështje thelbësore. Së pari, lidhur me vlefshmërinë kohore të verifikimit të pasurisë, ku përcaktimi i periudhës që nga viti 2008 krijon pasiguri juridike dhe bie ndesh me standardet e vendosura nga Gjykata Kushtetuese, e cila ka theksuar nevojën për një kufizim të arsyeshëm kohor. Së dyti, lidhur me kompetencat për nxjerrjen e legjislacionit sekondar, pasi projektligji i jep Byrosë diskrecion të gjerë për të rregulluar procedura që prekin drejtpërdrejt të drejtat pronësore, çështje këto që duhet të jenë të përcaktuara qartë në vetë ligjin’’, thuhet mes tjerash në komunikatë.

Komunikata:

KDI: Projektligji për Byronë kërkon trajtim të kujdesshëm dhe adresim të çështjeve kyçe të ngritura nga Kushtetuesja dhe Komisioni i Venecias

Instituti Demokratik i Kosovës (KDI) ka mbajtur sot një konferencë për media, ku ka paraqitur qëndrimet e tij lidhur me versionin aktual të Projektligjit për Byronë Shtetërore për Verifikimin dhe Konfiskimin e Pasurisë së Pajustifikueshme, i cili është proceduar për shqyrtim në Kuvend.

Gjatë konferencës, KDI theksoi se forcimi i mekanizmave për konfiskimin e pasurisë së pajustifikueshme është një hap i domosdoshëm në luftën kundër korrupsionit. Megjithatë, një reformë e tillë duhet të ndërtohet mbi parime të qarta kushtetuese, siguri juridike dhe respektim të të drejtave themelore, në mënyrë që të jetë e zbatueshme dhe e qëndrueshme në praktikë.

Ndonëse KDI e përkrah parimisht idenë e konfiskimit civil dhe vetë Byronë si mekanizëm, vlerëson se versioni aktual i projektligjit nuk i adreson në mënyrë të plotë gjetjet e Aktgjykimit të Gjykatës Kushtetuese (KO46/23) dhe rekomandimet e Komisionit të Venecias, duke lënë hapësirë për paqartësi dhe rrezik për cenim të të drejtave kushtetuese.

Në veçanti, KDI ngriti shqetësime për dy çështje thelbësore. Së pari, lidhur me vlefshmërinë kohore të verifikimit të pasurisë, ku përcaktimi i periudhës që nga viti 2008 krijon pasiguri juridike dhe bie ndesh me standardet e vendosura nga Gjykata Kushtetuese, e cila ka theksuar nevojën për një kufizim të arsyeshëm kohor. Së dyti, lidhur me kompetencat për nxjerrjen e legjislacionit sekondar, pasi projektligji i jep Byrosë diskrecion të gjerë për të rregulluar procedura që prekin drejtpërdrejt të drejtat pronësore, çështje këto që duhet të jenë të përcaktuara qartë në vetë ligjin.

Po ashtu, KDI theksoi mungesën e një procesi të mirëfilltë dhe gjithëpërfshirës të konsultimit publik për këtë version të projektligjit, duke vënë në pikëpyetje transparencën dhe legjitimitetin e reformës.

Në këtë kontekst, KDI i ka dërguar një letër të gjithë deputetëve të Kuvendit të Kosovës me qëndrimet dhe rekomandimet për përmirësimin e projektligjit, si dhe së shpejti do të përgatisë dhe publikojë një hulumtim parlamentar për këtë çështje.

KDI i bën thirrje Kuvendit që shqyrtimi i këtij projektligji të shoqërohet me debat të hapur, gjithëpërfshirës dhe të bazuar në standarde kushtetuese dhe evropiane, në mënyrë që të shmangen zgjidhje që mund të rezultojnë të paqëndrueshme apo të kontestueshme në praktikë.